رسالة شكر من شاهندة مقلد/ للنشر

خطاب الشكر ده طنط شاهندة ملتهولي في التليفون وقالت لي ابعتيه لكل الناس، انا بانزله اهو وح ابعته على كل الكونتاكتس بتاعتي رجاء النشر

شكر واجب



الآن وبعد أن وصل جثمان ولدي الطاهر إلى أرض وطنه، على نفقة أفراد كرام من أبناء الشعب المصري العزيز بعد أن رفضت وزارة الخارجية أن تتكفل بعودة ابن من أبناء أسرة شهداء، وتوسد ثرى مصر الغالي بجوار والده الشهيد صلاح حسين، فإنني أتوجه بالشكر إلى: كل من شاركني فجيعتي في فقد ابني وسيم من الزملاء والأصدقاء الأحباء وأبناء مصر الغالية ، وكل القوى الوطنية والسياسية على اختلاف اتجاهاتها وانتماءاتها وممثلي المنظمات الأهلية والنقابية والفنانين والأدباء والإعلاميين في الصحافة والقنوات الفضائية لما غمروني به من مساندة ومشاعر فياضة كانت بالنسبة لي خير عزاء.
كما أتوجه بالشكر إلى السيد رئيس الجمهورية والسيد رئيس الوزراء المصري الذي تفضل مشكورا بتسليم رسالتي ورسالة القوى الوطنية والسياسية والمثقفين المصريين إلى السيد بوتين أثناء زيارته إلى جمهورية روسيا الاتحادية.
وأتوجه بالشكر الجزيل للسيد السفير د. عزت سعد سفير جمهورية مصر العربية في روسيا الاتحادية وطاقم السفارة بجهودهم المشكورة منذ لحظة اختفاء ولدي وحتى الآن.
و يبقى أن أشكر الرئيس بوتين، رئيس وزراء روسيا الاتحادية، والسلطات الروسية للاستجابة المشكورة للكشف عن حقيقة اختفاء ولدي ومواصلة التحقيق في الجريمة البشعة التي أودت بحياته.
كما أشكر السيد سفير جمهورية روسيا الاتحادية في مصر ميخائيل باجدانوس والوزير المفوض إيفان مالاداكوف والقنصل ورجال القنصلية الذين فتحوا لي أبواب القنصلية يوم عطلتهم الرســمية من أجل توثيق الأوراق اللازمة لتسهيل عودة جثمان ولدي.
ليس هذا مجرد شكر إنه عرفان بجميل مواساتي في محنة أدعو الله ألا يتعرض لها أي إنسان على وجه الأرض.

شــــــــاهندة مقلد

الظاهر فيا شيء لله

انا مش قلت لكوا تبرعوا لعلاج الصهاينة نفسيا، اهو طلع معايا حق، الست دي، اولا انا مش عايزة حد يتريق عليها ولا يجرح فيها بجد عشان صعبت عليا وهي كل مشكلتها انها ست طيبة واتصدمت في حاجة كانت مؤمنة بيها، هي يهودية امريكية هاجرت للكيان الصهيوني من ستة وعشرين سنة ودلوقت بتسجل فيديوهات عشان تثبت ان فكرة اسرائيل كدولة هي مؤامرة نازية ضد اليهود، وان اللي في المراكز القيادية في الكيان الصهيوني مش يهود اصليين دول نازيين بيدعوا اليهودية، وان التعليم الصهيوني بيعمل برامج سرية للاطفال عشان يشوه نفسيتهم ويحببهم في القتل، وان الرعاية الصحية في الكيان الصهيوني بتحقنهم بحاجات تخليهم متوحشين وهي بتدعي ان دي امصال، وانها من ساعة ما ابتدت تكشف حقيقة الصهيونية وهي حاسة بدوخة هي وبقية افراد اسرتها، وان الشعائر الدينية اللي بتحصل في اسرائيل دلوقت مالهاش علاقة بالديانة اليهودية وبتقول: لو جدي وجدتي عايشين ما كانوش فهموا ولا كلمة من الشعائر الدينية الموجودة، وان دي مش شعائر دينية ده سحر اسود عشان يسحروا بيه الاسرائيليين، (مش عايزة قلة ادب انا الست صعبت عليا وفعلا خفت عليها يكونوا ح يموتوها وللا حاجة) وان الاطفال اليهود اللي في اسرئيل بيتاخدوا وبيتعمل عليهم تجارب اشعاعية، وان فيه مجموعة من زمان من اطفال اليهود اليمنيين تم ترحيلهم لامريكا وبتقول ان ترحيلهم لامريكان كان عشان (تاني مش عايزة قلة ادب قبل ما اتكلم) يربيهم السي آي إيه ويعمل منهم الجماعات الاسلامية الارهابية (قصدها القاعدة لان مافيش حد يمني غيرهم) عشان يستمتعوا بالفرجة على اليهود وهم بيموتوا اليهود وانهم مش مسلمين ولا حاجة دول يهود مخطوفين من اهاليهم، وان نظام الخدمات الاجتماعية هدفه خطف ابناء الفقراء من الاسرائيليين (اول مرة اعرف ان عندهم فقرا، يمكن قصدها ما يقدروش يجيبوا غير عربية دايو بالقسط) عشان يحقنوهم ويمارسوا عليهم السحر الاسود وان اللي  في الجيش الاسرائيلي دول محقونين بمواد معينة بتخليهم يقتلوا الاطفال، وان اللي بيدي الاوامر دي هم النازيين مش اليهود

وان النازيين غير انهم موجودين في السلطة، هم كمان موجودين في المستشفيات والمؤسسات الدينية والاجتماعية وان فيه عملية منظمة لاصابة اليهود بالغباء

الغريبة بقى ان الاسرائيليين اللي بيدخلوا لها بيتعاملوا معاها بجدية شديدة، يا اما بيزعلوا منها بجد وبيتناقشوا معاها، يا اما بيقولوا لها والله معاك حق فعلا وماحدش بيدخل يقول يا جدعان دي مجنونة غير كام واحد امريكاني، انا بقى صعبت عليا، هي مش مجنونة، ومش عايزة حد يقول عليها مجنونة لو سمحتوا انا باتكلم بجد، هي واحدة كان مضحوك عليها، وانسانة حساسة وطيبة ومش قادرة تستحمل اللي دولة الكيان الصهيوني بتعمله، ومش قادرة تصدق ان دول الناس اللي هي امنت بيهم وصدقتهم وعمالة تقول: مش اليهود اللي يحبوا يقتلوا الناس، احنا عمرنا ما قتلنا حد عشان نقتل الناس بالطريقة دي، انا مش عارفة اعتذر للعرب ازاي؟ احنا كنا علاقتنا بيهم قبل اسرائيل ممتازة، انا متأكدة ان الجيش الاسرائيلي تحت تأثير عقار معين ده غير نظام التعليم اللي مافيش زيه في اي حتة في الدنيا، ده اغرب نظام تعليم شفته في حياتي

(ملحوظة تانية: بجد مافيش يهودي تميز كان خريج نظام تعليم اسرائيلي)

طبعا انا واحدة بطبعي باحب اصدق نظرية المؤامرة وكل حاجة، بس ليه الكلام ده مش داخل نافوخي؟ لان فيه عرب في اسرائيل وبيتعلموا معاهم (اللهم الا اذا كان فعلا الاطفال اليهود بيتعمل لهم برامج خاصة سرية زي ما هي بتقول) ولو فيه حاجة زي دي ما كانش الفلسطينيين سكتوا الا اذا كان الفلسطينيين نفسهم وقعوا تحت تأثير السحر الاسود والحقن وعشان كده بيتخانقوا مع بعض ومنحوسين ومش عارفين يحرروا ارضهم لحد دلوقت:) المهم، انا ليه نزلت كلامها مع اني متشككة شوية فيه

عشان اثبت لكوا اني فيا شيء لله، مش انها مجنونة وتاني اللي ح يقول عليها اي كلمة وحشة ح ازعل قوي مش كل انسان طيب الناس تستهبله، بس فاكرين لما قلت لكوا بيخلقوا من مواطنيهم الليدي ماكبث اللي بتمشي وهي نايمة ويتهيألها ان ايديها فيها دم وتفضل تغسل ايديها وتقول الدم مش عايز يروح وتفتضل تستحمى وتحط برفان عشان ريحة الدم اللي هي متخيلاها تروح وفي الاخر انتحرت؟

هي قالت كلمة الحقيقة مهمة جدا وهي الخلاصة من كل كلامها: بيحطموا الانسان اليهودي معنويا وروحانيا وبيخلقوا منه وحش

(صحيح، مافيش حاجة اوحش من ان الانسان يتقتل اخلاقيا ومعنويا، لو مات ماديا كل الناس بتموت، بس لما يموت روحانيا واخلاقيا يبقى الحيوان احسن منه واسعد منه حظا) 

السؤال اللي فعلا بقى عايزة افهمه: مين المستفيد من وجود اسرائيل؟ لا اليهود مستفيدين، بالعكس دي اسرائيل دولة معوقة، وكل اللي هاجروا ليها قاعدين خايفين ومرعوبين وبيجيلهم كوابيس زي ما الست بتقول ومافيش انسان يعرف ينتج ولا يبدع ولا يبقى مفيد في ظروف زي دي ابدا، خصوصا لما يبقى حاسس بالذنب كمان ودي حقيقة بصرف النظر عن المحاولات الفاشلة لخلق ابطال اسرائيليين من ورق في مجالات الادب والفن كل ده كلام فارغ، واللي بيروج للحاجات دي بيبقى مغرض، ماهو انا ينفع ادي جايزة لقصيدة شرايين اليأس تتفجر في احقاد الضغينة مدام معايا فلوس كتير وينفع واحد تاني شرقان فلوس يعمل نفسه ناقد وهو حتة حمار ويقول على القصيدة دي من عيون الادب عشان ياخد اللي فيه النصيب، لكن ده ما يعملش قصيدة شرايين اليأس تتفجر في احقاد الضغينة منتج ادبي حقيقي، وصورتهم في العالم فعلا بقت وحشة، ماحدش بقى يحب اليهود دلوقت، الناس كلها بقت خايفة منهم، لكن ما حدش بيحبهم، عشان تبقوا عارفين بقى ماحدش بيفرق ما بين اليهودية والصهيونية غير العرب واليهود اللي ضد الصهيونية، غير كده العالم كله فاكر ان اليهودية هي الصهيونية. اه نسيت اقول لكوا ان الست بتقول ان هرتزل ده متآمر ضد اليهود وانه كان عايز يحولهم للمسيحية وطبعا خبطت في الكنيسة الكاثوليكية يا عيني هههههههههههه، الكل نازل تخبيط فيها من كل ناحية، طيب ادي اليهود خسرانين اكتر ماهم كسبانين، والامريكان والاوروبيين بيدفعوا ضرايب وبياخدوا ايه في المقابل؟ ولا حاجة، الناس بتحرق العلم الامريكي عشان امريكا بتسلح اسرائيل، طب ايه الفايدة اللي عايدة على امريكا كدولة وللا حتى على اقتصادها بما انهم بيحبوا الفلوس؟ وطبعا مش ح نجيب سيرة العرب، احنا بالصلاة ع النبي ماحدش حاسبنا على البشرية خالص، مع ان بقى، اللي عايز فلوس ييجي عندنا، اللي عايز ايدي عاملة ييجي عندنا، اللي عايز انتاج كتير وكويس ورخيص وابن ناس ييجي عندنا، اللي عايز يحمي اليهود من الاضطهاد يبعتهم عندنا، ماطول عمرهم كانوا عندنا بشوات، طب يعني احنا مفيدين لكل الاطراف ومع ذلك ماحدش بيحاول يستفيد مننا وبس حاطين على راسنا الحكام العرب عشان يضمنوا اننا ما تقوملناش قومة، مع ان احنا قومتنا هادية وطيبة خالص ونحب الاجانب زي عنينا وبنعمل خدنا مداس ليهم طول عمرنا، وبالعكس امريكا بتصرف فلوس كتير قوي عشان تخلي حكام العرب على كراسيهم، مع انها لو وفرت فلوسها وسابتنا ننمو ونتقدم ح تستفيد مننا اكتر بكتير 

طيب لما الكل مضرور من وجود اسرائيل الا اتنين وعشرين فرد بالتمام والكمال، ايه الاصرار الفظيع ده على دعمها؟ مين المستفيد؟ ماحدش يقول لي تجار السلاح، يا سلام؟ هو فيه اكتر من الحروب في الدنيا؟ ده مافيش اسهل من تسخين الناس على بعض في اي حتة، ماحبكش اسرائيل تفضل قاعدة، وطبعا حكام العرب هم المستفيدين الوحيدين بس ما اعتقدش انهم لهم السطوة اللي تجبر امريكا تفضل تدفع فلوس في حب العذري لاسرائيل

عمالة اقلبها في مخي، انا ما احبش حاجة ما يبقاش لها منطق كده، باتضايق

عاجل: الحكم على مجدي حسين بالحبس سنتين

وصلني الميل ده من ساهر جاد:

جاءنا الان من الاسماعيلية ان المحكمة العسكرية اصدرت حكمها على مجدى حسين بالسجن لمدة عامين وغرامة 2000 جنيية نشطاء قافلة التضامن مع مجدى حسين اعلنوا انهم لن يغادروا المكان ويطالبون بحبسهم معه بعد ان منعتهم سلطات الامن من الاقتراب حتى من البوابة الخارجبة لمقر قيادة الجيش الثانى الذى تجرى داخله المحكمة

Watch more YouTube videos on AOL Video

ياااااااا انا لما شفت الفيديو ده عيطت

انا طبعا بعت لهم جواب شكر، ما انا خلاص بقيت الباز افندي في فيلم ابن حميدو اه

الموقع بتاعهم هنا

وتقدر تعمل الباز افندي وتراسلهم هنا

احنا عايزين نساندهم ونشجعهم لان الصهاينة ماسحين بيهم البلاط ودول بقى فلوسهم على قدهم مش اغنيا زي الصهاينة، وطبعا العرب الاغنيا مش بيدوا الناس دي فلوس، بيدوا الصهاينة زي ما انتوا عارفين، الراجل ويصا ده بيروح فلسطين وبيقعد قدام البيوت اللي بتتهد زي راشيل كوري كده، يعني ممكن يموت في اي لحظة، وممكن الصهاينة يقتلوه، الراجل ده لو مات انا ح ازعل قوي، انا خلاص حبيته، انا باحب الناس الانتحارية دي اللي تقف في وش القطر عشان كلمة الحق وهم كحيانين اصلا، فاقل واجب يعني نلحقه قبل ما يتقتل من تحت راسنا ونبعت له جواب شكر، على الاقل الراجل ما يحسش انه بيدن في مالطا، كفاية ان اوروبا وامريكا بيتعاملوا معاه على انه راجل مجنون هو والحركة بتاعته، وبيقول كلام انساني ومنطقي جدا: الدين دين، والجنسية جنسية، ازاي الدين يبقى جنسية؟

ماهو ده سؤال منطقي برضه

فيه على الموقع بتاعهم موجود باللغة العربية اسكتوا ده طلع ما اسموش المسبار، ده طلع برنامج ترجمة اسمه المسبار، لا حول ولا قوة الا بالله، مش لاقيين عربي متطوع يترجم لهم؟ معلش يا عيني تلاقيهم بيترجموا من جوجل :) باقول لكوا ما حيلتهمش حاجة، عموما انا بعت لهم اني ممكن اتطوع في ترجمة بعض الحاجات، واللي عايز يتطوع يجبر بخاطرهم والنبي احسن مقطعين قلبي مش عارفة ليه وتقدروا تراسلوهم بالعربي كمان، بس عربي فصيح وجمل بسيطة مش مركبة عشان يعرفوا يترجموها على جوجل :)،

بس خصيمكوا النبي لتراسلوهم، ده انا لما شفتهم قلبي اتقطع، شكلهم اغلب من الغلب
يا عيني، بصوا عاملين فيهم ايه:

ايه البؤس ده ياربي، دول حتى مش عارفين يتهموهم اتهامات عليها القيمة، للدرجة دي غلابة وضاربهم السلك؟

الله الله ع المستقبل باين في عيون كل ولادنا

تحديث:

النتائج الاولية بتقول ان الولية السكرية ام بدلة شاحتاها من عبد الحليم حافظ في السبعينات هي اللي كسبت، يا لاااااااهوووووويييييييييييي، اتاريها كانت نازلة قتل في الناس وبتقول: احنا بننشد السلام، طبعا ماهي سكرانة ومش دريانة بحاجة

----

اللي قدي فاكرين الاغنية دي، كانت فايزة احمد بتغنيها واحنا اطفال، ايام ما كان جمال سلامة مسيطر على الموسيقى الوطنية والدينية وكان له منهج مشهور في التلحين، بيقسم الكورال لستات ورجالة ويخليهم يغلسوا على بعض كدهو: دعوة ابراهي...

- دعوة ابراهي..

ونبوءة مو..

- نبوءة موس...

ترنيمة داو..

-ترنيمة داو..

وبشارة عيـ..

-وبشارة عيـس..

كلهم: صلى الله عليه وسلم محمدنننننن

ياسمين الخيام: ننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننننن

كان فيه بقى اغنية بنفس الطريقة بس كانت فايزة احمد والكورال هم اللي بيغلسوا على بعض: الله الله ع المستقبل باين في عيون كل ولادنا بجهودنا يا ناس ح يكون اجمل والخير ح يعم على بلادنا مصر الغاليـ..

-غاااااليـ..

ام الدنيـ..

اممممممم الدنيـ....

مصر الغـ..

مصر الغـ...

اممم

امممممم-

انا افتكرت الاغنية دي ودعوة ابرا...دعوة ابرا... لما شفت موضوع المحادثات بين فتح وحماس، اه وربنا، كل واحد فيهم يقول: عايزين نتحا...عايزين نتحا...وحدة الصف الفلسـ...وحدة الصف الفلسـ....من اجل الشعب الفلسطينييييييييييييييييييييييييييييييييييييييي

بس احلى تعليق سمعته من واحد في فتح بيقول: شكرا لحماس جاءت لنا بنتنياهو

يا حليييييييييييييييييلة، على اساس ان الانسة فيرجينا جميلة الجميلات حمامة لا مؤاخذة السلام تسيبي ليفني فتح اللي كانت ح تجيبها؟

انا شفتها بعنيا اللي ح ياكلها الدود وهيا بتقول: انا مؤمنة بحق شعب اسرائيل في كامل ارض الموعد

هم دول ينفع معاهم الكلام ده يا ناس؟ دول بيخلوا عيالهم، الاطفال الابرياء يكتبوا على القنابل رسائل لاطفال العرب، فيه كده؟ ده تاجر المخدرات يقول: ابني مالوش دعوة باللي باعمله، الرقاصة تعمل البدع وتقول: ولادي ما يشوفونيش وانا باعمل كده

ودول بيجننوا عيالهم ويخلوهم يكتبوا على القنابل ويدربوهم على السلاح من وهم بيحبوا، طب حتى يخافوا عليهم؟ دول ح يجيبولهم تخلف كده حرام عليهم والله الحاجات دي بتأثر على ذكاء الاطفال ونفسيتهم، ثم هو مين اللي عمل المذبحة الاخيرة؟ مش فيرجينيا جميلة الجميلات اللي شفتها على السي ان ان سكرانة وبتتطوح وبتضحك ضحكات رقيعة وعمالة تترمي على كتف عيل من دور عيالها؟

اسكتوا اتصدمت في مشاعري، اه والله، شكلها ما يجيبش كده خالص بالبدلة المجربة والبلوزة الهاي كول السودا اللي بتلبسها دي، بقيت عمالة ابحلق في التلفزيون واقول: يا ولية ينيلك...هو انت طلعتي كده؟ وعينيها حمراااااا وعمالة تضحك وترقص وتتطوح ومش عارفة تقف على رجليها ومش عايزة تبطل شرب، انا مش عارفة الاشرار السي ان ان دول جابوها وهي بالمنظر ده ليه؟ افتكرت حسن عابدين في فيلم درب الهوا لما كان باشا محترم وبالليل يتحزم ويرقص وهو بيقول: انا عايز حد يهزأني يهزأني يهزأني

وبيقولوا ان استطلاعات الرأي بتقول ان الاسرائيليين شايفين انها ما كيفتش دماغهم كفاية في اخر حرب دي، عشان كده مرجحين نتنياهو، طيب يعني كده تبقى حماس هي اللي غلطانة؟ ينفع كده يعني؟ ينفع كده؟ دول ناس؟ دول ناس طبيعية؟ وللا حتى نص طبيعية؟ طب يعني...يعني....اقول ايه ياربي...ينفع؟ ينفع يعني؟ ولسة بيتكلموا على محادثات ومبادرات؟ طب فيه مبادرة ممتازة انا باقترحها، بس لما يتوافق عليها ارجو حفظ الحقوق المعنوية ليا، مش ييجي بان كي مون يضرب على الفكرة ويطنشني:

احنا عايزين نلم من بعض ونعالجهم يا شباب، تبرعوا للعلاج النفسي للصهاينة يا ناس ابوس رجليكوا

---

ملحوسة: انا اليومين دول باخلص ورق حكومة وباخرج من الصبح الف على كعوب رجليا عشان امضاء موظف واحد بس، فحتلاقوني مش متواجدة كتير، لاني الصبح بالف واعيط في المكاتب الحكومية

يعني هم كانوا يهود وللا مثليين؟

تحذير: الصور فظيعة

مافيش بني ادم في الدنيا يستاهل يتعمل في كده، ولا حتى حيوان، ولا حشرة في الدنيا ولا كرسي يستاهل يتعمل فيه كده ابدا، والصور بتقول ان فيه ناس اتعمل فيها كده

بس انا بجد عايزة اعرف، للتاريخ والمعرفة يعني، هم كان بيتعمل فيهم كده عشان يهود؟ وللا عشان مثليين؟ وللا الاتنين مع بعض؟ وللا لا كده ولا كده؟ وللا دول اي حد بيعارض النازي وتصادف ان منهم يهود ومثليين؟ وللا الناس اللي اتعمل فيهم كده دول مش معروف لهم اهل ولا مصدر وكل واحد عمال يتاجر بيهم شوية؟ ماهم ماتوا بقى حد ح يسألهم؟ وكل واحد يدعي حاجة بقى، يعني ممكن احنا كمان ناخد الصور دي ونقول النازي حرق العرب، هم اصلا مش باين لهم ملامح من كتر العذاب اللي اترسم عليهم الله يخرب بيته مطرح ما راح 

الصور دي عرضها اليهود على انهم هم، وعرضها المثليين على انهم هم، واللبس المخطط والمثلث البمبي كلهم كانوا بيلبسوه، وكل واحد بينسبها لنفسه، اللهم بقى الا اذا ناس امعنت في العنصرية ونسبت المثلية الجنسية لليهود بس (سواء بقى شايفين المثلية دي حاجة وحشة او حلوة بس نسبها لديانة او مجموعة معينة كإشارة سلبية او ايجابية في الحالتين عنصرية) طب انا بقى واحدة من الناس الفضول واكلني، مش لان اللي شفتوه ده مش جريمة ولا حاجة، وكينونة الشخص او حتى الكائن الحي اللي يتعمل فيه كده مش ح يقلل من حجم الجريمة ولا ح يزودها لان في النهاية كلهم بني ادمين. بس تفرق انه كان بيعمل كده في المعارضين، ايا كانوا، او الناس اللي مش عاجبينه عشان له دماغ معينة، وانه بيعمل كده في اليهود بالذات او المثليين بالذات. لو بيعمل كده في المعارضين ايا كانوا، يبقى اليهود واكلين دماغنا ليه بقى؟ ما كل اللي عارض النازي اتعمل فيه كده ح نمسكهم واحد واحد ونعمل لكل واحد فيهم دولة؟ ولو صح كلام المثليين يبقى بقى اذا كان اليهود اتعمل لهم دولة عشان اللي اتعمل فيهم في محارق النازي يبقى ليه بقى المثليين مش معمول لهم دولة؟ هو كل اللي يندبح يتعمل له دولة؟

لو صح كلام المثليين، يبقى هتلر ده راجل مجنون زي نيرون والعالم مالوش ذنب انه يتحمل مسئولية تصرفات راجل مجنون مهووس بتعذيب البني ادمين، في ماي سبيس كل ما اعرض صور الجرائم الصهيونية يقولوا لي: معلش اصل النازي عذبهم! طب المثليين ما بيعملوش كده ليه؟ ما يمشوا هم كمان يدبحوا في خلق الله، طب والعرب اندبحوا في اسبانيا وعليه فيجب علينا اننا نروح نعمل في تانزانيا اللي اتعمل في اجدادنا من خمسميت سنة في اسبانيا

بصرف النظر عن رأيي او رأي اي حد في المثلية الجنسية، بس الكلام اللي بيقولوه ده له معاني كبيرة 

عاااااااجل: محمد عادل كلمنيييييييييييييي

ما تفرحوش قوي كده، هو بس اتصل بيا وهو نازل للتحقيق

هو العرض بتاعه النهاردة، ادعوا له بقى ياخد اخلاء يااااااااااااااااارب

تصحيح عاجل بخصوص بايضن

بس المرة دي مش غلطتي والله، دي غلطة ترجمة الجزيرة، الجزيرة كتبت الخبر كده:

عاجل: جون بايدن يقول ان حل الدولتين قد مضى زمنه

طلع الراجل بيقول كده:

It is past time for a secure and just two-state solution. We will work to achieve it,

نص الخبر على رويترز اهو

بس ده ما يمنعش اننا نقرفهم برضه

ساعدونا يساعدكوا ربنا

او ياخدني ويريحني، شوفتوا بقى ردود افعالهم على تصريحات بايضن؟ في ساعتها اللهم صلي ع النبي بعد ما كانوا خنسانين ومكتومين طلعوا زي الصراصير المرشوشة من الجحور

طيب

واحد:

فيه حد عنده موفي ميكر؟ عشان انا حتى لو عندي موفي ميكر مش ح اعرف اعمل بيه حاجة

طيب الاغنية دي مشهورة قوي بيقولوا عليها من الفول كلور بتاعهم، اتعملت سنة 48 :) فلكلور سنة تمانية واربعين

المهم عليها رقصة

ده فيديو بتاع العيال اللي ميتة

وده الفيديو بتاع الدكتور اللي بيصرخ في القناة الاسرائيلية

انا عايزة الاتي:

تقطيعات ما بين الرقصة وما بين العيال المقتولة

جميل؟

وبعدين

صوت الراجل اللي بيصرخ على صورتهم وهم بيرقصوا

وصوت موسيقى هافا ناجيلا على صورة العيال وهم ميتين

حد يعرف يعمل الحكاية دي؟

دي حاجة

الحاجة التانية

ابوس ايديكوا اشتركوا على ماي سبيس ده المنتدى الاوسع انتشارا في امريكا واسرائيل واورومبا وادخلوا الحقوني انا كتبت في الفورمز من هنا ودول هجموا عليا كالتتار من هنا وعمالة الوش يمين وشمال

التوبيكس بتاعتي اهي واعملوا انتوا كمان توبيكس عشان هم عمالين يعملوا لي ريبورتينج ودلوقت انا مش عارفة انزل فيديوهات على ماي سبيس

لما ابقى لوحدي ح يقدروا عليا لكن لما يبقى فيه كذا حد بينزل نفس الفيديوهات ح يربرتوا مين وللا مين؟

وحياة الانسة والدتك لقاعدة لك في زورك يا بايضن

بالنوسبة لارامل السيد الرئيس اوباما فيه خبر حلو كده عشان خاطرهم، بايضن بيقول حل الدولتين عفى عليه الزمن، هيهيهيهييييييي، طب صح، مظبوط، هو عمره ما كان له زمن اصلا عشان الدبان يعف عليه، يعني جناح الممناعة اللي هو احنا، والافندي بايضن متفقين ان يا احنا يا اسرائيل، وطبعا اكيد بايضن مش ح يختارنا احنا، طب وشرف الانسة والدتك لقاعدة لكم على الموقع بتاعك انت واوباما الحايس في الخطة بتاعته ده ومطلعة عينيكوا، على الله بقى يشيلوني عشان اعمل لهم فضيحة

بالنوسبة لارامل السيد الرئيس انا باقول يلبسوا قمصان مشجرة وبنطلونات....لا جيبات حمرا فوق الركبة وتحتيها كولون اسود ويحطوا شرايط في راسهم ويروحوا يقفوا جنب يسرا في اسيوط ويلفوا دايرة كاملة وهم بيعرجوا: جينجل جينجل ليتل ستاااااااااااار

لا وعلى ايه؟

ممكن يتدربوا على الرقصة دي احسن واوقع

بالنوسبة لي اشوفكوا بقى على الاكاونت اللي عاملاه على موقع اوباما انا بس عندي سؤال محرج شوية، ممكن مهندس مصري يساعدني فيه لانه عامل اكاونتت هو كمان وباقول برضه يا مهندس اعمل مدونة وطلع تلاتينهم، ياريت سبعة تمانية خمسمية كده يعملوا اكاونتات على موقع اوباما وننزل عليهم بقى بعزم مافينا كل اللي بيتكتب على اي مدونة بينزل على الصفحة الرئيسية، ح تلاقيهم بيقولوا لك انهي ولاية واسئلة كده كأنهم شارطين انك تبقى امريكاني بس طنش الاسئلة دي هم مش فاتحينها للامريكان بس، انا عايزة قوافل زي قوافل النمل بقى عشان نشوف مين فينا اللي عفى عليه الزمن وهم اصلا حايسين في حتة خطة مش عارفين يمرروها، ما تعملش حاجة غير انك تدخل هنا وتعمل اكاونت وتستلمهم كل يوم باللي ربنا يقدرك عليه وياريت تشترك في مجموعات على موقعهم كتير عشان البوستات بتاعتك تنزل عندهم، انا اقتراحي، وكل واحد حر، ان كل الناس تعمل اكاونت على الموقع ده وكل يوم نلطع لهم فيديو، تقرير، مقارنة زي المقارنة دي، وبالمناسبة المقارنة دي جربتها على كام حد لقيتها بتطلع نار من ودانهم ومش بيعرفوا يردوا، مافيش غير واحد قال لي: خلاص يبقى جورج واشنطن ارهابي، بس هو مات بقى ح نجيبه تاني ازاي؟ :) طلب خاص من كل الاخوة المقيمين في الولايات المتحدة، لو سمحتوا تعملوا اكاونتات على الموقع ده، تحسبا انهم يشيلونا بحجة اننا برة امريكا، يقوموا يلاقوكوا انتوا بقى مواطنين امريكان في زورهم، بس الاول قولوا لي اعمل امبد ازاي للفيديوهات

مش بترضى تعمل امبد ابدا

امنعوا الضحك

وانشروا الفيديو ده، انا بقى مش ورايا غير الصهاينة وفاضية لهم

The Daily Show With Jon StewartM - Th 11p / 10c

Randall Balmer

Daily Show Full Episodes
Important Things With Demetri Martin

Funny Political News
Joke of the Day

النمل يثرثر

يا روحي، لسة سامعة خبر في الجزيرة انه في اكتشاف علمي جديد لقوا ان النمل يثرثر كثيرا :) يا كميلة، والبحث بيقول ان الملكة هي اعلى صوت فيهم وانها بتنادي بصوت عالي فيرفعوا كلهم قرون الاستشعار ويسمعوا كلامها وينفذوا اوامرها على طول :) يا ترى بيقولوا ايه وهم رايحين جايين كده بسرعة: يا اخي شهل شوية...هات حتة السكر دي..ياللا بسرعة ح اشيل معاك

- لا لا خفيفة خفيفة...انا ح اشيلها لوحدي

يا سيدي احنا مع بعض اهو عشان نلحق ندخلها البيت بس بسرعة

يا عم انت الحق بس حتة العيش اللي واقعة هناك قبل ما البهايم اللي في البيت يشيلوها

الملكة: الحقوووووووووووا ديتوووول ديتووووول بسرعة بسرعة

- هه مش قلت لك الحق حتة العيش؟ يا غبي....ايه ده؟ نمول ..نموووول نموووول رد علياااااااا

جوة الجحر

الملكة: قبل ما نرتب اللي جمعناه النهاردة، لازم نقف دقيقة حداد على الشهيد نمول والشهيد نميلة والشهيد نملالي اللي ضحوا بحياتهم وهم بيواجهوا اعتى الالات العسكرية للدفاع عن فتافيت العيش والرزاية وحتة السكر ووفاء لارواحهم الطاهرة انا باتعهد قدامكوا اني مش ح استسلم ولا ح اضحي بحقوقنا في الفتافيت اللي المعفنين بيوقعهوها على الارض ومالناش بديل عن خيار المقاومة

---

طب والله امي بتقعد تتفرج على النمل وتقول لي بصي...اكيد بيقولوا حاجة، قال وانا اللي كنت باخدها على عقلها طلع كلامها علمي 

بيعلاموا العيال في أسيوط ثانتس ديفيند

يا حليلة، وزارة الخاردية الاموركاني ع تعلام العيال في اسيوط انهم يحبوا اموريكا ويرفعوا اعلام امريكا ويحتفلوا بسانتس ديفيند، يعني عيد الشكر يا داهل انت وهو، وبتشترط انهم يبجوا من اسر فجيرة اكمن الغلبان ع تطمر فيه اللجمة اللي ع يوكلوهاله وجال لك بجى فيه بت اسمها يسرا صرفوا عليها الفين دولار، دولار ينطح دولار، عشان يعلاموها (ولاد النتنة الفين دولار دول ايه؟ علموها تعمل مفارش كروشيه؟) والبت بجت متعلمة ومتنورة آخر حادة وجالت لهم اول هام اني اتعلامت احترم الاختلاف!!! امااااال لزمن ولابد احترمه واولت لمن اشوفه وهو داي من باعيد اجوم افز من موكاني واديله التمام، واللي ما ع يحترمش الاختلاف ع نطخه ومالوش دية حدانا واني رفعت العلم الاموريكاني وكان ع يرفرف، اصلك ده علم يرد الروح، ايشي احمر على ازرج وندوم كاتيييييير والوالية السفيرة دات حدانا، بيضا جشطة، تجولش كلوب منور في ليلة عتمة؟ وامي اولت لمن شافتها زغردت وجالت لها شالله السنة الداية تبجي في الحجاز يا اميرة يا بت الاصول، والمثل ع يجول لك اطعم الفم تستحي العين، وهم في عيد الحمد لله والشكر لله دابوا لنا ديك رومي كابيييير وجعدنا ناكل فيه أسبوع بطوله والواحاد حاسس انه بجى اموريكاني يا ولد، الديك الرومي رد الدموية في جتة النفر منينا وجالوا لنا لزمن التسامح من دوة الجلب والتسامح مافيش احسن منيته ابويا جالهم وماله، المسامح كريم واللي مش ع يسامح ع نبج بطنه بجيج وطبعا الديك الرومي وابرة الكاروشيه دولم غير المعونة اللي ع يدفعوها للحاكومة، والمعاون ربنا، ناس فييسة وما ع تستخسرش فينا حادة، ودابوا لاخويا كوتش وبروفل، بس ربك والحج الولا ما رضيش يلبسه، اصله كان احمر ودي عيبة حدانا في البلد، بس اخدناه منيهم عشان ما نكسفش ايدهم، خوادات بجى ومهماش خابرين عوايدنا، امي فكته وربطت بيه خشم الباهيمة اصلها ع تولد جريب، وجالوا لنا لزمن تحبوا اموريكا واحنا طبعا ع نحبها اومااااال، ما نحبهاش كيف؟ دي حتى توبجى جلة اصل هو احنا جطط ناكل وننكر؟ والسلام عليكم ورحمة الله وبركاته حاف آه نايص طايم.

سؤال بيمغص في نفسيتي

انا عارفة اني بقيت غلسة وباسأل اسئلة كتير مالهاش ايتها معنى بس معلش نساع بعضينا في الظروف دهين

الا الجرابيع الصيع اللي ربنا بلانا بيهم واكلوا دماغنا منين ما نمشي يقولوا: وفين بقى قيادات حماس؟ اهم مستخبيين تحت الارض اهم، اهم في سوريا اهم (بيقولوا على رئيس المكتب السياسي المبعد اللي ممنوع يدخل بلده هربان في سوريا طب حتى لو جه ده رئيس مكتب سياسي ح يعمل ايه في غزة غير انه يشوف اهله بس؟) وعيال النزال يموتوا ومافيش فايدة، وسعيد صيام يموت ومافيش فايدة، مش عارفة هم كان نفسهم في ايه اكتر من المدبحة اللي حصلت؟ ايه الشرقة للدم دي كلها؟ لدرجة ان واحد فيهم قال لي في وشي (قبل ما اشتمه واقول له يا مقزز يا مقرف واجري وراه عشان اضربه - الجبان جري لما لقاني قايمة اضربه والحيوانات اللي قاعدين مسكوني) المهم قبل ما اقوم قال لي: وسعيد صيام اللي اتسبب في قتل اخوه وولاد اخوه، بقى ده بني ادم مقاوم؟ ده هربان عند اخوه واهو اتسبب في انهم يموتوا

(ملحوظة: المدونة غير مسئولة عن الازمات القلبية التي قد تصيب معظم القراء)

طيب يعني الاستنباطات العظيمة الوجيهة اللي تنم عن عقليات بتجري فيها الصراصير الكبيرة دي اللي بتاكل السم وتقول كمان ما انسحبتش كمان على بيريز واولمرت وليفني وباراك ليه؟

يعني حد يقول لي رئيس صهيوني واحد وللا رئيس وزارة وللا وزير دفاع حتى اتعور واوا في صباعه (اللهم الا الاصابة اللي حصلت لشارون من الواد الشقي اياه :) انا مش عارفة ايه اللي خلاه يعمل كده؟)، طب ماحدش سأل عليهم ليه؟ يعني سعيد صيام الوحش اتسبب في قتل اخوه معاه، والنزال الوحش خلف عيال كتير وبالتالي هو المتحمل مسئولية قتلهم لانه جابهم للدنيا، ودول مستخبيين تحت الارض ومنفيين في سوريا غصب عنهم والمفروض يرجعوا برضه مع ان حتى لو حاولوا يرجعوا مصر مش ح تدخلهم من المعبر

طيب يعني اولمرت ده، وللا حتى باراك مش ينزل يبص على عياله اللي باعتهم يرقعوا بالصوت ويموتوا؟ او حتى يموتوا الناس وتجيلهم كوابيس (على حسب كلام بعض الجنود الصهاينة) من كتر العيال اللي بيموتوهم لما بقوا عاملين زي ليدي ماكبث وح ينتحروا في الاخر؟

ده احنا مات لنا رئيس الاركان في حرب الاستنزاف، وعبد الناصر في حرب الاستنزاف كان الجنود فجأة يلاقوه قاعد وسطهم على جركن المية وهو لابس بنطلون صوف وشيرز، وحتى السادات كان بيلبس لبس فرقة حسب الله بتاعه ده وينزل وسط الجيش (الا ايه اللبس اللي كان بيلبسه ده؟ وايه البايب ده؟) وكان فترة حرب وممكن في اي لحظة اسرائيل تغير على الموقع وتموتهم، اشمعنى بقى ماحدش سأل على بيريز ولا اولمرت ولا باراك ولا ليفني؟ يعني المساكين المستوطنين الجرحى بالهلع (اه والله قالوا 1200 جريح من صواريخ حماس معظمهم حالات هلع وبيتعالجوا في المستشفى وحصلت لهم ازمة في طاسات الخضة) ماشفناش حد منهم نزل يطمن على الجرحى بالهلع ولا يسقي حد فيهم بق مية ويكبر في ودنه، طب ما سألوش عليهم ليه؟ هم فين بقى؟ مش بيجيلهم ولا صاروخ ليه؟

ولما بيريز قال الكلام ده في دافوس (وطبعا الحمد لله ان بيريز اتكلم في دافوس والحمد لله اني سمعته، سبحان الله، هو والجرابيع اللي عندنا تقولش تافين في بق بعض؟ والله ما خلا لهم كلمة قالوها ما قالهاش وراهم، وانا مش عارفة بقى مين اللي بيقول ورا التاني، انا مش باتهم حد بانه عميل لاسرائيل لا سمح الله، لان اولا مافيش عميل لاسرائيل، العميل بيبقى يا عميل لحماس يا عميل لايران يا عميل لسوريا ده معروف طبعا، ثانيا اكيد اللي بينهم وبين بيريز اتصال روحاني سامي سامي كلب حرامي امثالي من الغوغاء والدهماء لا يرقوا الى مستواه) طب لما بيريز قال نفس الكلام وانهم مستخبيين في الانفاق وانهم في سوريا وكل الكلام ده اللي الواحد بقى عمال يقول: ياربي سمعته فين قبل كده؟ ياربي سمعته من مين قبل كده؟ ليه ماحدش قال له: طب وانت حضرتك كنت فين يعني؟ نزلت وسط المستوطنين في الملاجئ تطمنهم؟ نزلت وسط الجيش بتاعك وهم واقفين لابسين ملاية الساحرة الشريرة على كتافهم وعمالين يفأروا كده بضفايرهم دي عشان تشجعهم؟ وانت اصلا ما كانش ح يحصل لك حاجة، هي حماس عندها طيارات؟

يا ترى ايه؟ وللا انا باسأل اسئلة مالهاش لازمة؟

اه...انا باسأل اسئلة مالهاش لازمة

فيديوهات للتوزيع

اللي عمل صور مقارنة الهولوكوست بجرايم الصهاينة ده...قولوا ورايا، ربنا يجزيه كل خير دنيا واخرة عننا وعن الانسانية يارب ويبارك له في مخه ده حتى مش ماضي، يعني صدقة جارية خفية كمان، ربنا يكرمه ويديله كل اللي نفسه فيه دنيا واخرة يارب

بصوا بقى، فيه ناس تانية، ربنا برضه يكرمهم زيه بالظبط عملوها فيديوهات الفيديوهات دي انا عايزاها تتوزع بهيستيريا

خصيمك النبي ياللي ما تاخدش الفيديوهات دي عندك

هي نفس الصور بس بتختلف في طريقة عرضها وفي الكلام اللي مصاحبها والمقدمة والنهاية بتاعتها

دي اكتر واحدة عاجباني، وعاجبني انها تواشيح عربية، اشمعنى هم وزعوا على العالم كله هافا ناجيلا هافا وخلوا كل الناس تتكلم عبري

انا نفسي ربنا ينفخ في صورة حد يعمل اغنية تبقى سهلة وبسيطة وجميلة والموسيقى بتاعتها تحمس كده وتبقى بالعربي ويبقى فيها كلمة متكررة وبسيطة بحيث ان حتى اللي ما يعرفش عربي يقولها، نفسي نعمل اغنية واحدة بس عربية تعلم مع كل الناس في العالم ومهم قوي انها تبقى باللغة العربي، وطبعا تبقى لخدمتنا قضيتنا احنا، مش بتحكي عن المزة بتاعته

ابعت ياللي بتبعت 

بس التواشيح دي حلوة قوي ونغمتها قريبة من كل الناس

وفيه دي وزعوها برضه وناس كتير تشوفها حلوة قوي برضه

ودي بقى مصاحبها اغنية انجليزي

ودي انا نزلتها من على اليوتيوب وحملتها تاني على اليوتيوب وحاولت اغير اغنية كان مرة فيه ولد صغير صغير صغير صغير اللي الاخ الباكستاني كان حاططها دي، بس بيقول لي بندينج، عموما متوقع انها في اربعة وعشرين ساعة الموسيقى بتاعتها تتغير

ودي حلوة برضه

جميل قوي، اكيد بيقولوا كلام مهم مدام انا مش فاهماه

باحاول الاقي الاخ الباكستاني اللي حاطط كان مرة فيه ولد صغير صغير بس مش لاقياه

وده كمان واهميته انه حاطط كلمة يهود تحت ضحايا النازي وفلسطينيين تحت ضحايا الصهيونية

ودي عظيمة لان عليها اغنية مايكل هارت لن نركع

ده جميل، ومعمول له اخراج حلو قوي وموضح الصورة مش حاططهم جنب بعض جايب صورة ضحايا النازي الاول وبعدين ضحايا الصهيونية



ده معلش يا عيني واد امريكاني فحاطط اغنية عجيبة كده، غالبا هو اللي بيغني على الجيتار وللا ايه وبيقول ست سنين اضهاد من النازي وستين سنة اضطهاد من الصهيوني، المهم برضه اجبروا بخاطره وتدخلوا وتزودوا عدد المشاهدة

انا عايزة منكوا ايه بقى؟

جمعاااااااااااااء تاخدوا الفيديوهات دي كلها وتنشروها عندكوا على المدونات، ده بيعمل لها لينكات كتير على الموقع ومن ثم بيعمل لها عدد مشاهدات كتير وعدد اللنكات المرتبطة بيها كتير قوم تقب اكتر عند الناس لما تفتح صفحة اليوتيوب

الحاجة تانية، اللي عنده بورنامج التحميل بتاع الفيديوهات من على النت يحملها وعنده اكاونت باسمه ينزلها تاني وباسم

holocaust

او

new holocaust

بحيث كل اللي يدور على الكلمة دي يلاقي الفيديو ده، على الاقل عشان نخدم الانسانية ربع ما اللي عمل الصور دي خدمها

انا عايزة تعذيب، عايزة اللي يكتب هولوكوست مايلاقيش غير الكلمتين دول

اللي مش عنده مدونة ولا اكاونت على اليوتيوب او ما يعرفش ينزل الفيديو من على النت يعمل ايه؟

اولا فيه برنامج مافيش اسهل منه لدرجة ان انا العبيطة باستخدمه عادي اسمه

IDM 5.15

مش عايزة واحد قليل الادب يدخل يقول لي قديمة، انا باكلم البنات اللي زيي انتوا مالكوا؟ ثانيا يعمل اكاونت على اليوتيوب

صعبة؟ ولو صعبة الواحد لو مش ح يتعب على حاجة زي دي يتعب على ايه؟ على اي حال البرنامج محمد شلطف بعتهولي وهو عندي وعندكوا الميل بتاعي تقدروا اللي عايز يحمله يبعت لي وانا ابعت له

(ملحوظة البوست ده نازل على المجموعات البريدية ومرفق معا برنامج الاي دي ام)

طيب اللي ماعندوش وقت او صبر او حتى احمر مني في الكمبيوتر يعمل ايه؟

يدخل كل يوم على الفيديوهات دي ويفتحها بس، بحيث يكتر عدد المشاهدة، ويبعتها بالميل لكل اللي يعرفهم 

على فكرة لو روحك في مناخيرك قوي ومش طايق تعمل حاجة لانك بتشتغل وزير....لا ده الوزير ما وراهوش حاجة يعملها، طيب، لو بتشتغل زبال ومش فاضي كفاية تفتح كل اليوم الصفحة دي وتدوس على السهم بتاع بلاي بتاع كل فيديو وما تتفرجش ولا حاجة بس كفاية دوست بلاي وامشي من هنا

كل ده ح يقبب الفيديوهات دي على وش القفص

انا مش عايزة احرجكوا في نفسيتكوا اقول لكوا ان فيه عرب ومصريين بيوزعوا الدعاية الصهيونية في كل حتة، خللي الطابق مستور بقى

يعني دي حاجة مش ح تاخد منا مجهود

-------
اه، الشباب اللي عايش في اوروبا والدول المتغدمة مطلوب منه اكتر انه يعمل ريتينج ويوزع على اوسع نطاق عشان لما الفيديوهات بتتفتح كتير في بلد معينة ح تقب في البلد دي ممكن في بلد تانية لا
 

الله، الناس ابتدت تهلفط

دلوقت واحدة صاحبة ماما قالت لها: لا...هي الحكومة المصرية بتعمل كده في العلن، لكن اكيد في السر بيعملوا حاجة تانية خالص

على فكرة، الست دي ماهياش يعني مخلولة ولا حاجة، اقصد لحد وقت قريب، وماهياش فريدة عصرها

اتنين زمايلي في الشغل والساعي ابتدوا يقولوا لي الكلام ده مؤخرا

وبما اني بقالي مدة بايعة العربية، فباركب تاكسيات وانا بطبعي ما احبش اقول للتاكسي حاجة احب اسمعه

تقريبا حوالي خمسة وتمانين في المية من سواقين التاكسي مقتنعين بان كلللللللللللللللل اللي عوكل وعاطف السكري بيعملوه ده تمويه والحقيقة انهم في السر بيعملوا حاجة تانية خااااااااااااااااااااااااااالص

امممممممممممم

طيب الحفاظ على السلامة البدنية والعقلية للمواطنين ده منصوص عليه في حقوق الانسان، لما يأكلونا اكل مسرطن وساكتين

يوصل الامر انهم يجننوا الناس كمان؟

لا حول ولا قوة الا بالله، حاجة تقطع القلب، عليه العوض ومنه العوض

انيميشن حلو قوي

حلو قوي

هو انا ماحدش بيرد عليا ليه؟ باقول ايه العسل اللي احنا فيه ده؟

بيقول لك واحد من حماس لم تبرعات وداخل بيها من مصر لغزة راحوا ماسكينه وقالوا له جبت الفلوس منين، قالهم دي تبرعات ناس للمنكوبين، راحوا ضاربين عليها، اه وربنا، ضربوا على عشرة مليون دولار زكاة مال الناس وفلوس الايتام والمعاقين والمصابين ومنكوبي الحرب اللي هم اصلا سبب في اصابتهم لما قفلوا عليهم بالمفتاح من برة وهم بينضربوا جوة وقالوا لهم: لما تبقوا تموتوا يبقى ندخلكم

وبعدين بيقول لك قارب الاخوة اللي بيحمل مساعدات وفيه صحفيين واطباء ورجال دين مسيحيين ومسلمين واكل ومعونات طبية، قال لك بقى راحوا ناطين عليهم جوة المياه الاقليمية المصرية وظبطوهم بقى، وركاب القارب اتصلوا بمصر ومصر ما ردتش عليهم

ايه العسل اللي احنا فيه ده؟

انا مش سألت السؤال ده قبل كده؟ ماحدش بيرد ليه؟ اللي مش ح يجاوب ح اسقطه واطلعه من المدرسة واوديه المرور واقول لهم انه عليه مخالفة السير عكس الطريق عشان يدفعوه تلاتلاف جنيه ويحبسوه اربع ايام على ذمة التحقيق ويطلقوه من مراته ويدخلوا عياله الاحداث ويضربوا جوز خالته ويخلوا خالته تتفرج، مش بتذاكروا ليه؟ فين جدك اللي كان بيذاكر على اضاءة عمود النور وطلع الاول ودخل كلية الطب

- هو جدو دكتور؟

لا ماهو ساب الكلية عشان يشتغل ويساعد ابوه

الحمد لله ان امي عمرها ما قالت لي الكلام ده وانا صغيرة ابدا بس صحابي في المدرسة كان بيتقال لهم الكلام ده وكانوا مصدقينه وما استغربوش ابدا ان تقريبا تلات اربع جدود اللي في الفصل ذاكروا على عامود النور ودخلو الطب وسابوا الطب عشان يشتغلوا 

عشان كده لحد دلوقت مش عارفة افهم: ايه العسل اللي احنا فيه ده؟ اكيد صحابي في المدرسة زمانهم فاهمين دلوقت

عمرو موسى يستاهل اني اعتذر عن قلة ادبي عليه

انا شفت حواره مع حسين عبد الغني، مش لازم اني اتفق معاه في كل رأي، بس هو له رأي وحجة قوية وله منطق، وعشان كده هو يستاهل اني اعتذر اني قليت ادبي عليه وانا فعلا اتسرعت لاني اولا ما كنتش لسة شفت كلمته اللي قالها في الاول، والحقيقة الكلمة كانت كويسة جدا، ثانيا لان المنظر كان ان اردوغان بيمشي وهو واقف متردد، وثالثا لانه حضر

هو له وجهة نظر ان مدام بيريز ح يتكلم والعالم كله ح يسمع كلمته في دافوس لازم حد يتكلم ويعبر عن وجهة النظر العربية بقوة وان هو ما كانش قاعد مع بيريز، هو كان بيوصل رسالة للعالم والصحف العالمية اشارت لكلمته وده كان مهم

والكلمة اللي هو قالها فعلا كانت مهمة

هو بيقول انه ما مشيش لان في اخر الجلسة فيه تلخيص للندوة وممكن اللي بيلخص الندوة يقول كلام فيه اكاذيب وكان لازم يبقى موجود عشان يعرض وجهة النظر او يعترض في حال ما التلخيص كان مخل

هي وجهة نظر خلافية، ممكن ناس تتفق وناس تختلف، لكن في النهاية وجهة نظر تحترم، وانا شلت البوست اللي قليت ادبي عليه فيه

وبعدين بصراحة وهو بيتكلم مالي مركزه كده ومتعلم ومتنور ومثقف وحاجة تشرف بدل عاطف السكري والواد منصور اللي ما بيجمعش اللي عمونا تصريحات وخلوا رقبتنا قد السمسمة

يعني تخيلوا هو ما حضرش واللي حضر عاطف السكري وللا الواد منصور اللي ما بيجمعش كان ح يبقى المنظر ايه؟

ومع ذلك مش لازم ابقى متفقة مع كل كلامه لكن اقدر اقول اني محترمة وجهة نظره، وفي النهاية الله يكون في عونه، واحد بيتعامل مع اتنين وعشرين محنط، ده احنا محنط واحد وماشيين نكلم نفسنا، امال هو عامل ايه

ده بقى حوار مع عزمي بشارة فيه ردود على كل حاجة عشان بقى كل حاجة تبقى على مية بيضا الكلام اللي بيقوله عزمي بشارة فصل الخطاب، بعد كلامه مافيش كلام

عباس بيلف اوروبا يشحت وبيشتم حماس، وهو عمال يشحت بالمليارات وياعيني عشان بتوع حماس دخلوا اخدوا كام بطانية عشان بردانين عملوا لهم زيطة وزمبليطة

طب ياريت بتوع اسطبل عنتر والدويقة يتعلموا منهم ويدخلوا كده ياخدوا حقهم بدراعهم