وقع من أجل تحرير المعتقلين

كلنا مع حرية الصحافة بلا قيود

ولكن هناك فرق بين حرية الصحفي

الملتزم بميثاق الشرف الصحفي

الذي ينص على الحيادية وحماية المصدر وعدم إثارة المشاعر السلبية لدى المتلقي

ناهيك عن التحريض الأمني

وبين الصحفي الذي يبحث عن الإثارة والاستثارة حتى وإن كان على حساب حرية المواطنين وكرامتهم

ومهنة الصحفي تختلف جملة وتفصيلا عن مهنة المخبر

فمهمة الصحفي عرض الحقائق بحيادية من أجل الصالح العام

أما المخبر فمهمته - خاصة في مصر - تلفيق التهم وتتضخيم الصغير وتصغير الضخم للحصول على علاوة

ما فعله المصري اليوم يخل بميثاق الشرف الصحفي

ويتعمد استثارة آلة القمع الأمنية ضد طلبة جامعة الأزهر

دلوقت واحنا منتظرين الأعياد

أولياء أمور الطلبة ما بيناموش ولسان حالهم: عيد بأية حال عدت يا عيد

شباب 18 سنة في السجن في البرد ده

كل جريمتهم إنهم عبروا عن رأيهم

تختلف أو تتفق معهم

تبقى معاهم أو ضدهم

بالكلمة والحوار

مش بالتحريض الأمني

اللي بيحصل ده ضدنا كلنا

لو سكتنا على اللي بيحصل للإخوان

في يوم ح نلاقي نفسنا مكانهم

وما حدش يقدر يفتح بقه ويدافع عنا

مدام وافقنا في يوم على أن تمارس الصحافة مهمة المخبر

مدام وافقنا في يوم على إن اللي يعبر عن رأيه يتصفى

مالناش عين بعد كده نطالب بحريتنا

ولا بحقنا الدستوري في التعبير عن رأينا

اتكلموا ما تسكتوش

النظام بياكل الحتة الكبيرة عشان يتفرغ لبقية التيارات وينقنق فيها على مزاجه

لتوقيع العريضة اتبع هذا الرابط

http://www.petitiononline.com/masry/petition.html

ملحوظة: العريضة مكتوبة بكل أدب

لدرجة إني اتنقطت

لا أستثني منكم أحدا

الدولة تصفي الأخوان المسلمين،

تماما، فإلى جانب اعتقالها لرجال الأعمال الذين يمولون الحركة، فقد قرر الأزهر تعيين أساتذة في المدينة الجامعية، لمراقبة الطلاب وعد أنفاسهم واختلاجاتهم، محاكم تفتيش على الطلبة يعني

كما أعلن وزير الأوقاف الحرب على جماعة الإخوان

يعني بيمارس حرية الرأي اللي كان بيمارسها وزير الثقافة

وأنا في المناسبة السعيدة دي لا أتوجه بكلمة للحكومة المصرية

ولكنني أتوجه إلى التيارات السياسية والصحفيين والكتاب وناشطي حقوق الإنسان

دعاة الحرية والديمقراطية

الذين دافعوا عن "حق" وزير له سلطة ونفوذ في ممارسة إرهاب المواطنين بدعوى حرية الرأي

ويدافعون عن حق المواطنين البهائيين في الإعلان عن أنفسهم

أتوجه لهم جميعا

كل من شارك في هذه المذبحة

بالتحريض الأمني

بالقول

أول الفعل

أو الشماتة

أو تشجيع الدولة كروماني يشجع أسدا جائعا على التهام إنسان

أو الصمت المطبق والطناش

وأتقدم لهم بخالص ازدرائي

واشمئزازي

واحتقاري

وكل البصاق الذي في فمي

وكل القيء الذي في معدتي

لوجوههم المنحطة المنافقة المدعية الفاشية

كلاب السلطة

أولاد القحبة لا أستثني منكم أحدا

وهذه المناسبة السعيدة تظهر عدة حقائق

إلى جانب أن التيارات السياسية الأخرى زائفة ومنافقة وإرهابية

أولها

أن الأخوان يمولون من قبل رجال أعمال مصريين

وأعترف أنها كانت مفاجأة بالنسبة لي فقد كنت أعتقد بصحة ادعاءات أولاد القحبة بأن الأخوان ممولون من الخارج

(السعودية وإيران..بالرغم من تناقض مصالح الدولتين)

كما اكتشفت مؤخرا أن هؤلاء المستثمرين المصريين

إلى جانب تمويلهم للأخوان فهم أيضا يمولون مرضى السرطان وعدد هائل من الأسر الفقيرة

وأن اعتقالهم سيخرب بيوت كثير من مساكين مصر

بينما اعتقال رجال الأعمال من ممولي تيارات أخرى سيخرب بيوت محلات الخمر ومصانعها وفتيات الليل

يا فسدانين وسكرانين

يا مسطولين رجلين وراس

هذه المذبحة ارتكبت بـأفواهكم وألسنتكم وأيديكم اللي عايزة قطعها

هذا وأنتم لا تعدون كونكم تيار معارض قوي بفعل الدولة وتغذيتها

أمال ح تعملوا فينا إيه لو لا قدر الله مسكتوا البلد

الاتهامات الموجهة للأخوان منها تدريب العيال على الكراتيه!

وإيه كمان

وإعدادهم للسفر إلى بؤر الصراع مثل فلسطين والقتال هناك ضد إسرائيل

مكتوب كده في الجرنال

يا أولاد القحبة لا أستثني منكم أحدا

العيال المقبوض عليهم متهمين بالعداء لإسرائيل

حتى الدولة لم تتهمهم بأنهم بيعدوا لأعمال عسكرية داخل مصر

حتى الدولة اللي تقدر تلفق تهمة جماعة إسلامية للبابا شنودة

قالت إنهم عايزين يحاربوا في فلسطين

ممكن تفوقوا شوية من السكر وتكلموني

إنتوا بتناموا إزاي؟

واللا الخمرة موتت مشاعركوا

طبعا مش ح أقول إن ربنا ح يسلط عليكوا آلة الظلم اللي حركتوها بكل فاشية تجاه ناس لمجرد إنهم مختلفين معاكوا
وناجحين في استقطاب الناس وانتوا بضيانين وفشلة

لأنكم ببساطة ما تعرفوش ربنا

بس هو يعرفكوا

على الله أشوفكوا مكانهم

ولو إني عارفة قلبي الوسخ وح تصعبوا عليا برضه

أنا فكرت أحط لينك لقصيدة نجيب سرور عشان تشوفوا نفسكوا في مرايتها

بس للأسف نجيب سرور كان مؤدب

قاموس البذاءات العالمية كله لا يستطيع أن يصف دناءتكم

إتفوه

هي إيه حكاية الصومال

يا اخوانا الصومال طلعان تلاتينها

ماحدش سائل فيها ليه

من أكتر من عشرين سنة

إسرائيل قالت إنها بتنسق مع إثيوبيا عشان تتحكم في باب المندب

وقالوا ببجاحة

والخبر على فكرة في أرشيف ماما (أصل امي عندها ارشيف)

قالوا احنا سيطرنا على قناة السويس

مش ناقص غير نسيطر على الصومال عشان نتحكم في باب المندب

طب إيه؟

إيه يعني؟ ح نسيبهم كده؟

يجي واحد يقول لي: تعرفي تقعدي لنا في حتة ناشفة؟ هو احنا كنا عرفنا نعمل لغيرها لما ح نعملها هي؟

آه احنا كنا بنتكلم، يعني بنجيب سيرة لبنان، وسيرة فلسطين، وسيرة العراق

مش بنعملهم حاجة ازاي

مش بنتكلم عنهم يعني؟ ونس ده وللا مش ونس

مجهود ده وللا لا؟ مش فيه عصبية طالعة في الكلام؟

طب اشمعنى الصومال يعني مافيش اي عصبية طالعة في الكلام

دول ايام ضرب لبنان طلعوا في مظاهرات وما نسيوش يقطموا اللبنانيين ويقولوا في المظاهرة إنهم واقفين جنب لبنان بالرغم من تخلي العرب بما فيهم لبنان عنهم

طب إيه؟

إيه؟

أنا مستعدة أتفائل

الصديق محمد جمال عايزني أتفائل

الحقيقة هو كمان مالوش ذنب أقعد أندب فوق دماغه وأقر

والناس عايزة تفرح أو على الأقل يبقى عندها أمل أنها ممكن تفرح في يوم من الأيام

وأنا من الناس والله، مش من النسناس

وعايزة أتفائل

فضلت أفكر إيه اللي ممكن يبعث على التفاؤل يا بت يا نوسة إيه

لقيت حاجة في مقدمة ابن خلدون تبعث على التفاؤل جدا

ابن خلدون بيرصد ولادة الدول وتدرجها نحو القمة وبدء أفولها وشيخوختها

وبيقول إن كل مرحلة لها مميزات ولها عيوب والاتنين يعدوا من مظاهرها الثابتة اللي ما بتتغيرش

يعني مثلا الدولة اللي وصلت لقمة الحضارة والتقدم والرفاهية

سلبياتها هي انتشار الفساد الأخلاقي والاكتفاء من الدين بالمظهر وفقدان الإنسان للنخوة والشجاعة والإقبال على البضاعة غير اللازمة والتي تنم عن الترف المذموم

كما يكسل البدن فيكسل بكسله العقل وتبدأ الدولة في الأفول وأول نذير شؤم على أفول الدولة المتحضرة هو ظهور طبقة شديدة الفقر في المجتمع المتحضر المتقدم

طيب كل دي حاجات تبعث على التفاؤل، ليه؟

لأننا عندنا كل أمراض المجتمع المتحضر المتقدم بالسنتي والمللي

يبقى ده دليل على إننا مجتمعات متحضرة ومتقدمة

يجي واحد متشائم يقول لي بس احنا ما عندناش أي مظهر من مظاهر التقدم والتحضر التانية اللي قال عليها برضه ابن خلدون

زي التقدم في العلوم والفنون وابتكار ألوان جديدة من الصناعات والدراسات

وإغناء العباد حتى التخمة المذمومة واعتزاز أهل الدولة بعسكرها الذي يهابه القاصي والداني

وتدين الأمم والبلاد بالولاء لهذه الدولة طوعا وكرها

وتحسب لأقوال ملكها وخلجاته ألف حساب

على فكرة دي مش مقتطفات من ابن خلدون

دي تلخيصات أبواب كتير كان بيوصف فيها الدول المتحضرة

طيب واحد متشائم عايز يفسد عليا تفاؤلي

أعمل في أهله إيه بقى؟

الضربة اللي ما تموتنيش....تخرشمني

يا مين يلايمني على رقبة الحمار

اللي قال الجملة السخيفة الكاذبة القاسية اللي بتقول

الضربة التي لا تميتني تقويني

بغل مين اللي قال كده

ده كلام فوق انه ثبت بالتجربة عدم صحته

هو أيضا غير علمي

عمرك شفت واحد أخد علقة سخنة واتكسر وبعد ما خف من الكسر طلع منها زي القرد؟

يعني أنت لو لاعب كرة واتلم عليك شوية بلطجية تغدغوك ح تعرف تلعب بعد كده؟

طيب إذا كان ده في الجسم اللي الطب البشري لقى له أنواع علاج كثيرة ومتقدمة

أمال بقى النفس اللي علومها لحد دلوقت متأخرة حتى في أوروبا والدول المتقدمة

إذا الإنسان بيمر بتجربة قاسية تهري وتاكل من أعصابه إزاي بعد كده ح يبقى أقوى

التجارب القاسية يا إما بتخلي الإنسان أكثر حساسية وشراسة يا إما بتخليه متبلد وفاقد لإنسانيته

يبقى إزاي بتقوي

بقى بالذمة اللي اتعرض للتعذيب في السجن ح يبقى عنده بال وللا خلق وللا صبر زي اللي كان عنده قبل كده؟

أنا ليه قلت على العبارة دي قاسية؟

لأنها بتحمل الشخص اللي بيمر بأزمة نفسية عبء إنه لازم يبقى قوي وممكن هو يكون مش قادر يا نفيسة مش قادر

الناس مثلا لما بتشوف واحد اتعرض لتجربة قاسية بيبقى أكثر شراسة وأكثر تشككا وأكثر استماتة في محاولاته لاسترداد حقه

وبيفتكروا إن دي قوة

بس دي مش قوة خالص ده منتهى الألم

ده واحد بيقول آآآآآآآآآآآآآي أنا تعبان

أو ممكن يكون النموذج التاني إنه يتعامل مع الموضوع كأنه ما حصلش

ويكمل حياته عادي

ويفتكروا إن دي برضه قوة

مع إن دي بقى مش قوة

ولا حتى تعبير عن الألم

ده واحد مااااااااااااات

مات إنسانيا

بيتنفس بينا بس هو خلاص خلص

ومحاولاته لدس التجربة السيئة في العقل الباطن ح تطلع في أشكال مختلفة

زي إنه يحاول يمارس كل اللي مورس ضده بس مش مع اللي اذاه مع ناس يبقوا اضعف منه

زي اللي جوزها بيضربها مثلا فتضرب ابنها

بدل ما تضرب جوزها وتفتح له دماغه

اللي ضربت جوزها وللا حاربته عشان اهانها دي واحدة متألمة بس لسة ما ماتتش

لكن اللي قابلة الاهانة وبتنفسها في ناس تانية

دي ماتت

والاتنين ما بقوش اقوى لما مروا بتجربة قاسية

العيال اللي في الأحداث عمرهم ما ح يبقوا بقوة الاولاد اللي اتربوا في بيوت

عشان كده لازم يتعاملوا معاملة خاصة

ترمم اللي ينفع يترمم منهم

لكن فيه حاجات كتير بتتكسر وعمرها ما بترجع زي ما كانت

مرة محمد الشرقاوي قال لي: كله بيعدي

بس الحقيقة إن مافيش حاجة بتعدي أبدا من غير ما تعلم وتعمل ندبة

عشان كده لازم الإنسان يجنب نفسه أي تجربة سيئة مش جايبة تمنها

فيه تجارب سيئة بتجيب تمنها

زي حاجة تكون لخدمة الناس ويدفع الواحد تمنها عشان في يوم من الايام ح تجيب تمنها

حتى لو بعد موته

يعني أنا مثلا باعرف اقرا واكتب واشتغل واصوت في الانتخابات وارغي كمان واقول رأي

عشان ناس قبلي تعبت ويمكن مرت بخبرات سيئة وممكن يكونوا اتهاجموا واتقال عليهم فسدانين او كفرة

عايزين يعلموا الستات ويساووهم بالرجالة

بس التعب اللي تعبوه والالم اللي اتألموه جاب تمنه

بس إن الواحد يغامر ببكارة جهازه العصبي عشان حاجة مسيرها في يوم من الايام تخلص

وما لهاش اي مقابل يستاهل لا في حياته ولا بعد مماته

اهو ده عين الحماقة

وأنا أم الحمقى

ربنا يشفيني ولو إن

لكل داء دواء يستطب به إلا الحماقة أعيت من يداويها

بس ما فيش حاجة بعيدة على ربنا

هو ربنا عماكوا من شوية

حاجات كتير الواحد ما يعرفش إنه بيحبها قوي غير لما تحصل حاجة كبيرة تلفت نظره ليها

غالبا بتبقى حاجة مأساوية

وأحيانا بتبقى حاجات تبعث على السعادة أو الفخار

ويفضل الواحد فاكر إنه ما بيحبش الحاجة وما يكتشفش إنه بيحبها غير لما الوقت يكون اتأخر

يعني أنا مثلا ما عرفتش إني باحب الأطفال غير لما جوزي السابق اجهضني بالعافية

قبل كده كنت فاكرة إني مش باحبهم وما يهمنيش إن يبقى عندي أطفال

بس بعد الواقعة دي اكتشفت إني باحب الأطفال وبالذات أطفال الشوارع

باحس إنهم أطفال بلا أمهات وأنا أم بلا طفل

عشان كده عايزة أعرف إذا كنت باحب مصر وللا لا قبل ما تحصلها حاجة هي راخرة

أنا أصلي مش عارفة إذا كنت باحبها وللا لا

أنا صحيح ما أقدرش أعيش في حتة تانية غيرها

بس كل اللي نفسي فيه إني أروح حتة أشم فيها هوا من غير سحابة سودا عشان أنضف رئتي

وأشرب مية من غير مجاري عشان أنضف جوفي

وبعد كده أرجع مصر أوسخهم تاني

وكمان ساعات كتير باحس انها بتصعب عليا

مصر يعني

باحس انها غلبانة

بس باتغاظ منها كمان وبابقى عايزة امسكها من ودانها وارجها جامد واقول لها : ليييييييييييييه كدااااااااااااااااا

يا شيييييييييييييييخة بقىىىىىىىىىى حراااااااام علييييييييييييكىىىىىىىىىى

هو يعني إيه مصر؟

مش مصر برضه يعني المصريين؟

طب أنا باتغاظ قوي من المصريين

مع إني زييهم بالظبط

يعني مواعيدي عايمة

اقول لاصحابي ح اجي بعد المغرب

وبعد المغرب ده يمتد لقبل مغرب تاني يوم

وسرحانة ومهيسة برضه زي كل المصريين

مرة ماما ادتني هدوم المكوة وقالت لي وانت نازلة اديهم للبواب عشان يوديهم للمكوجي

نسيت واخدتهم معايا الشغل

ومرة ماما جابتني من قدام الاسانسير عشان كنت رايحة الشغل بشبشب البيت

وباعيط على اي حاجة

واضحك على اي حاجة برضه

وكلمة تجيبني وكلمة توديني

ولما اصلح بين اتنين البخ الدنيا عشان كل ما اسمع حد فيهم اقتنع بكلامه

يعني مصرية حتى النخاااااااااااااع

امال باتغاظ من المصريين ليه لما انا زيهم؟

يمكن عشان برضه طبع المصريين انهم ينتقدوا في غيرهم كل اللي موجود فيهم

يعني زي سواق التاكسي اللي قعد يشتم في وساخة الشوارع وقذارة الشعب المصري وهو عمال يتف وينف من الشباك

طب احنا ليه كده؟

على فكرة دي ملحوظة

ان كلنا بنشتم في المصريين

اللي بيعملوا كذا وكذا

طب اذا كان كل في البلد متضايقين من اللي بيحصل

وبينتقدوه

امال مين اللي بيعمله؟

دايما كل ما حد فينا - بما فيهم أنا - ينتقد حاجة في البلد

افتكر شعبان حسين في وجهة نظر لما كان بيقول: هو ربنا عماكوا من شوية

هو سيادتك مش معانا وللا ايه

أنا؟ أنا مؤمن والمؤمن مصاب

بس أنا نفسي البلد دي تبقى احسن

ونفسي العيال اللي في الشارع يلاقوا حياة احسن

ونفسي احارب اسرائيل واحرر فلسطين

مش لازم يعني الشوارع تبقى نضيفة

اذا اردت ان تطاع فامر بالمستطاع

بس نفسي نرجع تاني زي ايام ابن خلدون لما كان بيقول على مصر: ويبلغنا لهذا العهد عن أحوال القاهرة ومصر من الترف والغنى في عوائدهم ما يقضى منه العجب، حتى إن كثيرا من الفقراء بالمغرب ينزعون إلى النقلة إلى مصر لذلك

مع إنه كان بيوصف مدينة فاس وبيقول إن الشحاتين بيشحتوا اللحمة والسمنة وثمن أضحية العيد!!!!!!!دول الفقرا بتوع المغرب اللي كانوا بيجوا مصر عشان فلوسها كتير وعيشتها احسن؟

بس مع ذلك طباع المصريين ما اتغيرتش من ساعتها

يعني في نفس الزمن اللي مصر كانت غنية قوي كده فيه

المقريزي بيقول ان المصريين جبناء ورغايين ورجالتهم بلطين ومرنخين ونسوانهم شرسات ومسترجلين عشان ما عندهمش رجالة عدلة (هو اللي بيقول مش أنا ) يعني الحال هو الحال

بس ابن خلدون ما قالش علينا كده

بالعكس كان بيحب مصر

يمكن عشان ابن خلدون مغربي

والمقريزي مصري؟

مرة واحد لبناني قال لي احنا بنحب مصر قوي

قلت له على فكرة انت مش مضطر تجاملني يعني لو مش عاجباك مصر ما تضغطش على نفسك

بس هو اكد لي انهم في لبنان بيحبوا مصر

واتنرفز مني لما لقاني مش متحمسة قوي لكلامه

ولما حكيت لصاحبتي السورية هي كمان اتنرفزت مني

وقعدت تدافع عن مصر كانها هي اللي مصرية

الغريب اني مش متعودة ادافع عن مصر قوي

ولما حد بيهاجمها مش بازعل

بس لما لقيت حد من برة بيدافع عنها فرحت

هو الإنسان إيه غير شوية نفسيات فوق بعضيها؟

حكاية تضحك لدرجة العياط

الدنيا كلها تضحك

كل حاجة فيها لو بصينا لها من زاوية ما ح تلاقيها تضحك

يعني مثلا امبارح كنت البي دعوة وزير التضامن الاجتماعي لحل مشكلة أبناء المؤسسات وأطفال الشوارع

كان فيه ناس تانية عندها مشاكل خليتني أعيط لما عنيا كانت ح تقع من وشي

بس لو الواحد بص للمشاكل دي من زاوية تانية يمكن يضحك

واحد صعيدي ابنه ضايع منه بقاله اربع سنين مقهور بس ماسك نفسه عشان ما يصحش الراجل يعيط زي الحريم أبه

ولابس ومتأنتَك كمنه جاي يجابل سعادة الوزير

وع يكلم الوزير بألاطة وع يجول له: أني مش جاي أحل مشكلتي

أنا جاي أحل مشاكل ملايين بدل ما جاعدين تتحدتوا على مشاريع تربوا بها العيال اللي تايهة من اهاليها

ما ترجعوهم لاهاليهم

ولجل ما الاقتراح ده يتحجج تنشئوا (قال تنشئوا ما قلش تعملوا) تنشئوا مجلة وتسموها أمان يا مصر

ولو حداك يا سعادة الوزير اسم تاني ما يجراش

الجريدة ديت أو المجلة زي ما تحبوا ع تنبهوا على كل المؤسسات الحَكومية وغير الحَكومية انها ع تصور العيال اللي حداها

كلاتهم واللي تايه منه عيل ع يشتري المجلة ويعتر في ابنه

على الاجل بالجليلة توفروا على نفيسكم تربية عيال لهم اهل ع يدوروا عليهم زي ما اني ع دور لحد ما ضهري انجسم

قبل ما عم رجب يتكلم كان فيه واحدة بتقول ننزل صور التايهين على النت! لما عم رجب اتكلم....

بص بقرف لصاحبة اقتراح النت وجال لها: مش كل الناس حداها امكانية الاطلاع على النت (أيوة قال الاطلاع)، أنا فعلا لاحظت إن عم رجب متثف ومتنور بدليل إن الوزير اتأثر بكلامه وعشان يبين شوية تعاطف قال له: ربنا يعترك فيه إنت عندك عيال غيره

جال له: يا سعادة الوَزير عندي تنين غيره بس يعجوب عليه السلام كان عنده تناشر وعمي على يوسف

المجلة ديت يا سعادة الوزير ع تحل مشكلة ستين في المية من العيال اللي انتوا حايسين فيهم ومش عارفين تربوهم واهاليهم دايخين عليهم كمان

هو أنا نكدية؟

أصل كل ما افتكر الوجاهة والوقار اللي على وشه المخلوطين بالقهرة المكبوتة والابتسامة المرة اللي ما بتفارقهوش

اعيط لما اتفحت

مع إن الحكاية تضحك

وللا انتوا ما ضحكتوش؟

بوش يؤيد جيش رشيق

أنا عندي قطتين في البيت واحد فيهم شبه جورج بوش واهبل برضه وبيعمل حركات عبيطة

عشان كده باحب اتفرج على بوش

خصوصا لما يقعد يضحك من غير سبب

واحد قال له معظم الامريكيين عايزينك تمشي من امريكا واستطلاعات الراي بتقول كده

رد عليه وقال له: لا مش معظم الامريكيين، انا باقول لك الامريكيين عايزيني اقعد في العراق

افتكرت مسرحية محمد صبحي بتاعة الناس عمرها ما كانت مبسوطة

لامبسوطين بس انت مش واخد بالك

بس اغرب حاجة قالها انه يؤمن بان "يكون لامريكا جيشا رشيقا خفيف الحركة في "العراق

اول مرة افهم ايه اللي بيحصل في العراق

انا اصلي لاقية الحكاية مش مفهومة

بس بعد الكلام ده عرفت فيه ايه

العراق تحولت الى سرك

صح والله وانا اقول يا ربي فيه ايه

الدنيا منكوشة كده ليه

اتاريها سيرك

وسجن ابو غريب هو فقرة تدريب الحيوانات

والحرب الاهلية هي فقرة الغازية

ووجود القوات الامريكية هي فقرة البهلوان

عشان كده لازم يبقى رشيق وخفيف الحركة

حاجة غريبة قوي بتحصل لي لما باسمع اخبار العراق

انا اصلي زي قرضاي والسنيورة كده

مش في خيانتهم لبلدهم

بعد الشر عليا

بس في عياطهم

باعيط على طول

على اي حد

وبسبب اي حاجة

ام دمعة

وكل الناس بتصعب عليا

حتى اخوات يوسف

وابن نوح

بس اول ما اسمع اخبار العراق

مش عارفة ليه بتمسكني كريزة ضحك

استغفر الله العظيم

اول ما اسمع: قتل 133 عراقي في انفجار بالحلة

اتفتح في الضحك

اتخيل شكل العراقيين

اللي عاملين زي تلامذة الفصل اللي المدرس بتاعه غايب وعمالين يهيصوا

بس مؤخرا

النكتة بقت بايخة

رأينا الشحاذين..فأين النبلاء

غريب منطق أولئك الذين يغلقون نوافذ سياراتهم في وجه الكناسين وبائعي الفل والمناديل الورقية. لم أدخل في مناقشة مع أحدهم، ولكن يمكنك بسهولة أن تعرف منطقه إذا أسعدك الحظ وصادفت سيارة فارهة يطل منها رجل ممن هم "قفاهم عجينة/كروشهم سمينة" وهو ينهال على البائع أو الكناس بمحاضرة "أخلاقية" مرددا: "لازم تشوف لك شغلانة بدل اللي بتعمله ده، وبطل تزن على الناس لازم يكون عندك كرامة، دي اسمها شحاتة مقنعة"! بالطبع يظن "الشحاذ المقنع" أن الرجل "خواجة" بدليل أنه يتحدث "لغات"، ومنعا للإحراج، ولضيق وقت الإشارة لا يحاول البائع – الذي يكون غالبا طفلا – أو الكناس – الذي يكون غالبا مسنّا – مطالبة السيد بترجمة فورية فيجيبه: "كل سنة وإنت طيب يا باشا" بمعنى: "قصّر...ح تدفع وللا إيه؟"

إن أحسنا الظن، فالسيد المبجل لا يعلم أن هؤلاء "الشحاذين" ينتمون إلى ستة ملايين عشوائي، تحفل بهم القاهرة وضواحيها، وأنه بالفعل يحتاج الجنيه الذي يبخل به الباشا، ليأكل، وأنه إن لم يحصل على هذا الجنيه، سيضطر إلى انتقاء ما لذ وطاب من مزابل المحروسة. ولا بأس في ذلك بالنسبة له، ولكنه فقط يحب أن يجدد في صنوف الطعام التي يلتهمها، طمع الدنيا بقى. وأظن أن السيد المواطن لا يحتاج لمعرفة هذه المعلومات، فملامح فقر الدم، وكافة أمراض التلوث، ودلائل عدم اقتراب المياه – في يوم من الأيام – من جسد "منعدمي الكرامة"، بادية عليهم من الوهلة الأولى.

وإذا أسأنا الظن، فالدنيا لم يعد بها خير، وليس أدل على ذلك، من صرخات الاستغاثة التي تخرج من نفس الأسياد المبجلين، إذا ما لمحوك وأنت تشتري علبة مناديل ورقية، أو عقد فل من هؤلاء، فما أن تقدم على هذه الخطوة الخرقاء، حتى تجد من "يتدلدل" من نافذة سيارته: "ما تديهمش، إنت كده بتشجعهم على الشحاتة، لا لا لا..."، ثم يصرخ صرخة أخيرة تشبه تلك التي تطلقها نادية الجندي في نهاية كل أفلامها: "لعععاااااااااااا".

طيب يا سيدي، لا تشجعهم على الشحاذة، فعلى ماذا تشجعهم إذن؟ على السرقة؟ أو ترويج "البغاشة" أي المخدرات؟ أو الانضمام إلى عصابات لسرقة المنازل؟ أو دعارة الأطفال؟ أو حتى العمل لصالح إسرائيل؟ أم أنك تظن أن هذا المواطن "غير النافع"، حين يستمع إلى تلك المحاضرة المبهمة التي تبصقها في وجهه، سيقف مع نفسه وقفة، ويذهب للعمل كساعي في أحدى شركات "الاستكراد والتصبير"، ويلتحق بمدرسة ليلية، أو يدرس من منازلهم، ويتفوق في الدراسة، ومع كل شهادة يجتازها بنجاح باهر، يعطيه صاحب الشركة علاوة، ويمنحه صلاحيات وظيفية جديدة، حتى يتفوق في الثانوية العامة، ويلتحق بكلية الطب أو "التب" كما يقول عنها "منعدمو الكرامة"، ويتخرج ليصبح معيدا في الكلية، فينظر إليه صاحب الشركة بحنان قائلا: "إنت يابني بتفكرني بنفسي، أنا برضه بنيت مجدي من الصفر.."، ثم يزوّجه ابنته، لتسافر معه في البعثة الدراسية التي منحته إياها الدولة، تقديرا لنبوغه، ويكافح في بلاد الفرنجة، ويبهرهم تفوقه، و"يتقدم يتقدم وكفاية خلاص يتندم"، وأخيرا يعود لوطنه وهو يحمل شهادة الدكتوراه التي حصل عليها بتفوق في المسالك البولية والبواسير، ويجري عملية الفتاء لكل أبناء قريته مجانا، وتحاول شركة أمريكية احتكار اختراعه الذي يمكنك من أكل "الشطة" دون نزول – لامؤاخذة – البواسير، ولكنه يرفض وتصاحب موسيقى رأفت الهجان صوته وهو يقول: "البلد دي ياما إديتني..."؟

ولا مانع من أن تنساق وراء أحلامك لتتخيل أن هذا الطبيب المخترع المشهور يذكرك في لقاء تلفزيوني ويشرد في شجن وهو يقول: "الراجل ده أنا ما أعرفوش، بس هو اللي غير حياتي....".
حسبنا الله ونعم الوكيل في الأفلام العربي.

انشرها يمكن تنفعك

عمرك جات لك الرسالة دي؟ اللي هي بيبقى مكتوب فيها مضمون ديني ويعقبه

تهديد بالويل والثبور وعظائم الأمور

ويجيلك ويحط عليك

إلهي تصحى تلاقي نص شنبك ساقط ع المخدة

ولو كنتي بنت الهي تصحي تلاقي شحمة ودنك لازقة في سنانك

قادر يا كريم

لو ما مررتوش الرسالة دي

طبعا الرسايل دي ما بتكتفيش بالأسلوب التهديدي

فيها رسائل احتقارية

إذا لم ترغب في نشر هذه الرسالة فلا تفعل لأنك لا تستحق ثوابها

يا كلب

الغريبة إن الرسائل دي معظمها مضمونه مش مستاهل انك تبعته في الميل لناس تعرفهم ممكن تتصل بيهم وتقولها

زي مثلا لا إله إلا الله

ما كلنا عارفين إن لا إله إلا الله

فيه رسائل تانية فيها قصص من وحي الخيال العلمي

مش متذكرة بالضبط بس حاجة كده شبه واحد كان سكري وبايظ وبيحب يسمع أغاني (ولازم يقول لك بيحب يسمع أغاني عشان الميلات دي بتبقى جاية من السعودية أو من المتسعودين) وهو راجع وش الصبح سكران العربية اتقلبت بيه

ولقى الارض انشقت وطلعت راجل عجوز شاله وطار بيه

وهو حيران مين الراجل ده وشاف راجل تاني سنانه طالعة لبرة وقرونه خمس امتار وعنيه صفرا ووشه اسود وشعره اخضر و....

مش عايزة قلة ادب هو ما وصلش لحد كده

وقعد ينازع الراجل الطيب ويقول له ده بتاعي والتاني يقول له لا بتاعي

بصراحة أنا لو راجل

وفي السعودية

واتنين رجالة ماسكيني كده

يبقى اتشاهد على شرفي

وللا ايه

الغريبة انه مش بيجي في باله حاجة زي دي

مع انه سكري وبتاع مسخرة

لكن الغريبة ان مخي اوسخ من مخه

مع اني والله مش باشرب غير شاي اخضر وقهوة فلتر

ما اطولش عليكوا

في الاخر بيكتشف ان ده ملاك الرحمة

والتاني كان الشيطان

تقريبا يعني

وبعدين يقول له ربنا عايز يديك فرصة تتوب

طبعا الرسالة بتبتدي بأن شيخ صالح ورع بيحكي عن قصته دي اللي هي بتاعة جوز الرجالة اللي بيتخانقوا عليه لحفيده البايظ السكري اللي بيعمل نفس اللي جده كان بيعمله

وطبعا اللي كاتب الرسالة ده هو الحفيد

وطبعا مش بيقول على جده انه كبر وخرف

ولا انه راجل ما بيحترمش شيبته وبيكدب لحد دلوقت

ولا ان حفيده ده عنده خمس سنين وجده بيحاول ينيمه

ولا انه لا حفيد ولا نيلة وانه واحد كداب وممكن يطلع في الآخر واحدة بتشتغلنا

كل ده شغال

ايه بقى سر اصرار الواحد او الواحدة على نشر القصص الوهمية دي

مع وضع عنوان: قصة لابد من قراءتها

وفي الآخر يا رب تموت لو ما نشرتهاش

وإيه إحساسه لما بتتنشر

عشان فيه ناس معاتيه بتخاف فعلا

يجيلها ويحط عليها لو ما نشرتهاش

بيحس مثلا انه انتصر وعرف يستغفل كل ولاد العبيطة دول؟

صدق اللي قال:

هو الإنسان إيه غير شوية نفسيات فوق بعضها

الرسالة اللي زعلت الكل مني

أنا مش عايزة الخبطكوا وحد يطلع يقول لي انت مرة تدافعي عن عبد الكريم الملحد ومرة تدافعي عن الأخوان المسلمين ومرة تدافعي عن

حزب الله ومرة تدافعي عن البهائيين.

الحقيقة مافيش لخبطة ولا حاجة، والحقيقة إن اللخبطة حاصلة في المجتمع.

لأن الناس اللي بتدافع عن حق الأخوان في التواجد كحزب سياسي مش كجماعة محظورة، وحقها في التظاهر، مش مستعدة لقبول وجود البهائيين في المجتمع، والناس اللي بتدافع عن البهائيين مش بس مش مستعدة لقبول الأخوان دي كمان بتحرض عليهم أمنيا وبتشمت فيهم بتلذذ.

أنا بقى شايفة إن هي دي اللخبطة بعينها

منين احنا زعلانين إن فرنسا بتمنع الحجاب وزعلانين على نفسنا واللي جرا لنا في الأندلس ومحاكم التفتيش اللي أجبرتنا على تغيير ديانتنا

ومنين بندعي انتماءنا للحضارة الإسلامية

اللي كانت بتقبل الجبرية، والقدرية، والزنادقة، والملاحدة، والصابئة، والمجوس، وكمان عبدة الشيطان وملل ونحل لا عد لها ولا حصر

ومنين نزعل إن وزير الثقافة اساء استغلال سلطاته وأرهب المواطنات العزل بانتقاده لملابسهم

وبعد كده نقول لا مش من حق إنسان إنه يؤمن بديانة تانية غير الديانات اللي احنا مؤمنين بيها؟

ومنين اللي واقفين جنب حق البهائيين في الوجود والاعتقاد

وأكلوا دماغنا بالحرية البتنجانية

هم نفسهم يبلغوا عن الأخوان ويتجننوا من مجرد ذكر اسمهم

ويحرضوا الدولة تنكل بيهم وتعمل فيهم نفس الممارسات اللي لما بتتعمل في حد من الجانب الآخر دعاة الحرية يتشالوا يتحطوا؟

ندى قالت إنها قرفانة

أنا بقى

لامؤاخذة

عايزة أطرش

اوعوا من وشي

ح أطرش

النهاردة لما سمعت في الجزيرة، بعد النطق بالحكم ضد البهائيين، صوت واحد بيقول: الله أكبر، إن تنصروا الله ينصركم

كنت عايزة أعرف هو نصر الله في إيه بالظبط؟

طبعا النوايا ربنا اللي بيحاسب عليها

بس الأفعال دي حقنا احنا

خصوصا لما تبقى متعدية

نصر الله في إيه بالظبط؟

نصر الله في إنه زود على مجتمعنا عدد من المنافقين زيادة على المنافقين اللي فيه؟

نصر الله في إنه استعدى على الإسلام ناس قهرهم وأجبرهم إنهم كل ما يبصوا في بطاقتهم يتنكدوا ودمهم يتحرق؟

نصر الله عشان زود على المقهورين عدد تاني من المقهورين؟

مش مكفينا المقهورين في الشارع؟

والأحداث؟

والعشوائيات؟

والسجون؟

حد عارف المقهور ممكن يعمل إيه؟

فيه شاعر زمان قال:

يا ويلهم من شر مظلوم حكم

بس المقهورين يتحكموا على حد وللا في أي حاجة

ح نشوف ح يجرا لنا إيه

هي دي الدعوة إلى الله بالحكمة والموعظة الحسنة؟

هذا الحكم الجائر لا يضير البهائيين في شيء

لأنه ببساطة القوانين والأوراق الحكومية لا تستقر في القلوب

ولو القوانين تقدر تغير المعتقد

كانت قوانين فرنسا قدرت تغير اعتقاد المسلمات في الحجاب

اللي تحايلوا على القانون وبقوا يلبسوا برانيط وعليها كوفيات

مش بس كده

بعد القانون ده كتير من الفرنساويين غير المسلمين اللي كانوا ضد القانون لبسوا الحجاب كشكل من أشكال تحدي هذا القانون الجائر

والله ناس محترمة

مش لأنهم وقفوا جنب المسلمات

بس لأنهم متسقين مع نفسهم

عارفين بقى المصريين العلمانيين اللي بيدافعوا عن حق البهائيين دلوقت؟

كانوا بيدافعوا عن حق الدولة الفرنسية العلمانية في رفض الأزياء التي تتنافى مع سياستها!

إيه القرف ده؟

أمال زعلانين ليه بقى؟

زعلانين ليه إن أمريكا وانجلترا واقفين مع السنيورة بدعوى إنه حكومة شرعية

وبتتآمر عشان تسقط الحكومة الشرعية في فلسطين؟

ماهم زينا

كل واحد بيقول الشرعية هي شرعيتي أنا

والحرية هي حريتي أنا

أنا وبس

واللي مش معانا يبقى علينا

طب وماله يا سيدي حتى لما يبقى عليك

لا اللي علينا يطلع تلاتينه

ونقلعه ملط كمان

واللي مش عاجبه مطرح ما يحط راسه يحط رجليه

طب أنا نفسي بقى القاضي ده يجوز بنته لواحد مكتوب في البطاقة إنه مسلم

وبعد ما بنته تخلف

يتفاجئ إن أبو أحفاده بهائي

إيه رأيه ساعتها؟

على فكرة بقى،

الحكومة أحسن تيار في كل التيارات السياسية اللي موجودة في مصر

عارفين ليه؟

عشان هي الوحيدة اللي متسقة مع نفسها

بتظلم كل الناس

وتقهر كل الناس

ومش بتناقض نفسها

ولا بتدعي إنها بتاعة الحرية والديمقراطية

ولا بتقول: قال الله وقال الرسول

ببساطة كده ماحدش له حقوق عندها

أنا عايزة بس أفهم الناس اللي بتقول كلام وتتبنى قضايا بخصوص فئة معينة

وترجع تناقض نفسها وتقول كلام عكس الكلام في قضايا تخص ناس تانية

لما بيبصوا في المرايا بيشوفوا إيه بالظبط؟

بيناموا مطمئنين إزاي وهم بيدافعوا عن العدالة لفئة

ويسعوا لظلم فئة تانية؟

عايزة أعرف بجد


حد عنده إجابة؟

الله يرحم سيدنا عمر اللي قال:

متى استعبدتم الناس وقد ولدتهم أمهاتهم أحرارا؟!

فاكرين الرسالة إياها؟

اللي زعلت مني كل البلد...مش كل البلد يعني كلها بس على الأقل كل اللي قروها، بس كل فئة زعلت لأسباب خاصة بيها خالص، الرسالة

اللي كنت باقول فيها إني عايزة أطرش لامؤاخذة، وكنت متضايقة من ازدواج المعايير والكيل بمكيالين، فاللي بيدافعوا عن حق البهائيين في حرية العقيدة، واللي أنا شايفة إنه حقهم بأمر الله مش بمزاجي، بيقفوا ضد حرية الإخوان في إن يكون لهم حزب سياسي وتمثيل شرعي، واللي بيدافعوا عن حق الإخوان في التمثيل السياسي، بيناقضوا نفسهم، ودينهم، ويمنعوا ناس من حرية الاعتقاد اللي ربنا كفلها لهم.

جالي على الرسالة دي تعليقات كلها بتأكد الكلام ده، يعني اللي ضد البهائيين ما شافوش حاجة في الرسالة غير إني بادافع عن حق البهائيين، وواحد قال لي إنت بهائية، واللي ضد الإخوان ما شافوش حاجة غير إني بادافع عن الإخوان، بس كان صعب إن حد يتهمني بإني إخوان. بس شافوا إني بادافع عن ناس إرهابية، وإن العيال دي مش مظلومة، على فكرة واحد قال لي باللفظ: الإخوان مش مظلموين دول بيعملوا عروض عسكرية، قصدوا على شوية التشليت اللي عملوه في ساحة الجامعة، واللي ينم على إنهم عمرهم ما أخدوا تدريبات لا في معسكر ولا في نادي ولا حتى في مركز شباب الحقانية.

هو ده بالظبط اللي كنت اقصده من رسالتي اللي بعتها على المجموعات، إن كل واحد مش بس مش قابل يدافع عن المختلف عنه، ده مش قابل إن حد غيره يدافع عنه. زي ما رئيس جامعة الأزهر ده قال ما حدش يتدخل عشان يفرج عن العيال!!!!!!!! وبعدين زعلانين إني عايزة أطرش؟

أنا عايزة أعرف مدى أمانة إني أنشر بعض الرسائل اللي وصلتني، مش عارفة ده أخلاقيا صح وللا لا

بس من ضمن الرسائل واحدة بتقول على البهائيين: لازم نضيق عليهم الخناق لحد ما يرتجعوا وكان ناقص تقول ويبقوا عبرة لمن يعتبر ومن لا يعتبر كمان

وواحد قعد يشتم في الإخوان عشان هم لو تمكنوا ح يمارسوا عنف وإرهاب

يعني عشان ما يمارسوش أي عنف أو إرهاب في المستقبل يبقى احنا نتغدى بيهم قبل ما يتعشوا بينا ونمارس احنا عليهم العنف والإرهاب والبلاغات الأمنية المنحطة عشان هم لو أخدوا فرصة يبقى لهم تمثيل سيا سي ح يعملوا زي ما احنا بنعمل دلوقت

عظيمة يا مصر

يا أرض اللوا

نيلك معكر

جوك معفر

شعبك مغبر ليل الأمم

أنا ح أنشر الرسالة اللي باتكلم عنها على المدونة للي ما وصلتهوش على الميل

تعليق سريع

زميلي بيقرا دلوقت الجرنال بصوت عالي، كان بيقرا مانشيت لبيان الحكومة: ملتزمون باحتياجات الفقراء ومحدودي الدخل، وبعدين سكت شوية، ولقيته بيتمتم بينه وبين نفسه وبيقول: حتى يكتب عند الله كذابا....وبعدين قرا بصوت عالي: شؤن البلاط السلطاني...يسر شؤن البلاط السلطاني بسلطنة عمان أن تعلن عن طلب وظيفة فني زخرفة!!!!!!! يعني للي عايز يشتغل يا جماعة