Thursday 28 February 2013

عن رحلة بورسعيد

بصوا.. انا الموبايل بتاعي لا بيصور ولا بيخش على النت، مع اني شارياه من مركز موبينيل اللي في الميرغني، اسمه هاواوي باين.. وقاطعين عني النت، كل ما اتصل بيهم يقولوا العيب في تليفونك، نروح لهم المركز يصلحوه ويرجع يبوظ تاني
فانا ان شاء الله حاستنى اما اقبض واجيب موبايل تاني.. لو الموبايل التاني ما اشتغلش عليه النت برضه يبقى لا لأخونة موبينيل
الخلاصة يعني انا حاحكي الرحلة كلها بس للاسف كلامي مش موثق بفيديو ولا بصور الصور والفيديو حتلاقوها عند محمد واكد ورامي غانم
+++
ايه اللي مخليني عايزة احكي اللي حصل كله في بورسعيد، اني قابلت راجل صوفي جميل كده، كان راكب عربية واحد صاحبه ولما شافنا في الشارع نزل مخصوص وقال لي: انت لازم تقولي كل حاجة، واهم حاجة تقولي مشاعر البورسعيدية اكتر من الاحداث
+++
انا عارفة ان فيه ناس بتخلط ما بين جرايم قتل وبين الكورة ومدخلين ده في ده، ومحولين جريمتين قتل الى منافسة كروية، اللي هم اولتراس اهلاوي واولتراس جرين ايجلز بدون ذكر اسماء، دول عايزين بورسعيد كلها تتحرق، ودوكهمة شايفين ان ماحدش من بورسعيد يتحاكم خالص، حتى لو قاتل، والمطلبين حاجة مش معقول، بس هو من امتى مشجع الكورة في اي حتة في العالم بيطلب اي حاجة معقولة؟ هو كده لجل بختنا المدوحس الحكاية اتكعبلت في مشجعين كورة، ما تقدرش تلوم مشجعين الكورة لان دي دماغهم، زي مشجعين الدين كده، ما هو الاسلاميين دول بيشجعوا دين مش مؤمنين بدين، حتى امي الست العاقلة دي بتشجع مرسي، مش مصدقاه، امي ست بتفهم يعني، فهي عارفة ان مرسي زفت وطين، بس ما ينفعش تقول عليه زفت وطين وهي بتشجعه، لازم تقول الحكم ظلمنا
انا باشجع كورة من زمان، وزملكاوية من تانية ابتدائي، يعني متدربة على "الحكم ظلمنا" دي وانا عارفة ومتأكدة انه ولا ظالمنا ولا نيلة، بس يعني حاطلع الفريق بتاعي حمار؟
الحقيقة انا شايفة ان تشجيع الكورة بوخ بقى، وحيتحول لجريمة في حد ذاته، وشايفة انه ابتدا يتحول لجريمة من ايام ماتش ام درمان اللي كان مع الجزائر... فاكرين؟ لما قاطعت الشعب كله وقررت اشجع اي فريق يلعب قصاد المنتخب
المهم مش دي قصتنا
قصتنا بقى ان فيه ضحايا راحوا، سواء من اولتراس اهلاوي ولا من بورسعيد، والاتنين مش حييجي حقهم
مش حييجي ابدا.. مش بس لان الحاكم ظالم، كمان لان المطالب بالحق مش عارف يطالب بحقه ولا يطالب بالماتش.. ولا حينفع ان بورسعيد كلها تتحرق او تتعزل او تتعاقب او يتقتل اهلها قتل عشوائي، لان مش بورسعيد كلها اللي قتلتهم، ولو مدينة بورسعيد كلها اللي قتلتهم مش حيبقى الضحايا عددهم 74 بس.. ولا حينفع ان 74 يتقتلوا في مكان وماحدش في المكان ده كله يتسئل حتى دول ماتوا ازاي.. مش كائنات فضائية نزلت قتلتهم يعني، وطول مافي طرف بيطالب بان بورسعيد كلها تتعاقب، يبقى اللي مات حقه مش حييجي من اللي قتله، وطول مافي طرف بيطالب ان ماحدش يتعاقب خالص يبقى بورسعيد كلها حتشيل الطين... وهي حلقة مفرغة، والله يخرب بيت الكورة على اللي اخترعها.. انا بطلتها من ايام الجزائر وربنا شفاني والحمد لله
لكن اهالي بورسعيد اللي مالهمش علاقة بالكورة، مش عايزين ان العدل ما ياخدش مجراه، بالعكس، هم كل شوية يبدوا استعدادهم انهم يتعاونوا مع السلطات لتقديم الجاني الحقيقي للعدالة.. بس هم مش شايفين ان السلطات عندها النية دي
+++
الزيارة لبورسعيد اتأخرت جدا، كان عندي امل اننا نعرف نعمل عصيان مدني، او حتى مسيرات مكثفة في القاهرة، وكنت شايفة اننا لو رحنا هبطنا على البورسعيدية وهم عاملين عصيان مدني يبقى بنحملهم عبء، هم حيتخانقوا ولا حيضايفونا؟
العصيان المدني جه على اثر قتل 30 واحد قصاد السجن، و7 في الجنازة
ومطالب العصيان المدني هو معاملة شهداء بورسعيد زي شهداء 25 يناير.. دي المطالب، لكن مش هو ده الدافع
الدافع الحقيقي واللي لمسته من اهالي بورسعيد انهم حسوا انهم بيتعاقبوا عقوبة جماعية على جريمة هم ما عملوهاش، وان الموضوع اتحول الى استقطاب كروي اكتر منه تحقيق العدالة، وده قلب عليهم كل المواجع القديمة قوي من سنة 56 لما واجهوا لوحدهم، وايام التهجير في 67 لما اتعاملوا وحش قوي في القاهرة، والحقيقة، باعتراف القاهريين اللي حضروا اياميهم هم عاملوهم وحش فعلا، عارف اللي امه بتموت وهي بتولده فابوه يكرهه لان ده بوز الفقر اللي اتسبب في موت مراته؟ اهو القاهريين اتعاملوا مع اهالي مدن القناة وقتها بنفس النفسية: دول بوز الفقر اللي مجيتهم كانت مع الهزيمة، مع ان دول كانوا جايين مصابين واللي جوزها مات، واللي ابنه اتسرع من صوت القنابل وبيجيله كوابيس، وبدل ما يلاقوا حد يخفف عنهم ولا حتى تشكرهم انهم شالوا المسئولية لوحدهم لقوا ناس بتعاملهم على انهم بوز الفقر، ده غير بقى يفط كتير مكتوبة للتذكرة بالمعاملة القذرة اللي اتعاملتها بورسعيد ايام مبارك بعد ما ظلم ابو العربي ولفق له تهمة وقتله، والراجل كان عايز يدي له شكوى.. مش يقتله زي ما مبارك اتبلى عليه
الخلفيات دي مهمة لفهم طبيعة اهالي بورسعيد، واهالي القناة كلهم، ومهمة لانهم بيجيبوا سيرتها، ومدام بيجيبوا سيرتها تبقى واجعاهم لحد دلوقت، ولو كانوا حسوا باي اختلاف ما كانش القديم اتقلب عليهم
اللي قلب عليهم القديم هو انهم حاسين ان الهدف من المحاكمة هو الانتقام من بورسعيد مش البحث عن الجاني الحقيقي ومحاكمته، لانهم هم نفسهم شهدوا في تحقيقات المدبحة على اللي قتلوا، بس لاحظوا في الاول ان بيتم القبض بشكل عشوائي على ناس مالهاش علاقة، ده غير ان الحكم بالاعدام صدر ضد ناس منهم واحد ما حضرش الماتش، وواحد اهلاوي كان جاي يشجع الاهلي، وواحد مش متوجه له تهمة اساسا في المحضر، وواحد متصور وهو حاطط ايده على كتف حسام حسن، الاهم من ده كله، واللي محسسهم ان الحكم مقصود بيه عقاب بورسعيد مش عقاب الجناة من بورسعيد، هو ان الداخلية لم يوجه اليها اي تهم ناهيك عن ان اي حد منها يتحاكم، لحد دلوقت، وبعد احكام الاعدام، ماحدش حل لغز قطع النور، ماحدش حل لغز الابواب الملحومة... طب هم كمان عايزين يفهموا مين اللي عمل كده، زي ما اهالي الشهداء اكيد عايزين يفهموا هم كمان ويعرفوا ليه عمل كده واللي عمل كده ضروري يتحاكم وياخد اعدام هو كمان
ده غير بقى ان الديفولت بتاعهم هو ان الداخلية بتتبلى عليهم، ومش بيصدقوا كلام الحكومة خالص، خصوصا بعد ما مبارك بذات نفسه وهو رئيس الدولة، اتبلى على واحد منهم وقال كان عايز يقتلني وعملي واوا في ايدي وهم كلهم شايفينه وهو بيديله ورقة فيها شكوى
وكل الناس بتجيب سيرة اي حد اتظلم من مبارك، وماحدش بيجيب سيرة ابو العربي اللي اتقتل ظلم، وكمان بورسعيد كلها اتعاقبت بذنب هو ما عملوش.. فعندهم احساس ان ايه بقى؟ هو انتوا ما عندكوش حد غيرنا تظلموه ولا ايه؟ حتى مش عارفين تقولوا لنا البقية في حياتكوا في اللي مات؟ للدرجة دي يعني هو احنا اسرائيل؟ ده انتوا بتعزوا في الاسرائيليين بخطابات رسمية
ولو تلاحظوا مطلب العصيان المدني: معاملة شهداء بورسعيد زي شهداء 25 يناير... وزي ما كلنا راسيين، شهداء 25 يناير ما خدوش غير طلب الرحمة.. يعني كل العصيان المدني ده عشان مرسي يبطل يقول على اللي ماتوا بلطجية، وعشان الناس تبطل تقول: احسن انهم ماتوا.. لحد دلوقت ما سمعوش كلمة: البقاء لله
+++
اول ما وصلنا بورسعيد رحنا عند السجن اللي حصلت عنده المدبحة، اول ما بتوصل بتلاقي على الناصية عمارة هي دي اللي كان واقف عليها القناصة، وفي شارع متفرع من الشارع الرئيسي فيه سوق في اخر الشارع ده السجن، كل اللي ماتوا واتصابوا كانوا في الشارع الرئيسي، مش في الشارع اللي فيه السجن، يعني بعيد خالص عن السجن، كلهم اخدوا طلق مباشر من القناصة اللي فوق العمارة اللي على الناصية، او من قوات الامن اللي كانت متقدمة على اول الشارع اللي فيه السجن
الشباب اللي استقبلونا مثلوا لنا الجريمة لانهم شهود عيان، كان في كشك متخرم، الكشك ده كان مستخبي وراه اتنين، واحد قال لصاحبه اقف ورايا وتعالى نستخبى ورا الكشك، الامن فضل يضرب على الكشك بالطلق الحارق لحد ما الشاب ده اتصاب في كتفه بطلقة دخلت في كتفه من قدام وخرجت من ورا وراحت داخلة في رقبة صاحبه اللي كان مستخبي وراه وقتلته، كان من ضمن القتلى واحد بيشتغل بياع على فرشة كان رايح السوق يجيب  حاجات للفرشة، ده غير الراجل القعيد اللي كلنا شوفنا الفيديو بتاعه، المصابين بيقولوا انهم كانوا شايفين قوات الامن وهم بينشنوا عليهم، يعني الضرب ما كانش عشوائي، كمان احمد خير الله قال لي انهم كانوا بيشوفوا ناس معاها مسدسات، كان الواحد فيهم يطلع فجأة يضرب طلق ناحية السجن ويجري يختفي، بعد الطلق بتاعه الداخلية تنزل ضرب في الناس واللي ضرب الطلق مش لاقيينه اصلا ولا عارفين هو اختفى فين.
بعدها عدينا على القسم اللي كان حاصل عنده مواجهات، لقينا الحيطان والعواميد الحجر اللي في الشارع متخرمة كلها بطلق كتير قوي، واحمد خير الله قال لنا برضه ان كان فيه ناس بتظهر تضرب من الشارع طلقة على القسم وتختفي، وبيقول ان اللي عايز يضرب القسم فعلا كان يقدر يطلع فوق اسطح العمارات، خصوصا انها قدام القسم مباشرة، وفوق السطح كان حيبقى الشرطة تحتيه فيقدر يصيبهم، لكن اللي كان بيضرب طلقة ويجري يختفي ده كان بيضرب من الشارع عشان الشرطة تضرب على الناس، بعدين بيضرب طلقة ليه؟ هي الطلقة دي حتعمل له ايه غير انها تدي مسوغ للشرطة انها تضرب الناس وخلاص؟
لما تشوف القسم، تلاقي عدد الطلق اللي على حيطانه ما يجيش واحد على عشرة من عدد الطلق اللي على الحيطان والعواميد اللي قدام القسم، يعني قصاد طلقة واحدة الشرطة كانت بتمطر الناس بالطلقات
بعدين رحنا عند الجبانات
كان حصل بقى لبس في مين اللي ضرب الجنازة، لان في بعض ناس قالت ان الجيش هو اللي ابتدا ضرب على الجنازة، بس اللي كانوا معانا، وهم من شهود العيان، قالوا ان اللبس ده حصل لان نادي الشرطة جنب نادي الجيش، وده اللي خلا الناس تفتكر ان الجيش هو اللي ضرب، والحقيقة ان الشرطة هي اللي ضربت
في روايات اخرى اتقالت بان كان فيه ظابط جيش جوه عربيته وان الشباب وهم بيحدفوا نادي الشرطة بالطوب جات طوبة على عربيته كسرت له الازاز وانه بعدها نزل وضرب نار على الجنازة فالشرطة ضربت نار على الجنازة
لكن الشهادة دي الشباب اللي معانا ما شافوهاش وهم كانوا حاضرين الجنازة، هم بيقولوا لنا ان فيه كذا حد قال لهم كده، لكن هم اللي شافوه بالظبط ان الجنازة كانت معدية، وان واحد رمى طوبة على نادي الشرطة فكان الرد هو وابل من الرصاص على الجنازة، وكلهم شافوا جثة واحد من الشهداء وهي بتقع والجثة اخدت طلقة في الراس وهي واقعة على الارض
الناس قعدت تلملم الجثث من على الارض، ولما وصلوا المقابر بقوا مش عارفين مين تبع مين، ما كانش فيه غير شهيد واحد بس اللي اسمه مكتوب على الكفن، غير كده الجثث اتلخبطت، وبقوا يفتحوا الاكفان عشان يشوفوا وش كل واحد ويعرفوا هو تبع انهي اسرة
الحقيقة الناس في  بورسعيد بيحبوا الجيش لسبب غامض، وكذا حد قابلني وقال لي: احنا كنا مش بنحبك عشان بتشتمي الجيش بس بقينا نحبك عشان قلتي كلمة حق عن بورسعيد
لما قلت لهم ان الجيش قتل صحابي، صمموا ان اللي قتل صحابي هم الطرف التالت اللي هم الاخوان، وان الجيش ما بيقتلش حد!
مش عارفة لحد دلوقت هم بيحبوا الجيش ليه؟ الشباب اللي استقبلونا بيقولوا ان الجيش له تاريخ مع بورسعيد!
تاريخ؟
تاريخ اسود ومنيل... سابهم لوحدهم في 56 وسابهم لوحدهم يواجهوا في 67... حتى في 73، اعتمدوا على المقاومة الشعبية، خصوصا في السويس - وبالمناسبة السويس بيحبوا الجيش برضه.. مش بيحبوه، لان السوايسة عادة مش بيحبوا حد احتياطي كده ليطلع ابن كلب D: بس مش بيكرهوه يعني - فانا مش فاهمة ايه التاريخ اللي بينهم غير انه بيضحك في وشهم ومش بيرضى يضربهم؟ هم كمان عايزينه يضربهم؟ يعني هم شايلين عنه وبيقاوموا مقاومة شعبية وكمان حيضربهم؟ ليه؟ هو اخوان؟
الخلاصة.. الكلام ده فضفضة بناتنا.. ماحدش يقول لحد بورسعيدي الكلام ده عن الجيش عشان حتتعور في وشك وحتزعل وتجيب ناس تزعل
+++
بعد كده رحنا القسم الشعبي، ولقيناهم كاتبين يفط كتير تريقة على مرسي، ومن ضمن اليفط اللي كنت عايزة اصورها يافطة بتقول انهم مش عايزين يستقلوا  ولا حاجة بس القسم ده عاملينه سخرية من الشرطة وعايزين يدوهم درس في كيفية اداء واجبهم كشرطة
عملت محضر في محمود عزت، وخيرت الشاطر، وحطيت اسم مرسي برضه ما يجراش حاجة اما اديله برستيجه على اساس انه رئيس وكده، انا عارفة يعني ان الراجل عبد المأمور ومالوش في حاجة، بس برضه ما يصحش الواحد يتجاهله، عشان سنه حتى
ووجهت لهم التهم الآتية:
* ادارة ميليشيات غير قانونية من شأنها ترويع المواطنين
* خيانة الوطن وبيعه
* القتل مع سبق الاصرار والترصد
وكل اللي كانوا في القافلة وقعوا تضامنا على المحضر
واحنا واقفين مرت عربية خضرا على الاعتصام ووقفت نزل منها راجل صوفي جميل قوي، وجه قالي كلام كتير انا مش في حل اني اقوله، بس وصاني اني انقل مشاعر البورسعيدية اكتر من اني انقل احداث شوفتها، ومشي
بعدها رحنا على الاعتصام، المطالب متعلقة وكان نفسي اصورها عشان بس الناس اللي عمالة تقول ده اعتصام القتلة تشوف المطالب بنفسها
قعدنا شوية مع الناس، بعدين ظهر راجل كده وقعد يزعق لنا ويقول احنا مش عايزين حد انتوا جايين "بتتزيدوا علينا وتتاجروا بينا" وكلام كتير كده مالوش لازمة، والناس اتخانقت معاه وخدوني بعيد عنه
الراجل ده واحنا ماشيين راح لمحمد واكد وقال له: احنا عايزين نبني مصر، لازم تتصلوا بخيرت الشاطر وتخلوه يتعاون مع رجال الاعمال عشان نبني مصر، ويتصالحوا بقى مع رجال الاعمال وهو وهم يبنوا البلد!
والله العظيم قال كده.. محمد واكد فتح بقه كده وبعدين قال له: نتصل بخيرت الشاطر؟ قال له: ايوه.. احنا تعبنا، وعايزين نبني مصر.. فواكد قال له: حاضر.. ههههههه طب حيقوله ايه طيب؟
بس انا مستغربة ان الراجل ده ما قالش: انا مش اخوان على فكرة بس باحترمهم
بعدها رحنا كلنا ساندوتش كده في مطعم اسمه مجدي وشوفنا خطاب مرسي هناك
بعدين رحنا بورفؤاد.. منطقة جميلة قوي
على فكرة انا باروح بورسعيد كتير قوي، من سنة 2006 وانا باروح دايما، كل ما الاقي نفسي مخنوقة اخد بعضي واروح بورسعيد، اركب المعدية رايح جاي، واقرا الفاتحة للشهداء اللي حفروا القناة، واكتب لهم جواب وارميه في المية، واروح ازور شهداء المقاومة في المقابر وارجع.. اول لما اعمل كده الكرب يتفك
بس كنت باركب المعدية رايح جاي من غير ما انزل بورفؤاد... تقول الاسطورة ان اللي يركب المعدية رايح جاي من غير ما ينزل منها الكرب بيتفك... وانا جربتها ونفعت :)
عمري ما نزلت بورفؤاد ولا شوفتها، هي منطقة راقية، زي الزمالك في القاهرة كده، بس طبعا مش زحمة وتلوث زي الزمالك، فيها الفلل بتاعة موظفين القناة الاجانب بتوع زمان، وتخطيطها حلو
رحنا حتة اسمها نادي الاسرة عشان نقابل النشطاء الثوار هناك، معظمهم مستقلين، وفيهم ناس في حركة اسمها رابطة ثوار بورسعيد او شباب بورسعيد مش فاكرة.. المهم يعني ان دول الناس اللي زينا كده اللي بينزلوا ينضربوا ويشموا غاز، ولما ما يلاقوش ضرب في بورسعيد ينزلوا لنا ينضربوا في اي محافظة فيها ضرب
واحنا في الاجتماع جه شاب كده وقال لنا لازم تروحوا اعتصام المسلة، الاعتصام ده لبعض الشباب البورسعيدي ردا على كلام مرسي بان اهالي بورسعيد بلطجية عشان عاملين عصيان مدني.. خلينا مجموعة منا قاعدين مع الشباب، ورحت انا مع المجموعة اللي رايحة اعتصام المسلة
لما رحنا اعتصام المسلة جبنا لهم مصيبة
ما تعرفش بقى الظاهر اننا مرصودين من ساعة ما جينا، او الظاهر ان مجيتنا دي عملت قلق لبعض الاطراف اللي انا لسه ما اقدرش اجزم هم مين.. بدليل ظهور الراجل بتاع كلموا خيرت الشاطر عايزين نبني البلد ده في وسط الاعتصام الاولاني وهو بيزعق لنا ويقول لنا امشوا من هنا مش عايزينكوا.. ولما غلسنا وما مشيناش جاي ورانا يقول لنا كلموا خيرت الشاطر!
لما وصلنا عند اعتصام المسلة في بورفؤاد كان العدد قليل قوي، خيمتين بس، وشباب بعدد قليل، وكل همهم يقولوا لنا: وصلوا للناس ان احنا مش بلطجية، احنا طلبة جامعة، وولاد ناس، ومحترمين... وكلام كده من اللي يوجع القلب
بعدين واحد منهم قال لنا ان السلفيين اتصلوا بيهم وقالوا لهم انهم عايزين ينزلوا معاهم ويتضامنوا معاهم على شرط ماحدش يشتم مرسي!
فانا طبعا وداني سخنت، وسلمى فؤاد شعر راسها وقف، وقلنا لهم ينزلوا معاكوا ليه؟ الجدع لسه بيوضح لنا انه مجرد بيحكي لنا الواقعة ما ادينالوش فرصة.. وانا بقى اتفتحت كالعادة، وقلت له دي ناس ما بتعرفش ربنا، دول انا نزلت معاهم في العباسية ورجلي اتفتحت وكانوا بيتحاموا في ضهري انا ورشا عزب في الاخر الاقي نفس الوشوش اللي كانت بتتحامى فيا في العباسية نازلة شايلة شوم علينا في الاتحادية.. دول ما يعرفوش ربنا خالص.. وسلمى تقول له: هم حيتشرطوا عليكوا ولا حيربوكوا، عايزين ينزلوا ينزلوا بشروطكوا، يعني ايه ما تشتموش مرسي؟ الجدع قال لنا: والله انا عارف ده كله، بس انا باقولكوا يعني ان حتى السلفيين قلبوا عليهم.. فقلت له: دي تمثيلية عشان يحجموا الحراك بتاعكوا، يعني ايه حننزل معاكوا بس ما تشتموش مرسي؟ امال انتوا هنا ليه؟
واحنا واقفين كده اذ بينا نفاجأ ان ناس ابتدت تهل على الاعتصام اللي كان مهوي اصلا.. قلنا خير وبركة، وانا مش من عادتي اشك في الناس بطريقة: "اشكال غريبة" اللي دايما الثوار يقولوها دي.. اشكال غريبة اللي هو ازاي يعني؟ طالع لهم ديل؟
بس الظاهر اني غلط.. لان محمد موسى بقرون استشعاره ابتدا يحس فعلا ان فيه "اشكال غريبة" دخلت الاعتصام بعد دخولنا بعشر دقايق، فجه قال لي: يالا يا نوارة بسرعة من هنا... 
وانا خارجة لقيت واحد وقف في وشي وقال لي: وانت بقى يا استاذة مش عايزة ليه تقولي الجيش والشعب ايد واحدة؟
قلت له: عشان قتلوا صحابي
قال لي: يعني مين اللي حيمشي الاخوان يعني؟
فانا ومحمد موسى في نفس واحد قلنا له: والله لو الجيش نزل يمشي الاخوان احنا مش حنعترضه ولا حنمنعه.. بس انت شايف انه نزل يمشيهم؟
ولو كان عايز يمشيهم جابهم من الاصل ليه؟ والله لو نزل قتلهم يبقى عدل ربنا بعد ما قتلوا كل الناس دي.. بس لو عايز يقتلهم بجرايمهم ما كانش قتل صحابنا من غير جريمة
فجأة لقينا عدد كبير تكأكأ علينا، قام محمد موسى غامز رامي غانم عشان يمشيني، راح رامي ساحبني انا وسلمى ومروة ومعانا راجل كمان في القافلة معلش نسيت اسمه، وموسى يا عيني هو اللي اتزنق في وسطهم واستملوه
المهم يعني رحنا نتضامن مع الناس بوظنا لهم اعتصامهم ومليناه تحريات
رجلنا خضرا
رجعنا على نادي الاسرة وانا كنت خلاص ابتديت اعمل شات داون، وحاسة اننا مش بنعمل حاجة مفيدة، فقلت لهم خشوا قولوا لمحمد واكد يبطل كلام عشان نلحق نروح الدنيا ليل وفي شبورة
كل واحد يخش يفشل طبعا يسكت واكد D: لحد ما قلت ما بدهاش بقى، حاخش امارس سلطاتي واسكته عشان نمشي
وبالفعل ما يجيبها الا نوسة، ماحدش عرف يسكته غيري
وركبنا الميكروباص عشان نمشي، واحنا ماشيين عدينا على الاعتصام اللي خربناه ده، لقينا اللي كان فيه خمسة بالعدد بقى فيه حوالي الف واحد بالتزامن مع خبر قراهولنا رامي بدعوات لتوكيل القوات المسلحة لادارة شئون البلاد
تاني يوم عرفنا ان السيسي رفض التوكيلات دي :)
رميت الورد طفيت الشمع يا سيسي
ناس غلبانة قوي.. يعني طنطاوي قعد سنة ونص يجهد فينا بمدابح شهرية عشان يعبد الطريق للاخوان ويسلمهم البلد وبعدها يجيب لهم السيسي وفوقيه بوسة وياخد القلادة عشان في الاخر الجيش يقلب على الاخوان؟ طب كان ليه من الاول عمل كده؟
وقال على رأي واحد على التويتر "مش اخوان بس بيحترمهم" قال: بقى الجيش حينزل يضرب اللي وقفوا معاه بعد الثورة عشان ينقذ اللي كانوا بيسبوا له من القتل؟
اخيرا للاخوة اللي قاعدين مستنيين السيسي اللي راح يجيب ورقة بوستة وجاي: اللي عايز يعمل حاجة بيعملها ما بيشتناش توكيلات، بقى كل القتل ده ما يحركهمش واللي يحركهم توكيلات ووقفة عند المنصة الجمعة دي؟ ايه الغلب اللي انتوا فيه ده؟ انتوا عمالين تبعتوا جوابات لواحدة بتحبوها على العنوان اللي غيرته بعد ما اتجوزت واحد غيركوا
ومن وجهة نظري المتواضعة، التوكيلات دي اتعملت مخصوص عشان تزود من عزل بورسعيد، وتخلي ناس كتير ما تضامنش معاها، يعني انا ما رحتش الشهر العقاري، بس مراسل اون تي في قال انه راح الصبح يشوف العدد اللي رايح يعمل توكيلات لقاهم ما يزيدوش عن 50 نفر، ومع ذلك المستشار قفل الشهر العقاري عشان الخبر يسمع ويتنشر في الجرايد، وكل ده بهدف تحويل مطلب العصيان المدني من حق الشهداء الى المطالبة بنزول الجيش اللي مش كل الناس موافقة عليه، زي ما اتحول مطلب اولتراس اهلاوي من حق الشهداء الى عقوبة بورسعيد اللي برضه مش كل الناس موافقة عليه
انا باعامل ضميري... ومش طالبة غير رضا ربنا ولو على سخط الناس
والله الموفق والمستعان

13 comments:

مش فاهمه said...

نوارة انتى صعبانه عليا انتى مش بتقرى المدونات بتاعتك انتى نسيتى التحريات العسكرية اللى كانت ماليه التحرير وقت ماكانش فيه فى الأعتصام فى التحرير غير 18 نفر يا نوارة ارحمى نفسك و ارحمينا ماينفعش ثورة من غير عدد كبير الناس مش مصدقاكم اعملوا حزب اعملوا جمعيه اعملوا اى حاجه مش حاينفع كده انى بلكتنى على التويتر و انا من الناس اللى دلوقتى بتعيب عليكى الاندفاع الأعمى بتاعك ده اسمعى كلام صافى هى صح و الله و انتى فكرى شويه مش صح اللى بتعملوه كفايه كده بهدلتوا الثورة معاكم و الثوار

Unknown said...

يا راااااااااااااااااجل؟
طب ياريت مافيش دين ام اخوانجي يخش هنا

мεййα‏ ‏ said...

موفقاكي جدا ف موقفك اتجاه العسكر

بس الناس معذوره
مرسي وحكومته ضاربلهم طناش
ولا معترفين باللي بيحصلهم اساسا

والناس ف المدن التانية بارده كده وكأنها مش شيفاهم


مش لاقين قدامهم غير نزول الجيش

وانتي ف المدونة قفلتي ف وشهم حتى الامل ف الجيش
ومدتيش حل !!!!!!

فييييييييييييين الحل طيب

sabrafamily76 said...

أولاً يا نوارة أنا بقولك ربنا يجبر بخاطرك ويطعمك ما يحرمك يا رب علشان جبرتي بخاطر الغلابه مجيتك انتي وأصحابك على عينا ورسنا . ثانياً أنا بورسعيدية وكنت قبل الثوة بحب الجيش وباحترمه لكن بعد اللي عمله في مصر وبعد اللي عمله في الثوار من أيام مسرح البالون مروراً بماسبيرو ومحمد محمود والعباسية بقت معزته هو وظباته في قلبي ذي معزة مبارك والإخوان . كلامي ده علشان أقولك إن مش كلنا مع الجيش بس للأسف الغرقان بيتعلق بقشة وفيه ناس مستعدة حتى ترجع مبارك علشان الإخوان يغوروا وتفكيرهم قاصر ومش بيفكروا في العواقب . فضلاً على إن هما بيبعتوا للبورسعيدية جنود وظباط جيش من أولاد البلد ففيه ألفة وفخر بيهم .

Nahla Elnemr said...

والله لو الجيش نزل يمشي الاخوان احنا مش حنعترضه ولا حنمنعه-
معلش انا فهمت من الجملة دى ان انتى موافقة الجيش يرجع، صححيلي لو أنا مفهتمش

hosam alaa said...

Radiohatfm
Radiohatfm UK
Science Blog
UK Channels
Egypt Jobs
Egypt Visiting
Gold Mining
Nogoom FM

Dr.issamo said...

حمدالله ع السلامة

Dr.issamo said...

حمدالله ع السلامة

علان العلانى said...

بداية حمد الله على السلامة
عن رحلة الثورة " ..فصل ووصل"

الشعب أَصْدَقُ إِنْبَاءً مِنَ الصحف .. في فعله الحدُّ بينَ الجدِّ واللَّعبِ

الثورة بطبيعتها لاتتفاوض مع واقع هي من يشكله أنماهي تتموقع بين جدلتين جدلية قطيعة مع ما قبلها وجدلية تأسيس لواقع يستجيب لشروطها ، إذا أتفقنا على أن الشعب كيان متخطي النوع والفصل والجنس والطبقه والعقيدة، وهو كتوصيف مادي أساسه "الوجود معاً بصحبة الآخرين" والشعب كقرار وإردة ليس مع أو ضدالآخرين بل هو قرار من أجل أو ضد ذاتنا والانتماء فيه هو شكل من أشكال الاجابة فى مواجهة التاريخ، وهو بهذا مسؤولية فى مواجهة المصير العميق لوجودنا فى التاريخ ووجودنا هنا في هذه اللحظة. فالثورة بوصفها فعل متراكم يتشكل ويحدث ثغرة تمثل قطيعه زمنية بين ما قبل وما بعد؛ فهنا وبقدر انتباه الشعب لفعله فى التاريخ يتشكل مصيره، "هنا والآن " وفى خضم هذه الخلخلة تلملم كل القوى المتصدية للفعل السياسي كل رصيدها من "الوعي" بالممكن التاريخي للأجابة عن سؤال المصير الذى لن يكون بدون رؤية متجاوزة لكل ما أنتج الثورة نفسها وجعلها هكذا واقع شعبي. • فى هذا الفعل "الجد" الفائق الخطورة والمتخطى لكل شرعية سواه تتطاحن الشرعيات الهاوية فى الثغرة التى أحدثتها الثورة مستبيحة كل الوسائل بغريزة البقاء والحضور فعندما إراد الشعب على جناح الثورة أسقاط النظام ، كان يعبر عن الجدلية الأولى وهى جدلية القطيعه وهى جدلية تكسير عظام بطبيعتها وضريبتهاالمبذولة دم وهذا الدم هو العقد بل هوجوهر الإرادة الشعبية ؛ وحد الدم فيها نسيج المجتمع بكل عناصره وطبقاته وتغيب الدم أو تهميشه وهو عتبة المرور لأختراق جدلية التأسيس لواقع يستجيب لاستحقاقات ثورة الشعب كان هذا الأختراق بداية الوهن وبداية الخلل فى التأسيس لواقع ما بعد الثورة . فطبيعة الصراع السياسي ما بعد الثورة أنما يكون على المستقبل المستحق والمستجيب للأستحقاقات الثورية والشعبية ، وحقيقة أنه لاتوجد قوى سياسية قادرة على الاستجابة للأستحقاقات الثورية بداهة سياسية فما تم بإرادة شعبية متخطية ومجسده لشرعية تنتج و تصنع السياسات لا تمررها، والحتمية المترتبه على أليات التغيب والتهميش للدم هو التدرج ليكون الفعل الثورى هو مجرد صراع على السلطة لا على المستقبل ، فما دون الدم هو مجرد أختلاف على "الشكل" لا الجوهر وهذا إرتداد لخطاب ما قبل الثورة وهذا هو ما يشكل مظاهر التيه التى تكتنف الفعل الثورى فى هذه المرحلة ، وهو لا يتم بإرادة قوى "الثورة المضادة الداخلية والخارجية وحسب" بل بدأ فى تخطى ذلك الى القوى المقاومة الما قبل ثورية ذاتها ويسحبها بقوة جذب باغرقها فى تفاصيل الشكل لتلوذ بشرعية الخطاب المعارض الما قبل الثورة بسب الطبيعة الحتمية لعمليات التشكل المرنه لخطاب ما بعد الثورة وحقيقة عدم تشكلها هى ذاتها ككيان تحت مممكن سياسي بطبيعته يفاوض لا يملى بإستلهام إرادة شعبية ، وبحكم غياب رؤية ما بعد ثورية نهايك عن خطاب ما بعد ثوري فى مواجة خطاب يقاوم الأفول ويستميت بغريزة البقاء بتفجير صراع طاحن تشريعي وقانوني على المفاهيم والتعريفات التى استقرت فى ظل هيمنة خطاب المخلوع هذه أحبولة قوى الثورة المضادة الداخلية والخارجية؛ أما فخ قوى المقاومة الما قبل ثورية فهو نفسه شرعية خطاب المقاومة المستمده تلقائيا من حقيقة مقاومتها للنظام السابق تحت أفق خطابه وأن كان هذا لاينفى كونه خطاب "غير ثوري" بقطبيه الأسلاموي والعلمانوي واللعب هنا يتموضع فى كون هذا الخطاب فى جوهرة لم ينطلق حتى الأن من فائض القطيعة التى أحدثتها ثورة الشعب ويكتفى بشرعيته الما قبل ثورية كأنها شرعية متخطيه الثورة ذاتها وهذا يهيئى لذهنية أن الثورة جائت لتحقق له التمكين ، فى حين أنه بوعى او لاوعي يعاود ترميم الخطاب الما قبل ثوري على نفس الثوابت وأخطرها على الاطلاق (التبعية ) التى تكافح قوى الهيمنة لترميمها بما لها من نفوذ على جميع القوي فى الداخل مستخدمه فى ذلك لأختراق العريض لكيان وجسم دولة المخلوع ولكل ادواتها الخشنه قبل الناعمه فى الداخل وفي الخارج بآليات مؤسساته النافذه دوليا وعملائه فى الأقليم.
وبعد أقول
البداية دائما نصف كل شىء وقد جاء فيها على لسان الشاعر:ا

يا شعب ياللي دفع ثمن الشوارع دم... احفظ اسامي اللي ماتوا في الشوارع صم... الشارع اللي اصطفي وقصر الامارة لم

فافى said...

بس يا نواره السيسى لازم يرفض التوكيلات دلوقتى لأن زى ماقلتى لو هاينزل مش هايستنى توكيلات. من حد لكن ده مايأكدشى ابدا انه مش ناوى ينزل :))) بس فى اللحظه المناسبه لما الدم يكتر اكتر من كده يمكن ينزل

samyqaid said...

اخيرا رجعتى للمدونة مبروك التصميم الجديد بس ياريت تخالينى اصمم ليكى احسن منة http://semsam.blogspot.com/ http://3alymntni.blogspot.com/ https://twitter.com/samy_qaid

hosam alaa said...

مشاهدة اعادة محاكمة مبارك اونلاين هنا

mahmoud said...

شكرا للموضوع

http://forums.my-egi.com منتدى ماى اجى