Friday 9 December 2011

المجد للشهداء

كلمني مالك عدلي وقال لي ان اسماء محفوظ اتصلت بيه وطلبت منه اننا نعمل مجموعة عمل لحصر كل اسماء الشهداء بالكامل، واستشهدوا ازاي، وحالتهم الاجتماعية، واسرهم، يعني نعمل حاجة زي بيبلوجرافيا لشهداء محمد محمود وشهداء مصر من يوم 25 يناير، طبعا تحمست للفكرة جدا واجتمعنا وحضر عدد من الشباب اللي متحمسين للفكرة وقررنا اننا الاول نحط تعريف للشهداء وهو كل من قتل على ايد النظام في احداث الثورة، سواء كان بيتظاهر، او بيقوم بعمل ثوري زي اقتحام الاقسام (لو اقتحام الاقسام عمل بلطجة يبقى اقتحام سجن الباستيل في الثورة الفرنسية كان بلطجة.. الحقيقة تبقى الثورة الفرنسية كلها عبارة عن عمل بلطجة من اوله لاخره)، او قاعد لا بيه ولا عليه واتقتل من النظام زي المساجين اللي اتقتلوا اثناء عملية فتح السجون، او واحد ماشي في الشارع ومش بيتظاهر ولا بيعمل حاجة واتقتل من غير ذنب. 
احنا ابتدينا من الآخر للأول، يعني بنحاول نجمع اسماء شهداء محمد محمود، ما عرفناش نوصل غير لسبعة وخمسين اسم، المستشفيات الميدانية في ميدان التحرير بتقول انها طلعت 88 جثمان، وفيه مستشفى ميداني بتقول انها طلعت 27 شهيد الاسعاف اخدتهم ومش عارفين ودتهم فين، لا وصلوا المشرحة ولا راحوا اي مستشفى، ده غير الجثامين اللي كان الامن بيسحبها اثناء معركة محمد محمود، حاولنا نتحصل على اسماء الشهداء من مصلحة الطب الشرعي فحدث الآتي:
اسماء محفوظ راحت مصلحة الطب الشرعي عشان تطلب الاسماء فدخلوها على واحدة اسمها ماجدة قالت لها: انت جاية تسألي على الـ980 جثة انا عارفة.. بس انا ما عنديش غير 43 بس، بيقولوا عليا اني مع المجلس العسكري، بس انا مش مع المجلس انا مع شغلي. اسماء قالت لها: انا مش جاية اسأل على الـ980 جثة انا جاية اطلب قائمة باسماء التلاتة واربعين دول، فقالت لها: طيب فين اذن النيابة؟ فاسماء قالت لها: لا انا جاية اطلبها ودي كده، فقالت لها: يعني عايزة تديني رشوة؟ فاسماء قالت لها: انا جبت سيرة رشوة؟ فالست ماجدة قالت لها: انتوا مش عملتوا ثورة وعايزين البلد تمشي صح؟ هاتي اذن نيابة.. ولعلمك مش كل التلاتة واربعين دول شهدا، احنا اتخانقنا مع اهالي عشان عيالهم كانوا ميتين في حاجات تانية في نفس اليوم وعايزين يحسبوهم شهدا، والتلاتة واربعين دول فيهم اشكال بلطجية ما يجيبوش شهدا خالص...
واخيرا ادتها رقم لدكتور في الطب الشرعي عشان يقولها على الاجراءات اللي تجيب بيها الاسماء، ولما اسماء سألتها هو حضرتك اسمك ماجدة ايه؟ قالت لها اعملي سيرش على اسم ماجدة الطب الشرعي وانت تعرفي كل حاجة عني ما انتوا بتهاجموني في الجرايد 
ههههههههههههههههه لا الحقيقة الست ما تستاهلش الهجوم ولا حاجة.. دي فلة، بتشتم ناس ميتين بطلق ناري وتقول عليهم اشكال، شكل الميتين مش عاجب الست ماجدة
بس فيه نقطة مهمة في كلام الاستاذة ماجدة، ان فعلا فيه شهداء وهي ما رضتش تكتبهم شهداء عشان شكلهم مش عاجبها، هي اللي قالت انها اتخانقت مع الاهالي واتهمتهم انهم بيدعوا ان عيالهم مقتولين في محمد محمود... معلش يعني واحد جايب جتتة ابنه مضروبة بالنار، تفتكر يعني حيقعد يخطط انه يكتبه مقتول في مكان غير المكان اللي اتقتل فيه؟ هو في ايه ولا في ايه؟ وايه المصلحة؟ اهالي شهداء محمد محمود كلهم خاضعين للتهديد دلوقت، والناس خايفة جدا لان حاسة ان مدام اللي قتل عيالها جيش يبقى مافيش امل ياخدوا حق ولا باطل، والناس كلها عارفة كده؟ فيه حد حيجيب المشاكل لنفسه؟ دول ما رضيوش يطلعوا جنازات عيالهم من التحرير من كتر ما هم خايفين، لو فيه حد من الاهالي حاول يزور يبقى حيحاول يكتب ان ابنه ماماتش في التحرير عشان يخلص من وجع الدماغ والتهديدات اليومية، مش العكس، انما الاستاذة ماجدة بتقول انها ما رضتش تكتب البلطجية شهداء وده معناه ان الجثة اللي شكلها مش شيك الست ماجدة ما كانتش بترضى تكتبهم شهداء.. وعلى رأي عمرو مصطفى: باعترافهم باعترافهم
عموما رقم 980 ده انا حاسة انه مبالغ فيه قوي، العدد كبير، ويمكن اكتر بكتير من ال88 اللي طلعتهم المستشفيات الميدانية لان فيه جثامين كتير سحبها الامن اثناء المعركة، ده غير ان كل يوم فيه مصاب بيموت، فممكن العدد يوصل ل200 او 300، ومع ذلك مش عايزين نسبق، حندور عليهم وحنجيبهم ان شاء الله
بس كمان احنا فكرنا في اننا نعلن في كل حتة، بعد ما نبذل احنا الجهد المرضي من ناحيتنا، ان اللي ابنه مختفي، او يعرف انه مقتول، واي حد عنده فيديوهات، او صور، او معلومات سواء عن استشهاد بعض الناس قدامه، او انتهاكات من قبل السلطات، او اي حاجة، اي معلومة ولو صغيرة واي وثيقة ولو تافهة، يتصل بينا، الموقع الالكتروني تحت الانشاء، وخطوط التليفون ان شاء الله تبقى جاهزة قريب وعملنا الميلات اللي الناس ممكن تراسلنا عليها

MartyrsGlory@Live.Com
MartyrsGlory1@Live.Com
فيه ميثاق للمجموعة دي، والميثاق المفروض حيكتبهولنا الدكتور تميم البرغوثي، وفيه مستندات بالشهداء حيجيبها لنا مالك عدلي
اللي خلاني بس اتكلم عن الموضوع بدري قبل ما نجهز بكل حاجة اننا محتاجين مساعدتكم
اي حد عنده فيديوهات فيها اطلاق نار او اعمال عنف من قبل قوات الامن والجيش يا ريت يبعتها لنا على الميلين دول 
--------
حاجة اخيرة... انا حانزل قائمة الاسماء اللي حصرناها، غير انكم تحتفظوا بيها، انا طالبة منكم انكم تسلموا على اسم اسم وتترحموا عليه ولو مسلم تقرا له الفاتحة ولو مسيحي تصلي له، وحتشوف، وعلى ضمانتي الشخصية، البركة اللي حتحل عليك لما تعمل كده، انا باقول لكم حاجة مجرباها، ومش لازم احكي تفاصيل، بس انا لما عملت كده حصلت لي حاجات غريبة جدا جدا جدا جدااااااااااا، لدرجة اني بقيت ماشية اكلم نفسي وابص على قائمة الاسماء واقول: مين دول؟ انتوا مين يا عم؟ انتوا مين؟ 
والله العظيم.. جرب كده تعمل اللي انا عملته وحتشوف بنفسك: السلام عليكم يا فلان ورحمة الله وبركاته، وتقرا له الفاتحة او تصلي له.. ولما تعمل كده قول لي حصل معاك ايه
القائمة لشهداء محمد محمود بس اسم احمد سرور فيها مع انه في مجلس الوزرا بس باعتبار انها كمالة لنفس المعركة
كمان فيه راجل في الاخر عنده 57 سنة استشهد بالاختناق، ده ما كانش جاي يتظاهر، ده كان جاي يدور على ابنه
شهداء محمد محمود :
1- محمد الحسيني البرعي
2-محمد السيد محمد عبد الفتاح
3- محمد بشر انور
4- محمد بشير تهامي
5- محمد نبيل ربيع شحاتة
6- محمد سعيد امام
7- محمد سمير رمضان
8- محمد صلاح محمد
9- محمد عبد النبي عبد الغني مصليحي
10- محمد محمود
11- مصطفى محمد عبد المنعم
12- مصطفى محمد عمر السيد
13- منتصر مكرم عبد الرحمن
14- احمد سيد سرور
15- يحيى زكي
16- شهاب احمد السيد
17- احمد البدوي
18- د. محمد قناوي
19- سيد خالد سيد
20- سيد جابر محمد سليم
21- شهاب الدين احمد ابراهيم الدكروري
22- عادل امام جاد كريم
23- عاطف محمد داوود
24- عاطف محمد محمد عوض
25- عاطف محمد محمد فاروق
26- عبد الخالق السيد عبد الخالق
27- عبد الرحمن عبد الحميد سيد علي
28- عزت عبد الواحد 29- عصام السيد صابر
30- علي صلاح خضر
31- عمرو محمد احمد عبد الخالق
32- عمرو محمد البحيري
33- عمرو محمود محمد
34- ماجد يوسف
35- محمد احمد السيد العباوي
36- ابراهيم سليمان محمد سليمان
37- ابراهيم عبد الناصر قطب
38- احمد سمير احمد رمضان
39- احمد صديق
40- احمد طارق
41- احمد عبد الرؤوف
42- احمد فاروق حسين
43- احمد محمد احمد عبد العليم
44- احمد محمد عبد الحميد
45- احمد محمود احمد
46- ايمن احمد عبد الرؤوف
47- بدري حمد بدري
48- حازم
49- حازم مشحوت محمد ابراهيم
50- حسام السيد صابر
51- حسام حمدي خليفة
52- محمد انور محمد عبد الله
53- احمد محمد محمد عبد الحميد
54- ايمن محمد احمد عبد الحليم
55- فراج محمد أحمد سليمان عوض السن: 57 عاما مكان الوفاه: ش محمد محمود / ميدان التحرير التاريخ: 23/11/2011 قضية: 9793 لسنه 2011 قيدت: سجل مدني قصر النيل تاريخ: الأربعاء 27/11/2011 رقم: 325 جهة الأصدار: صحة قصر النيل محافظة القاهرة سبب الوفاه: توفي متأثرا بالأختناق نتيجه القاء قنابل الغاز والمسيل للدموع بكثافة بالشارع المذكور وهو عامل ببنك ناصر ويعمل بعد الظهر بعياده خاصة في الشارع المذكور اول المكالمات لأهله كانت من قيادي بالداخلية وأبلغهم خالص التعازي والمساواه والتأكيد علي حق الشهيد
56- حسام مصطفى المصرى التاريخ : 6\12\2011 توفى فى المستشفى بعد احداث مجمد محمود 
--------
تاني.. اي تنتوفة بخصوص احداث عنف ارتكبت من السلطات يا ريت تبعتها لنا، ولو فيديوهات او صور ابعت وانت مغمض
بالنسبة للدكتور احمد معتز اللي اكتشف المواد المسممة اللي مات بيها الجثث.. الدكتور ده حسب ما عرفت انه مهدد، وواجب علينا اننا نحميه كلنا لحد ما يكمل اركان القضية

14 comments:

أحمد عتمان - Ahmed Etman said...

انا عارف انك مابقيتيش فاضية تكتبي تدوينات كل يوم لان زمن التدوين و جهاد الكيبورد انتهى و زمن جهاد الشوارع و الميادين بدأ، بس انا قاعد هنا في كندا و عمال اقرا كل يوم اخبار و قرف من كل وادي و من كل لون، و حبيت بس اقولك اني مفتقد جدا تدويناتك و تحليلاتك
روحي يا بنت نجم، ربنا ياااااا رب ينولك اللي في بالك و يتقبل منك و ينصركم كلكم يااااا رب

utopia said...

المجد للشهداء ولعنة الله على قاتليهم
جعل الله مجهودك فى ميزان حسناته

Imanh said...

يارب نقدر نكمل ثورتنا عشان ده رد الاعتبار للشهدا بجد حتي لو العسكر خبوا جتتهم في مقابر جماعيه في الصحرا،هيبقوا راضين وفرحانين وشايفنا حتي لو احنا مش لاقين جتتهم او مانعرفش حتي انهم استُشهدوا،وحسبي الله ونعمي الوكيل

biber boy said...

ربنا يرحمهم رحمة وساعة ................ وحشتينا

mohra said...

ماجده هلال دى ظهرت مع يسرى فوده قبل كده و الكلام انها كانت مظلومه من السباعى و انها ست محترمه و كده

AbOHaNi said...

أنا مكملتش التدوينة لما قريت إن إقتحام الأقسام عمل ثورى
عمل ثورى لما تبقى الثورة مسلحة مش لما تبقى ثورة سلمية فى ظروفنا يعتبر عمل غبى أو إجرامى و السؤال هو هل نثور ضد عساكر و ظباط يتلقون الأوامر أم نثور على من يعطون الأوامر ؟

المواطن مصري said...

حمدالله ع السلامة يا نوارة
ربنا يعينكم و يقويكم في حصر اسماء الشهداء
بس طبعا اكيد مش هتنسوا شهداء باقي المحافظات لأن في احداث 19 نوفمبر فيه شهدا ماتوا في اسكندرية و المنيا او اسيوط على ما اتذكر
اكيد هتذكروهم تباعا و ربنا يوفقكم
انا بس اللي محزني حاجة ان الناس دي اغلبها شباب ما شافوش لسه الدنيا و حلاوتها( لو كانت حلوة اصلا) لكن عزائي الوحيد انهم في الجنة و نعيمها و حلاوتها الابدية
اعتقد اني لازم احزن علينا لأننا لسه عايشين :'(

helal said...

سلام الله علىك وعلى شهداء الثورة
اختي نوارة انا شايف ان الوقت حان ان يكون فيه قائد للثورة والمجموعات الثورية اللي في الميدان اعتقد ان علاء الاسواني هو المناسب او اي حد تتفقوا عليه

helal said...

سلام الله علىك وعلى شهداء الثورة
اختي نوارة انا شايف ان الوقت حان ان يكون فيه قائد للثورة والمجموعات الثورية اللي في الميدان اعتقد ان علاء الاسواني هو المناسب او اي حد تتفقوا عليه

abumazen said...

الله يباركلك يا نوارة على كل اللى بتعمليه ودفاعك عن حق الشهداء وانا عارف انه ده واجب عليكى ولا تستحقين عنه الشكر منا نحن البشر ولكن الجزاء من الله سبحانه وتعالى .....وحسبنا الله ونعم الوكيل فى قتلة الشهداء ومن يتسترون عليهم واخرهم قناص العيون اللى الداخليه بتديله صك البراءة

abumazen said...

المجد للشهداء والسلام على كل شهيد والفاتحة على ارواحهم جميعا وهو المنتقم الجبار سيرينا اياته فى العالمين

Unknown said...

نواره ممكن تكلميني
انا ومجموعة شغالين على نفس الفكرة
محمد علي
قريبك من عيلة نجم (انضرب علينا نار سوا فوق سطوح نقابة الصحفيين أيام الثورة واتقابلنا في مولد الجازولي)
01228528552

Amal Egypt said...

يا نوارة .... أنا ممكن أساعد إزاي؟ إحنا عندنا كارم محمود من نقابة الصحفيين وبعد التنحي بدأ في جمع بيانات الشهداء والمصابين لمتابعة الحالات، وأنا عندي مجموعة من المهتمين يتمنون التواصل مع أهالي الشهدا والسؤال عنهم، وممكن يكون ده مشروع بمثابة أكفل أخ لشهيد أو عائلة شهيد ولو من باب المتابعة والتواصل والسؤال.

salem elkotamy said...

SALEM ELKOTAMYسالم القطامي said...
مبارك مازال يحكمنا،من خلال تنازل صوري عن الحكم،في إطار صفقة مشبوهة،مع عسكر سوزان وإسرائيل،غلمان مبارك مازالوا في مواقعهم،مافتئوا يمجدون في كبير أصنامهم،هناك صفقة دنيئة تمت في الخفاء،مابين الخائن،والأخون من جنرالاته،الطنطاوي،سليمان،عنان،شفيق،موافي،لكل ثورة سبب أما فى حالة الثورة المصرية، فهناك ألف سبب، من بينها حكم الرجل الواحد الذى استمر لثلاثين عاماً، وخطط مبارك لتوريث الحكم لابنه، والفساد المستشرى والمحسوبية والمحاباة والإصلاح الاقتصادى، الذى لم يستفد منه غالبية المصريين، لكن ذلك يتناقض بشكل حاد مع الغياب شبه الكامل للتغيير السياسى.فتيبس عقل مبارك،ومميوة ،من مومياء،جسده وشيخوخة بطانته،أعاقته عن فهم إرادة الشعب،وعن إستحالة التوريث،وعن تعزيب،من عزبة،مصر،وشخصنة ملكيتها لأسرة مبارك الحقيرة الوضيعة،التي عهرت بإستزناء السلطة بالثروة،فولدت نغلا إسمه الفساد،والإستبداد،والإستعباد،الثورة يجب أن تستمر،إذا لم يتم القبض على آل مبارك،وعصابتهم،وحاشيتهم،ونظامهم الذي يجب إقتلاعه من جذوره!!!سالم القطامي

17 February 2011 13:58
SALEM ELKOTAMYسالم القطامي said...