يالهوي ياما؟

وما اروع ان يتحد قطبي الامة لاسعاد الفقراء، انا المصري كريم العنصرين، بعت لحم الحمير بين الاهرامين
....واقول لك عاللي خلاني ابيع حميري وكلباني...اسعاد الفقراء
والله العظيم عنيا دمعت من غلبهم، انا مصدقاهم، والله مصدقاهم، شوف الناس مخها وصل لفين؟
يادي الغلب يا ربي
اتفضل يا سيدي اتغم هنا

بالنوسبة لاننا شعب همجي

اصلنا مش بلد اكسلانسات وعشان كده اضغط الرابط ده

حمد الله ع السلامة

حمد الله ع السلامة يا اسراء انت ونادية
عقبال الباقي كلهم

آدي شهادة بلطجية المحلة واهاليهم

حد شاف جلسة مجلس القورة امبارح؟ طالع واحد من الداخلية يقول قلة مندسة وانا عارفهم واحد واحد بالاسم زي ما انا عارف اللي قاعدين هنا واحد واحد بالاسم! طب ده تهديد للمندسة وللا تهديد لاعضاء مجلس القورة؟
وطلعتش بقى الستش عائشة وبتشتشكلم كدشه وقالت احلى كلام بصراحة حاجة كده زي: البتش فاتشن بنتش جوزي بتشاخد البتش رانيا بنتشي وتعلمها المراهكة
وطبعا الكلة المندسة كانتش عايزة تشعلم الاهالي المراهكة
وكلام بقى كتير عن دور الشرطة العظيم وواحد اهبل مش عارفة ده مين رجله والقبر ومش عايز يتقي ربنا قال ما معناه انا قلبي بيتقطع على الشرطة اللي احنا بنحملها فوق طاقتها وبندخلها في كل حاجة وهي بنتجز: ندخلها في موضوع العيش تنجز ندخلها في اعتصامات تنجز ندخلها في عمال تتجز
كان ناقص يقول: والله شالوا البيت شيل وبقى الغسيل بيشف كده بيشف
والراجل بتاع الداخلية ابو نضارة حمرا - والله نضارته حمرا انا مش قليلة الادب - قال اولا احنا من حقنا نستخدم القوة بافراط ومع ذلك ما استخدمناش القوة بافراط واحنا ما عملناش حاجة عليا الطلاق والعتاق بالتلاتة مافيه اي حاجة وقدر كمان ان فيه اي حاجة مافيش اي حاجة
وكل اللي عملناه من حقنا واكتر من كده برضه من حقنا
طيب هلبت وزير الصحة بنفسيته قال ان فيه ناس ماتت وان فيه عدد من المصابين كبير من الاهالي ده من حقهم؟
وربط المصابين بكلبشات في السرير من حقهم؟
ومصادرة الرصاص اللي كان بيطلع من اجسام المواطنين من حقهم؟
ويا سيادة وزير الصحة يا طبيب قبل ما تبقى وزير يا ملاك الرحمة سماحك للشرطة بربط المصابين من حقك وحقهم؟
انا مش شايفة اي عذر لاي طبيب، مهما كان صغير، انه يسمح للشرطة انها تصادر الرصاص وما يكتبش تقرير بيه ولا يعمل بيه محضر، ح يعملوا له ايه يعني؟ ح يعملوا له ايه اكتر من اللي عملوه في الناس؟ هو احسن من الناس دي في ايه عشان يخاف على نفسه وما يخافش عليهم؟ حسبنا الله ونعم الوكيل
حسبنا الله ونعم الوكيل
حسبنا الله ونعم الوكيل
وتكسير العربيات والمدارس وتلبيسها للمواطنين من حقهم؟
واول ما الناس تبتدي تهتف يروحوا فاتحين عليهم رصاص مطاطي وقنابل مسيلة من حقهم؟
وضرب مواطن وتلبيسه تهم تودي في داهية بعد ما يطلعوا مخه برة لمجرد انه فتح المحل بتاعه من حقهم
شوف شهادة والد الضحية البلطجية عند وائل عباس
طب ماحدش فيهم رد على الصور اللي بتثبت تورط الامن في التخريب
ماحدش رد على الصور والفيديوهات اللي بتثبت ان الاهالي هم اللي انضربوا وما شفناش عسكري مراسلة واحدة مصاب هم بيقولوا ان فيه من الشرطة مصابين، احنا ما شفناش غير عسكري واحد قاعد في السرير زي القرد مافيهوش اصابة واحدة وبيقولوا انه مصاب، واللي اصابوه هم الناس اللي مخها طالع برة
ماحدش رد على ان الشرطة قتلت الطفل احمد وهو واقف في بلكونة بيتهم من غير ايتها سبب واضح
ماحدش رد على شهادات الاهالي المتصورة
هم بيناموا ازاي اذا كنت انا مش عارفة انام؟
طب المدونين - المندسين - جايبين صور وفيديوهات وشهادات وهم مالهمش مصلحة للانحياز للمحلة
- على حسب علمي مافيش مدون مناسب من المحلة - ولا مناسبين اصلا عشان مش معاهم فلوس يناسبوا حد
ولا بيقبضوا في التدوينة خمستاشر الف جنيه زي تامر امين
السادة اعضاء مجلس القورة بقفاهم العجينة وكروشهم السمينة وجلودهم اللي بتضوي ودماغهم التخينة
ايه الادلة اللي عندهم غير شوية تقارير متفبركة ورغي ولت وعجن بخصوص البتش فاتشن بنتش جوزها؟
طب المندسين قدموا صور وفيديوهات وشهادات اهالي وحقائق ان الاهالي هم المصابين وان المتهمين بالبلطجة كلهم مافيهمش واحد سليم بالصوت والصورة
طب حد يرد علينا يا مجلس القورة
حد يرد علينا يا ام رانيا
حد يرد علينا يا عم الحاج اللي عايز تصادر الجرايد المستقلة حفاظا على امن البلاد
حد يرد علينا يابو نضارة حمرا
حد يرد علينا يابو كريم اساس وصبغة حمرا برضه
والله انا ما قليلة الادب هم اللي امبارح كانت كل حاجة عندهم حمرا
ملحوظة: حتى كريم الاساس كان مدي على ضي احمر، انا قلت فيه حاجة غلط في الالوان
قلت اشوفه في تلفزيون تاني لقيت الليلة كلها حمرا برضه في التلفزيون التاني
طب نعمل ايه؟
نطالب بمحكمة دولية مثلا تحقق في الموضوع؟
نبعت الصور والتقارير والفيديوهات للقلل المنتحرة؟ طب شوفوا لنا سكتها، انا باتكلم بجد، اللي عنده عنوانهم يبعت لهم
ماهو زي ما بتدينوا الناس بمكالمات تليفون الاولى تشوفوا الفيديوهات وللا نستغيث باسيادكوا اللي بيدوكوا المعونة عشان يقطعوها
احنا عن نفسنا حد الله ما بينا وبينها ما بيوصلناش منها سنت واحد
--------
اللي عايز يساعد الجرحى او الاسر المصابة في اولادها وارزاقها فيه طريق مشروع وقانون وآمن يافندم وهو
التوجه الى مركز هشام مبارك في واحد شارع التوفيقية او الاتصال بهم على تليفون
25758908
فيه اغاثة وفيه كل وسائل المساعدة القانونية والشرعية والدستورية وكل حاجة يعني
مع تحيات مركز هشام مبارك: ابانا الذي في حقوق الانسان

احذر من كليك هير

ح تلاقي في مدونتك واحد جاي يعلق وكاتب
click here
او اي حاجة فيها
here
وسايب لك لنك على الكلمة اوعى تقف على الكلمة وتفتح اللنك لان ده بيبقى فيروس
وياريت لما يسيب لك تعليق زي ده تمسحه ليجي واحد يتكعبل فيه ويفيرس له الجهاز بتاعه
منهم لله بقى...جاتها نيلة اللي عايزة خلف

رفض استئناف

الاسم : صابر

التهمه : مصري

السن : أصغر سن عصري

رغم انسدال الشيب

ضفاير ضفاير من شوشتى لما لتحت خصري

المهنه : المهنة وارث عن جدودي والزمان

صنع الحضاره والنضاره والامان

البشره : قمحى

القد : رمحى

الشعر : اخشن م الدريس

لون العيون : اسود غطيس

الانف : نافر كا لحصان

الفم : ثابت فى المكان

ولما جيت ازحزحه عن مطرحه

كان اللى كان

جهه الميلاد: فى أي اوضه مضلمه

تحت السما

على ارض مصر

من أي دار وسط النخيل

مطرح ما يجري النيل

ما دام ما يكونش قصر

الحكم: من سبع تلاف سنه

وانا هنا راقد سجين

اطحن على ضراسي الحجر

من الضجر

وابات حزين

ملحوظة: سالنى سائل حبستك طالت وليه

لانى طيب وابن نكته وابن ايه

ما فيش مخالفه ركبتها ضد القانون

لانى خايف

والقانون سيفه ف اديه

تسأل عليا المخبرين فى أي حين

تسمع وتفهم قصتي الف وبيه

الاسم صابر ع البلا ايوب حمار

شيل الحمول من قسمتى والانتظار

اغرق فى انهار العرق طول النهار

والم همى فى المسا وارقد عليه

عرفت ليه ؟

أحمد فؤاد نجم

معتقل القلعة

1974

لاغاثة المحلة

اللي عايز يساعد الجرحى او الاسر المصابة في اولادها وارزاقها فيه طريق مشروع وقانون وآمن يافندم وهو
التوجه الى مركز هشام مبارك في واحد شارع التوفيقية او الاتصال بهم على تليفون
25758908
فيه اغاثة وفيه كل وسائل المساعدة القانونية والشرعية والدستورية وكل حاجة يعني
مع تحيات مركز هشام مبارك: ابانا الذي في حقوق الانسان

بلاغ إلى النائب العام

جبهة الدفاع عن متظاهري مصر

السيد المستشار / النائب العام

تحية طيبة ... وبعد،،

الموقعون أدناه من المواطنين المصريين وقد كانوا متوجهين إلى مدينة المحلة الكبرى يوم الجمعة 11 أبريل 2008 لإبداء التعاطف والتضامن الإنساني مع ضحايا أحداث المحلة، يتقدمون لسيادتكم بطلب تحريك الدعوى ضد:

· وزير الداخلية بصفته.

· ضباط مباحث أمن الدولة (طنطا): العقيد/ أحمد فتحي والمقدم/ أحمد شتا.

قام المذكوران باحتجازنا على قارعة الطريق عند مدخل طريق طنطا المحلة من طريق مصر – الإسكندرية الزراعي، وقاموا بمنعنا من حرية الحركة واحتجاز السيارات التي كنا نستقلها وذلك من الساعة الحادية عشرة صباحا وحتى الثالثة والربع بعد الظهر، دون سند من القانون ودون إبداء أي أسباب لهذا الاحتجاز.

كما قام المذكوران بالاشتراك مع ضابط ثالث يرتدي الملابس الرسمية بالاستيلاء عنوة على مفاتيح السيارة الخاصة للأستاذة الدكتورة / منال عبد المنعم المنياوي، وهويتها الشخصية ورخصة السيارة (سيارة فيات بونتو – رقم 122591 ملاكي القاهرة).

مقدمو البلاغ:

1. أ.د. نادر عبد المقصود فرجاني – خبير دولي في التنمية – بطاقة 24408202100155

2. أ.د. منال عبد المنعم المنياوي – أستاذ بكلية طب القصر العيني – بطاقة 26104190103003

3. أ.د. مديحة إميل توفيق دوس – أستاذ بكلية آداب القاهرة – بطاقة 24708040102004

4. أ.د. ثريا سيد عبد الجواد – أستاذ بآداب المنوفية – بطاقة 25210030102583

5. د. يحيا عباس حامد عبد الله القزاز – أستاذ مساعد بكلية علوم حلوان – بطاقة 20605042700677

6. د. ماجدة محسن أباظة – باحثة - بطاقة 26305241300386

7. د. عايدة عصمت سيف الدولة - أستاذ مساعد بكلية طب عين شمس- بطاقة 25411102102066

8. د. سوزان عبد المعطى فياض –طبيبة- بطاقة 24709041201002

9. منى حامد امام –طبيبة- جواز سفر 483707 صادر من مصر الجديدة في 6/6/2001

10. د. ماجدة محمد عدلى –طبيبة- بطاقة 25303100101243

11. د. راجية محمد شوقى الجيرزاوى –طبيبة- بطاقة 25303162200043

12. د. هاني مصطفى محمد الحسيني – عضو هيئة تدريس بكلية علوم القاهرة – بطاقة 2600692100479

13. د. ليلى مصطفى إسماعيل سويف – مدرس بكلية علوم القاهرة – جواز سفر 375364 صادر في 6/8/2007

احمد مات يا كفرة

كتب مراقب مصري:

أحمد مات يا كفرة يا ولاد الحرام
أحمد مات يا حبيب يا عادلي
أحمد مات يا حسني!!!

هيلاري وماكين بيقولوا على اوباما طبقي

آه وربنا، هيلاري الميليارديرة وماكين ابو كرش بيقولوا على اوباما طبقي
ليه بقى؟
اوباما قال ان الطبقة العاملة عندها احساس بالمرارة والغضب والكراهية وبتفرغ مشاعرها المكبوتة دي اما بالسلاح او بالتشدد الديني او الاساءة للمهاجرين
قوم ست هيلاري تقول: ايه ده الكلام ده؟ ده كلام طبقى
!!!!!
هلبت ما افلام الست شادية بتاعة الفقير بياكل لقمة الفول وهو سعيد وبينام وهو متهني البال واغنية محلاها عيشة الفلاح كانت بتوصل امريكا مترجمة بقى
ولزمن وحتمن الست والدتها حكت لها قصة: البس قميص اسعد واحد في المدينة وطلع اسعد واحد في المدينة ما عندوش قميص وكل القصص والافلام والمسمسات اللي معمولة عشان تريح ضمير امثالها واللي مفادها: هم الفقرا مبسوطين بحالهم كده...دولم حتى اسعد من الاغنيا
واللي يقول ان الطبقة العاملة طلعان ميتين ابوها لحد ما كفرت وكرهت الناس ونفسها والعيشة واللي عايشينها يبقى طبقي
طبعا اوباما جاله ازبهلال من رد فعل هيلاري وماكين وقال ما معناه: نعم؟ افندم؟ انا طبقي؟ أنا؟ أنا؟ أنا؟
واردف قائلا ما معناه: اظن يعني انا مش محتاج اقول ان دي نتيجة طبيعية للفقر...وللا محتاج؟
والنبي ماتش الكورة اللي باناتهم هم التلاتة يلعبوه زي ما يحبوا بس بلاش يتكوا على حاجات توجعنا احنا
خليهم في التأمين الصحي وحرب العراق

هام هام هام

شوفوا التقرير المصور ده عند وائل عباس
كان المفروض يبقى عشرميت حد مع وائل ومينا مش هم بس، التقرير المصور ده مهم جدااااااااااااااا
انا شايفة ان التقرير ده بيأكد ان الاولوية دلوقت للمحلة
يعني هم ما يشبهوش غزة؟ وللا عشان غزة فيها تصوير وتلفزيونات؟ على عينا وراسنا غزة بس دول مش ولاد حرام ولا حاجة

بدل اضراب التهريج

يعني مش لو كان الناس اكتر من ستة وتلاتين كان الوضع اختلف؟ بدل لعبة اضراب عيد ميلاد الريس البايخة دي واللي احلق شنب احمد نظيف لو نجحت مش لو كان عدد اللي راحوا المحلة بالميات وللا يا سلام لو كان الف وللا الفين مش كان الوضع اختلف؟
انا بصراحة مش من عادتي ان اطلق دعاوى لان دي مسئولية كبيرة وانا ما اقدرش اتحملها انا اخري اتحمل مسئولية نفسي والبي الدعاوى اللي انا شايفة انها صح حتى لو مافيش غيري اللي ح يلبيها زي اضراب ستة ابريل
بس المفروض ان الاضراب ده خطوة، لو كانت نجحت من غير تصعيد كانت تتكرر لكن بما ان حصل تصعيد وفيه ناس هم لوحدهم تحملوا نتيجة الاضراب، سواء المعتقلين دلوقت او اهل المحلة - من المعتقلين والمحاصرين - يبقى المفروض اللي دعا للاضراب كان عامل حسابه ان يبقى فيه خطوة تانية
مش عامل حسابه وماشي كظماني؟ معلش ما جراش حاجة ما الدولة خطتها دلوقت اللا خطة واحنا عادة شعب ماشي كيفما اتفق بالبركة كده
طيب اللي عمل الدعوة للاضراب ليه ما عملش دعوة ان الكل يروح المحلة، ويبقى معاهم مجموعة من المثقفين والفنانين والقوافل الطبية والصليب والهلال الاحمر والبشرية كلها تروح معاهم بحيث يبقى العدد يا سيدي بالميات بلاش بالالاف
وده يفضل يتكرر كل يوم
ما قلتش ليه من الاول؟ عشان انا مش باتحمل مسئولية الناس ولا حاطة نفسي في موقع زعامة، انا على استعداد اتحمل مسئولية قراراتي الشخصية لابعد الحدود بس غير كده انا مش زعيمة ومش ناوية ابقى زعيمة ولا مؤهلة للزعامة، والزعامة مالهاش علاقة بالسن ممكن عيل عنده تمنتاشر سنة ومؤهل للزعامة اكتر من واحد عنده تمانين سنة
:p
وفي كل الاحوال وفي كل مراحلي السنية انا مش مؤهلة للزعامة عشان ادعو لحاجة زي دي واتحمل مسئولية الناس اللي ح تروح
اروح لوحدي واقول اني رايحة، اروح مع ناس قالت انها رايحة، لكن ما ادعوش الناس وانا مش متأكدة اني اقدر احميهم او اتحمل مسئوليتهم
انا مش موافقة على اضراب مايو
انا مش موافقة على اضراب مايو
انا مش موافقة على اضراب مايو
انا مش موافقة على اضراب مايو
ولو اجمع عليه الناس ح اضطر اشارك فيه وانا كارهة
والاقتراح البديل ان يتم التوافد على المحلة باغثات ومعونات مادية ومعنوية وباعداد كبيرة ومعاهم ناس شخصيات يعني
ويتعمل حملة من دلوقت اسمها انقذوا المحلة او اي حاجة بقى
المفروض انها اتأخرت قوي
والاكيد ان اللي ح يروح مش ح يعمل مظاهرة طبعا ولا وقفة احتجاجية، الناس مش ناقصة قرفنا يعني ولا ناقصة مزايدتنا اللي عايز يقف وللا يقعد يبقى في مدينته ما يروحش يرمي بلاه على الناس
القوافل المتوافدة على المحلة المفروض انها رايحة للمساندة والمساعدة المادية والمعنوية والطبية وخلافه
ويبقى فك حصار وتقديم واجب عزاء واغاثات انسانية عشان الحكومة ما يبقاش لها حجة
يا سيدي اي حد يروح من المواطنين العاديين اللي هم لا تبع جمعية ولا دكاترة ولا حاجة يقول انا داخل اتبرع بالدم داخل اعزي
المهم ان العدد يبقى كبير وهادي
هادي
عشان ما يعملش مشاكل للناس اللي احنا رايحين لهم واللي مش عايز يبقى هادي يتخانق في مدينته
ده اقتراح، اقتراح للدراسة مش دعوة وانا مش متحملة مسئولية الناس ولا شايلاهم في رقبتي انا ما اقدرش على حاجة زي دي
لكن اضراب مايو اضراب تهريجي وانا مش موافقة عليه
وحاسة ان الناس مش ح تتفاعل معاه
ومع ذلك على عكس ما الاخوان عملوا: ح اشارك فيه بالرغم من اني معترضة غصبن عن بوزي: ح اقعد في البيت واعلق الحتة السودا ومش ح اشتري الصحف القومية لاني اصلا مش باشتريها ولا حتى باشوفها على النت هو انا مستغنية عن مرارتي
ومش موافقة
مش موافقة
مش موافقة
مش موافقة
مش موافقة
مش موافقة

مساء الموز

انا لسة صاحية حالا والله نمت زي القتيلة
مش عارفة مين اللي اختار مدخل طنطا، طبعا انا ما اعرفش الفرق ما بين مدخل طنطا ومدخل سرس الليان انا عمري ما رحت خالص، كمان مش عارفة ليه رحنا بالعربيات كان المفروض نروح بالاتوتبيس، وما اعرفش ان ده كشك مرور

ثم افرضوا كشك يعني ناس داخلة المحلة، هو احنا داخلين بيت مشبوه؟ دي بلد كل الناس بتدخلها
عموما انا آسفة على رداءة التصوير لاني كنت باصور من ورا الظابط وما كنتش عايزاه يشوفني وانا باصور لانه اخد شرايط القنوات وقطعها فطبعا الموبايل الجربوع بتاعي كان ممكن يتقتل
بس فيه فيديو لطيف يا رب يكون واضح


اولا دي الفيديوهات والاساتذة بيتجادلوا مع الضابط، بصراحة كانوا بيتخانقوا معاه، حتى فيه دكتور اسمه رشاد ابتدا هادي وبعدين في الاخر اتعصب، الحقيقة انا كنت عايزة ادخل مش اتخانق، قوم يا اخويا رحت اكلم ح الظابط بالادب: يا فندم احنا عارفين انك بتعمل شغلك بس دول اساتذة جامعة وناس كبار ومعلش.... واذ بي افوجأ ان اللي كان واقف زي الفار وهو بيتزعق له بيتنطط عليا عشان باكلمه بادب
نصيحة لوجه الله تعالى: لما تشوف ظابط بوليس هزأه على طول
الظاهر ما علمهمش في البيت موضوع الادب ده، هم علموهم: اللي يشتمك يبقى مسنود واللي يحترمك تبقى عينه مكسورة
فطبعا رحت مدياله الوش التاني، ح اعمل ايه مضطرة، مع اني بطبعي هادية ونسمة زي ما انتوا عارفين
الواد وائل عباس والواد مينا دخلوا ولاد اللذين
واحنا فضلنا محجوزين من الساعة حداشر للساعة تلاتة العصر، الساعة سبعة ونص كان فيه مؤتمر صحفي، بس انا كنت في العالم الاخر ما عرفتش اروحه
بس بصراحة فيه فيديو لطيف قوي لسة باحمله ويارب يكون واضح، الدكتور يحيي قزاز طبعا كان الاعلى صوتا وصال وجال وقعد يزعق للظباط وبعدين فجأتن راح باصص للمخبرين، وهم واقفين عادي مخبرين مع اني اعرف ان المخبر ده المفروض يبقى متخفي، المهم بص للمخبرين وقعد يقول لهم انتوا غلابة زينا، يعني انتو ما بتقفوش في طابور العيش؟ احنا بنعمل كده عشان الغلابة اللي زيكوا، ما تشوفوا انتوا عايشين ازاي والبشاوات عايشين ازاي، ما تشوفوا بيهينوكوا ازاي ما تشوفوا بياخدوا كام وانتوا بتاخدوا كام
بصراحة هي وشوش المخبرين بان عليها التأثر وحاولوا طبعا يخبوه لان ده خراب بيوت ليهم
بس انا افتكرت عادل امام لما كان بيكلم حاجب المحكمة ويقول له: انا لو منك اجيب بتاعة واحطها على صدري واجي اقعد اول واحد الصبح، او ااجر صعايدة وبالشوف في الازاز
:)

بس مش عارفة الفيديوهات بتتحمل بصعوبة ليه مع انها قصيرة
ومرة تانية باعتذر عن رداءة التصوير
فيه مخرج شاب كان ح يتشد لانه اتخانق مع الظابط، وبصراحة الظابط كان بارد وعمال يقول: سيبوه يغلط على الاخر
!!!!
بس هو ماحدش غلط، احنا كنا كل اللي عايزينه المفتاح بتاع الدكتورة منال
اصلهم عشان ما يدخلوناش قاموا اخدوا المفتاح والبطاقة والرخص بتاعة الدكتورة منال وخبوها، عشان لا نمشي ولا ندخل، محبة يعني زي ما تروح عند واحد صاحبك ويخبي جزمتك عشان مش عايزك تمشي
المهم اليوم باظ
حسبنا الله ونعم الوكيل
وفي الآخر عملوا علينا كوردون بعربيات نقل كانت ماشية على الطريق، وسواقين عربيات النقل مش فاهمين فيه ايه ياعيني وواحد قال لنا هو فيه ايه؟ هو كل العربيات دي صحافة، فقلنا له لا دول اطباء كانوا داخلين عشان الجرحى اللي جوة واساتذة جامعة كانوا عايزين يعزوا في اللي ماتوا وفيه صحافة..احنا جايين نعمل واجب

فالراجل هز راسه وقال: آه...فهمت...طب احنا ذنبا ايه؟ احنا بقى ح نتغدى على حسابكوا
شفتوا العربيات؟ ولا كأننا مهربين مخضروات
طبعا الدكتور نادر فرجاني قعد يقول لهم لو كنا اسرائيليين كنتوا دخلتونا وشيلتونا في عينيكوا
المراسل بتاع اوربيت اتاخد منه الكارنيه، واحمد فوزي المخرج قال لي انه سمع المدير بتاعه بيقول له كان حقك تكلمهم امبارح بالليل
!!!!
حد ياخد الشرايط بتاعة اوربيت ويقطعها؟ ده ظابط واضح انه حتى ما بيشوفش تليفزيون، طب ده حتى الاخ عماد اديب بيخدمهم بعنيه
بصراحة انا كنت ح اطق من جنابي
المشوار باظ واللي غايظني انهم حفظوا وشي، طب احاول ادخل تاني ازاي؟
ثم يعني عمالين تقطموني وتقولوا لي مدخل طنطا مش عارف ايه، طب ما انا كاتبة الدعوة من امبارح ما قولتليش ليه على مدخل تاني؟

انا جيت

ونحب بالمناسبة دي اشكر مريم بنت عمران اللي اكلت دماغها بمسيجاتي وكانت بتحدث اول باول
سابونا الساعة تلاتة العصر
انا لسة مخلصة اكل واكلت كأني عمري ما اكلت
ح ارتاح وانزل الفيديوهات ان شاء الله

هنا المحلة

تحديث:

2:24 جابوا عربيتين ننقل و كردنوا علينا !!!
----------------------------------------------------------------
2:13 الأمن خطفف كاميرات الأوربيت و قطع الشرايط
-----------------------------------------------------------------
2:09 لسه محجوزين.. أنا جعانة و عايزة أنام
-----------------------------------------------------------------
2:06 تصدقوا: فيه ناس زعقت في الضابط فإتأدب معاهم.. كلمته أنا بذوق إتنططت عليا!!؟؟!! الظاهر هما تبع حسن عابدين: أنا عايز حد يهزأني ... هاني الحسيني و يحيي قزاز و ماجدة عدلي سابوا عربياتهم و مشيوا على رجليهم فالضابط جري وراهم و لحقهم
------------------------------------------------------------------
2:03 إحنا عددنا 36-

-----------------------------------------------------------------

12:48 نورا قدامي اهيه و هي مااخدتش العربيه ولا حاجه دول كانوا حاجزينها بالعربيه و السواق و اوهمونا انها مشيت بالعربيه

---------------------------------------------------------------------

12:41 اللي محتجزنا اسمه العقيد احمد فتحي

-----------------------------------------------------------

12:37 احنا محجوزين ممنوع ندخل او نرجع

---------------------------------------------------------------------

11:53 نورا و السواق محجوزين بالعربية و المفاتيح مع ظابط

---------------------------------------------------------------------

11:45 في ظابط اخد عربية دكتورة هناء عبد المنعم و اختفى في ظروف غامضه

---------------------------------------------------------------------

11:41 عربية اميمة ماتسرقتش دي نورا يونس اخدتها و دخلت المحلة

---------------------------------------------------------------------

11:35 الدكتورة اميمة الحناوي عربيتها اتسرقت !!!!!!

---------------------------------------------------------------------

11:27 بقالنا اكتر من نص ساعه و الامن محتجزنا على مدخل المحلة و أخد مفاتيح عربية الدكتورة منال عبد المنعم و البطايق

في الطريق إلى المحلة

إن شاء الله، بالبس اهو عشان انزل مع المجموعة (مجموعة من اساتذة الجامعة والمثقفين، يعني مافيش صيع غير انا ومينا في المجموعة عملا بالشعار اللي اطلقه مجيك تريكس: يا صيع العالم اتحدوا) اللي رايحة المحلة دلوقت لفك الحصار عن المحلة والتضامن معاهم
ان شاء الله يحصل كل خير، دعواتكوا، بس الخطة ب اني مدية الباسوورد لاحدى المدونات مش ح اقول اسمها بقى دلوقت
ومحضرة رسالة على الدرافت، وفي كل الاحوال اللي زعلان مني يسامحني انا واحدة على سفر
:))
وانا مش زعلانة من حد، انا متعودة اعمل الحكاية دي قبل ما اسافر اي حتة، بعد ما بارجع من السفر بارجع في كلامي
ان شاء الله اي تطورات ح تلاقوها نازلة على المدونة من خلال الناس اللي انا ح اديهم الباسوورد
توكلنا على الله
ملحوظة: فيه معلق دخل نكد عليا وقال انتوا السبب في اللي حصل للمحلة وزايدتوا عليهم
احنا يا سيدي لا زايدنا ولا ناقصنا، واحنا مش بنحملهم فوق طاقتهم ولا حاجة، هو التضامن بقى كمان حرام؟ وعموما لو هم مش عايزينا ح يطردونا ثم انا مش حمل الكلام ده الله يخليكوا

وقع للتضامن مع المحلة

وقع البيان ده لو سمحت في مكان التعليقات
ده وصلني بالميل من ساهر وانا اول الموقعين عليه من مدونتي

نداء للتضامن مع أهالي وعمال المحلة

نحن الموقعين على هذا النداء من الكتاب والمثقفين والسياسيين المصريين، نعرب عن قلقنا البالغ من الأحداث الجارية في مدينة الحلة الكبرى وندين ما جرى من عمليات عنف وترويع للمواطنين واستخدام للمجرمين وأصحاب السوابق من قبل قوات الأمن للتخريب المتعمد والصاق تهمته بأهالي المحلة الشرفاء.

إننا نتوجه إلى الرأى العام المصري والعربي والعالمي وأنصار الحرية والعدل في كل مكان بنداء عاجل لابداء التضامن والتحرك لمساندة عمال وأهل مدينة المحلة الكبرى. ونؤكد على الحق المشروع في الاضراب والتظاهر السلمي الذي كفلته كل القوانين والدساتير والأعراف الدولية للتعبير عن الرأى والاحتجاج على التدهور المريع للأحوال الاقتصادية والمعيشية للشعب المصري.

إننا إذ نعلن تضامننا الكامل مع عمال وأهالي المحلة الكبرى نطالب بما يلي:

1- الافراج الفوري والكامل عن كل المعتقلين في الأحداث الأخيرة.

2- فك الحصار فورا عن مدينة المحلة الكبرى وعودة الحياة الطبيعية بها.

3- محاسبة المسئولين عن مجزرة المحلة الكبرى التي أريقت فيها دماء الأهالي.

وأخيرا فاننا نؤكد على أن الانفجار الشعبي الذي حدث في المحلة لم يكن سوى نتيجة طبيعية لسياسات اقتصادية واجتماعية أدت إلى افقار الغالبية العظمى من أبناء الشعب المصري.

كل التضامن مع عمال وأهالي المحلة

عاش نضال الشعب المصري

القاهرة في 8 أبريل 2008

----
طبعا البيان ما ذكرش المدونين ولا المواطنين الكظماني من الغوغاء والدهماء من امثالنا
بس احنا بنوقع برضه..احنا اولى بما ان المحلاوية بقوا متهمين بانهم صيع والمدونين كمان بيقولوا عليهم صيع
صيع بصيع بقى

النيابة قالت لجورج اسحاق: انت متهم بانك ضد التوريث

!!!!!!!!!!!!
هي بقت كده؟
طيب يا بيني آدمين

التجمح نجع باكتساع في المعليات

هع هع هع هع
كركركركركركركركركرككررررررررررررررر
هئ هئ هئ هئ هئ
هاهاهاهاهاهاهاااااااااااااايييييييييييييييييييي
نياها نياها نياها نياها
هأ هئ هؤ هيييييييييييييييييييي
مش قلنا قبل كده اللي اختشوا زمانهم بقوا بترول؟
وحفريات كمان

ازاي تتضامن مع المحلة

معلش يا شباب التضامن مع المحلة دلوقت فرض عين، انا عارفة ان فيه ناس خايفة وناس مكسلة
الخوف شعور انساني طبيعي وانا شخصيا باقدره وباعتبره عذر كافي خصوصا ان حتى لو مافيش حاجة تخوف ممكن الانسان يخاف لانه بيبقى شعور غير منطقي ما يغلبوش غير التكال على الله او ان يبقى فيه جوة الانسان دافع كبير وقوي واقوى من احساسه بالخوف
طيب اللي مش ح يقدر ييجي المحلة بكرة بس ممكن يبعت للصحف وللمجلس القومي لحروق اللسان تضامنه مع اهالي المحلة ومطالبته بالافراج عن كافة المعتقلين؟
يا سيدي لو خايف روح سايبر كافيه بعيد عن المنطقة اللي ساكن فيها ولو عندك عربية ما تروحش بيها وادخل اعمل اي اكاونت لميل جديد تبعت منه رسالة تضامن ومطالبة بالافراج عن المعتقلين وامشي وما تجيش السايبر ده تاني ولا تعدي من الشارع اللي هو فيه
اظن مافيش امان اكتر من كده
اقول لك كمان، لو ح تموت من الخوف، البس جوانتي عشان ما حدش يرفع بصماتك، والله العظيم ما باتريق، ما جراش حاجة لما تخاف مش عيب، العيب انك ما تتحايلش على الخوف وتعمل اللي تقدر عليه، واللي هو واجب عليك واقل من الواجب كمان
اما الكسل فهو مش عذر، ده عذر اقبح من ذنب، مافيش في الدنيا اكسل مني ده انا بطة بلدي، بس ده مش عذر، لو المزة مستنياك في الفيوم في عز المطر ح تنط من السرير وتنزل تروح لها يعني
دي عناوين بعض الصحف والمجلس القومي لحروق اللسان اللي عرفت اجيبهم تقدر انت كمان تجيب عناوين تانية
لما عشر رسايل، ميت رسالة، عشرتلاف رسالة يوصلوهم يقدروا يتجاهلوها لكن لما يوصلهم مليون رسالة ما يقدروش يتجاهلوها
واللي عنده اقتراحات يتفضل يقولها، احنا عايزين نعمل حساب كل الناس: نعمل حساب الهتيفة، ونعمل حساب الشغيلة، ونعمل حساب كمان الخويفة والكسالى، كلهم مواطنين وكلهم لازم يتضامنوا مع المحلة، لازم
العناوين اهيه

nchr@nchr.org.eg, ahramdaily@ahram.org.eg, akhbarelyom@akhbarelyom.org, elbadeel@elbadeel.net, el3ahsera@dream.tv, editorial@almasry-alyoum.com, dostor-eg@yahoo.com, dostor_eg@yahoo.com

شوفوا انا باطلب بادب واخلاق ازاي؟ ارجوكوا يعني دي حاجة بسيطة بس يمكن تفرق لما العدد يبقى كبير

حط نفسك مكان المعتقلين واهاليهم، حط نفسك مكان ابو او اخو الولد اللي مات، حط نفسك مكان اللي فقد بصره من رصاصة مطاطية دخلت في عينه، ومن خلال خبرتي في الدنيا، اللي مش بيحط نفسه مكان الناس ويساعدهم، ربنا بيحطه بعد شوية فعلا في مكانهم ومش بيلاقي حد يساعده

كمان بالنوسبة للعاشرة مساء، هم كل ليلة بيفتحوا رسايل الاس ام اس على رقم 91235 عايزاكوا تهروهم رسايل: انا متضامن مع المحلة، نطالب بالافراج عن كل المعتقلين، انا متضامن مع المحلة، انا احب المحلة والمحلة تحبني

معلش انا عارفة انكوا ح تتنرفزوا عليا بس انا عارفة ان منى الشاذلي كويسة والله العظيم، هي يمكن تكون خافت، وكل الناس بتخاف، حتى ممكن حسن نصر الله نفسه يكون بيخاف يعني ده شعور انساني، الرسايل الكتير على الميلات والموبايل ممكن تشجع اللي خايف لانه بيحس بالونس وانه مش لوحده، وتخوف الطاغية وتحسسه انه فتح على نفسه نار جهنم، واظن برضه ان لما تجيلها ييجي مليون رسالة على الاس ام اس متضامنة مع المحلة ممكن تقرا منهم تلاتة ونبقى برضه عملنا بونط، بس انا عايزة كلام من اللي قلبكوا يحبه

شوفوا انا لسة مؤدبة

مش قادرة

جرى ايه يا روح خالتك انت وهو، الناس دي ماتت عشان بتطالب لنا بلقمة عيش واحنا قاعدين في بيوتنا، مش عارف تبعت حتة جواب؟ دي وكسة ايه دي ياربي احنا ح نتحايل عليكوا؟

بلاوي

طب الهي اللي ما يتضامنش مع المحلة تحرم عليه لقمة العيش اللي ماتوا عشان يجيبوها له، وتزول من وشه النعمة

بس هه