اشتريتوا حلاوة المولد؟

واتفرجتوا على فيلم الشيماء؟ "لقد نجا لقد نجا" مع ان يعني الشيماء ما كانتش بتغني ولا حاجة بس اهو حسام الدين مصطفى كان عايزها تغني
كل سنة....كل سنة....مش طالعة مني
سيدنا محمد اكيد وصل له الاخبار دي
الإضرابات والتظاهرات لزيادة الرواتب كانت مفاجأة للحكومة المصرية التي تعيش يوما بيوم، أما لكثير من المراقبين فلم تكن إلا نتيجة طبيعية لحالة التدهور المستمر التي يشهدها الاقتصاد المصري بحسب بيانات النشرة الشهرية لمركز معلومات مجلس الوزراء، حيث قفز معدل التضخم من 0.4 في كانون الاول 2007 إلى 4 في كانون الثاني 2008، وهو ما يعني أن كل جنيه مصري فقد 10% من قيمته ما بين عشية وضحاها هي مسافة الانتقال من كانون الاول الى كانون الثاني.
وتتوالى بقية المؤشرات لتخبرنا بمدى سوء الوضع؛ حيث انخفضت الصادرات المصرية الزراعية بمقدار النصف تقريباً من ٩٤,٤ مليون دولار إلى ٤٨,٥ مليون دولار، كما انخفضت الصادرات الصناعية بمقدار الثلث تقريباً من ٣٧٣مليون دولار إلى٢٦٤,٣ مليون دولار، بينما ارتفعت الصادرات المصرية من الوقود من ٧٢٧ مليون دولار إلى ٨٤٠,٥ مليون دولار؛ في الوقت الذي يشكو فيه المصريون من ارتفاع أسعار الغاز الطبيعي والسولار وهو ما يطرح تساؤلاً عن ترتيب أولويات الإدارة الحكومية المصرية التي لا تجد حرجاً في زيادة الكميات المصدرة من النفط والغاز رغم حاجة السوق الداخلية، في المقابل ارتفعت الواردات المصرية من ٢٤٠٥,١ ملايين دولار إلى ٢٧٤٠,٤ مليون دولار، ووفقا للأرقام الرسمية فإن أسعار المواد الغذائية قفزت، كما حدث مع الخبز غير المدعم الذي ارتفع بنسبة ٥.٢٦% خلال عام واحد. وارتفعت أسعار منتجات الألبان بنسبة ٢٠% والزيت بنسبة ٤٠%، وأكد برنامج الغذاء العالمي مطلع الشهر الجاري إن مصاريف الأسرة المصرية المتوسطة ازدادت بنسبة ٥٠% منذ بداية عام ٢٠٠٨.

واكيد كمان وصل له الاخبار دي

وبدلاً من استجابة الحكومة بتحديد حد أدنى حقيقي للأجور يتناسب مع مستويات المعيشة ويتحرك سنوياً وفقاً لمعدلات التضخم فوجئ المصريون بتقديرات هزيلة للمجلس الأعلى للأجور الذي لم يجتمع منذ 3 سنوات إلا الشهر الماضي تحت ضغط مطالب الحركات الفئوية، ليخرج علينا بتوصيات للحد الأدنى للأجور تنقسم الى ثلاثة مستويات هي: 250 جنيها (50 دولاراً) للعامل غير المؤهل علميا، و275 جنيها (55 دولاراً) للعامل الذي يحمل مؤهلا متوسطا، و300 جنيهاً (60 دولاراً) للعامل الذي يحمل مؤهلا عاليا، وإن كان لسان حال المصريين المتابعين لتوصيات المجلس الأعلى للأجور يقول "تمخض الجبل فولد جرذا "، فالمدهش أن يكون رد وزير التنمية الاقتصادية الدكتور عثمان محمد عثمان أن الاقتراحات الخاصة بزيادة الحد الأدنى للأجور تحتاج الى تعديل القانون الرقم 53 لعام 1984 الذي ينص على أن الحد الأدنى للأجور 35 جنيهاً شهريا (7 دولارات)، مشيراً إلى أن التعديل يتطلب موافقة مجلس الشعب وتصعب مناقشته وعرضه في الدورة البرلمانية الحالية، وبالتالي سيستغرق الكثير من الوقت، وهو ما دفع المصريين للرد "رضينا بالهم والهم مش راضي بينا".

ودي طبعا
http://news.bbc.co.uk/hi/arabic/middle_east_news/newsid_7306000/7306400.stm

واكيد دي

http://news.bbc.co.uk/hi/arabic/world_news/newsid_7306000/7306197.stm

وكمان دي

http://news.bbc.co.uk/hi/arabic/middle_east_news/newsid_7304000/7304681.stm

وحاجات تانية كتير بقى
طب انا محرجة حاليا دلوقت، محرجة جدا الحقيقة بجد يعني مش محرجين؟
اكيد محرجين من الرسوم المسيئة طبعا صح؟ طب انا بقى محرجة جدا من المحرجين من الرسوم المسيئة اللي بيسمعوا كلام بابا اللي علمهم الهيافة وبييجوا على الرسوم ويتصدروا
محرجة محرجة يعني
لا بس نستمر
ياللا يا صناع الحياة هوب هوب
لفة كمان وناخد حتة سمسمية في المولد

مدونة عراقية: جديدة ومثقفة وذكية

انا باتفسح على النت كده لا بيا ولا عليا لقيت مدونة اسمها
shoot the Arab
بصراحة الاسم عجبني موت استخفيت دمه
دخلت لقيت المدونة لسة فاتحة جديد وريحة البوية لسة موجودة
وكاتبه على المدونة كده
Since everyone is shooting at Arabs these days...
maybe I should take a shot too.
هههههههههههههه
قلت ايه المسخرة دي واقرا لكو...الاقي المدونة مستواها الثقافي مرتفع جدا ودمها خفيف زي الشربات وصاحبة المدونة ملاحظاتها ذكية جدا قلت لا ما بدهاش قعدت افلي في المدونة واكتشفت ان صاحبتها عراقية مع انها كاتبة في اللوكيشن الامارات بس انتوا عارفين العراقيين دلوقت اتنطروا على كل العالم بما ان امريكا عايزة العراق شوية كده يعني ودلاديل امريكا فارشين العراق على السفرة وكل واحد عمال ياخد حتة اللي من الكتف واللي من الكوارع واللي من بيت اللوح
المهم بس هي كاتبة بالفصحى لكن عرفت من لهجتها انها عراقية وفرحت قوي، عشان انا باحب العراق، عشان انا كمان متربية فيها
وفرحت بالمدونة وبالمكتوب في المدونة وبصاحبة المدونة
بس والنبي يا صاحبة المدونة كبري الخط شوية عشان المسنين من امثالي يعرفوا يقروا

هو ساويرس ماله ومال السياسة؟

يعني طلع لنا في التلفزيون يقول الحكومة دي احسن حكومة جات مصر دي دافعت عني وفيه تنمية بس ما وصلتش للناس اللي تحت وقلنا معلش ماهو بتاع بزنس وعادة بتوع البزنس مافيش عمار بينهم وبين الناس اللي تحت على اساس ان البدروم بيبقى معطن عادة وريحته وحشة
انما يكتب مقال يدافع فيه عن محمد دحلان اللي فجر الحرب الاهلية في فلسطين وامريكا نفيستها بتقول اه احنا اتفقنا معاه اه نيهانياهاااااااااااا ويقول اصله صاحبي!!!!!! طب صاحبك اقعد معاه في ريستوران احنا مالنا وبيتكلم عن السيادة المصرية اللي خرقتها حماس وعن امريكا الوحشة اللي بتشوه صورة دحلان عشان هو وطني
يامي يامي يامي
يعني امريكا وحشة؟ وحشة يا باشمهندز؟ وحشة؟
طيب...ينكن والله ماحدش بقى عارف حاجة
وبعد كدهوت حذر سيد علي من انه لا سمح الله يكون من المؤيدين لحماس وانظر لي وفي ذلك حكمة
لا معلش بقى ثانية واحدة
انا ما باطيقش حماس لاني بطبعي ماليش خلق على التخلف والعته
بس ولنفرض ان سيد علي من المؤيدين لحماس، مش هو حر برضه وللا ده كان يستلزم نبرة التحذير والتهديد الموجودة في مقال لكاتب ماهواش كاتب بالمرة، وصاحب سلطة ونفوذ اقتصادي وسياسي وثقافي داخل مصر وخارجها لحااااااااااااااد امريكا الوحشة اللي مش عاجباه وبيقول عليها انها بتشوه صاحبه
وبعدين يرجع يقول "أما سياسياً، فقد خسرت حماس مصداقيتها أمام الغرب،" طب ايه يعني خسرت مصداقيتها امام الغرب يعني؟ مش الغرب ده لسة بيقول عليه وحش وبيشوه صورة دحلان
طب يعني دحلان له مصداقية امام الغرب وفي نفس ذات الوقت بيشوه صورته؟ ثم ايه اهمية الصورة امام الغرب اذا كان الغرب وحش وبيلوث الشرفاء؟
ثم حماس وحشة وحشة وحشة يقوم صاحبك يا باشمهندس يعمل حرب اهلية ويولع الدنيا ويقتل فلسطينيين؟
يعني اذا كنا بنلوم على حماس انها شاركت في الحرب الاهلية فاللوم كله متركز على ان حماس ما كانش لها حق ابدا تنساق وراء استفزازات مجموعة دحلان وترد على اعتداءاتهم لكن اللي ابتدى الحرب دحلان
فهل ايه؟
هل الباشمهندس نجيب بيبرر لدحلان انه اشعل حرب اهلية في فلسطين؟
هل كلام الباشمهندس عن امريكا الوحشة اللي بتشوه الشرفاء اللي زي دحلان ينسحب مثلا كمان على اسامة بن لادن وعلى حماس نفسها
واذا امريكا بتقول انا باتعاون مع دحلان وهو ما انكرش حتى الموكوس اللي اسمه عباس قال له شوية انت كده بقى عشان النفس ريحتك فاحت يبقى انت بتدافع في ايه؟
واذا كانت عمالة دحلان كدب وافترا من امريكا وانت بتستدل على كده بان مافيش دليل ممسوك ضده وانا مش فاهمة دليل ايه تاني اكتر من انه اشعل حرب اهلية لكن حضرتك عايز مستندات؟ يعني المفروض يسجل عمالته في الشهر العقاري ويوقع عليها اتنين موظفين حكومة؟
طيب اذا كان ده افترا لان مافيش دليل
طب ايه دليلك على ماذكرت من عمالة حماس لسوريا وايران؟
لا ما حدش يقول لي ماهو,,عشان كمان دحلان ماهو
لكن خلينا نتكلم في المستندات
في مستندات؟
ويعني ايه اصلا عمالة لايران وسوريا؟ مش فاهماها دي
يعني الواحد يبقى معاه جنسية امريكاني وبيشتغل بنظام امريكاني وبيصاحب ناس بتخدم امريكا وده كويس
ولما واحد يتعامل مع سوريا وايران يبقى عميل؟
يعني مش بعيد بعد كده نلاقي واحد متهم بالعمالة للسودان ثم العمالة لاسكندرية
ثم واحد من المهندسين يبقى عميل لمصر الجديدة
ثم انت بتتكلم في السياسة ليه؟

جرابيع عمرو خالد

والغربية ان مافهمش راجل يوحد ربنا، مافهمش واحد كتب اسمه وطلع لي برة من خلال الشنطة زي ما انا مصدرة نفسي ومش مستخبية من حد، انما نقول ايه، اهي هي دي بقى تربية الداعية العظيم، الصنم الاوحد وربهم الاعلى اللي قريب قوي ح يحطوه في ميدان التحرير ويلفوا حواليه نحن غرابة عت عت، طيب وحياة شناباتهم اللي تليق على الجاموسة اكتر ما تليق عليهم ما انا سايبة الصنم ده الا لما اضعضعه واخليه عبرة لمن يعتبر ومن لا يعتبر
ولسة مش عارفة بقى، هل اقول كل اللي انا اعرفه عن عمرو خالد، وللا مافيش داعي اشخصن الامور والامور الصخصية خليها في الصخصي؟
خليها في الصخصي، وبعض الامور المهنية برضه خليها في الصخصي، زي سرقته لافكار الناس اللي بتبعت له ميلات مثلا
مش مهم ده
المهم ان الاستاذ عمرو خالد فيه عدة نقاط تخص عمله فوق انه بيعمل بزنس كويس قوي من الدين خلاه مليونير
زي مثلا انه عمل صناع الحياة بتاع: انا عايز اعمل نهضة لبلادنا
بقى انا اول ما طلع عمرو خالد ده كنت اقعد اسمع شرايطه واطنش على صوته، وكان بيتكلم في الرقائق والعبادات ولحد كده كويس
ابتدى بقى يقول عايزين نعمل نهضة لبلادنا
طيب، حاضر
ابعتوا اقتراحات للنهضة ببلادنا، حاضر
والناس تبعت اقتراحات للنهضة بمشاريع تعمل نهضة بجد
انا شخصيا اعرف على الاقل خمس مشاريع اتبعتت وكان يقدر عمرو خالد ينفذها بمنتهى السهولة لها علاقة بتنمية المستوى القاعدي للامة
ملحوظة: المستوى القاعدي دي تعبير السيد جمال مبارك لما قال فيه نهضة بس ما وصلتش للمستوى القاعدي
نهضة كده شبه محو امية الكمبيوتر وزراعة السطوح بطاطس وحملة لا للتدخين ومحاربة المخدرات مع شرطة دبي
مع ان اي عيل صغير ماشي في الشارع يعرف ان اي بناء بيبتدي من المستوى القاعدي
انتوا قاعدين شوية...طب احنا قاعدين مع بعض
انما ايه اللي بيحصل في البلد واللي بيساهم فيه عمرو خالد، بل ازعم انه ابتداه في برنامج صناع الحياة بتاعه
عملية اتخام للطبقة المتوسطة العليا اللي خايفة تنزل وعمالة تتشعلق في البزنس وتتسلق عليهم وتمن الاتخام ده ان "المستوى القاعدي" بيتخانق على طابور العيش وبقوا يموتوا بعض
ازاي بقى الطبقة المتوسطة العليا دي تتسلق البزنس وتتشتغل وسيط غير منتج بالمرة وتتسبب في فقر الناس من غير ما ضميرها يأنبها؟
الاستاذ عمرو خالد نجح في ده بقوة، اللي كان بيتابع صناع الحياة كان يقدر يشوف كل حلقة عمرو خالد كان بيدي الناس واجب الاسبوع
ايه واجب الاسبوع: امشوا ستة كيلو كل يوم عشان تبنوا الارادة!!! اه وربنا كان بيقول كد
وييجي في حلقة الاسبوع اللي بعده يهلل يهلل يهلل للناس اللي مشيت ستة كيلو تهليل ولا كأنهم حرروا فلسطين
لحد ما الانسان يتم اشباعه باحساس انه لو مات دلوقت ح يتحدف عدل على الفردوس الاعلى لانه مشي ستة كيلو كل يوم لمدة اسبوع
يجي الواجب اللي بعده
علم امك الكمبيوتر
الواجب اللي بعده ازرع السطوح بطاطس
ونتج عن هذه الخطة اللي ماشية بقالها سنين مجموعة مشوهة من الناس اللي شكلهم متدينين وهم الحقيقة متدنيين واللي اتعامل مع صنعة ايد عمرو خالد - خصوصا في العمل التنموي او الخيري - يعرف كويس شكل بتوع عمرو خالد بيبقى عامل ازاي
والله العظيم باعرفهم عن بعد:
واحد مبتسم ابتسامة هابلة عمال على بطال من غير ايتها مناسبة
عادة بيبقى مزة او مز متدين
محنتف وملمع كأنه خارج من الفورمالين
يقول كلام كتييييييييييييييييييييييييييير وما يعملش منه ايتها حاجة
يتميز بالندالة المنقطعة الجماهير
سطحي وما يهموش غير المظاهر وشكله قدام الناس
لو راجل يبقى كل تفكيره في البنت اللي قدامه: هل يا ترى سبق واتجوزت عرفي؟ طيب لو كده نتوبها ازاي؟
ولو بنت يبقى كل تفكيرها: هل يا ترى عنده عربية شيك؟ اصل اهم حاجة ان المتدين يبقى معاه فلوس عشان سمعة الاسلام
وهم اكتر ناس عندهم فوبيا سمعة الاسلام وصورتنا في الغرب ودايما دايما دايما يتكلموا انجليزي في وسط الكلام عشان تبقى صورة المسلم انه شيك وبيتكلم انجليزي
مخه كله متبرمج على انه يشحت الناس مش ينمي الناس
وده الجزء التاني من الخطة فيما يخص المستوى القاعدي
مدام الطبقة المتوسطة العليا عايزة يبقى معاها فلوس لازم تشتغل سمسار لبتوع البزنس اللي هم اصلا بيعتمدوا على الاستهلاكي مش الانتاجي، طيب والمستوى القاعدي؟ اعملهم شحاتين
وبقت ثقافة الشحاتة والتشحيت هي الثقافة المسيطرة دلوقت وكتر خير عمرو خالد
كل كلام عمرو خالد عن انك تدي الناس هدوم جديدة مش قديمة تأكلهم من نفس اللي بتاكل منه
ما جابش سيرة ان حد يعمل مشروع ويشغل الناس دي، خصوصا ان كلامه موجه للناس اللي على قلبها الفلوس متلتلة قد كده
ونجح عمرو خالد، مع مجموعة اخرى من الدعاة، في تنمية ثقافة الشحاتة
والجعان لما تقول له تحب تشتغل عشان تاكل وللا اجيب لك الاكل شحاتة اكيد ح يقول هاته شحاتة بقى هو انا قادر اقوم من الجوع؟
وبقى فيه طبقة اسمها: المتدينين الشيك
ما يعرفوش من الدين غير الصوصو نونو والابتسامة الهابلة اللي شغالة عمال على بطال والاحساس المتضخم بالذات وهم الحقيقة ما بيعملوش ايتها حاجة خالص والعجز الكامل والالاطة والاحساس بالتفوق من غير سبب واضح
ويعملوا العملة وما يتحملوش اي مسئولية
والجبن سيد الاخلاق، ما يعرفوش يواجهوا ابدا، حتى لما فيهم حد يحب يشتم، زي اللي دخلوا شتموا هنا، ماحدش فيهم ساب اسمه لان هو صورته قدام الناس انه الواد او البت المسهوكين بادب المتمزمزين بتدين المبتسمين دائما وابدا المقبلين على الحياة بلا مبرر
فلما يدخل يشتم ويشرشح ح تبقى الصورة حاجة تانية
ولو عمرو خالد بيعرف يربي رجالة ما كانش بقى ده حالنا
وللا انتوا مش ملاحظين اننا عندنا ازمة رجالة؟
عمرو خالد احسن من الرقاصة
الكلمة دي اتكررت كتير قوي ومن اللي بيدافعوا عن عمرو خالد
طب كويس انهم عارفين انه لا يقارن الا بالرقاصة
لانه ستار زي اي ستار وعلى رأي مالك مصطفى اللي حارق دم الناس مش عارفة ليه: مطرب وممثل وبيدخل الجنة احنا عايزين ايه اكتر من كده؟
وازيد على كلام مالك انه بيدخل الجنة بلذاذة ولطافة وبيخلي الناس لذيييييييييذة لذييييييييييييييييييييييييذة كمييييييييييييييلة بطططططططة
وتخيلوا بقى لما يبقى رجالتنا لذاذ وكميلة وبطة يبقى ده اسمه ايه؟
بلاش بقى عشان دي اعراض ناس

الراجل نيم ابنه بدري

هي الناس بقت تقتل عيالها كتير وللا هي طول عمرها بتقتل عيالها واحنا ما كناش نعرف؟ الراجل قال لابنه نام بدري الواد ما رضيش راح منيمه الى الابد...ضربه بالعصايا على راسه راح الواد مات...مش يقعد يعيط شوية على ابنه؟ لا هرب!!!هم المجانين كتروا وللا انا اللي مخي ضرب وللا فيه حاجة غلط في الحياة؟ وللا الدنيا طول عمرها كده؟ لا الدنيا مش طول عمرها كده..انا بقالي شوية في الدنيا مولودة بقالي كتير يعني وفاكرة ان الدنيا ما كانتش كده..ده انا حتى فاكرة ان فيه واحد قتل ابوه وامه وكانت بقى جريمة هزت المجتمع المصري كأن حصلت مصيبة والواد اصلا مجنون ورئيسة مستشفى المجانين اياميها كشفت عليه وقالت انه مجنون وحتى فاكرة ان الناس زعلت منها وقالت ليه قالت عليه مجنون ده يستاهل ياخد اعدام حتى لو مجنون، والواد كان بيقول انا قتلت امي وابويا عشان اريحهم من الدنيا وكانت هيصة وبوليكة
دلوقت واحد يقتل ابنه او يقتل ابوه بقى خبر صغير في جنب الصفحة عاتشي يعني ما بينزلش مانشيت في الصحفة الاول

بوست من عبده البرماوي: اسمع علك تستفيد

عبده البرماوي كتب تعليق باسم سيد مراد بس هو مش قايل انه سيد مراد فده سر يعني بس هو عبده البرماوي بس ما حدش يقول
المهم انه كتب تعليق عندي في المدونة وانا كالعادة استخسرت تعليق عبده البرماوي في انه يبقى تعليق واللي يقرا يقرا واللي ما يقراش ما يقراش عشان كده ح انزل التعليق بتاع عبده البرماوي بوست اهو:

مع ملحوظة ان ده عبده البرماوي مش انا عشان ما حدش يدخل يقول لي: يا سلام يا نوارة بوست رائع تسلم ايدك
دي مش ايدي دي ايد عبده البرماوي

اتفضلوا:

الانسة الحاجة نواره
أولا نفسي تهدي وبلاش حمقه
ثانيا لاحظي ان جزء من الثقافة المحافظة هو استخدام ألفاظ شديدة التحفظ مش مؤدبه لأ شديدة التحفظ وفيه فرق

خلينا نمسك في الحته دي
علاقة عمرو خالد والعديد من العاملين في هذا الحقل الاعلامي بشبكات البزنس السعودية وحسبتها الشهيرة في تنييم الناس من خلال الاستهلاك واللهو المخلوط بوش ديني محافظ يمنع الأفكار التحررية اللي بتقف ضد الاستغلال والتخلف وبتدعو الناس للعيش في ظروف أفضل ووفق حريات أكثر اتساعا
المشكلة مش في الدين اللي انا باعتبره أعظم أدوات التحرر والنبي صلعم هو اللي قال جئت لاحرر العباد المشكله في استخدام الدين لانتاج الاستبداد والاستغلال وتصدير الافكار المخدرة التي لا تجعل الناس ترفض الظلم بل تستكين له حسبة كمال أدهم ،فريق المخابرات المركزيه اللي عمل السعوديه قالت كده من زمان، استخدام قليل من عوائد النفط لخلق تنميه شكليه مظهريه غير مستديمه تقوم علي الاستهلاك وتعظيم قيمة الكسل والثقافة الريعيةهذه الثقافة يروج لها وكلاء مثل الباكستاني صالح كامل خبير جمع المتناقضات في سلة واحدة بنك اسلامي ومضاربات بورصة نيويورك قنوات صفاء ابو السعود وعمرو خالد في سلة واحده ولا كلام عن تناقض او مصداقيه فالشئ الصادق الوحيد هو ان يعيش هؤلاء ودولتهم فوق الجميع وليس من وكيل للامركة والاحتكارات العالميه اجدع منهم ولم يقم باجهاض التنمية الذاتية اكثر منهم لا يحترمون القيم النهضوية ولا الثقافة الرفيعه ولا فكر التحرر الانساني ويقدسون كل السبل المدرة للدولار بما فيها الطرق التي تضع لافتة الله كذبا فوق صروحها الهلامية وطالما تتتج المال وتنيم الناس عن تحررهم ونهضتهم وتجعل الدعوة اداة للمخاتلة والترويج للتهاويم والمراوغات البلاغية علي حساب الحقيقة فاهلا بها

هذا ما على العقلاء كشفه ومواجتهه ونزع القداسة عنه. لننزع القداسة عن المخادعين حتي لو قالو نصف الحقيقة وانبهر الناس بها فسكوتهم عن النصف الاخر هم غمط للحق وتعمية للخلق
دعونا لا ننخدع بلافتات كتبوا عليها الدعوة الي الله وبلاغة تطنطن بالصلاة ولاسلام علي النبي في ذات الوقت الذي تخون ابسط ما نادي به من مبادئ وقيم
-----
انتهى بوست عبده البرماوي واسمع يا كابتن انت وهو علك تستفيد

وفيها ايه لما الدين يبقى بزنس

هي الفلوس عيب؟ وجرا ايه لما واحد بيعمل شغل في قناة فضائية وبياخد عليه مرتب زيه زي اي مقدم برامج او معد برامج وبياخد فلوس على مجهوده؟ هو الغنى عيب؟ هي مؤامرة على المسلمين عشان يبقوا فقرا؟
خخخخخخخخخخخخخخخخخخخخخخخخخرررررررررررررااااااااااااااااااااااااااااا
كلام خرا فعلا
اولا فيه فرق ما بين العلم وما بين الدعوة الى الله
تعلم العلم وتعليمة فرض كفاية والمتفرغ لتعلم العلم وتعليمه بياخد فلوسه من الامة كلها زي علماء الازهر اللي بياخدوا فلوسهم من الدولة اللي هي ضرايب المواطنين وحتى لو خصخصوا الازهر وعملوه جمعية اهلية..يا ريت، فيه صندوق لتلقى التبرعات للازهر وبيجيله فلوس كتير من كل انحاء العالم وواجب المسلمين انهم يدفعوا في الصندوق ده والمرتبات تتصرف للعلماء من الصندوق ده زي زمان قبل ما الازهر يتأمم :)) على الاقل ح ياخدوا مرتبات عدلة بدل ما يفضلوا يركبوا اتوبيسات او يروحوا يشتغلوا برة عشان يحسنوا دخلهم وكمان يتعايروا انهم كانوا بيدرسوا في جامعة مع ان برضه التدريس في جامعات الدول الاسلامية زي التدريس في الازهر، بمعنى ان مافيش امير ولا ملك ولا رجل اعمال بيدفع لهم الفلوس دي ضرايب الناس اللي المفروض ان ولاء العلماء لهم زي ما سيدنا عمر قال: النصيحة لله والرسول والمؤمنين
والعلم الفقهي ما ينفعش يبقى بزنس لانه علم زي الفيزيا والترجمة والفلسفة وقواعد اللغة والكيمياء كله علم
يعني ماينفعش مثلا عالم دين يطنش على اية او حديث او تفسير او مدرسة فقهية عشان صاحب المال مش عاجبه الكلام
ده بالنوسبة للعلم الديني
بالنوسبة للدعوة
الداعية حاجة والعالم حاجة تانية خااااااااااااااااااااااااااااالص

زي ما قلنا العلم ده فرض كفاية جزء من الامة يعمله وباقي الامة لازم تسانده وتسهل عليه التفرغ للعلم
لكن الدعوة الى الله دي عمل تطوعي زي الصدقة زي التبرع بالدم نوع من انواع الصدقة مطالب بيه كل المسلمين كل واحد بامكانياته في واحد باخلاقه فيه واحد بلسانه الحلو فيه واحد بموهبته المفروض اصلا دي خاصية يتميز بها عمل المسلم عن بقية الناس لكن دي مش شغلانة يتخصص فيها ناس دون ناس وكمان ياخدوا عليها مرتبات
ينفع اعمل عقد مع مستشفى استثماري ويدوني مرتب عشان اتبرع بدمي كل تلات شهور؟ وتبقى دي شغلتي: متبرعة بالدم؟ ينفع اشتغل متصدقة؟ وابقى باخد مرتب على اني باتصدق على الفقراء وتبقى دي شغلانتي؟
اصلا اصلا...هو فيه حاجة اسمها داعية؟ ده اسم مستحدث
زمان كان فيه عالم، فقيه، محفظ، معلم، لكن مافيش حاجة اسمها داعية الاسم ده مش موجود في اي من الكتب القديمة
يجي واحد متخلف يقول لي ازاي ده مذكور في القرآن: وداعيا إلى الله بإذنه وسراجا منير
عااااااااااااااااااا
لو فيه شغلانة اسمها داعية يبقى فيه شغلانة اسمها متصدق، وشغلانة تانية اسمها متبسم في وجه اخيه عشان دي صدقة، وشغلانة اسمها متقي النار ولو بشق تمرة وكل واحد من دولم يروح يشتغل عند رجل اعمال وياخد مرتب على كده
ده فيما يخص شغلانة: الداعية اللي بقت شغلانة على اخر الزمن
اما فيما يخص الدين نفسه اللي بيستخدمه ما يسمى بالداعية من اجل الكسب واهو بالمرة بياخد ثواب
فخلينا بقى نتكلم بصراحة
الدين اذا فكرنا فيه من منطلق روحاني وانساني واخلاقي مفيد جدا لانه اولا بيربح الانسان نفسه وفي الاخرة بيربحه الاخرة بس...بس...بس..ما بيكسبش غير كده والحقيقة بيخسر بالمعايير الدنيوية المادية كتير ده حتى ربنا لما بيحب عبد بيبتليه، بيكسب الراحة النفسية والقرب من الله والرضا عن النفس واستجابة الدعاء ووجود هدف في الحياة الانسان يعيش عشانه: هدف اكبر من المكاسب القريبة ومتع الدنيا، هدف يخلي الانسان يحس انه اكبر من حقيقته ولطف من ربنا في اللي بيخاف منه
لكن اذا دخل في اطار البزنس بقى مالوش لازمة خالص الا بقى اذا حصل تعديلات في البضاعة بحيث يبقى شكلها اريح واحلى وارخص وفيها اوبشنز اكتر
لان هو ده البزنس والبزنس مش شتيمة في حد ذاتها
لما اقول الغزل والنسيج بزنس مش شتيمة
لكن لما الاقول بيع البني ادمين بزنس تبقى شتيمة
لما اقول الترفيه بزنس مش شتيمة
لكن لما اقول الدين بزنس، وكمان بقى ترفيه ومعظم الدعاة دلوقت بيستظرفوا دمهم كأنهم بيعرضوا مسرحية هزلية، دي تبقى شتيمة
وبمعايير السوق: المكسب والخسارة والعرض والطلب يبقى الدين اللي ربنا نزله زي ما هو دمه تقيل قوي ومزعج جدا
مش عشان الكلام اللي بيقوله عمرو خالد بخصوص صحيانك في البرد عشان تتوضى وصيامك في الحر، بالعكس دي اسهل حاجة ويمكن افيد حاجة في عرض المنتج لانه مش متعب بجد وفي نفس الوقت بيصيب الانسان بالرضا عن نفسه ومحلولة يعني
انما بقى بعقلية السوق نفكر كده: الدين ده بيأمر بالعدل والاحسان وايتاء ذي القربى وينهى عن الفحشان والمنكر والبغي
تبقى ح تموت تعمل حاجة وما تعملهاش عشان خايف من ربنا ولو طنشت خوفك وعملتها ضميرك يبقى مأنبك
استفتي قلبك وان افتوك يعني البس لوحدك ماحدش ح يشيل عنك وانت وربنا بقى يا حلو
افضل الجهاد كلمة حق عند سلطان جائر
والله لا يؤمن من بات شبعانا وجاره جائعا وهو يعلم
واذا قلتم فاعدلوا ولو كان ذا قربى وبعهد الله اوفوا
لو ح تتعامل مع الكلام ده بصفتك انسان ح تلاقي نفسك طاير في الهوا وتعيش طول عمرك وكل لحظة في حياتك لها قيمة
لكن لو ح تتعامل مع الكلام ده على انه بزنس تعرضه على المستهلك ح يبقى افففففففففففففففف ايه وجع الدماغ ده؟ انت ح تنكد علينا ليه يا اخي؟
عشان كده الدين لازم يتسنجف ويتدلع ويتشخلع بحيث يبقى في اللذيذ وتلاقي له تخاريج لطيفة
والعدل انك تتجوز اتنين وتجيب لدي شبشب بوردة وللتانية شبشب بوردة نفس اللون ونفس الوردة
والاحسان انك لما تدي الخدامة بتاعتك هدوم تنقي الحاجات الحلوة
وايتاء ذي القربى انك تتصل ببنت خالتك في العيد
واستفتي قلبك...يعني اعمل اللي ترتاح له
وافضل الجهاد كلمة حق عند سلطان جائر؟ انت مالك ده شغل العلماء
والله لا يؤمن من بات شبعانا وجاره جائعا وهو يعلم...وانت ما تعرفش...ثم انك ساكن في المهندسين...هو فيه حد جعان في المهندسين؟ اكيد كل جيرانك شبعانين
واذا قلتم فاعدلوا ولو كان ذا قربى
يعني لما ابنك يتخانق مع صاحبه في النادي تبقى حقانية
ولو كنت سايق خليك رايق، شغل قرآن في الكاسيت، وطلع هدومك القديمة للفقرا وادي الكناس جنيه
ومن لم يهتم بامر المسلمين فليس منهم يعني تطبع استيكارات وتقعد تعيط قدام قناة الجزيرة
مشاريع التنمية: ده شغل اولي الامر
التصدي للاحتلال: ده شغل اولي الامر
الانهيار الاقتصادي المتسبب في الجوع: ده شغل اولي الامر واديك بتدبح وتوزع اكل على الفكراء والمساكين
لكن بقى ح تقعد تقلب دماغنا وتفكر في حل جذري وتتكلم عن عدل وتنمية وحريات واصلاح حقيقي وتوعية وتفكير ح تتعب دماغنا وتتعب كمان
خليك في نفسك وما تخليناش نسلط عليك القلم واللسان
ويا سلام لو تشتغل في الدعوة عند رجل اعمال حرامي بتاع نسوان ورقاصات وما تفتحش بقك ولا تطالبه بانه يعمل مشروع واحد ينمي ويشغل وينهض بالاقتصاد وتبيع وتكسب وكمان اديك بتاخد ثواب في رجل الاعمال ده وبتخليه يدفع فلوس لوجه الله تعالى
وكده تبقى ضمنت الدنيا والاخرة وتبقى بتزرع السطوح بطاطس وتتبرع بهدوم لجنوب السودان وتمحي امية الكمبيوتر وتمشي ستة كيلو كل يوم وتاخد جوايز من منظمة الصحة العالمية عشان عملت ضد التدخين وما حدش بطل تدخين وفلوس ورضا الله تعالى وخلي الشعب يعيش وبضاعتك يبقى عليها اقبال وتجيب اعلانات وفلوس كتير
والغلابة لهم ربنا..انت ح تقطع نفسك؟
انت مبسوط والحكومة مبسوطة وامريكا مبسوطة والناس مبسوطة والاغنيا مبسوطين والفقرا يولعوا بجاز وسخ ويكفروا كمان، ما انت عملت الدين بفلوس...يعني حتى ربنا اللي مالهمش غيره استخسرته فيهم ياللا يستاهلوا هو ربنا ح يفقرهم ليه الا اذا كانوا ولاد كلب
ملحوظة الفقرا بيكرهوا عمرو خالد، وفيهم ناس ما تعرفوش، وفيه منهم بقى اصلا ناس بيقولوا ربنا بيعمل كده ليه؟
دي اول مرة والله تحصل في مصر: ان الفقرا يكفروا
----
اما بخصوص السلفية فيعني دول الكلام معاهم زي الكلام جوة عشة فراخ خصوصا انهم يمتازوا بهطل منقطع الجماهير

المدونة لا ترحب بالاغبياء

والنبي أحمد الصباغ..خالو، دخل عندي وساب تعليق مفاده ان فيه ضجة معمولة في وسط البلد لمقاطعتي....انا طبعا نايمة على وداني انا لا بانزل وسط البلد ولا باقعد على قهاوي ولا بابلس كوفيات وباستحمى الحمد لله فمعنديش ايتها معلومات انا يا امتن باشتغل يا امتن باقرا يا امتن بادون يا امتن نايمة يا امتن باكل شيكولاتة لحد ما بطني توجعني، المهم بقى احمد الصباغ فاجئني بموضوع ان البوست اللي كتبته نتج عنه ثورة عارمة هزت ارجاء قهوة البورصة ووقعت الشيشة وكرفت على كوبايات الشاي وطيرت الكوفيات وتسببت في ان عدد من الاخوة المثقفين يستحموا كعملية انتحارية تلت البوست الغلبان اللي كتبته على مدونتي الغلبانة وقد عقد اجتماع البورصاوية في ساعة متأخرة من الليل وتم الاتفاق على اعداد حملة لمقاطعتي..على اساس يعني اننا كل يوم بنتعشى سوا وانا ما اعرفش تلاتربعهم
وعليه فانا احب ان اقدم التماس لمجلس قيادة البورصة بان تشتمل حملة المقاطعة على كل من:
الذهانيين ثقافيا
المعاقين فكريا
المتبرمجين تنظيميا وبيشتغلوا بالزمبلك وتدوس على بطنهم يصقفوا وعلى وشها تنور على ضهرها تنور
الاغبيا
ودي غلطتي وانا اقر واعترف بها
مالك مصطفى كان حذرني من الاغبيا وقال لي احذري الاغبيا الاغبيا فيهم سم قاتل
بس انا ما سمعتش الكلام...مع ان مالك ابويا في التدوين وهو اللي مسك دماغي لحد ما دونت والمفروض ان عقلي في راسي اعرف خلاصي عايزة اتنصح اتنصح مش عايزة اتنصح ما اتنصحش
ومع ذلك ما اتنصحتش واعتبرت ان الغباوة دي عيب خلقي وعاهة يجب الا يتم اقصاء صاحبها بسببها لانه في النهاية انسان
وقد اوضح لي السيد مالك مصطفى ان الغبي زي اللي عنده جرب يصعب علينا لكن ما نلزقش فيه عشان ممكن يضرنا
لكن انا ما اتنصحتش
على ايتها حال:
اذا كنت تنتمي لاي من المدرج صفاتهم سالفا قاطع جبهة التهييس لو سمحت عشان انا عاملة المدونة دي لمزاجي وده الكلام اللي قالهولي مالك لما كان بيجر رجلي للتدوين وارجو انه ما يكونش استغل براءتي وسذاجتي وحداثة سني وقلة خبرتي ونضارة تجربتي في الحياة وغرغر بيا واداني معلومات مغلوطة
انا واحدة باتكلم من راسي وماحدش بيبسني على حد وانزل هبل في الجبل وانا فاكرة نفسي باجاهد
وطظ في عمرو خالد
طظ في عمرو خالد
طظ في عمرو خالد
طظ في عمرو خالد
طظ في عمرو خالد
طظ في عمرو خالد
طظ في عمرو خالد
طظ في عمرو خالد
طظ في عمرو خالد
طظ في عمرو خالد
طظ في عمرو خالد
طظ في عمرو خالد
ودراويشه اللي خبل لهم عقولهم بصويته ويمكن بفلوسه في ذات الوقت
انا الحمد لله قسط عربيتي 400 جنيه وح يفضل 400 جنيه لان مدة القسط سبع سنين يعني العربية وصاحبتها ح يموتوا والقسط لسة ما خلصش وباشتغل زي الحمار والله اكتر من عمرو خالد وحسين يعقوب بكتييييييييييييييييييييييييير بس مش بابيع دين عند البقال

احمد حلمي استرشح يا مينز

بيان رقم 1 من مسترشح حى عابدين :

واخيرا استرشحت .. ومعدش ناقصنى حاجة

الله اكبر ولله الحمد ( على رأى الإخوان ) .. اخيرا وبعد عذاب عشرة ايام متتالية نجحت فى تقديم اوراق الاسترشاح لادخل موسوعة جينس باعتبارى احد المعارضين القلائل جدا الذين نجحوا فى تقديم أوراق ترشيحهم فى محافظة القاهرة .

ورغم احداث هذا الاسبوع وما تكبدته من عناء لتقديم الأوراق على النحو السابق ذكره إلا أن يوم الخميس الاخير كان مختلف تماما .. ففجأة بدون مقدمات اختفى طابور الخمسمائة من امام شباك التقديم .. وفجأة تحول الشباك الى قاعة مكيفة محترمة ومنصة وميكروفونات ..( يبدو انه استعداد لليوم المخصص لتقى طلبات ترشيح الحزب الوطنى ) .. عندما دخلت الى مبنى حى عابدين لتقديم الأوراق شعرت بشعور مختلف تماما .. قاعة مكيفة خمس نجوم يتصدرها منصة محترمة تجلس عليها لجنة تلقى الطلبات مكون من خمسة اشخاص .. يتعاملون باحترام وان كانت عقلية الموظف العام لازلت تسيطر عليهم فقد حاول احدهم التشكيك فى الفيش والتفشيش الذى عانيت من اجل الحصول عليه وقبل ان يكمل كلامه ابرزت له كارنية نقابة المحامين وافهمته ان ما يتحدث عنه هو مستند رسمى يحمل شعار الدولة والنسر بيرفرف فيه .. واذا كان لديه اى شك فيه فعليه فورا التحفظ عليه واخطار قسم الشرطة باعتبارها جريمة تزوير فى اوراق رسمية .. ونبهت عليه انه اذا لم يقبل الفيش فى اقل من دقيقتين سوف اقوم انا نيابة عنه بالاتصال بالنجدة وبالطبع ساتصل ايضا بقناة الجزيرة والصحافة واعملها فضيحة .. وقبل اكمال العبارة كان قد وضع خاتم اللجنة على الاوراق قائلا بابتسامة " بالتوفيق " ثم نظر لسقف القاعة هامسا " مفيش فايدة فى المحامين ؟؟ " .

رسوم النظافة .. كلاكيت عاشر مرة :

بادر الموظف بالسؤال .. حضرتك عارف ان فيه رسوم .. قلت له طبعا . . قالى طيب اتفضل على الخزينة ادفع 50 جنية رسم ترشيح و 500 جنية رسوم نظافة .

سألته .. ايه لزوم النظافة انا استحميت قبل ما انزل من البيت ؟؟ فرد قائلا .. ده قرار المحافظ وممنوع استلام اوراق الترشيح بدون سداد رسم النظافة ..

هى أيه حكاية الحكومة المصرية مع النظافة .. هو حد مفهمهم أن الشعب المصرى ناقص نظافة .. انا بادفع فى البيت 3 جنية نظافة مع النور .. وفى المكتب 15 جنية نظافة مع وصل النور .. كمان ادفع 500 جنية نظافة مع الترشيح .. ايه حالة النظافة اللى نازلة على الحكومة دى ؟؟

قال الموظف ان هذه الرسوم لزوم ازالة اوراق وملصقات الدعاية الانتخابية .. فقلت له أن أمن الدولة تقوم بالواجب فقبل أن تمر ساعة على تعليق الملصقات واللافتات تكون امن الدولة قد قامت بدور النظافة وازالت الملصقات .. فرد الموظف ان هذه تعليمات المحافظ لا تقبل الأوراق بدون رسوم نظافة .. وحضرتك تقدر تستردها تانى بعد الانتخابات .. ابقى قابلنى .. هو اللى بيدخل جيب الحكومة بيخرج تانى .

أمرنا لله .. حر ونار فى جتتهم .. يقعد لهم فى عيالهم وعافيتهم يا رب !!!

المرشحين .. ذهب ولم يعد :

عندما امسكت بيدى ايصال استلام اوراق الترشيح وتنهدت تنهيدة عميقة ونطقت الشهادتين بدأ الارتياح يظهر على وجهى وهو ما يصاحبه دائما اسئلة سخيفة .. فبدأت بالاسئلة .. هو كام مرشحى متقدمين لحى عابدين لغاية دلوقتى .. فقال الموظف .. عابدين مش كتير فى حدود ثلاثة .. ثلاثة بس .. ليه هو الشعب راح فين ..

الله .. معنى كده ان قائمة الحزب الوطنى اللى متقفلة وعددها عشرين مرشح لو ثلاثة ربنا افتكرهم منها حانجح بالتزكية .. ده ايه الحلاوة دى !!! عموما ربنا كبير قادر ياخد ثلاثة من الحزب الوطنى ويخلصنى !!

على أن الملاحظة الطريفة ان كلمة مبروك كانت سابقا تقال لمن ينجح فى الانتخابات .. اما الآن فتقال لمن ينجح فى تقديم اوراق ترشيحه .. فقد تلقيت كم من التهانى بمناسبة تقديم الاوراق شعرت معها اننى قد فتحت عكا ..

وعلينا الآن أن نبدأ فى اعداد البرنامج الانتخابى .. وافكر جديا فى دعوة أوباما وهيلارى الى مناظرة تلفزيونية باعتبار أننا كلنا مسترشحين .. ومحدش احسن من حد ..

واخيرا استرشحت .. ومعدش ناقصنى حاجة

محدش له كلمة عليا .. ولا حد له عندى حاجة

وأركب الحنطور .. واترشح !!

أحمد حلمى

المحامى

مسترشح واحد مستقل وسط عشرين مسترشح حزب وطنى

حى عابدين

http://freedomcenter.blogspot.com/

-----

الف الف مبروك يا احمد ومن النهاردة انت حرة انشالله بقى تبات برة

بالنوسبة لرسوم النضافة يا اخوانا حرام عليكوا استحموا الريحة وصلت للحكومة وبتطلعه على جتتنا

بس فيه مشكلة رئيسية ان مناطق كتير قوي في مصر ما بتوصلهاش مية ومناطق تانية المية بتيجي ساعة في اليوم ومناطق تالتة بيقعطوا المية ويجيبوا النور واول ما المية تيجي يقطعوا النور

طب الناس تنضف وتبقى بلد اكسلانسات ازاي؟ ماهو الاكسلانسات لازمهم مية وصابون وشامبو، والا ارمي اي اكسلانس في مصر وبعد اسبوع ح يتحول لحنظلة اللي كان بيحب رائحة الانسان وهو فخور بها

مشروع قانون لتجريم العنف ضد المرأة يوم 16 مارس

الساعة 11 الصبح في نقابة الصحفيين مركز النديم ح يعمل مؤتمر ويعمل مشروع قانون لتجريم العنف ضد المرأة وبعد كده سيتم التوجه للبرلمان تقديم المشروع
والله انا اقتراحي في المشروع ان اللي يضرب ست يتعلق اسبوع في ميدان عام عشان يبقى عبرة لمن يعتبر ومن لا يعتبر

ده طلع فعلا الرسول هو اللي غلطان وعمرو خالد نبي الزمان

ده رد كتبته في التعليقات والرد ده موجه بس لحسن مدني وسامي الطحاوي واسد الدين وطارق ومرعي

وفيه واحد انونيمس مش عارفة هو مين، بس بشكل عام ده رد للناس اللي عايزة تتكلم وتفكر مش للدراويش، والله اعلم بقى دراويش وللا قابضين مدام الراجل طلع غني كده:

انا بس ح ارد عليك انت عشان اوضح لك حاجة

اولا لما تقرا البوست ما تنطش او لو عايز تنط يبقى الحتة اللي لفتت نظرك ترجع تعيدها عشان تفهمها

يعني انت بتقول لي لو ابوكي كنتي اتضايقتي

اولا متهيالي ان سيدنا محمد اغلى عليا من ابويا ومن نفسي ومافيش داعي للمزايدات

ثانيا

ح اخد المثل بتاعك واوضح لك

لما مثلا مثلا عبد الرحمن الابنودي يقول انا اخدت فلوس من الكوايتة ايام حرب العراق عشان انا راجل وطني ومؤمن بالقومية العربية وانت تيجي تعلق وتقول والله معنى الكلام ده ان ابوكي خاين وعميل صهيوني وبيقبض من امريكا بينما الكل عارف ان ابويا وطني وما بيقبضش من حد ومن الد اعداء الصهيونية يبقى ده اسمه في الاسلوب الادبي التوكيد بالضد وعادة التوكيد بالضد لازم يبقى صادم عشان يبقى محفز

يعني انت بتنبه عقلي لان الكلام ده ما يعقلش لاني لو قبلت الكلام ده يبقى لازم امد الخط على استقامته واقبل ان اللي ما اخدش فلوس من الكوايتة هم اللي خونة وصهاينة وبيقبضوا من امريكا

لما الصحابة كانوا بينادوا بصوت عالي وهم بيدعوا والرسول قال انكم لا تدعون اصما

ما حدش قال له ايه قلة الادب دي ازاي تقول على ربنا اصم

ليه؟ لان ربنا اداهم مخ وهم بيعملوا اللي عليهم وبيشغلوه

ليه رديت عليك انت بالذات وما ردتش على البهايم التانيين لاسباب كتيرة

اولها: ان انت مش بتتصيد وبتستوضح بجد

ليه باقول على التانيين بهايم واغبيا وما كفرتش حد فيهم بالمناسبة زي ما هم كفروني، ههههههههههه والله ضحكتني قوي...اول مرة حد يقول عليا كافرة عشت ونلت اللقب، لان الطريقة دي فعلا بقت مقرفة جدا

طريقة ايه؟

طريقة ان الكلام ما يبقاش عاجبك فتسيب الكلام اللي مش عاجبك لان ما عندكش رد وتتصيد في حاجة انت عارف ومتأكد انها مش زي ما انت بتحاول تفسرها عشان تشتت الحوار وتحط اللي قدامك في موقف دفاعي

زي النكتة بتاعة الراجل اللي دخل لقى مراته مع راجل فاول ما مراته شافته قالت له ماشاء الله يا استاذ داخل البيت الساعة اتنين بالليل فبص للراجل وقال لها مين ده فقالت له ما تغيرش الموضوع

دراويش الدعاة ما عندهمش رد على دخله الغريب واللي مش مبرر فراحوا ماسكين في حتة وقالوا لي انت بتقولي على الرسول عواطلي ولو انا باقول على الرسول عواطلي يبقى الرسول كان بيقول على ربنا اصم

ويبقى صحابة كتير غلطوا في الرسول لانهم استخدموا هذا الاسلوب البلاغي في الدفاع عن رأيهم ولو قريت نهج البلاغة وفي مناقشة سيدنا علي مع معاوية لما معاوية كان بيطرح منطق فكان سيدنا علي عشان يدلل على بطلان منطقه يقول له: اذن فالنبي كان كذا، وكذا دي بقى ممكن تبقى: مفرط...لا يتقي الله....لا يقيم حدود الله في اشارة الى بطلان المنطق وبلاغيا مفهوم بالاجماع ان لما الامام علي يقول في رده على معاوية: اذن فالنبي كان لا يقيم حدود الله

انه بيقول لمعاوية انك انت الذي لا تقيم حدود الله وانك بتزايد فيما لا يقبل المزايدة وكأنك بتزايد على النبي نفسه

حتى معاوية ما استخدمش الاسلوب الرخيص اللي الاشكال دي استخدمته وما قالوش: يا قليل الادب انت بتقول على النبي لا يقيم حدود الله لان معاوية ما كانش شايف اي سبب لانه يتغابى لانه لو اتغابي كل الناس، حتى اللي في معسكره، ح تقول له يا غبي انت ليه بتتغابى او على الاقل كانوا ح يضحكوا ويعتبروه بيهزر ثم انه ما كانش غبي، ثم انه ما عندوش وقت يضيعوا في التغابي لانه عنده هدف، بصرف النظر بقى عن ايه الهدف بس ما كانش قاعد فاضي يعني وحياته هلامية زي الاخوة دولم

انا ح اسيب التعليقات دي ومش ح امسحها فيه بس تعليق اتكرر مرتين فمسحت واحد وسبت التاني لانه هو هو نفس التعليق من نفس الشخص بس كتبه مرتين

==========

نيجي بقى للموضوع الرئيسي

يا استاذ مرعي

ويا اي حد اتناقش في الموضوع وقرر ما يتغاباش كل حاجة في الدنيا لها سياسة ولها قانون بيحكمها السياسة مثلا فن الممكن على رأي هيكل ابو كلمة بخمسة جنيه استرليني ده راخر، التجارة او البزنس فن العرض والطلب

الدين فوق ده كله

الدين هو اللي بيحكم السياسة والتجارة وكل مناحي الحياة عشان كده ما ينفعش الدين والمتخصصين فيه انهم يبقوا مستفيدين من الامور الدنيوية عشان يعرفوا يوجهوا هذه الامور

الداعية او عالم الدين شغلته يقول للبزنس : ده حلال وده حرام أو الاولوية للامة هي التجارة في المنتج الفلاني وعدم التجارة في المنتج الفلاني زي مثلا ان البلاد تبقى في حالة حرب فيبقى الاولوية لصناعة السلاح ويبقى واجب ديني على التجار والصناع ان تبقى دي تجارتهم وصناعتهم لما يتحول الدين نفسه لبزنس ساعتها يفقد قيمته التوجيهية

ويدخل تحت مظلة قوانين السوق، عرض وطلب، مصلحة ومستفيد

ويبقى عليه فمثلا ما ينفعش ان عائض القرني يقول ان اللي في العراق مقاومة لان ده بيخرب بيت رجل الاعمال اللي بيديله فلوس لان رجل الاعمال له مشاريع في العراق

ما ينفعش عمرو خالد يتكلم في مشاريع تنموية لان ده بيخرب بيت الشيخ صالح اللي معتمد في البزنس بتاعه على المشاريع الاستهلاكية، ويبقى دخله اتنين مليون ونص في السنة، وللا حتى يا سيدي مليون وللا نص مليون، ويطلع للناس الغلابة اللي ما عندهمش متعة في الحياة غير الفيلم والماتش اللي محتكره الشيخ صالح ويقول لهم الوصلة حرام وسرقة

وتبقى المادة اللي بيقدمها الدعاة مادة تجارية بيشوفوا الطلب على ايه وبيعرضوا بضاعتهم عشان ده بزنس ودي فلوس ناس يبقى الدين زي السياحة زي الغزل والنسيج وزي كمان تجارة السلاح والمخدرات والدعارة

ما كله بزنس بقى

اذا كل حاجة ح تتسلع حتى الانسان ما ينفعش القيمة الروحية والاخلاقية للانسان كمان تتحول لسلعة والا ليه الرسول ما اخدش فلوس على كل صحابي اسلم...ماهو بمجهوده وتعبه وكفاحه الناس دي اسلمت يبقى على الاقل يدفعوا للراجل اللي هداهم يبقى بيتعامل بقى على الراس بكذا دينار وعلى حسب لو كان عبد يبقى الراس بتلاتة مليم ولو سيد من اسياد قريش تبقى الراس بشيء وشويات

اما الكلام عن ان الرسول كان غني ودخله كبير بس هو كان بيصرف كل دخله على الفقرا ويقعد هو واهله وبناته من غير اكل ولا حتى خادم يرحمهم من الشقا

هههههههههههههههههههه

مش عارفة اقول ايه؟

دي ادانة لبتوع بزنس الدين مش دعم لهم عبد الرحمن ابن عوف ما كانش بيدعو الناس للاسلام وياخد فلوس على كده
سيدنا محمد كان بيجيله الخمس من المغانم وكان كمان تاجر وقبل الرسالة كان عنده فلوس كتير هو والسيدة خديجة

الحقيقة الاسلام جه على الرسول والصحابة وهم معاهم فلوس وما سابهمش الا لما فلسهم

بينما الدعوة جات على الدعاة وهم ماعهمش فلوس وما سابتهمش الا لما عملتهم مليونيرات

لما واحد يتقال له انت مليونير منين يقوم يرد ويقول انا من عيلة محترمة

دي اسمها قلة ادب

لان ده معناه ان الفقرا مش من عائلات محترمة

وسيدنا محمد ابو الفقراء وكان بيدعي ان ربنا يحيه مسكينا ويميته مسكينا ويحشره في زمرة المساكين

لما واحد يتقال له انت جبت الفلوس منين ويقول انا باشتغل

يبقى بيدق لنا عصافير على دماغنا لان ده معناه ان كل الغلابة دول ما بيشتغلوش وعواطلية

وسيدنا محمد ابو الغلابة

لما واحد يستهبل ويقول ده رزقي يبقى كأن ربنا مستقصد الفقرا ومش بيرزقهم او كأن المساكين دول فقرا لان ربنا غضبان عليهم

وسيدنا محمد ابو المساكين

يبقى الناس دي بتزايد على الرسول نفسه والناس الغلابة مالهاش الا ربنا لما كمان ربنا يتسلع ويبقى بتاع الاغنيا يبقى الغلابة فضل لهم ايه؟

حتى سيدنا محمد استغلوا فرصة موضوع الدنمارك وعملوا عليه مشروع استثماري اسمه جوائز المحبة وبيتاجروا بحب الناس للرسول

وانا ما اعرفش ان اللي يحب الرسول يعلق يافطة يا اما ده معناه بقى ان الصحابة كانوا بيكرهو الرسول

ماحدش فيهم كان بيعلق يافطة: الا رسول الله ولا بيشتري تي شرت بفلوس مكتوب عليه يا حبيبي يا رسول الله

الحب افعال

وما كانش فيهم تاجر بيبيع يفط عليهم : انصر نبيك..ويبيع ويكسب

واذا كانت دي الطريقة في حب الرسول يبقى اكيد اكيد الصحابه كانوا بيكرهوا الرسول

تاني

وخلي الاغبيا يدخلوا ويقولوا لي: يا كافرة انت بتقولي الصحابة بيكرهو الرسول؟

انا باستمتع بغباء الانسان خصوصا لما يتغابى بمزاجه مش خلقة ربنا

انا باكره الطريقة المبتذلة دي بتاعة: بتححححححححبه هههههو كمان بيحححححححححححبك، الدعوة دي ابتدت بححححححححححححضن وانتهت بححححححححححححضن، حضن ايه؟ هو فيلم حمام الملاطيلي؟ وكمان فوق تبويظ مخ الناس بالطريقة المقززة دي يبقوا مليونيرات؟ والناس جالها هطل وبقت طريقتها في التعبير عن الحب تنم عن انهم مش فاهمين يعني ايه حب اصلا

فيه قصيدة لنزار قباني ( مع ملحوظة اني مستنية واحد يقول لي بتستشهدي بنزار قباني الزنديق..:)) الحاجات دي لطيفة موت):

حمقاء أنت ألا ترين قلبي قد تجمع في عيوني

إن كان حبك أن أعيش على هرائك

أكرهيني

ملحوظة تانية: اسد الدين بعت لي رسالة بصراحة ضحكت لما قريتها لانه بيقول لي ليه كده يا نوارة ده انت حفيدة الرسول ينفع تتكلمي كده على جدك؟ انا عارف انك ما تقصديش

اولا: ابن خلدون بيقول ان بعد الجد الرابع ده ما اسموش جد

ثانيا: يعني اللي مش حفيد الرسول ما يحبوش؟ ولو جدي ابو جهل المفروض احبه واكره سيدنا محمد؟

ثالثا: "يا فاطمة بنت محمد...اعملي فلن أغني عنك من الله شيئا"

رابعا: الملك حسين كمان حفيد الرسول...ههههههههه يعني الملك حسين قريبي؟ يععععععععع

خامسا: الدعوة الاسلامية اول دعوة تحارب الانساب، والبشرية ما فهمتش ان الانساب لا تغني الا بعد ما الرسول جه في الدنيا، ودي الانساب القريبة، ما بال بقى الانساب البعيييييييييييييييييييييدة

انا مش باحب الرسول غير عشان هو الرسول وبس، وامارات الحب ان اللي يحب حد يحب احبابه، والرسول آخر وصية له: الله الله في النساء الله الله فيما ملكت ايمانكم...ومات، مات وكان راهن درعه عند يهودي وما عندوش في البيت غير شوية شعير. اللي ينصب نفسه داعية وقدوة لازم يحس باقل الناس اللي هو بيكلمهم، لازم ما يبعش كلام وياخد عليه فلوس، ولازم يتحاسب جاب فلوسه منين، لو ينفع ان الدين يبقى بزنس يبقى ينفع ان الواحد يستغنى عنه ويشتري سلعة تانية اذا ما عجبتوش الخدمة

احمد حلمي: مرشح مش عارف يسترشح

مذكرات مسترشح مش عارف يسترشح

مع إعلان الحكومة عن فتح باب الترشيح لانتخابات المجلس المحلية تذكرت اعلانات الحكومة فى تلفزيونها المصرى .. كن ايجابيا .. شارك فى صنع سياسية بلادك .. سجل نفسك فى الكشوف الانتخابية .. شارك فى العملية الانتخابية ..

ورغبة فى المشاركة فى العملية الانتخابية واستخدام حقى الدستورى فى الترشيح .. وانبثاقا من الرغبة فى خدمة اهالى الدائرة الكرام .. واتساقا مع مبداء العمل العمل .. وانبعاثا وانشقاقا واندثارا الى اخره قررت أن اخوض هذه التجربة .. وياريتنى ما قررت !!!

ستبدأ التجربة من حيث تترك بيتك وعملك وأكل عيشك لتجرى يمين وشمال للبحث عن مستندات التقديم من الشهادة الجامعية واداء الخدمة العسكرية والفيش والتفشيش .. رغم أن الرقم القومى يغنى عن كل ذلك فمجرد ادخاله على الكمبيوتر كفيل ببيان كل هذه المعلومات .. لكن تقول ايه .. حضارة سبعة آلاف سنة من الروتين العقيم .. وأسأل نفسى وانا اخوض هذه المشاوير .. هو أوباما وهلارى قدموا فيش وتفشيش لما دخلوا الانتخابات ؟؟؟

الفيش والتفشيش :

عند الذهب الى قسم الشرطة لاستخراج الفيش والتفشيش لم يكن من الصعب اكتشاف المؤامرة الأولى .. موظف خاص مختص فقط باستخراج الفيش والتفشيش للمرشحين لانتخابات المحليات .. طبعا هذا الموظف غير موجود طوال النهار .. وخد عندك مائة مشوار ذهابا وايابا للقسم .. فين عم سالم يا جماعة .. عم سالم راح المديرية يودى الفبش .. عم سالم راجع من المديرية بالفيش .. عم سالم رايح فلسطيم يفتح القدس ومعه الفيش .. الخلاصة .. مفيش عم سالم .. ومفيش فيش .. ضاع يوم قول اتنين .. فى النهاية يتوسم موظف اننى من الطبقة العليا علشان البدلة والكرافتة والنظارة السوداء .. فيبادر بالنصيحة .. هو حضرتك مش حزب وطنى برضو .. ايوة طبعا انا من لجنة السخافات .. طيب ما تروح حضرتك مصلحة الأدلة فى الوزارة على طول .. والله فكرة .. شكرا .. وتبدأ مشاوير وزارة الداخلية ذهابا وايابا ..

وفى مصلحة الأدلة داخل وزارة الداخلية التى من اختصاصاتها مكافحة جرائم الرشوة تدور تلك الحوارات مع الموظفين والاجابة عليهم هى ما بين القوسين :

صباح الخير حضرتك عايز فيش علشان الانتخابات .. ربنا يوفقك معاليك ( عشرة جنية ) .. طبعا حضرتك مستعجل ومش حاتقدر تقف فى الطابور اللى اخره فى ميدان التحرير ( عشرة جنية ) .. حضرتك معاك صورة ( عشرة جنية ) .. طيب تعالى كده وهات ايدك علشان تتفيش ( عشرة جنية ) .. الاستلام بكرة حضرتك .. ليه هو مش مستعجل .. ما هو ده المستعجل .. ضاع كمان يوم .

فكوا المكنة :

بكرة بقى .. الفيش يا جماعة .. لاء حضرتك تعالى الساعة 4 الظهر .. حاضر .. الساعة 4 الظهر .. الفيش يا جماعة .. اقف فى الطابور .. يالهوى ده اخره فى ميدان التحرير ( عشرة جنية ) .. اسمك ايه .. دور .. مفيش .. مفيش ازاى .. هو بتاع انتخابات ..اه قولت لى .. لاء ماطلعش .. ليه .. اصلهم فكوا المكنة .. مكنة ايه اللى فكوها .. مكنة الفيش بنعمل لها صيانة تعالى بعد اسبوع .. وحياة خالتك تقصد بعد الانتخابات .. انا حاعتصم .. انا حاضرب .. انا معتصم فى الوزارة .. هيصة و زيطة ويتدخل الرئيس ونائب الرئيس .. فى الاخر يظهر الفيش .. اتفضل ياباشا بالتوفيق ( عشرة جنية ) .

شباكنا ستايرة حديد :

اخيرا ياربى حصلت على الفيش .. احمدك يارب .. يالى بينا بقى على المحافظة .. اخيرا ربنا رضى عنى وحاشوف شباك تقديم طلبات الترشيح .. عشم ابليس يا مرشح شباك ايه يافندى اللى حاتشوفه .. خد عندك ..

عند الوصول الى المحافظة وشباك تقديم الطلبات تفاجأ أن هناك طابور مكون من 500 شخص على الشباك فتضطر للوقوف خلفهم فيكون دورك رقم 501 ومن الساعة 9 صباحا وحتى الواحدة ظهرا لم يتحرك شخص واحد من الخمسمائة .. اغلق الشباك الساعة الواحدة والخمسمائة هم الخمسمائة .. اه كده فهمت .. الخمسمائة كومبارس مهمتهم منع اى مرشح من الوصول للشباك .. تم اغلاق الشباك الساعة الواحدة لتعلن وزارة الداخلية أنه حتى اليوم قبل الاخير لم يتقدم اى شخص للترشيح .. وتناشد الوزارة السادة المواطنين المشاركة فى العملية الانتخابية .. كن ايجابيا وشارك فى صنع سياسية بلادك .. بلادنا بتتقدم بينا .. ايدك معنا .. اللى يحب النبى يزق علشان بلدنا مش عارفة تتقدم بينا .. يعود المرشح رقم 501 الى بيته واوراق ترشيحه فى يده بعد ان فشل فى الوصول الى الشباك .. يجلس امام التلفزيون ليشاهد اعلانات وزارة الداخلية ..كن ايجابيا وشارك فى العملية الانتخابية .. يا مثبت العقل والدين يارب .. ضغطى طالع نازل ..

اليوم الاخير :

غدا الخميس ... اليوم الاخير لتقديم اوراق الترشيح .. والاوراق لا تزال فى جيبى .. ومن التاسعة صباحا سأذهب الى شباكنا ستايره حديد لأجد نفس الخمسمائة شخص يقفون فى نفس الطابور .. طيب اعمل ايه .. حاعتصم فى المحافظة .. ماينفعش .. حاعتصم فى الشارع ادام المحافظة .. حاتيجى أمن الدولة تشيلك .. حابعت للسيد جورج بوش رئيس مجلس ادارة العالم اناشدة ممارسة ضغوط على الحكومة المصرية لتمكينى من الترشيح .. ماينفعش حاتاخد وقت .. طب اعمل ايه ياعالم !!!

أنا لا اتطلع ولا احلم ولا أتجراء أن أحلم بالنجاح .. انا فقط ارغب فى الحصول على لقب مرشح .. بس مش اكتر من كده .. مش عايز انجح .. عايز بس لقب مرشح .. هو ده كتير يا عالم .

أحمد حلمى

المحامى

مسترشح مش عارف يسترشح

http://freedomcenter.blogspot.com/

-----

وهنا انتهت شهادة المسترشح المسكين وقد شوهد وهو يعاني من نوبات استرشاح شديدة ولا نفع معاه شاي بلمون ولا كونتافلو

ولا حول ولا قوة الا بالله العلي العظيم

إني احفظ نكتة اني احفظ نكتة

مرة واحد صاحبنا عزم ابونا على الغدا وقال له يا ابونا انا النهاردة مبسوط اطلب اي حاجة مني فابونا قال له والله يا فندم كفاية عليا اقعد معاك واتغدى معاك بس كان عندي كام سؤال كده قال له اتفضل اسأل

قال له ينفع جنابك ان واحد مسيحي يبقى وزير، قال له يا سلام طبعا ينفع، قال له طب ينفع جنابك يبقى رئيس وزراء، قال له يا سلام يا ابونا جيت في جمل نعمل مسيحي رئيس وزراء ايه كمان، قال له طيب ينفع يعني..يعني لو مافيهاش مضايقة يبقى نائب رئيس الجمهورية قال له يا سيدي يا ريت اهو يبقى تغيير قال له طب يعني ينفع ينفع ان مسيحي جنابك يبقى....يبقى...يبقى رئيس جمهورية

قال له ولا مسلم يا روح امك

----

الا اخبار البورصة ايه يا استاذ احمد؟ بيقولوا بتكسب مليون دولار في السنة دلوقت قال؟

انا احكي لكوا اصلي انا ما بيتبلش في بقى فولة، بقى الاستاذ احمد حلمي عامل مركز الحرية عشان يدافع عن المساجين اللي مش لاقيين حد يدافع عنهم حلو؟ حلو...قوم الاستاذ احمد مش عايز ياخد تمويل من اي جهة اجنبية كمسألة مبدأ حلو؟ لا مش حلو..لانه كده بيصرف على الشغل من جيبه حيث ان معظم شغله تطوعي، يعمل ايه الاستاذ احمد، اخر مرة شفته فيها من ييجي شهور كتير كده قال لي انه ح يضارب في البورصة عشان يصرف على المكتب لانه لسة مصمصم انه ما ياخدش فلوس من حد

حقة لو ضربت معاه زي طارق السويدان وبقى يكسب مليون دورار في السنة دي تبقى فرجت من وسع

بس واضح من حظه في الاسترشاح ان فيه ناس النحس ملازمهم وناس ماشية معاهم زي السكينة في ال...جاتوه ارزاق بقى

ايه حكاية ليمان طرة؟ ثم ايه الكفار المسلمون دولم

والله العظيم قريت حديث للرسول بيقول ما معناه مش فاكرة نصه بس معناه يعني ان في اخر الزمن كل الناس ح تنصاب في مخها فما تكاد تجد رجلا عاقلا...القرآنيين ح يعملوا اول مؤتمر لهم ومسميين نفسهم الكفار المسلمون
ههههههههااااااااااااااااااااي
عثل عثل عثل والله العظيم دي حشيشة جامدة...او حقنة بيسة غالبا
ثانيا
ايه حكاية المسجون اللي بيواجه الموت في ليمان طرة شفته عند عرباوي وهو مش كاتب تفاصيل...فسر يا حسام، او اللي يعرف حاجة يفسر لنا

ماهو يا عمرو خالد غلط يا سيدنا محمد غلط

اظن كلكوا عارفين ان السنة دي فوربز قالت ان الدعاة اعلى دخول واعلاهم عمرو خالد اللي بلغ دخله السنوي اتنين ونص مليون، دولار طبعا مش جنيه يا معفن انت وهو وهي، وبعديه طارق السويدان، وتالتهم عائض القرني مؤلف لا تحزن، طبعا وانت ح تحزن ليه يا خويا؟
اولا ماشاء الله لا قوة الا بالله، وبالهنا والشفا، واللهم لا حسد، وكل حاجة يعني عشان ماحدش يفتكرني حاقدة ولا حاجة
طب والله العظيم ما حاقدة ما لعيبة الكورة بيقبضوا اكتر من كده بس فيه كام سؤال كده بيطرح نفسه يتلخص في اغنية زياد الرحبان:
بيقولوا لك من عرق جبينه
طلع مصاري ها الانسان
طيب كيف هيدا وكيف ملايينه
وما مرة شايفينه عرقان
احنا من واحنا حلوين قد كده واحنا نعرف ان طريق ربنا، بصراحة كده، بيخسر فلوس وصحة ويمكن يخسر الواحد حياته كمان هلبت بقى ما الدعوة الى الله اللي عيشت سيدنا محمد لآخر لحظة في حياته رابط بطنه من الجوع بقت تكسب ملايين دلوقت، وملايين خضرا
طب افهمها بقى تيجي ازاي دي
عمرو خالد بيقول انا اهلي اغنيا وعيلتي ناس محترمة
طارق السويدان بيقول انا باضارب في البورصة وباشتغل واكسب
والباقي قالوا ده رزق
مما يدل على:
اولا: ان سيدنا محمد من عيلة مش محترمة
ثانيا: ان سيدنا محمد كان عواطلي
ثالثا: ان سيدنا محمد صلى الله عليه وسلم ربنا كان غضبان عليه قوي ومش بيرزقه ابدا
او:
اولا: ان عمرو خالد عيلته مش غنية ولا حاجة
ثانيا: البورصة والشغل ما يجيبوش كل الفلوس دي، ما كانتش العين بكت
ثالثا: ان رزق بالمعقول يا سيدي
الرزق على قد التعب
هاذوها نقطة
النقطة التانية
عندنا في الاسلام الرزق بييجي من حاجتين: الانتاج والتجارة
والاتنين عليهم بعض المحاظير بحيث ما ينفعش الواحد ينتج قنبلة ويقول ده رزقي ولا يتاجر في الدعارة ويقول ده رزقي
يعني انتاج او تجارة حلال
والانتاج يا مزروع يا مصنوع
والمصنوع يا بدني يا ذهني
واكيد اكيد الدعوة الى الله مالهاش دعوة بالزراعة
تبقى صناعة؟
صناعة؟ متهيالي صانع الدين هو اللي نزله مش كده؟ ح نقول انتاج فكري؟
طيب منين؟ اذا كان كل شوية يقولوا احنا مش بنفتي احنا بندعوا الى الله، فيه فرق ما بين تعليم العلم وانتاج الاجتهاد الفكري وبين الدعوة دي شغلانة ودي شغلانة
انا مش عايزة اضيق خلق الناس واقول لهم حقيقة تاريخية ان العلماء في الدولة الاسلامية كان محرم عليهم ياخدوا فلوس من التلاميذ وانهم كانوا بياخدوا جراية من بيت المال او بيقبلوا صدقات عشان ما ياكلوش بعلمهم وفي نفس الوقت يتفرغوا له وفيه علماء كانوا بيتكسفوا ياخدوا من بيت المال صدقات فكانوا بيشتغلوا شغلانة تانية
بس اديني قلت مع اني ما كنتش عايزة اقول والله بس انتوا اللي ضغطوا عليا
طب ما تضغطوش عليا اكتر من كده عشان اقول لكوا ان الدعاة الجدد ولا حتى بينتجوا انتاج فكري يعتد بيه عشان ياخدوا كل الفلوس دي ومافيش بيت مال المسلمين عشان يصرف عليهم
يبقى منين؟ منين؟
يبقى بياخدوا صدقات بقى...صدقات بالملايين وبالدولار...العبي يا مدرسة الالعاب
طب كده بند الانتاج اتقفل
مافيش غير بند التجارة...ييجي واحد رخم يقول لي ما هي دي التجارة مع الله
هئ هئ هئ هئ
فيه فرق ما بين التجارة مع الله - اللي بالمناسبة مش بتجيب ملايين خالص...عمرها ما جابت ملايين ولا عمرها ح تجيب ملايين - وبين التجارة باسم الله
كل واحد فيهم يطلع يقول: انا لا اتقاضى اجرا على محاضراتي
عذر اقبح من ذنب..ياريته كان بياخد فلوس على المحاضرات كنا عرفنا الفلوس دي كلها جات منين؟ منين؟ منييييييييييييييييييييين؟
من امتى الدين بيجيب فلوس؟ امال الشيخ كشك مات فقران ليه؟ امال عطية صقر فضل يركب الاتوبيس الاحمر ده لحد ما مات ليه؟ امال الشيخ شلتوت كان فقران هو راخر ليه؟ ده فيه عالم جليل، ناسية اسمه، كان في الستينات مات لان ديل جلابيته شبك في عجلة الترماي وهو نازل منه
امال الانبيا كانوا رعاة غنم ليه؟ امال سيدنا محمد كان بيقعد بالتلات ايام ما يدوقش غير المية ليه؟ امال كان بيتلوى على الحصيرة من الجوع ليه؟ امال كان بيربط بطنه ليه؟
بس الحمد لله، ربنا نصرنا واخيرا الدين بقى بيكسب، آآآآآآآآه عشان كده توني بلير اشتغل مدرس دين
طب ما تيجوا نشتغل في الدين ونبيع ونكسب وتلعلع معانا ونلعب بالفلوس لعب
ادعولي بس وانا انغنغكوا

يا أخ وليد المسلم ممكن ترحم امي؟

فيه اخ عظيم ومثقف متخصص في مناقشة الديانة المسيحية اللي معلوماته عنها ما تفرقش كتير عن معلوماتي عن علوم الوراثة، وباين بينقل من حد وبيبعت لي انا على اساس ايه؟ بيقنعني انا يعني بانه هو زعلان من الديانة المسيحية عشان انا اقدر اعمل له ايه؟ يعني ايه التصرف المطلوب مني انا عن ذات نفسيتي؟ لو فيه حاجة في ايدي اعملها انا ممكن اتطوع، بس للاسف انا ما اقدرش اعمل له حاجة
طيب افتح الميل الاقي الف ومش عارفة كام رسالة منهم حوالي خمسميت رسالة من الاستاذ وليد عناوينها كده: هل مريم الاقنوم الرابع؟ من هو ابو المسيح؟ هل للمسيح اخوة؟ هل المسيح ابن زنا؟ هل يوسف النجار كان خطيبا لمريم؟ هل كان عندهم تلاجة في البيت؟ هل اودتة النوم والسفرة كانت على حساب مين؟ وعناوين كده عاملة زي عناوين روايات محمود عبد الرازق عفيفي اديب الشباب
بالنوسبة لاديب الشباب فهو بيعلن عن موهبته الفذة على الحيطان لعك وعسل ان حد يكتشفه ويدفع ملايين الدولارات في اعماله الادبية، طيب الاستاذ وليد بيبعت لي انا ليه؟ ومهما اعمل انسابسكرايب يرجع ويبعت لي على ميلي الصخصي وعنده كذا ميل بيبعت منه على حيث يعني انك تسلم نفسك لان المكان محاصر

طب والنبي يعني حوار الاديان اللي من جانب واحد ده انا مش عايزاه...اعمل ايه حاليا دلوقت؟

فيلم أكشن بطولة أمن الدولة

دلوقت احمد عبد الفتاح بعت لي ميل بيقول لي الامن بيطارد مدير موقع اخوان اون لاين واداني لنك مدونته عشان افهم الحكاية لقيت التغطية بطولة امن الدولة وعاملين زي فيلم امريكاني هم بيعملوا كده ليه؟
التفاصيل هنا

توني بلير مدرس دين

هئ هئ هئ هئ هئ هئ
الموكوس بعد ما قتل له مليون نفر في افغانستان والعراق ومراته مشيت في البطال وصوروها مع صاحبتها استغفر الله العظيم احنا عندنا ولايا وبعد ما قال لنا امام العالم العربي خياران اما دولة علمانية ديمقراطية او دولة دينية ديكتاتورية ونحن لن نسمح بالخيار الثاني، والله كتر خيره انه تعب نفسه وادانا خيارتين وبعدين خاف علينا من الانتفاخ قام قال كفاية عليكوا خياراراراراية واحدة
بعد ده كله، الراجل يا ختي قلب كاتوليكي واشتغل مدرس دين في مدرسة دينية
وده من ايه ده يا ترى؟ يعنى ارواح المليون بريء بيطاردوه في منامه قام مشي في سكة ربنا وللا صدمته في حرمه المصون خلته يبيع الدنيا وللا ايه الحكاية؟
برضه يا حاج التايب حقوق العباد ما بتروحش...ح تكفر عن مليون بريء قتلتهم ازاي؟
هي ايه الحكاية؟ هو كل شوية واحد يسيح دم الناس ويقول انا تايب؟

حملة الدعاء على اصحاب التشريفات

حضراتكوا اكيد بتخرجوا في الشارع زي اي انسان طبيعي ما بيخرج في الشارع، واكيد بيبقى وراكوا مواعيد زي ما اي كائن حي بيبقى وراه مواعيد، السؤال اللي بيطرح نفسه على ترابيزة السفرة: هل بتوصلوا في معادكوا؟
اقصد لما بيبقى فيه تشريفة بتوصل في معادك؟ الاجابة طبعا لا واللي ح يقول اه ح اضربه بالقلم على وشه، طيب هل حضرتك او حضرتي عندنا قوائم بمواعيد التشريفات عشان اليوم اللي يبقى فيه تشريفة ننزل بدري شوية او نأجل المعاد او نشرب سم فيران ونخلص من حياتنا؟ على رأي راقية براهين بالطبع لأ واكيد حضرتك بتقف، لامؤاخذة، زي الكلب والباشا الظابط معطلك والدوق معدي بتشريفته وعادة الدوق بيبقى جاي من مدينة اكتوبر رايح مصر الجديدة او جاي من مصر الجديدة رايح العاشر من رمضان او امبابة او العجوزة المهم انه لازم يجيب اول الكوبري لاخره وانت تقف زي الكلب، مافيش حاجة يا كابتن ما تزعلش كده كلنا كلاب

طب ايدك معايا يا كابتن انت وهو ولو راسك متغطية بكوفيرتة وللا حاجة اكشفها وادعي معايا: الهي وانت جاهي يا اصحاب التشريفات يوقف لكوا المراكب السايرة، الهي لا تكسبوا ولا تربحوا قادر يا كريم، يخصم من رصيدكوا في البنوك ومناصبكوا وصفقاتكوا على قد ما بيتخصم للموظفين بسبب العطلة على الكوبري، الهي كل مشوار تخرجوا فيه وتوقفوا حال الناس يبقى اوله نكد واوسط غم واخر خسارة بالمليارات، الهي يقلق منامكوا زي ما بتضيعوا وقتنا ولا تناموا ليل ولا نهار، قادر يضيع عليكوا صفقات بيع البلد زي ما بتضيعوا عمرنا في الاشارات، الهي الكاربيراتيرات بتاعة العربيات كلها تتخرم وتجيب بنزين وتتزحلقوا من فوق الكوبري، الهي يرزقكوا بمفصلة مدببة على الكوبري تفرقع عجلة العربية ام اتنين مليون قادر يحرق دمكوا بجاز وسخ زي ما بتحرقوا دمنا واحنا ملطوعين، الهي تفرقع في وشكوا ازازة كوكاكولا وغطاها يلبس في عنيكوا زي ما بنفرقع في وش بعض وبنلبس في بعض من الغل اللي مش عارفين نفشه فين، يا رب يا ربنا تطلعوا برة مناصبكوا وتتلطعوا زي الكلاب معانا في تشريفة جربوع تاني يزنقكوا ويسخن العربية ويعصب السواقين
ربنا يبتليكوا بسواق ميكروباص اضبش يدخل في العربية المصفحة ويعجنها لكوا، يا رب امريكا تقلب عليكوا وتعطل لكوا سفرياتكوا، الهي وانتوا راكبين الطيارة ورايحين امريكا تقبضوا المعلوم الطيارة تعطل في نص السكة وتفضلوا متشعلقين في الهوا
ينكد عليكوا بحق كل اسعاف مات فيها مريض، يسود عيشتكوا بحق كل موظف اتحسب له تأخير، يطربقها على دماغكوا بحق كل واحد خطيبته فسخت خطوبتها عشان لطعها، الهي يوقف لكوا كل ماشي في حياتكوا وينيم لكوا كل واقف ولا صيدليات الدنيا ومستشفياتها تنجيكوا
قادر يا كريم
---
سيبكوا بقى من الدعاء لغزة، غزة وللا فلسطين وللا العرب كلهم مش عايزين دعوات دول عايزين رجالة وعندهم مخ وللاسف الصنف ده شاحح من السوق ولما بيبقى فيه مخ اوبشن الرجالة بيبقى عطلان ولما بيبقى فيه رجالة بروجرام المخ بيبقى ما نزلش على الهارد ديسك اصلا والاغلبية لا ده ولا ده ومش حلها الدعا

دلوقت احنا فعلا محتاجين حملة دعاء على اصحاب التشريفات لان فعلا مافيش في ايدنا حاجة نعملها مافيش غير ان ربنا يستجيب دعواتنا على كل صاحب تشريفة انشالله واحد بس قوم يبقى عبرة لمن يعتبر ومن لا يعتبر
انا معوقة بانرات يا ريت حد يتطوع من المتضررين من التشريفات ويعمل لنا بانر للحملة دي

لا حول ولا قوة الا بالله

بعض المدونات العربية وباللغة الانجليزية والالمانية كمان واصحابها مسلمين بيتناقلوا بفرح وفاة احد راسمي الرسوم المسيئة اسمه اريك ابيلد سورنسن عن عمر يناهز 89 سنة
يا عيني يا ربي....كده دخلنا في تقطيع القلب، يعني بصرف النظر عن اني دورت في الوكالات كلها عن الخبر ده ما لقيتهوش...بس الراجل عنده 89 سنة ومات، مات زي ما كلنا ح نموت، ان اجلا او عاجلا، ايه بقى؟ ايه يا عيني كمية الكبت والغلب اللي الناس فيه ده، والله العظيم صعبوا عليا

مقال هام جدا لعبد الوهاب المسيري

اللي لفت نظري للمقال رامز

والمقال منشور على موقع الجزيرة قسم وجهات نظر
قوم انا استكنيصت موت من المقال واخدته خبط لزق وفيه كام فكرة مكن علمت عليهم بالاحمريكا
بس اقروا المقال ح تنباساطوا

الإعلام والإمبريالية النفسية

عبد الوهاب المسيرى الإعلام الأميركي هو أهم آليات الإمبريالية النفسية وأنجح الوسائل في تفريغ الإنسان الأميركي والهيمنة عليه وتصعيد حراراته الجنسية والاستهلاكية. وهو إعلام ذكي إلى أقصى حد فهو لا يكذب قط، وإنما يجتزئ الحقيقة، ويوجد تعبير باللغة الإنجليزية هو "true lies" "أكاذيب حقيقية" بمعنى أنه يمكن تمرير الأكاذيب عن طريقة إخفاء جزء من الحقيقة. " لا نعرف ماذا سيفعل بنا الإعلام في المستقبل القريب، خاصة بعد ظهور قنوات الفيديو كليبات والهيمنة التي تمارسها على وجدان شبابنا وكثير من شيوخنا! " والإعلام، خاصة المرئي، له سطوته وقوته، فهو يصل إلى منازلنا وعقولنا وأحلامنا بشكل مباشر. ويجب أن نتذكر أن الإعلام لم ينتخبه أحد، ولا توجد أي مؤسسات لمساءلته، رغم أن خطورته كاملة وأثره مدمر. والإعلام في بلادنا لم يصل بعد إلى هذا المستوى من "التقدم" مما يخلق مساحة وفضاء خاصين للإنسان العربي يمكنه من خلاله أن يراجع ما يسمع. فهو حينما يسمع تصريحات رئيس دولته، فإنه يراجع الإذاعات الأجنبية أو إحدى الفضائيات العربية ليرى مدى صدق هذا الرئيس ويحكم على أقواله بمحك الواقع، ثمة عقلية نقدية لاتزال فعالة في العالم العربي وتم تقويضها في العالم الغربي من خلال سطوة إعلام متميز. ولكننا لا نعرف ماذا سيفعل بنا الإعلام في المستقبل القريب، خاصة بعد ظهور قنوات الفيديو كليبات والهيمنة التي تمارسها على وجدان شبابنا وكثير من شيوخنا! أجلس أمام التليفزيون في الولايات المتحدة في حالة تقزز من المضمون، لكن في حالة استمتاع بالشكل والتقنية العالية. فصناع الصور (بالإنجليزية: إميج ميكرز image makers) وصناع الأحلام في مختلف وسائل الإعلام قد تملكوا ناصية لغة الصورة وأتقنوها تماما. ومن أهم القطاعات التي تساهم في صنع الصورة قطاع الأفلام الذي يشيع العنف وصورة الإنسان الذي يعيش في اللحظة الآنية، يساعده قطاع الأزياء الذي يُغير "أذواق" الذكور والإناث والأطفال كل عام مرتين. ومن أهم القطاعات الأخرى، ولعلها أهمها قاطبة، قطاع الإعلانات التجارية التي لا يكف التليفزيون الأميركي عن بثها. تقوم الإمبريالية النفسية من خلال الإعلام بترويج صورة الإنسان الاقتصادي الجسماني، وهذا يتضح بجلاء في الإعلانات التليفزيونية. هدف الإعلان التليفزيوني اقتصادي استهلاكي (بيع سلعة ما) ولكنه يوظف الجنس للترويج لهذه السلعة، أي أن الإمبريالية النفسية لا ترى الإنسان إلا من خلال هذين البعدين (الاقتصادي والجنسي). فاحتساء الشاي لا تكتمل متعته إلا من أيد رقيقة!! والإعلانات عن قشرة الشعر أو البشرة تجعلنا نحس أن الجنس البشري كله قد أصيب فجأة بالأمراض الجلدية! ولكن لو شفي المرء منها فإن جاذبيته الجنسية لا يمكن أن تقاوم! ويرتبط بذلك كله انتشار القيم الاستهلاكية مثل أنه لابد للمرء أن يجدد نفسه كل يوم، من خلال نوع معين من الكريمات أو العطور، وأنه بوسعه، رغم تقدمه في السن، أن يحتفظ بحيويته بل وشبابه وجاذبيته الجنسية بطبيعة الحال إن هو استخدم نوعا معينا من الفيتامينات. إنها إعلانات هدفها أن تدفع الإنسان لمزيد من الاستهلاك، وكأن الاستهلاك هو الهدف الأساسي وربما الوحيد من وجود الإنسان في هذا الكون. وعادة ما تتم المزاوجة بين الاقتصادي والجنسي، ولكن هناك إعلانات تحاول أن تدخل للمستهلك من مدخل آخر. فهناك إعلانات تحاول استخدام قيم مثل الترابط العائلي ولكنها توظفها في تصعيد الاستهلاك، كأن يدعوك الإعلان للحديث مع والدتك من خلال شركة كذا للتليفونات، أو تذكرك بشراء هدية لها من المحل الفلاني وبالتقسيط المريح. " الإمبريالية النفسية هيمنت على الإنسان الأميركي وهمشت القضايا السياسية الكبرى في وجدانه وأغرقته في دوامة الاستهلاكية حتى أصبح شعاره "طالما أن الكيل ملآن فلا يهم أي شيء آخر" " وتعطيك العنوان ورقم التليفون وكل البيانات اللازمة للاستهلاك، وتخبرك بكل مزايا السلعة التي ستشتريها، (ولننظر ماذا يحدث للأعياد العلمانية عندنا مثل عيد الحب وعيد الأمهات). المهم هو توظيف القيمة الإنسانية والأخلاقية من أجل الاستهلاك. ومع هذا يظل استخدام الجنس هو النمط الأكثر شيوعا. والهدف من هذا الهجوم الإعلامي هو إشاعة النموذج الاستهلاكي لتطويع الجماهير وتدجينهم وتنميطهم، بحيث يجد الإنسان العادي (وغير العادي) نفسه مستبطنا لفكرة أن السعادة لن تتحقق إلا عن طريق الاستهلاك والمزيد من الاستهلاك، فيتوحد تماما بالسلعة ويصبح إنسانا "متسلعا" ذا بعد واحد غارقا تماما في السلعة والمادة، وفي حالة غيبوبة إنسانية كاملة. وكما يقول الدكتور جلال أمين، إن ضحايا الاستغلال في المجتمعات الرأسمالية المتقدمة ليسوا العمال والفلاحين، وإنما هم المستهلكون من أي طبقة. ولعل هذا يظهر في الاستغلال البشع للطفولة، إذ تتوجه لهم الإعلانات مباشرة، وبذا تتخطى الآباء والأمهات ومنظوماتهم الأخلاقية بل ودخلهم المالي. وقد هيمنت الإمبريالية النفسية على الإنسان الأميركي، وهمّشت القضايا السياسية الكبرى في وجدانه، وأغرقته في دوامة الاستهلاكية، حتى أصبح شعاره "طالما أن الكيل ملآن فلا يهم أي شيء آخر"، أو كما يقولون بالإنجليزية "طالما أن هناك دجاجة على المائدة (as long as there is a chicken on the table) فإن العالم لا يهمه"، فيؤثر السلامة ولا يفكر فيما هو خارج حدود الدجاجة! هذا يعني أن الإنسان الأميركي يستجيب مباشرة للمثيرات التي تأتيه من العالم الخارجي عالم المادة والحواس الخمس، مثيرات تتبعها استجابة فورية. وهذا مع الأسف إحدى صفات الحيوان الأعجم، بينما إحدى خصائص الإنسان أن هناك مسافة بين المثير والاستجابة. إن ما حدث في الولايات المتحدة أنه بعد تفريغ الإنسان من أي حاسة نقدية ومن أي مضمون إنساني مركب، عبئ بالمنظومة الاقتصادية الجسمانية. وفي هذا الإطار تم تقسيم العمل بحيث تخصصت النخبة الحاكمة والحكومة الفيدرالية في مسائل الدفاع ومسائل الأمن والسياسة الخارجية، وتركت للجماهير كل الأمور الأخرى مثل المطافئ والبريد والتعليم والرعاية الصحية ومدى نقاء مياه الشرب وبعض قضايا الأمن الداخلي مثل المرور وظاهرة الاحتباس الحراري، وكل ما يتخذ في هذه المجالات يتم من خلال إجراءات ديمقراطية صارمة. أما القرارات السياسية الكبرى (السياسة الخارجية- ميزانية الدفاع- ميزانية المخابرات) التي تحدد مصير الأمة والتي تلتهم جزءاً كبيراً من الميزانية، فقد تُركت للنخبة الحاكمة (التي تسيطر عليها المصالح الصناعية والعسكرية) تفعل فيها ما تشاء حسب أولوياتها وحسب ما تمليه مصالحها وليس مصالح الشعب الأميركي. وتعكس الصحافة الأميركية هذا التقسيم للعمل، فالأخبار العالمية والتحليلات السياسية تنشر أساسا في جرائد ومجلات النخبة مثل نيويورك تايمز وواشنطن بوست. أما الجرائد الشعبية والمحلية و(tabloids) التي تقرأها الجماهير، فهي تشير إلى "العالم" في نصف عمود، أما بقية الجرائد فهي تنشر الفضائح والأخبار الخاصة بالجماعة المحلية، والجزء الأكبر مخصص للإعلانات والاوكازيونات وكوبونات الخصم. ولذا من النادر أن تقابل أميركيا يعرف آليات صنع القرار السياسي في بلاده أو الهدف من القرارات التي اتخذت في مجال السياسة الخارجية. " ما يحدث في المجتمع الأميركي لم يحدث فجأة ولم يأت من القمر، وإنما كان كامناً في منظومة العلمانية الشاملة ومن ثم يجب ألا نتوقع أي تغير حقيقي في الوجدان السياسي للشعب الأميركي إلا مع حدوث زلزال قوي " وفي غياب أحزاب سياسية لها برامج مختلفة توعي المواطن وتثقفه سياسيا، يقع هذا المواطن الأميركي العادي فريسة سهلة للإعلام ولتقسيم العمل الذي فُرض عليه وجعله غير قادر على فهم سياسة بلده الخارجية وتدخلها العسكري في كل أرجاء المعمورة، خاصة أنه يتم تبرير عمليات الغزو العسكري والتدخل السياسي في شؤون الدول الأخرى من خلال خطاب عالي النبرة ممتزج بلون قومي أميركي فاقع له أبعاد أخلاقية وأحياناً دينية، فيتحدثون عن "القيم الأميركية" مثل الديمقراطية وحقوق الإنسان وحماية الأمن القومي الأميركي. كما أنهم يلجؤون لتخويف المواطن الأميركي، من عدو ما، كان في مرحلة من المراحل هو الشيوعية وأصبح الآن الإرهاب الإسلامي! ورسّخوا في وجدانه أن هذا العدو يكره الديمقراطية ويحقد على الأميركيين بسبب أسلوب حياتهم ومعدلات الاستهلاك العالية التي يتمتعون بها، ولذلك عادة ما تبدأ الاحتجاجات على سياسة أميركا الخارجية في الجامعات بين المثقفين الذين يدركون طبيعة الأكاذيب التي تطلقها النخبة الحاكمة. وتنتقل بعد فترة ليست بالقصيرة إلى الشوارع بين الجماهير العادية. وظاهرة عدم الاهتمام بالسياسة الخارجية وعدم إدراك تضميناتها ظاهرة حديثة وعالمية، ولكنها توجد بشكل أقل في بلد مثل إنجلترا وفرنسا، إلى أن نصل إلى بلد مثل روسيا حيث نجد أن الناس هناك عندهم درجة أعلى من الوعي السياسي. ومع هذا أجري استطلاع للرأي في إنجلترا فظهر أن غالبية من شملهم الاستطلاع يظنون أن الإسرائيليين هم أصحاب الأرض وأن الفلسطينيين يحاولون اغتصابها منهم! بالطبع هناك فروق ولكنها ليست فروقاً جوهرية، لأني أعتقد أن الذي يسيطر على الولايات المتحدة هي الرؤية "الاستهلاكية المادية" حيث ينظر للإنسان باعتباره مجموعة من الاحتياجات المادية أو الجسدية. هذه الرؤية لم تهيمن على الإنسان الأميركي دفعة واحدة. كل ما في الأمر أن حلقات المتتالية العلمانية أخذت في التحقق حلقة تلو الأخرى إلى أن وصلنا إلى الوضع الحالي. خذ على سبيل المثال مسألة الشذوذ الجنسي حينما تركت أميركا عام 1969 كان الشذوذ موجودا، كما هو الحال في كل المجتمعات الإنسانية، لكننا كنا نهمس حين نتحدث عنه. ثم بدأت قضية الشذاذ تتحرك من الهامش إلى أن وصلت إلى المركز. ولكن بعد ذلك مع تصاعد معدلات التوجه نحو اللذة والاستهلاك ومع اتساع رقعة النسبية الأخلاقية، بدلا من المطالبة بالتسامح مع الشذاذ تحولت القضية إلى ضرورة تطبيع الشذوذ أي المساواة الكاملة بين الإنسان العادي والإنسان الشاذ. ثم تطور الأمر وتزايدت المطالبة بأن يكون الزواج المثلي زواجا شرعيا، وأن يحصل أعضاء الزواج المثلي على نفس الحقوق التي يحصل عليها الأزواج العاديون، بما في ذلك حق تبني الأطفال. ولنتخيل طفلا ينشأ في أسرة مكونة من رجلين أو امرأتين، أليس هذا إجهاضا لحقه في أن تكون حياته عادية مثل حياة معظم البشر عبر التاريخ؟ ثم وصل الأمر إلى أن بعض أساقفة الكنيسة الأنجليكانية وبعض الرعاة البروتستانت وحاخامات اليهود من الشذاذ يصرون على الاحتفاظ بمناصبهم أو مواقعهم الدينية، وعلى زيجاتهم المثلية في ذات الوقت. ومن الطريف والغريب أن كثيراً من أتباعهم قد أيدوهم في قرارهم هذا، وهذا هو التطبيع النهائي! ما أود أن أؤكده أن ما يحدث في المجتمع الأميركي لم يحدث فجأة ولم يأت من القمر، وإنما كان كامناً في منظومة العلمانية الشاملة ومن ثم يجب ألا نتوقع أي تغير حقيقي في الوجدان السياسي للشعب الأميركي إلا مع حدوث زلزال قوي. " لعل سيتي ستارز في مدينة نصر التي يحج لها المصريون والعرب وكأنهم يدخلون إلى إحدى المعابد العلمانية، هي قمة انتصار الإمبريالية النفسية علينا، ولذا لم يعد الغرب في حاجة لإرسال جيوشه لاستعمارنا كما كان يفعل في الماضي " والإمبريالية النفسية والسعار الاستهلاكي قد هاجمانا بكل شراسة، فالإعلانات التليفزيونية والفيديو كليبات والأفلام والأوكازيونات واليانصيب والمسابقات، تحاصر الإنسان العربي وتعيد صياغة أحلامه وتصعيد توقعاته. فإن كان ثريا فهو سيحقق كل رغباته فيشتري شاليهاً في الساحل الشمالي والجنوبي والشرقي والغربي، ويشتري عربة آخر موديل، وفيلا في إحدى المدن الجديدة، ويرتدي هو وزوجته ثياب آخر موضة (ولا يتبرع بنصف مليم لأي مستشفى أو جامعة)، أما محدودو الدخل فهم يحلمون، بعضهم يستمر في الحلم، وبعضهم يصاب بالإحباط فيتحول إلى إرهابي. انظر إلى أفراح المصريين في الوقت الحاضر، لم تعد مناسبة للتآلف الاجتماعي، وإنما أصبحت مظاهرة استهلاكية استعراضية. ولتذهب لأي فندق خمس أو سبع نجوم، ستجد أنك تدخل عالما لا علاقة له بالتاريخ أو الجغرافيا، عالما ينسيك هويتك، فيصعد رغبتك في الاستهلاك. بل إن النزعة الاستهلاكية زحفت إلى المآتم أيضاً، إذ إن الإعلانات عن وفاة فلان الثري تأخذ مساحة ضخمة في الجرائد تكلف عشرات الألوف من الجنيهات، كما أن الفيديو دخل في بعض الجنازات، ولا حول ولا قوة إلا بالله! ولعل سيتي ستارز في مدينة نصر، التي يحج لها المصريون والعرب وكأنهم يدخلون إلى إحدى المعابد العلمانية، هي قمة انتصار الإمبريالية النفسية علينا، ولذا لم يعد الغرب في حاجة لإرسال جيوشه لاستعمارنا، كما كان يفعل في الماضي. والله أعلم. ـــــــــــــ كاتب مصري

يا سلاااااااااااااااااااام يا دكتور عبد الوهاب لا فض فوك ولا حرمنا الله من كلامك اللي زي سلاسل الدهب ومخك اللي زي الالماظ

اهو انا بقى يا سادة المقال دهون بيلخص كل اللي انا مؤمنة بيه
يعني حاساه ومؤمنة بيه ومش عارفة اقفشه حاجة كده جوايا ومش عارفة اقولها قوم الدكتور عبد الوهاب المسيري قال كل اللي في نفسي
وانا مؤمنة بكل حرف في المقال ده وابصم عليه بصوابع ايديا ورجليا كمان
يا سلااااام برضه العلام حاجة تانية بدل ما اقعد اتخانق مع مالك ووائل عباس ومينو خطيبي المسيحي عشان اشرح لهم انا قصدي ايه والاقي نفسي مش عارفة اشرح لاني زي ما شوفتوني امبارح باشن واتهته اهو بقى اللي عايز يعرف ايه اللي في بالي ومش عارفة اطلعه يقرا المقال ده
يااااااااا انا مبسوطة قوي...مبسوطة قوي...اول مرة حد يعرف يطلع اللي جوايا
ولقد خلعنا نحن جبهة التهييس الشعبية على هذوها المقال لقب
الدستور التهييسي لدوقية جبهة التهييس الشعبية
ملحوظة كمان
انا برج الميزان زي الدكتور عبد الوهاب المسيري
الللللللللللللللللل
عشان كده هو حاسس بالجوانيات اللي في قلبي بس بالنوسبة لي الظاهر امي اتكعبلت على بطنها وهي حامل فيا