خلفوا كتييييييييييييييييير

خلفوا كتييييييييييييييييييييييييييييييييييييييييييييييييييييييير
خلفوا كتيييييييييييييييييييييييييييييييييييييييييييييييييييييييييييييييير
خلفووووووووووووووووااااااااااااااااااااااااا كتييييييييييييييييييييييييييييييير
لو لسة عايزين البلد دي تبقى بتاعتنا
لو لسة عايزين يبقى لنا مكان في الارض لا حيلتنا نووي ولا فيتو ولا احنا بتوع بزنس
هاتوا عيال كتير دي وسيلتنا الوحيدة ان بلادنا ما تتباعش
واننا ما ننقرضش
الحكومة عايزة تخلص مننا عشان تعرف تبيع للمستثمرين
وما حدش يقول ح اكلهم منين العيال ما بتاكلش وبتعيش
ثم احنا شايلين بعض وكل واحد شايل البلد دي على ضهره وماشي بيها زي ما كلنا عيالنا ح تاكل والعيال ياكلوا نص بطن احسن ما يبقى مافيش مصر خالص ولا فيه وطن عربي من اساسه

عاجل للاعلام بخصوص الوفد الاوروبي لغزة

دلوقت المجموعة اللي كانت رايحة غزة واتمنعت راجعة القاهرة وقدامهم ان شاء الله ساعة على الوصول للقاهرة
اول ما ح يوصلوا ح يعملوا مؤتمر صحفي امام المفوضية الاوروبية في جامعة الدول
رجاء من كل الاعلاميين الحضور

اوشي وري من الناموس فين

تحديث:
دلوقت التسعة رجعوا وادوهم جوازات سفرهم وراجعين كلهم على القاهرة
-----
المفروض كنت اعمل تحديث بس ده عايز له بوست لوحده
الحركة العالمية لدعم غزة اللي طلعت البيان ده
واللي رافضة اي تعاون مع اسرائيليين سواء بقى من بتوع السلام الآن وبيقولوا ان اي تعاون ممن يسمون انفسهم بالاسرائيليين المتعاطفين مع القضية الفلسطينية يبقى حلهم انهم يبطلوا يبقوا اسرائيليين
تسعة منهم قرروا يمشوا على رجليهم المية وخمسين كيلو عشان يروحوا غزة..على رجليهم...على رجليهم...على رجليهم
يا كسوفي يا كسوفي يا كسوفي اخص عليا وعلى وشي وعلى تربيتي
اربع ستات وخمس رجال والجنسيات: ايطاليا، اليونان، اسبانيا، بلجيكا، امريكا، الهند.
وفيه ناس فضلوا في الاستراحة، يعمل ايه الامن بتاعنا عشان يرجع التسعة
البوليس اخد المفتاح بتاع الاتوبيس من السواق واتصلوا باللماشيين على رجليهم وقالوا لهم انهم محتجزين زمايلهم اللي في الاستراحة ومش ح يسيبوهم الا اذا اللي ماشيين رجعوا
ايه ده؟ اوشي وري من الناس فين؟ فيه امن في الدنيا يتصرف كده؟ فيه امن ياخد رهائن؟ ايه دور الباتشينو في فيلم الاب الروحي اللي الامن بتاعنا عايش فيه ده؟
التسعة رجعوا والبوليس اخد جوازات سفرهم بص فيها ورجعها لهم وهم غالبا ح يرجعوا
يادي الكسفة، يادي الكسفة
بصراحة انا مكسوفة من نفسي قوي، انا لو مكانهم مش ح ييجي في بالي ابدا اخد مية وخمسين كيلو مشي
ومتهياليش ان فيكي يا مصر راجل فحل شنباته يقف عليها طابور صقور ممكن يفكر يعمل كده ابدا
مش عارفة هم ح يعملوا ايه دلوقت
جتنا نيلة في حظنا الهباب

ايقاف الحركة العالمية لدعم غزة

تحديث:
مجموعة الحركة الأوروبية لدعم غزة سابوا الاتوبيس ومشيو على رجليهم خمسة كيلو وعربيات الامن ماشية معاهم وبتقول لهم لو مشيتوا لحد القمر ح نفضل ماشيين وراكوا، هم ممثلين الحركة عددهم عشرة وعايزين يمشوا المية وخمسين كيلوا على رجليهم!!!!! يا خيبتك في ولادك يا مصر
المهم ندى القصاص اتصلت بيهم واقترحت عليهم انهم يقعدوا في اي حتة ويشوفوا حل عملي لان مية وخمسين كيلو مشي في الصحرا ممكن يعرضهم للخطر من العرب او من الامن نفسه، ممكن الامن مثلا يقول عليهم انهم بيشربوا خمرة وعشان كده ضربنا عليهم نار، زي ما ضربوا نار على السودانيين عشان بيشربوا خمرة، طبعا انتوا عارفين الامن بتاعنا الاخلاق عنده قبل اي حاجة، ممكن يلاقوها واسعة قوي ان ناس ماشية في الصحرا ورايحة تدعم غزة وتاخد معاها خمرة ما حدش ح يصدقهم، فممكن يخترعوا حاجة تانية، ممكن اللحم الابيض المتوسط يعجبهم وربنا يستر ويلبسوها في البدو، المهم يعني هم مش ح يغلبوا يخترعوا لهم اي اختراعات خصوصا ان عددهم عشرة بس
عشان كده ندى اقترحت انهم لازم يفكروا في حل تاني
مش عارفين بقى ح يعملوا ايه، عموما ندى معاهم على التليفون
===
الامن اعترض الحركة الاوروبية لدعم غزة كانوا رايحين رفح واعترضهم الامن في بالوظة فنزلوا وقفلوا الطريق راح الامن فاتح الطريق التاني رايح جاي وفيه اصرار غريب على انهم ما يعدوش ابدا عشان كده هم بيفكروا يرجعوا ويعملوا وقفة احتجاجية قدام الاتحاد الاوروبي
المجموعة دي بتشارك في عدة فاعليات منها فاعليات مناهضة الفصل العنصري، وهم ضد اي تعاون مع اسرائيليين خالص عشان كده بيعملوا فاعلياتهم في نابلس لان نابلس بتحظر مشاركة اسرائيليين في فاعلياتها، يمكن عشان الكده الامن معصلج معاهم قوي لان موقفهم من اسرائيل مافيهوش اي علوقية لامؤاخذة، يعني المساعدة الوحيدة اللي يقدر يقدمها الاسرائيلي المتعاطف مع الفلسطينيين هو انه يسيب البلد ويهاجر والعلوق يمتنعون لانهم على راي المثل لو كان بينفع كان نفع نفسه

احمد نظيف يتفرقد الشارع المصري

قابله مواطن فنظيف قال له نفسك في ايه؟ فقال له فيلا
نظيف: يا سلام على طمع المصريين..طب اطلب طلب ابسط من كده شوية
المواطن: هات باتنين جنيه عيش
نظيف: تحب الفيلا تبقى كام دور؟

الرابطة العالمية لدعم غزة

فعالية دولية للتضامن مع غزة

من 31 اذار / مارس - 1 نيسان / ابريل

اوقفوا حصار غزة

اوقفوا التواطؤ العالمى مع الاحتلال الاسرائيلى
والجرائم ضد الشعب الفلسطيني

قررت مجموعة من المشاركين الدوليين اتخاذ اجراءات ضد بلدانها وتواطؤها الغير انساني المدمر فى حصار قطاع غزة

وقد قرر الوفد الذى يضم مشاركين من الباسك ، النمسا ، اسكتلندا ، النرويج ، ايطاليا ، هولندا فرنسا ، اسبانيا ، اليونان ، تركيا ، فلسطين ، الاردن والهند الوصول الى الجانب المصري

من الحدود مع غزة لايصال حموله شاحنة من الغذاء والدواء وللاحتجاج على الحصار الغيرانساني المفروض على شعب غزة بالتواطؤ مع حكوماتنا

نحن نحتج على الاباده الجماعية للشعب الفلسطينى وندين رياء الحكومات الاوروبية وغيرها من الحكومات التي تنتهك الاراده الديمقراطيه للشعب الفلسطيني بشكل صارخ واتخاذها مواقف لمصلحة اسرائيل واجندة الولايات المتحدة من اجل الاحتلال والهيمنة

كما ندين بشدة الاتحاد الاوروبي لتخلية عن مسؤولياتة المنصوص عليها في الاتفاقات السابقة للتسهيل والاشراف على مرور الناس من خلال معبر رفح الحدودى.
وبناء على ذلك فإن الحكومات الاوروبية تتواطأ و بشكل مباشر في الحصار الذى تفرضه اسرائيل على الفلسطينيين في غزة ، وعلى حبسهم فى سجن مفتوح ، وحرمانهم من تلقى السلع والخدمات الاساسية مما ادى الى معاناة هائله و كارثه انسانية.
احتجاجنا يجب ايضا ان ينظر اليه في ضوء الذكرى الستين لنكبة 1948 - تلك النكبه والطرد الجماعي والقسري للشعب الفلسطيني نتيجة للعدوان الصهيوني الذي مهد الطريق لانشاء دولة اسرائيل - بالاضافة الى استمرار النكبه والاحتلال الاسرائيلي والذى اتسم بسياسات التوسع ونزع الملكيه وسفك الدماء.

واننا نؤكد على الحاجة الملحه لتنفيذ وتوسيع الحملة العالمية للمقاطعة وفرض العقوبات وفضح الاحتلال الاسرائيلي وسياسة الفصل العنصري وسياسة الاحتلال والقمع.
تضامنا مع شعب فلسطين
ندعو الجميع الى المشاركة و الانضمام الى الوفد المسافر الى رفح

* الانطلاق من القاهرة : صباح يوم الاثنين 31/03 فى الساعة 7:00 صباحا من أمام نقابه المحامين المصريين

* العودة إلى القاهرة : ليلة الاثنين 31/03

* لاى معلومات باللغتين العربية والانكليزيه :

0020163789594
و للمعلومات بالفرنسية

20 1 63 98 23 2
"الحملة الاوروبيه ضد الحصار"

INTERNATIONAL ACTION in SOLIDARITY with GAZA

31 March - 1 April

End the siege of Gaza!

End the world complicity to the Israeli occupation
and crimes against the Palestinian people!

A group of international participants decided to act against our countries' complicity to the inhumane and devastating siege of the Gaza Strip.

A delegation including participants from the Basque country, Austria, Scotland, Norway, Italy, Netherlands, France, Spain, Greece, Turkey, Palestine, Jordan and India intend to reach the Egyptian side of the border with Gaza in order to deliver a truckload of food and medicine and in protest against the inhuman siege imposed on the people of Gaza, with the complicity of our own governments.

We protest against the genocide of the Palestinian people and condemn the hypocrisy of European and other governments who blatantly violate the democratic will of the Palestinian people and have taken positions in the interest of the Israeli and US agenda of occupation and domination.

We strongly condemn the European Union for backtracking on their responsibility, as stipulated in past agreements, to facilitate and oversee the flow of people through the Rafah border crossing.
The European governments are therefore directly complicit in the Israeli-imposed siege of the Palestinian population of Gaza, their confinement to an open air prison and denial of access to the most basic goods and services, resulting in massive suffering and a humanitarian disaster.

Our protest must also be seen in the light of the 60th anniversary of the 1948 Nakba -the massive expulsion and forced flight of the Palestinian people as a result of the Zionist aggression which paved the way for the creation of the state of Israel- as well as the on-going Nakba and Israeli occupation, marked by expansion policies, expropriation and bloodshed.

We emphasize the urgent need to enforce and broaden the global campaign for Boycott, Divestment and Sanctions (BDS) against the Israeli Apartheid State and its policies of occupation and oppression.

Solidarity with the people of Palestine!!!
We call on everyone wishing to participate to join the delegation to Rafah!!!


* Departure from Cairo: Monday morning 31/03 at 5:00am from the Egyptian Bar Association
Address

* Return to Cairo: Monday night 31/03

* Information english and arabic : +20 - 1 - 63 78 95 94

information french 20 1 63 98 23 22

"European Campaign Against the Siege"

عمر طاهر

بما اني واحدة نتاوية درجة اولى فانا مشتركة في الريدر في كل المدونات اللي سيادتك سمعت عنها واللي ما سمعتش عنها ونظري ح يطير من كتر ما باقعد اقرا كل التدوينات والوكالات وخلافه
ماشية في الريدر زي اي فتاة مؤدبة لا بتبص يمين ولا شمال واي حد يكلمها ما تردش عليه والاقي مدونة اسمها احلام مبعثرة كاتبة عن عمر طاهر الشاعر والصحفي، والحقيقة هي كاتبة عنه كلام ما فهمتوش خالص، بتقول انه مغرور وذاته منفوخة وانه مدون وقلب شاعر
!!!!!!
يعني هالله هالله ع الجد والجد هالله هالله عليه
عمر شاعر وكاتب نقطة ومن اول السطر، عمر كان صاحبي قوي من عشر سنين وبقالنا سنين ما شفناش بعض ولا اتكلمنا نقطة ومن اول السطر
كنت ناوية ادخل اعلق عند الاستاذة بس لقيتها قافلة التعليقات
انا كل بس اللي كنت عايزة اقوله، على المستوى الشخصي، اللي يعرف عمر عن قرب يا اما يتفهم انه شخصية خزعلبلية يا اما يبقى عايز يرميه من الشباك ثم ينزل وراه ويخنقه ثم يحطه تحت عجلات القطر
لكن عمر فنان فنان، وشاعر كبير قوي على فكرة، وكاتب فعلا مبدع وكتابته قوية وفي نفس الوقت طِعمة وتتاكل اكل ومختلف تماما عن اي حد، فلما ييجي حد يقييم عمر على المستوى الفني عليه انه ينسى عمر على المستوى الشخصي باكتئاباته ورخاماته ودقاته النص كم يا اما متغاظ من رخامته ما يتكلمش عليه على المستوى الفني خالص
ثم ان رخامته واكتئاباته هي اللي بتعمل فنه، وهو ذاته متضخمة آه، بس له حق، ماهو فنان فعلا ودي هبة من عند ربنا مش هو اللي عملها يبقى ما ياخدش شلوت في نفسه ليه؟
دول الكلمتين اللي كنت ح اقولهم، بس بما ان احلام مبعثرة ما رضيتش اقولها الكلمتين دولم على مدونتها فكنت زمان كتبت بوست عن عمر طاهر بعد ما قريت شكلها باظت وعجبني قوي وكنت فرحانة بالكتاب، حتى ح تلاقوا حماس شديد في البوست، بس ما نشرتوش مش فاكرة ليه؟ تقريبا برضه كان عمل معايا دقة ندالة وللا حاجة مش فاكرة والله
بس المقال اهو انا سايباه زي ماهو وكنت كتبته من سنة:

أول مرة آخد بالي إني أنا وعمر صحاب بقالنا تسع سنين، يااااااااااا، كتير قوي، ماشاء الله يعني، وبلاد تشيلنا وبلاد تحطنا، ونغيب نغيب ونرجع نتكلم تاني كأننا كنا مع بعض امبارح، دايما الكلام بينا بيبتدي كأنه تكمله لحوار توقف لمدة دقيقتين بس، مع إنه ممكن يكون متوقف بقاله ست سبع شهور.

عمر ما ينفعش تقول عليه الكلمة اللي بتتقال على الناس: "فلان من الشخصيات اللي..."، لأن عمر مش من الشخصيات، هو عمر من عمر، كده عامل زي حاجة معينة مش عارفة هي إيه، بتشتغل بسهولة، وبيطلع منها مفاجئات كتير، وكل مرة حاجة تانية خالص غير اللي قبلها، بس عموما أظرف فترات حياته وهو مكتئب. هو مكتئب طول السنة، بتيجي كده نص ساعة كل شهر ما بيبقاش مكتئب، وبيبقى في النص الساعة دي سخييييييييييييييف، ساكت، وممكن يكبسك من غير سبب، ومن غير ما يقصد، بس الحمد لله إنها نص ساعة كل شهر، هو برضه في النص ساعة اللي هو مش مكتئب فيها مش بيكلمني، عشان عارف إني بازعل واتقمص بسهولة، بس هو اكتئابه غريب، يعني مثلا مرة قال لي: يا شيخة ده انا قريت عن الاكتئاب لقيته حاجة تانية خالص، اتخضيت أنا مش بيحصلي كده. طبعا ما رضيتش ساعتها أحرجه وأقول له إنه لو راح لدكتور ح يحتار في أمره، وفي الآخر ح يحطه في صندوق إزاز ويلم الدكاترة ويتفرجوا عليه عشان هو حالة نادرة؛ يعني مثلا أكتر وقت بيبقى فيه عنده أمل، وهو قرفان جدا من الدنيا، أكتر وقت ممكن تضحك فيه من كلام عمر وهو مكتئب وعايز يولع في الكون، أكتر وقت ممكن يديلك دعم معنوي وهو معنوياته في الحضيض.

وانت بتسمعه كأنك بتقرا كتاب فكاهي فلسفي تاريخي نفسي اجتماعي عبثي هزلي حزين، وإنت بتقرا له كأنك سامعه لدرجة إنك تقدر تسمع نبرة صوته في كل جملة بيقولها، هو أصله صوته ملون. ينفع تقول عليه دمه خفيف مووووووووت، بس ما ينفعش تقول إزاي، كمان ما ينفعش نوادره تتناقلها الأفواه، لأنها بتبقى معقدة ومركبة ومليانة خيال، وكل ما كان خيالك أوسع كل ما ضحكت أكتر. فيه ناس بتكره عمر، والناس دول يا إما غلاويين بطبيعتهم ومتغاظين من عمر عشان شكله مغرور، هو الحقيقة معتد بنفسه قوي، بس زي اعتداد العيال اللي عندهم تلات سنين: "سوفتي جمالتي؟! أنا حو، أنا ساطر..."، كمان طبيعة االناس انها بتحب تصنف، وعمر الحقيقة مش صعب تصنفه، هو مالوش تصنيف أساسا، هو كده، يعني متدين قوي، وماجن قوي، مؤدب زي بنت خجولة، وبصباص زي رشدي أباظة في فيلم الزوجة 13، مرن في حاجات ما ينفعش تتعدى، ويحرن في حاجات مالهاش أي أهمية، ساعات يبقى قاسي ويتهيالك إن شوية وح يبقى صدام حسين، وفي نفس اللحظة تلاقيه بقى حنين وغلبان، يتفاجئ من حاجات بديهية، ويحل المسائل الإنسانية الصعبة، ليه؟ الله أعلم، بس هو بيقول إنه ضحية زواج القرايب.

الغريبة إنه بيحب الناس قوي وعنده إحساس إنه لازم يعطف عليهم، بس متغاظ منهم، جدا، وعنده إحساس إنهم لازم يتقرصوا، يتقرصوا بس، أو يتشكوا بدبوس، هو أصله مش عنيف ولا دموي. لما بيكتب حاجة حلوة قوي، يبقى عايز يجري على الناس ويوريها لهم، مش عشان يتفاخر بيها، بس عشان هو حاسس إن ده إنجاز للبشرية، هو كده يعني منتمي للبشرية ومنعزل عنها برضه، يعني منتمي ليها عاطفيا، بس بيحب يقعد لوحده خالص، وكل ما يقعد لوحده أكتر كل ما يحس إنه جزء من البشر أكتر، وإحساسه ناحية شغله، زي إحساسه ناحية شغل الناس التانية، يعني لما أنت تكتب حاجة حلوة يتعامل معاها على أساس إنه هو اللي كاتبها، لدرجة إنه ممكن يكون منتظر الناس، بما فيهم اللي كتبها، تشكره، عشان: الله؟ مش كلنا بيني آدمين؟ احنا لما نعمل حاجة لازم كلنا نبقى فرحانين بيها، وللا إيه؟

كل حاجة عند عمر تضحك، هو ساخر صحيح، بس سخريته مافيهاش قسوة، فيها...فيها...فيها أبوة، كل ما يتريق على حد أو حاجة، تحس إنه أب بيحكي نوادر ابنه، بالذات لما يتكلم عن البلد والناس بشكل عام. فيه ناس لما اقعد معاهم أبقى خايفة، عشان أنا عارفة إنهم بيتريقوا على كل حاجة، وعارفة إن كل كلمة أو حركة ح اعملها ح يمسخروها، بس رغم إني عارفة إن كل حاجة عند عمر تضحك، بابقى مش خايفة، عشان عارفة إنه ح يمسخر كل حاجة بحنان وهدهدة، كأنه بيلاعب عيل صغير. آه صحيح ده هو بيحب العيال الصغيرة قوي، يمكن عشان كده.

فيه حاجة كده غريبة شوية، بيحب نفسه من خلال الناس...بيحب الناس من خلال نفسه...بيتفائل باكتئاب..بيكتئب بتفاؤل...بيصيع بأدب...بيتأدب بصياعة...بيتنرفز بفكاهة...بيتفكه بنرفزة...بيتكسف ببجاحة...بيتبجح بكسوف...بيكدب بصدق....بيصدق بكدب مش عارفة مين قبل مين. بس دايما كل انفعال أو فكرة عند عمر بيضفر فيها عكسها بطريقة مدهشة ومفاجئة، والواحد ما يبقاش عارف يقول: عمر بيقول....يعني ممكن تقول زكريا بيقول، لكن مش ممكن تقول عمر بيقول، لما تحب تنقل عنه حاجة تقول: أنظر عمر ويا إما تشير إلى كتاب شكلها باظت، يا إما تكتب نمرة تليفونه.

مرة واحدة قالت لي: عمر نصاب، هي الحقيقة ما قالتش عمر نصاب، هي قالت برج الأسد نصاب وبصت لعمر. ما هي لها حق تتلخبط، ماهو كل حاجة عنده داخلة على بعضها، أصل هو كمان بيكره الميلودرامية، يعني كأنه اتنين: يكتئب يطلع له واحد من جواه يقول له يا عمي ما تكبرهاش قوي كده إنت ح تعمل لي فيها علوية جميل؟ يفرح يطلع له نفس الواحد من جواه يقول له فرحان على ايه جتك خيبة؟ يحب واحدة يطلع له ذات نفس الواحد يقول له: إنت متأكد إن دي هي اللي انت عايزها؟ يسيبها، يطلع له تاني ويقول له: منك لله يا أخي ضيعتها من إيدك..حرام عليك...يتخانق مع واحد يقطع معاه خالص، ولا كأنه موجود في الدنيا، وينساه، ينساه لدرجة إنه لو جه يسلم عليه ح يسلم وهو ناسي مين ده أساسا، ويتصاحب على حد يفضل يتكلم ويفضفض، ويسمعه ويضحكه.

فيه حاجات أساسية مخلياني متمسكة بصداقة عمر، أولها إنه ما يعرفش يعني إيه يلوم، ولا يلف ويدور، وكل ما يحاول يتناصح ويخبي يتفضح أكتر، ويقفش نفسه وهو مفضوح قبل أي حد، ويتريق على روحه والحكاية تقلب فكاهة، وتخلص. ميزة عمر إن كله بيعدي، الزعل بيعدي، والكآبة بتعدي، والرخامة بتعدي، سواء منك أو منه، وزي ما هو مش بيعرف يلومك على أي دقة ندالة، انت كمان مهما حاولت تلومه وتحضر له كلام تغسله بيه، أول ما يكلمك تلاقي نفسك بتضحك ومش عارف تنطق بكلمة.

طفل عجوز...أو عجوز مستعيل...أهم صحاب وبيتحدفوا علينا.
=======
خلص البوست اللي كنت كاتباه من زمان
ايه اللي خلاني انشره وايه يعني اتحمقت كده ليه:
لاني مش باحب الظلم
عايزة تقول على عمر رخم تقول من هنا للصبح لكن تقول مش فنان ومش كاتب مقتدر يبقى احنا بنهرج
وانا ما احبش التهريج في فن الكتابة بالذات

يوم ستة ابريل انا مش متعتعة من بيتي

الاضراب ينجح الاضراب يفشل الاضراب يطلع ينزل انا يوم ستة ابريل مش متعتعة من بيتي مش عشان كفاية دعت ولا غير كفاية انا ولله الحمد والمنة على رأي ابن كثير اشرف باني مش عضوة في اي حاجة خالص غير في جمعية اسمها جمعية خريجات الجامعة، اتسست زمان قوي ايام ما كانت ست تتخرج من الجامعة دي يعني جابت الديب من ديله، ووالله فجأتن سذاجة لقيت نفسي عضوة فيها مش عارفة ليه
لكن:
لما توصل حوادث الموت لاكتر من خمستاشر حادثة - اللي انا اعرفهم على الاقل - في طوابير العيش وانا مافيش في ايدي حاجة اعملها يبقى على الاقل الزم بيتي زي ما سيدنا محمد قال
على العموم انا مضربة يوم ستة ابريل بصرف النظر عن مصداقية اي حد ما يهمنيش في حاجة اصلا او انضمام اي حد معايا انشالله اكون انا لوحدي اللي مضربة عشان على الاقل لما ربنا يسألني عملتي ايه وانت عمالة تاكلي وتحشي الاقي حاجة اقولها حتى لو حاجة مش مقنعة قوي بس اسمي حاولت ومش ح اقعد اكسر في مقاديف الناس وايأس بقى والا اروح انتحر امال قاعدة في الدنيا اعمل ايه؟
ماعندناش حركة معارضة حقيقية تحوز على ثقة الناس
ما عندناش شخصية كاريزمية لها مصداقية
ما عندناش خلايا ولا تنظيمات واحسن والله قطعوا
ما عندناش ناس نازلة وسط البشرية اللي بتموت بعضها على رغيف
طب ما عندناش ده كله يبقى على الاقل يبقى عندنا دم، يبقى على الاقل عندنا الحد الادنى من الانسانية اللي يخلينا نزعل
نتقمص ونقعد في البيت
اللي يقدر يروح يغطي اضراب عمال المحلة يروح بس الطريق للمحلة ما اعتقدش ان ح يبقى سلس، عموما برضه نحاول
انا ح احاول اروح اغطي وان شاء الله مش ح اشتري ازازة مية في السكة، ح اخد المية من البيت، والشندوشتات كمان
والله عرفت اوصل للمحلة ح اوصل...ما عرفتش ح ارجع بيتنا واقعد فيه
ومش ح اكل...مش ح اكل طول اليوم ابدا ابسط حاجة بيني وبين نفسي احس اني جعت مع الجعانين
واللي ربنا عايزه ح يكون
المقال ده بعتهولي وائل عبد الفتاح

ايه حكاية مشكلة العنوسة دي بقى؟

والله انا مش شايفة اي مشكلة عنوسة في البلد، سيبكوا من نظريتي التآمرية، بس بجد ليه الالحاح في ان عندنا مشكلة عنوسة بينما الحقيقة ان الاحصاءات بتقول ان تسعة مليون غير متزوج وغير متزوجة (عانس يعني) من سن تمنتاشر لخمسة وتلاتين!!!نعم؟ هو اللي ما اتجوزتش وللا ما اتجوزش في سن تمنتاشر وللا عشرين وللا تمانية وعشرين ده يبقى اسمه عانس او عانسة؟
اولا التسعة مليون دول لو كلهم فوق الاربعين ولسة ما اتجوزوش يبقى برضه مافيش مشكلة عنوسة لاننا وفقا للتعداد ستة وسبعين مليون من غير اللي مالهمش شهادات ميلاد واللي ساكنين في مناطق بتوع التعداد يقرفوا يدخلوها طبعا وبلاش نحسب دول في احصائية ما يسمى بالعوانس لان دول مش داخلين في اي احصاءات وعايشين حياتهم هم بلد وبقية البلد بلد تانية. وبيتجوزوا ويخلفوا ويموتوا ولا حتى بيتعمل لهم شهادة وفاة
طيب خلينا في المحسوبين تسعة مليون على ستة وسبعين مليون يعني حداشر وتمانية من عشرة في المية..ده كتير؟ ده كتير في عالم الناس كلها ما بقتش تتجوز اصلا؟ والستات في اليابان بيربوا حيوانات عشان زهقانين من الرجالة؟ والرجالة في الخليج بيتجوزوا اي جنسية تانية غير الخليجية عشان طلباتها مش عارفة كام كيلو دهب؟ حداشر في المية ده كتير؟ هو فيه حد بيتجوز قدنا؟ ده احنا اي حد معدي من البلد ما بيخرجش منها الا وهو سايب عيل
المعروف ان الفقرا قوي والاغنيا قوي بيتجوزوا من غير اي مشاكل
الفقرا قوي: حصيرة واقلب
والاغنيا قوي: عش حياتك كأنك لا تموت ابدا....عش حياتك كأن يوم القيامة لن يأت، عش حياتك كأن مافيش ربنا اصلا
وبيتجوزوا ويصاحبوا من الجنس الاخر ومن نفس الجنس كمان يعني لما يحبوا يجددوا
ده حتى المقريزي قال علينا في خططه: هم منهمكون في الجماع
واحنا من اكتر الدول اللي بتستهلك الفياجرا لحد ما طلع اوشاعة على رجالتنا انهم مضروبين، طبعا ما يعرفش الحقيقة غير المصريين اللي عارفين ان الرجالة المصريين الوحيدين اللي يبقى طبيعي ويصمم ياخد فياجرا عشان عنده طموحات ما اتحققتش لحد النهاردة لاي انسان
يبقى فين المشكلة؟
التسعة مليون دول نصهم ما وصلش لسن الجواز العالمي ويمكن اكتر من نصهم خصوصا ان سن الجواز اتأخر في العالم كله، ثم اننا لحد مطلع القرن اللي فات كان سن الجواز المتعارف عليه اربعتاشر سنة، وخلاص بقى المفاهيم دي اتغيرت في المدن، يمكن لسة في الريف شوية زي ما هي بس والله حتى الريف ابتدى يغير رأيه، واللي عايز يتجوز بيتجوز باي طريقة، ومش صحيح ان البنات طلباتها كتير ولا حاجة، ولا صحيح ان الرجالة مش لاقيين يتجوزوا عشان عواطلية، بيبقى عواطلي ويتجوز واحدة تصرف عليه بمنتهى الروح الرياضية يعني مافيش اي مشاكل
ليه الاصرار على ان مصر فيها مشكلة عنوسة؟ ليه؟
عشان الطبقة المتوسطة قيمها متلخبطة وعاملة زي الهجين اللي نصه حمار ونصه التاني رجل فرخة؟ طب واحنا مالنا الطبقة المتوسطة دي وفقا لتقارير القلل المنتحرة ما تتجاوزش العشرة في المية، ومش مشكلتها العنوسة مشكلتها تلوث القيم والدماغ اللي متركبة شمال وانهم عين في الجنة وعين في النار وح يموتوا يعيشوا عيشة رجال الاعمال وعيني فيه واخي عليه وفي نفس الوقت بيتنططوا على الطبقة الفقيرة بانهم هم المتعلمين اللي عندهم دين واخلاق
وعشان كده انتشرت ما بينهم ظاهرة المزة المؤدبة وعشان كده طلبات رجالة الطبقة دي: رقاصة متدينة
مش رقاصة هي حاجة تانية بس الواحد مش عايز يقبح يوم الجمعة...اجازة
ومشكلة الجواز بالنسبة لهم مش مشكلة مادية ده عرض مش مرض هم عيانين في دماغهم
وهم اصلا مش مهمين اساسا لا ماسكين الاقتصاد زي الاغنيا ولا تعدادهم كبير زي الفقرا يبقى ماسكين ودانا وبيتكلموا ليه لما اكلوها ويشغلونا بمشاكلهم اللي هي مش مشاكل اصلا؟ ما يحلوا عننا

آدي جزات الأمهات اللي ما بتسمعش كلام عيالها

أمي من شوية كده قالت لي مجدي الجلاد كلمني عشان أكتب في المصري اليوم، قلت لها اوعي تعملي كده ده احنا احنا شاتمنهم ع السبحة، قالت لي احنا مين، قلت لها المدونين يعني اتعصبت عليا وقالت: الله انت ح تتحكمي فيا انت والعيال دول بتوعك انا حرة اعمل اللي انا عايزاه، هو انا باسألك بتكتبي ايه في المدونة؟ وللا اعرف عنك حاجة اصلا؟
قلت خلاص اسيبها تخوض تجربتها بنفسها، وانا مؤمنة باني ادي الامهات والابهات الحرية الكاملة عشان يتعلموا من الدنيا تحت عيني، احسن ما يروحوا يعملوا حاجة من ورايا وارجع اقول ياريت اللي جرا ما كان
قعدت امي شوية تكتب في المصري اليوم وكله تمام لحد ما اخر مرة نشرت رد على المسلماني، المقال كان طويل شوية، راحت ماما متصلة بالسكرتيرة وقالت لها: لو المقال طويل انا مستعدة اختصر، فالسكرتيرة قالت لها طيب استني اسأل مدير التحرير، سألت مدير التحرير قال لها لا نازلة زي ماهي مش ح نختصر، امي بطبعها موسوسة شوية، غيري خالص يعني، تبعت المقال قبل المعاد باسبوع، وتفضل تتابع كل يوم لحد ما كل اللي في الجرنال يستقيلوا او تشوف بنفسها المقال منشور زي ما هي تابعت، كل يوم تتصل بالسكريترة: ها يا نورهان؟ متأكدين انكوا مش عايزيني اختصر؟
- طيب اسأل تاني يا استاذة....لا مافيش حاجة...اكيد مافيش اختصار ح تنزل زي ماهي يا استاذة
- اكيد؟
- اكيد
ثم نزل المقال وإذ بالست توفوجأ ان المقال طاير منه 25 سطر قطم، وبطريقة متشخبطة خالص بحيث ان اللي يقرا المقال يقول: هي مالها؟ هي بتقول ايه اصلا؟
طبعا ماما لمت هدومها ومشيت، وانا مارضيتش بقى اانبها واقول لها ما احنا قلنا كده من زمان، مافيش داعي للتقطيم المهم بنتنا ورجعت لنا
امي بقى دمها محروق من ان المقال نزل متشخبط كده، لقتها بتتصل بيا على تليفون الاودة من تليفون اودتها اللي بينها وبين اودتي متر وبتقول لي: هو انت ممكن تنشري المقال عندك؟
مع ملحوظة انها بتقول لي انها سامعة عني من بعض ناس اني قليلة الادب وبتنأرزني كل شوية وتقول لي انا مش عايزة اعرف حاجة بس الناس بتقول لسانك طويل، لميه شوية، هممممم دلوقت بقى مش سامعة اي حاجة من دي، ياللا الواحد يعمل الخير ويرميه البحر
بس بعد كده انا ح اخد من امي وابويا فلوس على البرشطة على الجبهة بالطريقة دي
تحذير: المقال طويل

تاكسي الكلام

تنصل ولكن: لا تلمني!

بقلم: صافي ناز كاظم

بالإشارة إلى ما تفضل به الأستاذ أحمد المسلماني، في المصري اليوم 17/3/2008، من تعقيب على مقالي: "نظرية المسلماني في مشروعية الحسم بالمذابح"، الذي نشرته بالبديل 10/3/2008، يؤسفني إغفاله فقرة تعميمية قالها في مقاله "جريمة رائعة"، المصري اليوم 3/3/2008، نصها الواضح هو الآتي: "إنسانيا...لا يمكن أن يقف أحد مع مذبحة جماعية...غير أنني أقف تماما على النقيض من ذلك الحس الإنساني البدائي لأكون واحدا من الذين يحترمون ويقدرون...المذبحة الرائعة...إنني واحد ممن يرون أن بعض رؤى الإصلاح والتقدم لا تحتمل ترف الحوار والجدل والإقناع، كما أنها لا يمكنها أن تبقى أسيرة حرب باردة بين الرأي والرأي الآخر"، كما أنه قال، باستخلاص كلي: "...إن عددا وفيرا من نماذج التقدم قد أتت وعلت في ظروف حاسمة، لا أجواء مرتبكة، وفي بيئة واضحة، لا في غابة من الانتماءات والانحيازات والأيديولوجيات المتصارعة"، فما الذي، بالله عليكم يا أهل الفهم والوعي، يمكننا أن نفهمه من كلامه هذا سوى أنه مع النماذج التاريخية، وليس مع نموذج مذبحة القلعة فحسب، التي رأت أن الحسم بالمذابح قاعدة مشروعة؟ وما الذي يعنيه قوله هذا سوى تأييده فتح باب المذابح على مصراعيه؟ وكيف يحتج حضرته بعد ذلك على الربط بين تأييده هذا لجرائم الحسم بالمذابح، على إطلاقها، وبين مذابح الكيان الصهيوني في غزة، التي تزامن توقيت نشر مقاله 3/3/2008 في خضمها وعصفها، متهما حضرتي "بربط مالا يربط وخلط مالا يختلط" ودخولي "إلى مناطق كانت نائية تماما عن جغرافية الفكرة"؟

كنت أفضل للأستاذ المسلماني التنصل مما توحي به أفكاره بشجاعة لا تحرض على لومي إذ أن هذا فيه جور كبير خاصة عندما يعاود اتهامي بأنني وصلت إلى "خلاصة معيبة جاءت من مقدمات خاطئة".

ولا شك أن الأستاذ أحمد المسلماني يعرف واجب الكاتب في حسن التصويب إلى الهدف الذي يريد أن يذهب إليه كلامه حتى يحتاط فلا يفهم منه مالا يقصد، ومن أجل ذلك كانت الكتابة مسئولية صعبة، وهما ثقيلا، وأحيانا غما لابد منه.

يبقى اختلافي مع الأستاذ أحمد المسلماني في نقاط كثيرة منها النقاط التالية:

1- ملنان فلنائي هو نائب وزير الحرب الصهيوني، وليس نائب وزير الدفاع كما تفضل بالقول.

2- مذبحة القلعة لم تكن معركة عسكرية، وكون أنها لم تشمل الأطفال والنساء لا يمنع كونها مذبحة، والتبرير بأن المذبوحين غدرا "كانوا جميعا من القادة السياسيين والاقتصاديين..." من التبريرات التي يمكن أن نلحق بها تعليق: صدق أو لا تصدق!

3- من حق الأستاذ المسلماني أن يقف إلى جانب محمد علي ويطلق عليه صفة "العظيم" فهذا تقديره، لكن ليس من حقه أن يسمي الأمراء المصريين بالرعاع والعبيد لأن هذا خارج حقه في التقدير.

4- الاستشهاد العلمي لا يكون بالرجوع إلى مقال في جريدة، فهناك مرجع أكثر دقة في مجال التقييم للأمراء المصريين، وأعني كتاب الأستاذ الدكتور سعيد عبد الفتاح عاشور بعنوان "العصر المماليكي في مصر والشام"، الذي ألفه عام 1965، وصادر عن دار النهضة العربية في طبعة ثانية عام 1976.

5- أما ما يجب أن نعرفه عن محمد علي وعن بقية جرائمه، القارعة والراقعة وغير الرائعة بالطبع، فهناك كتاب ميسر عنوانه "سيرة السيد عمر مكرم" الذي ألفه الباحث والأديب الرائد محمد فريد أبو حديد، وأصدرته لجنة التأليف والترجمة والنشر عام 1937، وطبعة كتاب الهلال ديسمبر 1951. وحين نطالعه، هو وغيره من المراجع المعتمدة سوف نعرف بكل تأكيد أن مقولة مثل: محمد علي "...زعيم عظيم، أخرج وطنا كاملا من الظلمات إلى النور وتقديرا لجريمة رائعة أنهت العصور الوسطى..وبدأت العصر الحديث"، ليست سوى كلام عصبي يثير الضحك أكثر مما يثير الغضب خاصة عندما نعلم أن محمد علي المذكور، بعد أن أسس دولته عام 1805، دولة الحاكم الفرد المستبد بالقهر والظلم والاحتكار والاغتصاب، أحرق كتب المؤرخ الشريف عبد الرحمن الجبرتي وقتل ابنه، وأذل السيد عمر مكرم ونفاه وحدد إقامته بعيدا عن أهله وقاعدته الشعبية من أهل مصر حتى مات الرجل كمدا أو سما والله أعلم، وربما كان هذا الإذلال، الذي وقع على السيد عمر مكرم عقوبة نزلت به لأنه الذي ساعد هذا السفاح الجاهل الغاشم على تسلق كتفيه وسلمه بيديه مقاليد الحكم والسيطرة على مصر. من المعروف والثابت أن محمد علي داهن الخلافة العثمانية، وإنجلترا، وفرنسا، وأحب كل ما هو أجنبي، أوروبي، واستعلى به على المصريين ونظر بازدراء إلى قدراتهم، ولأنه الذي كان لا يقرأ ولا يكتب، لم يستوعب باعهم الطويل في العلم والمعرفة والمهارة والصناعة والفلاحة، فحصرهم في دوائر الخدم والأتباع وانتزع أراضيهم، يعملون بسياط السخرة، وكأنهم الأقنان والعبيد وليسوا أصحاب الأرض وملاكها. وإذا كان قد أرسل البعثات العلمية إلى أوروبا فلم يكن هذا أولا من ميراث السيدة والدته، وهو الذي أتى مصر جنديا جائعا مفلسا من أجناد الدولة العثمانية الأرناؤوط، مؤتمرا بتعليماتها ضد الأمراء المصريين لإخضاعهم تماما باللعب على حبال خلافاتهم، وليسحب من الشعب المصري كل كفاءات المقاومة التي تصدوا بها لجرائم نابليون بونابارت وحملته الفرنسية، وليشل حركة قياداتهم العلمية والفكرية، لتجفيف منابع مبادراتهم في المشاركة السياسية وعزل تأثيراتهم بعيدا عن ناس البلد وأهلها.

وإذا كانت هناك أخطاء وكان هناك قصور وكان لابد من نهضة فلم يكن هذا يستدعي استجلاب ثقافة مستوردة يسميها البعض "التنوير"، لتستوطن مصر بعد سلخها من ثقافتها ودينها ولغتها. فمن هذا الذي كان يطالب بثقافة "غالب" غربي يركب بها على أنفاس "مغلوب" يستسلم له، ويكون حماره وبغلته ويحمد فضله في الوقت ذاته قائلا بفخر الحمقى: لقد خرجت من العصور الوسطى وأصبحت حمارا في العصر الحديث؟

هذا الذي يسمونه "باني مصر الحديثة" ليس سوى مؤسس لمبدأ الفصل التام بين الحاكم والشعب المصري هذا الشعب الذي لم ينل من محمد علي وأسرته "العلوية" سوى سياسة منطق: "...أنتم عبيد إحساناتنا".

إن علينا أن نتبين ذلك التقسيم الذي أفرزته سنوات حكم الأسرة العلوية، هذا التقسيم الطبقي المتعسف: ألا فرانك، ألا تورك، بلدي، وكان الألا فرانك هو الأجنبي من بلاد أوروبا المحتمي بالاحتلال والمستفيد من كل المميزات بصفته الشريحة الأعلى، والألا تورك الذي يتصارع مع الألا فرانك في جدلية عجيبة، ثم البلدي، أي كل ما يعبر عن ثقافة وتقاليد شعب مصر بخلطته القبطية والعربية الإسلامية. هذا "البلدي" كان الشعب المصري الذي لم يكن يسمح له بالسكنى في مثل "عمارة يعقوبيان"، أو دخول الأوبرا أو النوادي أو التجول في شوارع وسط البلد والتسوق من حوانيته الفاخرة، اللهم إلا إذا استطاع أن يثبت ولاءه للثقافة الغربية بالخضوع التام مظهرا وقلبا وقالبا نازعا جلبابه، أي ثيابه البلدية، ويكون مثل حمدية في زقاق المدق.

الكلام في هذا يطول ويتكرر، ولكن الأهم فيه دعائي أن يرحمنا الله من أشباه محمد علي السائرين على نهجه، ومن المعجبين بجناياته وجرائمه.

قفلوا الفرن في اسطبل عنتر

دوقت واحدة صاحبتي كلمتني وبتقول لي انهم قفلوا الفرن في اسطبل عنتر
ليه قفلوا يا بنتي الفرن؟
عشان واحدة ماتت في الطابور
ماتت ازاي؟
اتفعصت في الزحمة
ايوة يعني ايه دخله ده بانهم يقفلوا الفرن؟
انت بتسأليني انا؟
---
افهم من كده ان لما تشرب بيبسي ويجيلك تسمسم ح يقفلوا شركة بيبسي؟
لما تشرب بيرة ستيلا وتتعمي ان شاء الله قادر يا كريم ح يقفلوا مصنع ستيلا؟
لما تاكل ماك دونالدز ومصارينك تطلع قدامك شبرين ح يقفلوا ماك دونالدز
الطابور فعص الست، يقوموا يكتروا العيش عشان الناس ما تقفش طابور وللا يقفلوا الفرن من اساسه؟

حق العودة للاجئين الفلسطينيين: انا عندي الحل

حل رائع وفوري وممكن يحل مشكلة اللاجئين الى الابد ونخلص بقى من الصداع ده
الحل ان اللاجئين يقلبوا...آه يقلبوا كذا كذا في المنتزه
لامؤاخذة يعني الضرورات تبيح المحظورات ودي مفسدة صغيرة لجلب مصلحة كبيرة ما جراش حاجة يا شباب، بالنوسبة للستات برضه تقلب كذا كذا في المنتزه بحيث تبقى المعادل الموضوعي
حد فاهم حاجة؟
طب اقروا الخبر ده وانتوا تفهموا
ايه رأيكوا بقى؟ اظن حل ما خطرش على بال حد في الدنيا، ولا خناق ولا مشاكل ولا مؤتمرات ولا قلل منتحرة ولا قرف ونكد وافتحوا الحدود واقفلوا الحدود وحماس وعباس ولباس ووبوري رايح وبوري جاي
كل فلسطيني ينمر له على اسرائيلي وكل فلسطينية تنمر لها على اسرائيلية وهم عندهم كتير ياما قوي من الصنف ده وربنا يوفقكوا وتركزوا كده والحب مش كل حاجة المهم المعاملة الكويسة والعشرة والاستقرار والشاذ ما يعيبوش الا....الا....ياللا بقى انتوا فاهمين يعني اكيد ما يعيبوش الا ايه وخلصونا من المشكلة دي وما توجعوش دماغنا وتتعدوا على السيادة المصرية احسن نكسر رجليكوا خافوا على رجليكوا بقى يمكن تنفعكوا في حاجة
المهم ان اللي ادى "حق العودة" لهاذوها الصخص الفلسطيني اسمه مشلاح

رفعت سيد احمد يكتب عن حماة مكة

ثقافة العري فى فضائيات حماة مقدسات مكة

بقلم/ د. رفعت سيد أحمد

في مصر وكما هو الحال في كافة بلادنا العربية، الخوف على شبابنا، ليس فحسب من (المخدرات) و(الانحلال الخلقي)، ولكن من تلك الثقافة التي تبثها فضائيات تلك المملكة و ذلك (الأمير) الذي باع بعضها لليهود، كما أشارت هذة الصحيفة في أعدادها السابقة؛ فهذا الأمير ورفاقه دعاة حماية المقدسات، يبثون عبر فضائياتهم وصحافتهم المبتذلة، (ثقافة العري) بكل ما تعنيه الكلمة من معنى ومبنى؛ فمن استخدام للجسد، وبخاصة جسد المرأة في أسوأ، وأحقر استخدام له ،إلى إثارة متعمدة للغرائز، مع غياب كامل للمضمون الإعلامي الجاد والمحترم، فيتحول شبابنا تدريجياً إلى مجرد مستهلك لـ(بضاعة) رخيصة، تطل عليه صباح مساء من هذه الفضائيات.

* الأخطر في ثقافة العري التي يمتلكها ويبثها هؤلاء التُجار والسماسرة بقيادة الأمير (إياه) أنها تتعمد تقديم المرأة المصرية باعتبارها مثال للفتنة والإثارة، وليست تلك المرأة الفقيرة المكافحة (وما أكثرهن) أو المرأة العالمة المثقفة المتدينة، إنه يقدم فقط المرأة المبتذلة، وكأن كل نساء مصر كذلك، ولعل حلقات هالة سرحان عن (الدعارة في مصر) والتى قدمتها عبر فضائية روتانا التى يباركها شيوخ الوهابية ويحللون مشاهدتها فى الوقت الذى يكفرون فيه المقاومة وثقافتها نقول لعل ماقدمته( هالة)خير مثال على ما نقول، حيث فبركت الإعلامية الكبيرة القضية وقدمت فتيات مصريات باعتبارهن داعرات يقدمن المتعة بأجر، ثم بعد إذاعة الحلقات على قناة روتانا التي يمتلكها (الأمير الوليد بن طلال) الذي يزعم هو وأسرته ودولته حماية الكعبة والمقدسات والقيم (!!)، إذ بالفتيات يفضحن القناة الفضائية، والإعلامية الكبيرة وأميرها الذي حماها، ويعلن أنهن قمن بتمثيل دور الداعرات مقابل أجر وأن المسئولين بهذه الفضائية أجبرهن على ذلك!!

* إن تعمد هؤلاء تقديم المرأة المصرية على هذا الشكل يعد في عرف القانون جريمة ينبغي أن يحاسبوا عليها، وهو ما جري فعلاً في حينها، لكن الأهم هو المحاسبة الشعبية والسياسية، وهو ما ينبغي أن يظل مستمراً وقائماً حتى لو حفظ التحقيق القانوني مع هالة والأمير الوليد الذي حماها مرغماً عن أنف الشعب المصري، بل وأعطاها برنامجاً جديداً تبث فيه "ثقافة العري" التي تتقنها ويحبها الأمير ورفاقه!!

* الأخطر من الشكل السائد لثقافة العري هذه، هو ثقافة التطرف والغلو والتكفير التى ابدع فيها شيوخ الوهابية المتسعودة ضد كل ماهو خير وحلال فى ديننا ودنيانا وهي ثقافة لا تقل خطراً عن (ثقافة العري) بل ربما تقوم بنفس المهمة وهي تشوه القيم (والتي عمودها الإسلام) وتشوه التدين المصري والعربي المعتدل، والغريب في الأمر أن الذي يرعى الثقافتان (العري والتطرف) هو مصدر واحد (الاسرة السعودية)وهو ذاته المصدر الذي لا يعلو نجمه إلا عندما يهبط نجم الثقافة والتدين المصري المعتدل، إنهم يعّلون ويتضخمون بأموالهم وثقافتهم المبتذلة كلما هبط الدور المصري بفعل حكامه وبعض مثقفيه من السماسرة والمرتزقة وهو الدوروالذي نطالب اليوم بإحيائه وبقوة في مواجهة أموال النفط وثقافة عريه وغلوه الديني المخالف لروح الإسلام وجوهره.

-----

المقال ده اتنشر في جريدة الميدان

الا صحيح ازاي الواحد يحرم على الناس عيشتهم وبعدين يقلعهم ملط

هو يا اما ملط يا اما يحبسهم في قبو؟

مدون حلو...وجيمي ما راحش في الوبا

المدون ده امريكاني واضح انه من اصول مكسيكية او هندي احمر مخلط ببيض، وواضح انه برضه طالع من طبقة اجتماعية متكحرتة وربنا نفخ في صورته، لما تقروا تدويناته ح تستنتجوا كده برضه، ثم يعني امريكي ابيض سيك ومن طبقة متوسطة ازاي ح يبقى مخه نضيف يعني؟
الواد ده اكيد يعني جدته مغتصبة زي اي ملون مخلط بعرق ابيض، مالكوم اكس بيقول كده
المهم المدون ده عاجبني قوي ولما باقرا له باحس ان الدنيا لسة بخير بس هو مقل قوي عايزة الواد جيمي بما انه في امريكا يقول له كتر شوية من التدوين
اسكتوا اسكتوا اسكتوا مش الحمد لله الواد جيمي ما راحش في الوبا، بصراحة بصراحة انا كنت فاكراه راح في الوبا اصل الواد خلع ولا كلمني وبعدين غطس كده قلت بس الواد راح في الوبا وجاله ازبهلال وصدمة حضارية من اللي بتحصل للي بيروح امريكا ويرجع لاوء لسانه وبيتكلم عن الامريكان اللي زي الفل وان احنا اللي ولاد وسخة
بس الحمد لله حبيبي يا اخويا طلع فقري زي اخته، راح اتصاحب على الهومليس والجرابيع اللي في امريكا كلهم وباعت يقول لي وحشتني عربيات الكشري والفول انا زهقت...ما طلعتش حلوة ولا حاجة يعني، وبيتوعدني توعد شديد اللهجة بانه ناوي يعمل مسح لكل جرابيع امريكا ويضرب معاهم صحوبية

فقري فقري يعني، انشالله دايما يا جيمي ربنا يديمه عليك وعلينا
انا مبسوطة قوي على قد ما كنت زعلانة منه لما كنت فاكراه هنادي وراح في الوبا على قد ما انا مبسوطة انه لسه من قبيل الفقريين دلوقت

فيوم 6 ابريل: ايه لزوم الإئئ إئئ

بجد يعني انا عايزة افهم ايه المشكلة انك تفخد في البيت ليوم واحد بس؟
الناس مالها عمالة تتحجج بحجج واهية وتقول ده ممكن يغلي السلع ده ممكن يعمل ويسوي
ده هو يوم واحد يا اخوانا مش ح تروح فيه الشغل ومش ح تشتري ولا تبيع، ايه المشكلة؟ بجد انا مش فاهمة ايه المشلكة؟
ده يوم واحد...مافيش اي حجة بجد

امك نزلت تلعب في الشارع

هم بينقطونا ليه؟
في الاول يقولوا ده بمب العيد وما حدش مات
يصنوا شوية وبعدين يقولوا حد مات
يصنوا شوية وبعدين يعتذروا....نكتة قديمة قوي بتاعة حمادة سلطان لما الراجل ومراته سافروا وسابوا الكلب بتاعهم عند صاحب جوزها الكلب مات فصاحبهم بعت لهم ان الكلب مات فالست انهار فجوزها قال له اما انت خرنج صحيح كده الست منهارة، كنت الاول تقول الكلب نزل يلعب في الشارع الجواب التاني الكلب خبطته عربية الجواب التالت الكلب في المستشفى الجواب الرابع الكلب مات
وسافر تاني هو ومراته، بعدها بيومين صاحبه بعت له: امك نزلت تلعب في الشارع

الحكم بسجن المجرم الاثيم والقاتل اللئيم: ابراهيم عيسى

هدم الحضارة..هدم المدنية والمعمار، هدم كل أولئك وهؤلاء وتلك، ولهذا ولكل هاتيك المجالي
اتحكم على ابراهيم عيسى بالسجن ست شهور
البي بي سي كاتبة سجن...مش حبس!! ما اعرفش هل ده عدم دقة من المحرر وللا هو فعلا سجن مش حبس
وبعدين مينو قال لي انه مع ايقاف التنفيذ والبي بي سي ما قالتش مع الشغل والنفاذ وللا مع ايقاف التنفيذ
مين المحرر اللي كاتب ام الخبر ده؟
المهم: اديكوا عرفتوا ما حدش يبقى يسأل عن صحة الريس تاني
اوعى تقابله في اي حتة وتقول له: ازيك وازي صحتك كده...دي كلمة قبيحة
قصدك ايه بصحته يا قليل الادب؟
----
الحرية لم تخلق الا لمن يحملون ارواحهم على اكفهم

كسبنا صلاة النبي

عليه الصلاة والسلام

رجاء قراءة الخبر لاخره مع قراءة شهادة اهل القتيل وزملائه
واذا كانوا كدبوا في انه اتقتل ورجعوا في كلامهم يبقى اللي يكدب يكدب على طول
لكن ازاي بقى...معقولة يعني نكدبهم ونصدق نفسنا

------
قال الامام الشافعي: لقد خلقك الله انسانا...فلا تجعل من نفسك بهيمة

الحرية لم تخلق إلا لمن يحملون أرواحهم على أكفهم

Freedom is only for those who are ready to die

Malcolm X-13

شعبان عبد الرحيم عملاق

بما انه بيكره اسرائيل وبيقولها لو اتسأل انشالله يموت قتيل او يخش المعتقل، فهو مهدد بتطبيق حكم العماليق عليه، ودي فتوى من اتنين من الحاخامات المهمين والمؤثرين في المجتمع الاسرائيلي
وبيقولوا : وعلينا أن ننزع أي أثر للإنسانية في تعاملنا معه، حتى ننتصر
:)
والله الكلام ده لطيف موت، انا بس كل اللي بيغيظني ان ماحدش بيقول على الناس دي ارهابيين ، حد يكتب تعليق يقول لي: دول ارهابيين، عشان انا انبسط وارتاح واحس ان مافيش مشكلة
ياللا قولوا

ماذا لو كانت القمة العربية في تل ابيب؟

لبنان مش رايحة القمة العربية عشان دي سورية الاخص الاخص الاخص، والسعودية باعتة البواب، ومصر بتشاور عقلها تبعت البواب وللا السفرجي، والوضع حرج جدا وكل الدول العربية حايسة وفي نص هدومها كل ده ليه؟ عشان القمة السنة دي في سوريا...مين؟ سوريا...بتقولوا مين يا ولاد؟ سوريا مين؟ سوريااااااا
الا الواحد كل ما يقرا الجرايد علامات استفهام بتطلع كده في دماغه وخيالات مريضة كده
يا سلام لو القمة العربية في تل ابيب: يا ترى الرؤساء والملوك والزعماء بس هم اللي ح يروحوا؟ وللا ح ياخدوا ميكروباظات ومعاهم مراتاتهم وعيالهم واحفادهم ويمكن كمان رفات ابهاتهم وامهاتهم واجدادهم ومعاهم حلل المحشي والعيال الصغيرة فوق سقف الميكروباظ بيصقفوا والنسوان تزغرد والرجالة تقول الله اكبر
انا مش باهرج ولا باستظرف دمي، عشان اتنين من نواب الكوايتة ماثلين دلوقت حاليا امام النيابة عشان شاركوا في تأبين عماد مغنية، وقبل كده نواب اردنيين اترفع عنهم الحصانة ومثلوا امام النيابة عشان عزوا في ابو مصعب الزرقاوي بينما رابين المجحوم لما غار في ستين داهية كل الزعماء العرب بما فيهم ريسنا ملاح ومعدينا والملك حسين اللي قال عن رابين وهو يعدد مناقب الفقيد له الحجمة ولاهله الصقر والبرطمان
He was a great soldier
كان مقاتلا عظيما
هو يا ترى يا هل ترى هل المجحوم رابين قاتل ضد اي حد في الدنيا غيرنا؟ ده مجرد سؤال بريء
وما حدش مننا طالب بمحاكمة الزعماء العرب عشان عزوا في رابين فوق على كده وزيادة اني فاكرة انهم ذاعوا كل مراسم العزاء بالزمارة الطويل: زمارة دقيقتين حدادا على الفقيد!!!! في نفس الوقت كان فتحي الشقاقي استشهد ولا عزاء للزعماء
الزعماء او البزنس مينز اللي ياريتهم كانوا بتوع بزنس عدلين الا بيشتغلوا تجار شنطة للانتاج الاجنبي
-----
تعليق بسيط بس بخصوص البوست بتاع وتدق اجراس الكنائس في الجزيرة العربية
فيه ناس فهمت اني خايفة من النشاط التبشيري في الجزيرة العربية: ناس قالت لي جدعة يا نوارة وناس قالت لي ليه كده يا نوارة..والاتنين فهموني غلط، الحقيقة انا ما قلتش كده خالص، انا كنت باشرح ليه المسلمين قايمين ومش عايزين يقعدوا بخصوص بناء كنيسة في جزيرة العرب وان دي احد مخاوفهم
بس بالنوسبة لي انا مش خايفة من التبشير والله العظيم تلاتة والله العظيم كمان مرة ويمين يحاسبني عليه ربنا انا ما خايفة من اي نشاط تبشيري
يا ريييييييييييييت وقال على رأي اللي قال: اللي خدته القرعة تاخده ام شعر، هي لو مشكلة المسلمين ووكستهم دي واقفة على تغيير الدين نغيره من بكرة، من بكرة ليه، من دلوقت اهو، بس لو كنا فلحنا واحنا مسلمين يبقى نفلح واحنا على اي دين تاني، ما احنا عندنا مسيحيين على كل الطوائف وملحدين ولا دينيين وبهائيين، لو فينا فالح كان على وشك بان يا نداغ اللبان
ياريتهم كده ياخدوا تشكيلة من كل الاديان اللي عندنا والطوائف والجنسيات العربية ويعملوهم زي ماهم عايزين والله، على اي طايفة يحبوها، ويبعتوهم امريكا
احلق شعري نمرة واحد واحط منكير اسود وروج ازرق ان ما كفرنا الامريكان وطلعناهم من كل الاديان اللي خلقها ربنا وقليل ان ما طلع مارتن لوثر من تربته وقال لهم: انتوا مين اللي شار عليكوا الشورة الوسخة دي...حسبي الله ونعم الوكيل فيكوا
- الله انت اسلمت يا مارتن؟
- ماهي حاجة تكفر
------
عائلة محمد فؤاد عفيفي طالعة دلوقت في العاشرة مساء وجنازته شيعت والعزا منصوب
وامريكا بتقول مافيش قتيل
مرات محمد بتقول: جوزي وانا عارفاه...لا له في الخلايا ولا له في اي حاجة
!!!!!!!!
هو احنا بقينا اعضاء في خلايا لحد ما يثبت العكس؟
كل الناس يا ابو الغيظ بتسألك: ح تكسر رجل مين المرة دي؟
عموما انا عندي الاجابة، جبتها من منى الشاذلي طبعا، بتقول انهم اتصلوا بالخارجية وهم قالوا احنا مالناش دعوة بالموضوع ده اصله حصل في مياه اقليمية مصرية يعني مش اختصاصنا
!!!!!!
طب ما الجعانين لما دخلوا عندنا كانت ارض مصرية ومش من اختصاصك يا ابو الغيظ تقطع رجلين الناس

الحلوة اتكلمت

مصر اتكلمت وقالت لا يا اخوانا مات واسمه محمد مختار عفيفي بس السفارة الامريكية بتقول ولا حد مات ولا حاجة ايه السلبطة دي هو واحد ده يعني مات؟
الظاهر امريكا من كتر ما موتت مليون ونص في العراق ونص مليون في افغانستان ما بقتش تعترف بالفرداني ده، ايه يعني بني ادم مات مش حكاية ثم ان ده صرصار مصري ما يسواش تلاتة نكلة يعني والمهم امن امريكا له الاولوية
----
امبارح شفت تقرير في الجزيرة عن تكاليف الحرب وقالوا ان امريكا صرفت على الحرب تلاتة ترليون دولار غير علاج المصابين والمرضى من اثر الحرب اللي وصل لستميت مليون دولار ده غير ارتفاع معدلات الخلل النفسي والانتحار بين الجنود الامريكان وجورج بوش بيقول انا مقدر حجم التضحيات والتاريخ ح يذكر الناس دي، هو ح يذكرهم طبعا يعني هم دول يتنسوا؟ ناس في اقل تقديرات قتلوا 2 مليون في سبع سنين يتنسوا ازاي دولم، ولسة لما الحرب تخلص والفضايح تبان وللا هي مش ح تخلص؟ وللا ح تخلص لما احنا نخلص؟
طبعا التقارير الامريكية عن القتلى ما يؤخذش بيها خااااااااااااالص واللي ياخد بيها يبقى يا بيستهبل يا بيستهبل اظن اهو قاتلين واحد ومش حاسبينه على المقاتيل ما اعرفش هم بيحسبوها ازاي بس واضح انهم بيعملوا حساب الجمل في موضوع القتلى ده
يجيبوا اسم القتيل واسم امه ويحسبوا كل حرف بكام ويجمعوه وبعدين يطلع لهم الناتج فيعملوا له حجاب
والله دي فكرة ممتازة للاستاذ بوش، بما انه بيقول ان بينه وبين ربنا كلام وحديت وكل شوية يتكلم معاه ياد يا بوش روح ياد يا بوش تعالى ياد يا بوش موت ياد يا بوش ولع
وطبعا بوش بيسمع اصوات مش ممكن يكدب لان اللي بيكدب بيروح النار
طب ليه بوش بعد ما يسيب الرئاسة ما يشتغلش في فك الاعمال والسحر واخراج العفاريت الزرق من جتت البني ادمين بما ان دي هوايته واظن اللي عمله فينا بروفا كويسة ونجحت نجاح باهر بفضل انتخاب الامريكان الطيبين الجهلة له لفترتين على اساس ان الواحد ممكن يوصل بيه الجهل انه يقتل طفل وهو طيب ومش واخد باله انه طفل ولا حاجة، وللا لسة فيه حد عليه عفريت كده وللا كده؟
تلاتة ترليون دولار؟ مش احنا كنا اولى بالفلوس دي؟ صحيح اللي عنده قرش محيره يجيب رقاب ويطيره
بس والله اتأثرت قوي من الكلام اللي قاله التقرير بخصوص الحالة النفسية السيئة وحالات الاكتئاب اللي بتصيب الجنود الامريكان
حاجة تقطع القلب والله انا الدمعة كانت ح تفر من عيني
ولاد الكلب مش عايزين يموتوا بسهولة، ولا عايزين يغتصبوا بسهولة، وطبعا ده بيقلل من متعة الضابط الامريكي وهو لامؤاخذة بيغتصب، مع انه الراجل امير وجاي يكسب ثواب فينا، يظبط المواطن ويكيفه وبيتعمد انه يغتصب عشان يشيل هو الذنب لوحده، شوف التضحية، وبعدين يمنحه الشهادة ويبعته الجنة
انما تقول ايه في قلة اصلنا وقذارتنا، حرام علينا والله حطمنا مشاعر الجنود الامريكان الرقيقة وبينتحروا من كتر الزعل
طب نعمل ايه دلوقت؟ نكفر عن خطيئتنا ازاي؟ انا بافكر نعمل حملة للتبرع لضحايا ضحايا العراق من الجنود الامريكيين
ونعمل حملة ضد كل ضحية عراقي او افغاني تسبب في جرح مشاعر الجندي الامريكي السكمنس
ونخلي عمرو خالد هو اللي يقودها بما ان دول ناس ميتة وما ينفعش معاهم غير الدعا دلوقت: حملة الدعاء على ضحايا العراق وافغانستان انهم ما يدخلوش الجنة ولا يعتبوها عشان حطموا مشاعر الامريكان
حلوة خرنج دي يا بيه؟

كلم الـ...تلهيك واللي فيها تجيبه فيك

يعني البجاحة لها ناسها فعلا، انا شايفة بعيني اللي ح ياكلهم الدود - عن قريب يا رب خليني اخلص - سمير عمر وهو طالع في الجزيرة وبيقول انه في موقع الحادث وان البياعين والصيادين ملمومين وعايزين يمنعوا السفينة الامريكية من انها تمر وان اهل القتيل جم وعملوا هيصة وبوليكة والبي بي سي بتقول فيه قتيل والجزيرة مراسلها اللي في موقع الحادث بيقول قتيل انما تقول لمين يا حسين
مصدر عسكري امريكي بيقول لا لا لا مافيش حد مات ولا حاجة...قوم يا شيخ قوم بلاش دلع ما انت زي البمب اهو
وايه الاعلام الامريكي اللي غلب البيت بيتك وصباح الخير يا مصر ده
يا داهية دقي دقي دقي دقي على قرعة بنت اختي
معناتو ايه الكلام ده؟ معناتو ان امريكا مش عايزة حد يكون مات...يعني مافيش حد مات مافيش حد مات
ثم ان الاعمار بيد الله واهي ساعته جات اعترضوا بقى على كلام ربونا يعني لو ما كانش مات بالرصاصة كان مات وهو على سريره دي اعمار
الغريبة بقى ان البي بي سي والجزيرة والسي ان ان رغوا في الموضوع الا الاعلام المصري مافيش حد منهم نطق
لعل المانع خير؟
هل مستنيين الاوامر من امريكا يعني نعمله مات وللا نعمله ما ماتش؟ ولو مات يبقى ازاي؟ ولو ماماتش يبقى ازاي
طبعا فيه عدة حلول
الحل الاول ان اهل القتيل يتخرسوا خالص، وطبعا الحل ده مع وجود الفضائيات ومع وجود المراسلين اللي حضروا حادثة القتل ح يبقى صعب قوي، ولو ان كل صعب يهون في حب اموركا الاميرة الطيبة واهل القتيل ممكن يفهموا المراسلين انهم فهموا غلط ده هو بس وقع مغمن عليه من الخضة وبيتعالج في سويسرا دلوقت والدكتور مانع عنه التليفون عشان عنده اصطدان في النفسية على اساس العاطفة
فيه حل تاني، ان القتيل يبقى عليه تار داير والتار ولا العار يا ولد فط من الصعيد لجل ما يهرب من جضاه بس ولد الدهاشنة رادل من ضهر رادل تنته وراه لحدت لمن جاب جراره وعرف متواه فين عاد وفط على الساويس وجاب اجل الددع ولجل نبهاته اسم الله عليه جام ملبسها في الادانب بس ربك ما يرضاش بالظلم يا ولد كشف حجيجته وظهرت براءة الادانب الشجر امات عيون زرج الامرا السكرة
هييييييييييييييييييييه ده ربونا له حاجات يا ددع

بتشربها سادة وللا سيادة

تحديث:
عداهم العيب، الاموركان قالوا لهم اقفوا ما وقفوش قالوا لهم اقفوا ما وقفوش قالوا لهم اقفوا ما وقفوش
راحوا ضاربين عليهم رصاص وموتوا صخص وجرحوا اتنين
بس فيه حاجة واحدة يا عم الخواجة: البياعين بتوعنا ما بيعرفوش عنجليزي
كنت كلمهم بالفرنصاوي

وكالات الانباء بتقول ان صخص مصري اتقتل لما كان في قارب عشان يبيع شوية حاجات لسفينة امريكية معدية من الكنال
الراجل ده في وكالات الانباء اسمه صخص، بس بالنسبة لاهله وعياله هو اللي فاتح بيتهم وبيتنطط على القوارب ويعمل بهلوان عشان ياكل عيش، عيش من ابو ربع جنيه اللي قد السي دي ده...عارفينه؟
بالنوسبة لام السيادة المصرية اخبارها ايه؟
والجوع المصري اخباره ايه؟
والناس اللي بتعمل اراجوزات عشان تعيش وتعيش عيالها وفي الاخر ديتهم رصاصة طالعة من سفينة امريكية مش عارفين مصدرها زي ما الامريكان قالوا ايه نظامهم؟
في داهية...في داهية صح؟ فدا الامريكان الطيبين الامرا اللي بينشروا الديمقراطية في الشمس عشان يطلعوا البراغيت
طظ في البائع الجائل برا وبحرا لجل عيون الامريكان الطيبين
وطظ في اهله وامه وعياله وغلبه وشقاه في جزمة امريكا والامريكان اسيادنا وتاج راسنا
وهذا الصخص..غار في داهية
واهو الامريكان ريحوه من الشقا والتنطيط عشان لقمة العيش وودوه الجنة ياكل بسطرمة ولحمة ضاني ويحلي بسوداني
مش احسن ما كان يعيش ويجيله سل وللا فشل كلوي وللا يبيع عيل من عياله

والله الواحد مش عارف يودي جمايل امريكا والامريكان فين

للناس اللي بتعتبر ان الكلام عن الكرامة عيب

اقروا الخبر ده
:)
والله العظيم اول ما قريت الخبر ده افتكرت اغنية: من فضلك لو سمحت نزل ايدك تحت
من امتى اسرائيل بتقول انا مستعدة لاي هجوم...اللي ح يضربي ح اضربه اهو انا ما باخافش بقى من حد لعلمكوا انا ما اخافش غير م اللي خلقني
ووزير الدفاع طالع يقول تصريحات شبه تصريحات الزعماء العرب في الستينات
:))
الظاهر من عشرتهم معانا بقى وللا حاجة اتهطلوا
فيه مسئول في الاستخبارات الاسرائيلي اسمه فركش عمال يقول اوعى تقرب اوعى تفوت اوعى تيجي احسن ح تموت
والسلطات الاسرائيلية بتقول للاسرائيليين صحصحوا معانا الله يخليكوا...اي حد يقول لكوا تعالوا اوديكوا عند ماما ما تروحوش معاه ولا تاخدوا بونبوني من حد بلاش الطفاسة دي
طب والله العظيم ما باتريق اقروا الخبر كده، انا قريت الخبر اتنفخت وحسيت بفخر..اول مرة يخافوا من اي حد عربي
ربنا يخليك لنا ياللي في بالي، ولو انه خسارة في جتتنا
الا لما تقول لحد ده كفاية انه عمل لنا كرامة يبصوا لك كده كأن كلمة كرامة دي كلمة قبيحة

وتدق اجراس الكنائس في الجزيرة العربية

بلاش نتكلم في الموضوع ده من ناحية الفقهية لاني اولا مش فقيهة ثانيا لان المسألة خلافية ما بين ناس بتقول ان نصارى نجران كان عندهم كنيسة وكمان صلوا في مسجد الرسول وما بين ناس بتستند على تصرف سيدنا عمر في اقصاء اليهود والمسيحيين من الجزيرة العربية لاسباب سياسية خلينا نتكلم كظماني كده زي ما احنا متعودين مع بعضينا
فيه عدة اسئلة بتطرح نفسيتها على ترابيزة السفرة
اولا: ليه الفاتيكان طالبة تملا جزيرة العرب كنايس؟
ثانيا: ليه السعودية مش عايزة تبني كنيسة عندها بينما الامارات وقطر بنوا كنايس؟
ثالثا: ليه كتير من المسلمين مخضوضين وقلبهم واقع في رجليهم؟
نتكلم بصراحة وللا حد ح يزعل؟
وانا من امتى بيهمني حد يزعل؟ اللي يزعل يتفلق ويولع بجاز وسخ
الفاتيكان بتقول سبب منطكي جدا: فيه مسيحيين كتير بيشتغلوا في الجزيرة العربية ومن حقهم يمارسوا شعائر دينهم
عداهم العيب؟ لا عداهم العيب واللي يقول غير كده يبقى غير منصف بالمرة
السعودية: بتقول لا حرام...اذن فلنضع الخلافات الفقهية جانبا ولنتبنى وجهة النظر الفقهية اللي بتقول ان بناء كنيسة او معبد في جزيرة العرب حرام استنادا على: لا يجتمع في جزيرة العرب دينان. وبيقولوا ان ده حديث مع ان الرسول كان عايش وكان في حياته مجتمع في جزيرة العرب تلات اديان مش دينين بس مش مهم خلينا في لا يجتمع في جزيرة العرب دينان ونقول ان ده حديث ونقول ان ده صح ونطنش على ان سيدنا ابو بكر لم يقص الاديان الاخرى واللي عمل كده سيدنا عمر ماشي؟
ماشي
وآل سعود زعلانين وبيقولوا طب والفاتيكان تبني جامع عندهم؟
سؤال وجيه..بس الفاتيكان مافيهاش مسلمين ولا فيها اي دين تاني غير المسيحية الكاثوليكية وهم ملتزمين بده
طب بالنوسبة لآل سعود حماة حمى السلفية فيه كام سؤال بيمغص في نفسيتي دلوقت حاليا:
فيه عندكوا مسيحيين وبوذيين كمان وللا لا؟
مين اللي جابهم؟ مين؟ امي؟ والله ابدا...الست قاعدة اهي ماعملتش حاجة..مش امي..طب مين اللي جابهم؟
وبناء كنيسة او معبد في جزيرة الرسول حرام...طيب حرام
واستضافة جيش امريكي لضرب افغانستان والعراق وايران مش حرام؟ بلاش عشان مسلمين..عشان بني ادمين
والتعاون السعودي الاسرائيلي من الابرة للأجهزة الإلكترونية وفي السر كمان مش حرام؟
ملحوظة: الخبر ده نزل على وكالات الانباء واتشال بسرعة
وتلقي الاوامر من تشيني لمساعدة امريكا على اجتياز عنق الزجاجة اللي هي مقبلة عليه مش حرام؟
والكلام عن ان ايران اخطر من اسرائيل والتعاون مع امريكا واسرائيل ضدهم مش حرام؟
والغريبة الغربية ان السعودية قالت: لو الفاتيكان ح يعترفوا بان سيدنا محمد نبي ممكن نعمل لهم كنيسة
:))
يعني مش معقولة فصال كمان في الدين
دلوقت السؤال اللي بيطرح نفسه بقوة: ليه دولة آل سعود ما بتكملش وساخة للآخر؟
جابت الناس وادتهم قواعد حربية وسابتهم سنين نازلين هبد في مخاليق ربنا يمين وشمال وبتدعمهم اقتصاديا بكل ما اوتيت من قوة حتى لو على حساب اقتصادها هي وييجوا الناس اللي هي جايباهم يقولوا عايزين مكان نصلي فيه يقولوا لهم لا
بجد انا حازقني مثل قبيح: الفتاة المنحرفة لما تعمل كل حاجة وتيجي على....وتقول لا حرام
افهموهما انتوا بقى انا مش ح افسر
او مثلا تشترط ان الزبون يبقى مطاهر عشان ما يبقاش نجس
طيب دهوت بالنوسبة للسعودية
طيب بالنوسبة للفاتيكان
معلش معلش معلش انا وش الاستعباط ووقلت يا واد طنث خالث اللي الناس فيه ده مش عاجبني
برضه عامل زي الواد اللي يركب ميكروباص وكوعه يسرح ولما البت تقول له الله: يقول لها ايه؟ باطلع الفلوس من جيبي
فتسكت، بدل ما يحط ايده في جيبه يحط ايده في حتة تانية البت تقول له الله يقول لها ايه؟ غصب عني ما اخدتش بالي فتسكت يطلع الفلوس ودراعه كله يسرح البت تقول له الله يقول لها ايه؟ باعد الفلوس ده انت مخك وسخ قوي
طبعا هي تستاهل المفروض كانت تسفخه كف من الاول خالص
بس هو كمان بيستعبط
بقى طالعين لنا في كل حتة من حتت الكون يقولوا لنا وش كده: مافيش وسيلة للقضاء على الارهاب غير ان المسلمين يبقوا مسيحيين
وبابا الفاتيكان ادانا كام كوع على صدرها تنور على كتفها تنور على ....تنور
وجورج بوش يقول دي حرب صليبية والناس تقول الله الله ما يقصدش دي كلمة امريكاني عادية زي ما بنقول واد عترة...يعني هو كان من عترة الرسول بجد؟
وفجأتن كده سذاجة بقى الشغل الشاغل لكل مناصري الحرية والديمقراطية: ازاي المسلمين يتحولوا مسيحيين من غير ما حد يضايقهم وفي نفس ذات الوقت ازاي يتم حماية المسيحيين من"الاسلمة" والحقيقة لو ح نعتبره ماتش كورة المنافسة مش شريفة
لما امريكا واوروبا يبقوا محتلينا سياسيا واقتصاديا وعسكريا وثقافيا وكمان عايزين يحتلونا روحانيا وبيقولوا لنا في وشنا كده دون مواربة واي حد يتكلم في الاسلام يبقى ارهابي بينما العصايا داخلة في كل حتة
وعصايا ايه؟ خشب مشرشرة ومنسلة وفيها مساميرة بارزة ومتنية خلف خلاف
وبعد كدهوت، وبعد ما العالم الاسلامي كله بقى مستعمرة امريكية اوروبية مش فاضل غير بس الكنيسة وتبقى كملت
وطبعا الكنايس دي ح تعمل نشاط تبشيري واي حد ح يفتح بقه ويقول ياخوانا ما ينفعش يبقى احتلال وتعملوا نشاط تبشيري ده كده يبقى نشاط سياسي استعماري ح يبقى ضد الحريات واي حد ح يقاوم النشاط التبشيري ح يبقى ارهابي مع ان النشاط التبشيري على اطلاقه مافيهوش حاجة، بس النشاط التبشيري في دول محتلة ومتضعضة ده يبقى نشاط عسكري مش ديني والا ما بيروحوش اليابان مثلا يعملوا تبشير ليه؟ وليه التبشير ده ما كانش من عشر سنين، ليه ما حليش التبشير غير بعد هزيمة العالم الاسلامي عسكريا واحتلال اراضيه؟
ايه ايه ايه؟
طب الانسة ساكتة وانت عمال كوعك ودراعك يحك في كل حتة...ما تعمليش فيها بقى راجل متدين وهي تعمل ام الشريفة اللي مش واخدة بالها...قول بصراحة كده انا وسخ وهي شرموطة وماحدش يتدخل بناتنا على الاقل عشان نبقى عارفين راسنا من رجلينا
ثم انزلوا انتوا الاتنين من الميكروباص واجروا لكوا اودة في بانسيون وارحمونا احنا
واذا كان يا اما اقبل اني احتل واغتصب وكمان اغير ديني تحت القنابل العنقودية يا اما ابقى ارهابية لا انا ارهابية وارهابية وارهابية وتبع تنظيم القاعدة والواقفة والنايمة والقايمة كمان

اضراب اساتذة الجامعة

ولاول مرة في تاريخ الجامعات المصرية اساتذة الجامعة يضربوا، يعني حتى اللي كانوا بيزعقوا لنا على المظاهرات ويقعدوا يعقلونا هم نفسهم زهقوا وامتحانات الترم التاني قربت، والعيال طبعا اكيد مبسوطين انهم ما بيحضروش ومش عايزين المشكلة تتحل خالص :) بس انا مبسوطة من اضراب اساتذة الجامعات بالذات اكتر من اي اضراب تاني، مش عشان العيال مش ح يحضروا، بس عشان الناس في مصر ابتدت تواجه عشان تحل المشكلة بدل ما تفكر في بدايل زي ما كان طول الوقت بيحصل وبتتقضى

ظاهرة الامهات الكلبة

طبعا امبارح كان عيد الام اللي انا مش باحبه لان لان الامهات نعمة ربنا يديمها وكل واحد يشكر نعمة ربنا بالطريقة اللي هو شايفهما مناسبة وكل يوم مش يوم في السنة المهم يعني بس طبعا قعدوا يتكلموا عن الام ودور الام وكده
بس انا حسيت انهم بيتكلموا عن امهاتنا احنا، مش امهات جيلنا
انتوا مش ملاحظين ان امهات جيلنا وكمان اللي اصغر مني شوية وبقوا امهات انتشرت بينهم ظاهرة الام الكلبة؟ عارفينها دي؟ اللي تشوفها بتعمل ايه في العيال تبقى عايز تقتلها عشان العيل ده احسن له يبقى يتيم من انه يبقى عنده ام كده
لو حد يذكر بوستات الرجالة والستات اللي كتبتها وخلصنا منها ان المشكلة في الامهات المصريات انها بتحب عيالها بطريقة قريبة شوية من الجنان، قريبة كتير من الجنان وده ممكن يأثر على العيال ويديهم تصورات عن نفسهم مش حقيقية عشان امهاتهم بقى مفهماهم انهم ما حصلوش ولا ح يحصلوا
بس دول امهاتنا، ووالله مش امي بس كل امهات صحابي وصحبات ماما، وكمان يمكن اللي بتشتغل بتاخد بالها من عيالها اكتر لان بيبقى عندها احساس بالتقصير بتحاول تعوضه بانها تبالغ في الاهتمام
لكن انا دلوقت باشوف امهات كلبة كلبة كلبة، وشفت منهم كتير بصراحة، كام، يعني واحد اتنين، بتاع ستة كده شفتهم في ظرف سنتين بس بعيدا عن الامهات اللي بترمي عيالها في الشارع من الفقر دول غلابة وانا شخصيا باتعاطف معاهم لانها بتبقى قليلة الحيلة ونوع الفقر اللي احنا فيه غير مسبوق الحقيقة مش ناقصنا غير ناكل قطط وكلاب زي ايام الشدة المستنصرية وبعيدا برضه عن امهات بتشتغل وتجري على لقمة العيش لان يا اما فلوس الراجل مش مكفية يا اما هو خالع ايده اصلا من الصرف وده بيبقى غالبا لا مؤاخذة يعني نو اوفنس ودي ظاهرة تانية انتشرت برضه ما كانتش موجودة بالطريقة الفظيعة دي
لكن انا باتكلم عن امهات ظروفهم كويسة نسبيا مش جعانين يعني، وطول الوقت مش بتفكر غير في نفسها، وبالنسبة لها عيالها دول كومبارس صامت دورهم في الحياة انهم يسكتوا واذا ما سكتوش ينضربوا وسايباهم ومطلوقة في الشارع او حتى قاعدة تعمل شات وتتفسح على النت او باصة في الصقف او متفرغة لجوزها تحاصره او اذا مافيش جوز يبقى كل يوم بترسم على راجل جديد مع ان معظم الامهات الكلبة ان لم يكن كل اللي شفتهم ما بيشتغلوش وطول الوقت مش عايزة ابنها او بنتها عايزة تخزنه في اي داهية حضانة جدة الجيران يلعب في الشارع يروح يموت في داهية المهم ما يوريهاش وشه ده فيهم واحدة كانت بتسيب ابنها عند مرات ابوه اللي هي بتكرهها عمى بس عشان تخلص منه وما كانش هاممها ان ابنها ما بقاش يحبها
النوع ده من الامهات ممكن تستخدم ابنها لتحقيق مكاسب شخصية ( يا تبتز بيه جوزها، يا تشنكل بيه راجل: وش مسكنة كده) وساعتها تفتكر انها مخلفة غير كده ما بتفتكرش موضوع انها خلفت ده خالص وحاجة فوق الوصف الناس تحكي وتتحاكى عليها حاجة انا مش عارفة افهمها: ازاي ام ومش طايقة تقعد مع ابنها نص ساعة على بعض وهي ما ورهاش حاجة؟ ومش متحملة مسئوليته في اي حاجة خالص، ولا عندها ظروف ضاغطة على اعصابها تخليها مش عايزة ابنها او بنتها، طب جابتهم في الدنيا ليه؟
وليه الظاهرة دي بقيت اشوفها؟ وكتير نسبيا، طب اول واحدة نموذج شاذ، تاني واحدة نموذج شاذ، تالت واحدة نموذج شاذين طب كل دول شواذ؟ فجأة كده حياتي اتملت بالشواذ؟ طب ما شفتش الشواذ دول في جيل امهاتنا ليه؟
فيه حاجة مش مظبوطة

ايه جو الحنان الاسري ده؟

عمرو والي ابن اخو يوسف والي استورد دايوثين مبيد بيسرطن الاكل، جه الداكتور سعيد عمارة رئيس لجنة المبيدات في وزارة الزراعة قال له ده بيسرطن مش ح نسمح لك تستورده، وكيل بقى الشركة المنتجة للدايوثين يبقى شريف الجبلي اخو حاتم الجبلي، قوووووووم سعيد عمارة اتألش وعمرو والي رفع قضية وكسبها عشان وزارة الزراعة ما قدمتش استشكال وماحدش من جيهاتهم قدم ايتها مستند يشرح مدى خطورة الدايوثين قووووم المحكمة حكمت لعمرو والي وشريف الجبلي تمم الصفقة وعمرو والي استورد الصفقة وعاشوا في تبات ونبات وخلفوا سراطين واشعاعات وتوتة توتة فرغت الحدوتة حلوة وللا ملتوتة؟
حلوة؟
عليكوا غنوة

كازينو الشجرة ونفسية المقهور

الا انا طول عمري عارفة ان كازينو الشجرة ما بيدخلش محجبات ولا رجالة بجلاليب ولا اصحاب عربيات نص كم ونفسية المقهور المتمكنة مني خلتني كنت باتعامل مع الموضوع ده انه امر واقع وخلاص ادي الله وادي حكمته
لحد ما اسامة غريب كتب مقال في المصري اليوم عن الموضوع ده ولقيت ان ده مش الله ولا دي حكمته، دي حكمة ساخب المخيل
وبيتساءل اسامة غريب: اشمعنى لما حنان ترك عملت ريستوران عنصري ما بيدخلش غير المحجبات - زي ما الصحافة كتبت وتبين بعد كده ان الكلام ده مش صحيح الريستوران بيدخل المحجبات وغير المحجبات والمسلمات وغير المسلمات هو بس ما بيدخلش رجالة - عملوا عليه هيصة وبوليكة وزيطة وزمبليطة في الصالون؟
واذا كان كازينو الشجرة ده على ارض مصرية باي حق ما يدخلش محجبات يعني تسعين في المية من نساء الشعب المصري؟ وعلي ايتها اساس ماحدش بيتكلم وبنتعامل مع الموضوع ده على اساس انه خلاص بقى كازينو الشجرة بيستحأرنا وما بيدخلش امات تشحجيبة وابوات جلاليب وسبح وحتى ما ينفعش تروح بعربية قسطها ربعميت جنيه طبعا اه والله الزبون لازم يعرفوا عربيته نوعها ايه عشان يدخلوه يعني ابو مية تمانية وعشرين ما ينفعش يروح.....بس مش عارفة ينفع تروح بالميكروباظ ولا لا؟
طب هل ايه؟ هل دي مش عنصرية؟ وطائفية؟ وطبقية؟ ووساخة؟
تحبوا نغير لكوا الشعب؟ وللا احسن لكوا انتوا تمشوا من هنا وتروحوا بلد اكسلانسات عشان احنا ناس جرابيع وبنلبس جلاليب وبنحط التشحجيبة وحتى اللي مش لابسة تشحجيبة مش عاملة شعرها مظنبليط وما عندناش والله اكسلانسات غيركوا
وانتوا خسارة في البلد الوسخة دي
سيبوها لشعبها الجربوع
جتكوا القرف سرقتوا البلد
الله انا مفقوعة قوي
البلد دي بلدناااااااااااااااااااااااااااااا
اللنك ده لصاحب كازينو الشجرة والعاملين بكازينو الشجرة ومرتادي كازينو الشجرة
انشالله تطفحوها يارب انشالله تطفحوا كل لهطة بتلهطوها من بلدنا ومن دمنا ومن شقانا يا ولاد الككككككككلببببببببببببب

المصري اليوم هو اللي كداب وللا مين بالظبط

المصري اليوم كتبت خبر عن الافراج مجموعة من اللي كانوا متخزنين في السجون بقالهم خمستاشر سنة لحد ما سنانهم وقعت وشعرهم شاب واللي جاله سل وخلافه، طيب الناس دي فيه منهم اللي الامن مسميهم "التوقف والتبين" مش عارفة دي كناية عن ايه بس ده الاتهام المتجهز لكل ابناء سواحل كفر البطيخ فيما عدا عصام الحضري ومنتصر الزيات بيقول ان ده اجراء كويس لانهم فعلا غلابة واتقبض عليهم ايام سياسة تجفيف منابع الارهاب اللي هي يعني اي واحد يروح الجامع يبقى مشروع ارهابي ومش ح نستناه بقى لما يبقى ارهابي احنا نخلص معاه اول باول
طيب الحقيقة بقى ان الاهالي عرفوا الخبر ده من المصري اليوم ومن ضمنهم اسرة نجيب عبد الفتاح اسماعيل اللي مفروض انه بيقولوا له انت رئيس تنظيم التوقف والتبين هههههههههههههه الاسم ده مسخرة على فكرة الظاهر صاحب التنظيم ده كان نظره شيش بيش فكان لازم يقف شوية ويدقق احسن يخبط في الحيطة
المهم ان نجيب بقاله خمستاشر سنة النيابة كل مرة تديله براءة من رئاسة هاذوها التنظيم ومن كل التهم المنسوبة اليه وكل مرة الامن يعمل له تجديد حبس
اهل نجيب لما قروا الخبر على المصري اليوم اتصلوا بالسجن قال لهم ولا جالنا ايتها خبر ولا عمرنا سمعنا بالكلام ده
ده حتى مرة مشوه من وادي النطرون عشان النيابة امرت بالافراج عنه وهو بيكمل اجراءات الافراج في قسم دمياط راحوا محتجزينه تاني وعملوا له تجيد حبس ده من كام شهر الكلام ده
طب ايه؟
هل المصري اليوم كداب؟ وللا الداخلية بتدي اخبار كدب؟ وللا دي نبوءة؟ وللا حد شاف حلم؟ وللا البني ادم ده ح يفضل كده طول عمره ياخد براءة ويتعمل له تجديد حبس؟
ياريت المصري اليوم تستوثق لنا من الموضوع ده وتسأل في الحكاية

ح نعمل ايه يوم ستة ابريل

دوقت يا سيدي لما انت عمال المحلة دعوا لاضراب شامل يوم ستة ابريل احتجاجا على الغلاء
الفكرة هايلة نظريا، خصوصا يا كابتشن انت وهو ما حدش عمل حاجة بالنوسبة للغلاء خالص، الناس بتموت بعض وفي الصعيد دوقت عاملين مخازن سلاح وبيعمروا الفرفر وهم رايحين طابور العيش واللي ما بياخدش عيش بيخبط الفران بطوبة في راسه ده بقى موروث شعبي حاليا دوقت
طيب اضراب شامل وعام
في حالة الاضراب الشامل والعام الدولة مش ح تقدر ترفد مثلا مليون عامل عملوا اضراب
لكن تقدر ترفد عشرتلاف عامل
بالنوسبة لنا احنا طبعا تمانين ماليون فيهم حوالي خمستاشر واحد يعتمد عليه بجد
طب هل ايه؟
يعني انا مثلا اقطع مناخيري ووداني لو حد عندنا في التلافزيون عمل اضراب
لا يستحيل ابدا
الاستعلامات ماحدش ح يعمل فيها اضراب
بتوع الضرايب العامة
ده غير كمان ان الدعوة للاضراب ما وصلتش المتكحرتين فعلا: يعني بتوع خدمات المعاونة والكير سيرفيس والناس اللي بالنسبة لهم الكشري بقى كفيار
طب هل ايه؟
وعلى رأي ام زينب مرات بابا، فجأة لقيتها قعدت جنبي وبصت لي كده: طب وبعدين يا نوارة
قلت لها وبعدين ايه يا ام زينب
قالت لي يعني اخرة الترنت كوم بتاعكوا ده والاستعصامات والحاجات دي...ح نفضل كده اللي معاه ياكل واللي معاهوش ما ياكلش؟
ما عرفتش ارد
الا صحيح اخرة الترنت كوم والاستعصامات ايه؟

حماس زعلانة عشان الامن عذب عيالهم

يا سلام؟ مفاجأة يعني؟ اول مرة تحصل مثلا؟
طب دولم من حماس، فيه واحد بقى فلسطيني صاحبنا من كام سنة، لا من حماس ولا ترباس جه مصر وكان عايش في لندن واستاذ جامعة بس البعيد فقري بيحب مصر ونفسه ياخد الجنسية المصري ويعيش في مصر، حلو؟ حلو، طول ماهو بيتعامل بالجنسية الانجليزي كان متشال على الراس فضل يحرب على خرابه ويسعى انه ياخد الجنسية المصري، اخد الجنسية المصري النهاردة بكرة جابوه في امن الدولة وفضلوا معلقينه شهر، وخرج نفسيته محطمة وانا حاولت افهمه انه هو كده اخد الجنسية المصري بالثلث بس هو ما اقتنعش وسافر وما جاش تاني
عناصر من حماس، ووقعوا في ايد الامن المصري، ح يتكلموا معاهم ازاي؟ يعني هم كانوا متوقعين ايه؟ ح يجيبوا لهم قهوة او شاي وكيك؟
ح ياخدوهم بالحضن ويغنوا اغنية زهرة المدائن؟
دي مصر يا عبلة اهلا وسهلا
تعالوا في اي وقت
امبارح قريت عند احمد عبد الفتاح انهم بيسألوهم عن شاليط وهنية بيستخبى فين
بس البي بي سي بتقول على لسان احد مسئولي حماس انهم بيسألوا عن مين اللي ضرب الحدود والتخطيط لخطف او قتل عناصر من فتح
الحقيقة البي بي سي لها حق تستغرب بس احمد عبد الفتاح مالوش حق ابدا يعني ومستغرب كأن دي عذرية الحرية المصرية انتهكت!!! ايه يا احمد بيتكلموا معاهم يعني ياخدوا ويدوا في الكلام مافيش حاجة ده شوية صعق بالكهربا على كام بونية على كام امك وابوك حاجات بسيطة يعني مراعاة لظروفهم والازمة اللي هم فيها ما رضيوش يتقلوا عليهم في الاسئلة
كلمتين كده خفافي
واسامة سرايا بيقول ان حماس بتشوه سمعة مصر وبتقول كلام مالوش اساس من الصحة
:) الراجل ده لطيف موت، ليه كده يشوهوا سمعة مصر صحيح؟ ماهي قلة ادب فعلا، يعني هي دي اول مرة الامن المصري يعذب فلسطينيين؟ وبعدين هم احسن مننا في ايه؟ هم بس ما بيفهموش اللهجة المصري، ده مش تعذيب، يعني الراجل ما يشوفش شغله؟ ثم يعني ما الامن بتاعهم بيعذبهم، واسرائيل بتعذبهم والعالم كله بيعذبهم اشمعنى بخلانين على الامن بتاعنا؟ مالوش نفس يعني؟ وللا ما يشبهم اسرائيل والامن الفلسطيني والسي آي إيه؟ اشمعنى امننا يعني؟ تف عليه الكلب؟ اما قلة اصل صحيح، هم الفلسطينيين كده قلالات اصل، بقى نفتح لكوا الحدود ونبيع لكوا اكل، صحيح الضعف ضعفين، بس كفاية مقابلتنا الحلوة يعني لاقيني ولا تغديني، وبعد ده كله لما الامن يتكلم معاكوا كلمتين تفضحونا كده وتتكلموا علينا؟ يعني ده احنا اتقفل علينا وعليكوا باب واحد، يصح كده اللي يحصل في اود التحقيق يطلع للغرب؟ ده المفروض حتى لو امك سألتك ما تردش
قلة ادب
ياللا يا شباب معلش حقكوا علينا...ما تبقوش بس تتعشموا احنا قلنا الكلام ده قبل كده وانتوا اللي صممتوا

لولولولولييييييييي ربنا ما يفرح حد واحنا حزانى

والله المثل المصري الوضيع ده ما فهمتوش غير لما قريت الخبر ده
امريكا على شفا كساد اقتصادي ومعدلات نموها في نزول ومتوقع ان النمو يبقى واحد من عشرة في المية...ييجوا ايه دولم جنبنا احنا اللي عندنا معدلات النيميو وصلت لسبعة وتمانية في المية على حسب كلام الضاكتور نظيف اللي نظف البلد من كافة شيء لا اكل ولا جاز ولا حديد ولا زرنيخ حتى ننتحر بيه، حتى البترول يعني لو حد حب يولع في نفسه مش ح يلاقي الولعة
طبعا جورج بوش بيتوعدنا انه يحل المشكلة، ح يحلها ازاي يعني؟ ح يطلع حبابي عنينا احنا طبعا عشان احنا الحيطة المايلة هلبت ما العالم العربي وخاصة مصر اتحملوا الازمة الاقتصادية اللي اتكعبلت فيها اموركا بعد حداشر سبتمبر بس الحقيقة نأب الكابتن بوش على شونة المرة دي لسبب بسيط ان وقت ما حكوماتنا حملتنا الازمة الاقتصادية عشان تنقذ اموركا كان حيلتنا اللضا حاليا دلوقت باطنا حتى مش محصل النجم يعني يا واخد السمنة من العرب حرمت عليك الهمبورقع عشان يبقى بوش واذنابه يكحتوا فينا لحد ما يطلعوا المحارة براحتهم اهو اتوكسوا ومش ح يلاقوا العبيد يشيلوا حاجة
وللا ح نشيل برضه
بس فرحت والنبي...فرح شرير كده ومليان حقد وغل وسواد، عارفين البيني ادم لما يبقى اسود من جواه من كتر ما دقت على راسه طبول، يبقى مش هامه حاله يتحسن، او بالاحرى ما عندوش امل يتحسن، بس كل امله ان اللي عمل فيه كده يتوكس زيه
يا سلاااااااااااااام لو اشوف الامريكان بيتخانقوا على طابور العيش وبيزألوا بعض بالطوب
ده كده يبقى فضل وعدل ومش عايزة حاجة من الدنيا
انا ما عنديش طمع ولا امل اننا نبطل نجوع انا كل املي ان اللي جوعونا يجوعوا معانا عشان ناخد ثواب الجماعة

شفتوا النيو لوك الجديد؟

ده بمناسبة مولد النبي وعيد الام وعيد الشرطة وعيد تحرير سينا
شوية تجديد
بس ماحدش يلزق في الحيطة
احترس من البويا

اتفرجوا على بلطجية عمرو خالد

واحد كاتب لي التعليق ده:

أببوح said...

يعنى انت مش ناوية تطلعى عمرو خالد من دماغك
ما تلمى نفسك يا بنت نجم لحسن قسما عظما أسلط عليكى العيال اللى دمروا وائل عباس و خلوه يعتزل التدوين

March 20, 2008 6:34 PM

يا ماشاء الله
وكمان الداعية المبتسم دوما المقبل على الحياة بلا مبرر بيأجر بلطجية على اي حد يهاجمه وبيعترفوا انهم تسليط عمرو خالد وبيعترفوا ان الهجوم الشرس اللي على وائل عباس ده والخوض في عرضه والمدونة اللي معمولة له مخصوص من تصنيع بلطجية عمرو خالد عشان وائل قال رأيه في الداعية المليونير
بانت يا وائل بقى ما تقعدش تضرب اخماس في اسداس وتسأل مين اللي بيعمل كده
طب اما نشوف انا وللا الاضيش عمرو خالد صناع البلطجة