Friday 10 May 2013

جزاء سنمار

قريت خبر القبض على احمد ماهر من المطار، وافتكرته تهييسة او اشاعة لحد لما لقيت الوطن والمصري اليوم وكل المواقع كاتبة ان ماهر اسمه كان على قوائم ترقب الوصول وهو راجع من امريكا اتقبض عليه في المطار... 
انا مش عارفة اقول ايه.. اي كلام حيتقال حيبقى حاجة مش حتعبر عن الاحساس اللي جوايا.. قعدت على التويتر اتف على مرسي وبعدين دخلت نمت وانا نايمة حلمت اني باكلم واحدة صاحبتي في التليفون وعمالة ازعق واقولها: احمد ماهر يتقبض عليه من المطار زي المهربين؟ احمد ماهر اللي لولاه كان زمان شفيق رئيس جمهورية دلوقت مرسي يحبسه كده؟ البلد دي لو فيها رجالة وناس بتعرف ربنا وبتخاف منه مرسي ما يقعدش فيها النهاردة قبل بكرة.. وفضلت ازعق لحد اما صحيت على صوتي.. صحيت لقيت خبر ان احمد اخد اربع ايام على ذمة التحقيق والتهم الموجهة له التحريض على التجمهر وقطع الطريق العام ومقاومة السلطات اثناء ضبطه واهانتهم

بصوا، انا في اللحظة دي مش حادي حد امل، ولا حاقوله بكره احسن، ولا حاطلب منه الصبر، انا صابرة وناوية اكمل صبر ان شاء الله لان انا اصلا زملكاوية وواخدة على الصبر.. لكن اللي مش عايز يصبر او مش قادر يصبر مش حاقدر الومه، ولا حاشحته كمان

انا مش ندمانة على حاجة، اقصد مش ندمانة اني حشدت ليوم 25 ونزلت فيه ووقفت قدام المجلس العسكري وقدام الاخوان.. ده انا حتى مش ندمانة اني دافعت عن الاخوان ايام مبارك... انا عملت الواجب، ووقت ما كنت باعمل الواجب ما كانش عندي امل ولا حاجة، كنت باعمل الواجب عشان ده واجب ولازم يتعمل، يمكن بعد الثورة بقى عندي امل، بس انا رجعت لمرحلة اني اعمل الواجب عشان ده واجب.. وحافضل اعمله

لكن انا كمان لازم اعبر عن نفسي، انا حاسة بخزي، وخذلان، وطعن في الضهر، ومرارة، واحساس كده بحتمية انتصار الشر في نهاية المطاف، وان الاعمال النبيلة دايما ما يحصدش نتائجها غير الناس الخسيسة، وإن دي سنة الحياة، يموت احسن ناس، عشان يبكيهم رفقاؤهم، واللي خانوهم يحصدوا ثمرة مجهودهم، وقاعدة عشان اخفف عن نفسي اقرا كتاب مقاتل الطالبيين اللي بيرصد قتل سلسال سيدنا النبي وابو طالب.. طبعا حد حيقولي عشان تخففي عن نفسك تقري تاريخ قتل اهل البيت؟ جدا... على فكرة وانت كمان لو مكتئب وحاسس بالخذلان والخزي زيي لازم تقراه.. انت كمان لو جات لك لحظة قلت فيها وانا كان عليا من ده كله بايه؟ لازم تقراه اهو حمله لانه حيديك امل.. اه وربنا زمبؤلك كده..

هو صحيح انت حتقعد تقرا في ناس كل شوية حد يستغيث بيها تروح جري تغيثه فيطلع اللي بيستغيثوا دول اندال او عاملين لهم كمين، وكل شوية حد يكدب عليهم، وهم ما يرضوش يكدبوه عشان عيب.. افرض طلع صادق؟ يعني اخد ذنب اني كدبت صادق؟ ودايما قبل ما يتقتل اي حد فيهم، ربنا يمكن كل واحد فيهم من قاتله، بس هو ما يرضاش يقتله، ما يرضاش يقتله عشان ما بيحبش القتل غيلة وغدر، او عشان اترجاه وهو اشفق عليه، او عشان ما كانش ساعتها رافع سلاح عليه وهو مش عايز يعتدي في القتل، او عشان توسم ان لو اداله فرصة يعيش يمكن يتوب ويشوف الحق.. فتكون النتيجة، ان المعفي عنه اللي الاخ ما رضاش يقتله هو بالذات اللي يقتل هذا الشخص اللي عفا عنه... ده ملخص سير اهل البيت بالتسلسل، والغريب ان كل واحد فيهم بيعمل اللي ابوه وجده عمله بالظبط، ولما واحد قال لسيدنا زيد بن علي زين العابدين ما معناه: هو انتوا يا اخي ما بتتعلموش من اللي بيتعمل فيكوا؟ قال له برضه ما معناه: احنا بنعمل الصح.. وابويا وجدودي ما غلطوش في حاجة عشان اتعلم انا.. هم صح وانا باقتدي بيهم
وعلى فكرة برضه على طول الناس كانت بتلوم عليهم، اللي منهم يتصالح يقولوا له يا مذل المؤمنين، يا جبان، يا متخاذل ياللي عصرت لمون منك لله انت السبب في اللي احنا فيه.. ييجي حد منهم يقول خلاص بالاها عصر اللمون نتخانق.. يقوموا يخلعوا منه ويلاقي نفسه لوحده وبعد اما يموت يفضلوا هم هم نفس الناس يقولوا عنه: وهو ايه اللي وداه هناك؟ اه وربنا وربنا وربنا زمبؤلك كده.. مش مصدقني اقرا الكتاب.. وبرضه الناس تفضل تقولهم انتوا السبب، منكوا لله خربتوها.. انت بقى لما تقرا الكتاب ده حالتك حتتحسن كتير، لانك حتحس انك مش لوحدك، واهي ناس اهي.. اظن بقى دول احسن ناس في الدنيا كلها في الاولين والاخرين بعد سيدنا النبي والانبيا مافيش حد احسن منهم.. صح؟ اهم برضه حصل لهم اكتر من اللي بيحصل لك، وبنفس الطريقة، وبرضه بيعملوا الواجب والمبدأ حتى لو هم عارفين النتائج، وبرضه بيغيثوا اللي بيستغيث بيهم حتى لو هم عارفين انهم اندال وكدابين وامهم امريكانية، وبرضه ماشيين بمبدأ من خدعنا خدعنا له، ولما حد يقولهم: فلان ده كداب، يقولوا له عيب ما تكدبش الناس، لما يتبين كدبه ابقى كدبه انما من غير دليل ما تظلمش، وبرضه الناس طول الوقت تلوم عليهم وتقولهم انتوا السبب.............................. وبرضه عمرهم في حياتهم ما وصلوا للسلطة، ولو ربنا عارف ان السلطة فيها خير ما كانش ضن بيها على اهل بيت نبيه
طبعا مالكش دعوة بالسلفيين اللي حيقعدوا يقولوا لك ابو الفرج شيعي وكل الهلاوس بتاعتهم دي.. خليهم كده يقعدوا يطاردوا اشباح في خيالهم لحد اما يتجننوا زيادة ماهم مجانين، وقالك حزب النور لقى بؤرة شيعية مكونة من تلاتين واحد في معبد الكرنك وفي الاخر طلعوا ناس من قبيلة الجعافرة اللي مكونة حوالي نص الصعيد وممكن الموضوع يقلب بغم لان الصعايدة في الحاجات دي مش حيتفاهموا وياخدوا ويدوا في الكلام... المهم، ابو الفرج ده لا سني ولا شيعي، وما كانش بيستحمى اصلا عشان خاطر يتوضى ويصلي حتى، ده كان راجل صايع، الله يرحمه بقى، ومالوش غير في اللت والعجن في سير النسوان وفتنة الغلمان، بس كان من جهابذة الثقافة في وقته وجليس الخلفاء وكتب كتاب تأريخي، حتلاقي في النص كده مش قادر يقاوم ميوله للت في سير النسوان بس عموما دي بتبقى جملة او جملتين، حكاية او اتنين في وسط الاحداث التاريخية اللي بيسردها واللي موجودة عند الطبري وابن كثير وابن سعد في الطبقات، لان دي احداث ما يقدرش يزور فيها، وهو عمل الكتاب ده لإنه جزء من منجزه الثقافي ولإن دي شغلانته اللي بياكل منها عيش
مش قصدي انكد عليك.. انا عايزاك بس تعرف انك لازم تفضل تعمل واجبك، وتعمل الصح يا حزلئوم، ومالكش دعوة بالنتائج.. احنا كنا بنقف خمسين واحد على سلم النقابة، وساعات كنا بنبقى عشرة، ومرة ظبطت عمر اسد ومعاه اتنين صحابه هم التلاتة عاملين وقفة على سلم النقابة، وكان بيبقى قدامنا قد عددنا 1000 مرة عساكر امن مركزي، وما بطلناش ولا يأسنا، مش عشان كان عندنا امل ولا حاجة، عشان ده واجبنا اللي عملناه وحنفضل نعمله، وعشان انت مش لازم تندم انك عملت الواجب، وعشان مش لازم يوجعك ان لما قرايبك وجيرانك يبقوا عارفين انك "الواد او البت بتوع المظاهرات" فيفضلوا يقولوا لك: عاجبكوا كده؟ انتوا السبب في اللي احنا فيه... لان اللي بيقولك كده ما عملش حاجة، وبيلومك عشان عملت حاجة، واللي يقولك انتوا السبب قول له: انا اتسببت في الحاجة الوحشة اللي حصلت.. حضرتك بقى ما اتسببتش ليه في حاجة احسن؟ ولا انت قاعد في البيت مستنينا نغلط عشان تلومنا؟ وانت ما غلطتش في حاجة.. انت عاملت ضميرك، وفي كل الاحوال انت كسبان، لو مت تبقى شهيد، لو اتصابت يبقى جزء منك سبقك للجنة، لو اتحبست يبقى ارتاحت من وشوش عكرة قارفاك في عيشتك باللوم والتقريع.. وانا عايزاك تعرف ان ناس احسن منك وحصل لهم اوحش من اللي حصل لك، وفي جملة جميلة قوي في الكتاب ده بتوصف الناس اللي من اهل البيت اللي حبسهم ابو جعفر المنصور - وبالمناسبة العباسيين استغلوا اهل البيت عشان يوصلوا للسلطة وبعد كده قتلوهم وحبسوهم زي واحد صاحبي انت ما تعرفوش - الجملة بتقول: كانوا صبرا.. كسبيكة الذهب، كلما اوقد عليها النار ازدادت خلاصا
اذا كان احمد دومة اتحبس ولما الاخوان حبوا يشوهوا سمعته ما لقوش حاجة يقولوها غير: ده كان اخوان وسابهم.. كويس انهم عارفين ان الانتماء للاخوان معرة يتعاير بيها الانسان، واذا كان احمد ماهر اللي ساند مرسي بكل قوته، واللي فعلا لولا ان ستة ابريل ساندت مرسي في الاعادة كان زمان شفيق هو اللي رئيس دلوقت، واذا كان احمد ماهر كل الناس لامته، وبعضهم نبذوه، واتهموه في شرفه الوطني، وقالوا له يا خاين يا عميل يا امنجي يا اخوان خلايا نايمة ياللي اتفقت مع الامريكان عشان تجيبوا الاخوان ياللي طمعان في وزارة... واحمد حيطمع في وزارة من الاخوان ليه؟ لو كان طمعان في وزارة ما خدهاش من مبارك ولا المجلس العسكري ليه؟ اللي فاكراه ان ستة ابريل قالوا احنا حندعم مرسي رغم اننا عارفين ان المجلس العسكري حينجح شفيق، يعني هم وقتها كانوا معتقدين انهم بيراهنوا على الحصان الخسران، وللتذكرة، اكتر حد قدم شهداء في العباسية كانت ستة ابريل.. بس حازمون الانطاع نسيوا.. اذا كان جو الاسطورة مقبوض عليه، اذا كان جيكا وكريستي انتخبوا مرسي وقتلهم.. اذا كان علاء عبد الفتاح اتمرمط ايام مبارك عشان بيدافع عن الاخوان، وهو في محبسه ايام المجلس العسكري انتخب الاخوان في مجلس الشعب، ولما خرج عمل مسيرة تسليم السلطة لمجلس الشعب والاخوان ضربوه وعصر لمون وانتخب مرسي واخرتها يعملوا له ضبط واحضار عشان الاميرة جومانا... اذا كنت انت قاعد مستني دورك في القتل او الاصابة او الاعتقال... ما تزعلش... احسن منك وحصل لهم كده، وفي الاخر، مين اللي الناس خلدت اسمه؟ مين اللي ناس عملته ولي بتتبارك بيه؟ يعني انت حتموت ومرسي هو اللي حيعيش؟ ما كلنا ميتين... وكلنا مقابلين ربنا
"هذا يوم ينفع الصادقين صدقهم"

5 comments:

Unknown said...

فلسفه صراع الحق والباطل ف الاسلام
ممكن بشوية فصحة : كانت تبقى احسن .. وربما العكس هو الصحيح

Unknown said...

شكرا يا نوارة -المقال ده صبرني اوي اوي
انا كنت بدات اياس خلاص وبدات احس ان مافيش اي فايدة في الشعب ده واني يمكن بتعب نفسي على مافيش ويمكن كل اللي بعمله غلط بس كلامك جدا رفع معنوياتي
انا شاكرة لك من كل قلبي

https://twitter.com/ABEERALSIAGHI

muhammed said...

يارب بالمصطفى بلغ مقاصدنا... واغفر لنا ما مضى يا واسع الكرم
في الحقيقه انا من الناس اللي ماكنتش اظن خير في احمد ماهر، لكن انا اكيد ممكن اكون غلطان
لكن انا دايما بثق في رأيك اللي غالبا مش بيكون صح وده لحسن نيتك واندفاعك للخير، الا اني متأكد من رجاحه عقلك وشرف نضالك.. وعموما كل انسان يتشرف انه يكون عنده مروؤه مع اي حد حتى لو مره في حياته.. واحنا هانيجي ايه في آل البيت رضي الله تعالى عنهم ، شكرا ع الكتاب وع الامل اللي بين السطور لحد ما اقرا الكتاب

شمس النهار said...

انا مش تاعبني قد ان كانت رجلي مكسورة ونزلت علشان اشيل مبارك
اوم البس في الاخوان
بس اللي مصبرني اني ماانتخبتهمش لا في مجلس الشعب ولا مرسيكا
لأنهم انكشفوالي بدري بدري
بس انا حزييييييينة جدااااا
معقول الشباب ده كله يروح والمصابين والمفقودين اكتر من حرب 73
والبلد حاله بقا انيل
بس ارجع واقول
ان كده كويس انكشفوا واتفضحوا
تصدقي ان واحد اخواني بيقول لي هنبقا اغلبيه في مجلس الشعب
وهنشكل الحكومه ده علي اساس ان الحكومة دي متشكله من تنزنيا
بقول لك ايه
احمد ماهر ربنا معاه وهيستجيب لدعاء الناس كلها وهيخرج ويبقا زي الفل الدور والباقي علي اللي عملوا فيه كده التاريخ هيشرشحهم
لكن احمد ماهر الاجيال الجايه هتتكلم عنه بكل فخر وهيتسمي باسمه اهم شارع فيكي يامصر

samyqaid said...

اللة يتور يا نوارة بس الاخوان اولاد وسخة وفى ناس قالت من الاول لينا وانتى كانتى بتدافعى عنهم على اى حال كلنا بندافع التمن ومحدش بيتعلم ببلاش ,,,لى طلب ياريت ترجعى تكتبى فى المدونة زى زمان دية بيتك القديم وسيك من تويتر شوية