Thursday, 13 March 2008

ماهو يا عمرو خالد غلط يا سيدنا محمد غلط

اظن كلكوا عارفين ان السنة دي فوربز قالت ان الدعاة اعلى دخول واعلاهم عمرو خالد اللي بلغ دخله السنوي اتنين ونص مليون، دولار طبعا مش جنيه يا معفن انت وهو وهي، وبعديه طارق السويدان، وتالتهم عائض القرني مؤلف لا تحزن، طبعا وانت ح تحزن ليه يا خويا؟
اولا ماشاء الله لا قوة الا بالله، وبالهنا والشفا، واللهم لا حسد، وكل حاجة يعني عشان ماحدش يفتكرني حاقدة ولا حاجة
طب والله العظيم ما حاقدة ما لعيبة الكورة بيقبضوا اكتر من كده بس فيه كام سؤال كده بيطرح نفسه يتلخص في اغنية زياد الرحبان:
بيقولوا لك من عرق جبينه
طلع مصاري ها الانسان
طيب كيف هيدا وكيف ملايينه
وما مرة شايفينه عرقان
احنا من واحنا حلوين قد كده واحنا نعرف ان طريق ربنا، بصراحة كده، بيخسر فلوس وصحة ويمكن يخسر الواحد حياته كمان هلبت بقى ما الدعوة الى الله اللي عيشت سيدنا محمد لآخر لحظة في حياته رابط بطنه من الجوع بقت تكسب ملايين دلوقت، وملايين خضرا
طب افهمها بقى تيجي ازاي دي
عمرو خالد بيقول انا اهلي اغنيا وعيلتي ناس محترمة
طارق السويدان بيقول انا باضارب في البورصة وباشتغل واكسب
والباقي قالوا ده رزق
مما يدل على:
اولا: ان سيدنا محمد من عيلة مش محترمة
ثانيا: ان سيدنا محمد كان عواطلي
ثالثا: ان سيدنا محمد صلى الله عليه وسلم ربنا كان غضبان عليه قوي ومش بيرزقه ابدا
او:
اولا: ان عمرو خالد عيلته مش غنية ولا حاجة
ثانيا: البورصة والشغل ما يجيبوش كل الفلوس دي، ما كانتش العين بكت
ثالثا: ان رزق بالمعقول يا سيدي
الرزق على قد التعب
هاذوها نقطة
النقطة التانية
عندنا في الاسلام الرزق بييجي من حاجتين: الانتاج والتجارة
والاتنين عليهم بعض المحاظير بحيث ما ينفعش الواحد ينتج قنبلة ويقول ده رزقي ولا يتاجر في الدعارة ويقول ده رزقي
يعني انتاج او تجارة حلال
والانتاج يا مزروع يا مصنوع
والمصنوع يا بدني يا ذهني
واكيد اكيد الدعوة الى الله مالهاش دعوة بالزراعة
تبقى صناعة؟
صناعة؟ متهيالي صانع الدين هو اللي نزله مش كده؟ ح نقول انتاج فكري؟
طيب منين؟ اذا كان كل شوية يقولوا احنا مش بنفتي احنا بندعوا الى الله، فيه فرق ما بين تعليم العلم وانتاج الاجتهاد الفكري وبين الدعوة دي شغلانة ودي شغلانة
انا مش عايزة اضيق خلق الناس واقول لهم حقيقة تاريخية ان العلماء في الدولة الاسلامية كان محرم عليهم ياخدوا فلوس من التلاميذ وانهم كانوا بياخدوا جراية من بيت المال او بيقبلوا صدقات عشان ما ياكلوش بعلمهم وفي نفس الوقت يتفرغوا له وفيه علماء كانوا بيتكسفوا ياخدوا من بيت المال صدقات فكانوا بيشتغلوا شغلانة تانية
بس اديني قلت مع اني ما كنتش عايزة اقول والله بس انتوا اللي ضغطوا عليا
طب ما تضغطوش عليا اكتر من كده عشان اقول لكوا ان الدعاة الجدد ولا حتى بينتجوا انتاج فكري يعتد بيه عشان ياخدوا كل الفلوس دي ومافيش بيت مال المسلمين عشان يصرف عليهم
يبقى منين؟ منين؟
يبقى بياخدوا صدقات بقى...صدقات بالملايين وبالدولار...العبي يا مدرسة الالعاب
طب كده بند الانتاج اتقفل
مافيش غير بند التجارة...ييجي واحد رخم يقول لي ما هي دي التجارة مع الله
هئ هئ هئ هئ
فيه فرق ما بين التجارة مع الله - اللي بالمناسبة مش بتجيب ملايين خالص...عمرها ما جابت ملايين ولا عمرها ح تجيب ملايين - وبين التجارة باسم الله
كل واحد فيهم يطلع يقول: انا لا اتقاضى اجرا على محاضراتي
عذر اقبح من ذنب..ياريته كان بياخد فلوس على المحاضرات كنا عرفنا الفلوس دي كلها جات منين؟ منين؟ منييييييييييييييييييييين؟
من امتى الدين بيجيب فلوس؟ امال الشيخ كشك مات فقران ليه؟ امال عطية صقر فضل يركب الاتوبيس الاحمر ده لحد ما مات ليه؟ امال الشيخ شلتوت كان فقران هو راخر ليه؟ ده فيه عالم جليل، ناسية اسمه، كان في الستينات مات لان ديل جلابيته شبك في عجلة الترماي وهو نازل منه
امال الانبيا كانوا رعاة غنم ليه؟ امال سيدنا محمد كان بيقعد بالتلات ايام ما يدوقش غير المية ليه؟ امال كان بيتلوى على الحصيرة من الجوع ليه؟ امال كان بيربط بطنه ليه؟
بس الحمد لله، ربنا نصرنا واخيرا الدين بقى بيكسب، آآآآآآآآه عشان كده توني بلير اشتغل مدرس دين
طب ما تيجوا نشتغل في الدين ونبيع ونكسب وتلعلع معانا ونلعب بالفلوس لعب
ادعولي بس وانا انغنغكوا

1 comment:

nour said...

لايجوزان نتكلم علي رسول الله بهذه الطريقه
ولايجوزان نتكلم في خصوصيات وان نتهم احد بشيء مثل ذلك ياريت تتعلموا من النصاري كيف يتكلمون عن قداسة فلان وابوهم علان وهو يلبس الذهب ولم يتهمه احد منهم بشيء بالرغم من تمويل الفاتيكان وبعض الدول الغربيه للكنيسه المصريه