Saturday 8 June 2013

تحضيرا ل30/6.. الرهان على غباء العدو

تحديث: اهو عمرو عبد الهادي اعترف ان الميل ده مبعوت من ميله وقال "الهاكرز" هو اللي بعت الميل وانا في كل ده كله مش هاممني انه كداب اخر ستميت حاجة.. اللي خانقني انه بيقول "هاكرز" وبعدها يقول "هو" زي اللي بتقول انا بشتغل مودلز واللي بيقول انا باشرب كانز واحنا من موقعنا هنا بنشكر الاستاذ هاكرز على الميل ده مش قلت لكو الرهان على غباء العدو؟ المتخلف بعت سند اوول فوصل بالغلط لناس ما كانش المفروض يشوفوا الميل وبعدين قالك الهاكرز ضاع الهاكرز بصباع.. ربنا يديم عليهم الغباوة ويزيدها ويبارك فيها ويجعلها دايما في مصلحتنا




الايميل اللي فوق ده نشرته دينا يوسف وبتقول انه وصلها على ايميلها من جبهة الضمير
طبعا حيطلع لنا ناس بيتناصحوا، وانا بقيت اكرههم قوي قوي قوي الناس دي، عشان الحاجة بتبقى باينة وهم بيبقوا عايزين يسفسطوا، حيطلعوا ويقولوا طب وايه الدليل على ان الميل ده وصلها فعلا، وايه الدليل على ان عمرو عبد الهادي بعته فعلا.. وكل الهلاوس دي
طبعا لو كانت جلسة الحوار الوطني اتفرغت ونزلت في جرنال وما كنتوش سمعتوها بودانكوا كنتوا برضه ضيعتوا وقتنا في ايه الدليل ومين قال وايه اللي يضمن وبلاش هري ولازم تتأكدوا واصل لما بتقولوا الكلام ده بيخلي ناس ما تتعاطفش معانا وكل الطراش ده بتاع الناس اللي حاطة ايدها في المية الساقعة وغالبا ما بينزلوش لا هم ولا اللي هم خايفين عليهم ليبطلوا يتعاطفوا معانا، ابوهم على ابو اللي بطل يتعاطف معانا احنا دفنا صحابنا وهم قاعدين دفيانين.. كل ده عشان تغفيلنا وعشان ما حطيناش كل الاحتمالات قدامنا، مش لازم يبقى في دليل.. لازم نحط كل الاحتمالات ونخليها واردة في اذهاننا...
الكلام المكتوب ده وارد جدا، ووارد جدا ان عمرو عبد الهادي اللي مرة قال في تصريح انتوا مش حتعرفوا قيمة مرسي الا "لما نجيب لكوا ابو اسماعيل"! انه يكون بالهطل اللي يخليه يبعت الكلام ده في ميل، واللي يعمل اجتماع سري على الهوا يهذي فيه ممكن يبعت ميل بالطريقة دي ويوصل للناس.. المهم الخطة دي واردة بنسبة 99%.. ولما نحط حاجات في الحسبان وما تحصلش احسن من لما ما نحطش حاجة في الحسبان ونتفاجئ بيها زي ما بيحصل لنا بقالنا سنتين لما ورمنا 

تحذير:
عرفت دلوقت ان الاخوان ناويين يوم 30/6 يندسوا وسط المتظاهرين ويكتبوا او يرفعوا شعارات شتيمة في الاسلام والرسول، وعرفت كمان ان بالفعل الاخوان عملوا اكاونتات على الفيس بوك والتويتر بيعملوا فيها هاشتاج تمرد ويشتموا في الاسلام والرسول عشان يبينوا ان اللي بيتمردوا دول كفار وكدزه
بائسين... يعني مش كفاية حيخسروا الدنيا، وكمان بتخسروا الاخرة؟ على فكرة اللي بتعملوه ده حرام، والشتايم اللي بتكتبها دي ربنا حيحاسبك عليها بصفتك ومافيش غاية تبرر لك الوساخة دي
المهم.. التحذير ده وجب التنويه عنه لانه جالي من كذا مصدر واي حد تشوفه بيعمل كده اعمل معاه السلمية
------------
بصوا انا محرجة قوي اتكلم عن تحضيرات تلاتين ستة وانا عارفة اني مش حاحضرها لاني حابقى في الجنايات والله اعلم هم حيعملوا فينا ايه؟ بس شكلهم ناويين على حبسنا.. فحاسة اني يعني باعمل جنرال كازوزة وانا اغلب الظن حابقى في الحبس ومش حاحضر مع الناس لكن رجعت وقلت اهو اساهم بكلمة وانا يعني مش حابقى في مارينا ده انا حابقى في الحبس
:)
بالنسبة لتلاتين ستة انا ان شاء الله متفائلة جدا على عكس بقية الايام اللي نزلناها قبل كده وكنت بانزلها عشان باعمل الواجب مش عشان عندي امل 
ليه بقى المرة دي متفائلة؟ لان الاخوان والاسلاميين بشكل عام ناويين يتغابوا، او هم ابتدوا يتغابوا فعلا ويمعنوا في الغباوة.. وزي ما كان مبارك عن جدارة مفجر الثورة ضده، الاخوان المرة دي بقى يا ولاد مش بيركبوا على الثورة.. ده هم اللي بادعين الثورة ضدهم من اساسها
سيبك من انهم استدعونا للجنايات انا وعلاء ودومة وحازم عبد العظيم وكريم وعيد وغيرنا.. طبعا السلوك ده حيسخن الناس عليهم، مش عشان احنا ناس مهمين، بالعكس، عشان احنا ناس مش مهمين
الاخوان من غير ما يحسوا وجهوا اهانة لكل الناس اللي ضدهم ووصلوا لهم رسالة انهم بيقولوا لهم: انتوا شوية خرفان واحنا لما نقبض على الروس بتاعتكوا (بتصورهم يعني) حتتلموا.. ودي اهانة بالغة، خصوصا ان في اخبار ان الاخوان بيتصلوا بالكنيسة عشان تمنع المسيحيين ينزلوا 30/6! منتهى الاستفزاز والاستهتار وجر الشكل والتسخين.. كده اللي ما كانش ناوي ينزل حينزل... طبيعي يبقى الرد عليهم: احنا لا احنا خرفان، ولا ماشيين ورا حد، ولا دول الروس بتوعنا، ولا غيرهم، ولا انتوا ولا عشر جماعات من عينتكوا يعرفوا يقعدونا في البيت لو لنا مزاج ننزل.. ومافيش مانع من شوية ذكورية: هو انا حرمة زي نوارة اللي بتنزلني يا روح امك؟ او شوية عنجهية: هو علاء اللي مربي شعره ده اللي بيتحكم فيا يا روح خالتك؟ هو انا خروف زيك.. الخ
فكده كتر خيرهم.. يعني جم على الوجيعة لكل الناس لان اي مصري بطبيعته بورمجي وما يحبش يبان قفا ولا ماشي ورا حد... في شوية حاجات كده في نفساويات المصريين ما يعرفهاش الا حد مصري، وفي شوية زراير كده في نفسية المصري ما ينفعش تدوس عليها الا لو انت قررت تجر شكله، وزراير تانية تسخنه، زي مثلا انه ينزل في ثورة عشان تونس مش احسن مننا، خصوصا ان تونس دي بتنافسه في الكوره، طبعا دي تفصيلة ماحدش يحس بيها ولا يحسبها الا حد مصري، وانتوا زي ما انتوا عارفين دول مش مصريين.. دول عايشين في مسلسل على هامش السيرة وما خرجوش منه
وموضوع الكنيسة ده حرقة دم لغير المسيحيين لابعد الحدود... سيبك من انها اهانة للمسيحيين اللي خلاص اتعودوا على حرقة الدم في زمن الاخوان، بس المسلمين حيتغاظوا قوي لان برضه الاخوان بيوجهوا لهم اهانة انهم مستهترين بيهم وبحجمهم وبصوتهم، وبيوصلوا للناس احساس ان الاخوان دول مافيش فيهم فايدة، عايشين في وهم ان اللي ضدهم شوية مسيحيين على شوية نشطاء ماسون وخلاص كده، ومش عايزين يواجهوا ولا يسمعوا.. عاملين زي اللي متجوز واحدة بتقوله انا بكرهك يقولها: انت بتحبيني بس انت اللي مش واخدة بالك.. ده هي حماتي هي اللي بتكرهني
فكده اول خطوات الغباوة نشكرهم عليها وعلى الحشد التاريخي
ده غير بقى حرق مقر تمرد... انا لو مكان حملة تمرد ابعت لهم جواب شكر.. والله العظيم ما باهرج
لا في غباوة كده؟ بجد وربنا؟
انا بقى اللي ضحكني اكتر واحد من حملة تمرد قال: احنا عندنا مقرات سرية
D:
افتكرت سنية في وجهة نظر وهي بتقوله: يا عررررففففةةةةةةةة اوعى تقولهم على مكان الورق يا خوووووويااااااا.. ماهو احنا فينا دقة عبط الحقيقة
لا احنا فينا دقات عبط كتير... واحنا لو مش عبط كنا اتفتشنا في ثورتنا كده واحنا واقفين؟
تاني غباوة بيعملوها الاخوان التهديد والوعيد بتاعهم 
وبعدين هم مرعبوين وركبهم بتخبط في بعضها.. ودي اوحش طريقة تتعامل بيها مع الخوف.. انك تهدد.. اتعلم كده سواء في الحياة السياسية او الحياة الشخصية، لما تبقى خايف ما تهمبكش في الكلام ولا تكتر، ولا كمان تطلع تجري، لما تخاف اثبت واتعامل مع خوفك بالعقل.. انما التهليل ده حيضحك عليك الناس ويستنزف طاقتك ويشل مخك 
هو انا بنصحهم ولا ايه؟ ههههههههه عموما عادي يعني هم مش بيسمعوا نصايح، ما انا ياما كنت باقصد انصحهم باخلاص وبحسن نية ولا عمرهم سمعوا.. الحمد لله يعني.. لو يستاهلوا الخير كان ربنا رزقهم بيه.. المهم
الاخوان بقى مثلا مرة يقولوا لنا كل نفس ذائقة الموت.. ودي حقيقة كلنا نعلمها، وزي ما هي سارية عليهم هي سارية علينا
ومرة يبايعوا مرسي بالدم.. ودي حركات بلدي قوي.. واستنزاف طاقة
ومرة يقولوا لنا احنا محضرين مفاجئات وحنبهدلكوا وحنعمل ونسوي فيكوا.. اللي محضر مفاجئات وناوي يعمل ويسوي ما بيقولش على فكرة
واخيرا.. وتكليلا للرعب اللي هم عايشين فيه، قالوا احنا حنضطر نستخدم العنف عشان اتهددنا.. قالوا مين اللي هددكوا؟ قالوا: نوارة
والله العظيم تلاتة.. ورحمة شرف مرسي وخريت مع بعض.. قالوا نوارة هددتنا وعشان كده مضطرين ندافع عن نفسنا
قالوا لهم نوارة؟ نوارة هددتكوا بايه؟ قالوا: هددتنا بالقتل
عليا انا
D:
انا هددتهم بالقتل... طب بعيدا عن شناباتهم ودقونهم وكروشهم وعيبتهم ان واحدة ست، طريحة الفراش بقالها ما يقرب من شهر، وحتتحبس قريب، تخوفهم وما يتكسفوش يقولوا دي هددتنا بالقتل 
انا ما هددتهمش بالقتل الحقيقة ههههههههههههههههه انا مش متعودة اهدد بحاجة ما اعملهاش
اللي حصل اني كتبت على التويتر الاخوان يمشوا بالذوق وبانتخابات مبكرة بدل ما يوصل الامر انهم يتدبحوا في الشوارع يمشوا بالذوق احسن ما يمشوا بالعافية... او بالدم حاجة كده مش فاكراها

طيب انا مصدقة فعلا ان الاخوان خافوا من التويتين الخايبين بتوعي دول وفعلا افتكروني ان انا اللي بهددهم بالقتل مش باستشرف الواقع واللي حيحصل... لانهم بالجبن ده.. هم كده بيخافوا من العزل والستات والاطفال.. والا ما كانوش ضربوهم.. وحبسوهم

هم الاخوان متخيلين ان احنا بنئذيهم لما بنجمع ضدهم توقيعات وبننزل نطالبهم بانتخابات مبكرة؟
هم الاخوان متخيلين انهم لو خلصوا على كل الافندية في البلد بتوع التوقيعات والمظاهرات والصوصو نونو هم عارفين مين اللي حيواجههم بعدنا؟ 

والله العظيم والله العظيم والله العظيم الاخوان دول لو عندهم ذرة مخ مش بس يشكرونا اننا بنمشيهم بالذوق، دول يبوسوا ايدينا ورجلينا ويعرفوا انهم مدينين لينا بحياتهم

في راق تاني من الشعب المصري، اوسع، واعمق، واكبر، واقوى، ومستني اما يشوف الافندية حيعملوا ايه وحيحلوها ازاي؟ لو الافندية دول فشلوا يحلوها.. هم بقى حيتصدروا ويحلوها، ولو اتصدروا هم مش كويس على الاسلاميين خالص.. ده مش كويس على اي حد، انا بنفسي مش حاعرف امشي في الشارع بحجابي ده.. كل واحد بدقن حتتنف له في الشارع
هم مدركين هم عاملين ايه؟ النهاردة اشترينا الخضار بتاع اكل يومين.. يومين بس، عارفين بكام؟ واحنا بنوفر.. 68 جنيه.. ده غير الكهربا المقطوعة، والمية المقطوعة، واللي لسه حتتقطع اكتر واكتر.. وهم خايبين وسرقاهم السكينة ومعيشين نفسهم في خيالات ان ماحدش بيعاديهم غير اعداء الاسلام اللي هم احنا.. والكنيسة طبعا
انا لولا بس اني بحب البلد دي كنت دعيت ربنا ان الاخوان يموتونا كلنا عشان يواجهوا مصيرهم ويعرفوا ان الله حق ويترحموا علينا
وايوه باكررها تاني، الاخوان يمشوا بالذوق احسن ما يمشوا بالدبح
ومش احنا اللي حندبحهم.. واكيد مش انا هههههههههه.. لاننا لو كنا بندبح كنا دبحنا من زمان، وياريتنا كنا بنعرف ندبح من الاول، يمكن لو كنا بنعرف ندبح ما كناش وحلنا البلد الوحلة دي.. ولسه مستمرين فيه احنا مش عايزين البلد تروح لمصير سوريا مهما كان.. احنا مش خونة للبلد زيكوا يا اخوان، دي بلدنا وبنحبها وحنحافظ عليها من الدم والنار اللي انتوا عايزينهم.. ويا ريتكوا قد الكلام يعني هههههههه غلابة قوي
بس في ناس تانية الجوع عضها خلاص وفاض بيهم ومش حيحصل طيب لو ما لحقناهمش.. وهم دول اللي حيدبحوكوا في الشارع
فانا والله ما كنتش باهددهم انا كنت بانصحهم لوجه الله واعرفهم اننا بننقذهم من ناس ما بتعرفش تتفاهم ولا تحب تتفاهم خصوصا لما تحس ان التفاهم قلة رجولية مع ناس ما تستاهلش التفاهم
هم لازم يعترفوا انهم فشلوا ويمشوا بالراحة من غير مشاكل.. لان ماحدش حيحصل له مشاكل غيرهم، وهم عارفين كده كويس وخايفين قوي... وخوفهم شالل تفكيرهم ومخليهم يطبشوا
وعموما مصلحة.. يا رب يطبشوا كمان وكمان

بالنسبة لنا احنا بقى....
على فكرة الناس اللي نازلة كوم، والملايين اللي بيتفرجوا علينا ومستنيين يشوفوا "الافندية" حيحلوها زي ما وحلوها ولا لا كوم تاني...
السيدة في ضهركوا ما تكسفونا... 
عشان تبقوا عارفين، زي ما دي اخر فرصة للاخوان يخرجوا وروسهم فوق كتافهم، دي اخر فرصة لينا نحاول نحلها بتحضر وبشغل السيس بتاعنا ده
الغلابة خلاص... روحهم بقت في مناخيرهم، وحاسين ان كل حاجة خسروها، وسايبينا لما يشوفوا اخرنا وبعدها عليهم وعلى اعدائهم بقى
بمعنى
يعني حضراتكوا مش الناس تنزل يوم يومين تلاتة وبعدين رمضان داخل واحنا رايحين نشتري حاجة رمضان ومرحب شهر الصوم مرحب وسلامو عليكو
مش نعمل زي المرة اللي فاتت والناس تبقى على باب الاتحادية وشوية ال...... مش عارفة اقول ال ايه، اللي بيقولوا عليهم قيادات المعارضة يتكلموا عن "تغيير حكومة قنديل" وشغل الخواجات ده
ما تخيبوش امل الناس اللي بتبص علينا.. قصدي عليكو.. انا حابقى خلف القضبان وحتجيبوا لي البرنامج وحقول لا تنحرف ولو الاخوان سرقوا ثورتك اشكرهم وبوس ايد شعر ودقن
او خيبوا املهم بقى وواجهو مصيركوا مع الاخوان... الاخوان واخدين البلد على حاجة كده شبه الشدة المستنصرية واوسخ.. على الاقل في الشدة المستنصرية كان النيل قليل بس كان فيه نيل.. احنا كلها كام شهر والنيل حيبقى بح.. وحنبقى زي الخليج اللي كانوا نازلين نبر على نيلنا.. اهو طار، على الله يكونوا اتبطوا بقى
ولو دخلنا على حاجة شبه الشدة المستنصرية اللي حينزل يثبت الناس عشان ياكل مش حيبص لك ويشوف انت اخوان ولا ثوري، وهو في سكته عشان يخش الاتحادية غصبانية واقتدار حيكسر عربيتك المية تمانية وعشرين، ومش بعيد يشرح وش مراتك عشان ياخد منها النوباين
الا هل بلغت؟
اللهم فاشهد

10 comments:

الـسـيـدة نـون said...


لسة النهاردة الصبح بسأل نفسي هي نوارة مختفية ليه و بقالها فترة مش بتكتب على المدونة ؟

فرحت انك ظهرتي
:)

حمدا لله على سلامتك يا نوارة


خدت بالى انك قلتى فى البوست ان بقالك شهر تعبانة
ألف سلامة عليكي و إن شاء الله تخفي و تقومي بالسلامة

و إن شاء الله مفيش حبس ولا حاجة

ربنا معاكي يا نوارة
و ينجيكي من كل شر و ظلم




سلام

أختك خيخة

رجل من غمار الموالى said...

تحياتى لكى وألف سلامة ...

Unknown said...

سلامتك ألف سلامة يا أستاذة نوارة و إن شاألله اللى يكرهك هو اللى يعفن فى السجن....ويا خسارة الدقون والكروش والملايين فى كمية الجبن....ربنا يحفظك لأهلك ويثبتك على شجاعتك.

Unknown said...

نوارة

ربنا حق و عدل و اللى معاه الحق ما يخافش لأن بنا معاه و اللى يموت و هو بيدافع عن حق بلاده يبفى حقق أسمى غاية فى وجوده..دايما روحك العالية ترفعنا فوق الهم اللى عايشنه عشان نبص فوق ضباب اليأس و نشوف الأمل. مهما ضعف الجسد ما يقدر على الروح الا اللى خلقها. عشتى نوارة يا نوارة
Mel Ardd

محمد نور الدين said...

التمرد ليس فنا استعراضيا هذا ما قلته في المدونة

killerBee said...

جبهة تمرد " رضي الله عنها " - جبهه منزله لا يأتيها الكذب من بين يديها ولا من خلفها
" طبعا حيطلع لنا ناس بيتناصحوا، وانا بقيت اكرههم قوي قوي قوي الناس دي، عشان الحاجة بتبقى باينة وهم بيبقوا عايزين يسفسطوا، حيطلعوا ويقولوا طب وايه الدليل على ان الميل ده وصلها فعلا، وايه الدليل على ان عمرو عبد الهادي بعته فعلا.. وكل الهلاوس دي " هههههههههههههههههههههههههه
لأ بجد
مش ناقص غير انك تقولي ان جبهة الأنقاذ و تمرد ملائكه مش بشر
لأ من حقنا اننا نشكك بكل شئ في زمن الفتن و الكذب و التضليل و التشويه المتعمد
و الخلاصه
حسبي الله و نعم الوكيل في كل حد يعمل اي شئ يؤدي لأعمال عنف او اصابة مصري واحد بجرح او فقد مادي او معنوي

Michel SALAIS said...

مرحبا
أنا سوري مغترب لكن والدي وإخوتي يعيشون في سوريا

أحب فقط أن أقول إن مواقف الكثيرين ضد الإخوان المسلمين لاترقى إلي كشف نفاق هؤلاء وإجرامهم. أنا معارض للحكومة السورية وكنت ممن يظنون أن الاغتيالات والتفجيرات التي حدثت في سوريا بدءا من منتصف السبعينات إلى بداية الثمانينات ليست من صنعهم إلى أن قرأت في مجلاتهم عكس ذلك ومؤخرا أقر زعيمهم أنها كانت من صنعهم (وإن حاول التذاكي)
عندما تقللون من تقدير نزعتهم الإجرامية فأنتم ستخسرون ...

عندي أمل said...

الف سلامه عليك و ان شاء الله تكوني حرة في 30/6 معانا وتكوني نوارتنا بإذن الله

عندي أمل said...

الف سلامه عليك و ان شاء الله تكوني حرة في 30/6 معانا وتكوني نوارتنا بإذن الله

عندي أمل said...

الف سلامه عليك و ان شاء الله تكوني حرة في 30/6 معانا وتكوني نوارتنا بإذن الله