طظ في ذاتك الملكية يا ذات الاربع

سمعة بيقولك لو ما قبلوش الطعن بتاعي حافضح قضايا الرشوة

كانت فين قضايا الرشوة دي؟ وليه اتستر عليها عم سمعة الواد المؤمن؟ وليه بيقول حاضطر اظهرها، لو ما قبلوش الطعن، طب ولو قبلوا الطعن حتسيب المزورين من غير محاسبة؟

واحد من ولاد ابو اسماعيل قالي: ازاي تقولي عليه بيتستر؟ هو فيه قضاء محترم عشان يقدم قضايا الرشوة؟ طيب بما ان مافيش قضاء محترم، ليه بيهدد بإنه يظهرها لو ما قبلوش الطعن؟ والقضاء كان محترم لما رفع قضية على وزارة الداخلية عشان ياخد منها ورقة ان امه ما طلبتش اذن باخذ الجنسية منهم؟ ويضحك على الناس ويفهمهم ان ده دليل على ان امه ما اخدتش الجنسية؟ هو كام واحد بياخد الاذن ده من الداخلية؟ ولما تقولهم ماهو لما اتسأل على اخته قال ناقص يقولوا اختي فرنسية، يقوم يردوا عليك ويقولوا: ماهو قال ناقص يقولوا ان اختي فرنسية ده مش معناه انه انكر انها امريكية!

مالهمش عندي غير الرد ده

والنبي ابويا ده برنس.. برنس البرنسات كمان

اصحىىىىىىىىىىى... كله يصحى

اصحوا بقى.. اصحوا شلتوني

انا مش عارفة ابتدي منين بعد ما اتفرجت على الهذيان بتاع حازم ابو اسماعيل.. وبصراحة بقيت اتحسس مسدسي تجاه نظرية المؤامرة دلوقت (هيييييييه... فيييين ايام ما كنت واخدة توكيل المؤامرة حصري، زمن المؤامرة الجميل، ايام ما كانت المؤامرة ما تطلعش غير مع انجر قهوة وبعديها كوباية شاي اخضر بالنعناع.. دلوقت المؤامرة رطرطت وبقى اي حد يهذي فيها بكلام مش راكب على بعضه) بس في هذا المضمار اللي باتكلم فيه المؤامرة واضحة

مؤامرة خطة اجهاض الثورة المؤجلة من فبراير.. فاكرين؟ لما عمر سليمان قال لنا: جووووووووووو هووووووووووووووووم. واحنا ما رضيناش نجو هوم، بعدين وائل الابراشي طلع في قناة المحور وقال: انا للاسف صدقت كلام مبارك وعمر سليمان وحاولت اقنع الشباب انهم يروحوا وهم رفضوا، بعد 11 فبراير وصلتني معلومات مؤكدة ان كل اللي كانوا في الميدان اتصوروا واحد واحد وان كان فيه خطة لتصفية كل اللي شارك في الثور على مراحل.

الله ينور عليك

مين قال ان الخطة دي اتلغت؟ هي اتأجلت بس، او اتفردت على مدة اطول

1- طبعا اخدوا الاخوان في حتة اسمها المواسير ورا مصنع الكراسي وهم كإخوان انبسطوا وباعونا، وراحوا ساحبين وراهم السلفيين، اللي هم فعلا ما عندهمش اي خبرة سياسية، وقعدوا فترات منعزلين مش بس عن الحياة السياسية، كمان عن الحياة الاجتماعية، هم لهم دوايرهم وقليل قوي لما بيتعاملوا معاملات قريبة مع بقية الناس بسبب المعاملة اللي كانوا بيتعاملوها ايام مبارك

2- دبحوا لهم كام مسيحي، كعادة نظام مبارك، عشان يوسعوا الفجوة

3- استفردوا بينا احنا وهاتك يا ضرب وخزق عينين وقتل وتلفيق قضايا وبهدلة في المحاكم لما بقينا مجهدين فعلا، ومنهكين خالص

دلوقت بقى حان الوقت يتخلصوا من العقدة الكبيرة... العادي في التخلص من الاسلاميين باي ذا بوك زي ما بيقولوا انهم بيتخلصوا من السلفيين الاول لان السلفيين الحلقة الاضعف بسبب اداءهم اللي بيخلي قطاع كبير من الناس ما تتعاطفش معاهم بما فيهم الاسلاميين من تيارات تانية، وان كنت ناسي افكرك بالتسعينيات

اااااااااااه التسعينيات.. وللعودة الى مرحلة التسعينيات الامر يتطلب شخص قلبه ميت وما عندوش ضمير وبيحب يقتل الناس كدهو.. بعد مبارك مافيش الا عمر سليمان

حازم ابو اسماعيل

بص يابني.. "قولا واحدا" على رأيه.. حازم ابو اسماعيل كداب.. طب هو مش عارف انه كداب؟ لا هو عارف

اسمحوا لي بقى اعبر عن نفسي في هوجة نظرية المؤامرة دي واقول بكل ارتياح اني شاكة في الراجل ده وش

هو عارف موضوع الجنسية، دخوله السباق الرئاسي وهو عارف ده ممكن يتفسر على انه هطل، لكن اصراره الرهيب على شعللة الناس وتسخينهم بالشكل ده بيقول حاجة واحدة بس: حازم ابو اسماعيل مزقوق يعمل الازمة دي اللي يعقبها تفجيرات يلبسها السلفيين ونعود لايام التسعينيات تاني

انتوا اتفرجتوا على المؤتمر؟ شفتوا الراجل اللي بيقول بايعوه على الدم؟ شفتوا الاعدام يا مشير؟ 

طيب دي معركة دفاعا عن واحد كداب ومزور ومش حينضم لهم اي حد فيها.. وهم بصراحة انا عارفة ان ما يطلعش منهم لا تفجيرات ولا نيلة دول صوت بس واغلب من الغلب.. دول لما بيتهوروا بيصلوا العشا في الميدان ويروحوا بعدها، واخرهم يكسروا منصة ولا حاجة، مش حيعملوا اكتر من كده، وانا مش عايزة ازعلهم بقى دلوقت خصوصا انهم قربوا يموتوا..بس هم خوافين يعني شوية، ما جراش حاجة، يكون المؤمن جبانا قال نعم.. بس يكون المؤمن كذابا؟ قال لا.. صح؟

هم اغلبهم يا عيني مش مستوعب انه بيدافع عن واحد كداب، هم مصدقينه فعلا، لاسباب كتير مش كلها ان مخهم على قدهم، لان مش طبيعي ان كلهم يبقى مخهم على قدهم، بس هم لهم تراث من الاضطهاد والحصار اللي يخليهم اقرب لتصديق نظرية المؤامرة حتى لو الكلام مش منطقي

فهم حيفضلوا يجعروا كده ومش حيلايموها... وفجأة نلاقي تفجيرات، وطبعا ماحدش متعاطف مع وش امهم خالص في اللي هم بيعملوه ده، فالناس حتبقى اقرب تصدق انهم هم اللي عملوا كده، فحيتلموا

اممممممم... امتى؟

مش عارفة، هل بعد قفل باب الترشح، ولا بعد نجاح عمر سليمان ده بفرض اننا ادينا له فرصة للنجاح

ما اقدرش اتوقع

لكن انا اقدر اتوقع ان فيه حاجات كتير كنت باقول عليها مش ممكن وطلعت ممكن

يعني من سنة كان فيه واد مخبر مزقزوق عليا قال لي.. لا والله من اكتر من سنة كمان، ده قبل 9 مارس، قالي: عمر سليمان هو رئيس مصر القادم

طبعا قعدت ارفس من الضحك واقول شوف الواد الاهبل مش كفاية انه مخبر ومفضوح لا وكمان عامل لي محلل سياسي

اهو عمر سليمان جات له الجرأة انه يترشح.. لا وبيكيدنا وبيترشح بتوكيلات مش عن حزب ولا توكيلات نواب.. وبيقول لنا انا نازل بناء على طلب الجماهير والتمثيلية الفشيخة دي

ييجي واحد يقولي: يا شيخة بطلي عصاب بقى.. عمر سليمان حينجح في الانتخابات؟ هي الناس حتنتخبه؟

ده مثلا على اساس انك واثق في نزاهة الانتخابات؟ اذا كان الاخوان اللي بايتين في حضن المجلس وظبطناهم كذا مرة في اوضاع مخلة بيقولوا لك الانتخابات حتتزور، والمشير قالها صراحة والراجل ده ما بيرجعش في كلامه: الانتخابات مش حتتزور

يبقى حتتزور على طول كده

عمر سليمان كان الخطة البديلة للامريكان والاسرائيليين مش بعد قيام الثورة.. ولكن من سنة 2006 لما كان الجيش لسه مش موافق على توريث جمال مبارك (بالمناسبة قبل ثورة بشوية صغيرين كان خلاص وافقوا ووثائق ويكيليكس بتقول انهم وافقوا.. بس احنا لحقناهم وعملنا ثورة) امريكا كانت عايزة جمال، بس كانت حاطة عمر سليمان "رجل اسرائيل في مصر" كبديل في حال ما اذا لاقى جمال عدم قبول شعبي كبير، نظرا لتقل دمه التاريخي، يعني ايه الكلام ده.. يعني لما امريكا توافق على عمر سليمان سهل جدا الانتخابات تتزور، وهي مش موافقة عليه بس.. دي حتموت عليه، واسرائيل عاملة فرح في الجرايد بتاعتها انه اترشح

حيخش علينا عمر سليمان دخلة انه بيطهر البلد من الارهابيين اللي بيدافعوا عن واحد كداب ومجنون.. وبعدين يسرح على الباقيين. زي ما مبارك عمل بالظبط، هو عمل حاجة تانية غير انه مسك الاسلاميين غسيل ومكوى ولحد ما وصلنا ان سواقين الميكروباص بيهتك عرضهم في الاقسام؟ 

طب ايه بقى؟

بقى حازم ده مزقوق.. وماحدش يقول لي حطي احتمال انه يبقى مجنون.. حط انت الاحتمال ده، من ساعة ما غدر بينا يوم 18 نوفمبر وانا الشك حيقتلني، واللي هو بيعمله ده ما بيعملش حاجة غير انه بيعمل مشكلة بين الاخوان والسلفيين، وعادي برضه الاخوان لهم تاريخ في الندالة مع السلفيين، والسلفيين عندهم مرارة من ساعتها، وبيقدمهم على طبق من فضة للعسكر ولعمر سليمان ياكلهم ويشرب عليهم بيبسي بما لا يخالف شرع الله ويتكرع

ايه الحل؟

الحل انهم يلايموها.. ما اعرفش يلايموها ازاي؟ بس لازم يلايموها

اولا لازم كل الناس تجتمع عشان تقعد مع بعضها وتعرف انها لو فضلت طمعانة كده حنونس كلنا بعض في السجن

معلش.. مش وقت عتاب دلوقت.. نخلص من عمر سليمان والمجلس ونحطهم في السجن بعدين الاخوان بالذات لهم حساب عسير معانا، عشان هم اللي حطونا في الموقف القذر اللي احنا فيه ده لما سابوا المعركة قبل ما تخلص ونزلوا يلموا الغنائم

وما بيتعلموش نازلين انتخابات الرئاسة عشان يتفوا في الطبق لا هم ياكلوا منه ولا غيرهم حياكل منه ويسلموها تسليم مفتاح لعمر سليمان

بس دلوقت.. وانا لا املك الا النصيحة، على الاخوان سحب مرشحهم فورا والتراجع عن طرح اي مرشح اخواني والحشد للي الناس حتتفق عليه، مرشح توافقي اه، بس مش توافقي بين العسكر والاخوان، توافقي بين القوى السياسي الاخرى والاخوان، على حازم ابو اسماعيل، انه يبطل هطل اذا ما كانش مزقوق، واذا كان مزقوق حسبي الله ونعم الوكيل فيه ربنا قادر يبصر الغلابة اللي ماشيين وراه، والبرادعي (البرادعي... الله يمسيك بالخير يا برادعي.. لا عمره كدب علينا كدبة واحدة، ولا خبى علينا حاجة، ولا دلس علينا في حاجة، ولا حاول يمشينا وراه، لدرجة اننا كنا بنتعل منه عشان مش عايز يمشي حد وراه خالص وعمال يقول كل واحد يمشي بدماغه... واخرتها زهد في المنصب وبرنس والله.. برنس، مهما الواحد يختلف معاه ولا يتضايق منه في بعض حركات، انما الراجل ده برنس، ومتربي والله) بس البرادعي معاه كتلة وتوقيعات، وعندنا ابو الفتوح وحمدين وخالد علي، هم دول اللي نعرفهم مع الثورة، وطبعا ايمن نور اتقلش يا عيني، بس معاه كتلة مش بطالة.. كل دوووول، يلموا على بعض، ويعملوا فريق رئاسي محترم من مرشح ونائب والباقيين يتنازلوا، مافيش اي داعي لحازم يخوض معركة خسرانة وحيخوضها لوحده مع مجموعة حتبقى منعزلة وماحدش حيتعاطف معاهم لو اتشنيروا، وسهل يتصدق عليهم اي اعمال عنف بسبب الجعير اللي هم فيه.. زي البرص يبخ في الملح ما يسمش بس يربي عداوة.. ده مثل مصري ما تزعلوش :)، ومافيش اي داعي الاخوان يبقى الطمع عاميهم والغل يملا الشاطر من ابو الفتوح بلا مبرر

المشنقة حتبقى واحدة، واحنا مسيرنا نرجع نتخانق ونشرشح لبعض تاني، بس لما المعركة تخلص، دلوقت مافيش مجال للشرشحة.. حنموت كلنا.. ايه في ايه؟

ملحوظة: انا عارفة ان اغلب الظن الطمع واكل الناس وماحدش حيسمع النصيحة دي.. لكن انا باخلص ضميري عشان اتشنق وانا مرتاحة وحاسة اني عملت اللي عليا، وماحدش يرجع يلومني ويقول لي ما حذرتيناش.. انت السبب.. زي ما بيقعدوا يقولوا لي انت السبب في كل حاجة، وبرضه يمكن تكون، ولو واحد في المية الخطة دي صح، ولما نفضحها يتراجعوا عنها او حتى يأجلوها لحين ما نفكر في حاجة.. يعني ممكن لو جرسنا عمر سليمان يدفعوا بعمرو موسى بداله.. فاحنا بقى ساعتها نتفرغ نجرس عمرو موسى.. كده يعني، ماهو احنا مش لازم نكن عشان هم مش حيكنوا ابدا ويا احنا يا هم

وانا باحذركم تاني اهو.. عمر سليمان خطر ومكانه السجن، وبقالي مدة ماسكاه وكلكم استهزأتوا بيا

بس فيه فرصة نلحق.. يا اما نلبس كلنا

كمان جرأته على الترشح لازم يبقى لها رد في الشارع، فيه واحد اقترح مليونية: لو ما اتجمعتوش في الميدان حتتجمعوا في اللومان.. معا ضد ترشح عمر سليمان

اديني قلت يا رب وخلصت ضميري

عمر سليمان جالكم خبوا عيالكم

بالنوسبة لظباط 8 ابريل وغيرهم

هو فيه غير ظباط 8 ابريل ظباط تانيين نزلوا يوم 27 مايو وماحدش حس بيهم

شوف يابني.. بالنسبة لي انا شايفة ان نزول ظابط الافرول وسط متظاهرين مدنيين تصرف فوق انه احمق، مش شجاع قوي، لان العسكري هو اللي مفروض يحمي المدني مش المدني هو اللي مفروض يحمي عسكري ولابس افرول ونازل من غير سلاح.. ماهو يا تنزل بالافرول والسلاح وتحمي المدنيين بقى ويبقى اسمه انقلاب، يا نازل وسط المدنيين تلبس مدني زيهم عشان ما تعرضهمش للخطر زي ما حصل في 8 ابريل والناس ماتت من تحت راسك

ظباط 8 ابريل لما اتعمل معاهم حوار قالوا نوارة وبلال فضل شككوا فينا، فبلال قال انا ما شككتش فيهم انا ما كنتش عايز انقلاب في الجيش

طيب انا بقى شككت فيهم على فكرة، ولما نزلوا خفت يكون اللي منزلهم المجلس العسكري عشان يعملوا انقلاب زي الضباط الاحرار ويخرجوا المجلس العسكري خروج امن بفلوسه، ولمدة طويلة جدا فضلت حاسة ان المجلس العسكري هو اللي نزلهم، وقلت كده ومش حانكر اي كلام انا قلته 

انا الاول حاقول اوجه اعتراضي - اللي لسه ما انتفتش - على تصرف الظباط اللي بينزلوا بالافرول، وبعدها حاقول انا ليه عايزاهم يخرجوا من السجن ويرجعوا شغلهم كمان، وليه اخترت التوقيت ده اقول فيه انهم لازم يخرجوا من السجن ويرجعوا شغلهم، مش قبل كده

اولا: اوجه الاعتراض

- من حيث اني شكيت فيهم، فالحقيقة ده لسه قائم، من غير ما حد يزعل وينهار عليا، نسبة الشك قلت عن الاول بكتيييييييييير بسبب تعرضهم للسجن لمدة سنة صحيح، بس الشك لسه قائم لاسباب وجيهة، اولها اني ما اعرفهمش والله، وثانيها انهم بيتعمل معاهم حوار في الجرايد وبيعملوا اكاونت على التويتر، قد يكون ده بسبب تسيب وسيبان في الدولة كلها كلنا لامسينه، وقد يكون فيه نسبة من الشك، من حقي احتفظ بيها لنفسي، تالت سبب، ان دول ظباط جيش، الجيوش في كل حتة في الدنيا قائمة على السرية، وانا بطبعي اي حد بيتعامل بسرية باخاف منه، النشطاء كل حاجة معروفة عنهم، حتى تفاصيل حياتهم الخاصة، الجيوش في كل حتة في العالم فيها قدر من السرية. 

ومع ذلك.. انا حاقول اوجه اعتراضي عليهم باعتبار ان مافيش اي نسبة شك فيهم، لان شكوكي الخاصة دي تخصني انا وما ينفعش اسحبها على الناس، كمان ما عنديش اي ادلة تدينهم ولا تشكك فيهم، كلها لها علاقة باني باتخوف من الناس اللي بتشتغل في اجهزة يتسم عملها بالسرية، ودي مخاوف شخصية مش من حقي افرضها على غيري.. لانها ممكن ببساطة تكون عقد نفسية مش حقيقية

فخلينا جميعا نفترض ان اللي نزلوا يوم 8 ابريل دول كلهم نيتهم سليمة 100%، وهدفهم، زي ما قالوا، انهم يوضحوا لطنطاوي ان الجيش مش معاك ضد الثورة

طيب

1- انا مش من حقي اخاف من عبد الناصر جديد ولا ايه؟ يعني لما ينزل ضباط بالافرول وسط المتظاهرين ضد المجلس العسكري، مش ده يعرضنا لخطر ان يبقى فيه ضباط احرار جداد ولا ايه؟ طب الخطر ده مازال قائم لحد دلوقت، ييجي واحد يقولي: هم مش عايزين سلطة ولا عايزين يبقوا ضباط احرار. طب حضرتك واخد بالك ان مصر دولة عسكرية من ايام محمد علي بل من ايام المماليك بل من ايام احمس طارد الهكسوس.. بل من ايام مينا موحد القطرين؟ هو مينا ده كان ايه غير عسكري يعني؟ طيب حضرتك واخد بالك ان زي ما الشعب المصري، وهو شعب عظيم وحبيبي وشرياني وكل حاجة، بس عنده جيش فيتيش زي ما عنده دين فيتيش ولا لا؟

بمعنى، حتى لو الظباط دول ما عندهمش اي نية للسطو على السلطة او تكوين مجلس جيش شبابي بدل المجلس العسكري القائم، مافيش اي احتمال ان الناس تدبسهم يعني؟ مافيش اي احتمال ان الناس تتلم عليهم وتقولهم انقذونا من مجلس الخونة وتنتخبهم من الميدان وتحطهم مكان المجلس؟ وفي الحالة دي يبقى عندنا ضباط احرار جداد وابقى قابلني لو عرفنا نخلص من الحكم العسكري كمان ستين سنة تانيين

على فكرة ولحد دلوقت، لو طلعوا مجموعة من شباب الجيش وقالوا للمجلس العسكري امشي الناس حتقول: هييييييييه... خصوصا بعد الاداء الخزعبلي للاسلاميين، وحتقولهم شيلوا بقى والنبي احنا عايزين نروح

الشيطان شاطر، وعبد الناصر برضه كان شاب ومخلص وطيب وعمل العملية الانتحارية دي واللي كان فيها تهديد على حياته وحياة اصحابه عشان بيحب البلد وعايز يخلص البلد من الخونة، بس السلطة حلوة، والناس عندها قدرة خرافية انها تخلق فرعون، وادي النتيجة، ستين سنة لابسين في القرف اللي احنا فيه ده لما اتشطفنا

بزيادة بقى خريجين حربية.. عايزين واحد خريج معهد لاسلكي

2- والله انا شخصيا لو ظابط جيش حابقى في مأزق لا أحسد عليه... يا اما انفذ اوامر الضرب وابقى باقتل اهلي، يا اما ما انفذش اوامر الضرب وابقى باعمل عصيان، لكن انا لو ظابط جيش، كل اللي اقدر اعمله اني اقول لزمايلي لو جات لنا اوامر ضرب ما احناش ضاربين.. وممكن جدا زمايلي ما يسمعوش كلامي، وممكن يبلغوا عني، وممكن اتعفق من وسط الكتيبة بتاعتي واخد اعدام، وممكن جدا يكون السيناريو اللي باقوله ده حصل مع كذا ضابط جيش واحنا مش عارفين، بس هو البني ادم عايز الاجر من ربنا ولا عايز يعمل استعراض؟ 

انا مش باقول عليهم عايزين يعملوا استعراض، انا باقول ان اللي عملوه ده فيه قدر كبير من الحماقة السياسية، والمخالفة للقواعد العسكرية اللي المفروض انه عنده ولاء لها، ولو لقى نفسه ما عندوش ولاء للقواعد العسكرية دي، وانا شخصيا مش مؤمنة قوي يعني بالقواعد العسكرية هي مش قرآن، يبقى يقلع البدلة العسكرية ويقول مش لاعب يا عم.. دي قواعد فاشية، انما حقيقي مش فاهمة يعني ايه ينزل بالافرول من غير سلاحه عشان يخالف القواعد العسكرية.. ما هو يا يعلن التمرد على القواعد العسكرية، واللي هي طين وقطران بالمناسبة ومش عاجباني، ويقلع الافرول كمان، يا اما نازل يعمل تمرد يبقى يشيل سلاحه ويحمي المدنيين، يا اما من جوه الكتيبة بتاعته يقول مانيش ضارب.. الموقف اللي عملوه مش فاهماه بالمرة... انت شغلتك تحمي المدنيين طالما لابس الافرول

واللي انت عملته انك اتسببت في ضرب المدنيين، وبما انك مش معاك سلاح، فكمان ما عرفتش تحميهم، بل واتحاميت فيهم وهم عزل... طب ده ينفع يابني ده؟

3- اللي حصل في 8 ابريل خلا الضرب يبتدي بدري قوي.. يعني ضرب النار الحي على الناس كان مفروض يتأخر تلات اربع شهور تكون الثورة انجزت شوية على ما هم يبتدوا يتجرأوا ويضربوا نار علينا، تصرف ضباط تمانية ابريل اداهم مبرر انهم يبتدوا ضرب النار الحي بدري، ويبقى عندهم مبرر قدام الناس

4- التصرف اللي عملوه غلط سياسيا لانه بيستغل لحد اللحظة دي من قبل المجلس العسكري، لحد دلوقت المجلس العسكري ماشي يقول: الثوار عايزين يكسروا الجيش ويقسموا الجيش ويعملوا تمرد جوه الجيش، وبيستخدموا اللي حصل في تمانية ابريل وفيه ناس صدقتهم بسبب اللي حصل في تمانية ابريل

5- مش كفاية ان الجيش بيضرب علينا نار؟ ينفع يعني الجيش يضرب على نفسه نار يعني؟ ده ينفع يعني؟ يعني لما ظباط جيش ينزلوا بالافرول وتيجي الاوامر بان الجيش يضرب نار عشان يجيب "المتمردين" (وهم لا متمردين ولا نيلة يا عيني ده غلابة) افرض اتنين من اللي نازلين واحد صاحبه وسط الظباط دول، ولا حتى متعاطف معاهم، راح ضارب نار على اللي بيضرب نار.. يعني يموتوا بعض يعني؟ ينفع اجازف بحاجة زي دي؟ وانت ظابط جيش، وعارف ان ده احتمال وارد.. ينفع تعمل كده يابني؟ ده ينفع يعني؟ 

6- انا عندي مجلس عسكري عواجيز وفاسدين والناس كارهاهم افضل اناحر فيهم ويناحروا فيا لحد ما اخلص منهم، احسن من مجموعة شباب ضباط الناس تبقى منبهرة بيهم واللي يتكلم ضدهم يبقى خاين للوطن.. والنبي والنبي والنبي.. احنا حنعيده تاني؟ حنعيده تاني؟ لا والنننننببببيييييي والنبي والنبي

ده انا عشان اعترض على نزولهم بقيت خاينة للوطن.. امال بقى لو سكت وغيري سكت والحركة اللي عملوها دي نجحت والناس مسكتهم البلد.. كنت اخدت اعدام وسط تصفيق حار من الجماهير الغفيرة

دي بعض اوجه اعتراضي على تحرك ضباط 8 ابريل

طيب... الناس دي لازم تخرج من السجن ولازم ترجع شغلها

واللي باقوله ده مش مخالف لاوجه اعتراضي على تصرفهم ولا مخالف حتى للقواعد ولا القوانين

معلش يعني هم عملوا ايه غير نزق شباب؟

الدنيا ثورة.. والبلد كلها في حالة فوران.. وهم كبني ادمين عاديين من غير البدلة اللي ربنا بلاهم بيها دي، جزء من الشعب المصري ومن حقهم يتظاهروا، وفيه ظباط كتير بيلبسوا مدني وينزلوا المظاهرات، مش بني ادمين يعني ومواطنين ولهم حق يعبروا عن نفسهم؟

اولا: كلهم عيال صغيرة وما عندهمش خبرة سياسية، ومش مفروض يبقى عنده خبرة سياسية، واذا كان هم غلطوا كلنا غلطنا في حاجات تانية كتير، ما عملوش جريمة يعني، عملوا حسابات سياسية غلط، وهم مش مفروض ولا متوقع يبقوا عاملين حسابات سياسية صح، ووالله بقى لو بيعرفوا يعملوا حسابات سياسية صح يبقى هي دي الحاجة اللي تشكك الواحد فيهم بنسبة مية في المية

اذا كان عندي تشكك بنسبة 20% دلوقت بسبب انهم ظباط جيش، فلو كانوا بيعرفوا يحسبوا حسابات سياسية صح وهم في السن ده كنت حاشك فيهم بنسبة 100% واقول علقوهم من ودانهم.. لكن قلة خبرتهم السياسية بتخلي فيه نسبة 80% ان نيتهم سليمة فعلا

ثانيا: هو انا باقول يخرجوا يعملوا حزب؟ انا باقول يخرجوا من السجن ويرجعوا شغلهم وما عادوش يتدخلوا في السياسة تاني.. هم اتعاقبوا بشكل مبالغ فيه على غلطة مصدرها حسن النية بينما المجرم الحقيقي اللي بيقتل الناس ويعريهم بيحكم البلد.. ايه في ايه؟ سنة محبوسين؟ سنة ليه؟ وعمالين يطلعوهم من قضية يدخلوهم في قضية كأنهم جواسيس اسرائيليين

طب هم مش جواسيس لاسرائيل

ولا هم بيوصلوا الغاز لاسرائيل

ولا هم قتلوا المتظاهرين

ولا هم عروا البنات

ولا هم بيشتغلوا لصالح مبارك

ولا هم تحريات عسكرية بتنزل تفشل لنا الاعتصامات عن عمد

ولو هم غلطوا انهم لبسوا الافرول وسط المدنيين، فمش هم اللي ضربوا نار، وكان يقدر الظباط اللي جالهم اوامر بالضرب انهم ما يضربوش، وكان يقدر اللي ادا اوامر بالضرب انه ما يديش اوامر بالضرب، خصوصا انهم اكدوا انهم مش حيضربوا ولاد الكدابة بعدين خدونا على خوانة وضربوا، المقتولين مسئولية اللي قتلهم، مش مسئولية واحد كان لابس لبس غلط في المكان الغلط

انا عايزة افهم هم عملوا ايه عشان يفضلوا يتعاقبوا العقاب ده كله والظباط اللي قتلوا المتظاهرين عمالين ياخدوا في براءات؟

ثم ان اللي خايفين منه ما حصلش.. او على الاقل اللي انا خايفة منه ما حصلش، اللي هو ان الجيش يقتل بعضه او يحصل انقسام في الجيش او يحصل انقلاب عسكري يلبسنا في ضباط احرار تانيين.. طب خلاص مدام ما حصلش هم بيتعاقبوا على ايه دلوقت؟ وليه يتم التنكيل بيهم بالطريقة دي؟ 

يعني حتى لو المجلس العسكري عمال يعذبهم، هو بيعذبهم عشان هربوا ولا عشان فشلوا؟ ده لو حتى نيتهم كانت انقلاب ماهي فشلت.. وهو فيه حد بيعمل انقلاب من غير سلاح؟ 

هم بيعملوا ايه في السجن دلوقت حاليا انا عايزة افهم؟ اللي مكانه السجن فعلا مطلوق علينا واللي مسجون ده بيعمل ايه في السجن دلوقت؟ دول بيعملوا ايه في السجن؟ يا سيدي خرجهم ورجعهم شغلهم وحطهم تحت المراقبة... بعدين بيقولوا اصل فيه تعاطف معاهم في الجيش كبير.. ما طبعا لازم يبقى فيه تعاطف.. هم عملوا حاجة؟ هم عملوا ايه؟ هم فعليا ما عملوش حاجة ابدا.. خالص البتة، نزلوا مظاهرة... نعم؟ ايه؟ طب ما انت نزلت عليهم هبد ورقع ورحت مموت المدنيين ودخلت جبت عيالك وحطيتهم في السجن.. سنة؟ سنة محطوطين في السجن وعمالين يتمرمطوا شوية حبس انفرادي ويطلعوا من قضية يخشوا على قضية؟ ما كفاية بقى.. كلهم صغيرين في السن جدا لسه متخرجين من سنتين تلاتة.. بعدين ده حال جيش يسر عدو ولا حبيب؟

طيب يا سيد ياللي قلت على اللي عرا بنت الناس: اسألوا الظروف

ما حضرتك برضه اسأل الظروف بخصوص ضباط 8 ابريل و27 مايو وسيبهم بقى.. طب سيبوهم وخلوهم يخرجوا من الخدمة ويغوروا من وشكم خالص.. هو انتوا يعني معيشينهم في الاملة؟ يروح انشالله يشتغل بياع الامونيا 

كمان البلد السايب في السايب.. حيعملوا لنا ظبط وربط على دول بالذات يعني؟ اشمعنى دول بالذات يعني اللي مصحصحين لهم وهم اصلا ما عملوش اي حاجة لده كله

بقى البلطجية بيطلعوا يثبتوا الناس في الشارع وهم سايبينهم وناس كل جريمتها انها لبست لبس العيد في مظاهرة يتعذبوا العذاب ده كله؟ وهو لبس الجيش بقى لبس العيد فعلا.. البدلة دي مالهاش اي تلاتين لازمة.. وده اللي كلنا عرفناه دلوقت

انا يوم 8 ابريل كنت لامؤاغزة فاكراه جيش بجد بقى زي الجيوش اللي في الدنيا دي، فلما شفتهم نازلين بالبدلة خفت واتخضيت وقلت الله اكبر انقلاب عسكري من قلب الميدان، ولما لقيتهم طالعين على قناة الجزيرة وكل القنوات الفضائية بتذيع تواجدهم في الميدان، وفجأة لقيت طيارات هليكوبتر فوق راسنا عمالة تطير قلت حنتقصف، واتصلت بالخط الساخن وقلت لهم: انتوا ناويين تضربوا الميدان؟ قالوا لي: لا ما تخافيش.. قلت لهم: ما اخافش ازاي ده الطيارات فوقينا.. قالوا لي: بس مش حنضربكم ما تخافيش... وراحوا ضاربين بالليل، عشان احنا كلنا عارفين يعني ان الجيش صادق وما يقولش كلمة كدب

بس الكلام ده كان يوم 8 ابريل لما كنت بانية تخيلاتي على فيلم ابناء الصمت... لكن بعد عشرة اكتر من سنة كلنا عرفنا ان لا فيه ابناء الصمت ولا نيلة.. دول ابناء الحاج محمد وشركاه للخردوات وتنجيد الكنب.. اتاري العيال كانوا نازلين بالافرول عادي، ماهم عارفين اللي فيها... ده لبس العيد ده... مالوش اي تلاتين لازمة، وبيدربوهم ازاي يعروا البنات ويعملوا بيبي على الشعب

وبناء عليه.. وبعد مرور سنة.. وبعد اكتشافي انا شخصيا ان الجيش مش ابناء الصمت ولا حاجة.. انا شايفة ان دي ناس بتتعاقب على انها لبست لبس العيد في الميدان.. ولازم يخرجوا، ويرجعوا شغلهم.. اللهم الا اذا كانوا هم قرفانين من الشغل في الجيش وعايزين يشوفوا لهم شغلانة تانية ياكلوا منها لقمة حلال، لكن لو عايزين يرجعوا شغلهم يبقى يرجعوه

ومن حقهم انسانيا وقانونيا كمان.. انا عايزة افهم هم تهمتهم ايه بالظبط؟ هم ما عملوش تمرد على فكرة، ولا عملوا انقلاب.. هم لبسوا لبس الظابط وقالوا الشعب يريد تطهير البلاد وما كانش ناقص غير يشيلوا بلالين ويتمرجحوا في الزقازيق.. ايه التهمة بقى؟ معلش ممكن افهم يعني؟

ملحوظة لمهاويس ضباط 8 ابريل (ومعظمهم بنات :) اصل العيال شباب ومزز والبدلة برضه من ايام فيلم المراهقات بتعمل شغل هههههه) انا معترضة عليكم جدا.. لان اصلا اسلوبكم لبست الشباب دول في حيطة، وكلامكم يختلف عن كلامهم هم نفسهم.. يعني هم قالوا احنا مش عايزين نعمل انقلاب احنا نازلين نقول للشعب ان الجيش معاكم.. اللي انتوا بتقولوه انكم محميلينهم اكتر من طاقتهم واللي يهلوس في ان الجيش لازم يعمل انقلاب، واللي يهلوس في ان دول يعملوا مجلس مكان المجلس وتخريف ما بعده تخريف، وهم نفسهم ما قالوش كده، لا ولما كتبت اني مش عايزة انقلاب في الجيش قعدوا يتحسبنوا عليا: منك لله يا نوارة بوظتي انقلاب الجيش.. هههههههههههه يعني احنا بقالنا سنة كلنا بنهطل واهي في بيتها، لكن ما تهطلوش في حاجة ميري عشان الناس دي لبست مصيبة من تحت راسكم، واللي انا شايفاه ان المساندين لضباط تمانية ابريل من المدنيين احد اسباب انهم ما بيخرجوش من السجن لانهم عمالين يحملوهم اراء تخريفية هم مالهمش ذنب فيها، وضحوا ان الشباب دول مش عايزين يعملوا انقلاب وان تصرفهم كان بسبب حماسة شباب للثورة وان لو عايزين يعملوا انقلاب كانوا شالوا سلاح.. مش تلبسوهم في مصيبة، حرام عليكم.. طب انا الكلام ده بيخوفني شخصيا، حالة الجيش فيتيش دي بتوترني.. الظباط المحتجزين يخرجوا ويرجعوا شغلهم وما يتدخلوش في السياسة ولا ظباط جيش ينزلوا بالافرول الميدان تاني ابدا... العملة السودا دي ما تتكررش تاني ابدا، لانها بتدي ايحاءات مش صحيحة.. وخطرة

انا شخصيا مش عايزة ضباط احرار تااااااانيييييييييييييي

والله الموفق والمستعان

الاخوان المسلمون تهنئ الشعب بعيد طهور الثورة و... ترقع بالصوت

الورقة دي نزلها أنس حسن على صفحته على الفيك بوص.. وبصراحة أنا 
مصدقاها.. لاسباب عديدة، اولا ان انس جربته في كذا حاجة وطلع مصدر موثوق، ثانيا اسلوب البيان مشابه لاسلوب الاخوان.. ثالثا.. بصراحة انا عايزة اصدق، لان ده بيديني دعم نفسي كبير.. فانا لما احس ان فيه جماعة بحالها كلهم اهبل مني ده يخليني عندي ثقة في نفسي اكتر، ويدعم نفسيتي المحطمة بعد التعرض لعدد لا بأس به من الجثث

اسمعععععع علك تستفيد

هههههههههههههههههههههههههههههههههههههههههههههههههههههههههههه

احنا حنعيش يا ولاد

على فكرة ما ينفعش كده ابدا والله.. ما ينفعش ثورة اتقدم فيها تضحيات وبلد لها تاريخ زي مصر تضيع عشان اكبر فصيل سياسي فيها طلع اهبل

طب يطلع خاين

يطلع وسخ

يطلع بيكسب من ورا وساخته

انما يطلع اهبل كده حرام والله... حرام فعلا.. وبعدين الواحد لما يبقى اهبل مش عيب.. وانا احب احذر اي انسان هنا في هذا المكان عايز يتريق على الهبل.. الهبل مش عيب.. الهبل اصلا حاجة كويسة والهبل بيخشوا الجنة...... ان شاء الله

لكن قبل كده قلنا وحذرنا، زي المخلوع ما كان بيقول، ان الواحد لما يلاقي نفسه مش فاهم، يبقى يتمسك بالاخلاق... االاخلاق توصل الواحد لنفس النتائج اللي بيوصل لها العقل الذري والله

انما ان الواحد يبقى مخه على قده وكمان يتصرف تصرفات واطية ظنا منه ان الوطيان وانعدام الاخلاق والوساخة هي دي بقى النباهة والذكاء والتكتكة بينتهي بيه الامر انه ينزل بيان "اوعى يغرك جسمك" كالمبين بالشكل

ويا ترى بقى الاخوان امتى اكتشفوا ان المجلس العسكري هو اللي بيختلق الازمات وبعدين يرجع يحلها؟ بس لما قالهم مانيش رامي اليمين على الجنزوري؟

طب هو مش عايز يرمي اليمين على الجنزوري لهدف وساخته تضاهي وساخة هدف الجماعة في اقالة الجنزوري

الجماعة بتستهبل حضرتك.. هم عارفين كويس قوي ان الجنزوري ما بيحكمش الراجل يا عيني، ده اخره ما يغيرش ملابسه لإثبات التضامن مع الضحايا

بس هم حابين يقيلوا الجنزوري، وهم عارفين انه لا بيحل ولا بيربط، عشان يوصلوا للشارع انهم بقى البرلمان الجامد اللي بياخد القرارات وانه شيع لهم الحكومة اللي عاملة لهم ازمة، بصرف النظر بقى الازمة تستمر ولا ما تستمرش دي حاجة حيبقوا يفكروا فيها بعدين.. المهم انهم يقيلوا الجنزوري عشان يكسبوا شعبية في الشارع انهم مشوا للناس الراجل اللي العسكري جابه وعمل مشكلة

فالعسكري قالك الله.. طب وانا اتشتم لوحدي؟ لا حضرتك تتشتم معايا على فكرة يعني.. ومش حتكسب بونط على قفايا

ثم ان المجلس العسكري بيفتعل ازمة البنزين عشان يحسس الناس ان البرلمان مالوش اي تلاتين لازمة.. وده اللي غايظ الاخوان

يعني هو صراع على السلطة
والصراع على السلطة مش معركتي انا شخصيا... انا باتصارع على وطن، وعلى استقلال وطني، وعايزة بلدي تتخلص من النفوذ الامريكي وتتملك مواردها، وبالطريقة دي يرتفع مستوى المواطن المعيشي، ويبقى فيه حرية حقيقية مبنية على عدالة اجتماعية واستقلال وطني

قال وايه؟ قالك المفاجأة: المخابرات العسكرية هي اللي بتدير البلاد وطلعت ماشية في البطال مع الامريكان والاسرائيليين... لا بجد؟ اتفاجئت فشخ... قريت البيان فجأة  تعبت من المفاجعة

واكتشفوا اكتشافات مهولة بقى.. ان المجلس العسكري بيدعم بشار، وان العصار داير يسمع بيهم الاتحاد الاوروبي ويقولهم انتوا حتسيبوها للاسلاميين ازاي؟ وان المجلس العسكري عايز وضع خاص في الدستور، وحاجات جامدة جامدة يعني

وبناء عليه.. قرروا وضع خطة ما تخرش المية

الاستعانة بالله.... ربنا حيسترها مع اتنين قتالين قتلا ازاااااي؟ ده الناس اتدهست بالمدرعات وانتوا قعدتوا تقولوا فلوباتير هو السبب، قعدنا نستغيث بيكم في محمد محمود وانتوا قلتوا على الجثث انها مؤامرة عليكم عشان ما تعملوش الانتخابات، وفوق ده كله بعتوا لنا رسالة: لو صممتوا على مجلس رئاسي مدني يبقى بتدفعوا لحرب اهلية... احنا؟ احنا بنتهدد التهديد ده؟ كتر خيركم يا ولاد الاصول.. ده غير بقى العباية ام كباسين، والمتظاهرين المأجورين، ورحتوا جبتوا لنا السلفيين وقعدتوهم على حجرنا من غير ما تحطوا مشمع وقعدوا يدنوا ويقدموا مشاريع حجب المواقع وتزويج القصر وكلام هلس وفارغ.. وما سألتوش نفسكم اشمعنى النوع ده من السلفيين اللي مطلوقين بالطريقة دي مع ان فيه سلفيين عاقلين، وما سلموش اصحابهم، ولا مضوا عليهم، زي مصطفى حمزة اللي رافض المثول امام المحكمة العسكرية واللي انتوا مطنشينه والمفاجأة ان السلفيين والجهاديين كمان مطنشينه... والمفاجأة التانية بقى ان حزب النور خلع منهم.. وقبل كده ما سألوش نفسهم ليه رئيس حزب الاصالة سلفي ولواء شرطة واخو محمد عبد المقصود في ذات الوقت، وهو صاحب مشروع تزويج القصر.. وما عرفوش يربطوا ده كله بكلام العصار مع الاتحاد الاوروبي عن "امبراطورية الاسلاميين" وما عرفوش يربطوا ده كله بالحركة المريبة بتاعة "جماعة الامر بالمعروف والنهي عن المنكر" اللي اقطع دراعي من لغلوغه ان ما كانت مخابرات 
عسكرية من الالف الى الياء..
ثم.. الله.. وانتوا ايه اللي مزعلكم من كلام العصار والامريكان يا اخوان؟ انتوا مش حتبطلوا بقى؟ مش حتبطلوا.. صح؟
طب خلي الامريكان ينفعوكوا، يعني  هي الخناقة بينكم وبين المجلس على دعم امريكي واوروبي؟
انتوا الاغلبية في البرلمان والناس انتخبتكم وانتوا بعتوا الناس واشتريتوا رضا المجلس العسكري والامريكان وادي النتيجة
وهي دي بقى النباهة انكم تحاولوا تتحالفوا مع الامريكان؟ ليه؟ هي الام بتفضل ابن الجيران على ابنها ولا ايه؟ وقلنا لكم قبل كده مافيش داعي للعب الوسخ مع الامريكان، ده يناقض اهداف الثورة، احنا عايزين استقلال وطني، والامريكان عمرهم ما حيشتروكوا ويبيعوا عسكر كامب ديفيد اللي بيحموا لهم اسرائيل.... البسسسسس يا اخوان عشان نازلين نتفسح يا بابا

النقطة التانية: الثقة في القيادة والدعاء لها

الثقة في القيادة اللي لبستهم في الحيط.. والدعاء لها... حاااااضر... الهي تنسخطوا رجل كنبة يا بعدا

وقالك بقى ايه.. حنفضح المجلس العسكري

هههههههههههههههههههههههه وده لان المجلس العسكري سمعته زي البرلنت والناس كلها بتحبه زي ما احنا عارفين، ماحدش شافه ابدا وهو بيعري ويسحل ويدهس ويعذب ويكشف على عذريات.. الناس بتحبه موت موت موت... 

ومغشوشين فيه... ومستنيين اهل الكهف دول لما ياخدوا حتة هولز ويطيروا ويطلعوا يفضحوا لهم المجلس العسكري

وقالك: التحرك بسرعة: نواب - مؤتمرات - صالونات - حبشتكنات - عشاء عمل - غداء عمل - بيانات - جلاليب - سبح - شوبينج

ونازلين الجمعة الجاية...

واحدة على التويتر مسمية نفسها: سارقة المدرعة قالت دي جمعة "احنا منهارين" فالمنهارين بقى ينزلوا

انا انهارت ايام ماسبيرو ومحمد محمود وخلصت الانهيار خلاص

وقاعدة في بيتنا

مش بس لاني مغلولة وايام محمد محمود لما بعتوا لنا تهديد الحرب الاهلية ده قعدت اعيط وادعي عليهم يشوفوا اللي احنا شايفينه... بس لاني ما عنديش ثقة لا في اخلاقهم ولا مخهم

الواحد يبقى مخه على قده بس يبقى عنده اخلاق... يبقى ما عندوش اخلاق بس عنده مخ.. لكن لا مخ ولا اخلاق؟ ابوسك منين يا بخرا

عندي سؤال والله بس لشباب الاخوان اللي كل ما يشوفوا وشنا يقولوا لنا: انتوا مش عارفين.. اصل فيه مؤامرة.. جهة غير معلومة، بتعمل خطة مجهولة، حتنتج عن مصيبة لا يمكن نتوقعها

احساسهم ايه لما يلاقوا قيادتهم دلوقت بتقولهم كلام بقالنا شهور بنقوله وبسبب الكلام ده اتقال علينا مأجورين وممولين وعملاء وجواسيس وبي فور بانديتا؟

المجلس العسكري خدع الجميع في الاول... لكن مع اول رصاصة ضربها على الناس كلنا عرفنا انه بيخدعنا، الواحد ممكن يعمل مواءمات سياسية من هنا للصبح ومع اي تنازلات.. الا تنازل واحد: الدم. الدم مافيهوش هزار، وانا باعترف اني اتخدعت في المجلس العسكري، لكن الفراق بيني وبين كان اول نقطة دم اهدرها.. خلصت كده، مافيش حاجة لما الواحد يطلع اهبل قلت :).. مش عيب.. العيب ان الواحد ما يبقاش عنده اخلاق ويتحالف مع قاتل... ازاي الاخوان ما عرفوش؟ ولا عرفوا وطنشوا وافتكروا نفسهم ناصحين وبيلعبوا بالبيضة والحجر ويخشوا للمجلس قافية وساخة ولما لقوه غلبهم في الماتش قالوا: ياما..يابا؟

ونحب نقول لكل اخوانجي  واخوانية.. لا  تنحرف.. والوساخة لا تفيد.. واحب اسمع اغنية سيد الهولز يا كتاتني انت

انا ماليش اي صفحات على الفيس بوك

بتاتا...

الاكاونت اللي كان ليا اتهاك وخلاص.. ماليش اي نشاط على الفيس بوك خالص، كل الصفحات اللي باسم نوارة نجم دي فان بيدجز ناس عاملينها مشكورين بس هي مش صفحاتي وانا مش مسئولة عن اي حاجة بتتنشر عليها

نوارة نجم

يا بتاع الغلابة

يا ربنا

الشاعر تميم البرغوثي: رئيسنا واحد شهيد يحكم من التحرير

منصورة يا مصر مش بجميلة العسكر 

إحنا اللى روَّحنا بدرى بس مش أكتر 

قول للى روَّح عشان يرتاح فما ارتاحشى 

الراحة كلِّ ما تستعجلها تِتْأخَّر 

واللى ها ينزل ها يُحكُم لو ما روَّحشى 

قصر الرياسة بْبلاش، بسِّ انتَ مستخسر 

●●● 

قصر الرياسة ما فيش بينك وبينه كتير 

فيه سلك شائك وكيس رملة وكُشْكِ غفير 

لو جيت لوحدك، ها يضرب، والرقاب ها تطير 

وان رحت مليون، ها يهرب، وانتَ تبقى أمير 

رئيسنا واحد شهيد، يحكُم من التحرير 

قصر الرياسة الجديد بِصينِيَّة ومدوَّر 

●●● 

منصورة يا مصر بجميلة خيام الخيش 

بيحرقوها عشان تمشى ولا تمشيش 

يا مصر عُمْرِ ما فيه ثورة تقوم بِشْوِيش 

المُلك ده اللى ادِّتيه للعسكرى بقشيش 

حقّ العيال اللى ماتوا فى طابور العيش 

وبنت عَرّوها فى الشارع وشيخ أزهر 

●●● 

يا حاجّة ياللى بتقرى الكفّ والفناجيل 

إقرى وشوش البشر، ع النصر تلقى دليل 

ده حقنا ف مصر مش ها نسيبه للتساهيل 

وان قلتى نصبر يومين، يبقى ها نصبر جيل 

أجلنا قبل كدة فادنا بإيه التأجيل 

رَمْيِ الجُثَثْ فى الزبالة فى الضُّحَى الأحمر 

●●● 

منصورة يا مصر بجميلة ولاد وبنات 

بجميلة اللى انحبس بجميلة اللى مات 

بجميلة التريَقَة والضحك فى الأَزَمات 

ودم فوق الرصيف ناقش سُوَر وآيات 

يا مصر ياللى انتصرتى فْ جُمعِتين وِتَلات 

نفس العَدُو هُوَّه هُوَّه بَسِّ متنكَّر 

●●● 

الصبح طالع لِقِى دبابة فوق راسُه 

مربَّعة فوق دماغُه وكاتمة أنفاسُه 

والشرق مقفول وخِتْمِ النِّسر ترباسُه 

قام خبَّا شمسُه ووزَّعها على ناسُه 

على العيال اللى ماتوا غدر وانداسوا 

بقى شرق فى كل جسم، وشمس بتنوَّر 

●●● 

الشعب واقف وصدره للرصاص عريان 

والدولة خايفة ولافَّة نفسها ف جدران 

وزى ما الحاوى ممكن يلدغُه التعبان 

شوفوا حيطان السجون بتلفّ ع السجان 

والفالح اللى بيتهوَّر على النسوان 

ما شفناهوش ع الحدود يا ناس بيتهوَّر 

●●●

كان للفراعنة إله قرد وإله تمساح 

وللإله كهنة وعسكر يقف بسلاح 

وخزنة متقفِّلة بالضبة والمفتاح 

وقصر يشبه قصور الجمهورية براح 

يا عينى ع الآلهة بقوا فرجة للسياح 

ياللى بنسر وسيفين فرحان ومتكبَّر 

●●● 

الشمس تُدعى الغزالة فى اللغة فاعلم 

وبالغزالة المضيئة فى السما باحلم 

غزالة ممكن تبيِّن طبعها الوحشي 

ما تغرّكمش الأسامى ورقِّة المبسم 

دى شمس واللى يِقَيِّدها ما يفلحشي 

ومصر حالفة، ها تتحرر، هاتتحرر 

----------------

يا رب تعيش الف سنة يا تميم

بالنسبة لحملة الارهاب

انا نمت ست ساعات صحيت لقيت الناس كلها بتتكلم عن 100 بنت محتجزين في مجلس الشعب وبيتم اغتصابهم!

مين اللي ورا الكلام ده، واحد اسمه حسام عامر.. اللي ان شاء الله لما اشوفه حانسل كل ما يلبس في القدم على دماغ امه ولو راجل يوريني وشه، حيث انه زمان كان كتب عليا نوت ان انا معمول عليا كنترول وحلف بالله.. والله العظيم حلف بالله، انه شاف بنفسه الصور المخلة بالاداب اللي ممسوكة عليا من المخابرات.. ومافيش حد صدق على كلامه ونشر كلامه غير اتنين: ايمان بدوي وواحدة اسمها نورهان رمضان، وان شاء الله ربنا يوري ايمان بدوي دي في بنتها، حيث انها واكلة معايا عيش وملح، ومش حادعي على نورهان رمضان لان ربنا مش حيعمل فيها اكتر من اللي عامله في مخها وقال ايه الصور دي متاخدة لي مع واحد اسمه م ج.. وكل اللي يخش يقرا النوت بتاعته يضحك... 

:D

بتضحكوا على ايه يا مجرم انت وهو :)))) لعلمكم انا مخلة ومن زمان، وعملت في خلل علامات.. الخلاصة يعني الناس دخلت قالت له يعني انت مخابرات؟ ولا انت م ج ولا ايه بالظبط؟ ما هو يا نوارة اللي قالت لك وده مش ممكن، يا المخابرات اللي قالت لك وده معناه انك مخابرات.. وموضوع ان ماحدش شك فيا خالص دي عمل لي عقدة نفسية ههههههههههههههههه مش شاكين في سلوكي ليه؟ انا رحت على اكاونت حسام عامر ده عشان اطلع النوت بتاعته اللي كتبها عني ولقيته شالها... بس برضه لو شفته حانسل الجزمة والصندل على دماغ اللي جابوه..

طيب.. لو انا صديقة م ج ومعمول عليا كنترول يبقى فيه 100 بنت في مجلس الشعب بيغتصبوا

انا مش باستبعد عن المجلس العسكري والجيش انهم يعملوا كده واوسخ من كده كمان، هو فيه اوسخ من انهم يقلعوا بنت في الشارع؟ بس الاخ اللي مطلع على المخابرات وبيقسم بالله انه شاف صوري المخلة (انا بس ما غاظنيش في النوت دي غير انه قال ان الصور المخلة دي اتاخدت لي في عربية... اخصصصصص.. انا عربية؟ ليه؟ عربية ايه؟ ايه الجربوع ده؟ يعني يوم ما اقرر انحرف انحرف مع واحد مش لاقي يأجر اودة في اوتيل تلات نجوم؟ يعني مطلعني جربوعة كمان؟ طب مخلة قشطة.. الصيت ولا الغنا.. لكن جربوعة لا.. جربوعة لا.. ده ناقص يقول اني حاطة مانيكير مقشر من غسيل المواعين.. المانيكير المنقط احمر فابيض ده، عارفينه؟ ولابسة التحجيبة ام ترتر وحاطة روج احمر محدداه بقلم نبيتي.. كمان اتغاظت لما العيال قعدوا يقروا النوت ويضحكوا ولاد اللذين لا وكمان يشيروها على انها نكتة ههههههههههه)

طب حيث انك راجل مطلع على المخابرات يا ريت تقول لنا يعني ازاي العساكر يقولوا لواحد معدي كده ان الصناديق دي فيها جثة بنتين ماتوا من كتر الاغتصاب؟

حاجة من الاتنين.. يا اما الكلام ده صحيح، وفي الحالة دي الواد ده مخابرات، يا اما الكلام ده مش صحيح وفي الحالة دي الواد ده مخابرات برضه... او فتاي.. او مخبول.. لان الغرض من الكلام ده هو تخويف البنات انها تنزل، وانا شايفة ان الجيش بيبذل جهد كبير عشان يخوف البنات انها تنزل، ليه عايز يخوف البنات؟ عشان الرجالة ما بيخافوش على حاجة غير الستات.. فمش بس مش حينزل امه ومراته واخته وبنته، ده هو كمان ممكن يخاف ينزل لبعدين يتقبض عليه ويتعمل حاجة في حريمه.. ده تصور العسكري يعني، غالبا تصور غلط لانه عادة متخلف عقليا ومش بيفهم حاجة في حياته، الناس حتنزل اكتر على فكرة 

انا مش باقول المعلومات صحيحة ولا مش صحيحة، انا بس باسأل كام سؤال

فيه 100 في مجلس الشعب.. مافيش 5 منهم لهم اهل يسألوا عليهم؟ مافيش اسرة واحدة من الخمسة دول عرفوا يوصلوا للتلفزيون؟ انا بقالي يومين باسمع كلام مرسل عن فظائع بترتكب في مجلس الشعب

اللي انا اقدر اصدقه بشكل كبير ان فيه عدد غير معلوم محتجز في مجلس الشعب واكيد بيعذبوهم، امال يعني بيآنسوهم؟ فيه بنات ولا لا؟ ما اعرفش.. ممكن آه ممكن لا.. بس 100 دي واسعة قوي.. فيه اغتصاب ولا لا.. برضه وارد، الجيش اللي يقلع البنات ويكشف على عذريتهم وارد يعمل كده، لكن مش اكيد.. ووارد جدا ما يعملش كده عشان هو مش عايز فضايح اكتر من كده كمان

الخلاصة، عشان مصداقيتنا، وعشان ما يبقاش شكلنا وحش قدام الناس، وعشان ما يبانش اننا ظياطين وبنقول كلام مرسل ما نروجش كلام احنا ما نعرفوش ومش متأكدين منه، ونعقل الكلام، واللي يقول كلام زي ده يقول انا مستعد اشهد

يعني اللي شاف صندوقين فيه ميتين، ما صورش ليه؟ ممكن يبقى معاه تليفون معفن.. طيب، يروح يقدم بلاغ، انا عارفة ان البلاغ ده نبله ونشرب ميته، بس ده تأكيدا لصدق اللي شافه عشان لما نعمل حملة ونقعد نروج لكلام يرعب البنات والاهالي بالطريقة دي نبقى حاسين اننا مركونين على شهادة واحد اتخذ كل الاجراءات اللي تخلينا ما نكدبوش

وبرضه انا ما اصدقش واحد زي ده.. مش بس عشان قال عليا الكلام ده بس عشان متخلف عقليا ومش عارف يألف كدبة محترمة تتصدق وبس ما نابنيش غبر الناس تشاور عليا وهي بتتشقلب على ضهرها من الضحك: هاهاهاااااع مخلة مخلة.. واستلموني بقى: صباح الخير يا م ج.. ازي م ج يا نوارة؟ بيقولوا م ج بيبعت لك كلمني شكرا او بيكلمك من خدمة "ادفع لي شكرا".. هي العربية نوعها ايه؟ 127 بيضا؟ انت بقالك شوية مش على التويتر.. اوعي تكوني نزلتي تقابلي م ج

نستنى ونشوف على الاقل واحدة منهم تخرج لو فيه او اي حد من المعتقلين نعرف نوصل له باي طريقة.. ما هو لو حاجة زي دي ربنا مش حيسيبهم، ده ربنا كبير قوي وحيوصلنا لهم

وبرضه ما بنخافش.. ومش حيحصل لنا غير المكتوب

واي حد ضد العسكر خصوصا البنات والشباب اللي بيواجهو في الصفوف الاولانية يقروا ده

الحلقة الجديدة والاروع من توك شوز

دعاء بقت بتعمل حلقات توك شوز على الانترنت 

خوطة المجلس الكتشيتة... فسسسسسسسسسسسسسسسسسسسسسسسسسسسسسس

الا فاكرين البوست اللي كتبت فيه ان عندي احاسيس ومشاعرين عبارة عن هلاوس سمعية وبصرية بتخيل لي ان المجلس العسكري لمن يلاقي الطخط عليه بالجامد قوي يقوم يعمل انقلاب عسكري على نفسه؟ قال ايه؟ قال اه... قال طلع الموضوع ده صحيح فعلا وطلعت ان انا - مدد مولانا الحسين - قلبي حس، انتوا عارفين بقى زمان ايام ما كان المجلس مغرغر بيا كنت باحبه، واللي يحب ما يكرهش يا ولاد.. برضك قلبي بيحس بيه لمن ييجي يعمل شقاوة

صلي ع النبي

عليه افضل الصلاة والسلام

شششووووووف يابني... بقى انا بقالي فترة كده شامة ريحة مش تمام في الاعتصامين، خصوصا ان كلنا عارفين ان اعتصام التحرير مليان تحريات عسكرية، بيبقوا جامدين اخر حاجة... الاكثر ثورية على الاطلاق، ولا الحاج اسماعيل اللي دايما يرجع في كلامه في فيلم مطب صناعي.. اللي حصل منهم كالآتي:

اولا: في اثناء معركة محمد محمود فيه شخصن ما جه كده وقال لفرسان محمد محمود: انا معايا سلاح... نستخدمه؟ قام قالوا له: شكرام يا حاج.. احنا شغالين بالطوب والمولوتوف ومتشكرين على كده احنا مش وش ذلك ولا ذلك وش وخدوه من ايده طلعوه برة وقالوا له خالتي بتسلم عليك وبتقولك ما تجيش هنا تاني ولو شفت خلقة امك ولا اي حد من طرفك حنظبطك.. وامنوا المكان - في عز ما هم بيتقتلوا - عشان يضمنوا ان ماحدش بسلاح يخش لهم

ثانيا: دايرين بقى العيال التحريات.. اللي انا عارفة انهم تحريات وربنا، عمالين يقولوا للناس: كده مش حينفع.. احنا لازم نشيل سلاح هههههههههههههههه وطبعا انتوا عارفين الشيعب بتاعنا: ايه؟ غور يالا من هنا.. اعوذ بالله من الشيطان الرجيم... بس بقى فيه حاجة وحشة، قصاد كل واحد تحريات عسكرية فيه عشرة معاتيه قدامه، ما بيبقوش تحريات ولا حاجة يا عيني، بيبقوا مهاطيل، زي المهاطيل اللي كانوا بيقولوا: وماله لما يعملوا انقلاب عسكري.. شباب الجيش الطاهر النضيف الشريف العفيف.. تقول له: يعني انت عايز عبد الناصر تاني؟ يقول لك: لأ... لأ طبعا.. (حتى اللي بيحبوا عبد الناصر شايفين ان النموذج مش مناسب للتوقيت بتاعنا) قوم تقول له: ما هو كده.. قوم يقولك: ااااااه.... تصدق؟ صح وربنا.. وربنا صح... انت مخك ذري والله، ماهو الواحد بيحب المشورة عشان كده

اهم برضه نفس العيال المهاطيل يروحوا يكروا نفس الكلام: خالتك سلمية ماتت.. احنا لازم نشيل سلاح.. تقول له: تعالى يابني.. تعالى.. انت عايز فترة تسعينيات تاني؟ قوم يقول لك: ازاي يعني؟ (طبعا عشان هو ما كانش اتولد اصلا، او حتى كان في اللفة) قوم تقول له: ماهو مع اول خمس عيال حيشيلوا آلي الجيش حيعلن الاحكام العرفية والناس حتقول له عداك العيب يابو رحاب.. افرم ما ترحمش، وده اللي حصل في التسعينيات بالظبط، كان فيه تواطؤ شعبي مع القتل في الشارع وانتهاك حقوق الانسان والطوارئ والتعذيب وتقول لهم: حرام عليكم.. يقولوا لك: ولاد وسخة ارهابيين.. هو يا ياخدوا الحكم بالعافية يا يشيلوا علينا سلاح ويعملوا لنا حرب اهلية؟ يولعوا بجاز وسخ.. يتعذبوا ويطلع ميتين ابوهم كمان.. 

كده.. ده كان رأي الشارع المصري على فكرة.. وفي احيان كتير مبارك كان بياكل نفسه قبل ما حد ياكله، يعني كان بيعمل تفجيرات لنفسه عشان يلم ناس كتير والناس تقول له: راجل يا حسام.. لحد ما الشرطة توحشت وبطلت تعذب في الجماعات الاسلامية بس وبقت تعذب في سواقين الميكروباص وبعدين ابتدت تعذب في شباب الطبقة المتوسطة وبعدين ما بقاش لها كبير ولو كانت استنت شوية كانت عذبت مبارك.. يا ريتنا استنينا شوية

الخوف بقى ان المجلس العسكري يقرر ياكل نفسه قبل ما حد ياكله

قبل اي حاجة احنا لازم نعرف ايه السلمية وايه اللي مش سلمية وايه هي الثورة وايه اللي مش ثورة وامتى الثورة بتحتاج تشيل سلاح:

الثورة السلمية هي اي عمل ثوري يهدف الى اسقاط النظام القائم بدون اللجوء لاي اساليب عسكرية

بمعنى، اللي بيحدف بالطوب والمولوتوف قصاد واحد بيضربه بالرصاص الحي دي اسمها مقاومة سلمية، لان مافيش اي عمل عسكري في اللي هو بيعمله، يعني لما انت تخنقني اقوم اقرص دراعك عشان اشيله من رقبتي يبقى احنا الاتنين زي بعض؟ يعني انتفاضة الحجارة كانت ارهاب؟ انتفاضة الحجارة بالاجماع العالمي انتفاضة سلمية... ماحدش وصفها بانها عمل عسكري ابدا، ولا حتى القلل المنتحرة اللي دايما بتطالب الطرفين بضبط النفس

الشخص اللي بيقتحم القسم وهو مش شايل سلاح بهدف ثوري ده اسمه عمل ثوري سلمي، هو ما دخلش بالآلي على اللي في القسم وقتلهم، هم مجموعة من الثوار اقتحموا الاقسام اللي بتمثل بالنسبة لهم غرف تعذيب المواطنين بالظبط زي ما ثوار فرنسا اقتحموا سجن الباستيل... يعني اللي اقتحموا سجن الباستيل بلطجية؟ ما كانوش شايلين سلاح معاهم، وكذلك اللي اقتحموا الاقسام وامن الدولة ما شالوش سلاح معاهم، مافيش اي تحرك عسكري في اللي عملوه، ده تحرك ثوري سلمي

وطول ما فيه تحرك جماهيري من غير سلاح - في اي اتجاه - ضد النظام الحاكم دي اسمها ثورة سلمية.. امتى بتبقى مش سلمية لما بتلجأ لأساليب عسكرية

اول ما تشيل سلاح كده ما بقتش سلمية... وما بقتش ثورة كمان، بقت حرب اهلية

امتى الثوار بيحتاجوا يشيلوا سلاح، او بيحسوا انهم محتاجينه، لما ما يبقاش فيه اجماع شعبي على الثورة دي، جزء من الشعب عامل ثورة والجزء التاني يا اما عامل عبيط يا اما مع النظام القائم.. وفي الحالة دي الثوار بيشيلوا سلاح وفي الحالة دي اه بيبقوا بلطجية طبعا... هو بالعافية؟ انت اخترت تعمل ثورة ونزلت دفعت التمن، نص الشعب التاني طلع بيحب النظام القائم، ولا مستفيد منه، ولا حتى ندل وجبان يا سيدي، تقوم تشيل عليه سلاح؟ دي اسمها بلطجة بقى، ولو هو مساند للنظام حيشيل سلاح هو كمان، وتبقى حرب اهلية

الخطة الامريكية المكررة المحفوظة: ما عرفتش تقمع الثورة اعمل حرب اهلية... كلهم بيسمعوا الكلام في الموضوع ده، ما عرفوش يسمعوا الكلام بدري عندنا عشان ثورتنا عليها اجماع شعبي

لما ينزل عشرين مليون في ثورة دي مشاركة كبيرة جدا جدا جدا

لما الناس انضربت في محمد محمود الميدان بقى فيه مليونية كل يوم من غير كل القوى السياسية اللي استخبت تحت الترابيزة وخذلتنا... ده اسمه اجماع شعبي

وهنا بيت القصيد.. آن آن آآآآآآآآن

بقى المجلس نجح بمساعدة التيارات السياسية انه يفضل في الحكم، وهو عازم على البقاء في الحكم، حكاية انه خايف ملفاته تتفتح والكلام ده، ده كان زمان...... دلوقت هو عايز يفضل في الحكم.. انتوا عارفين كرسي عرش مصر عليه عسل وغرا الاتنين مع بعض، وكمان اتورط في دم، يعني لو خرج فيها رقبته.. يخرج ليه بقى؟ لا لازم يفضل

طبعا التيارات السياسية ساعدته انه يحبط الموجة التانية من الثورة وما يمشيش، لكن هو مش حمار بقى زي الراجل اللي فات، او بالاحرى، اللي بيديله المعونة مش حمار وهو بيسمع الكلام مش عندي زي الراجل اللي فات، هو عارف انه خلاص اتكره، واذا كانت دي فشلت عشان ما حدش لقي بسرعة بديل للمجلس العسكري وراح شاقطنا بموضوع الاسنتخابات ده، فهو خلاص.. ماحدش بقى طايقه، وهو عارف ان ماحدش بقى طايقه، والناس مرقدة له، واذا ما عرفوش يمشوه المرة دي حيمشوه المرة الجاية.. طب وهو حيستنى المرة الجاية؟ خمس عيال بآلي وخلص الليلة

خمس عيال بآلي اغلبهم - ان لم يكن كلهم - عيال من المعاتيه اللي بيسلموا ودنهم لبتوع التحريات العسكرية.. ثوار التحريات العسكرية الاكثر مزايدة على الاطلاق... مش حتقدر تغمض عينيك

ايه الدليل على اللي انا باقوله... الدليل (بخلاف ان بتوع التحريات العسكرية هم بالتحديد اللي عمالين يتكلموا عن السلاح وليبيا والكلام الفارغ ده) هو المجالس اللي هو عمال يخترع لنا فيها

مجلس الشعب بدون صلاحيات... طب كده مجلس الشعب ممكن يتخانق معاه، قوم لما يتخانق معاه الناس اللي راحت انتخبت مجلس الشعب ما حتصدق تنزل له: ارحل يا عم.. احنا مش قلنا لك كده المرة اللي فاتت؟ طب خلاص، نجيب له مواطنين شرفاء في مجلس استشاري يتخانقوا معاه، وبما ان مجلس الشعب الاندال هم اللي حصلوا فيه على الاغلبية فما حيصدقوا يفشوا غلهم في حد تاني غير العسكري احسن العسكري ده بيضرب جامد.. حلوة حكاية المجلس الاشتشاري دي نمسك في خناقة ويمسك في خناقنا بالادب.. مجلس الوزرا اسمه ايه ده اللواء الجديد.. عبد الحق باين؟ فيه شخصما كتشيت كده ظهر في الافاق قال: صلاحيات الجنزوري مطلقة.... زي صلاحيات شرف بالظبط.. واهو الحاج ابو صلاحيات ده، اسم الله على مقامه حيفضل مشغول بالبت صلاحيات يشورها ويجهزها عشان احنا نتخانق معاه على الداخلية والاسعار وسوء الاحوال المعيشية والمحاكمات وخلافه.. والمجلس العسكري بيحرك كل الاطراف من خلف ستار لانه عارف ان ماحدش طايقه ولازم يغور من وشنا الساعة دي، فهو حيحط برقع بس... لكن برضه، ليه نسيب حاجة للظروف؟ ماهم الناس دي اصلها تلف تلف وتروح ماسكة فينا وهاتك يا شتيمة فيك يا مجلس يا عسكري، نقولهم طب نجيب لكم عنان يقولوا لنا إلأ إلأ.. نقول لهم طب اهو الجنزوري يقولوا لنا إلأ إلأ.. امشي امشي امشي... وانا مش عايز امشي.. لو اتزنقت حاعملها حرب اهلية بقى واللي يحصل يحصل.. بشكل محدود، زي عمليات مبارك المحدودة بخصوص الارهاب وزي عمليات المجلس العسكري نفسه المحدودة بخصوص الكنائس والفتن الطائفية، قوم الناس تقول: في عرضك خليك قاعد

وبهذا يا اصدقائي الصغار، اذا ما نفعتش الخناقة السياسية تنفع الخناقة ام خمسة آلي المهم يسيبونا قاعدين والنبي والنبي والنبي.. اصل الكرسي حلو وهزاز

وبرضه نحفظ خط الرجعة ونقول ينكن تطلع تخاريف غاز... بس برضه اهو الواحد يعمل فضيحة شبه الفضيحة بتاعة المرة اللي فاتت قوم لو عقلهم وزهم على الكلام ده يعرفوا ان احنا كاشفينهم وحافظينهم وعاجنينهم وخابزينهم ومش واكلين من الاعيبهم.. حسكم عينكم تلعبوا باليح... اوعى اوعى.. مافيش لعب باليح احسن نلسعك ونجيب لك واوا.. وحنقفشك برضه وانت مستخبي ورا الستارة.. بخ

ومافيش عيال عبيطة حتسمع كلام التحريات العسكرية، هم عبط اه.. بس من كتر طبيتهم، وبيحبوا البلد اكتر منك يا طنطاوي واكتر من امهاتهم كمان

مافيش حد فيهم عايز لبلده حرب اهليه.. ولا حد فيهم عايز لبلده انقلاب عسكري ولا انشقاق مسلح... احنا شعب فلة.. انتوا اللي مالكوش في الفلة نصيب

المجد للشهداء

كلمني مالك عدلي وقال لي ان اسماء محفوظ اتصلت بيه وطلبت منه اننا نعمل مجموعة عمل لحصر كل اسماء الشهداء بالكامل، واستشهدوا ازاي، وحالتهم الاجتماعية، واسرهم، يعني نعمل حاجة زي بيبلوجرافيا لشهداء محمد محمود وشهداء مصر من يوم 25 يناير، طبعا تحمست للفكرة جدا واجتمعنا وحضر عدد من الشباب اللي متحمسين للفكرة وقررنا اننا الاول نحط تعريف للشهداء وهو كل من قتل على ايد النظام في احداث الثورة، سواء كان بيتظاهر، او بيقوم بعمل ثوري زي اقتحام الاقسام (لو اقتحام الاقسام عمل بلطجة يبقى اقتحام سجن الباستيل في الثورة الفرنسية كان بلطجة.. الحقيقة تبقى الثورة الفرنسية كلها عبارة عن عمل بلطجة من اوله لاخره)، او قاعد لا بيه ولا عليه واتقتل من النظام زي المساجين اللي اتقتلوا اثناء عملية فتح السجون، او واحد ماشي في الشارع ومش بيتظاهر ولا بيعمل حاجة واتقتل من غير ذنب. 

احنا ابتدينا من الآخر للأول، يعني بنحاول نجمع اسماء شهداء محمد محمود، ما عرفناش نوصل غير لسبعة وخمسين اسم، المستشفيات الميدانية في ميدان التحرير بتقول انها طلعت 88 جثمان، وفيه مستشفى ميداني بتقول انها طلعت 27 شهيد الاسعاف اخدتهم ومش عارفين ودتهم فين، لا وصلوا المشرحة ولا راحوا اي مستشفى، ده غير الجثامين اللي كان الامن بيسحبها اثناء معركة محمد محمود، حاولنا نتحصل على اسماء الشهداء من مصلحة الطب الشرعي فحدث الآتي:

اسماء محفوظ راحت مصلحة الطب الشرعي عشان تطلب الاسماء فدخلوها على واحدة اسمها ماجدة قالت لها: انت جاية تسألي على الـ980 جثة انا عارفة.. بس انا ما عنديش غير 43 بس، بيقولوا عليا اني مع المجلس العسكري، بس انا مش مع المجلس انا مع شغلي. اسماء قالت لها: انا مش جاية اسأل على الـ980 جثة انا جاية اطلب قائمة باسماء التلاتة واربعين دول، فقالت لها: طيب فين اذن النيابة؟ فاسماء قالت لها: لا انا جاية اطلبها ودي كده، فقالت لها: يعني عايزة تديني رشوة؟ فاسماء قالت لها: انا جبت سيرة رشوة؟ فالست ماجدة قالت لها: انتوا مش عملتوا ثورة وعايزين البلد تمشي صح؟ هاتي اذن نيابة.. ولعلمك مش كل التلاتة واربعين دول شهدا، احنا اتخانقنا مع اهالي عشان عيالهم كانوا ميتين في حاجات تانية في نفس اليوم وعايزين يحسبوهم شهدا، والتلاتة واربعين دول فيهم اشكال بلطجية ما يجيبوش شهدا خالص...

واخيرا ادتها رقم لدكتور في الطب الشرعي عشان يقولها على الاجراءات اللي تجيب بيها الاسماء، ولما اسماء سألتها هو حضرتك اسمك ماجدة ايه؟ قالت لها اعملي سيرش على اسم ماجدة الطب الشرعي وانت تعرفي كل حاجة عني ما انتوا بتهاجموني في الجرايد 

ههههههههههههههههه لا الحقيقة الست ما تستاهلش الهجوم ولا حاجة.. دي فلة، بتشتم ناس ميتين بطلق ناري وتقول عليهم اشكال، شكل الميتين مش عاجب الست ماجدة

بس فيه نقطة مهمة في كلام الاستاذة ماجدة، ان فعلا فيه شهداء وهي ما رضتش تكتبهم شهداء عشان شكلهم مش عاجبها، هي اللي قالت انها اتخانقت مع الاهالي واتهمتهم انهم بيدعوا ان عيالهم مقتولين في محمد محمود... معلش يعني واحد جايب جتتة ابنه مضروبة بالنار، تفتكر يعني حيقعد يخطط انه يكتبه مقتول في مكان غير المكان اللي اتقتل فيه؟ هو في ايه ولا في ايه؟ وايه المصلحة؟ اهالي شهداء محمد محمود كلهم خاضعين للتهديد دلوقت، والناس خايفة جدا لان حاسة ان مدام اللي قتل عيالها جيش يبقى مافيش امل ياخدوا حق ولا باطل، والناس كلها عارفة كده؟ فيه حد حيجيب المشاكل لنفسه؟ دول ما رضيوش يطلعوا جنازات عيالهم من التحرير من كتر ما هم خايفين، لو فيه حد من الاهالي حاول يزور يبقى حيحاول يكتب ان ابنه ماماتش في التحرير عشان يخلص من وجع الدماغ والتهديدات اليومية، مش العكس، انما الاستاذة ماجدة بتقول انها ما رضتش تكتب البلطجية شهداء وده معناه ان الجثة اللي شكلها مش شيك الست ماجدة ما كانتش بترضى تكتبهم شهداء.. وعلى رأي عمرو مصطفى: باعترافهم باعترافهم

عموما رقم 980 ده انا حاسة انه مبالغ فيه قوي، العدد كبير، ويمكن اكتر بكتير من ال88 اللي طلعتهم المستشفيات الميدانية لان فيه جثامين كتير سحبها الامن اثناء المعركة، ده غير ان كل يوم فيه مصاب بيموت، فممكن العدد يوصل ل200 او 300، ومع ذلك مش عايزين نسبق، حندور عليهم وحنجيبهم ان شاء الله

بس كمان احنا فكرنا في اننا نعلن في كل حتة، بعد ما نبذل احنا الجهد المرضي من ناحيتنا، ان اللي ابنه مختفي، او يعرف انه مقتول، واي حد عنده فيديوهات، او صور، او معلومات سواء عن استشهاد بعض الناس قدامه، او انتهاكات من قبل السلطات، او اي حاجة، اي معلومة ولو صغيرة واي وثيقة ولو تافهة، يتصل بينا، الموقع الالكتروني تحت الانشاء، وخطوط التليفون ان شاء الله تبقى جاهزة قريب وعملنا الميلات اللي الناس ممكن تراسلنا عليها

MartyrsGlory@Live.Com
MartyrsGlory1@Live.Com

فيه ميثاق للمجموعة دي، والميثاق المفروض حيكتبهولنا الدكتور تميم البرغوثي، وفيه مستندات بالشهداء حيجيبها لنا مالك عدلي

اللي خلاني بس اتكلم عن الموضوع بدري قبل ما نجهز بكل حاجة اننا محتاجين مساعدتكم

اي حد عنده فيديوهات فيها اطلاق نار او اعمال عنف من قبل قوات الامن والجيش يا ريت يبعتها لنا على الميلين دول 

ودي صفحة الحملة على الفيس بوك

--------

حاجة اخيرة... انا حانزل قائمة الاسماء اللي حصرناها، غير انكم تحتفظوا بيها، انا طالبة منكم انكم تسلموا على اسم اسم وتترحموا عليه ولو مسلم تقرا له الفاتحة ولو مسيحي تصلي له، وحتشوف، وعلى ضمانتي الشخصية، البركة اللي حتحل عليك لما تعمل كده، انا باقول لكم حاجة مجرباها، ومش لازم احكي تفاصيل، بس انا لما عملت كده حصلت لي حاجات غريبة جدا جدا جدا جدااااااااااا، لدرجة اني بقيت ماشية اكلم نفسي وابص على قائمة الاسماء واقول: مين دول؟ انتوا مين يا عم؟ انتوا مين؟ 

والله العظيم.. جرب كده تعمل اللي انا عملته وحتشوف بنفسك: السلام عليكم يا فلان ورحمة الله وبركاته، وتقرا له الفاتحة او تصلي له.. ولما تعمل كده قول لي حصل معاك ايه

القائمة لشهداء محمد محمود بس اسم احمد سرور فيها مع انه في مجلس الوزرا بس باعتبار انها كمالة لنفس المعركة
كمان فيه راجل في الاخر عنده 57 سنة استشهد بالاختناق، ده ما كانش جاي يتظاهر، ده كان جاي يدور على ابنه

شهداء محمد محمود :

1- محمد الحسيني البرعي

2-محمد السيد محمد عبد الفتاح

3- محمد بشر انور

4- محمد بشير تهامي

5- محمد نبيل ربيع شحاتة

6- محمد سعيد امام

7- محمد سمير رمضان

8- محمد صلاح محمد

9- محمد عبد النبي عبد الغني مصليحي

10- محمد محمود

11- مصطفى محمد عبد المنعم

12- مصطفى محمد عمر السيد

13- منتصر مكرم عبد الرحمن

14- احمد سيد سرور

15- يحيى زكي

16- شهاب احمد السيد

17- احمد البدوي

18- د. محمد قناوي

19- سيد خالد سيد

20- سيد جابر محمد سليم

21- شهاب الدين احمد ابراهيم الدكروري

22- عادل امام جاد كريم

23- عاطف محمد داوود

24- عاطف محمد محمد عوض

25- عاطف محمد محمد فاروق

26- عبد الخالق السيد عبد الخالق

27- عبد الرحمن عبد الحميد سيد علي

28- عزت عبد الواحد 29- عصام السيد صابر

30- علي صلاح خضر

31- عمرو محمد احمد عبد الخالق

32- عمرو محمد البحيري

33- عمرو محمود محمد

34- ماجد يوسف

35- محمد احمد السيد العباوي

36- ابراهيم سليمان محمد سليمان

37- ابراهيم عبد الناصر قطب

38- احمد سمير احمد رمضان

39- احمد صديق

40- احمد طارق

41- احمد عبد الرؤوف

42- احمد فاروق حسين

43- احمد محمد احمد عبد العليم

44- احمد محمد عبد الحميد

45- احمد محمود احمد

46- ايمن احمد عبد الرؤوف

47- بدري حمد بدري

48- حازم

49- حازم مشحوت محمد ابراهيم

50- حسام السيد صابر

51- حسام حمدي خليفة

52- محمد انور محمد عبد الله

53- احمد محمد محمد عبد الحميد

54- ايمن محمد احمد عبد الحليم

55- فراج محمد أحمد سليمان عوض السن: 57 عاما مكان الوفاه: ش محمد محمود / ميدان التحرير التاريخ: 23/11/2011 قضية: 9793 لسنه 2011 قيدت: سجل مدني قصر النيل تاريخ: الأربعاء 27/11/2011 رقم: 325 جهة الأصدار: صحة قصر النيل محافظة القاهرة سبب الوفاه: توفي متأثرا بالأختناق نتيجه القاء قنابل الغاز والمسيل للدموع بكثافة بالشارع المذكور وهو عامل ببنك ناصر ويعمل بعد الظهر بعياده خاصة في الشارع المذكور اول المكالمات لأهله كانت من قيادي بالداخلية وأبلغهم خالص التعازي والمساواه والتأكيد علي حق الشهيد

56- حسام مصطفى المصرى التاريخ : 6\12\2011 توفى فى المستشفى بعد احداث مجمد محمود 

--------

تاني.. اي تنتوفة بخصوص احداث عنف ارتكبت من السلطات يا ريت تبعتها لنا، ولو فيديوهات او صور ابعت وانت مغمض

بالنسبة للدكتور احمد معتز اللي اكتشف المواد المسممة اللي مات بيها الجثث.. الدكتور ده حسب ما عرفت انه مهدد، وواجب علينا اننا نحميه كلنا لحد ما يكمل اركان القضية

بيان هام

البيان منفصل:

من أجل الخروج من الأزمة التى تمر بها البلاد والجدل الدائر بين جميع القوى السياسية وغضب الشارع المصاحب له نعلن نحن المعتصمين بميدان التحرير عن رفضنا لسياسة العنف فى التعامل مع مطالب الشارع واحتجاجاته وتناسي ما وافقت عليه جموع الشعب المصري حول محتوى الإستفتاء الدستوري بتاريخ 19 مارس 2011 ونعلن عن خطة مقترحة للخروج من الأزمة تعبر عن مطالبنا وندعو جميع المعتصمين بميادين مصر لدعمها وكذا القوى السياسية وجماهير الشعب المصري وبنود الخطة المقترحة كالأتى:

أولا: ان يقوم المجلس العسكري بالعودة إلى ثكناته والتفرغ لادارة شئون الجيش وتسليم كافة سلطاته إلى مجلس مشكل من رؤساء الهيئات القضائية وهى رئيس المحكمة الدستورية العليا و رئيس المجلس الأعلى للقضاء ورئيس مجلس الدولة لتولى إدارة شئون البلاد فى المرحلة الحالية التى تنتهى بنهاية شهر إبريل2012 

ثانيا: يكون هذا المجلس مسئولا عن اجراء الإنتخابات البرلمانية فى موعدها على ان يعقبها الإنتخابات الرئاسية مباشرة.

ثالثا: يتولى البرلمان المنتخب تشكيل جمعية تأسيسية تعد دستورا جديدا للبلاد بالتزامن مع إجراء الإنتخابات الرئاسية ليقوم الرئيس المنتخب بطرح الدستور الجديد على الشعب فى إستفتاء عام.

رابعا: يتولى المجلس المشكل من رؤوس الهيئات القضائية تشكيل حكومة إنقاذ وطنى تطهر وزارتي الداخلية والاعلام وتعمل على حل المشكلة الأمنية والإقتصادية فى البلاد. 

خامسا: إلغاء كافة أشكال المحاكمات العسكرية للمدنيين وإحالة جميع المتهمين أمام القضاء العسكرى والمحكوم عليهم إلى قضاء مدنى مختص لإعادة محاكمته.

بيان هام اخر خمسة وسبعين حاجة

 تحديث:
البيان صاغه مالك عدلي وباسم.. بس الاجتماع كان فيه ناس كتير قوي ووافقنا كلنا بالاجماع عليه
---------
امبارح اجتمعنا مجموعة كبيرة واتفقنا على بنود المطالب

المطالب مش نكتة ولا كيميا ولا حاجة... المطلب ان العسكر لازم يمشي... طبعا الاخوة ابناء مصر هبة الاستقرار قعدوا يقولوا لنا امال مين ييجي... الصراحة انا مش فاهمة يعني ايه امال مين ييجي دي لما تتقال على العسكر!!!!!!!!!! يعني كانوا بيقولوا على مبارك: ماهو لو مشي ايه البديل؟ على اساس ان الراجل عشرة ووعيوا على الدنيا ما لقوش غيره فمش عارفين يتخيلوا حد غيره رئيس... انما ولاد امبارح دول كمان اخدتوا عليهم زي الطير ما اتعود عشه اتعودت عليك يا حبيبي؟ هم دول كمان حيعملوا فراخ دستوري؟ مش ناقص غير يقولوا لنا المجلس العسكري الاب

المفروض ان الحكم العسكري ده وضع استثنائي.. وبعد ما قتل لنا اكتر من 22 شهيد في يوم واحد ما بقاش نافع يقعد ولا ثانية، وسؤال مين ييجي ده سؤال استفزازي قال يعني هم ممشيين البلد... ايش حال ان ما كنتوش عمالين تشتكوا من وقف الحال وتقولوا الثورة.. هي الثورة بتحكم البلد؟ اللي حاكم البلد هو اللي واقف حالها، ولما كنا قاعدين بطولنا التمنتاشر يوم البلد كانت ماشية زي الفل

لكن ما علينا... بما ان مصر هبة الاستقرار، وانا مقدرة برضه انها اقدم دولة في التاريخ والناس مش عارفة تتخيل ازاي يعني الناس الكبارة تمشي.. تمشي تروح فين؟ خلاص من مييييين؟  بلاش السلوجان ده

وبما ان الناس مدمنة مؤسسات، وآخر عامود في الخيمة والكلام الفارغ ده، فاحنا اتفقنا على اننا نقترح حلول ما تعملش خلافات بين الناس، يعني بدل ما نقترح اسماء اشخاص وكل شوية حد يطلع لنا زي الخازوق ويقول لنا: البرادعي لأ... ابو اسماعيل لأ... ابو الفتوح؟ دي مؤامرة اخوانجية... ننقل السلطة الانتقامية من مؤسسة الجيش الى مؤسسة القضاء

طبعا برضه انا مقدرة ان الناس في الميدان قلبها محروق.. وحيبقى عندها تحفظات على حاجات كتير، زي ان نفسهم المجلس يتحاكم ويتعلق من رموشه بعد ما حرق قلوبنا كلنا، زي انهم شايفين زي ما انا شايفة ان مؤسسة القضاء مؤسسة فاسدة زيها زي مؤسسة الجيش.. بس نيجي على نفسنا يا شباب.. عادي بقى، ما احنا ناكل العلق ونقعد نحايل في اللي قاعدين في بيوتهم.. عشان اللي قاعدين في بيوتهم خايفين.. اه... اللي واقفين قدام الرصاص الحي مش خايفين وهم اللي قاعدين يحايلوا في اللي قاعد تحت البطانية ويطمنوه.. هي مصر كده.. ام العجايب، زي ما هي البلد الوحيدة اللي الاغنيا فيهم هم اللي عندهم حقد طبقي على الفقرا والفقرا ما عندهمش اي حقد ويقعدوا يقولوا: ربنا يزيده ويرزقه.. نصيبنا بقى.. اجيب لكم شعب منين؟ استورد؟ ولا حنرميهم يعني؟ 

 احنا مضطرين ننقل السلطة الانتقالية الى مؤسسة في الدولة عشان ما يقعدوش ياكلوا دماغنا ويقولوا لنا بتهدوا الدولة بتهدوا الدولة كأننا بنهد الهرم.. اصلا ربنا عامل لنا معجزة في الهرم الاكبر لها رمزية كبيرة:

الهرم الاكبر قمته عليها خازوق.. سبحان الله، فعلا قمة الهرم في مصر عبارة عن خازوق.. اكبر خازوق في حياتنا.. قمة الهرم في كل حاجة وكل مؤسسة وكل تنظيم... بس الناس بتحب الهرم.. خلاص... نحايل الناس وناخدها على قد عقلها بس نخلص من المقتلة المستمرة دي

اه طبعا مؤسسة القضاء مش حتفرق عن مؤسسة الجيش من حيث الفساد، بس اولا: مش حتحاكمنا عسكريا، ثانيا: لما ننزل نتظاهر ضدهم مش حينزلوا لنا شرطة عسكرية ولا حيدهسونا بمدرعات مرتبكة، يدوبك حينزلوا لنا الداخلية تقتلنا ودول بنعرف نبهدلهم. ثالثا: الاقتراح ده مطابق للاستفتاء اللي الناس قالت عليه نعم، اللي اخل بالاستفتاء وغير ارادة الشعب هو المجلس العسكري، لكن الشعب قال نعم على التعديلات الدستورية، التعديلات الدستورية لدستور 71.. مش الناس قالت له نعم؟ خلاص.. بينا وبينكم الورق والاستفتاء وختم النسر يا اقدم دولة في التاريخ.. مبسوطين كده؟ جبنا لكم ختم نسر ومؤسسة اهو. رابعا: القضاء حيبقى قدامه فرصة بحد اقصى 60 يوم مش حيقعد يقول لنا احنا مش حنقعد اكتر من ست عشر تلاتين شهر سنة قرن كده.. يدوبك مسافة السكة.. خامسا: لو مرمطناهم ماحدش حيقول لنا خط احمر وعايزين تهدوا البلد واسرائيل حتهجم علينا وفنزويلا حتحتل شبرا والكلام ده.. الجيش يرجع يحمي الحدود.... هأ.. قال يحمي قال.. يا ريتنا ما شفناكم ولا عرفنا حالكم المنيل.. يا ريتنا قعدنا عليكم ساعة ما خلفناكم.. هييييه... يالا... نصيبنا... المهم يعني.. اعتبروهم راحوا يحموها.. المهم نغورهم من وشنا والنبي.. انا ما بقتش مستحملة خلقة ميري تاني.. الشرطة احنا نعرف نتصرف معاها... المهم الجيش بشرطته العسكرية بمحاكمه العسكرية بخطه الاحمر بصابرين صابرين صابرين بسلاطاته ببابا غنوجه يغور من وش امنا بقى.. ونستعد للفل الجديد

بالنسبة لاقتراح حكومة انقاذ وطني... ده عند امه يا ادهم.. دي حكومة انقاذ العسكر مش حكومة انقاذ وطني، حنغير شرف ونجيب البرادعي ولا نجيب ملاك منزل من السما برضه هو تحت حكم العسكر والمسدس على راسنا وراسه.. مافيش الكلام ده.. الكلام ده فارغ.. فارغ وقلة ادب.. قلة ادب.. ده استعباط.. استعباط زي استعباط مبارك لما عين عمر سليمان نائب واقال الحكومة كأن المشكلة كانت في ان مالوش نائب وان الحكومة دي هي اللي وحشة.. احنا بنهزر معاكم؟ بنهزر معاكم؟ 

ينعل ابو عبده مشتاق اللي عايزين اي منصب دول.. وانتوا خاسس عليكم حاجة؟ حد بيموت لكم؟ حد بيتخزق له عين من اعز الحبايب لكم؟ من انتم؟ من انتم؟

باقولكم ايه... انتوا مش عبده مشتاق؟ استنوا لما الانتخابات الرئاسية تتعمل عشان تشتاقوا براحتكم

الانتخابات البرلمانية تتعمل في معادها... عشان الاخوان ما يزعلوش.. قال يعني حتفرق في حاجة انتخابات من عدمها طول ما احنا تحت حكم عسكري.. بس معلش.. ناخدهم على عقلهم عشان ما نزعلهمش

حاجة تانية مهم قوي: عفا الله عما سلف.... شششششششششششششششش شت شت شت... بااااااااس... ما تشدش في شعرك ياللي في التحرير.. انت عايز المصلحة ولا عايز تقعد تغل في نفسك؟ لو كنت عايز حاجة تانية غير المصلحة ما كنتش بهدلت نفسك كده

خلاص.. يبقى المصلحة اهم.. المصلحة المشتركة دلوقت ان العسكر يمشي.. وده مش حيمشي الا كلنا نتجمع ونتغاضى عن خلافتنا، لا نقعد بقى نلوم في الاخوان، ولا نقعد نأنب في اللي استندلوا في احداث ماسبيرو ونفكرهم بسكوتهم وقتها، ولا نسلخ في حازم ابو اسماعيل عشان خلع من الاعتصام يوم 18 نوفمبر ونقول للبرادعي انت جيت شهقة يا رمضان ولا اي حاجة من دي.. خلاص.. عفا الله عما سلف.. ولو مؤقتا، لحد ما نخلص من العسكر

عايزين نطمن كل الناس اللي خايفة تنزل الميدان لتاخد بالجزم القديمة والشباشب المتعاصة في الكنيف ان جزمنا في رجلينا وشباشبنا مش حنعوصها في الكنيف.. انزلوا بكامل طاقتهم وما تخافوش.. وما تعملوش فينا مقالب عشان خايفين منا.. عفا الله عما سلف.. مش حنضرب حد، المصلحة الواحدة دلوقت ان الحكم العسكري ينتهي فورا.. فورا فورا

وده البيان المقترح اللي عملته المجموعة وبيتوزع دلوقت في الميدان عشان ناخد بيه موافقات من الناس اللي عمال تتعجن من يوم 18 بالليل دي... معلش سامحوني يعني.. هم اولى ناس يبقى لهم الكلمة الاولى وبعدين اي حد غيرهم ييجي بعدهم.. ده كفاية ان المصابين اتصابوا تاني

البيان:

من أجل الخروج من الأزمة التى تمر بها البلاد والجدل الدائر بين جميع القوى السياسية وغضب الشارع المصاحب له نعلن نحن المعتصمين بميدان التحرير عن رفضنا لسياسة العنف فى التعامل مع مطالب الشارع واحتجاجاته وتناسي ما وافقت عليه جموع الشعب المصري حول محتوى الإستفتاء الدستوري بتاريخ 19 مارس 2011 ونعلن عن خطة مقترحة للخروج من الأزمة تعبر عن مطالبنا وندعو جميع المعتصمين بميادين مصر لدعمها وكذا القوى السياسية وجماهير الشعب المصري وبنود الخطة المقترحة كالأتى 

أولا: ان يقوم المجلس العسكري بالعودة إلى ثكناته والتفرغ لادارة شئون الجيش وتسليم كافة سلطاته إلى مجلس مشكل من رؤساء الهيئات القضائية وهى رئيس المحكمة الدستورية العليا و رئيس المجلس الأعلى للقضاء ورئيس مجلس الدولة لتولى إدارة شئون البلاد فى المرحلة الحالية التى تنتهى بنهاية شهر إبريل2012 

ثانيا: يكون هذا المجلس مسئولا عن اجراء الإنتخابات البرلمانية فى موعدها على ان يعقبها الإنتخابات الرئاسية مباشرة 

ثالثا: يتولى البرلمان المنتخب تشكيل جمعية تأسيسية تعد دستورا جديدا للبلاد بالتزامن مع إجراء الإنتخابات الرئاسية ليقوم الرئيس المنتخب بطرح الدستور الجديد على الشعب فى إستفتاء عام 

رابعا: يتولى المجلس المشكل من رؤوس الهيئات القضائية تشكيل حكومة إنقاذ وطنى تطهر وزارتي الداخلية والاعلام وتعمل على حل المشكلة الأمنية والإقتصادية فى البلاد.

خامسا: إلغاء كافة أشكال المحاكمات العسكرية للمدنيين وإحالة جميع المتهمين أمام القضاء العسكرى والمحكوم عليهم إلى قضاء مدنى مختص لإعادة محاكمته.

شيروه.. وخدوا عليه موافقات

واحنا حناخد عليه موافقات في الميدان ونشوف.. الكلمة الاخيرة للميدان برضه.. معلش يعني... عدم اللامؤاغزة.. 

احنا كمان بنجمع عليه توقيعات من شخصيات عامة، وفيه ناس كتير موافقة عليه
سؤال بقى:
22 شهيد... الميدان مش مليونية ليه؟ 
كلمة وقلتها ايام ماسبيرو وباعيدها تاني: اللي يرضاها للناس او يسكت عليها... يشوفها، يشوفها.. مش دعا على حد.. ده تقرير واقع.. عدل ربنا كده، وقلت لكم لو فلتوا بعملتهم في ماسبيرو مش حيكبروا لحد... ولو فلتوا بعملتهم في ماسبيرو ربنا مش حيسيبنا
ابدا... ماحدش سمع الكلام.. خليكم بقى.. انا خالية ذمتي امام الله الحمد لله
والعسكر حيمشي.. العسكر حيمشي.. المجلس العسكري كله قصاد شعراية من مالك مصطفى عندي.. حرقوا قلبي
حرقوا قلبي