مصائر الناس مش نكتة

تكونش النكتة مش نكتة وتكون بحق وحقيق؟ عارفينها انتوا اكيد بتاعة انا عايز الشعب يحبني قالوا خلاص يا فندم اطلع قرار وانت تلغيه فالشعب يحبك........مش معقول حياتنا اتحولت لنكتة

ومش معقول مصائر الناس تتحول لنكتة...ماهي دي مش طريقة الشعب يحبك بيها يافندم، الشعب ح يحبك لما تجيبله ناس تخاف عليهم وعلى مصالحهم.

بالروح بالدم رزق عيالنا اهم

انت مين انت؟ انت مين قول لي؟ والاعتصام امتى فات عليك قبلي؟

احنا مش حدادين ولا كمان نجارين احنا طبقة موظفين ييييييييييييييي ام برجوازية الموظفين بقى، الموضوع ده واجعهم، الموظفات قاعدين
على الرصيف: يا وزير احمد نظيف تاسع يوم ع الرصيف



الموظفات: بيجيله نوم ازاي والناس في الشارع وبيقولوا هو حد يقدر يلوي دراع الحكومة



يا وزير رد علينا...نسرق وللا نمد ايدينا



فيه بقى صخص فارق من الجنب ومبتسم وسألني سؤال الملكين وواقف مبتسم وبيبص للناس لا بيصور ولا بيغطي
ولا معتصم ولا اي حاجة واقف كده بس وبيسمع وبيسأل الناس ومبتسم يا ترى مين ده؟ عموما هو موجود في اخر الفيديو ده
كان واقف يشب ويسمع


شفتوه؟ عموما أنا استحياطا عشان تملوا عينيكوا منه حاطه له صورة فوق اهي...يمكن يكون قريب حد فيكوا ويتم التعرف عليه
دول جم من الفيوم بعد ما سلموا المفاتيح



الست دي مدير عام وبتقبض كله على بعضه بالحوافز والمكافئات والبدلات 800 جنيه



مدير عام تعيش بتمنميت جنيه؟ تمنميت جنيه دي تديها لاي حد يبرمها ويحطها في...في خرم المفتاح
ده مدير عام برضه بس مرتبه اقل من المديرة اللي قبله


احنا مالناش في السياسة
بقى هم واضح ان جالهم طراطيش كلام انهم متهمين اتهمامات والعياذ بالله سياسية، وكمان فيه واحد زعلان انه بيتقال ان اللي ورا اعتصامات هو كمال ابو عيطة والاخوان!!!!!! يعني هم اساسا فاكرين ان كمال ابو عيطة بيتقال عليه انه اخوان :) عموما اختصارا للقول
الموظفين بيقولوا دي ثورة جيااااااااااااااع



العيال عايزين دواء يا رئيس الوزراء سيبك بقى م الاغنياء


حسبي الله ونعم الوكيل....ترضاها على اختك وللا امك او مراتك تقعد تمن ايام في الشارع وما تسألش عليها
حسبي الله ونعم الوكيل
حسبي الله ونعم الوكيل

وادعوا لي انا كمان ربنا يخلصني من الراجل اللي مضايقني في الشغل

حسبي الله ونعم الوكيل...حسبي الله ونعم الوكيل.....حسبي الله ونعم الوكيل

أنف خفية تنحشر في الضرائب العقارية

ايوووووة

رغم انف مين بقى؟ ايه بقى؟ رغم أنف مييييييييين؟

رغم انف مين يا وزير؟

رغم أنف مييييييييييييين؟

هو فيه ايه؟

مين اللي انفه اتحشرت ما بين الهلال والصليب يا وزيييييييييير؟

موظفو الضرائب العقارية: وكل ضيقة بعدها وسعة

وراجعة بقى مش شايفة قدامي، ليه؟ عشان بعد المجهود العصبي، والعياط طبعا ده اساسي انا باروح اعيط انتوا عارفين، رحت الشغل واكتشفت ان فيه واحد عندنا بيرازيني محبة من غير سبب وقعدت احسبن احسبن احسبن في وشه وهو قاعد ولا كأن الكلام ليه ومن كتر الحسبنة حسيت ان القناة ح تولع.
المهم بقى نرجع للضرائب العقارية، انا صورت تلاتة وعشرين فيديو، ح انزلهم واحدة واحدة ونتكلم عن الاحداث النهاردة اتسلوا في كام واحد على ما اصحى بكرة ونحكي على رواقة

دي أول استفتاح وما اعرفش مين اللي شار عليهم شورة مهببة انهم يناشدوا بابا جمال وماما سوزان

وبعدين كمال ابو عيطة مسك الميكرفون وقال لهم: عيب عليك اما تبقى شحط وتقول يا ماما سوزان، انت بتطلب حق مش بتشحت

واتكلم كمان احد القيادات العمالية اللي قال كلام مهم قوي

ودي بقية كلمة الراجل الجميل...بعد كده راجل محموق قوي وصعب عليه جدا ان وزير المالية قال مش ح نساوي بين الحدادين والنجارين!!!!!!!!! الا صحيح يا معالي الوزير...ايه الكلام البيئة ده؟ ايه حدادين ونجارين حسستني اني دخلت منشية ناصر، عموما احد الموظفين قعد يهتف ويقول: لما احنا نجارين وحدادين تبقى انت ايه يا وزير تبقى انت ايه يا وزير تبقى انت ايه يا وزير

صحيح تبقى انت ايه يا وزير؟

ودي بعض من اهاتهم واناتهم وبيشرحوا فيها وجهة نظرهم

تصدقوا بالله ان الوزير بعد الاعتصام ده زود فلوس بتوع الضرايب العامة كأنه بيغيظ بتوع الضرايب العقارية او كأنه عايز بتوع الضرايب العامة يطفحوا كل قرش بياخدوه

تبقى انت ايه يا وزير؟

عاجبكوا حالهنا كده

تبقى انت ايه يا وزير

فيه موظف في الدنيا ياخد مكافئة اربعين قرش؟

تبقى انت ايه يا وزير؟

فيه موظف في الدنيا كل سنة يتحال على النيابة الادارية؟

تبقى انت ايه يا وزير؟

مش بنلوي دراعك ده حقنا

لما الموظف يشحت حقه

تبقى انت ايه يا وزير؟

بيقولوا عليهم شيوعيين!!!

آه طبعا مش بيطالبوا بحقهم

يبقوا شعوعيين يا خويا وماله هم يعني كانوا جوز خالتي

بس هم شيوعيين

وانت ايه يا وزير؟

ودولم الشعوعيين وهم بيصلوا

وما اعرفش مين ابن حرام اللي فكر في انه يعمل فتنة طائفية بين الموظفين راحوا الموظفين قالوا له العب غيرها يا شاطر ح ابقى اوريكوا الحاجات اللي الموظفين المسيحيين علقوها تهنئة بالعيد للمسلمين

ماهم شعوعيين بقى والعياذ بالله

ودول الشعوعيين وهم بيدعوا ع الظالم والمفتري ومقضيين العيد مكانهم

عشان شعوعيين لو بيعرفوا ربنا كانوا قضوا العيد في كازينو الشجرة

الا انت ح تقضي العيد فين يا وزير؟
لسة فيه فيديوهات تاني وتغطية عدلة بقى بدل ما انا باكتب وانا نص نايمة كده

يوسف بطرس غالي: أنتم عبيد إحساناتنا

في حرم مجلس الشورى، وفي اجتماع لوزارة المالية، القائمة على أموالنا وضرائبنا، صرح الدكتور يوسف بطرس غالي أمام الجميع معلقا على إضرابات موظفي الضرائب قائلا: "...فيه غيرهم أجورهم أقل فضلا عن 2 مليون عاطل.."، مضيفا: "..ولو قالوا لي إما أن تحل المشكلة وإما أن نظل في الشارع سأقول لهم ابقوا في الشارع.." معللا ذلك بأن: "...ماحدش يلوي دراعي..."! نعم يا معالي الوزير؟ أفندم؟ أسمعني مرة أخرى ماذا تقول؟ يا سيد وزير المالية، لا أحد هنا "يلوي" ذراعك لأن ذلك خارج السياق ،يا معالي الوزير، سيادتك تعمل عندنا، مرتبك، الذي هو بالقطع أكبر بكثير من رواتب موظفي الضرائب العقارية، نصرفه من ضرائبنا، وضرائب الموظفين الذين تقول لهم "خليكوا في الشارع"، بل إننا نحن من علمناك وجعلنا منك الدكتور يوسف بطرس غالي، ثم الوزير بطرس غالي، نحن الذين ننفق على بزتك الأنيقة وتشريفتك العظيمة، ومكتبك الوجيه، نحن الذين ننفق على الذي هو فوقك، والذي هو فوق الذي هو فوقك، إنكم جميعا يا سعادة الوزير تعملون عندنا، بأموالنا، بـ"شقانا" الذي تتحدث عنه، وليس هناك مجال للسيد أن يلوي ذراع من في خدمته، وأنتم من المفترض أنكم خدام الشعب لأن الشعب ينفق عليكم من ماله.
والأغرب يا سعادة الوزير أنك تعايرنا نحن بفشلك أنت حين تحدثنا عن موظفين مرتباتهم أقل من رواتب موظفي الضرائب العقارية، والتي بلغت 200 جنيه مصري فقط لا غير. ماذا تقول لنا؟ تقول: هناك موظفون مرتباتهم تصل إلى مائة جنيه مصري؟ نعم نحن نعلم، ونحمد الله أنك تعلم، ونتمتم "سبحان الله" مندهشين من أنك تعلم، ولا تخجل، ولا تعتذر للشعب الذي يدفع لك مالا لتحسن التصرف فيه، نحن يا معالي الوزير نعلم أن موظفين الضرائب العقارية "شقيانين" و"غلابة" كما قلت سيادتك، ونعلم أن هناك من هم "أغلب" منهم، ونطالب سيادتك، دون أي لي لأي ذراع، أن تقدم بيانا بأموالنا التي ندفعها، وبمصارفها، وبأسباب فقرنا بهذا الشكل. ومع تمنياتنا لسعادة ذراع سعادتك بالصحة والعضلات، نطالب باستجوابك عن أسباب قلة الأجور، وعن أسباب وجود 2 مليون عاطل باعترافك، وعن هذه اللهجة غير اللائقة التي تتحدث بها لأولياء نعمتك: الشعب المصري.
نحن نطالب باستجوابك لأنك تقول لنا بمنتهى الجرأة، أنت ورئيس وزارتك، أنكم عجزتم عن مواجهة التضخم، وأنكم لا تستطيعون مواجهة غلاء الأسعار والتحكم فيه، كما نشرت صحيفة الوفد على لسان الدكتور أحمد نظيف في نفس العدد الذي كنت ترفض فيه أن نلوي ذراعك وهو العدد الصادر يوم 10 – 12 – 2007. السيد وزير المالية، والسيد رئيس الوزراء، وجميع السادة المعالية من الوزراء، وليسمعني السيد رئيس الجمهورية، لقد صحوت من نومي يوم 10 – 12 – 2007 على عناوين الصحف وهي تحمل تصريحات أصابتني بالدوار من فرط الغيظ، لما فيها من جرأة وتطاول علينا نحن الذين، مرة أخرى أذكركم، ندفع لكم مرتباتكم وثمن كل "خيط في إبرة" تمتلكونه أو تمتلكه زوجاتكم، أو أبناؤكم، أو أحفادكم، نحن ندفع من دخولنا ما يعادل ما بين 20 إلى 40 في المائة ضرائبا لكم، لكي تقوموا بمهمتكم، لا للتتطاولوا علينا، وتعلنون عن فشلكم في القيام بوظيفتكم و"أينما نضع رؤوسنا نضع أرجلنا". مصر ليست الوسية ولا الأبعدية ولا العزبة، ونحن لسنا عبيد أحساناتكم بل نحن أولياء نعمتكم وسلطتكم وتشريفاتكم التي ترفلون فيها وتتركوننا للشقاء! هل عدنا للزمن الذي نحتاج أن نذكركم فيه بهذا الكلام؟

بانر لن نتنازل لن نصالح من تصميم مادو

وربنا ما اعرف اسمه ايه بس في هو واحد اول ما طلبت بانر للحملة صممه في نفس اليوم وبعتهولي يعني من الاخر واد مجدع

اشكرك يا مادو

وارجو من كل الاخوة المدونين تعميم البانر وشكرا

دراسة انجليزية: قتلى العراق تخطوا المليون

والله كنت سمعت في الجزيرة من حوالي سبع شهور انهم اربعة مليون ولما قلت كده لجمال عيد قال لي لا لا لا يا انتي سمعتي غلط يا الجزيرة بتخرف
اهو مدون امريكاني اسمه الجرينجو رومبيرو جايب دراسة بريطانية بتقول ان المدنيين في العراق اللي ماتوا تخطوا المليون نفر
هم يقولوا مليون نفر والجزيرة بتقول اربعة يعني المتوسط اتنين مليون ونص
اه اصل برضه ارتضح ان العنجليز والاموركان بيكدبوا زينا بالظبط واكتر والله وطلعنا احنا بنقول الحقيقة في حاجات كتيرة ويطلعوا هم اللي كدابين..والله الواحد بينباسط من الحاجات دي...بيحس بفخر كده خصوصا لما جوردن براون قال ان انجلترا لازم تستفيد من التجربة المصرية في القضاء على الارهاب....بذمتك مش حاسس انك عايز تقولها باعلى صوت وترفع راسك لفوق: انا مصري وابويا مصري وقانون الطوارئ مصري وكل فقري الله عليه وكل فقري الله عليه
خدوا اهو البوست بتاع الجرينجو.
وهو حاطط لنك الدراسة الانجليزية اللي بتقول المعلومات دي
http://elgringorumbero.blogspot.com/2007/12/stop-genocide-in-iraq.html
ملحوظة: انا مش حاطة اللنك ده يا حلو الملامح انت وهو عشان نمصمص شفايفنا وخلاص
شوفوا بقى ح نتنيل نعمل ايه؟

مبروك لعلاء الأسواني

علاء الأسواني فاز بجائزة برونو كرايسكي لحقوق الإنسان عن رواية عمارة يعقوبيان وأنا مبسوطة قوي

هو يستاهلها لأنه الرواية بتتكلم عن - طبعا اهم حاجة في حياتي دلوقت :) - التعذيب في السجون، وعن الانتهاك الجنسي للأطفال وعن الفروق الطبقية القاسية والفقر المهين اللي بيهين صاحبه ويؤدي به اما للفساد او لتدمير نفسه وغيره، وعن انتهاك حقوق المرأة واستغلالها جنسيا. وكلها حاجات حقيقية وموجودة عندنا وهو عرضها من وجهة نظر مصرية ومن غير ما يبص على جوائز عالمية.

مبروك يا دكتور علاء.

الخبر اهو

http://www.almasry-alyoum.com/article.aspx?ArticleID=85742

تاج الجزيرة..السلطانية

أنا مش باحب احل التاجات دي بس مهندس مصري هو اللي بعتهولي وانا ماقدرش ارفض له طلب

لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟

والله ماحدش بيعرف يحكم على الامور غير اللي جواها، يعني انا كل ما اشوف عربي الاقيه يقول لي: وين مصر؟ طبعا بيقولها بعتب ولولا الاحراج كنت قلت له يا عم مصر لما الدنيا بتمطر بتتحول الى منطقة كوارث، بس احنا بقى اللي عشمنا الناس بكلام الريادة والقيادة والاخت الكبرى والكلام ده...عشان كده لو كنت عربية مش مصرية وشفت مصر من برة كنت ح افتكرها ندلة! بس الحقيقة هي مش ندلة هي غلبانة بس

لوكنت أوروبي أو غير مسلم هتبقي إيه نظرتك للعرب والمسلمين؟

اممممممممم الاسئلة دي صعب الاجابة عليها بموضوعية لاني ما اقدرش احكم لو كنت اوروبية وانا باحمل ثقافة ومنهج تفكير عربي...يعني انا عشان احكم على حد لازم احط نفسي مكانه واحاول اتبنى زاويته، بس ده عشان انا متربية في ثقافة عربية، يعني مثلا احنا كعرب مش بنشوف اللي بيعيش مع واحدة من غير جواز وهو اوروبي انه لا اخلاقي لاننا عارفين ان ده في سياق مجتمعه مقبول، لكن الثقافة الغربية مختلفة، وبرضه الواحد لما بيبقى ضعيف بيبقى اعدل من القوي، يعني لو انا اوروبية ودولتي بتتحكم في العالم وللا حتى نص العالم وانا قوة اقتصادية وسياسية ايه اللي يخليني اتبنى وجهة نظر الاضعف مني وانا مش مجبرة على ده؟ متهيالي لو كنت اوروبية ومتربية في ظل الثقافة الاوروبية ومتعلمة تعليم اوروبي اظن كنت ح افكر زيهم: الناس عشان تبقى متحضرة لازم تقلدنا.

لو قالوا لك إنت بقيت رئيس جمهورية هتعمل إيه؟

ح اعتذر عن المنصب

لوسمح لك برؤية الرسول عليه الصلاة والسلام وإنك تقوله كلمة واحدة ؟

ح اقول له: خدني معاك

لو كنا في عصر ازدهار الأندلس كنت تتخيل نفسك إزاي؟

كنت احب ابقى شاعرة في صالون ادبي او كميائية من الستات الاندلسيات الكيميائيات اللي كانوا بيبقوا ناكشين شعرهم وبيخترعوا ادوية والاوروبيين حرقوها مع الكتب العلمية والعلماء والطبيبات والكميائيات...الله يخرب بيت ابوهم، دلوقت جايين يقولوا لو كنا احتفظنا بالعقاقير والكتب اللي كانت في الاندلس كنا وفرنا على نفسنا اربع قرون من البحث في الطب والصيدلة

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟

لا ماهو انا مش ناوية اتخطب
:))

لو طلعت القمر هتكتب عليه ايه؟

يااااااااااا مش ح يخطر على بالي خالص اني اكتب على القمر، بس لو حد طلب مني او فكرني ممكن زي مهندس مصري ما عمل اكتب يافطة عليها: لا اله الا الله محمد رسول الله

لو مررت التاج لحد و ما جاوبش هتعمل ايه؟

ح اقول معاه حق ماهو موضوع التاج ده بايخ قوي

تمرر التاج لمين ؟

لا بقى حرام....ما انا قلت في الاول لو التاج ده اتمرر لي من حد تاني غير مهندس مصري كنت قلت له اياك تعمل كده تاني وكنت ما جاوبتش
اللي ما ارضاهوش على نفسي ما ارضاهوش على غيري
:))

لن نتنازل لن نصالح

المفروض اننا نبتدي حملة لن نتنازل لن نصالح في مصريين ضد التعذيب، معلش انا اتأخرت شوية، عبد المنعم محمود ابتداها

يا شباب احنا عايزين بانر للحملة

قعدت ادور ادور ادور، تبتدي الحملة منين يا بنش يا نوسة تبتدي الحملة منين يا بتش يا نوسة

ما لقتش احسن من "وراء الشمس" بتاع هويدا بنت ابويا الشيخ طه، لسبب، ان هويدا طه في الفيلم ده فتحت ملفات لسة ما اتقفلتش وفيه منها اتقفل بشكل مأساوي زي قضية اسكندرية اللي اصحابها اتسجنوا بتهمة التهرب من السلطات واجبروا على التنازل عن القضية وفيه قضية البنت اللي هي الانسة س ما نعرفش حصل فيها ايه؟

اليكم الجزء الأول:

http://www.youtube.com/watch?v=b3uW1LyZUPc

http://www.youtube.com/watch?v=Wa0MlAwL600&feature=related


http://www.youtube.com/watch?v=6qRRhqT2gnI&feature=related


http://www.youtube.com/watch?v=z-0ZMU48rGU&feature=related


http://www.youtube.com/watch?v=5HTD6YIM-as&feature=related
تاني يا شباب اللي بيعرف يعمل بانر لازم يعمل بانر لحملة لن نتنازل لن نصالح
تشكرات افنظم

====

آه نسيت، مهندس مصري عامل حوار حلو قوي مع ظابط الشرطة السابق محمود قطري

ده ظابط شرطة صحيح بس حاجة يا يا يا شوفوه بنفسكو

هنا

آه ملحوظة: الحوار ده مهم جدا لانه بيجيب المرض من الجدر اللي هو ظابط الشرطة نفسه

وايه اللي بيخليه يتوحش كده العميد محمود قطري كتب كتاب اسمه اعترافات ضابط شرطة في مملكة الذئاب

والحقيقة ان كلامه مهم جدا لعلاج المرض من الجذور

انا باكره الديمقراطية قوي

عشان نصباية وانا مش باحب اللي بينصب عليا...كل واحد يقول بقين ويوعد وعود والناس يا عيني بهبلها تنتخبه وبعدين يطلع تلاتين اللي جابوهم، طيب الديمقراطية جابت جورج بوش اللي خرب الاقتصاد الامريكاني وبيراقب تليفونات الامريكان، يعني واحد يبقى بيخون مراته مثلا، مراته ما تبقاش عارفة والسي اي ايه هي اللي تبقى عارفة؟ ده احساس فظيع، والديمقراطية جابت ساركوزي، والديمقراطية جابت توني بلير مرتين اللي في اخر فترته الناس قالت له إإإإإإإإإيييههههههههه غور بقى مش قادرييييييين. وكتير كتير، طيب الديمقراطية فشلت عندنا في الجزائر وفلسطين عشان فيه مؤامرة علينا، طيب مين اللي بيتآمر على اوروبا والدول المتغدمة؟ ماهم علمونا كده من واحنا صغيرين ان الخواجات بس هم اللي بيتآمروا ماحدش بيتآمر غيرهم، وبيتآمروا علينا احنا بالذات، يبقى ليه فشلوا بقى؟ مش معقول يتآمروا على نفسهم، ثم ان الديمقراطية حاجة والحرية حاجة تانية خالص، ايران مثلا فيها ديمقراطية زي ما الكتاب بيقول: الانتخابات حرة فعلا ونزيهة وكل المواطنين بيشاركوا فيها بصرف النظر عن دينهم ونوعهم وعليها اقبال كبير والرئيس بيجي بانتخاب حر والبرلمان، حتى المرشد العام بيجي بانتخاب الناس للجنة علمية دينية واللجنة دي بتنتخب لجنة تانية واللجنة التانية بنتخب بالتصويت المرشد الروحي، يعني حتى المؤسسة الدينية فيها انتخاب ديمقراطي، بس مافيش حرية، ممنوع الدش والنت تلات اربعه محجوب يادوبك يعني بيفتحوا يشوفوا الميل.
مش عارفة بقى...انا ح اقول انا عايزة ايه
انا عايزة بلد يبقى فيها قانون، قانون حلو يعني كويس، يبقى واضح ومحدد ويساوي بين كل الناس الامير والغفير الست والراجل المسلم والمسيحي و"ديانات أخرى" واللي ماعندوش دين كمان، ويبقى زي المسألة الهندسية كده، قانون ويطبق على المسألة مافيش حاجة متسابة لضمير القاضي ووجدان المحكمة ومزاج الحاجب وكده يعني، ويبقى قانون عادل وانساني، وفي نفس الوقت ما ينتهكش التنوع والخصوصية، يعني مش مثلا عشان الست زي الراجل يبقى الست تتفعص في المواصلات زي الراجل ولا عشان المسلم زي المسيحي قوم الاتنين مثلا يتجوزوا في الشهر العقاري وممنوع يصلوا بقى عشان ما يحصلش حزازات بينهم مثلا، أو واحد لا ديني يتجبر انه يتجوز في الجامع وللا الكنيسة، اللي في الجامع في الجامع واللي في الكنيسة في الكنيسة واللي مدني مدني وكلهم مواطنين زي بعض، ولا عشان الامير زي الغفير يبقى مثلا الغفير يطلب منه انه يدفع غرامة خمسة مليون جنيه!!!!! يعني يبقى عادل ورحيم في نفس الوقت، والرحمة تبقى بالاضعف عادة.
ويبقى فيه حرية رأي وتعبير وإبداع غير مقيدة وطول ما الكلام كلام يفضل يتعامل على انه كلام وبس.
ويبقى فيه مساواة بين الناس وتنوع كمان.
ويبقى كل الناس تشتغل الشغلانة اللي تناسب كل واحد فيهم من غير ما يبقى فيه مهنة حقيرة ومهنة محترمة، المحترم هو اللي يعمل شغله وبس، ويبقى الاجر على قد الجهد، وكل واحد يبقى عارف اللي عليه واللي له، واللي يعمل اللي عليه، ياخد كل اللي له، واللي ما يعملش اللي عليه ما يخدش اللي لغيره، وفي نفس الوقت يبقى فيه نظام يرحم المعوقين واللي قدراتهم قليلة والمسنين واللي ما يقدروش يعملوا فلوس من الشغل لانهم ما يقدروش يشتغلوا.
ويبقى فيه خطة تنمية شاملة ونزيهة وتستغل كل امكانياتنا لصالحنا، وتستغل الثروة البشرية كويس، وتستغل المعوقين بطريقة منتجة ومثمرة، وكل واحد على قد مجهوده.
ويبقى فيه نهضة في البحث العلمي، وفي النظام الاقتصادي، ويبقى عندنا اكتفاء اقتصادي وزراعي وصناعي، او شبه اكتفاء يعني، بحيث ان ما حدش يضغط علينا من برة عشان احنا محوجين له.
ويبقى فيه نظام صارم ضد الفساد، مش بس بالثواب والعقاب الوظيفي العادل، بس كمان بالقانون، ويبقى بيشدد العقوبة على ابناء المسئولين عشان صغار الفاسدين يخافوا ويقولوا اذا كان ابن الريس اتحبس امال انا ح يعملوا فيا ايه؟ انا اقصد الريس متقال
ويبقى فيه نظام عسكري قوي ما يعتديش على حد ويبقى عندنا قوة ردع تخوف اي حد انه يعتدي علينا.
ويبقى كل الناس عندها بيت نضيف وآدمي وبتاكل كل يوم وتشرب مية نضيفة على طول على طول وتعلم ولادها تعليم كويس وتتعالج بمستوى مرتفع، وكلهم عندهم شغل حلو يبقوا مبسوطين منه وبينتجوا.
ويبقى كل التعليم محترم، مش بس التعليم العالي، كمان التعليم الصناعي يبقى حاجة محترمة، ويستغل استغلال صح في تنمية البلد.
وايه تاني يا بتش يا نوسة وايه تاني يا بتش يا نوسة
آه وتبقى كل حاجة واضحة قدام الناس ويبقوا عارفين راسهم من رجليهم، يعني عارفين بيدفعوا ضرايب كام وبتروح فين ولمين وليه وازاي بتستخدم ويبقى فيه مشروع تنمية على كل الاصعدة في الزراعة والصناعة والعلوم والاعلام ويبقى تفاصيل المشروع كله باين للناس وعارفين تفاصيله وعارفين هم ح يشاركوا فيه ازاي. ويبقوا لما يعملوا حاجة عارفين بيعملوها ليه، ليه بيعملوا خدمة عامة وايه فايدتها؟ ليه بيروحوا يتجندوا وح يتعلموا ايه هناك؟
ولما الاشارة تبقى حمرا الناس تقف ولما تبقى خضرا الناس تمشي
وماحدش يبقى له سلطة على حد والمجتمع كله له سلطة المحاسبة على كل الناس.
ويبقى القضاء مستقل - بس يبقى معاه القانون اللي مافيهوش وجدان وناريمان ده والنبي - ويبقى من حق سواق الميكروباص اللي بيدفع ضرايب انه لما يروح مؤسسة حكومية والخدمة ما تعجبهوش يشتكي ويقول: انا بادفع ضرايب فين الخدمة اللي بالفلوس اللي بادفعها؟
ويبقى فيه مؤسسات مجتمع مدني مدعومة برضه من الضرايب...بدل التمويل والذل للي يسوا واللي ما يسواش
والله الضرايب تغطي ده كله احنا بندفع ضرايب تصرف على العالم كله ده مافيش حد بيدفع الضرايب دي كلها اللي احنا بندفعها
وايه تاني يا بتش يا نوسة وايه تاني يا بتش يا نوسة وايه تانيييي
آه
واموت شهيدة وادخل الجنة
اديني قلت بقى كل اللي نفسي فيه
شوفوا بقى ح تعملوها ازاي بس ما حدش يقول لي الديمقراطية دي تاني طلعت وحشة دي مش حلوة
ما اعرفش ايه البديل يعني ممكن يبقى حاجة تانية غير اللي موجودة دي
ممكن مثلا يبقى فيه لجنة رقابية على البرامج الانتخابية يعني في حال ما نجح الحزب الفلاني او الرئيس الفلاني يبقى فيه لجنة بتراقب تنفيذ الحزب او الرئيس للبرنامج، واذا اخل بالبورنامج يتشعلق من حواجبه عشان كداب
اه
نفسي يبقى فيه تشريع للكدابين
اللي يكدب يعملوا فيه حاجات كتير وحشة يتحبس ويتجرس ويقعد كده منبوذ في المجتمع ويتبهدل كده
عشان كداب، اللي يشهد شهادة زور يتشقلط واللي يحلف يمين قدام المحكمة ويقول مش مذنب ويطلع بالدليل انه مذنب يطلع تلاتين اللي جابوه واللي ما يكدبش يتكافئ ما اعرفش ازاي، ياخد علاوة، اعفاء من العقوبة او تخفيف للعقوبة دي اكتر حاجة عاجباني في القانون الامريكاني ان اللي بيعترف بالجريمة بيتخفف العقوبة عليه واللي بيكدب في الشهادة بياخد حكم زيادة عن الحكم المفروض ياخده في الجريمة
والله يمكن ربنا بينصرهم عشان كده
اصل الكدب وشهادة الزور والحلفان بالكدب دول حاجة وسخة جدا يعني قذرة قذرة الحقيقة
والغش برضه لازم تبقى عقوبته وحشة جدا
ويبقى فيه قانون لحماية المرأة والطفل والأقليات وتنوعاتهم
في الحالة دي بقى ناس كتير ح تهاجر لمصر...اقصد لو عرفتوا تعملوا لي اللي انا عايزاه، يبقى لازم نعمل وزارة مخصوص لاستقبال المهاجرين وتسكينهم في الشغل اللي المفروض يشتغلوه والخدمات اللي ممكن يقدموها والحقوق اللي ياخدوها
آه وتبقى عقوبة الفساد برضه شنيرة، بس على شرط، يبقى الناس كلها واصلة لحد الكفاية بحيث مايبقاش فيه حد محتاج يسرق او يرتشي عشان ياكل او يدفع فاتورة النور او لبس المدارس
ها ح تعملوا ايه بقى عشان تعملوا لي اللي انا عايزاه؟

مؤتمر صحفي بمركز هشام مبارك الإثنين القادم

المؤتمر عن التعذيب يعني طبعا امال ح يكون ايه؟ ح يشارك فيه مركز النديم وح يبقى ان شاء الله الساعة اتناشر الضهر هو العنوان في واحد شارع التوفيقية الدور الـ.....كتير خصوصا لما يعطلوا الاسانسير مخصوص عشان يغلسوا على زوار هشام مبارك، والله قلت لهم تلاقي السكان بيدعوا عليكوا عشان انتوا السبب في تعطيل الاسانسير.

اقروا بقى الخبر ده

http://almasry-alyoum.com/article.aspx?ArticleID=85554

قريتوه؟ جميل جميل جميل...ومنطقي وعقلاني ومقنع وممتاز ممتاز الحقيقة

انا قلبي انشرح لما قريتوا...يا ترى قلبكوا انشرح زيي؟

طيب انشرحوا كمان واقروا الخبر ده

http://almasry-alyoum.com/article.aspx?ArticleID=85552

جميل جميل جميل....يا سلاااااااااااام انا سعيدة قوي بالتطورات دي كلها وحاسة كده...حاسة كده بحاجة مش عارفة اوصفها...سعيدة سعيدة سعدية ابو السعود قلبي انشرح وحاسة يا اخي ان هم انزاح من على قلبي

فعلا اخبار تدعو الى التفاؤل

بلدنا بتتسنجف بينا

عاجل: قضية مصري ظلم في السعودية

يا شباب الراجل ده دخل لي على المدونة وقال لي لو سمحتي زوري مدونتي

دخلت لقيت حاجة تغم وتقطع القلب

مصري راح يشتغل في السعودية اتنصب عليه من الكفيل ولما جه يطالب بحقه طلع عين اللي جابوه وتم التدخل في قرار القضاء من جهات عليا...عليا جدا...عليا خالص....عليا لاقصى درجة

ارجو منكم زيارة مدونته ونشوف نقدر نعمل له ايه

http://gamal51.blogspot.com/

بجد يعني الراجل فايض بيه على الاخر

تعليق بخصوص صحيفة البديل

الحقيقة انا مش باتحيز لاشخاص ولا حتى ابويا انا واحدة قليلة الادب اصلا ولساني طويل، بس بجد جرنال البديل بقى حلو قوي، ودي حاجة كويسة لان ده معناه ان اللي بيشتغلوا فيه بيسمعوا النقد وبيحاولوا يطوروا نفسهم، الجرنال اول ما طلع كنت مسمياه صحيفة البليد: مقبرة الصحافة المصرية، كنت كل ما افتحه احسن ان حد زقني في الستينات وقفل الباب عليا وجري، وتلات اربع الكلام ما كنتش بافهمه، حاجة كده عاملة زي: الماضوية في السديم اللا متناهي مع الحداثة البرجماتية، وكمان التوضيب كان سيريالي وشبه لوحة متاهة الانسان الانوي في عصر الآلة. بس دلوقت اتغير خالص، التوضيب بقى حلو ومريح للعين، والمواضيع والاسلوب والمقالات وكل حاجة فيه تطورت جدا، والموقع الالكتروني كمان بقى حلو قوي، بس اللون المصفر ده مش فاهماله يعني مش اصفر ومش برتقاني، لو يعملوه لبني مثلا يبقى احسن ولو يوسعوا شوية كمان ح يبقى مريح اكتر للعين، بس الحقيقة تاني الجرنال حاجة تانية خالص غير اول ما طلع، قفز قفزة جامدة جدا. انا بانبسط لما احس ان حد بيحب يطور نفسه وعايز يبقى احسن، خصوصا في الصحافة، عشان كده لقيتها تحية واجبة، لاني بصراحة اول ما طلعوا سلختهم وخليت اللي ما يشتري يتفرج عليهم :) بس معلش بقى هو انا كده، ولما بالاقي حاجة حلوة باقول برضه.

اليوم هو اصدار الحكم على سمينة مالك

ده مدون امريكاني عامل اقتراح اسمه
terrorize your lyrics
http://clatterymachinery.wordpress.com/2007/12/06/today-is-world-samina-malik-day-terrorize-your-lyrics/

هو ومجموعة مدونين انجليز وامريكان قرروا انهم ينشروا صور ارهابية ويحملوا دليل القاعدة ويكتبوا كلام ارهابي كنوع من انواع التضامن مع سمينة
وانا معاهم ان شاء الله ودي الصور اللي هم ناشرينها وده لنك دليل القاعدة
ملحوظة: انجلترا وامريكا هم اللي منزلينه على النت
http://www.disastercenter.com/terror/
بس صحيح انا ح اضيف على رأي عادل امام
ح انزل كمان صور الارهاب الامريكي والانجليزي في سجن ابو غريب
ونشوف ارهاب مين اللي يغلب
الحكم متروك ليكوا

اللي فوق صور صور حضارة اسيادنا
واللي تحت صور ارهابنا القذر

=====

ملحوظة: المفروض الحكم عليها النهاردة

بادور في النت وفاتحة بي بي سي ورلد ومافيش خبر عن الحكم

!!!!!!!!!!!!!!!!!

قلت يمكن اكون غلطت...بس الواد الامريكاني عامل النهاردة يوم سمينة عشان النطق عليها

النهاردة المفروض

======

تحديث:

سمينة اتحكم عليها بالسجن مع ايقاف التنفيذ واداء الخدمة العامة لمدة

تمنتاشر شهر وح تفضل تحت المراقبة

ياللا خليهم يضيعوا وقتهم ويراقبوا عيلة ماهي ناس فاضية ومش عارفة تودي فلوسها فين

بس يا ريت يسكتوا عنا بقى شوية

http://news.bbc.co.uk/2/hi/uk_news/7130495.stm

عرض حالة

كان ياما كان يا سادة يا كرام ولا يحلو الكلام إلا بذكر النبي عليه الصلاة والسلام، كان هناك ملك على بلاد تعاني من البطالة، فأصدر الملك مرسوما أن على كل شاب يرغب في العمل الحضور إلى القصر ومعه والده، وما لبث أن صدر المرسوم حتى اكتظ القصر بالشباب، كل يصطحب والده، فخرج عليهم الملك ثم أعلن: إن الوظائف التي أعرضها عليكم هي وظائف عظيمة في الدولة، وأجرها كبير، وصيتها واسع، لكنها مقرونة بشرط بسيط، ألا وهو أن من أراد شغل الوظيفة والحصول على الأجر العظيم عليه أن يقتل أبيه، فمن قدر على ذلك ربح الوظيفة والمال وعليه أن يقف إلى يساري، ومن أبى، فسيحفظ حياة أبيه لكنه لن يخرج حيا من هذا القصر، وعلى أولئك الذين اختاروا الموت أن يقفوا إلى يميني. اصطف الراغبين في الوظيفة والرافضين لها كما أمر الملك، فقال الملك: يا وزير، قد عفونا عن كل الآباء وعن الرافضين للوظيفة، أما من أبدى استعداده لقتل والده ليحصل على الوظيفة، فاستعمله في الشرطة، وأما من حبذ الموت ليحفظ حياة أبيه فجنده في الجيش. قال الوزير: يا مولاي، قد وعدت من تعهد بقتل أبيه بمال وفير! قال الملك: يا وزير أما هؤلاء فأغدق عليهم بأكثر مما وعدتهم ولكن أغلظ عليهم في القول وعاملهم بالشدة، ومن استعملناهم في الجيش، فاصرف لهم لقمة تسد جوعهم وخرقة تستر عوراتهم ولكن عاملهم بفخامة وكرامة، لأنهم طلاب عزة أو موت.
هذه القصة من الموروث الشعبي المصري، ربما يعرفها معظم المصريين خاصة المنتمين للقرى والنجوع، ولم أعد رواية تلك القصة التي طالما سمعها المصريون من الجدات والأمهات إلا تعقيبا على ما في جزيرة القرصاية. إنه في يوم 27/11/2007، توجهت قوة من الجيش المصري قوامها 250 مقاتل مصري إلى جزيرة القرصاية، مستعرضة القوة وشاهرة العداء في وجوه الفلاحين العزل الذين أصابتهم الصدمة، ليس لأنهم يطردون من أرضهم وأرض أجدادهم وأجداد أجدادهم ليشيد على مزارعهم منتجعا سياحيا، وليس لأن نيلهم السعيد يردم أمام أنظارهم وهم لا يملكون له عروسا لتفتديه من الفناء، لكن أهل القرصاية فزعوا وصرخوا وحفروا قبورهم بأيديهم وناموا فيها لأنهم وجدوا أنفسهم في مواجهة جيشهم الذي طالما ارتكن عليه المصريون ووثقوا به، وليس أدل على حب المصريين لجيشهم من هذه القصة التي أعدت روايتها.
إن الزج بجيشنا "المقدس" في معركة مع أهليهم من الفلاحين لصالح رأس المال، الذي لا يرقب في مواطن إلا ولا ذمة، لكارثة عظيمة، وأقسم بعزة الله الذي هو "بتاع الغلابة" كما يقول المثل الشعبي، إنها لواقعة جلل أن يواجه الفلاح جيشه صارخا: "يا كفرة...يا إسرائيل...يا ولاد الـ...، سبتوا إيه لبلدكوا....، يا احتلال...". هذا فوق كل احتمال وطاقة، هذا فاق قانون الطوارئ الذي نتجرعه لثلاثة عقود، وفاق سحب الدعم من رغيف الخبز، وفاق الأكل من المزابل، وفاق ثورة العطاشى، وفاق "المحاكم العسكرية"، وفاق الفتن الطائفية، وفاق حبس الصحفيين، وفاق حتى التعذيب في أقسام الشرطة؛ هذه قاصمة ظهورنا، نستحلفكم بحق دماء الشهداء أن ترحموا آخر مقدساتنا الوطنية.

بالنوسبة لدولت والتانيين ودوكهمة واسم النبي حارسها

على فكرة بقى انا كل ما ادخل عند دولت الاقيهم بيقولوا كلام زي الخرا وناس مرضى فعلا وعيانين ودي مشكلتنا كلنا ان يبقى دولت عيانين بالشكل ده...مما لا شك فيه ان كلنا عيانين بشكل او بآخر ويعني كتر خيرنا بصراحة بعد ده كله لو ما عيناش نبقى البعدا ما عندناش دم. بس المشكلة ان دولت عيانين وعبط...والتانين عيانين ومتخلفين، مين بقى؟ دوكهمة هم بقى اللي مستفيدين من كل حاجة، ولعلمكوا بقى دوكهمة هم اللي بيحركوا دولت، ودولت فاكرين نفسهم عتريس وبلوة سودا ومسنودين من اسمها ايه واسمها ايه اصلا عايزة تخلص عليهم عشان هم مش على كيفها قوي وعمالة تعمل حاجات من تحت لتحت عشان هي اصلا بتستغل دولت عشان تعمل فركيشة وبعدين تفركشهم هم كمان، ودوكهمة ما عندهمش ضمير ولا يعرفوا ربنا اساسا ومطرح ما ح ترسي ح يدقوا لها واخرتها ح نلاقي نفسنا كلنا متعلقين على البتاعة دي. اديني قلت بقى وحذرت وعقلكوا في راسكوا تعرفوا خلاصكوا عايزة تتنصحي اتنصحي مش عايزة تتنصحي ما تتنصحيش. وللعلم بقى كمان انا شاكة في التانيين انهم هم راخرين فاكرين نفسهم مسنودين على اسمها ايه وهي برضه ح تفركشهم، اصل مش معقول فيه حد غبي قوي كده، واحد غبي، اتنين اغبيا، تلاتة، ألف، خمستلاف، لكن كل دول اغبيا؟ وللا ليه لا؟ اذا كان دولت كلهم عيانين، او على الاقل كل ما حد فيهم يتكلم تلاقيه بيتكلم كلام عيانين، يبقى مش بعيد يبقى التانيين هم كمان اغبيا، وعيانين برضه. بعيد عنكوا الجوع كافر وكتمة النفس والظلم يعملوا اكتر من كده، برضه اسمها ايه عاملة شغل يعني اسم النبي حارسها يعني. بس تعرفوا بقى انا مش غايظني غير دوكهمة، واحد يقول لي ده معناه انك متحيزة لدولت والتانيين، وبتلاقي لهم اعذار حتى لو كان المرض والغباء ليه بقى مش بتعذري دوكهمة؟ اصل دوكهمة ما عندهمش ضمير وما عندهمش مانع انهم يستخدموا دولت عشان يبصروا بيهم وبعدين يقشوا بالواد، وهم عارفين كويس ان التانيين مش ح يسكتوا وح يحاولوا يقشوا بالكومي ومين بقى اللي ح يتفعص في النص؟ الغلابة اللي زيينا، طبعا دولت ولا يسووا تلاتة نكلة يعني مش وزن ولا قيمة ولا منظر بس شبشب مرفوع وخلاص، ليه بقى؟ اكمن دوكهمة مش معاهم الواد عشان يقشوا بيه دلوقت، وعارفين ان الكومي مع التانيين، ومستنين الواد في التفريقة اللي جاية، قالوا لك طيب نبصر مؤقتا بدولت وللا حتى ناكل بيهم اذا ما بصرناش على الاقل يبقى معانا الورق ...لحد ما يجي الواد في التفريقة، وهم بقى بيفنطوا كويس عشان يجيلهم الواد، بيغشوا في التفنيط يعني، والتانين واخدين شلوت عشان معاهم الكومي ومش واخدين بالهم من التفنيط، وعلى فكرة ممكن بسبب التفنيط الكومي يتحرق على فكرة، ودولت بقى للعلم مافيش اغبى منهم، ولا حتى التانيين، اه وربنا ليه؟ لان التانيين برضه معاهم السبعة الكارو، لكن دولت ولا معاهم حاجة بقى، معاهم ظراط عالي وخلاص، وساعة الجد ح ياخدوا صفر، هم بس عمالين يظبطوا وهم فاكرين بيظبطوا لنفسهم، بينما الحقيقة هم بيظبطوا لدوكهمة، ودوكهمة ماعندهمش مانع تولع حريقة وتبقى ولا يوم القيامة المهم بس يطلع لهم الواد في التفريقة الجاية، واديهم بيغشوا في التفنيط اهو....شايفين؟ بص بص، بيحطوا الولاد ورا بعض عشان التانيين ما ياخدوش ولا واد...ودولت ولا شايفين، وولاد وسخة كمان وقذرين، دولت اه، قذرين، انا عاذراهم على قذارتهم على فكرة، اصل غلابة، بس هم ولاد وسخة لانهم مش واخدين بالهم ان التانيين غلابة برضه على فكرة، هم فاكرين ان التانيين مدام معاهم الكومي خلاص، يبقوا مش غلابة زيهم، مع ان والله الكومي شكله ح يتحرق، وبعدين دول ما اكلوش ولا اكلة، حتى لما جم ياكلوا اكلوا بالسبعة وسابوا التلاتة على الارض مع ان معاهم العشرة يعني كان ممكن ياخدوا كارتين بدل كارت بس هم اغبيا، وغباءهم كمان انهم مش مديين فرصة لدولت راخرين خالص، وفاكرين ان دولت هم اللي ح ياخدوا العشرة منهم ودولت فاكرين ان التانيين هم اللي ح ياخدوا العشرة، مع ان المفروض انهم يجمعوا مع بعض عشان دوكهمة بيلعبوا مع اسمها ايه، يعني كسبانين كسبانين، وكمان ضموا دولت وح يطلعوا دولت من المولد بلا حمص، ليه؟ لان دولت مجموعهم لوحده، يعني دولت شغلتهم يظبطوا الارض للبصرات بس، لكن بقى ياكلوا حاجة؟ ابداااااااا، ولا خمسة واحدة، والتانيين شايلين الكومي بخيبتهم فاكرين ح يبصروا بيه.

طيب نعمل ايه بقى؟

عموما ربنا ما بيظلمش حد، اذا كان دوكهمة يبقى دوكهمة، خلي دولت يعرفوا غلطتهم كويس، ما اتعظوش اصلهم من الدور اللي فات، وخلي بقى التانيين يشربوا مية مجاري عشان اغبيا وبهايم وعدوانيين على الغلابة وفراخ قدام اللي واخد الورق كله، خليهم بقى على دول

احنا ح نعمل ايه؟

آه

احنا بقى ح نموت وندخل الجنة وننبسط ان شاء الله

ماهو ده اخر امل لينا

الضرب بالقفا حتى الشلل

يا شباب الخبر ده جالي على النت عايزين نشوف مدى صحته وصاحبه فين وكدهوت

اليكم نص الميل:


أربعة من جلادي الشرطة يعتدون علي مواطن بالضرب علي قفاه ويتسببون في اصابته بالشلل
بعد أيام من وفاة أحمد سيد صابر ضحية التعذيب داخل قسم شرطة العمرانية والذي لفظ أنفاسه الأخيرة بمستشفي الهرم منذ أيام شهد مركز شرطة أبوالنمرس واقعة أخري مثيرة، فقد قام »3« من المخبرين وضابط شرطة بالاعتداء علي الطالب عمرو علي السيد سالم »27 سنة« بالضرب والسب بأفظع الألفاظ أثناء جلوسه بصحبة خطيبته علي احدي الكافتيريات بشبرا منت ..
وقام المخبرون بالاعتداء علي رأسه ضرباً مبرحاً وعلي طريقة كليب القفا تم تلقينه »علقة ساخنة« ووصلات من الضرب علي القفا والقدمين، وتم نقله لمستشفي قصر العيني في حالة اغماء وغيبوبة تامة منذ »5« أيام بين الحياة والموت.
وقال شقيق الضحية أشرف ان شقيقه تم الاعتداء عليه يوم الاثنين الماضي أثناء جلوسه مع خطيبته باحدي الكافتيريا بمنطقة أبوالنمرس، وتم الاعتداء عليه بألفاظ وضرب مبرح حتي تم نقله في حالة غيبوبة تامة لمستشفي قصر العيني وكانت عقارب الساعة تشير الي الساعة »30. 10 « صباحاً يوم الاثنين الماضي فوجئت باتصال هاتفي من خطيبة شقيقي تخبرني بأن عمرو تم القاء القبض عليه واحتجازه داخل قسم شرطة ابوالنمرس بدون سبب اثناء جلوسنا حضر »3« مخبرين يرتدون الجلباب وبصحبتهم ضابط وطلبوا منا ابراز البطاقات الشخصية وفعلاً قام شقيقي وخطيبته باعطائهم البطاقات وبعدها قام الضابط بسؤال عمرو عن الفتاة التي بصحبته فأكدلهم عمرو »أنها خطيبتي« وبعدها بدأت وصلة »»كليب القفا المصحوبة بالركلات والإهانة« دون سبب، يلتقط شقيق الضحية أنفاسه لحظات ويعود للحديث مرة أخري قائلا: توجهت الي المركز وللاستفسار عن الواقعة ولكن فوجئت بمنعي من الدخول ولم أتمكن وحاولت مرة أخري ولكن محاولاتي باءت بالفشل واثناء جلوسي أمام المركز فوجئت بصاحب الكافتيريا وبصحبته محام وقص علي الواقعة اللي حصلت وقال لي أن شقيقي تعرض للضرب والاهانة وتم اقتياده داخل سيارة ميكروباص دون سبب وأثناء وصلة الضرب المبرح سقط مغشياً عليه وقام المحامي بالدخول الي القسم وبعد ساعة خرج وقال لي »أخوك هيخرج بعد قليل« ومكثت ساعة كاملة مرة أخري ومرت تلك الساعات وأنا في حالة قلق وتقابلت مع احد أمناء الشرطة الموجودين بالمركز.
وقام بادخالي وتقابلت مع المحامي ولم أجد شقيقي داخل القسم وعرفت أنه تم نقله لمستشفي قصر العيني فانتابتني نوبة بكاء شديدة ووجدت »نفسي محتار مش عارف أعمل ايه« وتوجهت للمقدم رشدي همام رئيس المباحث وقال لي أخوك ان شاء الله بخير ومكثت ساعة كاملة داخل المكتب وأنا في حالة خوف ورعب وجلس معي عمرو الدالي مدير مباحث المركز وجاء المأمور بعد ذلك ونزلت مع المقدم رشدي وذهبنا لنيابة امبابة وتم توجيه عدة أسئلة لي حول صحة شقيقي من حيث الحالة العصبية والضغط والإغماء وبعدها تم مقابلة الطبيب والاستفسار عن الحالة وتم استدعاء خطيبته »م. أ« وأدلت بأقوالها داخل النيابة وأكدت ان »3« مخبرين قاموا بضرب خطيبها عمرو وكان بصحبتهم ضابط شرطة وقاموا بضربه علي القفا والقدمين حتي فقد وعيه، ويعود شقيق المجني عليه للحديث مرة أخري ويؤكد ان الضابط قام بتلفيق محضر معاكسة له وأكد ان اسم الضابط مدحت.
وقال ان شقيقه أصيب بالشلل في القدم اليمني واليد اليمني وغير قادر علي الحركة كما أن الأشعة التي تم اجراؤها بالمستشفي فوجئت بها تشير الي أن شقيقي لديه مرض منذ الصغر وعيب خلقي وهو ناتج عن الضغط والعصبية وهذا ليس صحيحاً. تم تحرير محضر بالواقعة برقم »5722« مركز قسم امبابة وتولت النيابة التحقيق وتم تقديم مذكرة للمحامي العام يوم »13« نوفمبر 2007 وتم سماع اقوال والد المجني عليه وشهادة خطيبته. _ جبهة إنقاذ مصر _

=====

ايوة ايوة ماهو ده عمرو سعيد اللي مها قالت لي عليه وانا كتبت عنه

لما رجعت من عند كريم عامر

اصل الميل جاي لي عمرو علي السيد سالم يعني فيه اختلاف في الاسم يعني

:)))

اظن واضح وانا عقلي مش دفتر وبعدين انا ح افتكر ايه وللا ايه

ده لو كان جبل كان اتهد يا خويا

الا ايه جبهة انقاذ مصر دي؟

هو ده غير حزب الجبهة وللا ده تشابه اسماء؟

هو فيه ايه؟

انتوا مش حاسين معايا ان فيه حاجة غريبة بتحصل؟ الدنيا مش مظبوطة صح؟
فيه حاجة غامضة
اولا البلد زحمة بطريقة شاذة بجد يعني طيب نقول الو....يعني مثلا ممكن تبقى زحمة عشان مولد السيما ومولد التلفزيون؟
ده سبب يعني؟
طيب كل واحد سمع عن حاجة غريبة حصلت لحد يعرفه يرفع صباعه
عشان فيه شوطة كده معينة غامضة بتحصل للناس المحيطين واللي باسمع عنهم بس مش عارفة
هل انا اللي حاطة راسي في المولد وللا دي ظاهر متفشية بس انا مش عايزة افسر يعني والحكاية دي بقت تحصل لناس عادية
مش كده ولا كده ولا كده والناس العادية دي لما الحكاية دي بتحصل لهم بتتغير طبايعهم وحتى وشهم تحس كده انهم بيتحولوا
وبيعملوا حاجات غريبة وفيه حرك وفرك مش طبيعي وفيه حاجة تخوف والدنيا ضلمة شوية
انت شايف حاجة يا كابتن؟ اللي شايف يقول ممكن يكون انا نظري ضعف من الكمبيوتر
وانا بقى مش عايزة ابقى شكاكة لان الشك ح يعطلني بس خايفة اكون باشوط في الـ...كاكا وانا مش واخدة بالي
وبرضه مش عايزة يجيلي هس هس احسن تبقى عيبة
بس هي ايه حكاية اللي الحكاية دي مش ملاحظين انها شوطة؟ طيب اكيد وراها حاجة...واشمعنى هنا وللا هي في كل حتة
طيب ايه احنا ح نفضل مستنيين كتير ماهو بقت الحكاية هيصة خالص وماحدش عارف ياخد ويدي في الكلام بس بقى فيه شوية استعباط كده ومزايدات وكلام من اللي هو مش كلام والواحد بقى مش عارف يعني يقول وللا يعمل ايه وكله اتهبل
وبعدين كمان اي هجص في الهبص وانا ما عنديش بقى اللي عندهم هناك لاني مش باحب كده وبقيت مش عارفة
مين اللي عنده ومين اللي ما عندوش ومين اللي اهبل وفاكر نفسه ناصح ومين اللي بيستهبل وح يطلع ام اربعة واربعين بعد شوية
حاجة تخض مش كده؟
طيب تتصرف كيف يا عب رحيم؟ وللا يكون بيتهيألي ومافيش حاجة عادي؟ وللا تكون دي تمثيلية؟ وللا تكون مافيش وانا اللي مكبرة الموضوع؟ طيب اعمل ايه عشان ابقى في السيف سايد؟ وللا غلط ابقى في السيف سايد احسن يكون كده مش سيف...طب هات التسعة
هو انتوا مش ملاحظين كده برضه؟
هاه؟

آه نسيت اقول...الناس بقى التانية اللي هي مش في الشوطة هابلة شوية والشوطة بتاعتها مختلفة عن الشوطة الاولانية ومش عارفة يا عيني تعمل حاجة غير تهبل وتهوبص وتيجي تكحلها تعميها وكل ما يتكلموا اقول يا رب يسكتوا وبعدين بقوا حاجة قذرة جدا وانا مستنية عربية الرش او حتة الصابونة مش مفروض انها جاية من السوبر ماركت قريب؟ بيقولوا خلاص مفروض قربت تيجي...مش بتيجي ليه

على فكرة كمان الاول كانت الشوطة على هناك وبعدين بقت على دوكهة المهم ان دولم بس هم اللي يتشاطوا وخلاص مش مهم على فين المهم يحصل فيهم حاجة وانا خايفة اكون ده هس هس وكلها مصادفات والواحد بقى عايز يكلبش في الموضوع احسن هو راخر ياخده الوبا اعوذ بالله اعوذ بالله يا رب استر

احنا لازم نقف وقفة من اللي هي كده..بس المشكلة بقى ان اللي مفروض يقف وقفة من اللي هي كده ركبه واجعاه ويجي يعمل اي منظر تحس ان عنده تخلف عقلي وتقول يا رب يا رب يروح يتشاط معاهم احسن ده معتوه وح يلخبط لي الدنيا واي حد يحاول يتكلم معاه تحس انه طالع من الزير وعليه تراب ومش عارف ولا عايز يسمع الحكاية مع انها والله سهلة

وللا هي صعبة؟

لبعدين يطلع ده كله غلط من الاول...

امن الدولة يصادر 6 اتوبيسات برقم 44

اتصلت بيا ندى القصاص وقالت لي ان جالها خبر من عبد المنعم رياض بيقول ان امن الدولة صادر ست اتوبيسات برقم 44 ونزل الناس ولما سألوهم قالوا لهم عشان ح ننقل فيهم الموظفين المعتصمين بتوع الضرايب

وفيه عربيات امن كتير تحت حزب الغد

بس اشمعنى 44 يا ام 44؟

هم ح يعملوا فيلم رعب للموظفين وللا ايه؟

هو فيه ايه في ام البلد دي؟

بس بعد حادثة الجيش على كده بقى الامن معذورين

!!!!!!!!!!!!!!!!!!