Thursday, 29 September 2011

توكلنا على الله

بكرة ان شاء الله كلنا نازلين...
كلنا يعني كلنا.. يعني حزب الكنبة والمواطنين الشرفاء... يعني شباب الاخوان والقيادات لا، وشباب الاخوان اللي نازلين عمالين يدعوا على مكتب الارشاد ولا دعايا على عمر سليمان.. يعني شباب السلفيين والمشايخ لا... المسيحيين والكنيسة ما فتحتش بقها... يعني اللي بيسموهم ليبراليين لما بيلاقوهم مطولين شعرهم.. والباقيين اللي هم احنا بقى.. العالم الصايعة اللي راشقة في اي مظاهرة واعتصام دي.. اللي هو اللمة بتاعتنا دي بالصلاة ع النبي، المندسين، واللي خربوا البلد وكدهون
فوايد شهادة المشير انها لغت الاستقطاب الايديولوجي والمصلحجي والطبقي ورجعت استقطاب: ناس حقانية وناس ولاد تيت.. من كل الفئات والتوجهات والطبقات
ايه بقى؟
على الشعب ان يستعد تماما
المجلس قفل قناة الجزيرة، وبيدينا اشارة انه ناوي يستفرد بينا، وبيعمل عمليات ارهاب وترويع وتكفير ونفس الشغل اللي عمله مبارك يوم 24 يناير.. بس الحمد لله احنا المرة دي اشجع من المرة اللي فاتت، ومستبعيين اكتر من المرة اللي فاتت.. وقلبنا محروق بالدم اللي راح 
وزي ما قلنا المرة دي حنقول تاني
انت بتعمل الصح يا حزلئوم، انت على جانب الحق يا معلم.. نزلت لقيت اللي مع الحق عددهم كبير خير وبركة، نزلت ما لقتش غير انت ومحسوبتك يبقى احمد ربنا انك نجيت وعرفت الحق فين
انا حاعتصم ان شاء الله
لو فيه مسيرة حاشارك فيها ان شاء الله
لو ربنا كرمني بالشهادة يبقى اخير دعواتي استجيبت.. قولوا يا رب ينولها لك يا نوارة يا بنت صافي ناز.. قولوا
لو ما قطعوش النت احنا حنصور وننزل فيديوهات ونبعتها للجزيرة مباشر مصر هنا
ولو عايزين نقول اي مداخلة حنتصل على الرقم ده 
0140447722
الجزيرة دي وقفت جنبنا في ثورتنا، ومش حنسمح للمجلس انه يقفل اي قناة، دي لو كانت المحور اللي هي احقر قناة خلقها ربنا ما كناش سكتنا، ما بال اللي وقفوا جنبنا، واحنا ان شاء الله حنديهم السبق
متوقع من المجلس انه يعمل اي حاجة
متوقع انه يسلط بلطجية
متوقع انه يعمل حرايق او تخريب من اي نوع عشان يلبسنا فيها وعشان كده قفل الجزيرة عشان ما تكشفش ستره 
متوقع منه يعمل اي مصيبة
معلش.. هي دي اول طبلة دقت على راسنا؟ احنا نعرف نحمي بلدنا ونحمي ثورتنا ونحمي نفسنا من الاضيشهم وتكالنا على الله
قولوا يا رب
مالناش حد غيره
ياااااااااا رب

28 comments:

Youmna Yasser said...

وأنا معاكي بالثلث ... أي حاجة أنا واقفة تحت الإشارة اللي في مدخل الميدان من قصر النيل

Hussam said...

ربنا معاكل والله يوفقكم . والله انا مكسوف من نفسى لانى دلوقتى خارج مصر عندى شغل برة انا كنت نزلت ايام الثورة من يوم 29 يناير لغاية المخلوع ما اتخلع لكن بكرة صعب ( لكن لو دقت على الراس طبول هنزل واللى يحصل يحصل ) ربنا معاكم ويوفكم وخلوا بالكم من بعض شكلها الشرطة مش ناوية تجيبها البر وربنا معاكم

وأنت مالك said...

ياااااااااااااااب

وأنت مالك said...

ياررررررررررب

Hdabor100 said...

ياااااااااااااااارب
ملناش غيرك
انصرنا وثبتنا

Khaled Mohammad Saleh said...

انا سلفي ونازل يا نوراه
والشيخ حازم صلاح سلفيين ونازلين
والجبهه السلفيه نازله
ائتلاف المسلمين الجدد سلفي ونازلين

khaledi said...

ربنا معاكل والله يوفقكم

Khaled,
Ontario, Canada

khaledi said...

ربنا معاكل والله يوفقكم

Khaled,
Ontario, Canada

jehad said...

ربنا معاكم وهاينصركم باذن الله لانكم عى حق والجماعة اللي بيطبلوا للمجلس هايرجعوا يطبلوا لنجاحكم ذي ما عملوا ايام خلع المخلوع ياريتني معاكم انا خارج مصر لكن قلبي وعقلي معاكم ...

عمر الشافعي said...

هو يجري حاجه لو الظباط المعتصمين فى النادى بتوع ائتلاف ظباط الشرطه جم التحرير ؟؟؟؟
انا شايفها حتبئا رساله رائعه و بتجيب من الاخر

Aft said...

أنا شايف إن عدم إعطاء الكنيسة أى بيان ده نعمة علشان دول لو نطقوا ها يقولوا ما معناه بالضبط الخروج على المجلس حرام؟ فسكوتهم مش ها يعطل اللى ناوى ينزل وخصوصاً فى إعلان عن مسيرة من شبراوالدليل على كده أعرف إثنين ما راحوش التحرير خالص وكانوا فى ماسبيرو بس نازلين بكره
أما السلفيين ففيه شباب زى الورد منهم نازل إن شاء الله واكبر دليل التعليقات اللى على فيديو الشيخ الزغبى وإن شاء الله بكره ها يبقى كشرى مصرى ميه فى الميه

حسن محمد على said...

مهاجمة مكتب قناة الجزيرة "اليوم" هو تحدى امنى "خايب وغبى" لأرادة الثوار المصريين وتهديد مبطن بأن قانون الطوارىء شغال زى الاول واكثر, الكورة فى الملعب - فى الميادين يعنى - وسنرى من سيفوز - الاحرار - ام العسس والمخبرين الدون ؟؟؟

EGYPTIAN COMMANDOS said...

طيب المحافظات تفضل في الميادين ولا نروح على التحرير ايهم احسن احنا مجموعة مش تبع اي حزب او حركة احنا مانعرفش غير مصر .

Bo Galal said...

انتى نفسك كان اى حد بيتكلم على مجلس القلل كنتى بتاكلية وبعد كدة عقلتى ورجعتى تانى تفهمى كويس وكنت فاكرة ان مفيش حد غيرك فى الدنيا يعرف سياسة فى ناس تانى زيك كتير لسة مفهموش حقيقة مجلس القلل

Bo Galal said...

انتى نفسك كان اى حد بيتكلم على مجلس القلل كنتى بتاكلية وبعد كدة عقلتى ورجعتى تانى تفهمى كويس وكنت فاكرة ان مفيش حد غيرك فى الدنيا يعرف سياسة فى ناس تانى زيك كتير لسة مفهموش حقيقة مجلس القلل

dr_abdog said...

رصد | البلتاجى | سبب عدم مشاركه حزب الحرية و العدالة فى فعاليات جمعة 30 سبتمبر .. ان الفرصه الاخيره للمجلس يوم الاحد الساعة 7 لرده على المطالب الرئيسية للتحالف و لكن الجمعه التى تتلو الاحد القادم هى ليست مليونيه بل هى "الثورة"#RNN

Mohamed Badr-Eddin said...

السلام عليكم يا ست نوارة
كلامك قشطة وزي الفل بالصلاة ع النبي وانا والله لو في مصر كنت نزلت التحرير
ع فكرة.. انا اول مرة اقرالك حاجة مع اني عارفك من زمان بس بصراحة مكنتش بطيقك .. انتي عارفة نظام الافكار المسبقة عن الاخرين داهون... عموما ع بركة الله يا بنت صافي ناز
ولازم كلنا نكون ايد واحدة ضد المجلس اللي الكرسي حلى في عينه
فكرني بقصة عن عابد قبل الاسلام وبعدين واحد استأمنه على بنته لحد ماييجي من السفر وبعدين كل يوم بقى يجيبلها الاكل ويسيبه قدام الباب مرة في مرة لحد ما الشيطان غواه.. واتقتل في الاخر
المجلس الشيطان غواه على ع الكرسي بس احنا واقفينله بالمرصاد

أحمد محمد said...

ربنا يخليك يا نورة غصب عنك ويكتب لك مائة سنة،

كيوبيد said...

يارب انصر مصر وشعبه على كل ظالم وعلىكل عبيد السلطة محبى جاه السلطان انصرهم يارب بحق محمد الحبيب وعيسى

hardway said...

لا يوجد في جماعة الاخوان شئ او جمع او شلة
تسمي شباب الاخوان....رجال نساء شباب بنات.... صغار كبار أطفال كل..كل ذلك يسمي جماعة الاخوان المسلمين........
أما ما تقوله وتصدره سكسكة زمبلك..أملا وأمنية لتفريق ودس الفتنة ..لالالاجدوي...
يا سكسكة الطريقة دي ممكن تنفع مع جماعة أبريل ومارس ويونيوو كفاية كده متشكرين
أما الأخوان والسلفيين دي عقيدة..عقيدة
طبعا لا تعرفي يعني ايه عقيدة..ياما قلت لكي ..عودي ياسكسة لطبيعتك....الزمبلك

محمود الزهري said...

يااااااااااااارب
والله اتاخرنا قوي قوي

hardway said...

كرمني بالشهادة يبقى اخير دعواتي استجيبت..
............................
العبط والهرتله تاني ياسكسكة..أنت فاكره أنها شهادة التانوية انا نفسي أفهم شهادة ايه..وليه؟؟؟ هوالاستشهاد في سبيل الله أليس له شروط وأسباب..ولا كل سكسكة وقفت في ميدان التحرير بمصر المحروسةومصروف عليها من خليفة المسلمين بقطر ووافتها المنية بالميدان تصبح شهيدة!!!!!
ياسكسكة ممكن تقولي ..يارب أموت في ميدان التحرير..يارب أموت أنا نوارة بنت صافي ناز..ممكن كده وممكن تدعو الله عز وجل لتحقبق ذلك وأحنا كمان هندعو معاكي لتحقيق أملك...مع أني أشك في ذلك

شمس العصارى said...

الجمعة ناجحة باذن الله
بس موضوع الاعتصام لازم تنسيق اكبر مش نسيبها "للميدان يقرر" ويجيوا يستفردوا باللى حيقعدوا
ولو فى ترتيب يبقى من اول الصبح بدرى يكون فى اجماع وراى واحد مش الساعة 6 نلاقى كله خلع
مع بعض فى اليوم ونبقى مع بعض فى الاعتصام او مع بعض فى المشيان
كلنا فى الشئ نفسه

hardway said...

الجمعة مغلقة للتحسينات.............

negmat lail said...

بس يا ريت ما ترميش نفسك على الشهادة كده .. العيشة اصعب انا عارفة بس لو كل اللي زيك راح واستشهد حيفضل مين فيه دور برضه للناس الصاحية اللي مش مستشهدة

Yasser Adam said...

ربنا معاكم والله الموفق و كل المساندة بعقولنا و قلوبنا ومساندتنا لكم بوقفتنا و هتافاتنا أمام السفارة المصرية فى لندن وهذة المساندة التى لم تتوقف و لو ليوم واحد منذ 25 يناير بوقفتنا يوميا أمام السفارة لمدة ثلاثة ساعات أمام الرمز الذى يثبت عدم سقوط النظام حتى الآن و بالرغم من المضايقات التى تحدث لنا من داخل السفارة ويمكن معرفة التفاصيل من
www.misrspring.com

حسن محمد على said...

متهائلى عرفتوا ان "اسامة هيكل "هو استنساخ مشوة ل "عبد اللة كمال" الاتنين عرضحالجية غير شرفاء

أبوالبراء المصري said...

للعبرة والعظة والتذكرة
الإعلان الدستورى والمبادئ الحاكمة للدستور الجديد في مصر ‏

اعدام للرئيس بتهمة اداء فريضة الحج!!

هذا ما فعله الجيش التركي الحامي للدستور 1960عندما قام الرئيس المنتخب ديمقراطيا باغلبية ساحقة عدنان مندريس باعادة الأذان باللغة العربية ثم قام بأداء فريضة الحج سرا بعد زيارة لمنطقة الخليج ..فحكمت محكمة عسكرية تركية باعدام الرئيس مندريس
1960 بتهمة السعي لإنشاء دولة دينية!!