Friday, 9 December 2011

خوطة المجلس الكتشيتة... فسسسسسسسسسسسسسسسسسسسسسسسسسسسسسس

الا فاكرين البوست اللي كتبت فيه ان عندي احاسيس ومشاعرين عبارة عن هلاوس سمعية وبصرية بتخيل لي ان المجلس العسكري لمن يلاقي الطخط عليه بالجامد قوي يقوم يعمل انقلاب عسكري على نفسه؟ قال ايه؟ قال اه... قال طلع الموضوع ده صحيح فعلا وطلعت ان انا - مدد مولانا الحسين - قلبي حس، انتوا عارفين بقى زمان ايام ما كان المجلس مغرغر بيا كنت باحبه، واللي يحب ما يكرهش يا ولاد.. برضك قلبي بيحس بيه لمن ييجي يعمل شقاوة
صلي ع النبي
عليه افضل الصلاة والسلام
شششووووووف يابني... بقى انا بقالي فترة كده شامة ريحة مش تمام في الاعتصامين، خصوصا ان كلنا عارفين ان اعتصام التحرير مليان تحريات عسكرية، بيبقوا جامدين اخر حاجة... الاكثر ثورية على الاطلاق، ولا الحاج اسماعيل اللي دايما يرجع في كلامه في فيلم مطب صناعي.. اللي حصل منهم كالآتي:
اولا: في اثناء معركة محمد محمود فيه شخصن ما جه كده وقال لفرسان محمد محمود: انا معايا سلاح... نستخدمه؟ قام قالوا له: شكرام يا حاج.. احنا شغالين بالطوب والمولوتوف ومتشكرين على كده احنا مش وش ذلك ولا ذلك وش وخدوه من ايده طلعوه برة وقالوا له خالتي بتسلم عليك وبتقولك ما تجيش هنا تاني ولو شفت خلقة امك ولا اي حد من طرفك حنظبطك.. وامنوا المكان - في عز ما هم بيتقتلوا - عشان يضمنوا ان ماحدش بسلاح يخش لهم
ثانيا: دايرين بقى العيال التحريات.. اللي انا عارفة انهم تحريات وربنا، عمالين يقولوا للناس: كده مش حينفع.. احنا لازم نشيل سلاح هههههههههههههههه وطبعا انتوا عارفين الشيعب بتاعنا: ايه؟ غور يالا من هنا.. اعوذ بالله من الشيطان الرجيم... بس بقى فيه حاجة وحشة، قصاد كل واحد تحريات عسكرية فيه عشرة معاتيه قدامه، ما بيبقوش تحريات ولا حاجة يا عيني، بيبقوا مهاطيل، زي المهاطيل اللي كانوا بيقولوا: وماله لما يعملوا انقلاب عسكري.. شباب الجيش الطاهر النضيف الشريف العفيف.. تقول له: يعني انت عايز عبد الناصر تاني؟ يقول لك: لأ... لأ طبعا.. (حتى اللي بيحبوا عبد الناصر شايفين ان النموذج مش مناسب للتوقيت بتاعنا) قوم تقول له: ما هو كده.. قوم يقولك: ااااااه.... تصدق؟ صح وربنا.. وربنا صح... انت مخك ذري والله، ماهو الواحد بيحب المشورة عشان كده
اهم برضه نفس العيال المهاطيل يروحوا يكروا نفس الكلام: خالتك سلمية ماتت.. احنا لازم نشيل سلاح.. تقول له: تعالى يابني.. تعالى.. انت عايز فترة تسعينيات تاني؟ قوم يقول لك: ازاي يعني؟ (طبعا عشان هو ما كانش اتولد اصلا، او حتى كان في اللفة) قوم تقول له: ماهو مع اول خمس عيال حيشيلوا آلي الجيش حيعلن الاحكام العرفية والناس حتقول له عداك العيب يابو رحاب.. افرم ما ترحمش، وده اللي حصل في التسعينيات بالظبط، كان فيه تواطؤ شعبي مع القتل في الشارع وانتهاك حقوق الانسان والطوارئ والتعذيب وتقول لهم: حرام عليكم.. يقولوا لك: ولاد وسخة ارهابيين.. هو يا ياخدوا الحكم بالعافية يا يشيلوا علينا سلاح ويعملوا لنا حرب اهلية؟ يولعوا بجاز وسخ.. يتعذبوا ويطلع ميتين ابوهم كمان.. 
كده.. ده كان رأي الشارع المصري على فكرة.. وفي احيان كتير مبارك كان بياكل نفسه قبل ما حد ياكله، يعني كان بيعمل تفجيرات لنفسه عشان يلم ناس كتير والناس تقول له: راجل يا حسام.. لحد ما الشرطة توحشت وبطلت تعذب في الجماعات الاسلامية بس وبقت تعذب في سواقين الميكروباص وبعدين ابتدت تعذب في شباب الطبقة المتوسطة وبعدين ما بقاش لها كبير ولو كانت استنت شوية كانت عذبت مبارك.. يا ريتنا استنينا شوية
الخوف بقى ان المجلس العسكري يقرر ياكل نفسه قبل ما حد ياكله
قبل اي حاجة احنا لازم نعرف ايه السلمية وايه اللي مش سلمية وايه هي الثورة وايه اللي مش ثورة وامتى الثورة بتحتاج تشيل سلاح:
الثورة السلمية هي اي عمل ثوري يهدف الى اسقاط النظام القائم بدون اللجوء لاي اساليب عسكرية
بمعنى، اللي بيحدف بالطوب والمولوتوف قصاد واحد بيضربه بالرصاص الحي دي اسمها مقاومة سلمية، لان مافيش اي عمل عسكري في اللي هو بيعمله، يعني لما انت تخنقني اقوم اقرص دراعك عشان اشيله من رقبتي يبقى احنا الاتنين زي بعض؟ يعني انتفاضة الحجارة كانت ارهاب؟ انتفاضة الحجارة بالاجماع العالمي انتفاضة سلمية... ماحدش وصفها بانها عمل عسكري ابدا، ولا حتى القلل المنتحرة اللي دايما بتطالب الطرفين بضبط النفس
الشخص اللي بيقتحم القسم وهو مش شايل سلاح بهدف ثوري ده اسمه عمل ثوري سلمي، هو ما دخلش بالآلي على اللي في القسم وقتلهم، هم مجموعة من الثوار اقتحموا الاقسام اللي بتمثل بالنسبة لهم غرف تعذيب المواطنين بالظبط زي ما ثوار فرنسا اقتحموا سجن الباستيل... يعني اللي اقتحموا سجن الباستيل بلطجية؟ ما كانوش شايلين سلاح معاهم، وكذلك اللي اقتحموا الاقسام وامن الدولة ما شالوش سلاح معاهم، مافيش اي تحرك عسكري في اللي عملوه، ده تحرك ثوري سلمي
وطول ما فيه تحرك جماهيري من غير سلاح - في اي اتجاه - ضد النظام الحاكم دي اسمها ثورة سلمية.. امتى بتبقى مش سلمية لما بتلجأ لأساليب عسكرية
اول ما تشيل سلاح كده ما بقتش سلمية... وما بقتش ثورة كمان، بقت حرب اهلية
امتى الثوار بيحتاجوا يشيلوا سلاح، او بيحسوا انهم محتاجينه، لما ما يبقاش فيه اجماع شعبي على الثورة دي، جزء من الشعب عامل ثورة والجزء التاني يا اما عامل عبيط يا اما مع النظام القائم.. وفي الحالة دي الثوار بيشيلوا سلاح وفي الحالة دي اه بيبقوا بلطجية طبعا... هو بالعافية؟ انت اخترت تعمل ثورة ونزلت دفعت التمن، نص الشعب التاني طلع بيحب النظام القائم، ولا مستفيد منه، ولا حتى ندل وجبان يا سيدي، تقوم تشيل عليه سلاح؟ دي اسمها بلطجة بقى، ولو هو مساند للنظام حيشيل سلاح هو كمان، وتبقى حرب اهلية
الخطة الامريكية المكررة المحفوظة: ما عرفتش تقمع الثورة اعمل حرب اهلية... كلهم بيسمعوا الكلام في الموضوع ده، ما عرفوش يسمعوا الكلام بدري عندنا عشان ثورتنا عليها اجماع شعبي
لما ينزل عشرين مليون في ثورة دي مشاركة كبيرة جدا جدا جدا
لما الناس انضربت في محمد محمود الميدان بقى فيه مليونية كل يوم من غير كل القوى السياسية اللي استخبت تحت الترابيزة وخذلتنا... ده اسمه اجماع شعبي
وهنا بيت القصيد.. آن آن آآآآآآآآن
بقى المجلس نجح بمساعدة التيارات السياسية انه يفضل في الحكم، وهو عازم على البقاء في الحكم، حكاية انه خايف ملفاته تتفتح والكلام ده، ده كان زمان...... دلوقت هو عايز يفضل في الحكم.. انتوا عارفين كرسي عرش مصر عليه عسل وغرا الاتنين مع بعض، وكمان اتورط في دم، يعني لو خرج فيها رقبته.. يخرج ليه بقى؟ لا لازم يفضل
طبعا التيارات السياسية ساعدته انه يحبط الموجة التانية من الثورة وما يمشيش، لكن هو مش حمار بقى زي الراجل اللي فات، او بالاحرى، اللي بيديله المعونة مش حمار وهو بيسمع الكلام مش عندي زي الراجل اللي فات، هو عارف انه خلاص اتكره، واذا كانت دي فشلت عشان ما حدش لقي بسرعة بديل للمجلس العسكري وراح شاقطنا بموضوع الاسنتخابات ده، فهو خلاص.. ماحدش بقى طايقه، وهو عارف ان ماحدش بقى طايقه، والناس مرقدة له، واذا ما عرفوش يمشوه المرة دي حيمشوه المرة الجاية.. طب وهو حيستنى المرة الجاية؟ خمس عيال بآلي وخلص الليلة
خمس عيال بآلي اغلبهم - ان لم يكن كلهم - عيال من المعاتيه اللي بيسلموا ودنهم لبتوع التحريات العسكرية.. ثوار التحريات العسكرية الاكثر مزايدة على الاطلاق... مش حتقدر تغمض عينيك
ايه الدليل على اللي انا باقوله... الدليل (بخلاف ان بتوع التحريات العسكرية هم بالتحديد اللي عمالين يتكلموا عن السلاح وليبيا والكلام الفارغ ده) هو المجالس اللي هو عمال يخترع لنا فيها
مجلس الشعب بدون صلاحيات... طب كده مجلس الشعب ممكن يتخانق معاه، قوم لما يتخانق معاه الناس اللي راحت انتخبت مجلس الشعب ما حتصدق تنزل له: ارحل يا عم.. احنا مش قلنا لك كده المرة اللي فاتت؟ طب خلاص، نجيب له مواطنين شرفاء في مجلس استشاري يتخانقوا معاه، وبما ان مجلس الشعب الاندال هم اللي حصلوا فيه على الاغلبية فما حيصدقوا يفشوا غلهم في حد تاني غير العسكري احسن العسكري ده بيضرب جامد.. حلوة حكاية المجلس الاشتشاري دي نمسك في خناقة ويمسك في خناقنا بالادب.. مجلس الوزرا اسمه ايه ده اللواء الجديد.. عبد الحق باين؟ فيه شخصما كتشيت كده ظهر في الافاق قال: صلاحيات الجنزوري مطلقة.... زي صلاحيات شرف بالظبط.. واهو الحاج ابو صلاحيات ده، اسم الله على مقامه حيفضل مشغول بالبت صلاحيات يشورها ويجهزها عشان احنا نتخانق معاه على الداخلية والاسعار وسوء الاحوال المعيشية والمحاكمات وخلافه.. والمجلس العسكري بيحرك كل الاطراف من خلف ستار لانه عارف ان ماحدش طايقه ولازم يغور من وشنا الساعة دي، فهو حيحط برقع بس... لكن برضه، ليه نسيب حاجة للظروف؟ ماهم الناس دي اصلها تلف تلف وتروح ماسكة فينا وهاتك يا شتيمة فيك يا مجلس يا عسكري، نقولهم طب نجيب لكم عنان يقولوا لنا إلأ إلأ.. نقول لهم طب اهو الجنزوري يقولوا لنا إلأ إلأ.. امشي امشي امشي... وانا مش عايز امشي.. لو اتزنقت حاعملها حرب اهلية بقى واللي يحصل يحصل.. بشكل محدود، زي عمليات مبارك المحدودة بخصوص الارهاب وزي عمليات المجلس العسكري نفسه المحدودة بخصوص الكنائس والفتن الطائفية، قوم الناس تقول: في عرضك خليك قاعد
وبهذا يا اصدقائي الصغار، اذا ما نفعتش الخناقة السياسية تنفع الخناقة ام خمسة آلي المهم يسيبونا قاعدين والنبي والنبي والنبي.. اصل الكرسي حلو وهزاز
وبرضه نحفظ خط الرجعة ونقول ينكن تطلع تخاريف غاز... بس برضه اهو الواحد يعمل فضيحة شبه الفضيحة بتاعة المرة اللي فاتت قوم لو عقلهم وزهم على الكلام ده يعرفوا ان احنا كاشفينهم وحافظينهم وعاجنينهم وخابزينهم ومش واكلين من الاعيبهم.. حسكم عينكم تلعبوا باليح... اوعى اوعى.. مافيش لعب باليح احسن نلسعك ونجيب لك واوا.. وحنقفشك برضه وانت مستخبي ورا الستارة.. بخ
ومافيش عيال عبيطة حتسمع كلام التحريات العسكرية، هم عبط اه.. بس من كتر طبيتهم، وبيحبوا البلد اكتر منك يا طنطاوي واكتر من امهاتهم كمان
مافيش حد فيهم عايز لبلده حرب اهليه.. ولا حد فيهم عايز لبلده انقلاب عسكري ولا انشقاق مسلح... احنا شعب فلة.. انتوا اللي مالكوش في الفلة نصيب

41 comments:

Mina Elbatal said...

تفتكرى يا نواره الثوره هتنجح وهى سلميه
اعتقد الثوره بتحتضر

Mina Elbatal said...

تفتكرى يا نواره الثوره هتنجح وهى سلميه
الثوره بتحتضر يا نواره وكلهم بيتخلو عن الثوره

MoStaFa MuSlam said...

اخر فرصه لينا هى 25 يناير 2012 , ولازم ننشر الوعي ونفضح المجلس العسكري قبل اليوم ده , فى النوت دي شرح اتمنى اضافتكم وافكركم
http://www.facebook.com/photo.php?fbid=305923189421311

Ahmed Eldweik said...

في يوم من الأيام كنت بغل مش فاهم حاجة و قولتلك انك كلامك عك و بتتكلمي من غير فلتر..و باللي باشوفه في مصر باقولك يلعن أبو الفلتر..أنا من النهاردة هافك الفلتر و هافك الخيط اللي رابطين بيه يقنا علشان مانتكلمش من سنين
الله ينور عليكي يا نوارة..أكرمك الله

و بالنسبة للمجلس العسكري بقى..ده لازم نخربش وراه و نجيب تاريخهم الأسود واحد واحد ...لازم نعرف عدونا

Bean Ender said...

أولاً: حضرتك ناسية أن فيه حرب ابادة ضد المتظاهريين بالكيماوي؟
اتنين: هل حد قال أن احنا ناخد موقف هجومي، احنا بنقول الناس ليها شرعية الدفاع عن نفسها.
تلاتة: في ظل غياب القانون يحق للإنسان عند التأكد التام من فاعل الجرم أن يأخذ حقه بيده دون الإفتراء.
أربعة: لو قيام العدل لازم يأتي بالقوة (البلطجة) كدة كدة بيقال علينا بلطجية.
خمسة: لو انتظرنا أكتر من كدة فعلاً حتحول حرب أهلية، لأن ألة الاعلام الفاسد شغالة ليل نهار علي تضليل الناس.
سته: الكلام بس مش معاتيه علي حمل السلاح و دفاع عن النفس، لأ، في ناس ذات كرامة شايفة إن كل الحدود السلمية تم تجاوزها.
زي ما عملتي غلطت شتيمة إلي قالم الدستور أولاً، و من ضمن إلي طبلم للمجلس، متعلمتيش من اخطائك، الناس إلي بتموت غدر من الشرطة ليهم الحق شرعاً للدفاع عن نفسهم بشتى الطرق، دمهم في رقبة إلي قاتلهم و إلي منعهم.
كام ألف كمان لازم يموت، كم ألف في مقابر جماعية (مفقودين)، كم ألف مصاب.
أحمد حرارة قلها بعد ما فقد عينه التانية متمشوش إلا بعد ما تدخلوا ماسبيرو! إيه إلي حصل؟

blueroseash said...

والله انتي كل مرة تقوليها وتصدقي وتكشفي الخطة . بتحرقيهالهم قبل الفاس ماتقع زي مابيقولو.. عموما لو اتشتمتي كالعادة اتأكدي انك صح

شهرزاد said...

والله يانواره ا نت
مفيش زيك فاهمه الكفت على راى ابويا الله يرحمه هو ده الموضوع بالضبط واديهم بيحاولوا بس ان شاء الله ربنا حيوكسهم انا عارفه ومتاكده لانهم لا ينصرون الله ابدا بل ينصروا امريكا على الشعب الغلبان

juneone said...

ينصر دينك يا بنت يا نوارة..جدعة

nabil said...

طب عندك فكرة لو كلهم على قلب رجل كله واحد، ولا كيماوي بيلعب سينجل و المجلس واقف نيكست، ولا هو كل واحد راح جابلو دولسي ستيك لواحده و مستني يكسب عشان يلعب لواحده؟

هشام المستكاوى said...

نوااااارة وبتنور .. الله ينور على الفكر .. والاهم الاسلوب اللى يوصل صح للناس مش (للنخبة).. ربنا يباركلك يا بنت عمنا

moo said...

ماشى يا بنت الحلال انتى بتثبتى بعد النظر وكمان العقلانية بس مشكلتنا مع اللى زى الهطل اللى انت قولت عليهم وعلى فكرة انا سمعت ناس بتقول المسالة لازمها سلاح واترد عليهم ان السلاح موجود ولكن احن مش حانستخدمه بس يا ترى المرة الجاية مين حينتصر المهيجتية ولا قيادة متزنة بتحسب لثورتها المرة دى فى محمد محمود وكمان فى الميدان كانت المسالة هيصة ما حدش كان بيسمع كتير الا لليعرفة وحقه الصراحة ما انا مش واثق الا فى اللى اعرفه ودى مشكلة وكمان الخلافات السياسية بينا كانت بتسمع فى مدى استجابتنا للنصح من بعضنا مش علشان الكلام غلط بالضرورة بس علشان احنا مش طايقين بعض ياريت يا ريت على المرة الجاية وهى حتبقى فى نص واحد او بعده يعنى ممكن تبقى فى الذكرى السنوية نقعد تانى مع بعض الشباب الان محتاج يسمع لبعضه وربنا يستر وتكمل على خير

المواطن مصري said...

يادي النيلة!
ده انا لسه بقول لواحد صاحبي النهاردة المجلس عايز بس يامن لنفسه خروج امن و محترم عشان كدة موافق و بشدة على الوثيقة فوق المحشية, دي مشكلة المصريين على فكرة عايزين يتطمنوا للمجلس العسكري باي طريقة و بيتلككوا باي طريقة عشان ما يظنوش ظن بطال في المجلس العسكري( زي ما عملنا من بنها و صدقنا المجلس العسكري انه حامي الثورة بالرغم ان مبارك هو اللي اتطمنلهم و سلمهم السلطةو هما اصلا رجالته)
و انا كواحد من الشعب المصري الغلبان كنت بحاول اصدق و اقنع نفسي ان المجلس العسكري مزنوق زنقة الفار في المصيدة و لازم اننا نأمن له فرصة خروج عشان ما يعضش فينا و يعلن احكام عرفية ولا تقوم حرب اهلية, لكن طبعا كان جوايا هاجس انهم عايزينها دولة يتحكم الجيش في كل مقدراتها و يتحكم في سياستها زي تركيا قبل فترة, الخلاصة اللي انا على الاقل لازم اتعلمها انه ما ينفعش تعمل عبيطعن حاجة انت عارفها و الا اللي ادامك هيستعبطك و ساعتها مش هعرف اقول لا انا كنت كاشفك من الاول ,ساعتها هيقولي بعد ايه يا حلو؟!!!
امك في العش ولا طارت؟ و انا امي مش فرخة ولامؤاخذة

abumazen said...

ايوه كدة يا نوارة خليكى صاحية لمخططاتهم وتحرياتهم العسكرية وان شاء الله بعد الامور ماتنتهى والثورة تنجح قولى ان شاء الله ونحقق كل اهدافها ومطالب الشهداء وتستقرى وماتلقيش حاجة تعمليها امانة عليكى يا شيخة تعملى رسالة دكتوراة فى الغباء السياسى للمجلس السمكرى وانا واثق انك هتاخديها فى شهر بالكتير لانك ساعتها مش هتحتاجى مراجع و كله عندك بالصوت والصورة وهتبقى الدكتورة نوارة نجم مع مرتبة الشرف وتاخدى نجمة سيناء كمان

سميه صلاح عرفات مقلد said...

اخيرا كويس ابصرتي !! اللي انتي مش عايزة تشوفيه انه كان منتظر الاخوان ينزلوا عشان ينزل الناس اللي معاها رشاشات الجيش عشان يقول للناس الاخوان نزلوا بسلاحهم وبياخذوا الشرعية بالسلاح ويعمل احكام عرفية وقتها كلوا هيقولك معاك يابو ريه وسكينة مش رحاب و سعدية ..ولكن حضرتك وبعض الاشاوس قلتوا شربوا دم الشهداء ودهنوا وشهم بيه !!مش عارفة اسمي ده ايه ..وتقولي اندال وغيره والندالة هي اني اوصف حد بالندالة عشان مش على مزاجي بس انا شايف حاجة وهو مش مقتنع بيها يا فندم

Bean Ender said...

رجل إختلف معه كثيراً بس له احترامه، شوفي بيقول إيه: http://www.youtube.com/watch?feature=player_embedded&v=Tx_HxBW0AHw

متفائل said...

وبما ان مجلس الشعب الاندال هم اللي حصلوا فيه على الاغلبية فما حيصدقوا يفشوا غلهم في حد تاني غير العسكري

أولاً : أرفض بشدة أن تطلقي هذا الوصف على الإخوان والسلفيين (أم أنت لا يعجبك إختيار شعبنا الواعي المعلم الذي تتغنين - أنتي وأبوك - بمحاسنة ليل نهار ؟)ولا الديموقراطية ما دام ماجابتش اللي على هواكي تبقى خلاص كخة ؟
ثانياً : الأندال التي بتتكلمي عليهم دول هما اللي حيكموا مصر - شئت أم أبيت - فأما ترضي بذلك أو تقفين في جانب الجيش ليحكم هو .. ما هو أصل الأخ المخلوع قالها من زمان كلمة حكمة وإنتوا ماصدقتوش : أما أنا (يعني الجيش) أو الإخوان .. تجبيها كدة .. يجبيها كده .. هي كده
تكونيش كنت فاكرة إن العيال بتوع البنطلونات الساقطة اللي عاملين شعرهم كحكة هما اللي حياخدوا أغلبية المجلس ؟ بأمارة أيه يا صغننة ؟

متفائل said...

وبما ان مجلس الشعب الاندال هم اللي حصلوا فيه على الاغلبية فما حيصدقوا يفشوا غلهم في حد تاني غير العسكري

أولاً : أرفض بشدة أن تطلقي هذا الوصف على الإخوان والسلفيين (أم أنت لا يعجبك إختيار شعبنا الواعي المعلم الذي تتغنين - أنتي وأبوك - بمحاسنة ليل نهار ؟)ولا الديموقراطية ما دام ماجابتش اللي على هواكي تبقى خلاص كخة ؟
ثانياً : الأندال التي بتتكلمي عليهم دول هما اللي حيكموا مصر - شئت أم أبيت - فأما ترضي بذلك أو تقفين في جانب الجيش ليحكم هو .. ما هو أصل الأخ المخلوع قالها من زمان كلمة حكمة وإنتوا ماصدقتوش : أما أنا (يعني الجيش) أو الإخوان .. تجبيها كدة .. يجبيها كده .. هي كده
تكونيش كنت فاكرة إن العيال بتوع البنطلونات الساقطة اللي عاملين شعرهم كحكة هما اللي حياخدوا أغلبية المجلس ؟ بأمارة أيه يا صغننة ؟

علان العلانى said...

سناريوهات افتراضية...
الخطاب الثوري وخطاب المخلوع

المأزق فى المشهد هو مأزق النظام لا مأزق الثورة. المجلس العسكرى يلعب لعبة حافة الهواية وهى نظرية قديمة تسكن وعي الخشب المسدنة فى المجلس العسكرى ولكنه يلعبها بدون حزام واقى من جسد الجيش المصري فلم تكن هناك توازنات طبيعيه داخل بنية المؤسسة العسكرية لغياب نظرية للأمن القومى، أى أن الجيش كان منذ ثلاثين عاما ولا يزال يدار بقانون طوارىء داخلى ومن خلال المخابرات العسكرية وتلك هى ثغرة المجلس العسكري الاستراتيجية وكعب أخيل لدى قوى الهيمنة فى نفس الوقت. إن شبكة الارتباط بين الجيش والفلول أضعف حلقات الصراع لأنها عارية تماما وليس لها أى غطاء سياسي والعمليات القذرة من أفراد مدربين و مختارين اضطراريا ولكن قطاع كبير منهم ليس من القوات المسلحة حتما وأن تزيا بزيها، هناك ستار حديدى مطبق على الجيش فنحن لانرى غير المجلس العسكرى وكتلة الحرس الجمهوري ولكن صدى هذا على العصب الحى داخل كيان الجيش وأن كانت لاتتبدى فى ردود أفعال مباشرة تصل الينا من داخل جسد معزول الا أنها حتميا تشكل تلاحم بين شرعية ثورية شعبية وجيش يستجيب جهاز المناعه القومى والشعبى داخله للترياق الثوري. إن المجلس العسكري لا يستطيع حماية نفسه أو الحفاظ على مصالح قوى الهيمنة فى المنطقة بدون مساعدة مباشرة وحاسمة من الإدارة الإمريكية وإسرائيل لا تتوفر ظروف أقليمية لها فالحل هو حرب وقائية على الحدود تفرض لا صوت يعلو "فالأمة فى خطر" وهو حل مستحيل حاليا سواء فى ليبيا أو غزة أو السودان الى جانب الفوضى الأقليمية فى البحر الأحمر وبعد... أن تحليل المشهد السياسي فى هذه اللحظة لا يخضع لفروق التوقيت زمنيا ولابد من التحديق فيه بثلاث عدسات متوازية وفى نفس الوقت واحده داخلية وأخرى أقليمية وثالثة دولية وفى مراقبه شديدة الحذر للتناقضات بين الخطاب الساداتى المنبطح المستسلم الذى يرضى بفضلة أمان وفتات معونة ويميل الى العزلة مقابل عمالة صريحة مقبوضة الثمن وخضوع كامل لقوى للهيمنة وبين الخطاب الثوري الشعبي الذى يحمل رسالة المستقبل لأمة كريمة وشعب حر
عندما ﹸبترت أصابعه وﹸقطع لسانه
لم يدر كيف يخط بالصوت الذبيح
احتفاء العين بالرسوم و الأشكال
كان يريد بالنقش
ما يأباه من يجهل طلاوة الكلمات
حين تقول أكثر مما تحتويه شكولها
فعندما هجت النفوس أصولها
و أستحبت أن تكون
كيفما شاء ت عزائمها
ارتخت كل الوسائل
عن بلوغ مرامها
لم يبق الا المستحيل
يناطح مايستحيل بلوغه
الا لها

علان العلانى said...

العجوز والبحر

العسكر فى مرحلة الإنكار وتتلبسهم خضة سياسية وتمكن ذهان الثورة منهم فهم يعاندون التاريخ نفسه وستتبعها مرحلة الإنهيار وسيخلعهم الشعب المصري على مهله فهذه ثورة حقيقية طويل كالمدى نفسها وتتقن حرفة النمل ثورة شعبية على الحقية جوهرها الشهداء وفعلها فيه من حنكة الصنيعي وصبر الفلاح .الشعب المصري شعب شاب والشباب لا يقاتل على حكومة أنه يناضل ليحرر مستقبله من شبكة خطاب الهيمنة وهو فى فعله الثورى حريص على نسيجه القومي ويداري سفهائه وفى أتون الثورة التى لا يملك أحد على وجه الأرض خريطة طريق زمنية لها سيبدع على طريقته الفريدة ..كما يحكى لنا التاريخ كيف كان دائما فى صحوه علامة فارقه على صحوة الأمة...
أنتصر الشعب فلا تستعجلوه

kiki said...

فيه واحد صاحبي عايش في دور الثورجي مع انه في امريكا و بيتكلم كتيييييير عن موضوع السلاح ده... طبعا من قبيل الهبل ليس الا...هو و غيره اللي بيتكلموا علي موضوع شيل السلاح من غير ما يبقوا "إن كاهوتس" مع المجلس العسكري شايفين ان هو ده الصح. انا شخصيا ضد التنازل عن سلمية الثورة بس ممكن انتي و كل الثوار تلبدوا شوية لحد ما تتحل المشكلة؟ القعدة في التحرير ماعادتش لا تقدم و لا تأخر. لازم الثورة تدخل البيوت، و المصالح الحكومية و غيرها... مشكلة الثورة ان فيه فجوة عمالة توسع بين الناس و حياتها اليومية و بين الشباب اللي عاوز كل حاجة تمشي صح في غمضة عين. طرف بطيء تقريبا محلك سر و طرف عايز يجري زي الرهوان علشان يعيش و ياخد حظه من الدنيا.. و ما نقدرش نغلط الاتنين... لكن القعاد مش حل و البرلمان برضه مش حل لأنه مبني علي نفس نسق البرلمانات السابقة سواء كانوا اخوان او كتلة او ائتلاف او شلة الأنس. لازم مسيرات في كل انحاء القاهرة و تنسيق بين كل اللي عملوا اعتصامات فئوية

هو ده اللي المجلس عايز يمنعكم منه لأن اكبر عدو لينا هو الفساد في المؤسسات العامة لو حاربنا ده و قضينا عليه تبقي الثورة نجحت

Mohammad Al Qersh said...

انت بتفكريني بحزب الوفد. اسمك معارضه ومع ذلك انت جزء من الاشخاص الي بيدعموا المجلس اساسا. الناس الي المجلس ممكن يشاور عليهم ويقول الثوار اهم طالعين يقولوا الي هما عايزينه. يا ستي المجلس عمره ما حيزهق وكل الي بيحصل ده تهريج. مش بقول نشيل سلاح ولا بقول نعمل اي حاجه. بس الي انا شايفه وواضح ان محدش خسر غير الثوار ومصر. الجيش عمره ما بيخسر والناس الي اتعورت واتقتلت في شارع محمد محمود وغيرهم من 25 يناير. مفيش قصادهم اي خساره من ناحيه المجلس عشان يطلع. يعني باختصار عندهم استعداد ده يفضل يحصل كده سنتين ثلاثه ولا هيزهقوا. انا حاسس انك مش فاهمه ان الموضوع اكل عيش. الجيش ده كله عباره عن شركه كبيره. احنا مدخلناش حرب بقالنا اكتر من 38 سنه تقريبا. تقدري تقولي ليا بقي الي في الجيش دخل ليه؟ لو مش عارفه اقولك دخل عشان نوادي الجيش وشقق الجيش ومرتبات الجيش. ولما يعلي شويه تلاقي شركات الجيش ومزارعه وعمولاته وصفقاته. خلاص يا ستي الجيش معدش مكان الواحد عايز يدخل فيه عشان يدافع عن البلد. الجيش مكان الناس بتدخل فيه عشان تعمل فلوس. وكده انا اقدر اصلا افهم كل الي بيحصل. شئ مفهوم يعني لما يموتوا الناس في التحرير ولا يطلعوا بوز ابونا عشان انتخابات ولا يدونا اي حاجه بدون صلاحيات ولا يخلوا نفسهم فوق اي قانون او سلطه. ميقدرش يحط نفسه تحت سلطه ممكن تكون عايزه مصلحه البلد. لان اكيد مصلحه البلد ضد مصلحته هو.
انا حاسس ان الكومنت ده عمره ما يحطلع :) بس مش مشكله. يمكن يغير طريقه تفكيرك شويه. وانت في ناس كتير بتسمعك وتصدقك. وديه حاجه مينفعش تستخدميها غلط لان الاذيه مش حتمسك بس. ممكن تأذي ناس كتير من الشعب ده.

oleldoniia said...

ربنا يحميكي ويحفظك يا نوارة ... لا أسكت الله لك حسا

oleldoniia said...

ربنا يحميكي ويحفظك يارب .. لا أسكت الله لك حسا

DIY CNC said...

حمد الله على السلامة يا نو نو كنت بدور عليكى فى الميدان وكل شوية عمالة تلفى ارحلك مجلس الوزرا يفولو عند عمر مكرم انا مش معاكى هما بيدور و على اى شو وخلاص يعنى حاجة تتطول الوقت ومش مهم البلد ايكش تولع بس المهم ربنا بيكشف الفلولول والمرتزقة واحد واحد ربنا يقويكى

faissl said...

يا حاجة، والله العظيم يا شيخة، وحياة الأخوة ما فيه عشرين مليون نزلوا في الثورة، وما حدش انفرد بهذا الرقم الفشيخ إلا المجلس، وأكثر التقديرات افتكاسا قالت 8 مليون، والمجلس قال لنا عشرين مليون عشان اما ننزل بعد كده ونلاقينا لوحدنا نقول الشعب باعنا ونرجع.. والنتيجة إيه؟
النتيجة اللي انتي بتقوليه بالضبط: مفيش بالفعل إجماع شعبي على دين أم الثورة دي، ويا نشيل سلاح يا نلبس حكم عسكري للأبد، عشان العسكر بيحكم دلوقت بشرعية السلاح المستندة إلى شرعية مبارك اللي كلفهم بالحكم، وادي الجمل وادي النخلة..!

حسن محمد على said...

اية تعمل "الاستشارية" فى "الانكشارية"بس خلاص

متفائل said...

لفت نظري تعليق الأستاذ : علان العلاني وهو بعنوان : العجوز والبحر .. لذلك أود التعقيب عليه
ما كتبته صحيح تماماً يا سيدي .. لكن .. كي تنجح جزئية (يداري سفهائه) دي في إطار (حرصه على نسيجه القومي) لابد أن تندلع حرب أهلية بينه وبين (سفهائه) الذين يريدون هيمنة كاملة على كتابة الدستور القادم بلا شريك .. فإذا علمت يا سيدي أن (سفهائه) أكثر كثيراً من عقلائه فأعتقد أنك تستطيع أن تحدد لمن ستحسم نتيجة مثل هذه الحرب
أفلا يتطلب الأمر إذن (ضابط إيقاع) بين الشعب وسفهائه ؟ هو موجود .. ويحاول .. لكنكم تحسبونه من الأعداء .. تطالبونه بالرحيل .. تصرخون : يسقط يسقط حكم العسكر .. في حين أنه لو رحل لترك الأمر كله لهولاء السفهاء ولضاع النسيج القومي

مش فاهمه said...

حلو البوست ده التحليل هايل و جميل بس ماقولتيش الحل .....الحل فى رأيي تروحى للأندال او على الأقل للجزء الثورى فى الأندال و خليهم ينقلبوا على قياداتهم يعنى بدل ماضباط ينقلبوا على قياداتهم نسخن احنا فى البلتاجى و اللى زيه ينقلبوا على قياداتهم و نعمل معاهم احلى شغل هو ده الرهان و يايصيب يا يخيب مافيش قدامنا الا اننا نراهن على المجلس القادم ناخد له صلاحيات و يمثلنا و نخلص

donkejota said...

شكرا انك نورتي على حتت كتير احنا مش شايفنها

ولازم كلنا نعرف ان البلد دي مش هتنضف الا بينا

شكرا يا نوارة

hardway said...

أنت عبيطة يا عبيطة...

مصري وبس said...

" علي قد علمي "...

لما قعدت وسرحت في بناتي ومستقبلهم وطموحاتي بالنسبة ليهم وهما أكيد هيبقي ليهم رأيهم المخالف لرأيي
زي ما كنت طول عمري بأتمرد علي أي سلطة من اي نوع حتي أقرب الناس ليا المتمثلين في أهلي " قبل الزواج"و " بعد الزواج "أهلي ومراتي وبعد كام سنة لو لينا عمر هيبقي أهلي ومراتي وعيالي ولو ربنا مد في عمري هيبقي أهلي ومراتي وعيالي وصحتي .
المهم حاولت أحط نفسي في موقع أي مسئول عند البلد في الفترة القادمة وحاولت طبقا لخبراتي المحدودة ونظرتي المحلية وتطرف رأيي لجهة ميدان التحرير " للأسف ما إحنا بقينا جهات كتييييير"علي طول الخط ومن اول يوم ولما نزلت الميدان حسيت بحاجات مفيش عندي استعداد أتخلي عنها لأي سبب..... ووسط الحسبة الشخصية الصعبة بالنسبة ليا وممكن حد تاني يختلف مع رأيي وده حقه بس نفسي ألاقي اضافات جادة نستفيد منها كلنا بعد إذن حضراتكم قولوا عاوزين ايه علشان نطلع بالبلد من الكبوة دي بسرعة ونحقق الحلم اللي استشهد علشانه أطهر شباب البلد؟؟؟؟؟
دي شوية حاجات أنا شايفها مهمة ولازم تتنفذ بسرعة " علي قد علمي وفهمي "
1- إقرار حد أقصى للأجور 50 ألف جنيه وحد أدنى 1200 جنيه أي بنسبه 1:41 من قيمة الحد الأقصى وتطبيقها فوراً وإقرار إعانة بطالة أو توفير فرص عمل للعاطلين أو توزيع أراضي زراعية عليهم بكافة التسهيلات والضمانات المطلوبة ورفع المعاشات بما يتناسب مع الحد الأدنى للأجور.....
2- تعيين وتثبيت جميع المؤقتين واحتساب فترة عملهم كمؤقتين من فترة خدمتهم مع مراعاة حق ذوي الاحتياجات الخاصة في نسبة 10% من التعيينات وتطبيق قانون العمل على القطاع الخاص والرقابة على تطبيق ووقف تعيين أبناء العاملين وتكون الأولوية للكفاءة والتخصص.
3- تثبيت الأسعار ووقف ارتفاعها الغير مبرر والتصدي للاحتكار ومحاربته للقضاء على جشع رجال الأعمال وتأميم أموال رجال الأعمال الفاسدين وردها إلى مستحقيها من عمال وفلاحي مصر، والوقف الفوري لتصدير السلع الأساسية من أرز وزيت وسكر ودقيق وغااااااااز لأي دولة أياً كانت إلا بعد سد الاحتياج الداخلي والوصول إلى الاكتفاء بأسعار مناسبة للمواطن المصري وفي حالة تصدير الفائض يصدر بأسعار التصدير العالمية.....
4- وقف المحاكمات العسكرية للمدنيين وإعادة محاكمة كل من تمت محاكمته عسكريا أمام القضاء المدني والإفراج عن كافة المعتقلين السياسيين والإفراج عن ضباط التحرير الشرفاء وإلغاء قانون الطوارئ فوراً....
5- إعادة الأمن للشوارع واتخاذ كافة الإجراءات للقبض على الخارجين عن القانون فوراً وإعادة هيكلة جهاز الشرطة ومحاكمة جميع المتهمين في قضايا تعذيب وقتل
6- تطهير جميع الوزارات والمؤسسات والهيئات والمحافظات والمحليات والاتحادات والنقابات من فلول الحزب الوطني المنحل والذين تم تعيينهم بإشراف أمن الدولة وتقديم الفاسدين للقضاء العادل ومنعهم من السفر والتحفظ على جميع أموالهم وممتلكاتهم ....
7- إصدار الموافقات اللازمة لعمل نقابات للمهن والحرف المختلفة (السائقين - الإعلاميين - الفلاحين - .....) على أن تكون مستقلة ويشرف القضاء على انتخاباتها ويطبق ذلك على كافة النقابات الموجودة بالفعل، واستقلال الهيئات التي يجب استقلالها كهيئة الطب الشرعي، القضاء، الإعلام، الصحافة، ....)
8- وضع خطة زمنية قابلة للتنفيذ للقضاء على العشوائيات وتوفير حق المسكن لقاطني القبور والشوارع والمستحقين وتحويل جميع مقار الحزب الوطني المنحل لدور رعاية لأطفال الشوارع وتقديم لهم الرعاية الصحية وحق التعليم والعلاج النفسي والاجتماعي ليعيشوا كرماء في بلدهم.
9- تخصيص لجنة بوزارة الخارجية لاستقبال كافة شكاوي المصريين بالخارج للعمل على حل جميع مشاكلهم حلول فورية وخاصة مشكلة الكفيل وتحكمه في أرزاقهم بغير وجه حق وإعادة كرامة المصري ورد اعتباره في جميع الدول .
10- التكريم المستحق ومنح أرفع الأوسمة لأهالي شهداء الثورة " يناير - ماسبيرو - محمد محمود " ولمصابيها وتقديم العلاج الكامل لهم على نفقة الدولة وسفر من يحتاج العلاج بالخارج. ..................................................................................
ياريت أعرف رأي حضراتكم عاوزين إيه تاني؟؟؟؟...MK

علان العلانى said...

الأستاذ متفائل خليك متفائل 1

بداية لا أتفق معك ان سفهائه أكثر كثيراً من عقلائه وأكاد أجزم أنه العكس تماما وتاريخ مصر القديم والحديث وفى كل العصور لم يكن هذا الشعب كما يبدو لك وأعتقد أن الثورة اساسا جائت وكانت بهذا الحجم العالمى وهذا التوقيت الدقيق والنادر لأن عقلائه بل وعباقرته المعلومين والمعلمين أكثر كثيرا مما تظن ويظن العالم وهذا هو ما سبب كل هذا الارتباك العالمى والأقليمي هذه دولة كانت مصنفه فى دوائر السياسة العالمية دولة عميلة هل تفهم معنى ذلك
هناك كلمتان اساس هنا كلمة الثورة وكلمة الشعب وفى فهم هتان الكلمتان يمكن بسهوله فهم" جزئية" يدارى سفهائه و فالثورة رغم انها كلمة تتردد كثيرا ألا انها كلمة على مايبدوا غير مفهومة ان من يعتقد أن الثورة هى فعل ثمانية عشر يوما أو ما تلاها كمن ينظر الى الأصبع الذى يشير للقمر ولا يرى القمر الثورة تكاد تكون ظاهرة طبيعية محايده فى فعلها على الحقيقة لا تنتمى لأحد والكل ينتمى لها وهذه الظاهرة مثلها مثل كل الظواهر الطبيعية لا يفيد معها تحسب ولا يستطيع أن يحجبها أحد ، وهذا لانها تراكم يتكون على عشرات واحيانا مئات السنين ولا يدرى أحد لحظة أنفجارة رغم وجود مؤشرات له احينا، لا يستطيع أحد أو شعب أن يصنع ثورة هكذا مستحيل فى حدود علم السياسة وعلم التاريخ
أما الشعب فهى كلمة أشد غموضا من كلمة الثورة وقد يفجأك ذلك ولكنها على المستوى الفلسفي كذلك فمثلا سيادتك عندما تقول الشعب فأنت تتكلم عن كيان وأنت جزء لا يتجزء منه وهو غيرك وليس ذاتك ولكنه فى نفس الوقت ذاتك وغيرك وهو دينك وليس دينك وهو لونك وليس لونك وهو نوعك وليس أنت وهو شاب وعجوز ورجل وأمراه وطفل وفقير وغني وعالم وجاهل وذكى ومتذاكي وغبي ومتغابى وكل ما شئت من صفات وهوكل ويحمله جزء وهو الوطن فلو أختفي كل المصرين فجأه على سبيل المثال وبقيت هذه الحجاره فاين مصر وما معناها
وبعدالمجلس العسكري عباره عن مجموعه من المجندين أختارهم المخلوع بعناية فائقه ودقيقية وبعد اختبارات شديدة الانتباه ووضعهم فى هذه الأماكن الحساسة فى كيان الدولة وهو قائدهم الأعلى وكانوا بمثابة عبيد له وهذا شرط وجودهم فى مناصبهم ولا يوجد أدنى شك لعاقل واستغرب أنك لا تدرى أن السفهاء هم بذاتهم المجلس العسكري فهم مجرد عملاء وأخس ما أنجبت القوات المسلحة فى تاريخها منذ أن كان هناك جيش فى مصر بل هم أسوء من جنود فرعون موسي وأرذل وهم أجبن قاده لجيش مصر على مر عصوره وهم لطخة عار لن يمحيها الا زوالهم الى الأبد هم وكل من أختار هذا الخسيس المخلوع لقد دارهم الشعب وأملى لهم وأراد لهم الستر ولكنهم بجنبهم وهلعهم دمروا الممر الأمن الذي بناه لهم الشعب بتنازله عن حر ماله ويتقاعدوا وتطوا صفحتهم وبنوا بدل منه سور أما سفارة الصهاينه هدمه الشعب رغم أنفهم وكل ما حدث بعد ذلك هو محاوله لكى يثبتوا للأدارة الصهيوأمريكية أنهم يستطيعوا أن يقوموا مقام الكنز الأستراتجي المخلوع

علان العلانى said...

الأستاذ متفائل

نعود الى الثورة 2

وهى بهذه المفهوم الكلى أعلاه حدثت فى مصر فقد تراكمت دواعى لها منذ بوادر اكتشاف الشعب المصري أن الخيار الساداتي خيار كارثي وفى عام 1977 اى بعد حرب أكتوبر مفتوحة النهايات كانت أول رصد لحركه شعبيه كبيره عبرت عن تملل جيل "أكتوبر"الذى دفع الثمن وتحمل الغرامه هذا الشعب له مخذونه التاريخى الأستراتاتيجي الذي لا ينفذ ولم يستحدث من عدم منذ التاريخ المعروف للبشر وعندما يدرس تاريخ الحضارة فى كل مدارس العالم الابتدائية وحتى أعرق معاهدها وجماعتها ستجد بصمته دامغه لا تضاهيها بصمه فعلى سبيل المثال عندما حدثت هزيمة 1967توقع العالم كله أن هذا الشعب سيركع ولكنه وقف وقفه أدهشت قادته قبل أعدائه وفى ظرف 6 سنوات فعل ما كان بمثابة زلازل استرتيجي غير تاريخ العالم وتاريخ المنطقة رغم أنه لم يستفيد منه شىء يذكر وكان موقفه كموقف عنتره العبسى الجاهلى أغشي الوغي وأعف عند المغنم لقد ارتفعت أسعار البترول بعد هذا الحرب وتغير وجه المنطقه كلها وأخذت الصحارى مقام الحضر فيه على عكس نظرية التاريخ فى النفوذ السياسي
ولكى ليكون هذا التعليق نهاية أقول لك موجزا أنت بكلامك هذا لا تعرف مصر ولا ترى الا تحت أقدامك ولست فى حل ان أكتب الأن ما يستفيد منه مرحليا أعداء هذا الشعب سواء كانوا فيه وليسوا منه أى عملاء او أعداء أنفسهم أقول
القفز من مداراة السفهاء الى حرب اهليه رغم تعسفه بحيث أنه يبدو حوار تعجيز الا انه منطقيا الثورة الحقيقية لا تحفل بهذا وهل تعتقد أن الحرب الأهلية فزاعه سوف تجعل الناس تخضع للمجلس العسكري لو كان العسكر يعتقدون ذلك فهم واهمون الحرب الأهلية عمليا لا تتوفر إدواتها فى مصر وتاريخ مصر كله منذ الفراعنه الى اليوم لاتوجد فيه حرب أهلية بالمعنى المعروف وعندما حدثت فى التاريخ حدثت قبل الميلاد فى عهد مينا موحد القطرين أى أن الحرب الأهلية فى مصر لم تقم الا لتوحيها ومرة واحدة والى الأبد وهى على اية حال لن تكون لا سباب يصعب شرحها فى هذه العجاله أما أذا كنت تشير الى الأخوان فهم أهون مما تعتقد ويعتقدون لقد تركهم الشعب يختاروا أنفسهم وساهم كثير من جماهير الشعب فى اعطائهم الفرصه فقد ملؤا الدنيا هديرا بأنهم سيعدلون وأنهم دمقراطيون ويريدون دوله مدنيه وها هم وقبل أن تنتهى الأنتخابات يسكرون بخمر سلطه مغشوشه أما الدستور ومؤساسات الدوله فقد كانت طوع أمر الفرعون ماذا فعل بها هناك أمم عريقه ليس لديها دستور مكتوب و بريطانيا على سبيل المثال ليس لديها دستور الشعب يريد اعادة تأسيس الشرعية والسلطه بعد ذلك تكون لمن هو قادر على تحقيق مستقبل حر وكريم بكافئته لا بعمالته وهذا شعب شاب لم يصنع يوما حضارة باستلاء على ذهب جيرانه الأصفر أو بصدفه جيلوجيه تفجر له ذهب أسود لم يعرف الا الذهب الأبيض المبلل بعرق فلاحيه وعرق عماله وهو قادر يشبابه وعلمائه فى كل المجالات أن يصنع المعجزات فى كل المجالات

علان العلانى said...

وبعد
سيفعل الشعب ما يريد وقد إراد اسقاط النظام وسيسقطه عبر كل الوسائل والنظام ليس فقد الفرعون وجنوده ولكن هو كل منظومته بما فيه المعارضه المخترقه والعميلة وسيسقط الشعب كل من تحالف مع المجلس العسكري على حسابه وحساب دم شهدائه الأطهار وفطنة الشعب كانت فى أنه عندما أعطي السلطة للعسكر أعطاها وهو يعلم أنها سلطة تالفه لأن السلطة الحقيقية هى في الشرعية وليست في الأذعان والشرعية في يد الشعب وثواره وليست فى اية صناديق السؤال الأن لماذا حرص الجيش الذى نراه يعرى النساء ويضرب كبار السن ويطرطر على مجلس الشعب لماذا حرص على تأمين الأنتخابات وهو يعلم يقبنا أنها ستكون لصالح الأخوان؟ وهل هناك من يعتقد أن الشعب لا يرى ويحدق ويفكر فى كل هذا؟ المرحلة القادمه وصناعة المستقبل لن تكون الا تحت شرعية كامله لانها ستكون عقد مع جيل كامل أن يضحي لأجل ان يعيش احفاده فى حرية ورخاء الشرعية الجديدة فى أن يكون المواطن حر وكريم يبنى بيد ويبدع بيد وهذا لن يكون الا فى نظام طاهر اليد يحكمه القانون ويسوده العدل ولهذا فالشعب لن يفقد صبره أبدا فهو يصتع المستقبل وقد صبر على الفرعون المخلوع التافه المنحط ثلاثون عاما ومستعد أن يصبر على صناعة المستقبل عشرا ت السنين مهما كلفه صبره فلا معنى لحياة ذليلة خانعة بفضلة أمان ومعونات وتسول هذا شعب شاب يريد أن يعمل ويبدع ولن يكون هذا مجديا عندما يسلم السلطه لمرتزقه متشوقون لها لينهبوه لعشرا ت السنين القادمه كما فعل غيرهم فى بداية حكم مبارك كان يبشر بالحرية ونظافة اليد وبقول الكفن ملهوش جيوب وها أنتم ترون ما نهب ونهب سدنته ومن حوله نعم الشعب فطن ولكن فطنه اعمق من أن تجعله يأخذ ما يلقى له

حسن محمد على said...

اللواء عادل خرابة" اركان حرب اية وبلا ازرق اية ,لأ ودة الفصيح بتاعهم,يكلم الصحفين كأنهم مجندين مستجدين ,وهو ممتلىء بالكذب الفاحش والغرور الفادح فى محاولة بائسة لأخفاء كذبة القذر و الوضيع

Helal Soft said...

ربنا يبارك فيكى يا نوارة ، أفدتينى شخصيا كتير ، بس ما لوش لزوم نخون حد تانى ، الله أعلم بالنوايا ، وانا شخصيا متأكد زى ما أنا متأكد من نفسى ان الاخوان والسلفيين بيحبوا مصر زى أى شاب او فتاة فى التحرير

فادى فتحى said...

طيب انا عايز اعرف تصورك للسيناريو الى المفروض الثورة تكمل بيه , انتى عماله تتنبئى ومقدمتيش حلول

عماد عبد الملك بولس said...

لاعذر لنا إن كنا أغبي من أعدائنا و بدأنا الموضوع بالغضب و يزج فحم الحريقة إلي الأفران الهتلرية الانتفائية الذكية و فتحنا الباب للكل، أصدقاء و أعداء حتي عدنا لا نعرف العدو من الصديق ثم لا زلنا بلا خطة!!!!!!!!!!

muhnas said...

بعشقك يا نواره

muhnas said...

بعشقك يا نواره

Mohamed Abdulaziz said...

نوارة ممكن اسئليك سؤال , انتي ليه عملالي بلوك ع تويتر ؟ :D كل لما اجي اعمليك فولو يقولي انيك عاملة بلوك ومش عارف ليييييه ؟! هو انتي حرة طبعا بس كل الموضوع اني كنت عايز اتبعيك ومش عارف خااااالص @m7md_abdulaziz