مباركفون: ح تولع في البلد

عدد البديل الممنوع

احنا قلنا امبارح ان مطابع الاهرام رفضت تطبع البديل، حمل هنا عدد البديل الممنوع من عند احمد عبد الفتاح.
امبارح بعد الحريقة قعدت اقرا كتاب اسمه صور من المجتمع الاندلسي، شاحتاه من احمد عاطف مش بتاعي، اللي مألفاه اسمها د.سامية مصطفى مسعد، هو مش كبير قوي فخلصته، والدروس المستفادة ان المجتمع الاندلسي من كتر الرفاهية اللي فيه
اطمنوا، اللي زينا بيفضلوا واللي بيعيشوا مرفهين هم اللي بيخلصوا
هي دي حاجة تطمن وللا تقلق؟

هانت عليكوا؟

الجاموسة اللي بتحلب لكوا، البطة اللي بتبيض الماظ، العبدة اللي اشتريتوها وعاملة خدها مداس ليكوا، اللي لمتكوا من الشوارع يا جرابيع يا جعانين وعملتكوا رجال اعمال واصحاب ملايين ومليارات، اللي لميتوا فلوسها وقروضها وبقيتوا بهوات على حساب شقى عيالها
هانت عليكوا تشوفوها مولعة كده؟ ده اللي بلد دي عملته معاكوا لو كانت عملته مع حية كوبرا كانت حولتها لقطة، لو كانت عملته مع ابليس كان زمانه آمن وتاب ورجع ملاك
انتوا ايه؟ جنسكوا ايه؟ معمولين من ايه؟ لا بتحترموا لا قانون ولا حياة بني ادمين ولا تاريخ ولا مستقبل ولا حتى حاضر
ده احنا اللي ما شوفناش منها خير ابدا صعبانة علينا
بكرة النار اللي ولعتوها تاكلكوا
والله ح تاكلكوا
ياريتكوا كنتوا فيها وهي بتولع

منع الطبعة التانية من البديل بسبب المانشيتات

التفاصيل عند عمرو عزت
طبعا البديل كاتبين ان المستندات اللي اتحرقت فيها حاجات بخصوص مندوح سماعين
ومطابع الاهرام قالت لهم التعليمات الامنية مشددة
انا عمري ما شفت نظام اغبى من النظام بتاعنا
هو غبي وللا هو مستهتر بينا؟ والله انا ما يتهياليش انه غبي انا يتهيالي انه عايش الدولشا فيتا واحنا اصلا مش في حسباته وبيقول لنا: اعلى ما في خيلكوا اركبوه
عشان عارف اننا لا مؤاحذة ما بنركبش بنتركب بس

الامن يمنع موظفي المطبعة القديمة من انقاذ محتواياتها

الخبر من اخوان اون لاين
اتفضلوا اهو:

في تصرفٍ غير مسئولٍ منعت قوات الأمن موظفي المطبعة القديمة بمجلس الشورى من الدخول لإنقاذ الأوراق المهمة الموجودة بداخلها؛ وذلك بعد تلقيهم اتصالات هاتفية من زملائهم "النابوتجية" بامتداد نيران الحريق إلى مبنى المطبعة، مطالبين إياهم بسرعة الحضور لمساعدتهم في جمع الأوراق والمستندات المهمة والخروج بها للحفاظ عليها.

إلا أن الموظفين فوجئوا بقوات الأمن عند حضورهم تمنعهم من الدخول، وحدثت مشادات كلامية وصلت إلى حدِّ الاشتباك بالأيدي بين الموظفين ورجال الأمن، ولكنهم أصروا على الدخول قائلين لرجال الأمن: "إحنا اللي نعرف الأوراق المهمة مش إنتم، وإذا كنتم بهذه الشطارة فلماذا لم تسارعوا في إطفاء النيران بدلاً من الاعتداء علينا؟!"، إلا أن الأمن قام باستدعاء قوات إضافية من داخل المبنى وقاموا بتفريق الموظفين بالقوة!!.

----

امممممممممممممم

وكيف كان ذلك على رأي دبشليم؟

اهو اهو

عشان الاغبيا اللي فاكرين نفسهم اذكيا وكل ما قلبي يقول لي حاجة يقولوا لي: شعبوية

يا بتاع القرية الذكية مافيش اطفاء حريقة غبية؟

تحديث:
لمشاهدة صور الحريق اضغط هنا
------
اتصلت باحمد وقال لي ان عمال المطبعة حبوا يدخلوا عشان ينقذوا الورق والامن منعهم!!!!!
----
دلوقت اتصل بيا احمد وبيقول لي الضرايب ولعت مع انها بعيدة قوي والمتحف سليم والصحة سليمة مع انها بين الضرايب وبين الشعب والشورى

الضرايب ولاصحة والبنك ما ولعوش ولا حاجة الحمد لله سلام
بس مجلس الشورى تلاتربعه اتهد
ده كلام احمد عبد الفتاح من موقع الحدث راح بنفسه
صاحبتي قالت لي ان فيه طيارة نازل منها جردل ما صدقتهاش، بس انا شايفة دلوقت الطيارة وفعلا نازل منها جرد
!!!!!!!!!
امال ايه القرية الذكية والتكنولوبيا والفكر الجديد

اسماء المصابين في الحريق

من مدونة احترس انت الان في مصر:
وحصل (إخوان أون لاين) على أسماء المصابين وهم: محمد أحمد عبد الواحد، ومحمود أبو العلا، وإبراهيم سعد، وأحمد محمد مبارك، وعيد إمام حسين، وشعبان سيد علي، وربيع فراج حامد، ورماني حسان، وعلاء محمد إبراهيم.
-----
انا عايزة اعرف بقى
بعد الاهمال الفظيع في الدفاع المدني هل ح يبقى فيه واحد بس في الحكومة الوسخة دي ممكن يستقيل؟

انا زعلانة

زعلانة قوي
ليه كده؟ للدرجة دي؟ عايز ياخد ورق ياخده باي طريقة، ده تاريخنا، دي بلدنا
مبنى الشورى بينهار، ده مش زي احتراق الاوبرا، ده مجلسي الشعب والشورى، دي فلوسنا
الله يخرب بيوتهم
بيقولوا التاريخ بيعيد نفسه
طيب الحاج التاريخ عامل زي زينات صدقي لما كانت بتغني باسطوانة مشروخة وتقول: شوب شوب شوب شوب شوب
ما تعيد نفسك في اي حتة تانية

رياح ايه في الحر ده؟

رياح ايه اللي بيتكلموا عليها؟

هي فين الرياح دي؟ طب انا عايزة حد يحلف لي على المصحف ويقول انشالله يعمى بعنيه لو حس باي رياح

انا شايفة بعيني اتنين بيطفوا الحريق في التلفزيون

اتنين.....اتنين يا بشر

ده لو الناس اللي ملمومة تفت على مجلس الشورى اللي بيتهد دلوقت كانت طفته

احمد عبد الفتاح بيقول المصابين راحوا مستشفى المنيرة

عاجل من احمد عبد الفتاح من موقع الحدث

تحديث: احمد عبد الفتاح نزل صور على موقع ابناء مصر

حريق القاهرة؟ هو احنا بقى ح ناخد 57 قفا على سهوة؟ المفروض نكون اتعلمنا بقى

امبارح احمد المسلماني كان بيتكلم عن كتاب انجليزي بيقول "مصر على وشك الثورة" والكتاب بيقول ان كل حوالي تلاتين سنة مصر تقوم بثورة

ماشي زي بعضه، بس انا مش عايزة ضباط احرار، ومش عايزة ناس تحجز تذكرة في السينما وتخلع ومش عايزة ناس بتبعت جوابات لاوباما ومش عايزة توماس ومش عايزة مخاليل ولا اغبيا ولا خونة...اه انا سامعة قلة الادب واحد بيقول: تحبي نغير لك الشعب يا ست هانم؟

ما اعرفش اتصرفوا لكن ما تروحوش تيجبوا لي واحد موكوس ويبقى محسوب عليا ثورة

-----

احمد عبد الفتاح هناك، الجامعة الامريكية سليمة، مجلس الشورى في طريقه الى الانهيار الكامل على اغلب الظن

كل الناس شاكة في انها فعل فاعل زي ما انا كنت شاكة يعني انا مش مجنونة

فيه مصابين كتير قوي ولا واحد منهم راح القصر العيني الفرنساوي اللي هو جنب مجلس الشعب ومش عارفين ودوهم فين

اول حاجة اتحرقت بيقولوا مكتب صفوت

!!!!!!!!!!!!!!

مين اللي عنده ملفات عايز يخلص منها في مجلسي الشعب الشورى

تحديث تاني: انهيار الدور الثالث من مبنى الشورى

والله العظيم تلاتة فيها ان

تحديث عااااااااااااااااجل:

احمد نجيب مراسل قناة النيل للاخبار وهو بينقل اتخانق مع بتوع الامن وسمعناه بيقول: اعتقلني

احمد نجيب بيقول لم يتم السيطرة وان فيه انفاجارات
مين؟
استبعدوا الشبهة الجنائية بسرعة كده؟
ده عند امه يا ادهم

----

تحديث: المذيعة بتسأل فتحي سرور: هل فقدت مستندات هامة؟ جاوب عليها باللفظ: مافيش حاجة هامة

صدقت والله

والنبي انا هابلة اه بس مش للدرجة دي

دلوقت اسرائيل عملت هيصة وبوليكة عشان الجزيرة احتفلت بسمير القنطار وقعدوا يشتموا في غسان بن جدو وهددوا بطرد الجزيرة من فلسطين المحتلة حلو؟
جات هآرتس كتبت ان الجزيرة اعتذرت، حلو؟
جات الجزيرة قالت احنا ما اعتذرناش ولا حاجة وح نرفع قضية، حلو؟
لا مش حلو
عشان الجزيرة كتبت على موقعها كده:

وأوضح الناطق أن هيئة التحرير في اجتماعها الدوري كانت قد أصدرت توضيحا بشأن حلقة حوار مفتوح مع الأسير المحرر سمير القنطار، وأشادت هيئة التحرير بالبرنامج، غير أنها تحفظت على الأجواء الاحتفالية التي صاحبت الحلقة، ولم يتضمن ذلك أي اعتذار لأي طرف.

!!!!!!!!!
انا باحب الجزيرة وكل حاجة، بس نفسي افهم يعني ايه اصدرت توضيح؟ توضيح بخصوص ايه يعني؟ ومين يعني الجهة اللي الجزيرة بتوضح لها؟ اسرائيل؟ ما يولعوا بجاز وسخ هي اسرائيل كانت اصدرت توضيح لما القنوات بتاعتهم احتفلت بعزام عزام وابدت اي تحفظات على "الاجواء الاحتفالية" اللي صاحبت عزام وهو نازل بوس في شارون وشايل علم اسرائيل على كتافه؟
حد بقى يفهمها لي عشان انا واحدة تعليمي على قدي

عزازيل

رواية عزازيل للدكتور يوسف زيدان لسة مخلصاها حالا، ما قدرتش اسيبها لحد ما خلصت في ايدي
انصحكوا تقروها حلوة قوي. اصدار دار الشروق

السلاح الاسرائيلي الجديد

النبر
آه...ماهو بعد ما امريكا رفضت تدي اسرائيل سلاح عشان تضرب ايران وقالت لها بالفم المليان: بعد ما حدث في 2006 لا يمكننا الاعتماد عليكم. زي ما كوندوليزا قالت وهي بتهزأ اولمرت وتتخانق معاه
دلوقت سابوا كل حاجة وماسكين في نسوانا ينبروا عليهم ليه وليه غزالة جابت سبعة في بطن واحدة
الله اكبر في عينيهم هو احنا لسة فيه حد بيحسدنا؟ فيه اغنية نوبية بتقول:
من صغر سني منجر العم
(عاوج العمامة)
صابني طرش
بعد الطرش صابني عم
(صابني عمى)
كله وخصيمي ما راضي
(كل ده ولسة خصومي مش راضيين وبيحسدوني)
يعني هي الست عارفة ح تأكلهم منين؟ ما يسبونا في حالنا بقى
الا بمناسبة يسيبونا في حالنا شفتوا المسلماني النهاردة؟ الا الراجل ده نيموذج للي بيكوم المصايب على دماغنا واخرتها بيقول لنا ان فيه احتمال تحصل حرب عالمية تالتة بين روسيا وامريكا
واحنا دورنا ح يبقى ايه؟ هو احنا في الحرب العالمية الاولى والتانية كان بيبقى دورنا اننا بنفتقر
اكيد ده ح يفضل دورنا برضه، اهم حاجة ما يعملوش قواعد حربية عندنا خلي غزالة واللي زي غزالة يخلفوا احنا ما حليتناش غير الخلفة هي سلاحنا الاخير وواجبنا الوطني

وادي خبر حلو تاني اهو

بعد خبر تفوق الاطباء المصريين اللي بيغزلوا برجل حمار فيه خبر جديد وهو توقيع الجماعة السلفية في لبنان وثيقة تفاهم مع حزب الله مؤسسة على مواجهة العدو الامريكي والعدو الصهيوني ودعاوى التكفير والتصدي للفتنة ومهيجي العوام
ربنا يهديهم للصالح، عرفت من الخبر ان فيه اتنين شهال، الشهال الكبير اللي مسئول عن الجماعة السلفية واللي وقع وثيقة التفاهم وداعي الاسلام الشهال او بالاحرى دعي الاسلام الشهال اللي قال ان الوثيقة دي خطر على السنة وبتصب في مصلحة الشيعة
والله لو مواجهة الامريكان والصهاينة والتصدي للتكفير والفتن ضد السنة يبقى ده معناه ان مصلحة السنة في موالاة العدو الامريكي والصهيوني واثارة الفتن وتكفير الناس؟
اذا دي مصلحتنا يبقى ان شالله ما تتقضي لنا مصالح ابدا
ربنا يهدي العاصي
اديني اهو باجيب لكوا اخبار حلوة عشان ما تقعدوش تقولوا لي انت كئيبة
على الله بقى يدخل لي زعماء الكآبة ويسفهوا الخبر ده زي اللي سفهوا خبر الانجاز الطبي المصري ماهو اصلنا بقينا مدمنين نكد، بناخده سرنجات وسفوف ونشوق

لا والمصحف؟ جمال مبارك عامل مدونة

آآآآآه، بما اني زعيمة نظرية المؤامرة فانا شايفة ان المؤامرة انهم ينقلوا لنا دماغنا
جمال مبارك فتح مدونة؟
يا سلااااااااااااااام

السادة رجال الدين..ممكن ترحموا دين ابونا؟

مع كامل احترامي وتقديسي وتبجيلي واعزازي
رجل الدين دوره انه يبقى قدوة صالحة ويبقى مثال للتضحية والايثار والتطبيق العملي لتعاليم الدين مش دوره انه يطلع تلاتين ابو الناس ويكفرهم
لما كنا في دورة عن التدوين وحقوق الانسان في الشبكة العربية لمعلومات حقوق الانسان محمود عبد الفتاح قال لنا: ح نعمل من الحاضرين مجموعتين وح اديكوا موقف وشوفوا كل مجموعة تحله ازاي الموقف هو عبارة عن مركب فيها مريض بالايدز وعاهرة ومحامي وقاضي وطبيب ورجل دين مسيحي ورجل دين مسلم، المركب ح تغرق ولازم يرموا اتنين من المركب ح ترموا مين؟
المجموعة الاولى كان فيها مينا والمجموعة التانية كان فيها انا وناس تانية
المجموعة اللي كنت فيها اجمعوا على القاء مريض الايدز والعاهرة، قلت لهم بس العاهرة من حقها فرصة يمكن تتوب، ومريض الايدز من حقه فرصة يمكن حد يلاقي له علاج والمفروض ان رجلين الدين بيوعظوا الناس بالايثار والتضحية وحب الخير للناس والاستشهاد في سبيل حياة اسعد للاخرين يبقى مفروض اكبر واقوى موعظة حقيقية يعملوها انهم يضحوا ويرموا نفسهم عشان غيرهم يعيش اعتقد ان ده ح يهز بقية الناس اللي في المركب ويمكن العاهرة تعيد حسابتها ويمكن القاضي والمحامي والطبيب يتقوا ربنا اكتر لما يرجعوا بلدهم
ومريض الايدز يزداد ايمانه بالله ورضاءه بقضائه الغريبة اني ما اخدتش ثانية واحدة عشان اقنع كل المجموعة اللي بصمت بالعشرة على كلامي (المجموعة كان فيها سودانية واماراتي وكويتي وشاب مصري عنده ستاشر سنة وكلهم وافقوا قبل ما اكمل الجملة)
وفوجئت لقيت المجموعة التانية ضحت برجلين الدين بس من وجهة نظر تانية: احنا نعرف ربنا كفاية ومش محتاجين حد يعرفهولنا ...عايزين يخلصوا منهم يعني
انا مش عايزة اخلص منهم، انا عايزاهم يا اما يبقوا قد المسئولية اللي حطوا نفسهم فيها ويبقوا مثال حي للمواعظ اللي بيقولوها للناس يا اما يعتزلوا الناس لحد ما ربنا يصلحهم
لحد دلوقت مافيش فتنة ولا كارثة الا كان وراها رجال دين
صحيح مش دايما، يعني مثلا مقاومة الاحتلال الفرنسي خرجت من الازهر، مقاومة الاحتلال الانجليزي خرجت من الازهر والكنيسة
بس لما يبقى فيه احتلال ح نبقى نجري عليهم...يرحمونا بقى من استظرافهم والنبي
ده بمناسبة الدم الطاهر والحيوانات اللي مفروض نعطف عليهم

تصوروا لقيت خبر حلو؟ والمصحف خبر حلو

آه والله العظيم، سبق علمي للاطباء المصريين، انا فرحانة قوي، تقولوا عليا هايفة تقولوا عليا هابلة بس انا فرحانة مووووووووووووووووت لانه سبق طبي للاطباء المصريين وفي مستشفى مصري هنا في مصر مش دكتور مصري وسافر برة
يااااااااااااااااا انا مبسوطة، الا يا ترى دول بياخدوا من وزارة الصحة كام في الشهر؟

دم المسيحي مقدس وكلوة المسلم للحيوانات

بلغني من مصادر مواقعاتية موثوق بيها اللي هي مينو خطيبي المسيحي ان مالك مستاء من بوستاتي الكتير، طبعا بعد الله اكبر في عينك يا مالك، طب انا اعمل ايه؟ حد يوصف لي مهدئ او يشيل الريدر من قدامي ولجل غباوتي مشتركة في معظم المدونات ووكالات الانباء وعلى رأسهم مدونة مينو اللي كاتب النهاردة بوست يحرق الدم
البوست السعيد لمراقب مصري بيزف لنا خبر ان الدكتور حمدي السيد - اللي انا كنت باحبه قوي بالمناسبة - طلع قرار حكيم (بيدي حقن) بمنع نقل الاعضاء ما بين المسلمين والمسيحيين وتعلل باننا مجتمع لم يصل الى هذه الدرجة من الانسانية اللي تخلي المسلم يتبرع لمسيحي ومسيحي يتبرع لمسلم ببلاش! وانا اقول ياربي يعني مينو ذاكر في الثانوية العامية لما اتعمى واهله صرفوا اللي وراهم واللي قدامهم عليه في كلية الطب وبعدين ساب الطب؟ ده اكيد مجنون، طلعت انا اللي مجنونة
وعشان مينو يحب يكركب المصايب ذكر تصريح الانبا بيشوي اللي قال من فترة انه لا يجوز للمسيحي يتبرع للمسلم بالدم عشان دم المسيحي مقدس
ييجي واحد من الازهر يعترض على قرار حمدي السيد ويقول: لا ازاي ما نتبرعش للمسيحيين ده الاسلام امر بحسن معاملة الحيوانات فما بالك باهل الكتاب
بس نسي يقول: اللي ما يفرقوش عن الحيوانات حاجة، او على احسن التقديرات افضل شوية من الحيوانات في نظر المخاليل اللي متحكمين في حياتنا وامخاخنا
يعني قلنا رجال الدين المصايب بتيجي من تحت راسهم قام ربنا رد عليا عشان الظاهر اتجنيت على رجال الدين وبعت لي التصريح بتاع الدكتور حمدي السيد عشان يعرفني اننا شعب واطي على رأي مينا
دكتور...طبيب...عالم..يقول اصلنا عملنا بحث ولقينا 48 مسلم اتبرعوا لمسيحيين بينما 5 مسيحيين بس اتبرعوا لمسلمين وده دليل على انها تجارة اعضاء؟
ايوة ده دليل على انها تجارة اعضاء على اساس ايه؟ ان المسلمين اوطى من المسيحيين بالطبيعة؟ وللا هو خايف على اعضاء المسلمين ليلهفها المسيحيين ويدخلوا بيها الجنة زي ما الانبا بشوي خايف المسلمين ياخدوا دم من المسيحيين ليدخلوا بيه الجنة لا سمح الله؟ وللا عشان المسيحيين اغنيا ولاهفين بقى فلوس البلد وعندهم صيدليات ومحلات جواهرجية بقى وبيلغوا في الفتة والمسلمين - اللي زي احمد عز - فقرا ياعيني؟ يعني مش فاهمة المقدمات المنطقية بتاعة عدد المسلمين والمسيحيين ادت ازاي لانها تجارة؟ يفهمنا منطقه...آه آه عشان القسيس بيسحر، وممكن ياخد فص الكبد وللا الكلوة ويشرب مية بالل فيها ورقة بالحبر الاحمر ويتف فيها..صح؟ ياااااااه ده العلم نورن صحيح
عموما احب اطمنهم اننا ان شاء الله كلنا داخلين الجنة لان مش معقولة ربنا يودينا النار دنيا واخرة
الا اذا كانت القيامة قامت واحنا فعلا في الجحيم دلوقت والاخ السيد وقطب وبشوي هم الزبانية
مش عارف الدكتور المحترم اللي متعلم مناهج بحث ان القضية مش قضية مسلم ومسيحي وانما قضية غني وفقير؟
مش عارف ان معظم - ان لم يكن كل - اللي بيتبرعوا بالاعضاء بيتبرعوا لانهم فقرا ومستعدين يبيعوا عيل من عيالهم عشان لقمة عيش؟ بدل ما كان يتعب نفسه ويعمل بحث واسقتصاء عشان يشوف نسبة المسلمين المتبرعين من نسبة المسيحيين المتبرعين (اللي طبيعي يبقوا اقل لانهم اقل في العدد يعني) ما عملش ليه بحث عشان يشوف نسبة الفقرا المتبرعين ونسبة الاغنيا المتبرع اليهم؟
انا واثقة انه كان ح يلاقي نسبة الفقرا المتبرعين للاغنيا مية في المية بصرف النظر عن الدين
وعليه فكان واجب عليه يطلع قرار بان المتبرع يقدم بيان حالة اقتصادية لمنع تبرع الفقراء باعضائهم اللي مالهمش غيرها عشان ياكلوا بيها عيش
حسبنا الله ونعم الوكيل

والله يا معتوق لو عرفت تجيب رقبتهم لاعملك زعيم الامة العربية

ودي نهاية كل ست رمرامة ذوقها وحش في الرجالة
الله يرحمك يا حاجة سوزي جتك نيلة في ذوقك بقى حد يسيب القمر

ده:

ويروح لده؟

الله يرحمها البعيدة ما كانش عندها نظر
والله يا اخ عادل لو عرفت تجيب رقبتهم لاعلق صورتك في المدونة واعملك زعيم واطالب بمنحك الجنسية المصرية...وللا انت مش ح ترضى اكيد..لك حق
والله تبقى راجل عترة وجدع وما جابتاكش ولادة لو جبت لنا رقبتهم
بس خلي بالك من نفسك احسن يعملوا فيك حاجة...ربنا معاك تخلصنا من المصيبة اللي احنا فيها
مين عارف يا عيال مش يمكن ربنا ينصفنا على ايده؟ يمكن ربنا عارف اننا ولايا وغلابة وبعته لينا يبرد نارنا بعد موضوع العبارة...على الله