القبض على 17 من الاخوان منهم عصام العريان وصهر عادل امام

اففففففففففففففففففففففففففففففففففففففففف

جاني الخبر ده على الميل من مجموعة الحقيقة البريدية

اعتقال عصام العريان وآخرين من قياديي الأخوان أثناء اجتماعهم
خاص ووكالات- القت أجهزة الأمن القبض علي 16 من قيادات جماعة الأخوان علي رأسهم الدكتور عصام العريان أثناء اجتماعهم الذي قالت الشرطة أنه اجتماعا تنظيميا بمنزل رجل الأعمال نبيل مقبل -- صهر الفنان عادل إمام - بمنطقة الجيزة.

ومن بين المقبوض عليهم الدكتور محمود حسين عضو مكتب الإرشاد و مسئول الجماعة عن صعيد مصر والمهندس نبيل مقبل ورجل الأعمال سيد نزيلي والدكتور أحمد عمر والمهندس حسام أبو بكر والمهندس خالد البلتاجي والدكتور حمدي الزايط والدكتور هشام عيسي والدكتور سناء أبو زيد والشيخ حمدي ابراهيم.
وقامت قوات الامن بتفتيش منازلهم في غيابهم، والإستيلاء علي أجهزة الكمبيوتر الموجودة في المنازل إضافة إلي عشرات الكتب والمتعلقات والأوراق الشخصية، وقدتم تحويل المعتقلين إلي قسم مدينة نصر تمهيدا لعرضهم علي النيابة.
من جانبه أكد عبد المنعم عبد المقصود ـ محامي الجماعة ـ أنه لم يتبين حتي الآن إن كان هذا الإعتقال قد تم بإذن ووجود النيابة أم لا، مشيرا إلي أنه في حالة وجود النيابة فإنه سيتم عرضهم علي نيابة أمن الدولة العليا اليوم، أما إن كان القبض من خلال مباحث أمن الدولة فقط فسيتم عرضهم علي النيابة غدا، مؤكدا أنه في كل الحالات من المتوقع حبسهم 15 يوما علي ذمة التحقيقات وتوجيه الاتهامات المعروفة وهي الإنتماء لجماعة الإخوان المسلمين

اجهزة الامن منعت العريان من السفر مع رحلة سياحية نظمتها نقاب الاطباء ل27 طبيبا الى تركيا صباح الجمعة

بعد ان أنهى اجراءات سفره على رحلة مصر للطيران المتجهة إلى اسطنبول للمشاركة في بعض الفعاليات هناك ، إلا أنه عندما تقدم لانهاء إجراءات جواز سفره تبين إدراج اسمه على قوائم الممنوعين من السفر.
وقال العريان لرويترز إن الشرطة المصرية منعته من السفر للمرة الثالثة خلال أربعة شهور. !!

=========

افففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففف

يا الله يا ولي الصابرين

========

سمعت في الجزيرة ان المهندس نبيل كان عامل لهم عزومة غداء

ما حدش يتغدى بقى عند حد تاني

الغداء خطر على إمن العام

هو احنا مش ح نخلص من الموال ده بقى؟

يا رب

رد من العقيد أسامة الصادق على استفسارات أبو لهب

هههههههههههه ابو لهب عملنا مشاكل

:)

عموما العقيد اسامة علي الصادق سعيد جدا

بكل التعليقات وقراها كلها

ومهتم يرد على اي استفسار

وانا اتشرف باني انشر رده على مدونتي

:اليكم رد العقيد على الزميل ابو لهب

الاخ العزيز ابو لهب
اشكرك على تحيتك الرقيقة لشخصى ولكن الاحق بها هم من نالوا الشهادة فهم ارفع منى منزلة ..
وقبل ان اجيب على اسئلتك اود ان اوضح ان بالعالم العربى توجد ثلاث نقاط هامة خربت عقول وقلوب شعوبها وهى :
1- تكفير الآخرين
2- تخوين الاخرين
3- الكذب فى القول والفعل
لو ابتعدنا عن هذا الثالوث البغيض لوصلنا لمرحلة متقدمة راقية نعمل فيها لنرفع رأس العالم العربى عاليا ..

الاجابة على الاسئلة التى طرحتها :
1- موضوع الخرائط المصرية المزورة عن الخرائط المسلمة لسوريا عن سير المعارك 1973
الاجابة :
سيدى : لا يوجد جيش فى العالم يسلم خططه للاصدقاء .. حتى على مستوى الجبهة المصرية .. كانت خطط الجيش الثالث غير معلومة التفاصيل للجيش الثانى لدواعى الامن والسيطرة .. تخيل اى قائد عسكرى سورى يحمل خرائط الجيش المصرى ووقع فى الاسر .. ماذا سيكون عليه الحال .. هناك شىء يسمى تنظيم تعاون بين الجيوش وهى الخطط التعبوية اما على مستوى الدولة فتسمى بالخطة الاستراتيجية .. يتم الاتفاق فيها على بنود رئيسية بدون الدخول فى تفاصيل تعتبر سرية وخطيرة على القوات الاخرى.

2- خطة مصر للاستيلاء على خط بارليف دون الدخول لعمق سيناء
الاجابة :
تخيل مسرح العمليات على الجبهة المصرية .. مانع مائى جبار عرضه مائتى متر وعمقه اثنى عشر مترا وسرعة رياح شديدة وخط محصن من النيران بطول جبهة القتال بحوالى 180 كيلو .. كيف ستعبر الدبابات المصرية لتخترق سيناء وتصل الى العمق وتترك هذا الخط الذى يستطيع القتال لمدة شهرين بما توفر له من الطعام والشراب والذخيرة .. لا بد من تدميره اولا .. ان تدمير الخط هو بمثابة الانتصار لسبب غير واضح لبعض الناس .. انك ايها الجندى الاسرائيلى اصبحت على اتصال برى بالجندى المصرى والذى لن يمل من الاغارات عليك وذبحك وتحرير ارض جديدة كل يوم .. لهذا لفقت امريكا معاهدة السلام لصالح اسرائيل وليس لصالح مصر والعرب لانه بدونها كان الجيش المصرى قد حصل على تحرير سيناء بالقوة فى ظرف عامين بأقل خسائر وبخسائر كبيرة للعدو لا يستطيع تحملها .

3- الرسالة المشفرة للرئيس السادات لامريكا عن الحرب
الاجابة :
سيدى .. انك تتحدث عن موضوع خيانة عظمى لم تحدث فى التاريخ .. كيف لرئيس دولة مهما كان رأيك ورأى الاخرين فيه ان يقوم بهذا العمل .. اتعتقد ان امريكا توافق ان الرئيس السادات يقوم بقذف اسرائيلى بزلطة .. انه شىء عجيب .. الرئيس السادات مثل الزعيم جمال عبد الناصر كانا رحمهما الله مخلصين لمصر وللقضية الفلسلطينية ولكن كل واحد له حساباته وطريقة تنفيذ خطته .. وللعلم اللى ايده فى الميه غير اللى ايده فى النار .. الرئيس لديه اجهزه تبلغه بكل شىء ويتحملها مع بعض معاونيه دون تحميل الشعب هذا العبء النفسى .. الرئيس السادات وطنى حارب وانتصر ورضخ اخيرا للتهديد الامريكى مثل باقى الدول العالم التى تخاف من امريكا ولا مجال للمقارنة بزعيم مصر فكل شيخ له طريقته ولا تنسى ان جمال عبدالناصر وافق على وقف اطلاق النيران بالمبادرة التى حملت اسم وزير خارجية امريكا حينئذ " وليم روجرز "

4- بخصوص سحب الدبابات المصرية من شرق القناة بعد عبورها وعودتها للغرب
الاجابة :
هذا كان ايام الثغرة والتى تسبب فى جزء منها الرئيس السادات بدفع اكبر فرقة مدرعة الى الشرق مخالفا الخطة ورأى رئيس الاركان الصحيح .. هذه الفرقة كانت معدة للقيام بالهجمات المضادة على الاسرائيليين ولو كانت فى مكانها ولم تعبر وحدثت الثغرة لكانت اسرائيل لحقتها هزيمة منكرة قضت على نصف جيشها الرئيسى لكن كل رئيس بيعتقد انه طالما اصبح رئيسا فقد اصبح يعرف فى كل شىء وهذه هى الكارثة الكبرى وخاصة فى القوات المسلحة التى اقل خسارة بها تدمر البلد .. ُدفعت الفرقة 21 مدرع لتخفيف الضغط على السوريين .. يعنى الخسارة هنا كانت لصالح حماية سوريا وليس تزويرا وعدم مساعدة كما يتقول البعض
الرئيس السادات بعد الثغرة رفض فكرة رئيس الاركان الشاذلى "متعه الله بالصحة" بسحب الجيش الثانى وحصار الثغرة وتصفيتها .. رفض السادات .. علمت امريكا وهى تعلم ان الشاذلى لو نفذها لقضى على الجيش الاسرائيلى بالكامل لانه اصبح محاصرا بين الجيش الثالث بالشرق والجيش الثانى بالغرب .. هددوا الرئيس السادات .. وله حساباته كرئيس فرفض الفكرة وبدلا من ان نقضى على الجيش الاسرائيلى او نحاصره اصبح الجيش الثالث هو المحاصر

5- بخصوص تنازل الرئيس السادات عن بعض المواقع التى رفض الفريق الجمسى التنازل عنها .
الاجابة :
هذه هى سلطة رئيس الدولة .. هل سمعت او رأيت ان شخصا فى مصر استطاع ان يتفوه بكلمة بعقد صلح او زيارة لاسرائيل سوى الرئيس السادات .. هذه هى سلطة الرئيس فى اى دولة التى يمنحها له الدستور وهو القائد الاعلى للقوات المسلحة ورأيه نافذ على الجميع ولن تصبح غرفة العمليات ساحة للمناقشات وامريكا الان خير شاهد على ذلك فرئيسها يحارب فى كل مكان من العراق حتى ساقية مكى .. اى حتة يحلم ان بها واحد اسمه اسامة يبعت قوات له على طول .. هلع بيصيب بعض القادة والشعوب هى التى تدفع الثمن


ارجو ان اكون استطعت ان اجيب على اسئلتك بعيدا عن التعبيرات والمصطلحات العسكرية الغير مفهومة للكثيرين ..
والسلام عليكم ورحمة الله وبركاته

اسامة على الصادق
مدون كتاب
الناس والحرب

هي ايه حكاية الدكتورة سعاد صالح مع الاطفال؟

طبعا الكل عارف ان الولد اللي اتهمته الطفلة هند باغتصابها

طلع مش هو ابو البنت وانا شخصيا من قبل تحليل الحامض النووي

كان عندي احساس انه مش هو ابو المولود

تعقيبا على ما حدث الدكتورة سعاد صالح طالبت

بجلد الطفلة هند ثمانين جلدة بتهمة قذف المحصنات

وذلك لتكون عبرة لكل من تسول لها نفسها ان تفتري على

رجل الكذب

!!!!!!!!!!!!!!

انظر الشكل

الدكتورة سعاد صالح عايزة دي تتجلد تمانين جلدة

وكأن مش كافي عليها اللي حصل لها وهي لسة عندها حداشر سنة

وماحدش يطلع ويقول لي لا طلعت خمستاشر

على اساس ان خمستاشر سنة دي ظابط شرطة مش طفلة برضه

الطب الشرعي قال انها تملك انوثة خمستاشر سنة

لكن شهادة ميلادها وشكلها بيقولوا حداشر

ولو فرضنا انها خمستاشر يعني

دي

دي

يتقال عليها تتجلد عشان بترمي المحصنين وبتفتري على رجل الكذب

كمان اضافت الدكتورة سعاد ان الطفلة هند واهلها استفادوا جدا

من الحادث ده

امممممممممممممم

هلبت بقى ما البت راحت خلفت عيل وفضحت نفسها وجريت ورا

اي انسان بقى ما نعرفش مين وقالت لي اغتصبني لو سمحت

عشان اصلي مزنوقة في شقة

موطرحين وصالة وعفشة مية

واذا كان محامي الدفاع عن الولد اللي هو فعلا بريء

بيقول على دي

ان مشيها بطال وسيئة السير والسلوك

فاولا هو محامي الدفاع بتاع المدعى عليه وبيستخدم كل اسلحته

ولو اني باحتقر الاسلحة اللا اخلاقية

ثانيا هو راجل يعني ما يفهمش في اي حاجة بخصوص الموضوع ده

no offence

انا مش قصدي ان الرجالة ما بيفهموش

بس احمد زويل يفهم في الفيمتو ثانية

لكن عمره ما يفهم سيكلوجية طفلة عندها حداشر سنة

بتتعرض للموقف ده

واي ست بصمجية جواها بذور الامومة تقدر تعرف البنت مالها

دي خلقة ربنا

لكن واضح ان الدكتورة سعاد صالح بريئة جدا

ايوة والله بريئة وطيبة وغلبانة كمان

ومش عارفة ان فيه في الدنيا حاجات وحشة قوي

حاجات فوق طاقة استيعابنا ناهيك عن ان طفلة زي دي

تمر بيها

اي ست في الدنيا تعرف ان الموقف فوق طاقة واستيعاب طفلة

زي دي وان اي واحدة مهما كانت حتى لو كانت هند رستم في فيلم بنات الليل

دايما تحب تنسب مولودها الشرعي او غير الشرعي لابوه الحقيقي

وانها لا تتهم حد تاني غير ابو الطفل الا في حالتين

الحالة الاولى انها تبقى مهدد من قبل الاب الحقيقي تهديد

يعصف بمولودها قبل ما يعصف بيها هي

والحاجة التانية ان ابو الطفل الحقيقي ما ينفعش يبقى

ابو الطفل فعلا

حد فاهم حاجة؟

لا واضح ان ما حدش فاهم حاجة

ما حدش فكر ايه هو نوع التهديد اللي واقعة تحته طفلة زي دي؟

ما حدش يفهم ان الاطفال تهديدهم من اسهل ما يمكن؟

والاهم من ده كله

ما حدش فكر يطالب بإن ابو الطفلة هند

هو نفسه يتعمل له تحليل حامض نووي؟

ما حدش خطر على باله ابدا الحكاية دي؟

غريبة

مع ان دي اول حاجة خطرت على بالي

امال ربنا خلق الستات امهات بالفطرة ليه؟

امال ايه التميز اللي عند الست واللي بيخلي مشاركتها

في الحياة العلمية والعملية مهمة ومفيدة ومختلفة

وتقدر تشوف

- بحكم خقلتها وتجربتها -

الجوانب اللي الرجالة ما يقدروش يشوفوها

لانها ما اتخلقتش فيهم اصلا

لما المحامي يقول دي مشيها بطال حاجة

ولما ست ام فقيهة تطالب بجلد

دي

حاجة تانية وكمان نقول انها استفادت هي واهلها؟

مين فكرت تاخد الطفلة ام الطفلة في حضنها بعيد عن اهلها

وتفهم منها ايه اللي وراها

وللا احنا ماورناش حاجة غير نرفع الكرباج على الضعفاء

والمقهورين

والديوك الرومي ترتع في الارض فسادا ويوم ما واحد فيهم يتقفش

يدفع اللي عليه

- اللي هو اربعة وعشرين مليون -

ويخرج براءة

موظف حكومة معاه ملايين يسد بيها ديونه

واحنا عايزين نجلد طفلة عشان اخدت شقة

"مطرحين"

وصالة واستفادت بانها مرت باسوأ تجربة ممكن يمر بيها انسان

والهم اللي شايلاه في قلبها الصغير اكيد اكبر من اللي احنا نعرفه

طب اعمل ايه انا دلوقت على رأي عوكل

يا حبيب يا عادلي ما عندكش ولاد؟ حسبنا الله

اسفة جدا مش ح اقدر انشر صور اكتر من دي

الصورتين دول اخدتهم من مدونة

الوعي المصري

تقدروا تتابعوا على المدونة اقوال الام

وازاي اخدوا ابنها ورموه على الكوبري

بعد ما مات منهم وقالوا مات من التهاب رئوي

معلش للي بيتضايقوا من الصور دي

بس لازم تشوفوها وتشوفوا

الالتهاب الرئوي بيعمل في الناس كده؟

بقية الصور عند وائل عباس

يا وزير الداخلية

ما عندكش ولاد؟ مش خايف من ربنا؟

حسبنا الله ونعم الوكيل

رسالة للجميع من صاحب كتاب الناس والحرب

سيادة العقيد اسامة على الصادق

طلع بيفتح النت وبيشرفني بقراءة جبهة التهييس الشعبية

وبيقرا التعليقات كمان

وصلتني رسالة موجهة لينا كلنا على الميل بتاعي

: اترككم مع كلمات الصادق

الابناء والبنات مطلعى جبهة التهييس الشعبية
تحية عطرة لكم جميعا :

اعرفكم بنفسى :
الاسم .. عقيد بالمعاش / أســامة عــلى الصــادق " شاهد وعاصر وتألم وانتصر وخط كتاب "الناس والحرب"
قبل ان اعلق على ردكم على الابنة نوارة الانتصار .. ارجو ان تسمحوا لى بأن الخص الكتاب الذى يحوى اكثر من 480 صفحة فى كللمات قليلة :

ملخص كتاب الناس والحرب

الكتاب يسلط الضؤ على حالة الجيش المصرى قبل المعركة وهذا هام جداً لكى يعلم كل مصرى بعض اسباب الهزيمة ولهذا ذكرت بعض ما شاهدته بنفسى فى الوحدة التى تشرفت بالعمل بها فور تخرجى فى اغسطس من عام 1966 .. ثم الحشد الى سيناء بدفع القوات بطريقة غير منتظمة تخالف كل الاعراف العسكرية التى درستها .. معارك مع العدو الاسرائيلى لمدة ايام ثلاث ثم امر انسحاب بنفس طريقة الحشد والهرجلة .. كمين اسرائيلى قتل بعض الجنود والضباط وفجأة وجدت نفسى بين خمسة من جنود كتيبتى احدهم انا قائده .. لا نعرف اين نتجه .. فجميعنا حديثي العهد بسيناء .. تخبطنا فى سيرنا لغرض اللحاق بقواتنا التى تركتنا بعد الكمين ونحن جهلاء بكل شىء يحيط بنا .. كنا ستة واكبرنا عمرا لا يتعدى الخمسة وعشرين عاما بينما انا لم اكمل عامى الثالث والعشرين .. قليل الخبرة .. خمسة ايام تيها فى صحراء سيناء من شهر يونيو اشد شهور السنة حرار .. نحترق نهاراً من اشعة الشمس وضوءها القاتل لابصارنا ولا نجد شيئا نستظل به وليلا برودة قاتلة مثل شهر يناير .. تقابلنا مع جنود من وحدة عسكرية باحدى ورش الجيش .. اثنين وعشرون جنديا يرأسهم "مساعد" انهم مثلنا .. لاماء ولا طريق نعلمه للسير به .. فى احدى الليالى نمنا فى وادى ولا نعلم ما بداخله لكن ظهرت النتيجة فجراً انه وادى الثعابين الضخمة من فصيلة الكوبرا القاتلة .. لا ازيد اذا قلت ان به المئات من الثعابين التى لم تضر احد "الله هو الحارس" بعد خمسة ايام انسحاب مات الاثنين والعشرون جنديا بالتوالى عطشا امام اعيننا وكنا سنلحق بهم لكن الله لطف بنا وعثرنا على بدوى اغاثنا بشربة ماء وتلاها بطعام رائع مثله .. نواصل السير نهارا من الحرارة وليلا من البرودة .. نقع فى شرك تجار مخدرات ويوجهوننا الى طريق خاطىء لنقع فى لواء مظلات اسرائيلى .. معركة مفروضة علينا .. قاتلنا بالبنادق التى كنا نحتفظ بها .. نتيجة المعركة .. مقتل ثمانية جنود اسرائليين وتدمير عربتان جيب وسقوط طائرة هليكوبتر ..ظللنا فى الكهف الذى دفنا به اربعة ايام "اربع نهارا وثلاث ليالى" شاهدنا الموت لحظات كثيرة وشاهدنا معجزة من الله .. الاولى ذئبة بابنائها الستة تعيش بهذا الكهف رغم انها ماتت اثناء الاشتباك مع العدو ثم رؤيا لرجل صالح يوضح لنا كيف نخرج من هذا الكهف المردوم علينا باطنان من الصخور البازلت .. فرجها الله علينا .. سرنا ايام وليالى اخرى جوعا وعطشا ودخلنا فجأة فى معركة مع دبابة اسرائيلية .. اعيد ثانية دبابة اسرائيلية .. انه الجنون بحد ذاته ولكنها شجاعة الشباب وليس اكثر مع حماية وستر الله لنا .. مات اربعة من جنود اسرائيل .. نواصل السير ونقابل شتى صنوف العذاب من اهمال البدو لنا وسبنا بأقذع الشتائم ومعاملتنا كأننا حيوانات ضالة .. الله يسامحهم .. قبل الوصول لقناة السويس بعد مضى ثمانية وعشرون يوما هائمين فى صحراء سيناء القاتلة "كيف نأكل /كيف نشرب / كيف ننام" اسئلة سيجيب عليها الكتاب .. قبل العودة بأربع ساعات ينفجر لغم اسرائيلى بأحد جنودى فيقتل فى الحال بين آلامنا .. بعدها نقع فى معركة مع دباباتين ولورى وقود يحمل بنزين للدبابات .. يقتل الجميع حرقا لانفجار لورى البنزين " اندفاع الشباب والوطنية المصرية " عشرة من الاعداء ودباباتين ولورى .. ذقنا المرارة لمدة اربع ساعات سابحين فى سهل الطينة الملىء بالاوحال والقاذورات والاملاح المركزة .. عبرنا القناة بمساعدة رجال قناة السويس الابطال .. قابلنا رجال المخابرات وبعد مناقشة قصيرة ظهر فيها الفرعون المصرى حصلنا على علقة ساخنة ونزفنا ما تبقى من نقاط من دمائنا القليلة اللزجة .. فى بورسعيد ذهبنا للعلاج والراحة والرعاية .. لم يصل وزن احدنا اكثر من خمسة وثلاثون كجم !! اندهش المحيطون بنا وكيف عشنا ونحن بهذا الوضع
عدنا اليوم التالى للقاهرة للانضمام الى وحداتنا استعدادا لمعركة مع العدو !!
معاملة سيئة من المدنيين والبعض ربنا يصلح حالهم كانوا رحماء بى لاننى انفصلت عن جنودى الاربعة .. اعيش فى ميدان العباسية مثل القطط التى تعيش بجوار اكوام القمامة .. لا طعام ولا ماء ولا مال .. اخيرا ظهر لى لص جوعان اراد ان يأكل فهاجمنى بمطواة قرن غزال .. وجدنى مفلس وعدمان ومقشفر على حد قولة .. اخبرته بأننى جوعان .. رثى لحالى فهاجم شاب واخذ منه جنيها وذهب واحضر سندوتشات .. اعتقد انها كفته او اى شىء لأننى كنت اتناول الطعام ولا اعرف ما هو .. حضرت الشرطة مع الشاب .. لا اعرف كيف وضعنى المخبر فى البوكس؟ لكننى طرت فى الهواء الى داخل البوكس ليرتطم وجهى وانفى بالكابينة فتسيل منه الدماء .. اقتيد مع اللص الى قسم الوايلى واثار ما قام به كلا من جيش مصر"المخابرات" وشرطتها على وجهى وجسدى .. كدمات ونزف .. اقابل رئيس المباحث الرجل الطيب "نقيب عاطف شفيق ونتحدث واكتشف انه شقيق للشهيد الرائد وليم شفيق الذى قاد معركة الدبابات امامى فى سيناء واستشهد معه كل من ملازم اول مصطفى ورقيب اول محمد ورقيب على محمود .. لم تفرق الطائرة الاسرائيلية بينهم .. لأن الطائرة اذكى من المصريين اليوم وتعلم انهم جميعا ابناء مصر
الايام تتوالى والتدريبات على اشدها وزعيم مصر معنا فى التدريبات .. تفرغ تماما لاصلاح ما افسده السابقون .. حرب الاستنزاف وبطولات مصرية ودماء وارواح شهداء تقابل ربها .. اكتوبر ونصر عظيم شارك فيه المصريون جميعا تحت علمها وقيادتها وليس تحت قيادة فئة سياسية او دينية .. انها مصر .. واخيرا وقبل ان اختم التلخيص اعرفكم ان اول من استشهد من قواتى فى حرب الاستنزاف هو الجندى مؤهلات / نخلة نجيب نخلة .. رحم الله جميع شهداء مصر فى جميع العصور والحروب

التعليقات :
اطلعت على تعليقاتكم على ما تقوم به الابنة الغالية "نوارة الانتصار" والحقيقة الكثير مشجع واشكركم على تلك التعليقات لكن البعض سلبى والبعض يقول كلمة "واسعة" احترم رأى الجميع لكن هناك شىء هام وارجو جميعا ان تبتعدوا عنه .. ما كتبت عنه هم شهداء عند الله وليس لهم لسان يدافع عنهم بعد مضى اربعين عاما .. كيف نالوا الشهادة؟ اما حربا مع العدو او عطشا فى صيف صحراء سيناء القاتلة .. اكبرهم عمرا لم يصل بعد الى الثلاثين من عمره .. نفذوا اوامر الوطن واتجهوا لمقابلة العدو ولاقوا الشهادة ولم يجدوا احدا يقوم بدفنهم وتركوهم فى تلك الصحراء تنهشها الذئاب والضباع والنسور والغربان وتركوا الحزن والحسرة والالم لعائلاتهم وابنائهم .. فلا اقل ان نحترم ذكراهم ولا اقل ان نقرأ عنهم بدلا من قراءة التى يقوم بها بعض الشباب فى الاشياء التافهة .. انا اعلم وطنيتكم وحبكم لبلدكم .. جاءتكم الفرصة من تاريخ ليس ببعيد .. ترحموا عليهم بعد قراءة تفاصيل تقع بهذا الكتاب الذى لم ابغى من وراءه ربحا ولا مركزا بل ابغى قول الحق قبل ان اقابل ربى مثل رفاقائى الاربعة المتبقين من رحلة الانسحاب من سيناء عام 1967الذين لا قوا ربهم تباعا فى عامى 2006 , 2007 قبل نشر الكتاب ولم يبتبقى سواى وتركنى الله لهذا الوقت حتى اظهر اسرار تلك الايام والشهور والاعوام التى تعدت الست سنوات .. الكتاب فخر ان تحفظه فى عقلك ومكتبتك لأن به اسماء شهداء قابلوا الله وللعلم انا لم ابذل من الجهد مثلهم فى سيناء لاصابتى .. هم الابطال وليس انا .. انا اسرد ما قاموا به

ملاحظة :
اعتذر مقدما لكل من يقرأ الكتاب من حالات البكاء التى ستصاحبهم ولكن هذا البكاء هو عطر ننشره على ارواحهم الطاهرة وهم عند الله احياء يرزقون

منافذ بيع الكتاب:

*مكتبات الاهرام .. البعض اشتكى من عدم وجوده ولكن حاولوا واحتمال مكتبات الاهرام وسط القاهرة
*مكتبة ليلى .. امام بنك ناصر الاجتماعى بالقاهرة .. الشارع الموازى لشارع شريف ورقم التليفون 23934402
*المكتبة القومية .. مصر الجديدة .. 165 شارع الحجاز ت : 26324914

اشكركم جميعا وارجوا ان اشاهد تعليقاتكم على صفحات " جبهة التهييس الشعبية" بطريقة تليق بكم وبالشهداء الابرار .. لكم منى جميعا الف تحية يا شباب مصر العظيم ..



احد المحاربين القدماء وضحايا الحرب

أسامة عــلى الصــادق
مدون كتاب "الناس والحرب

"

=====

انتهت رسالة احد المحاربين القدامى وضحايا الحرب

العقيد اسامة علي الصادق

طلب مني بعض الزملاء ان اسجل مع العقيد الصادق

والعقيد اسامة كمان قال لي خبر حلو

قال لي ان فيه جندي مصري مستعد يسجل معايا

وان شاء الله فيه ضابط كمان

انا سعيدة قوي ان مدونتي تشرف بنشر رسالة هذا المقاتل العظيم

للحصول على كتاب الناس والحرب

مكتبة ليلى في شارع شريف امام

بنك ناصر الاجتماعي

او ممكن شراء نسخ من المؤلف

للاتصال
0127970032
وارضي
6074525

وبرضه ارجع واقول لو نقدر نشتري

منه الكتاب وننزله كامل على النت

الناس والحرب9: دولا المجد اللي يعلينا فوق الجرح نعود سالمين

ضابطنا بيقول انه زيه زي ناس كتير

ابتدى التوتر والخوف يسري في عروقهم كل ما يحسوا

ان ساعة الصفر قربت

طول ما المراكب ما وصلتش هم بيقولوا يبقى لسة على الحرب

جم المهندسين على الجانب الغربي من القناة عشان يفتحوا

عدد من الثغرات للجيش

اسرائيل عندها اجهزة تصنت تسمع دبة النملة

والمصريين عندهم حنجرة تنطق في شبرا

تسمع اللي في الاسماعيلية

وبسبب كده قائد الكتيبة كان بيطلب منهم يعلوا الراديو

على الاخر عشان يغلوشوا على اجهزة التصنت

وكمان لاحظوا ان بعض الجنود زيهم زي اي مصري

بيستكتموا السر لحوالي اتناشر نفر

كل نفر بيستكتم اتناشر تانيين

والله ما تسريب معلومات ولا نيلة ده غصب عنهم

بس ابتدت القيادات تاخد احتياطها انها تحيط المعلومات بالسرية

وجات القوارب

زيهم زي اي بني ادم داخل على امتحان وامتحان موت كمان

قلبهم طب واختلطت مشاعر الخوف والرهبة بالفرح والحماس

وصلت التعليمات مكتوبة وحفظها ضابطنا عن ظهر قلب

بدليل انه كاتبها من الذاكرة

من ضمن التعليمات: لا داعي للتهليل بعد اصابة تحدث للعدو

في دبابته او مدرعاته لانك بذلك تعرف العدو مكانك

.....

وطلب منهم كاتب التعليمات اللواء اركان حرب سعد مأمون

انهم يفتحوا الراديو على صوت العرب ويظبطوا ساعتهم على الساعة

تمانية وكان الطلب ده لان الهجوم كان مخطط له انه يبدأ اتنين وخمسة

ومش عايزين اي تأخر من اي فصيل او كتيبة او سرية ولو ثانية واحدة

يوم ستة اكتوبر الساعة ستة الصبح جات الفتوى من شيخ الازهر

بحتمية الافطار وان من لايفطر فهو اثم

الجنود زمزئوا وقالوا مالنا يعني ما احنا صايمين وزي الفل

واصروا يكملوا صيام

ضابطنا قعد يقنعهم وفطر قدامهم

عشان يشجعهم على الافطار

قبل لحظة الصفر بنص ساعة حالة سكون تامة في المكان والمحيط

كل فرقة معاها لاسلكيات كله ساكت ومبلم

وفي لحظة الصفر الطيران المصري انطلق وضرب في عمق سينا

ضابطنا قال احملوا القوارب وعدوا بسرعة

ضابطنا قائد مفرزة نطاق امن الفرقة

بالبلدي يعني مجموعة فدائيين

ولذلك لم ينج منهم سوى كاتب هذا الكتاب

كلهم استشهدوا عن اخرهم

المفرزة المفروض تعدي بالترتيب ده: فصيلة مشاة بقيادة

النقيب حسن وبعد ما توصل للشط بقية القوة تحصله

ودي طريقة المفارز والفدائيين انهم يقتحموا على دفعات صغيرة

عشان ما تهلكش كل المجموعة عن اخرها مرة واحدة

حاجة شديدة المصرية حصلت مع الجنود المصريين

لما قالهم احملوا القوارب

بلموا

ياللا

مبلمين

وفاتحين بقهم راح ضارب طلقة في الهوا

هوب الكل بيجري ويحمل القوارب وينط فيها

كأنه فيلم من ايام الصورة السريعة بتاعة شارلي شابلن

وبرضه حاجة شديدة المصرية حصلت

انهم في ساعتها غيروا الادوار يعني الرائد اسامة حل محل النقيب

حسن وعبر هو مع الناس اللي كانت مبلمة ومرة واحدة صابتها الحماسة

والنقيب حسن هو اللي استنى مع بقية المجموعة

تلات قوارب في الكنال فيهم قارب ضابطنا واقف في وسطه

ورافع علم مصر وبيغني بصوت عالي: والله زمان يا سلاحي

والجنود بيقولوا الله اكبر الله اكبر

ههههههههه

ده اللي قالوا لهم ما تهللوش؟

والنقيب حسن وبقية الجنود اللي معاه بيقولوا الله اكبر الله اكبر

وهم واقفين على الشط

طبعا المفروض انهم كانوا يستنوا الرائد اسامة واللي معاه لما يوصلوا

وبعدين يركبوا هم القوارب

لكن هم مين نطوا في القوارب وراهم على طول

طبعا كان ممكن قوي كتيبة من العدو تضرب عليهم وتخلص المعركة

بس ربنا سترها ووصلوا من غير خسائر خالص

ما تفهمش ازاي

المفروض ان اللي يعدي الكنال ده يتحرق بالنابلم على طول

وهم كانوا عاملين حسابهم على كده عشان كده الدفعة الاولى

كان المفروض تتحرق وتنط الدفعة التانية بعدهم

والعدو مشغول بالدفعة الاولى

وكده يعني

بس هم ما سمعوش الكلام وربنا سترها معاهم كده من غير

اي مبرر غير ان ربنا بيسترها

لقوا نفسهم عند الحاجز الترابي على الضفة الشرقية

ياااااااااااااا مش مصدقين نفسهم

كان ضابطنا اسامة اخد تعليمات بانه ياخد معاه سلالم

عشان لما يتسلقوا الحاجز الترابي بالمعدات ومدافع الهاون تبقى سهلة

هو شايف الحاجز من بعيد قال ولزومه ايه بس السلالم ح تبقى تقيلة على

القوارب والجند ح يتلخموا فيها احنا نطلعها على رجلينا

بس لما وصل وتسلق الحاجز الترابي بيقول عرفت اني كنت غلطان

وان تسلق الحاجز صعب قوي وكان لازم له سلالم والجنود مش ح يعرفوا

يطلعوا بكل المعدات اللي معاهم

وهو عمال يقرع في نفسه ويقول ايه اللي خلاني ما سمعتش الكلام

هلكنا هلكنا وقرر انه يدور وشه عشان ما يشوفش الجنود وهم

بيتدألجوا في القناة بالمدافع اللي شايلينها

فوجئ بالجنود شايلين البلاوي المتلتلة اللي معاهم

وطالعين صواريخ على الحاجز ولا كأنهم شايلين نملة وبيجروا بيها

والغريب انهم وصلوا عنده من غير ما يسمع صوت واحد بينهج

ولا اصابهم اي احساس بالتعب ولا استنوا ثانية ياخدوا فيها نفسهم

المفروض انهم يمشوا لحد تبة يضربوا منها العدو

بس يعني مش معقول الستر لحد دلوقت يعني اليهود

لو اهل الكهف كانوا صحيوا على الهيصة دي كلها

ابتدا العدو يقصفهم

ولا الهوا ماشيين كأنهم بيجروا في التراك

وكأن القصف اللي نازل عليهم ده ورد وفل

لحد ما وصلوا التبة المحددة

بيقول كاتب الكتاب ان حالة الهلع وضربات القلب المتلاحقة

اللي حصلت لهم قبل ساعة الصفر تلاشت وحل محلها حالة هدوء تام

وبيتمشوا على الحاجز الترابي بمنتهى الهدوء وكل واحد بيحفر لنفسه

حفرة عشان يختبئ فيها من النيران

!!!!!!!!!!!

بعد كل اللي نزل ده على دماغهم لسة بيفكروا يختبئوا من النيران وبيحفروا

بمنتهى الهدوء

تعليمات قائد المفرزة الرائد اسامة انهم ما يضربوش على اول دبابة

للعدو لان ده معناه انقاذ كل الدبابات اللي وراه

قال سيبوهم لما يعدوا نضرب عليهم كلهم

جات لهم اخبارية باللاسلكي ان الدبابات ابتدت تتحرك عليهم

وابتدت المواجهة ما بين اللحم والحديد

والطيارات الاسرائيلية عمالة تقع من قصف المدافع المصري

قائد الكتيبة زعق له في اللاسلكي: مستني ايه اشتبك

ضرب على الدبابة وفعلا حجزت الدبابات وراها

زي ما الضابط اسامة كان متوقع وعشان كده كان عايز يأخر الاشتباك

بس شوف يا اخي ستر ربنا مرة تانية

الدبابة اللي ورا الدبابة اللي انضربت جات تلف عشان تخرج من المزنق

غرزت في الملاحات وكل ما تتحرك تغرز

لحد ما نط كل اللي فيها منها بقى من الرعب

واسمع يا عليوة صويت مائير زي ولية من السبتية

بالترقع بالحياني: ياناس غيتوني الراجل رقعني بالطاسة على راسي

طيروا اربع دبابات واربع مدرعات الطيران الاسرائيلي جه يقصفهم

راح واحد بمدفع كتف ضرب عليهم قام جريوا

هههههههههههههههههههه

جود عليوة باد مائير

كل عام فانتوم بخير

على الساعة اربعة كان اقتربت المفرزة من تحقيق الهدف

وهو تدمير خمسين في المية من قوات مشاة العدو

بس انجزوا المهمة بنجاح وابتدت المفرزة تتصفى من ابطالها

واحد ورا التاني بيقعوا شهدا

مشاة العدو صحيح اتدمرت نص امكانياتهم بس ام الغل بتاع الصهاينة

بعتوا مدفعية نزلت عليهم بالذات ضرب غير انهم كانوا عايزين يأسروا القائد اسامة

قائد الفرقة ابتدى يتوتر وامرهم بالتقهقر بس العدو سامع الاتصالات

ولو تقهقروا ح يحاصرهم من ورا وح يقضي على كل الوحدة

كل ده والمدرعة جاية عليهم والضباط الاسرائيليين: قائد مصري سلم نفسك

بيقول مش عارف منين جات الضربة من سلاح ار ب جي

ومش عارف مين اللي ضربهم ودمرهم عن اخرهم

وطبعا رقعوا بالصوت كالعادة

مع ان المصريين كانوا بيقعوا شهدا ولحد دلوقت استشهد من المفرزة بس

سبعة بس كل مرة واحد يستشهد يقول كده: آه

آه دي بتاعة شكة الدبوس عارفينها

اهي هي دي

ويقع وخلاص

تدمر مدرعة العدو يبعتوا التانية ومصممين على اسر القائد اسامة

وجايين ناحيته هو بالذات

كبرت في دماغ الجنود بقوا يجروا عليه عشان يحموه

وهو يصرخ فيهم: انبطحوا على الارض بلاش جري

واحد منهم الطلقات تخترق جسمه وهو لسة بيجري

كانت طلقات فسفورية بيقول انه كان بينفضها

كانها تراب ويجري عليه عشان يحميه لحد ما ارتفع شهيدا

رحمه الله كان اسمه احمد

زي نص المصريين يعني

===

النقيب عصام من نفس كتيبة الرائد اسامة وقائد سرية ثانية

مهمته الوصول لاحتلال لنقطتين من نقاط العدو

كل ما يجوا يتقدموا نحوها العدو يضربهم من خلال الفتحات

اللي في خط بارليف

اصلهم كانوا فاتحين مزاغل في خط بارليف وبيقاتلونا

من وراء جدر

الضابط اللي خلف الدبابة مش متشاف بس فوهة المدفع

يا سيدي جدر جدر

بالشفا عليهم نط الجنود من غير اوامر من حد

على فوهات المدافع في حركة مفاجئة

هوب هوب كل واحد بيرمي نفسه عشان يصد بجسمه

ضرب المدافع ويأمن للنقيب عصام وفرقته الوصول للهدف

كاتبنا بيقول كل فتحة عليها مش اقل من عشر جثث للشهدا

كل ما يلاقوا الجثث مش كافية يرموا نفسهم تاني

لحد ما الضباط الصهاينة احتاسوا وبقوا يزقوا الجثث

بمواسير المدافع ومش عارفين وكل ما يزقوا شوية

يلاقوا اللي نط لهم على فوهة المدفع تاني وتالت وعاشر

عدوا من المزاغل؟

عدوا منها بس بينهم وبين الهدف حقول الغام

ولاد الشياطين مش سايبين حتة الا لما مفخخينها

نط يا عليوة انت وحمدان وحسنين ووووو

فوق الالغام وفرتكوا الالغام باجسادهم الطاهرة

برضه من غير تعليمات

كده تطوع

ييييييييي

اديني باعيط اهو

المهم

لحد ما احتلوا نقطة العدو بعد ما زرعوا الغام لدباباته

دخلوا النقطة كان فاضل فيها كام حلوف

قزقزوا فيهم كده لحد ما خلصوا

وشوية هربوا وهم بيعملوا اييييييييييييه؟

ايون

بيرقعوا بالحياني

سبع نقاط للعدو سقطت بنفس الطريقة وببسالة

المفرزة اللي احبوا لقاء الله فاحب لقاءهم

الطيران في الجو

والمشاة على فوهات المدافع

والقوات البحرية في العريش

والعدو ح يتفقع نازل تخبيط وهبد ورقع في كل اتجاه

زي الصرصار الكبير اللي بيطير المرشوش

ولسة القائد اسامة بيقول لجنوده احفروا اعمق عشان

العدو عايزنا احنا بالذات

واذا بصاروخ وسمع طقطقة الخوذة وآه السريعة

بتاعة الجند والدم سايح من راسه

وتلاوة الشهادة من كل اتجاه وهو تلى الشهادة

وصوته مش طالع

وهو مرمي لقى مقاتل جاي بيهزه وبيقول له

قوم ح يفعصو...آه

الدبابة فرمت زميله ودراع الضابط اسامة

ضابطنا غاب عن الوعي وشه مرمي على الرمل

وشاف وهو غايب عن الوعي وشوش زمايله

وهي طايرة بتحيط بيها حاجة زي الفقاعة

طبعا هو ما كانش لسة عرف مين اللي استشهد ومين اللي عاش

بس في الرؤيا دي شاف كل اللي عرف بعد كده انهم استشهدوا

وشوشهم مبتسمة وحواليهم كائنات بأجنحة كتير

وهو واقف بيقول لهم: ما تسيبونيش خدوني معاكوا

او ارجعوا لي

وسمع صوت من وراه بيقول له: لا ح يرجعوا ولا انت

ساعتك جات اهدى يابني لا تحزن ان الله معنا

بيبص وراه لقى ناس لابسة ابيض

كل ده وهو مرمي على وشه في حالة غياب عن الوعي

بيقول مش عارف استغرقت قد ايه

ما فاقش غير لما حس ان حريقة في ضهره

فوجئ لقى ضهره والع نار وراسه بتنزف

ودراعه مصاب من مفرمة الدبابة

قعد يتدألج من على التبة عشان يطفي النار للي في ضهره

بيبص لقى دبابة جاية عليه عايزة تدهسه طبعا

ستر ربنا دبابة مصرية ضربت عليها

نط منها ميجور اسرائيلي النار ماسكة فيه

وفي عز ما الرائد اسامة في اصابته

لقى نفسه بحركة لاشعورية بيحاول ياخد رمل يطفي بيه

النار الوالعة في الميجور الاسرائيلي

وهو بصرخ وبيقول: ليه عملتوا فينا كده؟ حرام حرام

لقى واحد بيجري عليه وبيقول مين اللي بيصرخ الرائد اسامة

قال له انت مسعد

قال له ايوة يا فندم

قال له اخليني

قال له اخليك ايه الدنيا والعة نار

وبعدين حكى له ان صاروخ مدرعة الدبابة الاسرائيلي

بعد ما قتل شوية جنود انفجر في نفسه وموت كل اليهود

اللي في المدرعة

زحف الرائد اسامة لحد ما وصل على الشط

وكان معاه مصاب تاني قعد يطلب المساعدة بصوت عالي

لحد ما بعتوا لهم قارب ينقلهم

وصلوا للشط الغربي

وواحد من الجنود اسمه ابو سريع شاله زي البيبي

على كتفه وقال له افديك يا سعادة الرائد عشان لو قابلنا

لغم اخده انا بدالك

بس لو قابلوا لغم الاتنين ح يموتوا بصر النظر هو شايله

وللا حاطه

المهم انهم وصلوا من غير الغام للجنود اللي غسلوا له وشه

وبعدين ركب لوري

وبعدين وراح على البلاح

عشان ناس تانية تستلمه وتنقله لمستشفى يتعالج

ايه بقى المكافئة اللي حظى بيها المقاتلين العظام دول

هذا ما سنعرفه في الحلقة القادمة

بالعند فيك يا ابو الدراويش

------

ملحوظة: شايفين البوست الطويل ده؟

ده تلخيص التلخيص وتلخيص مخل جدا

لوصف معركة لحم وحديد

وسرد اللي شاف بعينه غير سرد اللي قرا في كتاب

يااااااا

ياما نفسي الكتاب ده يبقى في ايد كل عربي

ويدرسوه في المدارس كمان

الناس والحرب8: معركة لحم وحديد

الحقيقة التعبير ده مش اختراعي

ده ابتكار المشير احمد اسماعيل وزير الحربية وقتها

ابتدت الاستعدادات للحرب

وابتدى كل قائد فرقة يدلي بدلوه ويقول هو يقدر على ايه

كلهم فرحانين بعيالهم

وعيالهم واثقين من نفسهم وريقهم بيجري

عشان يدخلوا حرب الصعايدة

تقدم قائد فرقة ضابطنا ودخل سأل على الرائد اسامة

قائد السرية الثالثة مشاه ميكانيكي بالكتيبة

537

اللواء

136

وقال له: لو ح تبقى قائد مفرزة متقدمة على قواتنا

مسافة من ستة الى سبعة كيلوا وبينك وبين القوات الرئيسية

قناة السويس ومش معاك عنصر مدرع كل اللي معاك مائة

جندي وعشرين سرية هاون وسرية الم/د وفصيلة صواريخ فهد

مضادة للدروع وجماعة "حية" صواريخ سترلا او سام سبعة

وفصيلة مهندسين وفصيلة قاذفات لهب

دي المعطيات

الموقف: هو انك عديت القناة باقل الخسائر بعد اقل من ساعة

العدو هاجمك بسرية مشاة ميكانيكي ودبابات

ها يا بطل اشرح لي بقى المعركة ح تكون ازاي

طبعا ضابطنا اجاب بصراحته المعهودة: دي معركة

مش متكافئة يا فندم

قال له ليه فاجابه الضابط اسامة بانهم مش ح يقدروا

يقضوا على اكتر من خمسين في المية بس من قوتهم

وما معناه بعد كده احنا باي باي

قوم يقول ايه: طيب ما كويس كده

كفاية قوي خمسين في المية من قوتهم

بعدها

فوجئ الضابط اسامة بواحد بيقول له

قائد الفرقة بيقول لك تعالى وهات راديو ترانزيستور معاك

سمع الكلام وراح لقى القائد ومعاه راجل غلبان بجلابية

ادى التحية لقائد الفرقة ومسى على الراجل الغلبان

يعني كنوع من التواضع

وركب اللوري معاهم

وصلوا لشط الكنال وطبعا طول السكة

كل ما الراجل يتكلم ويفتي ضابطنا يبص له

ما معناه انت مالك انت يا جدع

وبعدين فوجئ ان قائد الفرقة بيقول له

علي الراديو يا اسامة على الاغاني على الاخر

وابتدى يشرح للراجل ابو جلابية

يا فندم ح نعمل كذا وكذا

قام الراجل ابو جلابية قال له: مش معقول يا فؤاد

المفرزة كده حتتفرم منك المعركة دي ح تبقى

لحم قصاد حديد فقال له يا فندم ما احنا

ح نمدهم بعد كده بمدرعات

بص لضابطنا وقال له: انت فاهم مهمتك كويس

فهز راسه وهو عمال يقول هو الراجل ده بيكلم القائد

كده ليه

رجع لما صاحبه سأله قال له لا الظاهر فيه شخصية مهمة مع القائد

وكان عايزني اقابلها

قال له مين

قال له مش عارف بس شكله كده حد مهم

طلع انه المشير احمد اسماعيل

همممممممممممممم

بقى كده الصورة اتضحت

خطة العبور كانت معتمدة على العمليات الاستشهادية

هم ما خبطوهاش كده في وشهم

بس التانيين مش اغبيا يعني

الدفعات الاولى لعبور القناة واقتحام خط بارليف

دفعات لحم قصاد حديد

كان معمول حساب انها ما ترجعش تاني

رايحين يموتوا

مش بس كده لما حمى الوطيس

اندفع الجند عشان يأمنوا طريق للدبابات والقوات

اللي جاية بعدهم

الطريق مزروع الغام

والكنال مزروعة نابلم

وخط بارليف مزود بفتحات خارج منها فوهات

مدافع

عشرات بل مئات بل الاف من الجنود

رموا نفسهم على حقول الالغام

لان الاتحاد الزفتتي ما كلفش نفسه يدينا

كاسحة الغام بتلاتة مليم

الظاهر بقى ماكانتش على ايام الحرب العالمية التانية

الجند بقوا ينزلوا قاع الكنال عشان ياخدوا الضربات

اللي طالعة من بطنها ويأمنوا طريق للقوات اللي ح تعبر

القوات اللي عبرت

كتير من جنودها رموا نفسهم على فتحات خط بارليف

واحد يرمي نفسه على فوهة المدفع

فالجنود يلاقوا ان جثته لوحدها مش كفاية

يروح واحد تاني رامي نفسه فوقيها

مش كفاية

تالت رابع عاشر

عشرات من جثث الشهداء ملت فتحات

"مزاغل"

خط بارليف

مئات رموا نفسهم على الغام الجانب الشرقي للقناة

القناة نفسها كان لونها احمر من الدم

مش المشكلة في اول واحد رمى نفسه على اللغم

المشكلة في تاني وتالت وعاشر واحد

اللي قدام عنيه شايف زمايله اللي اكل وشرب معاهم

وهم بيتفرتكوا ومع ذلك ينط وراهم

===

فيه داعية مسبسب له شوية الاضيش كده

ما وراهمش حاجة غير يشتموا اللي ينتقده

وهو اساسا خنيق هو والبلطجية بتوعه

مش مهم

ومش مهم كمان انه في عز فضيحة سرقات

ابراهيم نفخو الشهير بابراهيم نافع

استضافه ولبسه طاقية وجلابية بيض

وخلاه يتكلم عن حب الله والرسول

ولا مهم انه بينقي الحرامية بالذات

خصوصا بعد ما يقضوا الحكم عشان يغنوا له

مقدمات برامجه

المهم انه كتب في الواشنطن بوست

يقول ان العمليات الانتحارية حرام وليست من الاسلام

في شيء

يا للهول

يعني من شهرين بس كان بيقول انا مش بافتي

ماله ومال الفتوى

يعني هو عايز يفهمنا ان الاف الجنود

اللي رموا نفسهم على الالغام في حرب

تلاتة وسبعين ح يروحوا النار؟

هم ذنبهم ان السادات باع دمهم وصالح اسرائيل؟

عايز يفهمنا ان المجاهدين الفلسطينيين والفلسطينيات

من اول سناء محيدلي لحد اخر عملية استشهادية

ح يروحوا النار؟

هم ذنبهم ان الفصائل استغلت تضحياتهم

عشان تتصارع على السلطة وتشعل حرب اهلية؟

امال نعمل ايه يا سكمنس عشان نخش الجنة؟

نزرع السطوح بطاطس

ونزرع قرعتنا شعر

ونجاهد في لندن؟

طيب بقى لولا العمليات الاستشهادية

واللي بيسميها ناس كتير

عمليات انتحارية

لولاها ما كناش انتصرنا في حرب تلاتة وسبعين

اساسا اساسا

خطة الحرب كانت معتمدة على العمليات الاستشهادية

زي ما قلنا قبل كده

من خلال حرب الاستنزاف تيقن القادة

ان امكانياتنا اللوجستية اقل بكتير من اسرائيل

لكن امكانياتنا الانسانية اضعاف اضعاف اضعاف

العدو اللي كل ما يتفرقع جنبه بمبة يرقع بالحياني

هم فهموا الدرس ده كويس

ومن ساعتها وهم بيخربوا في الانسان

وبيزرعوا فيه الهزيمة

وبيسموا الاستشهاد انتحار

وبيسموا الاستبسال ارهاب

وزاقين علينا ناس من اهلنا وناسنا

بعلمهم او من غير علمهم

يتبولوا ويتبرزوا في ودانا ودماغنا

بالكلام الفارغ ده

ولسة من شهر وللا حاجة واحد بيقول لي

هو ليه ربنا كده عايزنا نستشهد ونموت

ما يسيبنا نعيش

وبقت ثقافتنا اللي بتقول: من لم يمت بالسيف

مات بغيره

بقت حنجوري

وليس بالحنجوري وحده يحيا الانسان

ومن بعد حرب تلاتة وسبعين

ولما اسرائيل لاحظت انها ما تقدرش تقف

قدام القنبلة البشرية

قررت انها تنزع فتيلها وتخصي رجالنا

وتملاهم بالجبن والغباوة والدناءة

وتسميها واقعية

واذا كان الايمان هو اللي بيخلينا نستشهد

يبقى مافيش مانع يعملوا لنا ايمان

حلو كده وامور ومقطقط

وشه بيلمع وشعره مسبسب

واخره يزرع السطوح

تفاصيل المعركة في البوست القادم

الناس والحرب 6: ولا يطلوه العدا مهما الامور جابت

انا في التدوينة دي مش ح اهاجم عبد الناصر كعادتي

مش عشان غيرت رأيي لا سمح الله

بس احتراما لمشاعر الجنود المصريين

اللي اتقطموا بخبر وفاته

برغم كل حاجة ضابطنا

"الصادق"

قال لي انا باحبه وح افضل احبه مهما كان

بعد مبادرة روجرز اللي الرائد

- في وقتها -

اسامة الصادق بيقول ان الجيش ما كانش راضي عنها

توفي الرئيس جمال عبد الناصر

ضابطنا بيقول عمري ما حسيت الاحساس ده

ولا عمري شفت الجند شكلهم كده

زي الطفل اللي اتخطف من امه

وكأن سنهم كبر اربعين سنة

روحهم المعنوية نزلت في الحضيض

بعد ما كانوا مقبلين على التدريب

وكان الشيء اللي بيزيد حماسهم

انهم كانوا بيتفاجئوا بيه وسطهم جاي بعربية جيب مهكعة

وبيضحك معاهم

ويقول لهم الحرب الجاية ح تبقى حرب صعايدة

حرب التار ولا العار

كمان لما قابلته حكى لي حكاية ما كانش كاتبها في الكتاب

بيقول لي مرة من المرات بيلف عادي وسط الجيش

وهو كان طبعه انه يمشي ما يخافش

وما يهموش الحتة دي فيها الغام فيها عفاريت زرق

اول ما بص لقوه وشه اتقلب وبيزعق: ايه العك اللي انتوا

عاملينه ده

بيبصوا على اتجاه بصره لقوا قاعدة معمولة على ارض زراعية

قالهم فين صاحب الارض دي

نادوا عليه راجل غلبان قوي موت

حط ايده على كتف الراجل وقال له طبعا انت زعلان

الراجل الغلبان قال له لا يا افندي

احنا فدا الجيش

فواحد من الرتب قال له: نعوضه يا سعادة الريس

قال له: تعوضوه بايه؟ ايه اللي يعوض الفلاح

عن عود واحد في ارضه

الارض دي ترجع له وتتصلح وترجع زي ما كانت

واياك حد يقطع عود اخضر واحد في اراضي الفلاحين

====

الحاجات دي علقت قلوب الجيش

- بالذات العساكر -

بيه مع انه..يييييي

اسكت يا لساني

المهم ان الرائد اسامة الصادق

بعد فترة حزن فاق لنفسه ولوحدته لقاهم

مش شكل جيش ابدا

استجمع نفسه ولم جنوده وقال لهم

اللي يحب عبد الناصر يكمل مسيرته

تفتكروا هو راضي عننا دلوقت واحنا عاملين كده

تفتكروا هو يحب الجيش اللي هو دربه واعده

وبناه بنفسه انه يتهزم؟

فواحد من الجند قال له: ايه اللي بتقوله ده

امال لو ما كانش سلم عليك وقعد معاك وضحك وهزر

قال لهم يبقى عبد الناصر ح يزعل مننا دلوقت

ويبقى احنا خناه لما سيبنا نفسنا للحزن

من هنا ها ومن هنا ها

لحد ما الجنود تحاملوا على نفسهم ورجعوا للتدريب تاني

اول ما مات عبد الناصر اتغيرت طبعا القيادات

وجابوا قائد ما يفهمش طظ من سبحان الله

طبعا كاتب الكتاب راجل مؤدب وما بيكرهش حد

زي ما انا ذكرت قبل كده

كل اللي قاله ان القائد الجديد كادر اكاديمي

لكن مالوش خبرة في العمل العسكري الميداني

كمان بتاع شللية ووسايط وبيحب لحس الجزم

والجنود اللي بيتملقوه

هههههههههههههه

السادات بقى وقياداته

ولازم لما الواحد يقول السادات

يضحك

اتصاحب القائد الجديد على شوية عيال

اسكندرانية عرفوا ياكلوه بكلمتين

اما ضابطنا فقرر انه يبقى على الحياد

لا يعادي ولا يصاحب

ولو انه كان واقف في زور القائد الجديد بالعرض

وطبعا كالعادة ضابطنا شخط فيه شخطتين

اصله كل ما ربنا يرازيه بقائد عايز يذله

يطلع في زوره زي الصاروخ ويخليه ما يسواش تلاتة نكلة

بالادب برضه

المهم ان القائد الجديد ده مرة واحدة قلب على النقيب حسن

اللي كان مصاحبه في فترة من الفترات

وكان عايز يستغل الرائد اسامة في انه يذل النقيب حسن

ويطلع عينه

بس النقيب حسن والرائد اسامة فهموا قصدوا

وعرفوا ازاي يخيبوا ظنه وكل ما يطب على الوحدة

يلاقي النقيب حسن كويس مافيهوش حاجة

لا واخد جزا ولا متعاقب ولا اي حاجة

يقوم يزعق للرائد اسامة: هو ده اللي باقول لك اتوصى بيه

الرائد اسامة: اتوصى بيه على ايه راجل ملتزم وبينفذ الاوامر

وممتاز في التدريب ومن اكفأ العناصر عندي

اعاقبه من غير سبب؟

راح حاططهم هم الاتنين في دماغه

هههههههههههههههههههههه

سبحان الله

كل زعيم بيجيب قيادات شبهه

جمال كان بيجيب قيادات ديكتاتورية وعنيفة

بس سبحان الله محبوبة

والسادات كان بيجيب قيادات

هههههههههههههههههه

اللي هو

ههههههههههههههههههههه

يعني عامل عقله بعقل نقيب

ههههههههههههه

لسة بقى ح نتكلم لما الضابط اسامة شاف

احمد اسماعيل وزير الحربية

وعمل معاه زي الاستاذ حمام ما عمل مع الباشا

في فيلم غزل البنات

=====

اه كان فيه حد بيقول انه ممكن يشتري منه

حقوق النشر عشان ينزله بي دي اف

على النت لان الراجل يا جماعة طابعه على حسابه

وده ظابط جيش مش حرامي ولا رجل اعمال

ولا في لجنة السياسات

طيب اذا كان كده يبقى نتصل بيه

او اللي يقدر يشتري منه الحقوق يتصل بيه

وينزل الكتاب كامل لان المطبعة شطبت حاجات

مهمة قوي من الكتاب

حوالي تلتميت صفحة من اصل الكتاب

عموما هو منزل تليفونه على الكتاب

اهو

0127970032

وارضي

6074525

ونشوف ممكن النص الكامل للكتاب يتنشر

على النت بالاتفاق معاه

اسمه العقيد اسامة علي الصادق

خط ساخن لضحايا التعذيب

والنبي البت بلوس ستون دي بنت حلال مصفي

سايبة لي تعليق وبتقول لي فيه

حاجة تتعمل غير الكتابة

وانا باقرا كلامها فتحت على الميل

رسالة وائل عباس اللي بيقول ان بقى

فيه خط ساخن لضحايا التعذيب

:نصر الرسالة اللي جات لي اهو

افتتاح الخط الساخن لعلاج ضحايا العنف 9/8/2007
أخى المواطن:
إذا تعرضت للتعذيب أو علمت بوقوعه لاحد أصدقائك أو جيرانك يمكنك الاتصال على أرقام الخط الساخن لمركز النديم للعلاج والتأهيل النفسى لضحايا العنف . لن نكلفك إلا بداية المكالمة ثم نتصل بك فورا خدمة الخط الساخن متوفرة على مدار 24 ساعة يوميا على الارقام التالية 0164004012 - 0164004013