Wednesday, 25 January 2012

الشاعر تميم البرغوثي: رئيسنا واحد شهيد يحكم من التحرير


منصورة يا مصر مش بجميلة العسكر 
إحنا اللى روَّحنا بدرى بس مش أكتر 
قول للى روَّح عشان يرتاح فما ارتاحشى 
الراحة كلِّ ما تستعجلها تِتْأخَّر 
واللى ها ينزل ها يُحكُم لو ما روَّحشى 
قصر الرياسة بْبلاش، بسِّ انتَ مستخسر 
●●● 
قصر الرياسة ما فيش بينك وبينه كتير 
فيه سلك شائك وكيس رملة وكُشْكِ غفير 
لو جيت لوحدك، ها يضرب، والرقاب ها تطير 
وان رحت مليون، ها يهرب، وانتَ تبقى أمير 
رئيسنا واحد شهيد، يحكُم من التحرير 
قصر الرياسة الجديد بِصينِيَّة ومدوَّر 
●●● 
منصورة يا مصر بجميلة خيام الخيش 
بيحرقوها عشان تمشى ولا تمشيش 
يا مصر عُمْرِ ما فيه ثورة تقوم بِشْوِيش 
المُلك ده اللى ادِّتيه للعسكرى بقشيش 
حقّ العيال اللى ماتوا فى طابور العيش 
وبنت عَرّوها فى الشارع وشيخ أزهر 
●●● 
يا حاجّة ياللى بتقرى الكفّ والفناجيل 
إقرى وشوش البشر، ع النصر تلقى دليل 
ده حقنا ف مصر مش ها نسيبه للتساهيل 
وان قلتى نصبر يومين، يبقى ها نصبر جيل 
أجلنا قبل كدة فادنا بإيه التأجيل 
رَمْيِ الجُثَثْ فى الزبالة فى الضُّحَى الأحمر 
●●● 
منصورة يا مصر بجميلة ولاد وبنات 
بجميلة اللى انحبس بجميلة اللى مات 
بجميلة التريَقَة والضحك فى الأَزَمات 
ودم فوق الرصيف ناقش سُوَر وآيات 
يا مصر ياللى انتصرتى فْ جُمعِتين وِتَلات 
نفس العَدُو هُوَّه هُوَّه بَسِّ متنكَّر 
●●● 
الصبح طالع لِقِى دبابة فوق راسُه 
مربَّعة فوق دماغُه وكاتمة أنفاسُه 
والشرق مقفول وخِتْمِ النِّسر ترباسُه 
قام خبَّا شمسُه ووزَّعها على ناسُه 
على العيال اللى ماتوا غدر وانداسوا 
بقى شرق فى كل جسم، وشمس بتنوَّر 
●●● 
الشعب واقف وصدره للرصاص عريان 
والدولة خايفة ولافَّة نفسها ف جدران 
وزى ما الحاوى ممكن يلدغُه التعبان 
شوفوا حيطان السجون بتلفّ ع السجان 
والفالح اللى بيتهوَّر على النسوان 
ما شفناهوش ع الحدود يا ناس بيتهوَّر 
●●●
كان للفراعنة إله قرد وإله تمساح 
وللإله كهنة وعسكر يقف بسلاح 
وخزنة متقفِّلة بالضبة والمفتاح 
وقصر يشبه قصور الجمهورية براح 
يا عينى ع الآلهة بقوا فرجة للسياح 
ياللى بنسر وسيفين فرحان ومتكبَّر 
●●● 
الشمس تُدعى الغزالة فى اللغة فاعلم 
وبالغزالة المضيئة فى السما باحلم 
غزالة ممكن تبيِّن طبعها الوحشي 
ما تغرّكمش الأسامى ورقِّة المبسم 
دى شمس واللى يِقَيِّدها ما يفلحشي 
ومصر حالفة، ها تتحرر، هاتتحرر 
----------------
يا رب تعيش الف سنة يا تميم

18 comments:

eddo said...

جابها من الشمخ الجوااااانى

Mona Rady said...

حلوة أوي ، ربنا يخليه لمصر

borham said...

ايه الحلوة دي
عظما علي عظما يا ست

borham said...

ايه الحلوة دي
عظما علي عظما يا ست

Ahmed Fadel said...

http://www.youtube.com/watch?v=C67aq6jqgjA

Ahmed Fadel said...

http://www.youtube.com/watch?v=C67aq6jqgjA

haroon said...

ما تتجوزيه وتريحي نفسك

Mohamed Kadah said...

جميلة جدا

waheedhabeeb said...

رائعة كالعادة من تميم

علان العلانى said...

أصيل الشعر لما يكون له تميم
تميم الشعر لما يكون له أصيل

Hesham Mehrem said...

الشاعر الجميل ده مش واخد حقه

احمدرافت said...

رائعه جداااااااااااااااااا

احمدرافت said...

رائعه وحقيقية

احمدرافت said...

رائعه وحقيقيه

hamed mostafa said...

جميلة جدا

hardway said...

مصر لا تعرفه....ولا تريد ان تعرفه
وكلامه لا يصح في بلدنا...يروح بلده
ويحاول في حل مشاكلها..أحسن وأفلح له ولبلده
وحشتيني يا سكسكة التحرير

Muhammed S. Abdel-Meged said...

من أروع الكلام اللى اتقال فى حق ناس ضحت فعلا عشان خاطر البلد دى

---------------------------------
سامسونج

sammi qaid said...

دماغك عالية جدا