Tuesday 20 December 2011

بالنسبة لحملة الارهاب

انا نمت ست ساعات صحيت لقيت الناس كلها بتتكلم عن 100 بنت محتجزين في مجلس الشعب وبيتم اغتصابهم!
مين اللي ورا الكلام ده، واحد اسمه حسام عامر.. اللي ان شاء الله لما اشوفه حانسل كل ما يلبس في القدم على دماغ امه ولو راجل يوريني وشه، حيث انه زمان كان كتب عليا نوت ان انا معمول عليا كنترول وحلف بالله.. والله العظيم حلف بالله، انه شاف بنفسه الصور المخلة بالاداب اللي ممسوكة عليا من المخابرات.. ومافيش حد صدق على كلامه ونشر كلامه غير اتنين: ايمان بدوي وواحدة اسمها نورهان رمضان، وان شاء الله ربنا يوري ايمان بدوي دي في بنتها، حيث انها واكلة معايا عيش وملح، ومش حادعي على نورهان رمضان لان ربنا مش حيعمل فيها اكتر من اللي عامله في مخها وقال ايه الصور دي متاخدة لي مع واحد اسمه م ج.. وكل اللي يخش يقرا النوت بتاعته يضحك... 
:D
بتضحكوا على ايه يا مجرم انت وهو :)))) لعلمكم انا مخلة ومن زمان، وعملت في خلل علامات.. الخلاصة يعني الناس دخلت قالت له يعني انت مخابرات؟ ولا انت م ج ولا ايه بالظبط؟ ما هو يا نوارة اللي قالت لك وده مش ممكن، يا المخابرات اللي قالت لك وده معناه انك مخابرات.. وموضوع ان ماحدش شك فيا خالص دي عمل لي عقدة نفسية ههههههههههههههههه مش شاكين في سلوكي ليه؟ انا رحت على اكاونت حسام عامر ده عشان اطلع النوت بتاعته اللي كتبها عني ولقيته شالها... بس برضه لو شفته حانسل الجزمة والصندل على دماغ اللي جابوه..
طيب.. لو انا صديقة م ج ومعمول عليا كنترول يبقى فيه 100 بنت في مجلس الشعب بيغتصبوا
انا مش باستبعد عن المجلس العسكري والجيش انهم يعملوا كده واوسخ من كده كمان، هو فيه اوسخ من انهم يقلعوا بنت في الشارع؟ بس الاخ اللي مطلع على المخابرات وبيقسم بالله انه شاف صوري المخلة (انا بس ما غاظنيش في النوت دي غير انه قال ان الصور المخلة دي اتاخدت لي في عربية... اخصصصصص.. انا عربية؟ ليه؟ عربية ايه؟ ايه الجربوع ده؟ يعني يوم ما اقرر انحرف انحرف مع واحد مش لاقي يأجر اودة في اوتيل تلات نجوم؟ يعني مطلعني جربوعة كمان؟ طب مخلة قشطة.. الصيت ولا الغنا.. لكن جربوعة لا.. جربوعة لا.. ده ناقص يقول اني حاطة مانيكير مقشر من غسيل المواعين.. المانيكير المنقط احمر فابيض ده، عارفينه؟ ولابسة التحجيبة ام ترتر وحاطة روج احمر محدداه بقلم نبيتي.. كمان اتغاظت لما العيال قعدوا يقروا النوت ويضحكوا ولاد اللذين لا وكمان يشيروها على انها نكتة ههههههههههه)
طب حيث انك راجل مطلع على المخابرات يا ريت تقول لنا يعني ازاي العساكر يقولوا لواحد معدي كده ان الصناديق دي فيها جثة بنتين ماتوا من كتر الاغتصاب؟
حاجة من الاتنين.. يا اما الكلام ده صحيح، وفي الحالة دي الواد ده مخابرات، يا اما الكلام ده مش صحيح وفي الحالة دي الواد ده مخابرات برضه... او فتاي.. او مخبول.. لان الغرض من الكلام ده هو تخويف البنات انها تنزل، وانا شايفة ان الجيش بيبذل جهد كبير عشان يخوف البنات انها تنزل، ليه عايز يخوف البنات؟ عشان الرجالة ما بيخافوش على حاجة غير الستات.. فمش بس مش حينزل امه ومراته واخته وبنته، ده هو كمان ممكن يخاف ينزل لبعدين يتقبض عليه ويتعمل حاجة في حريمه.. ده تصور العسكري يعني، غالبا تصور غلط لانه عادة متخلف عقليا ومش بيفهم حاجة في حياته، الناس حتنزل اكتر على فكرة 
انا مش باقول المعلومات صحيحة ولا مش صحيحة، انا بس باسأل كام سؤال
فيه 100 في مجلس الشعب.. مافيش 5 منهم لهم اهل يسألوا عليهم؟ مافيش اسرة واحدة من الخمسة دول عرفوا يوصلوا للتلفزيون؟ انا بقالي يومين باسمع كلام مرسل عن فظائع بترتكب في مجلس الشعب
اللي انا اقدر اصدقه بشكل كبير ان فيه عدد غير معلوم محتجز في مجلس الشعب واكيد بيعذبوهم، امال يعني بيآنسوهم؟ فيه بنات ولا لا؟ ما اعرفش.. ممكن آه ممكن لا.. بس 100 دي واسعة قوي.. فيه اغتصاب ولا لا.. برضه وارد، الجيش اللي يقلع البنات ويكشف على عذريتهم وارد يعمل كده، لكن مش اكيد.. ووارد جدا ما يعملش كده عشان هو مش عايز فضايح اكتر من كده كمان
الخلاصة، عشان مصداقيتنا، وعشان ما يبقاش شكلنا وحش قدام الناس، وعشان ما يبانش اننا ظياطين وبنقول كلام مرسل ما نروجش كلام احنا ما نعرفوش ومش متأكدين منه، ونعقل الكلام، واللي يقول كلام زي ده يقول انا مستعد اشهد
يعني اللي شاف صندوقين فيه ميتين، ما صورش ليه؟ ممكن يبقى معاه تليفون معفن.. طيب، يروح يقدم بلاغ، انا عارفة ان البلاغ ده نبله ونشرب ميته، بس ده تأكيدا لصدق اللي شافه عشان لما نعمل حملة ونقعد نروج لكلام يرعب البنات والاهالي بالطريقة دي نبقى حاسين اننا مركونين على شهادة واحد اتخذ كل الاجراءات اللي تخلينا ما نكدبوش
وبرضه انا ما اصدقش واحد زي ده.. مش بس عشان قال عليا الكلام ده بس عشان متخلف عقليا ومش عارف يألف كدبة محترمة تتصدق وبس ما نابنيش غبر الناس تشاور عليا وهي بتتشقلب على ضهرها من الضحك: هاهاهاااااع مخلة مخلة.. واستلموني بقى: صباح الخير يا م ج.. ازي م ج يا نوارة؟ بيقولوا م ج بيبعت لك كلمني شكرا او بيكلمك من خدمة "ادفع لي شكرا".. هي العربية نوعها ايه؟ 127 بيضا؟ انت بقالك شوية مش على التويتر.. اوعي تكوني نزلتي تقابلي م ج
نستنى ونشوف على الاقل واحدة منهم تخرج لو فيه او اي حد من المعتقلين نعرف نوصل له باي طريقة.. ما هو لو حاجة زي دي ربنا مش حيسيبهم، ده ربنا كبير قوي وحيوصلنا لهم
وبرضه ما بنخافش.. ومش حيحصل لنا غير المكتوب
واي حد ضد العسكر خصوصا البنات والشباب اللي بيواجهو في الصفوف الاولانية يقروا ده

66 comments:

Bean Ender said...

الله ينور يا نوارة، و برضه لسه مختلف معاكي في قضية السلاح

Mike Cyril said...

نجحوا يخلوكي تتلهي في موضوع غير الثورة . و اجرام طنطاوي

ayman abdelrazek said...

انتي نجمه بنت نجم يا نواره
سيبك بقي من الموضوع الساقع ده انا عندي اطروحه كده يمكن تناسب الهبل اللي إحنا شايفينه
ليه مايكونش في طابور خامس داخل المجلس العسكري بيشتغل لصالح طره وسوزان ومخترق المجلس تماماً وهو المسئول عن المهازل دي كلها وممكن يكون المخابرات العسكريه والعامه تعمل لصالح هذا الطابور وذلك بعد ان اكد لي احدهم انا عمر سليمان يذهب لمكتبه في المخابرات يومين علي الاقل أسبوعيا لو الطرح ده منطقي يبقي ايه الحل ؟

كيوبيد said...

ايوة كده هو ده الكلام انا بقالى فترة بقرى بوست سورى مافيش فية اى جديد ولا لية لازوم. لكن ده فعلا كلام فى التمام وسلام غالى حاير طاير من الصعيد الى المدعو م ج هههههههههههه

falcon heaven said...

i hate u

falcon heaven said...

i hate u

falcon heaven said...

i hate u

الحادثة said...

معلش يا أبو النور ... بس م . ج دى اختصار مسلح جدا ولا مشلح جدا

ahmad said...

يا نوارة انت دايما نوارة ورنا يخليك لينا دايما نوارة
بس اختلف معاك في حكاية الحزب السيفي دي الجماعة الصوفية دول عليهم شوية خزعبلات وبالذات حكاية الاجازة دي وبعدين واحد كاتب بيقولك ايه انا خايف اقراه من غير اجازة
يا اخي الله سبحانه وتعالى قال ادعوني استجب لكم
بدون وسيط ولا اجازة ولا كلام فارغ
نوارة اعز الله وسدد خطاك

Emtiaz Zourob said...

لا حول ولا قوة إلا بالله

حتى اعراض البنات لم تسلم من اذاهم وشرهم

حسبي الله ونعم الوكيل .. يقذفون المحصنات باقذع الشتائم .. يا ويلهم من ربهم

احلام جوليا said...

وبعدين يا نواره رايحين بمصر على فين بالضبط لا حول ولا قوة الا بالله يارب سترك يارب

Wardaya said...

على فكرة اسلوبك نفس اسلوب كلامك عن ضباط 8-4 الي مظنش انك اعتذرتي عن غلطك فيهم و لا هتعتذري و ده الي يخليني اصدق حسام ، و على فكرة الكلام ده مصدره مش حسام بس اكتر من حد اتكلم عليه ، نفسي بس تسكتي شوية و تبعدي بدل مكل شوية تضللي الناس و تعطلي الثورة اكتر مهي عطلانة

samsaad said...

نواره اتقي الله شويه انا كنت قاعد مع ايمان بدوي من اسبوعين كدا وكل مره حد بيجيب سيرتك قدامها بالغلط بتاكله وبتقول انا مختلفه معاها اه وممكن نقطع بعض بس نواره اشرف من كتير بيتكلمو عليها كفايه اتهامات بالباطل

متفائل said...

لا أعتقد أنك منحرفة .. لا .. لا .. لا .. ما تركبش خالص دي .. إنت مجنونة مختلة آه .. بلا منطق واضح في التفكير آه .. ما تعرفيش اللي يوضيكي من اللي - لا مؤاخذة - يخريكي آه .. ضحلة الثقافة السياسية بصورة فاضحة آه .. ثم إنك حتى لو حاولتي تبقي منحرفة مش حتعرفي .. المنحرفة دي - قبل ما تكون منحرفة - لازم تكون مغرية بينما سعادتك - ولا مؤاخذة تاني - لا نصيب لك مطلقاً من موضوع الإغراء ده .. حتجبيه منين يعني ؟ ده الأب نجم والأم صافيناز وما يقدر على القدرة إلا ربنا

أبو أمك said...

إبقوا شيلوا الميتين اللي تحت

hardway said...

سكسكة ما رأيك..غرفة في أوتيل 7 نجوم
تطل شرفتها علي البحر الكاريبي....
نعمل أوكي...في أنتظارك

M7mdb7r said...

تسلمي علي الدعاء يا نواره ,, مع انه صعب الحفظ ,, وهايخلينا نطبعه ونوزعه ,, " فكك من الناس التافهه " السؤال المهم دلوقتي بقي ,, الـ مـ ج كان فيه أيه نسكافيه ولا شاي علشان الانحلال بيفرق لو شاي ننزلك معاك كيك D:

Unknown said...

لا بضر السحاب نبح الكلاب يا نوارة يا أميرة

Unknown said...

ألف تحية لك من تونس

mohammadheaba said...

ولية متفترضيش ان الجيش عارف هو بيعمل اية وقصده يروج الاشاعات دى علشان الناس تنزل اكتر ويعرف يلوى دراع الاخوان وهوعارف ان الدنيا هتهدى تانى مع المرحلة التالتة للانتخابات زى محصل فى محمد محمود ويبقى احبط الثوار كمان وضرب عصفورين بحجر

mohammadheaba said...

ولية متفترضيش ان الجيش عارف هو بيعمل اية وقصده يروج الاشاعات دى علشان الناس تنزل اكتر ويعرف يلوى دراع الاخوان وهوعارف ان الدنيا هتهدى تانى مع المرحلة التالتة للانتخابات زى محصل فى محمد محمود ويبقى احبط الثوار كمان وضرب عصفورين بحجر

mohammadheaba said...

طب لية ميكونش الجيش عارف هو بيعمل اية وقاصد يخلى الناس تنزل اكتر ويلوى دراع الاخوان اكتروياخد منهم اللى هو عايزو وبعد كدا الموضوع هيهدى مع المرحلة التالتة زى محصل فى محمد محمودوبكدا كمان احبط الثوار وفهم الشعب انة اكبر من الثورة وضرب عصفورين بحجر

heroo said...

بصى يا نوراة يا بنت عم احمد نجم الصغير الجسم كبير القامة والعقل ............ اللى رماكى بالباطل بكرة نسمع عن عرضه بينتهك من طوب الارض رغم اننا ما نتمناش كده ثم يا نوارة دنتى جزمتك بمليون راجل وبمليون شنب من الشنبات العيرة اللى بنشوفها كل يوم ................يانوارة نجم انتى والبنات اللى زيك جزمكم برقبة ملايين من الرجال او اشباه الرجال اللى نازلين شتيمة فيكم ورميكم بالباطل ..........يانورة يا نجم انتى والبنات اللى زيك فى الميدان والشباب اللى فى الميدان اشرف واعظم من انجبت مصـــــــــــــــــر انا فى السعودية وبحاول انزل مش عارف بس لو نزلت هنام فى التحرير ومش همشى ولو على موتى لحد ما يغور احقر رجال مصر يروحو فى داهية تاخدهم ويورونا رجولتهم على الحدود ولما نشوف ضبط النفس اللى مع العدو لكن مع المصري رجال اشاوس .............يا نورة يا نجم انا بتمنى قطع ايدي اللى اترفعت فى يوم بالتحية العسكرية لكلاب المجلس الحقير العسكري ............بلطم على وشى من يوم الجمعة زي النسوان على كل لحظة قضيتها فى فرقة الصاعقة لان ابطال الصاعقة اللى كانوا فخر لمصر بقوا عار على مصر ................. انا صدرى ضاق ووصل لى اليأس والأحباط لان رجولتنا انطعنت فى مقتل بقيت موطى راسى بين الناس هنا ومش قادر ارفع عيني فى حد ............واللى تاعبنى اكتر ومحزنى تعليقات كتير من شعب مصر اللى بقى جبان وفيه ناس احقر من اليهود واوطي من نعل الجزمة قطعوا البنت اشاعات وشغالين على وتر ان الجيش هو العمود الفقرى للبلد واننا بنهده وان منشات البلد متكلفة فلوس ونسيوا اننا شعب مصر اصحاب الافارول اللى لابسه العسكري واصحاب المنشأت اللى بيقول انه بيحافظ عليها العسكري بيحافظ عليه بالنار وقتل وسحل وضرب الشعب المصري على اساس اننا صهاينة مش مصريين والضرب بكل الغل والحقد ده من جيش كمب ديفيد ما شفناهوش لما اتعلق المصري من رقبته واتقطع زي الدبيحة فى لبنان من سنتين وما شفناش حد من رجال المجلس الحقير طلع قال كلام زي الرجال او رفع صباعه وحذر ان المصريين خط احمر انما شوية الطوب خط احمر ........ولما اتقتل العساكر على الحدود قعدنا يومين ما نسمعش صوت بغل فيهم ولا شفنا صباع اترفع ولا صوت طلع عملوا نسفهم سوسن (( لابسيين لعدانا قميص النوم وعلينا الشنبات العيرة ))
وما سمعناش من اى جبان خسيس من دهر خسيس من اقلية فى الشعب المصري خسيسة تعليق واحد على جلد الطبيب المصري فى السعودية امام الخلايق ...........وما سمعناش خسيس بن خسيس من دهر خسيس تعليق على احتجاز وتعذيب شباب مصري على الحدود مع ليبيا رغم ان اخبارهم ملت الدنيا .............كل اللى سمعناه اسود بتزأر ورجال أشاوس لما يكون فيه ماتش كورة مع الجزائر والبلد كلها طلعت تؤيد ضرب الجزائر بالصواريخ .........................اخس على دي ناس والله حاسس بالعار والخذي ..................

heroo said...

falcon heaven

تكره عنيك اللى بتشوف بيها يا شيخ مكلف نفسك وكاتب تعليق حقير زيك

You are a sick person
Does not merit a response to your words

محمد نبيل said...

حسام عامر دة تبعهم وكان بيقعد يحرض على توليع مدرعات والاستيلاء عليها وخطف ضباط، ويقعد يدى معلومات عن المدرعات متطلعش غير من حد عنده خبرة عسكرية.

أسلوبه التسخين دايما زى بتوع التحريات العسكرية.

admin said...

ماشاء الله عليك بارك الله فيكي
www.ramdoun.com

admin said...

بارك الله فيكي
www.ramdoun.com

بهيج الشرير said...

دول عسكر أغبيا ولاد قحبة وقصدهم مخلة بكسر الميم وتسكين الخاء والميم جيم دي معناها مخلة جندي

DIY CNC said...

السلام عليكم يا نو نو
قولى حسبى الله ونعم الوكيل
وبس

Wardaya said...

على فكرة محذفش النوت اتفضلي اهي :D https://www.facebook.com/note.php?note_id=242571469089486

nour1971 said...

مبدعهو جميله كالعاده حسبي الله و نعم الوكيل فيهم و في الجيش اللي عامل في البلد كده

hayat ank said...

عاااااااااااااااجل جدااااااا وضرورى ولو صح ابعتيلى رساله داخليه على حسابى على الفيس بوك لو حسام عامر ده مرشد سياحى قولى لى لحسن انا اعرفه وقابلته فى اعتصام مجلس الوزراء وكان عامل حزب الحضاره باين ولا ايه مش عارفه

hayat ank said...

يا اهل الدار الى يعرف بيشتغل ايه حسام عامر يقول جازاكم الله مزنوقه فيه وفى واحد انا واثقه فيه جداااااا وعايزه اتعامل معاه فى حاجه تمس الوطن ينطبق عليه نفس الكلام

hayat ank said...

يا اهل الدار الى يعرف بيشتغل ايه حسام عامر يقول جازاكم الله مزنوقه فيه وفى واحد انا واثقه فيه جداااااا وعايزه اتعامل معاه فى حاجه تمس الوطن ينطبق عليه نفس الكلام

علان العلانى said...

الجيش والكذب وشرف الجندية

الجيش ولماذا يحدث ما يحدث؟ والكذب البلطجي الذى يستند الى السلاح أو كما قال الشاعر جلوا صارما وتلوا باطلا .. وقالوا صدقنا فقلنا نعم
ولكن الشعب المصري لم يقل نعم وسمعا وطاعه رغم القتل والسحل وفقأ العيون والإرهاب والمماطلةوالحرب النفسية الموظف فيها إعلام مجرم جبان عاره موثق وخداعه مرصود قال الشعب المصري لا قال الشعب الجيش ملكي وسيكون لى وليس للمجلس ومحاسيبه الجيش لى وليس العوبة فى يد عمر سليمان وساكي عنان وكلما رفض الشعب المصري هذا الكذب البلطجي إزداد هلع وهستريا المجلس العسكري ولكن لماذا كل هذا؟

ما هو المسكوت عنه عن هذا المجلس؟ ولماذا يحدث ما يحدث؟ كل الحوادث والشواهد وكل هذا الكذب الذي يتصف بالبلطجة كذب عسكري يلقى وكأنه أمر ميداني لا يناقش .كذب يهين الكذب نفسه كوسيله تدعي الدهاء فنقول: الجيش تمت خصخصته كشركة أمنية تقوم على حراسة مصالح الإدارة الصهيوأمريكية مقابل معونة معلومة سنويا وأن يكون خير مصر طعمة لهم" كما حدث بين معاوية وعمر أبن العاص" وسدنتهم ومحاسيبهم. ونقول ايضا لقد أفرغت العقيدة القتالية من معناها لآن الجيش بعد حرب أكتوبر ونهايتها المفتوحة وبعد اتفاقية كامب دفيد لم تعد له نظرية للأمن القومي ونظرية الأمن القومي هى بالنسبه للجيش مثل الدستور بالنسبة للدولة وغياب نظرية للأمن القومي هو السبب فى تصفية الجيش من معظم قواده الشرفاء ولم يتبق غير "قوادينه" والعملاء وهو السبب فى تحوله الى قوة عمياء وهو السبب فى تربع هؤلاءالقادة الذين تروهم فى المجلس وفى الأعلام مزيج من البلاده والغفلة والعمالة والهطل أنهم ينفذون ما يملي عليهم وينتظرون حرب تلفزيونية من قوى الهيمنة على الحدود لكى يقولوا لاصوت يعلو فوق صوت المعركه وتكتمل أركان دولة ديكتاتورية جيش عمر سليمان من كلاب أمن الدولة وضباع البلطجية وذئاب الفلول من الداخل مقدمة لحرب تلفزيونيه من إخراج الناتو من الخارج لا يساعد اشتعال المنطقة فى تهيئتها وقد بدأت الحرب فى الداخل بتصفية الثوار بالقتل المباشر بدون محاسبة لقاتل شهيد واحد وتصفية عيون وانتهاك عرض مقدمة لكسر إرادة الشعب المصري وإعادة ترميم جدار الخوف الذى هدمه الشعب ولكن ما لم تتخيله كل خرائط الطريق المعدة أن ثورة الشعب المصري ثورة حقيقية كاملة الاركان لهذا لواجتمعت كل جيوش العالم ومجالسها على الوقوف أمامها لن تستطيع دفعها فهى ثورة شابة طويل مداها لاحدود لقدرتها فهي قدرة شعب إراد الحياة واستجابة القدر أن هذا الصراع فى ميدان التحرير بين الجيش وشعب كان أفراده عبيد ويطالبون بالحرية لن يظل موقع تسلية لحزب الكنبه كما كان يشاهد الرومان صراع الجلادياتر مع الوحوش البرية و.لن تتسلى بمشاهدته قوى الهيمنة الغربيه لن يدوم هذا الى مالانهاية أن الثوار لن يتركهم الشعب المصري لكى يصبحوا أصحاب الأخدود وسوف يكسر الشعب إرادة المجلس العسكري كما كسرها من قبل بهدم الجدار الذي بناه أمام سفارة أسياده
انتصر الشعب فلا تستعجلوه

haroon said...

انتي اللي حسدتي الثورة لما قولتي ( مفيش خوف تاااني ...مفيش ظلم تاااني ) ونسيتي تقولي بسم الله ماشاء الله

المواطن مصري said...

هههههههه
والله و انحرفتي يا سكسكة و انا اللي كنت فاكرك مؤديبة :P

بس على فكرة انتي تبوسي ايدك شعر و دقن ان الانحلال و الخوض في الاعراض وصل لحد كدة و بس( و ياريته لحد كدة و بس)
ده وصل السفالة و الحقارة و الدياثة ان انجاس يخوضوا في عرض بنت اشرف من امهات هؤلاء الانجاس
بس بما انك مكشوف عنك الحجاب طمنيني, هل الانجاس دول ناس عادية فعلا لكن فقدوا كل مقومات الرجولة من نخوة و شهامة و مروءة ولا هما لجنة الكترونية و مخبرين امن دولة؟!
لأن فعلا الموضوع ده مؤرقني جدا

Unknown said...

كرامة الوطن من كرامة مواطنيه البسطااااااااء قبل الأغنياء!!!!
طبعا أغلبكم ان لم يكن كلكم شوفتم المؤتمر الصحفي وردود الافعال عليه من مختلف الفئات الرافضة والمؤيدة ومش حضيف لحضراتكم حاجة بالكلام في البيان ومحتواه لأنكم عارفينه أحسن مني ....
أنا حتكلم عن ما لم يحتويه البيان سهوا أو عمدا مش هتفرق خلاص!!!!!...
- فين الكلام عن حقنا في التظاهر وكرامتنا التي هي من كرامة الوطن,, دا حتي المجرم له حقوق ومفيش حاجة أو حد في الدنيا " كل المخلوقات والحيوانات تحديدا " تقبل التفريط في كرامتها. ليه عاوزينا نفرط فيها ؟؟؟؟ دي كرامتنا هي كل ثروتنا والحمد لله لان هي والستر كفااااااااية أوي...
- فين حق الناس اللي اتسحلت والعالم كله شافها وهي بتتسحل والناس بدل ما تسأل هي ليه يتعمل فيها كده؟؟؟ وبأي حق تعملوا التصرف الحيواني اللي اتعمل في بنت أرجل من أي واحد في البلد؟؟؟ بيسألوا هي عملت ايه ونازلة ليه وكانت ناوية تعمل ايه بعد ستة أشهر ولونها المفضل ايه " في ناشط كبيييير. سأل هو العسكري لابس كوتشي ليه؟؟؟!!! " وان شاء الله ربنا والشباب الغلابة من بعده هيجيبوا حقها أسرع من المتوقع...
- طيب فين حق الناس اللي استشهدوا بطلقات في الرأس أو تأثرا بجراح الرصاص...
- طيب بلاش,,, فين حق الناس اللي اتسممت عيني عينك علشان يفضوها سيرة ويروحوا بيوتهم!!!
- فين العقول المدبرة للناس اللي عرضتم صورهم النهاردة؟؟؟
- فين حق شهداء محمد محمود؟؟؟
- فين حق شهداء ماسبيرو؟؟؟
- فين حق شهداء موقعة الجمل؟؟؟
- فين حق شهداء ثورة يناير؟؟؟
- فين حق أهالي الشهداء عند مسرح البالون؟؟؟
- فين حق مصابي الثورة؟؟؟
- فين حق خالد سعيد؟؟؟
- فين حق سيد بلال؟؟؟
طيب عاوز أشوف أي حد اتحاسب علي أي حاجة غير الثوار ومسجوني الرأي وما أكثرهم
" لدرجة ان بحساب عدد المعتقلين في هذه المدة من بعد الثورة نجده رقم قياسي جديد!!! ثورة بقي وبتنضف البلد!!! ,,,
فعلا,, بس ان شاء الله عمرها ما هتفضي من ولادها وبناتها الثوار والمدافعين عن البلد والشعب وحقوقه وحريته. اللي مش مهتم بيها الناس اللي لم يجربوها ويعرفوا قيمتها!!!.
يارب أشوف أي حاجة صح اتنفذت وهأكون أول من يتكلم عنها لأني بانظر قدامي مش ورايا لأن حماية مصلحة البلد اهم من حماية أي واحد في البلد,,,,
- صحيح بالمرة قبل ما أنسي,,,فين الأيدي الخفية؟؟؟.

العبيد الجدد said...

حوار متخيل

اخر حديث بين مبارك وطنطاوى.
ط - صباح الخير يا ريس.
م - اهلا ياسيدى اية الاخبار.
ط- كلة تمام يا فندم تعليمات سيادتك بتنفذ بالظبط.
م- عملت اية يعنى... ط- كل الى سيادتك امرت بية.
م- متلفش وتدور يا طنطاوى عملت اية بالتفصيل.
ط- الناس ابتدت تترحم على ايام سيادتك يا فندم مبيعديش اسبوع الا ونولع الدنيا وابتدينا نطبق خطة جمال بية الى كلمنى فيها لما كنا بنتعشى مع بعض الاسبوع الماضى.
م- خطة اية بالظبط.
ط -خطة التخوين ياريس.
م- هوة احنا مش كنا بنطبق الخطة دى قبل يناير ومجبتش نتيجة مع الناس الوسخة دى.
ط- ايوة يا فندم بس دى تعليمات جمال بية واحنا ادخلنا عليها بعض التعديلات.
م- تعديلات تعديلات اية يا خويا.
ط- احنا بدئنا بتخوين العيال بتوع التحرير ومتهمينهم انهم بيتلقوا اعانات من دول معادية لتدمير البلد وحرقها وكمان بنتهمهم انهم السبب ان البلد حتفلس والشعب مش حيلاقى ياكل بسببهم.
واتهمناهم بحرق المجمع العلمى والمبنى بتاع هيئة الطرق ومحاولة احراق مجلس الشعب والناس ابتدت تصدق وتقلب عليهم جامد.
م- وهما الى حرقوهم فعلا ؟.
ط- لا يا فندم انا اتكلمت مع الناس بتوعنا وهما اتصرفوا.
م- والناس دى موثوق فيهم يعنى مش حيودونا فى داهية تانى.
ط- اطمن يا ريس الهانم كانت متابعة كل حاجة بنعملها وكل ما تم تحت اشراف سيادتها هى وجمال بية وزكريا.
م- واخبار العيال بتوع الاخوان والسلفيين اية.
ط- تحت السيطرة يا فندم مصدقين نفسهم بس احنا مسيطرين عليهم تماما والى احنا عايزينة بينفذوة.
م- تمام بس حاول تخلص بسرعة موضوع التخوين دة وخلى الناس الوسخة دى تحس بالندم على الى هما عملوة فينا وانا لما حرجع حوريهم شغلهم كويس.
ط- ايوة يا فندم بس....
م – بس اية يا طنطاوى.
ط – بس موضوع الرجوع دة سيادتك.
م- مالة يا طنطاوى.
ط – الهانم بتقول ان جمال هوة الى حيرجع.
م – هى قالت كدة.
ط – ايوة سيادتك.
م – طيب حنبقى نشوف الموضوع دة بعدين المهم دلوقتى تخلص من العيال بتوع التحرير دول وتخلص عليهم كلهم مش عايز كلب فيهم يفضل على وش الارض هما والى بيايدوهم وعايز بقية الشعب الوسخ دة هوة الى يخلص عليهم ويخلصنا منهم من غير ما توسخ ايدك.
ط – اطمن سيادتك هما الى حيخلصوا عليهم وهما ابتدوا فعلا احنا ماشيين فى الخطة كويس والناس ابتدت تكرهم فعلا وقريبا جدا هما الى حيخلصونا من ولاد الكلب دول.
م – لما نشوف حتنيل اية بالظبط بس الموضوع طول عايزك تخلص بسرعة انت بطىء اوى كدة لية انا مش فاهم.
وابقى خلى جمال وعلاء يعدوا عليا بكرة على الغدا.
ط – تمام سيادتك...... اى اوامر اخرى سيادتك.
م – لا........ وتعدى عليا بكرة مع العيال تتغدى معانا.
ط – تمام سيادتك.
م – مع السلامة.
ط – شكرا سيادتك.

مش فاهمه said...

ماتزعليش يانوارة بس خدى بالك من نفسك علشان واضح ان الوساخه مالهاش قرار ...ارسى كده بس الا صحيح هو اكاونت اوشه اتسرق ولا ايه ايه

hardway said...

أنت فين يا نرنر
أنت سلكتي في عالم السكسكة
ياما قلت لكي هو ده الطريق الصح
أهلا بك في عالم السكسكة
سكسكة الانتصار

محمد صبرى said...

شيلى صورة حسن نصر الله يا نواره ... خلاص مبقاش هو المناضل العربي اللى عرفناه , دلوقتى حسن نصر الله هو نصير نظام السلخانه السورى

Anonymous said...

مقال رائع حقا ويا ريت تشرفنى بزيارة مدونتى المتواضعة http://misralmostabal.blogspot.com/

محمد نور الدين said...

ست الكل مساء الخير

الفيسبوك أغلقتيه في وجهنا المدونة هي الأخرى مغلقة يبدو أنك زهقتي من أصدقائك ومحبيك

حسن محمد على said...

سنة جديدة سعيدة عليكى انتى واللى جابوكى يا نوارة مصر يا جميلة.

مصراوي لزيز said...

بصراحة من اول سطرين في مقالك مقدرتش اكمل لركاكة الاسلوب وحدة الالفاظ الخارجة عن اصول الاحترام للحوار .. يعني ايه (( انسل كل ما يلبس بالقدم على دماغ امه ))

الام ذنبها ايه يا محترمة يا حقوقية

مصراوي لزيز said...

الحقيقة مقدرتش اكمل مقالك .. من اول سطرين ظهر اسلوب كله ركاكه والفاظ خارجة وجارحة وخادشة وفي محلها بالمرة .. الحرية مش قلة ادب وتطاول ..
لزمته ايه :..انسل ما يلبس بالقدم على دماغ امه..:

الام ذنبها ايه يا محترمين

لازم يكون الاسلوب افضل من كده حتى يصل فكرك دون تلوث

الشبكة المستقلة said...

لولا اني خايف تعملي ثورة علية كنت اولتك اتجوزيني و سيبك من الليلة دية -:)
انا مشيرتش البوست اللي انتي بتتكلمي علية بس خلي بالك من حاجة
انتي هاجمتي كاهن الوهابية محمد حسان و دخلتي نفسك في حرب جانبية لقاتل لمقتول
ربنا معاكي

MerOo said...

كنت بحترمك زمان دلوقتى بججججججججد بكرررررررررررهك بكرررررررررررهك

MerOo said...

زمان كنت بحترمك ,,,,,دلوقتى بنتى على حقيقتك و بكرررررررررررررررررهك بكرررررررررهك

mwanees said...

3ala fekra enty awalan.we7sha.re5ma .2alelt el2adab welzo2.da3efat alsh5seya.monafka.kazabah.mareeda.bedon mabade2.sho2m. ya3ny bel3araby keda enty bent bedaaaaan,,,

hardway said...

اليوم الاحد الموافق 2012/1/8
عرفتي انك لا تساوي شئ..حتي قناة جزيرة حمد في مباشر مصر أغلقت المذيعة التليفون في وشك وأنت تتبجحي علي قضاء مصر وعلي جيش مصر.......
حتي هذه القناة ..لم تحترمك..ولم تحترم تجاوزتك المقيتة عودي يا سكسكة الي طريقك..طريق السكسكة

hardway said...

أتظبطي في التحقيق...ياخفيفة
ولا لسه فيك حيل...يا مووووووووووووووووزا

Unknown said...

بكرة نشوف حبة( الخواجات)دول هيعملو ايه

الشبكة المستقلة said...

منك لله يا نوارة
صدقناكي لما حرضتي على ضباط 8 ابريل
لو كان الناس وقفو وراهم كنا خلصنا من الليلة دية
حليها بقى يا شطرة

ahmedfito said...

كلاب الكلب لايمكن يكونوا سباع
دم المصرى عندهم رخيص وينباع
مايعرفوا غير أومر كلبهم وصوت نباحه
لاشافوا يوم حرية ولا يوم ارتاحوا
علمهم كويس يعضوا فى بعضهم
علمهم كويس يخبوا فى عضمهم
بتقتل أخوك يا كلب علشان عضمه
صحيح غبى ودماغك جزمه
ياحمار بدماغ جاموسه افهم يا مصيبه
احنا وانتا مربوطين فى نفس الزريبه
غلبت أهاتى وانادى ولارد
طلعت أنا الغبى بكلم كلب

وتحياتى لحبيب فؤادى
أحمد فؤاد

salem elkotamy said...

قلوبنا معكم يانوارررررة إنتي ورفقائك

half dr said...

المشكله ان الناس بيصدقوا اي حاجه مثلا انا ف قريه صوتي تنبح من كتر مبقول ياناس مش كل ماتسمعوا تصدقوه ومش كل ماتشوفوه تحكموا عليه من غير دليل
بس لا حياه لمن تنادي
بس حسبي الله ونعم الوكيل
حسبي الله ونعم الوكيل
ف كل من اغتاب او خاض ف اعراض اوحتي ساعد ف فساد حتي لومن وجهة نظره انوا خير او قاصد خير بس ارجع واقول ان عمر الخير ما اساسه شر

admin said...

مشكور
http://www.alsadiqa.com

Mohammed Halim said...

و الله عندك حق

gmal mahmoud said...

انا شايف انا ابلغ رد ممكن يكون القصيدة ديه طبعا انتي بنت عمنا الكبير وده ممكن يكون كلام مش قوي بس هي حاجة من القلب لاني فعلا زعلت من اللي حصلك وبيحصل لبناتنا واخواتنا
نوارة النصر
بنت من مصر


بنت من مصر بالف راجل
وقفت قدام الظلم وقالت لأ
وبدال ما تقف معاها ياجاهل
ونكون كلنا ايد واحدة مع الحق
تمد ايدك عليها وتقول تستاهل
والله ديه حاجه تخلي الحجر ينطق

من امتى ياناس بنمد الايد على البنات
هو خلاص كده اللي اختشى مات
خلاص رجعنا بسرعة للسكات
خلاص رجعنا لحكاية خد وهات
خلاص الدنيا بقت تبات ونبات
لاااا مش هنقول اللي فات مات

فين راحت اخلاق الميدان
ليه المصري رجع تاني يتهان
هو مش كان النهار خلاص بان
لأ المصري مش هيرجع تاني جبان
ومش هنصدق كلام الزور والبهتان
مش هندي فرصة يفرقنا اي جبان

ديه نوارة النصر ياناس بنتتنا
ملامحها ملامحنا ودمها دمنا
بتحب مصروبتخاف عليها زينا
وازي في يوم وليله تبقى مش مننا
هو خلاص احنا اتعمينا كلنا
ومش عارفين حبيبنا من عدونا
كفاية كده بقي عشان المكان لا يسمح انما القصيدة اطول من كدة

rona ali said...

لا اله الا الله

ربنا كبييييييييير بجد

Anonymous said...

القاعدة في الحروب مع القذرين اللي زي دول ان مفيش قاعدة

اللي هينزل لازم ياخد باله ويستحمل أي ضرر هيحصله

ربنا معانا ومعاكي يا نوارة يا أجدع بنت في مصر

biber boy said...

اوعى تتنازلى او تنخى كانا معاكى

Hossam said...

Hi Nawara,
I am Hossam Shahin
I am now in USA studying in Fairleigh Dickinson University, and I came to USA through the State Department program of fellowship.I met you beofre in Albalad Library for you book 3esh 3al ree7., please I need to get you phone number urgently.
this is my email
hossam-sat@hotmail.com
ShahinHEgypt , is my skype

واحد عادى said...

يووووووه هوه انا كل ما افتح المدونه تبقى لسه نايمه - فيه ايه يا ست هانم - صحصحى معانا شويه الله يكرمك - عااوزين كتاباتك اللى بتنور لنا الطريق - وسيبك شويه من التويتر - عااوزيت تحاليل سياسيه - من فضلك صحصحى معانا شويه