إذا قتلتم فأحسنوا القتلة

أنا عايزة افهم، هي الخنازير دي مش حيوانات؟ هي الحيوانات دي مين اللي خلقها؟ مش ربنا؟ هو مش ربنا قال على الحيوانات أمم أمثالكم؟ هو مش الرسول قال على ذبح الحيوان او قتله "إذا قتلتم فأحسنوا القتلة"؟ هو مش تعذيب الحيوانات حرام؟ هو مش فيه واحدة دخلت النار في قطة وعاهرة دخلت الجنة في كلب؟

هو مش الريس قال الخنازير تندبح؟

ليه الخنازير تتاخد في فان كبيرة وتترمي في حفرة ويتردم عليها بالجير الحي (اللايم - مادة كاوية) احياء؟

حرام ده وللا حلال؟ احنا مش خايفين من ربنا؟ اذا واحدة دخلت النار عشان عذبت قطة واحدة، امال جيش الخنازير اللي بيتعذب بالخنق والمادة الكاوية ده ربنا ح يعمل فينا ايه انتقاما له؟ كون ان ربنا محرم اكله ده مش معناه اننا نعذبه

ده الرسول قال لا تمثلوا ولو بجثة الكلب العقور حرام عليكوا

احنا مش خايفين من ربنا؟ مش خايفين من ربنا؟ يعني احنا بنعذب الحيوانات دي عشان خايفين من انفلونزا الخنازير، مش خايفين ربنا يعمل فينا زي قوم فرعون ويجيب لنا مصيبة من حيث لا نرجو ولا نحتسب واحنا بنعذب مخلوقاته بالطريقة دي؟

انا مش باتناقش في قتل الخنازير، انا باتناقش في طريقة قتلها، ده، على رأي ام زينب، حيوان اخرس ما يقدرش يدافع عن نفسه، الزبالين يقدروا يعتصموا يتخانقوا، لكن مين يدافع عن الحيوانات؟ ربنا حط الحيوانات الضعيفة دي امانة في رقبتنا وح يحاسبنا عليها

انا باعيط، مش معقولة ابدا ما نعرفش ربنا خالص كده؟ احنا فاكرين نفسنا مين عشان نعمل في مخلوقات الله كده ومش خايفين من حسابه؟