Sunday 9 October 2011

د.صفوت حجازي كلمني

صحيت الصبح لقيت تليفون من الدكتور صفوت حجازي والمكالمة كانت بخصوص التصريحات بتاعته
انا حانقل لكم المكالمة زي ما هي، هو قالي:
بصي يا نوارة انا باتشتم ليل نهار ومش بيهمني وفيه ناس قليلة تهمني انت منهم عشان كده كلمتك، الموضوع اللي انا قلته ده معروف لكل الناس هو انت مش عارفاه؟
انا: لا يا دكتور مش عارفاه ومش عايزة اعرفه.. وانا شايفة ان الكلام ده ما يلقيش بقيمتك ومش موفق
هو: انا عارف اني غلطت اني قلت كده، وعارف انه كلام مش موفق، بس انا تعبت، انا مش باقعد في البيت، ومش عايز حاجة من حد، ومش حاترشح، ولا حاقبل مناصب، وعايز لما الثورة دي تخلص اروح اقعد في المدينة المنورة واريح دماغي، انا بقيت متهيالي اني ارمي التليفون ده، فيه مجموعة معينة ما وراهش غيري، ووصل الامر انهم يقدموا فيها محاضر وبلاغات كاذبة ان صفوت حجازي تعدى علينا بالضرب، وانا العيال دي عارفها بالاسم، وعارف هم ايه؟ وعارف الاحزاب اللي بتاخد فلوس من الجيش، وقلت ان فيه احزاب بتاخد فلوس من الجيش في نفس الندوة دي وماحدش بروز الكلام ده، ولا حد قال اني قلت اننا مش حنقبل حاكم عسكري لمصر، كل اللي بروزوه الكلام التاني اللي قلته، انت ما تتخيليش الضغط على اعصابي عامل ازاي، واتهامات على طول، وتخوين على طول، وانا عندي بيت واسرة وبناتي بيعيطوا لما بيشوفوا الكلام ده عن ابوهم، ويجنني بقى لما الاقي الكلام ده من ناس انا عارفهم، وعمري ما حاقول اسماءهم بس انا عارفهم وعارف هم ايه.. ويوم 8 ابريل وقعوني وكان هدفهم الاغتيال، ويوم صلاة العيد تعدوا عليا، وعلى طول يطلعوا في الاعلام ما وراهمش غير صفوت حجازي، هو صفوت حجازي ده مش بني ادم؟ ما بيحسش؟ ما بيغلطش؟ انا باحاول اعمل اللي اقدر عليه لله وللبلد ومش عايز حاجة ومش عايز حاجة ومش ناوي اقبل اي مكافئات دنيوية، بس انا بشر، وليه التصيد اللي على طول ده؟ وليه لما اقول حاجة كويسة تتخفي والاعلام ما يركزش عليها، ولما اغلط تنزل مانشيت؟ وكوني غلطت اتشنق يعني؟ طب هم ياما خاضوا في عرضي وقالوا عني كلام سافل كتير.. هه.. ماحدش اتكلم ليه ولا قال حاجة ولا دافع عني؟
------------------------------
بصوا بقى... انا فاهمة تماما اللي هو بيقوله.. تماما
وفاهمة الضغط النفسي اللي واقع عليه، وفاهمة احساسه بصراحة، وفاهمة يعني ايه الواحد يبقى طالع تلاتينه في الحياة ويلاقي عيال رمم وزبالة عمالة تزايد عليه، وانا بصراحة عمري ما كلمت صفوت حجازي على غفلة ولقيته في بيتهم ابدا، وعمري ما رحت في حتة ولا كلمت مصاب ولا محبوس ولا منكوب ولا ابو شهيد الا ولقيته وهو بيشتكي لي يقول لي: والله لولا صفوت حجازي كان زمانا مش لاقيين ناكل..والله صفوت حجازي اللي جاب لنا المحامي، والله صفوت حجازي هو اللي دخلني المستشفى
دي شهادة لوجه الله واللي مش مصدقني ينزل بنفسه يروح للمصابين ويجيب قدامهم سيرة صفوت حجازي، ولا يروح يزور اللي مقبوض عليهم في المحاكمات العسكرية ويجيب سيرته، حتى الناس اللي هو مش موافق على مواقفهم زي ظباط 8 ابريل، بيروح لهم برضه
ايه بقى اللي بيخلي الناس تبقى عدوانية عليه؟ ان ناس تانية برضه بتعمل شغل ومجهود ويفضلوا يقولوا لي: يعني هو ماحدش انضرب في الميدان غيره؟ هو ماحدش وقف مع المحابيس غيره؟ هو ماحدش وقف مع المصابين غيره؟ ماحدش ماسك ملف الشهدا غيره؟
لا فيه ناس كتير عملت حاجات غيره.. بس هو اللي بيتشتم مش هم، منى سيف ومالك عدلي واحمد سيف واحمد حلمي وغيرهم بيعملوا حاجات كتير للمقبوض عليهم والمصابين واهالي الشهداء، بس ما سمعتش حد بيشتمهم، ولما بتيجي سيرتهم بيشكروهم، ناس كتير كانت حتموت في الميدان، ومالك مصطفى مثلا انا برضه كنت باشوفه على طول وهو اول ما يشوف ضرب يجري عليه، يشوف رصاص يجري عليه، بس ماحدش بيشتم مالك مصطفى
بطلوا تشتموه وانا ابطل ادافع عنه
بطلوا تشتموه وهو يبطل يقول تصريحات مرة تصيب ومرة تخيب
وانا فاهمة والله يعني ايه الواحد يتعب ويزهق ويحس انه بيحفر في بحر وانه بيتعامل مع اشكال قليلة الاصل لحد ما يغلط غصب عنه، فاهماها تماما.. اذا كنت انا الفسلة اللي ما باعملش نص اللي هو بيعمله بابقى عايزة اولع في الناس ومرة اتخانقت مع واحد كاتب على التويتر: انا في المسيرة ومش شايف نوارة
قلت له: ونوارة مش نازلة تاني خالص بقى.. لك عندها حاجة؟ انت مش ابويا عشان تفتش عليا.. هو انا الدادا بتاعتكم؟ اشمعنى انا اللي باتعامل كده؟ اقعد في الاعتصام في الصينية يقولوا طالعة تتصور، اخش الخيمة يقولوا هي جاية تعتصم ولا تنام في الخيمة، اكنس الميدان يقولوا بتستعرض، اسيب ام المقشة واقعد يقولوا فاكرة نفسها اميرة ومشهورة وهي تقعد والناس تخدم عليها، وتنزلوا المسيرات تدوروا عليا؟ انتوا نازلين المسيرة عشان حاجة مقتنعين بيها ولا عشان تفتشوا عليا وتشوفني نزلت ولا لا؟ اشمعنى ماحدش بيدور على بلال، ولا على ابراهيم عيسى، ولا على الحملاوي، ولا على رشا عزب، ويوم ماحد يشوفهم يبقى كتر خيرهم انهم نزلوا، وانا كنت الخدامة يعني ولا ايه مش فاهمة؟ والناس قعدت تقولي: معلش يا نوارة ما يقصدش.. ده من العشم.. وانا برضه غلطت نفسي اني اتكلمت كده، هو ما قالش حاجة لده كله.. الجدع بيدور عليا محبة يعني.. بس الضغط العصبي بيخلي الواحد اعصابه تفلت
وبمناسبة بقى بلال وابراهيم عيسى، اول ما يختلفوا معاكم يبقى بلال وابراهيم عيسى باعوا نفسهم.... انا زهقت على فكرة
زهقت قوي.. زهقت من قلة الاصل والمزايدة واللي يوضيكم زي اللي ينجسكم.. بلال وابراهيم ايه اللي حيبيعوا نفسهم؟ ايش حال ما شفتهم سنة 98 وهم بيتقاسموا سندوتشات الطعمية وبيرموا على بعض حساب القهوة زي فيلم المنسي لما عادل امام قال لاحمد ادم: انا جبت لامك ازازة زيت الاسبوع اللي فات حاسب انت حساب القهوة بقى... وكان جرنالهم مقفول وطالع عينهم ومش لاقيين يدفعوا الايجار ولو كانوا قالوا يا بيع ساعتها كانوا لقوا الف شاري.. ما عملوهاش وهم مش لاقيين ياكلوا حيعملوها دلوقت؟ وهو كل عيل اهطل نزل له يومين افتكر نفسه صلاح الدين الايوبي وحيفضل يزايد على ام الناس وينصب لهم محكمة؟ 
خلاص.. صفوت حجازي قال تصريحات مش موفقة من كتر الضغط وهو حاسس انه غلط... ندبحه على العيد؟ ندبحه على العيد وننسى ان راسه كانت مفتوحة في الميدان وما رضيش يخيطها ولبس عليها حلة وراح وقف تحت تمثال عبد المنعم رياض يشاور للقناصة عشان يضربوا عليه
هو لوحده اللي عمل كده؟
لا مش هو لوحده اللي عمل كده... بس هو لوحده اللي مشهور ومعروف وشجاعته في الاقدام على الموت شجعت شباب كتير من اللي بيثقوا فيه.. وهو لوحده من ضمن المشاهير اللي ما كانش بيرضى ان "مريديه" يحاوطوه ويعملوا له بودي جاردز زي ما بنشوف مع بقية المشاهير، وكان بيزقهم ويجري على الضرب وده كان بيشجع شباب تاني، يعني اخد ثواب نفسه وثواب غيره من الشباب اللي بيحبه واتشجع لما لقاه بيعمل كده، وهو لوحده من المشاهير اللي كان بيتخانق مع الناس اللي بتقوله: خليك انت يا دكتور صفوت ورا، ويمكن اول مرة يشتم قال: ينعل ابو الشهرة انسوني سيبوني ماحدش له دعوة بيا
التصريحات اللي قالها دي غلط، وما يليقش انه يقولها، وبتحط ناس كتير ابرياء في دائرة الاتهام، وهو قالها بسبب الضغط العصبي اللي عليه وانا بصراحة فاهمة قوي موضوع الضغط العصبي، الشهادة لله انتوا تكرهوا الواحد في عيشته وتندموه على انه عمل خير في حياته ولو تعرفوا في القعدات الخاصة فيه ناس وصل بيها الامر انها تقول: والله مبارك كان معذور.. ده ايه القرف ده؟ 
ولا فيه ام تمييز وبالظبط بالظبط اللي يوضيكم زي اللي ينجسكم، واللي ما بيعملش حاجة غير الرغي الفارغ وتفريق الصفوف واحنا عارفين عنهم حاجات مش عايزين نقولها تعملوهم عجل ابيس وتقدسوهم واياك حد يتني لهم كلمة، واياك حد ينتقد اي حاجة بيقولوها، وعمالين تألهوهم واحنا عارفين دواخلهم وعارفين اتصالاتهم بالجيش وعارفين الاعيبهم واتصالاتهم بالسفارات كمان ومش عايزين نتكلم، وعشان ما بنتكلمش انتوا عاملينهم آلهة وماحدش يقدر يقول عنهم حاجة مع ان مواقفهم باينة، وتمشوا وراهم وورا طراشهم ولما يعكوا الدنيا تختلقوا لهم اعذار.. مع ان ابسط حاجة الناس دي قاعدين في بيوتهم يعني عمرنا ما شفنا لهم نزلة ولا بهدلة ولا نيلة، وهرابين من المواجهة كمان... واللي يتفانى بجد ووارد انه يقع في الغلط زي اي انسان تطلعوا ميتين اهله لما حاجة بقت تقلب البطن.. ماهو طبيعي اللي ما بيعملش حاجة ما بيغلطش واللي بيعمل عشرين حاجة وارد انه خمس حاجات تفلت منه... ايه؟ وطبيعي انه لو بيعمل عشرين حاجة تتفق معاه في تلاتاشر حاجة وسبع حاجات تختلف معاه فيهم، تسيب التلاتاشر حاجة وتمسك في السبع حاجات وتخونه كمان عشان مش متفق معاك؟
بس ده حال الدنيا.. حنعمل ايه؟ الصبر.. الصبر
هم يعني الناس اللي بتشتم دي احسن من سيدنا علي اللي قالوا له: انت على الحق، تقبل حلول وسط ليه؟ انت كافر.. يالا توب بقى وادخل الاسلام
ماهو التاريخ فيه الفئة الباغية اللي كسبت الدنيا.. واللي اعتزلو وقعدوا مالهمش اي تلاتين لازمة في الحياة غير يرغوا وطبعا كفوا نفسهم شر الناس وماحدش اتعرض لهم لانهم حزب كنبة.. والفئة اللي على الحق ودي الفئة الوحيدة اللي اتشتموا وكل واحد فيهم مات مقتول
هو ربنا عايز كده
بس برضه نتعلم من سيدنا علي.. صحيح ماحدش فينا زيه مهما حاولنا، وبرضه البني ادمين ضعفا، بس هو اتشتم على المنابر واتكفر واتقال عليه كلام اوحش من ده كله وما وقعش نفسه في الغلط وقبل ما يتكلم كان بيحسب كل حرف طالع منه.. نحاول على قد ما نقدر، وده اللي انا قلته للدكتور صفوت، يحاول على قد ما يقدر انه يمسك نفسه، ولو لقى نفسه مرهق قوي يرتاح 48 ساعة بس.. ده ما بيهمدش خالص.. خالص.. ده زمان مراته وعياله بيدعوا على الثورة دي، والضغط ده والارهاق ده هو اللي وقعه في الغلط.. هو مش عيل صغير على البهدلة دي وكمان قلة ادب
وانا مش حاشهد شهادة زور عشان اعوم على عوم الناس واراضيهم على حساب الحق، ومش حامسح مساهمات بني ادم وبطولاته عشان قال تصريحات غلط، الغلط يتقال عليه غلط بمعزل عن تشويه الشخص، وهو معترف انه كان غلط يقول كده، الكلام ينفع يعتذر عنه والموضوع ده يتقفل ويتحرم استخدام الاسلوب ده في الكلام خالص بينا وبين بعض، لكن الافعال ما تتنسيش
وقبل ما اي عيل خايب في الحساب يقول لي ما مبارك عمل الطلعة الجوية نسامحه؟
والله لو مبارك اخطاؤه على قد الكلام بس كنا سامحناه، لكن خطيئته تعدت القول الى الفعل وقتل ناس وبقى فيه دم ابرياء، ثم ان مبارك كان في موقع مسئولية ورئيس، صفوت حجازي لا رئيس ولا وزير ولا حتى مدير البوفيه
والناس اللي قاعدة ما ورهاش غير تدور ورا خلق الله.. والله لو فكروا يعملوا اي حاجة مفيدة في حياتهم مش حيبقى عندهم وقت يشتموا الناس
ومدام جبنا سيرة سيدنا علي بقى، احب افكركم ان الخوارج كانوا ثوار، وثوار انقياء كمان، وكانوا بيدوروا على الحق، وكانوا راديكاليين، وانتهى بيهم الامر انهم كفروا سيدنا علي وولاده.. واللي شتموا سيدنا ابو بكر وسيدنا عمر برضه كانوا ثوار، وانقياء، وبسبب اختلاف في المواقف السياسية مسحوا 23 سنة من الكفاح والبهدلة والتضحيات وقرروا انهم ناس وحشة عشان موقف واحد
البني ادم ما يسارعش لفتح جاعورته كده.. كل واحد وارد انه يغلط، ومدام مش بيكابر في الغلط يبقى الموقف انتهى

89 comments:

Nicholas Urfe said...

راجل مراوغ وممحون ،وشاطر في شئ واحد ،،الكدب والمرواغة وتصوير نفسه كشهيد برئ عفيف مخلص طاهر حالم شهيد،،لو هو عايز يروح المدينة يروح من غير ما يكلم حد ونصحى الصبح مانسمعش له حس ولا خبر ،،،بطل الثورة الاوحد ومناضل قناة الجزيرة عشرين حلقة وكاشف اعداء الاسلام والحاقدين عليه

Sinbad said...

شكلى هرجع احترمك تانى ولا ايه
مقال رائع

Sinbad said...

شكلى هرجع احترمك تانى ولا ايه
مقال رائع

Nahla said...

gamda a5er 1000000000000 7aga ya nawara :)

muhammad said...

سنهلك من كثرة اللغط وقلة الفعل أرجوكم اتحدوا كما كنتم في ال18 يوم انبذوا خلافاتكم على الأقل لنعتاد على فقه الأولويات الثورة أهم شئ اﻵن

واحد عادى said...

يا فرحه طنط زازا فينا

Nicholas Urfe said...

ابسط حاجة بدل ما يتصل بيكي انه يطلع على الهوا او في الميدان يتأسف للي غلط فيهم ،،ويفهم اتباعه ان مصر فيها اسلاميين وناس علمانيين او ناس مش بيسموا نفسهم سياسيا اسلاميين و،،،وان الاتنين اصحاب راي والاتنين وطنيين وما حدش احسن من حد،،، وماحدش اولى من حد ،،وماحدش اتقى من حد

لكن لما يتصل بيكي فهو عايز يحطك كجزء من خطة الدفاع والتلميع الاعلامي له

wisdomtooth1977 said...

wafeeety we kafeeety ya Nawarra.

شاةثي سشةثا شلاع ثمثئئ said...

كلام حماسي وجميل يا نواره بس صفوت حجازي مش بس مشهور صفوت حجازي داعية الى الله والكلام اللي عليه الدوشة تصريحين الاولاني .. بتاع شباباً ملحدين لقوا مصرعهم فى موقعة الجمل من أجل الثوار ومن أجل نجاح الثورة، فالله يستخدم الجميع مسلم وكافر ليكمل ما يريد
....... غير تصريحه في مؤتمر شعبي يعني من غير ضغوط ولا حاجه بيرمي فيها ناس بالزنى يستحق عليه الجلد 80 جلده حسب حد رمي الناس بالزنى ....... ثالثا كان فيه تمييز ودفاع عن شباب الدعوة واتهام شباب الثورة بالندالة والهروب ........... فليعتذر ويحاكم بتهمته قبل ان يتحدث باسم الدين

شاةثي سشةثا شلاع ثمثئئ said...

كلام حماسي وجميل يا نواره بس صفوت حجازي مش بس مشهور صفوت حجازي داعية الى الله والكلام اللي عليه الدوشة تصريحين الاولاني .. بتاع شباباً ملحدين لقوا مصرعهم فى موقعة الجمل من أجل الثوار ومن أجل نجاح الثورة، فالله يستخدم الجميع مسلم وكافر ليكمل ما يريد
....... غير تصريحه في مؤتمر شعبي يعني من غير ضغوط ولا حاجه بيرمي فيها ناس بالزنى يستحق عليه الجلد 80 جلده حسب حد رمي الناس بالزنى ....... ثالثا كان فيه تمييز ودفاع عن شباب الدعوة واتهام شباب الثورة بالندالة والهروب ........... فليعتذر ويحاكم بتهمته قبل ان يتحدث باسم الدين

شاةثي سشةثا شلاع ثمثئئ said...

كلام حماسي وجميل يا نواره بس صفوت حجازي مش بس مشهور صفوت حجازي داعية الى الله والكلام اللي عليه الدوشة تصريحين الاولاني .. بتاع شباباً ملحدين لقوا مصرعهم فى موقعة الجمل من أجل الثوار ومن أجل نجاح الثورة، فالله يستخدم الجميع مسلم وكافر ليكمل ما يريد
....... غير تصريحه في مؤتمر شعبي يعني من غير ضغوط ولا حاجه بيرمي فيها ناس بالزنى يستحق عليه الجلد 80 جلده حسب حد رمي الناس بالزنى ....... ثالثا كان فيه تمييز ودفاع عن شباب الدعوة واتهام شباب الثورة بالندالة والهروب ........... فليعتذر ويحاكم بتهمته قبل ان يتحدث باسم الدين

Argenda said...

الأول أنا زعلت من كلام الشيخ مش عشان كنت ماسكله ع الواحدة بالعكس لأني بحترمه و مكنتش متوقع منه ده ما أنا مبزعلش من سبايدر و لا من عكاشة و لا من إللي زيهم لأنهم ميستاهلوش يتزعل منهم و مقدر إللي الشيخ فيه و خلاص مدام قال إنه غلط ده يكبره عندي ميقللوش أبداً غيره بيغلط و بيدارى ورا ألف حجة عشان ميقولش كنت غلطان.

بالنسبة لأن الناس دايماً بتسأل نازلة و لا لأ يا نوارة مش من باب المزايدة بس سعات الدنيا بتغيم قدامي فبحب أشوف الناس إللي متأكد منهم و من آراءهم عشان يبقى إجتهدت قبل ما أعمل الحاجة و إنتي بثق في رأيك

biso1963 said...

كلامك جميل ومنسق وتعبيرك رائع لكن لية تحفظ شوية على ان الضغط العصبى يولد الانفجار .. صح ممكن انفجر ودة اكيد لكن مش بطريقة انى اتكلم فى اعراض ناس وافضح ناس سترهم ربنا وزى الحديث الشريف ما بيقول القوى هو من يملك نفسة عند الغضب ودى بقى يانوارة ضريبة الشهرة ضريبة انك تكونى معروفة فلازم الانسان يتحمل شوية انا عارف ان ناس كتير تحملوا فوق ما يستطيعوا لكن اللوم الوحيد ان مادمت ارتضيت بالشهرة فلابد ان تتحكم فى نفسك ولك من ارق تحياتى وشكرا

eddo said...

انا حاسس كده ببوادر انقسام فى الثوار يارب اكون غلطان

ahmed2011 said...

I REALY LOVE YOU SISTER
LAZEEEEZA FA7T

esamali71 said...

شكرا يا نوارة على التوضيح

وأرجو ان يخرج علينا الشيخ بأعتذار عن أقواله حتى ترجع صورته كما كانت فى أعين الشباب

Noha said...

طالما هو معترف بغلطته و احنا بشر مش منزهين لازم يعتذرعلنا زي ما غلط عنا و يوضح موقفه لان كل كلمة بتطلع من واحد زيه بتعلم و ممكن تاثيرها يكون قوي و ينتشر ماهي الفتنة يا نوارة الشرارة بتاعتها بتبدا كده و مفيش حد فوق الحساب و النقد ... ربنا يعينه و يعينا جميعا

Noha said...

طالما هو معترف بغلطته و احنا بشر مش منزهين لازم يعتذرعلنا زي ما غلط عنا و يوضح موقفه لان كل كلمة بتطلع من واحد زيه بتعلم و ممكن تاثيرها يكون قوي و ينتشر ماهي الفتنة يا نوارة الشرارة بتاعتها بتبدا كده و مفيش حد فوق الحساب و النقد ... ربنا يعينه و يعينا جميعا

Elmasry said...

صفوت باع القضية وعذره غير مقبول والدفاع عنه اشتراك معه فى الجريمة

7ASSO said...

د/ صفوت حجازى غلط ومفيش حد معصوم من الغلط ولكن لازم د/ صفوت حجازى يطلع ويعتذر عن ماقاله ويوضح وجهة نظره ورصيده عن الناس الفاهميييييييين كافى جدا جدا إنهم يتجاوزوا عن هذا الخطأ وأنا مبقولش انه يعتذر ويقول ان الكلام ده غلط وانا اسف والكلام ده ولكن من منطلق حتى حديث رسول الله صلى الله عليه وسلم ((عن أبي هريرة رضي الله تعالى عنه قال : قال رسول الله صلى الله عليه وسلم : كل أمتي معافى إلا المجـــــاهرين .. وإن من المجاهرة أن يعمل الرجل بالليل عملاً ثم يصبح وقد ستره الله فيقول يا فلان عملت البارحة كذا وكذا وقد بات يستره ربه ويصبح يكشف ستر الله عنه - رواه البخاري ومسلم)) فاللى ربه ستره مينفعش اننا نفضحه ما علينا انا مش هقدر أقدم نصايح لراجل انا مجيش اصلا ربعه ولا فى علمه ولا فى شجاعته ولا ف رجولته ولكن أنا شايف ان الدكتور صفوت لازم يطلع ويوضح النقطة دى بالظبط زى ما قالك يانوراة وكل دى محاولات لتشتيتنا بأى طريقة لازم كلنا نتوحد تانى عشان نحافظ على اللى نقدر نحافظ عليه

Muhammadian1 said...

ماشي موافق على كلامك .... لكن فين الإعتذار الرسمي ....
والذي يجب أن يكون على قدر الإساءة ... وعلى قدر الشيخ صفوت نفسه كعالم وكمناضل؟؟

سامية جاهين said...

مع احترامي الشديد يا نوارة طلعت منك آوت دي. بتقارني نفسك ولا أي حد من الاسماء اللي قلتيها بصفوت حجازي؟ وبعدين يعني إيه غلطت؟ هي دي زلة لسان مثلا؟ دي قصة طويلة عريضة ونسوان وخمرة وشقة.. فيلم يعني! المقارنة ما بين اللي بيحصل لك واللي بيحصل لصفوت حجازي مش في محلها. ودي مش أول مرة يهبل

ayman radwan said...

كلامك مظبوط ...بس يتقال بعد لما يعتذر والي بيدفع نفسه لكثرة الظهور الاعلامي يستحمل بقي..هو بيظهر اكتر من الللازم ومعتقدش انه غصب عنه يعني

Anonymous said...

غريبة يا نوارة.,,يفرق ايه هو عن الروينى و لا عتمان و لا صلعت زكريا؟هو عشان انه شيخ او شارك فى الثورة يوسخها بلسانه بمزاجه؟و طالما هو شايف انه غلط نطبق عليه الحكم الشرعى اللى بينادى بيه و هو الجلد 80 جلدة ,مقلتلهوش كدة ليه؟

فانتوماس said...

يا ريت تفكري انت ليه عندك الاستعداد تصدقي صفوت وتعذريه لما يقول انه غلط وهل عندك نفس الاستعداد ده ناحية ساويرس؟

فانتوماس said...

يا ريت يبقي عندك نفس الاستعداد ده انك تعذري الناس بما فيهم ساويرس والا يبقي الموضوع حاجة تانيه

مش فاهمه said...

انتى ايه اللى بتقوليه ده يا نوارة غلط ايه اللى غلطه و انتى بتعذريه الراجل عامل فيها داعيه و قدوة و غلطة الكبير مش زى غلطة اى حد ده بيخوض فى اعراض لأ و ايه كان عايش فى دور قرنى كمان طول الشهور اللى فاتت و لما الموضوع مسه شخصيا حايقر على الشباب ......بصى يا نوارة انا باحبك فى الله و انت جدعه بس للأسف ماشيه بقلبك انتى ناسيه الحب و الهيام و الجوابات للمجلس العسكرى ونقولك ارتجعى و انتى ابدا لما تلنتيجه كانت الخ*** اللى احنا فيه ....لو هو فعلا صعبان عليكى يطلع زى الرجاله يعتذر و لو شايفه الناس بتشتمه لأنك حاصره نفسك فى دائرة الشتامين له لكن فيه ملايين بيصدقوه و لو حاجه بيقولوله امين يسيبه من دول و يخليه فى بتوع امين بتوعه .....كفايه يا نوارة خليكى حقانيه المرة دى الرجل غلط و شكله زباله و بلاش تبقى انتى الكوبرى اللى يوصله لمجمموعه من شباب الثورة اللى مستلمينه .....الثورة ولا قام بها صفوت ولا 6 ابريل و لا الشباب اللى مستلم صفوت الشعب المصرى هو اللى قام بالثورة و انتظر النخبه و الدعاة و الشباب الواعى المثقف يحافظ له على ثورته لكن للأسف 30 سنه خراب خربت الدعاة و النخبه و الشباب و كلنا خذلنا الشعب اللى معروف انه انه بيتحمل و بيصبر و لما ثار خذلناه كلنا

KaRieMo said...

انا حزين حقيقى

KaRieMo said...

انا حزين...حقيقى حزين

بولا شكري said...

لأ مش هننصب المحكمة لكن يعتذر .. اللي يغلط يعتذر . صعبة ديه؟

عبد الله said...

طيب ما دام شايف نفسه غلط يعتذر على نفس الملأ اللي قال فيه الكلام ده لأنه كلام مأهانش بيه 5 ولا 6 أفراد لكن حط الثوار كلهم محل شبهات و موقفه مفرقش حاجة عن موقف واحد زي طلعت زكريا و الكلام اللي هو قاله يفرق ايه عن طلام ظطلعت زكريا .. دلوقتي بقى الناس تقول شهد شاهد من أهلها

غلطة الشاطر بألف

arabian_faithful said...

طيب أنا مش عافر أصلاً هو غلط فى أيه ^_^ بس عموماً أنا بأحترمه جداً و الله و بأحس فيه بالشهامه و عموماً حالياً لو أربعة قعدوا مع بعض يتكلموا عن حال البلد بيتهيألى حيمسكوا فى بعض
مشكلتنا مش بس المزايدة على بعض المشكلة أن محدش بيقبل إن رأيه ممكن يكون غلط و يرجع يقول الناس لازم تتوحد تانى ! طيب لما يبقى عندك مرونة أنك تتفق مع حد تبقى تتكلم براحتك!!!

أحلام ممنوعة said...

الضغط يولد الانفجار ... ما بالك أن يكون الضغط من ناس أنتي متأكده من نجاستهم وخستهم وعاملين فيها المناضلين السبعة ؟؟
أنا لو مكانوا مكنتش هاقدر أصبر أبدا .. وكنت هاكشف كل واحد فيهم

Bassem Tarek said...

تدونيه اكتر من رائعه .... المشكله مش في غلط صفوت او غلط اي حد تاني المشكله
في المزايده والتخوين
الحاجتين دول هيتدمروا الثوره وهيدمروا اي تحاد واي علاقه

كفايه مزايده وتخوين بقي عشان الواحد هيرجع

Anonymous said...

شكرا يا نوارة .. مقال منصف ، مقال من القلب .. الرجوع للحق و الإنصاف من شيم الكبار ، اشكرك و دايما ربنا يوفقك لكلمة الحق و فعل الخير يا بنت مصر يا جميلة .

7ASSO said...

عليه بالإعتذار فرصيده عندنا يكفى وحتى ليصمت من ينتظر الجنازة حتى يشبع فيها لطم

gamo said...

صفوت حجازي بيعيط لنوارة نجم
و النيلة الكبيرة ان نوارة قلبها رق و بتدافع عنه ؟!!!
يا خسارة الدقن و الشنب كان اولي بيهم نسوان شقة العجوزة

من يصف الشهداء بالمحدين و عبدة الشياطين
شخص فاجر مهما نافق و لبس توب الحمل

Unknown said...

الشباب الذين ظنوا بانفسهم انهم جيفارا التحرير يفتقدون الى الخبرة فى كثير من الاحيان ولا يقبلون التوجيه والنصح ويتطاولن على كل الناس المخالفين لهم هذا لكثير منهم اما البعض الاخر الذى يحصل على المال من الجيش او من بعض رجال الاعمال او من فلول الحزب الوطنى فقد باعوا البلد وقبلوا بالمال الحرام الذى لوث قلوبهم وصدورهم ويجب على المخلصين من ابنا مصر ومن الثوار ان يعقلوا الاموا ويزنوها بالميزان الحق

banota_masrya said...

كل انسان معرض انه يغلط وكل سياسي ممكن نتحمل هفواته وغلطه حتى لو الغلط اساء للناس .. لكن مشكلة صفوت حجازى ان اسمه بيسبقه لقب الداعية الاسلامي .. فالكلام اللي اتقال ده يتاخد عليه مليون مرة وصعب يمر مرور الكرام .. ولو صفوت حجازي عايز يبقي رجل سياسة مش دين يبقي يقول خلاص انا مش داعية ومش ليافي الدين ولا هنصح ولا هوعظ وهتكلم في السياسة وقتها هفواته واساءته للاخرين نبقي نفوتها لكن طول ما هو داعية اسلامي يبقي يحترم المسمي ده ويحترم ديننا قبل ما يحترم عقولنا !!!!!!!!!!

banota_masrya said...

كل انسان معرض انه يغلط وكل سياسي ممكن نتحمل هفواته وغلطه حتى لو الغلط اساء للناس .. لكن مشكلة صفوت حجازى ان اسمه بيسبقه لقب الداعية الاسلامي .. فالكلام اللي اتقال ده يتاخد عليه مليون مرة وصعب يمر مرور الكرام .. ولو صفوت حجازي عايز يبقي رجل سياسة مش دين يبقي يقول خلاص انا مش داعية ومش ليافي الدين ولا هنصح ولا هوعظ وهتكلم في السياسة وقتها هفواته واساءته للاخرين نبقي نفوتها لكن طول ما هو داعية اسلامي يبقي يحترم المسمي ده ويحترم ديننا قبل ما يحترم عقولنا !!!!!!!!!!

أبو عفان said...

تعرفى يا نوارة .. الساحل الشمالى فى أكتوبر بيبقى رايق رايق رايق وهواه يخبل ويرد الروح .. فياريت مولانا صفوت ياخد ولاده ويروح يروق له هناك كام أسبوع أو كام شهر .. وليتق الله ويترك الثورة فى حالها فللثورة رب يحميها .. أما العك وتشويه الثوار بكلام عام يطال الجميع أنقياء وأنجاس فهو ما لايرضى ربنا و أنا شخصياً أختصم مولانا صفوت عند الله فيما قاله وكان الأفضل له أن يخصص بدلاً من أن يبقى هذه الرواية المزرية عاراً على جميع من حضر التحرير الذين - ودون أن أفتئت على سلطان الله - قد يكون المولى عز وجل قد نظر إليهم فقال لهم أذهبوا مغفوراً لكم .. ثم يأتى مولانا صفوت ليصمهم ويقذف فى حقهم بكلام يستوجب أول ما يستوجب توقيع حد القذف عليه

Dandoon said...

مصرية بتحترم عقلها
الشخصيات العامة المفروض تحترم كل كلمة بتطلع من بقها و بالذات لما يبقى داعية :: يعني اية ضغط عصبي و يعني أية الأعلام ركز على كلام محدد و ساب كلام جميل و كلام معقول :: هو دة مبرر علشان يتكلم بالشكل دة في حق الشباب اللي
منهم اللي دفع عمره تمن لمبادئه و مطالبتهم بالحرية ... يا نوارة :: خليكي صادقة مع نفسك :: ما تحاوليش تبرري اللي قاله الشيخ لمجرد أنه أختصك بمكالمة تليفونية ... و الخير اللي بيعمله كتر خيره جدا عليه :: لكنه أيضا مش مبرر لاصريحات غير مسئولة

ali_nfn said...

نواره
انا محمد علي اللي اتعرفت عليكي تحت ضرب الرصاص لما كنا في روف نقابة الصحفيين وبيتضرب علينا نار
كان صفوت حجازي بنفس بساطة التليفون يطلع يعتذر عن تصريحه والاعتذار احترام للي يفهم ده
لكن معملش كده
انا شفت صفوت مع أول مجموعة راحت تحاصر مجلس الشعب وكلمته من كتر ثورية الموقف اننا نقتحم المجلس
شوفي كنت يثق فيه قد ايه
دكان حواليه بودي جارد منعوني ادخل اكلمه فزعق لهم واتريق عليهم وقالي فاكرنني رئيس جمهوريه معلش اعذر جهلهم
ده صفوت اللي عرفته
لكن بعد التنحي في كل تصريحاته نفسه اشتغلته
حاجه بجد خنقتني لأني شوفته في الميدان وليلة القناصة السواده بتاعت موقعة الجمل واستغربت ازاي انسان ممكن يتحول كده في لحظات الرخاء
انت كنت بتدافعي عن المجلس العسكري لغاية ما ظهر لك على حقيقتك
لكن هو ايه.... مش فاهم لغاية النهارده؟
صفوت حجازي عمال يخسر وانا اللي كنت

@masrygdan said...

تدوينه موفقه جدا يا نواره .... احنا بالمنظر ده بنفشخ ثورتنا بإيدينا ...لازم نبطل ننهش فى لحم بعض ونركز فى العدو المشترك ... انا كتأكد ان بعد اللى انتى كتبتيه ده حبك زاد للشيخ صفوت وانا كمان عارف انه غلط ورده خلانى احترمه اكتر ... يارب نغوق بقه من شغل فنجرية البق دى ونركز فى ثورتنا

Salomest said...

المقارنه بينك وبين صفوت أفندى حجازى انا أرفضها ..انا ممكن بختلف معاكى كتير فى نتناولك للفكر لكن بحس ان الكل طريقه واحد وهدفنا واحد

نواره انا مش هنسى مقال ليكى يا نواره (إحنا ولاد كلب) بتاريخ 4/12/2010 http://www.dostor.org/authors/11/910/10/december/4/32752

فرق بين اللى بيقول زمان ويهاتى إلحقوا البلد ومخفش من مبارك فى جبروته وبين اللى كان عامل فيها فرخه ومكنش ليه صوت ولما نيجى نكلمه يا عم الشيخ إلحق يقولك انا مليش فيه انا راجل بتاع دين (وعلى إعتبار ان قاعدة المبادىء لا تتجزء) إشمعنا دلوقتى بقينا بتوع سياسه وبتوع دين وبتوع كورة وبتوع فول وطعميه وإحنا اللى شلنا الثورة على أكتافنا وربنا سخر الشباب الملحد علشان يحمى الثورة ..بأى منطق راجل عاقل راشد عامل دين يقول الكلام ده...وبعدين انا ضد نغمة الإخوان وموقعة الجمل وشباب الإخوان لأنى كنت واحد من اللى إندعكوا فى موقعة الجمل ومكنش حد عارف إخوان ومن ترتان ده غير فضحتهم مع عمرسليمان وانهم أمروا شبابهم إنهم ينسحبوا قبل موقعة الجمل والشباب رفض ف بأى حق يلهم مكتب الإرشاد والشيخ صفوت والبلتاجى ثمرة تضحية شبابهم

المهم الشبخ أفندى صفوت بأى حق ينصب نفسه أمين عام الثورة ؟؟ ويطلع يعيط ويبكى فى الجزيزه على شهداء الثورة ولما عملنا مليونيات للمحاكمه وغيرو مش بنشوف خلقته..

هو مخنوق إكم شباب الثورة قال بأى حق يطلع صفوت حجازى يحكى عن الثورة وهو منزلش الميدان إلا يوم 28 يناير بعد ما أطمن إنهم بقت ثورة .... وده حقهم

محدش ينصب نفسه واصى على حد أو يتكلم أو يلهط مجهود حد

السؤال اللى بطلب منك تجاوبينى عليه ...أين صفوت حجازى السياسى البارع قبل الثورة مكنش ليه حس ليه


أنا مجبتش سيره طلوعه فى كل قنوات الدين يدعوا الناس لنعم اللى ودتنا فى ستين داهيه واللى المفروض والأولى بيه يطلع يعتذر ويقول حقكم عليا أنا غلط فى حق الثورة مش فى شويه عيال ..غلطت لما وجهت الناس وخونت ثقتهم فيا وهما ميشيوا ورايا بنعم

عم مينا said...

معلش يانوارة مع احترامي ليكي.. دي مش زلة لسان.. ده منهج هو واخده من يوم 11 فبراير.. لو فيه 5 أشخاص مسئولين عن الفرقة اللي بين الثوار من يوم التنحي فصفوت حجازي واحد منهم.. أنا مقروف زيك بالظبط من الناس اللي بتزايد بس اللي بيحصل معاه هو بالذات مش مزايدة

بإيدك يامصر said...

للاسف يا نوارة ما يقوله صفوت يتسق مع ما يقوله الإخوان والاسلاميون والذي ادى الى احداث انقسام ابتدأ بالتعديلات الدستورية والاعلان الدستوري المفبرك الذي نسب الى الاستفتاءزورا ، واقر بذلك مؤخرا منهم البلتاجي مع يسري فودة . وليس خافيا ان ذلك حدث بإتفاق بين المجلس والاخوان ، وهم من فضوا الميادين وهي ورقة ضغطناالوحيدة ، ومن جراء ذلك نحن يدوبك بنلم في الثورة . يعني مش عامل بوفيه ولا حاجة . هذا الكلام يكاد يضيع الثورة كلها.

الميدان said...

هي كلمه واحده - الاعتراف بالحق فضيله

Masria said...

Please don't get distracted, argoukom tanabahou

Masria said...

Please focus on El Thaura, it was ... mistake. Finish

بإيدك يامصر said...

للاسف يا نوارة ما يقوله صفوت يتسق مع ما يقوله الإخوان والاسلاميون والذي ادى الى احداث انقسام ابتدأ بالتعديلات الدستورية والاعلان الدستوري المفبرك الذي نسب الى الاستفتاءزورا ، واقر بذلك مؤخرا منهم البلتاجي مع يسري فودة . وليس خافيا ان ذلك حدث بإتفاق بين المجلس والاخوان ، وهم من فضوا الميادين وهي ورقة ضغطناالوحيدة ، ومن جراء ذلك نحن يدوبك بنلم في الثورة . يعني مش عامل بوفيه ولا حاجة . هذا الكلام يكاد يضيع الثورة كلها.

Mohammad Sulaiman said...

استاذه نواره بالنسبه للدكتور صفوت كل ابن ادم خطاء وخير الخطائين التوابون ودا اعترف بالخطأ فلا عليه حتى لو كان داعيه الانبياء اخطئت , اما بالنسبه لشعورك باليئس او الضغط عليكى فدا بدافع معرفه موقفك وصلب شجاعتك وثوريتك وايضا ثقه الكثير من الناس وحبهم لكى , ومن يتعدى عليكى من خنازير اتباع النظام الساقط فدا اكبر اثبات على صحه سداد خطوتك ويارب لا تنقطع وننتطر منك الكثير لاأن فى رأيى المتواضع لا ثوره بدون امثال الاستاذه الجميله نواره نجم \fantsticUK

utopia said...

تسلمى يا بنت نجم
اختلف مع د صفوت فى الاسلوب وده لانه بشر لكنه يكفيه الاعتذار عن خطأه انما ما اراه من هجوم عليه ليس فقط لانه اخطأ ولكن لانه داعية اسلامى
اناشد د حجازى الاعتذار وحتى مراجعة موقفه من العسكر لكنى اطالب فى نفس الوقت بمحاكمة الاخرون ممن باعوا انفسهم فى السر ويدعون الوطنية فى العلن

Ahmad said...

مش 6 عيال صيع نعتبرهم الثورة ماشى
الشيخ صفوت جزمته أحسن من 6 دول واى عيل يقول عليه كلمه
يستاهل اكتر من كده
فى محاولة لأغتيال الرجل معنويا
من شوية رعاع ملهمش قيمة ولا لزمه ولا تاريخ

شكرا يا نوراة على التدوينه

Admin said...

7asbeya Allah wa ne3ma al wakeel fe ay 7ad yettehem 7ad bel bateel w ba3den safwat 7egazy ragel mo7tram .. w ya reet teseby el link da 3ashan 5ater el thawra :D

FC Barcelona News

Hamada Elnaggar said...

إللى يشتغل فى العمل العام التطوعى الخيرى
ويستنى شكر وتحية وإجلال
يبقى منافق ووصولى ومش أمين
فمابالك ياست نوارة لما يكون كمان داعية وشيخ بسبحة
لا وقال إيه وعلشان زهق إن ماحدش بيشكر فيه ودايما بيصطادوا أخطاؤه إللى هيا كتير جدا
يقوم طاعن الناس فى شرفهم ويرمى الناس بالزنا
يا ست نوارة مش ممكن كل ماحد يقعد معاكى ولا يكلمك فى التليفون ويتمسكن شوية يصعب عليكى وتتعاطفى معاه

NAGWA said...

يا جدعه يا ست البنات بجد أثبتى انك حيادية وراجلاية بحبك

سكوت هنصوت said...

احلى حاجة فيكي انك لما بتخاصمي ما بتفجريش....وانك حقانية ورجاعة للحق...كل سنة وانت رائعة يا بنت الناس الطيبين...وفكك من الناس كلهم اتيه يوم القيامة فردا....محدش هيقف يتحاسب نيابة عن حد

من خالط الناس فصبر على اذاهم فله اجران

سمية صلاح مقلد said...

Somaia Salah Maqlad وانا كلمته الظهر وقالي انا بشر بخطأ مش معصوم وانا مقلتش اسامي حد عشان يقولوا قذفتهم ..قلتلة بس كده عملت زي طلعت مصطفى .. قالي بس بعضهم ماسكني مفيش وراهم غير صفوت حجازي وانه ركب الثورة وعامل فيها امين على الثورة وسكت فقلت الكلامده والمطلوب مني ايه دلوقتي قلتله حضرتك تقول للشباب مبرر لماقولته ..وحسبي الله ونعم الوكيل فيمن جعل واحد زي الدكتور صفوت اول من وقف مع الثوار بشهادة حتى العميان يقولي طيب طيب طيب ..اللهم انتقم منهم ووان كنت لا ابرر ما قاله المفروضض دكتور صفوت اكبر من هؤلاء ..

Mohammad Sulaiman said...

استاذه نواره بالنسبه للدكتور صفوت طالما اعترف انه اخطأ فدا كافى وكل ابن ادم خطاء وخير الخطاؤن التوابون فعليه من توبه يتبعها اعتزار . اما بالنسبه للضغط والعصبيه النتى فيها فدا ضريبه حب الناس لكى ولابد ان تدفع لاأن الناس حبتك بمواقفك وصلب شجاعتك وثوريتك وقوه وطنيتك بالاضافه ان من المعروف ان نواره نجم ارتبط اسمها باسم اى تقدم من اجل الثوره ومن اثاث اسناد الثوره ايضا فعليكى الصبر وطول البال ونحن معكى قلب ورب \fantasticUK

المواطن مصري said...

جدعة يا بت يا نوارة
احسن حاجة بتعجبني فيكي انك حقانية
مهما كنتي مختلفة مع حد انما لما بيعمل بنط جدعنة بتقولي عليها,
الحق حبيب الله
ولو ان احيانا بتعملي غلطات شنيعة لكن دايما بتكون بحسن نية و سذاجة احيانا
لكن زي مانتي قلتي احنا بني ادمين مش انبيا
المهم الاخلاص في العمل و مش مهم اي حاجة تاني
الدور و الباقي على اللي قاعدين على التمبوكة و مش فالحين غير في الكلام و بس

عبد الرحمن سالم said...

كلام زي الفل يا نوارة

محمد عبدوه said...

دايما تثبتين يا نواره انك لا تحامى لاحد الافى الحق والحق فقط وياريت فعلا نتجاهل اخطاء الناس اللى احنا واثقين من نضافتهم وطهارتهم وعدم سعيهم وراء مصلحه شخصيه ونتجمع كلنا حول من يخطئون فعلا فى حق هذا البلد واجهاض ثورتنا

شمس النهار said...

وياولاد الكلب هو مبارك مش بشر يخطئ ويصيب ولا اية ياصفوت ياحجازي منكم لله

شمس النهار said...

احلي كلام سمعتة من ست كبيرة قالت لما بسمع الا بيقول المخلوع بدعي علطول علي الا بيقول كدة ربنا يخلع عنك رحمتة ويغفر لمبارك وينصرة اميين يارب وانا بفول اللهم شتت شمل كل من تسبب في خراب مصر وخصوصا مايسمون نفسهم بثوار فضيحة 25 يناير وايضا صفوت حجازي وقريبا ساحج بيت الله الحرام وسيكون دة هو دعائي اللهم فاستجب

Ahmed Rashwan said...

تسلمي يا نوارة يا احسن حد يكتب بعقل ومنطق في الدنيا
انا ما يفرقش معايا اوي صفوت حجازي
بس انتي بتعالجي الموضوع بشكل محترم وادمي .. تسلمي ويسلم الراجل اللي عرف يربيكي عمنا احمد
ليكي سلامي يا اصيلة

الطائر الحزين said...

بارك الله فيكم
وانار ابصارنا للحق دوما

ما زلنا نتعامل على ان كل شيخ اله وكل رئيس اله وكل امام مسجد اله

نحن جميعا فى النهاية بشر

Sameh Elsawy said...

Hi Nawara
i would like to read your comment about this video,

يحطمون و يشعلون النار في المدرعات و يقتلون جندياً يحاول الفرار من المدرعة أثناء إحتراقها


شوفوا فى الثانيه 42

http://www.youtube.com/watch?v=pZDBUxB-1SY&feature=player_embedded

فافى said...

كويس انه اعترف انه غلطان انا لما قريت المقال بتاعه بالرغم انى مش بحبه وبالرغم من فى ناس كتير نقدته لكن انا فلت انها جمله هبله مالهاش اى لازمه وماتطلعشى منه لو اتحزفت من المقال ولا هاتقدم ولا هتأخر قالها ليه؟؟
لكن انا مش معاكى ولا معاه ان الضغط العصبى يخليه يقول كده الجمله دى نتيجه حشو زائد فى المقال وكلام فاضى وسوء تقدير للأمور لكن مش نتيجة ضغط عصبى ولا حاجه معلشى انا اخصائيه نفسيه ومش بفتى
وباين انا كمان هارجع اقرأ لك ولا ايه ههههههه مقال جيد

حمكشه said...

الثوار الاحرار اللى طلعوا ماسبيروا يلومون التيار الاسلامى على مايقومون هم به من نعصب وعنصريه وطائفيه والغلطه غلطه اللى مصدق انهم ليسوا عملاء

محمد نور الدين said...

ساذجة طول عمرك تظلي ساذجة

لا يترك مناسبة ، وهو يتحدث مع احمد منصور عن الثورة، ذكرك ، وأيضا مع واحدة لا اعرف اسمها التي كانت مع سيد على أيضا ذكرك . ولما حاولت أن تتجاهلك ذكّرها فقال لها نوارة نجم بنت شاعرنا الكبير أحم فؤاد نجم .
يا النوارة هذا صاحب مشروع و الجزيرة تسعى لتسويقه عن طريق الإخواني احمد منصور و الجميع يريد استثمار اسمك . فوقي تعبتينا يا بنت بسذاجتك .
لكن في حدود علمي لما الرجل يفضفض لامرأة ويشتكي لها همومه و أوجاعه هذا يعني أنها تمثل له شيئا خاصا . ولقد بالغ كثيرا في ذكر اسم النوارة بمناسبة وبدونها .

نور الدين (محمد الجيزاوى) said...

كتير بختلف معاكى
وكتير بهاجمك هنا لما اشوف اللى ميعجبنيش
ومش بطريقة انتقائية والله لكن دة كلام محترم وانت حد صاحب قضية رغم انى مبتفقش م نهجك
وبالمناسبة بختلف كمان مع صفوت حجازى واغلب السلفيين دلوقتى رغم انى كنت واحد منهم
بس اللى بيهاجموهم ناس معندهاش ضمير وبيختلفوا بطريقة غير شريفة غير نبيلة
انا اختلافى معاهم انهم يحتكروا حق الفهم وحق الصدق
بس همه مش مشوهين همه فاهمين غلط بس
واللى بيهاجمهم بطريقة صاحب اول تعليق همه سفلة فى طريقتهم
نوارة انت محترمة
وانا مبحبكيش لكن بحترمك
اسف على سخافة اسلوبى وفظاظته بس انا مبحبش غير الحق وبكره النفاق
تحياتى
احترامى
تقديرى
...
نورالدين محمود

aboulez mahmoud hassan said...

يا نوارة أنا مش هقول أي تعليق عن الشيخ صفوت حجازي، لأن فيه حاجه اهم ، دلوقتي بعد ما ظهرت الحقيقة علي لسان المشير و رئيس الأركان إن ما كانش فيه أي أوامر رئاسية بقتل المتظاهرين أيام الثورة ، يبقي الطائرات الحربية المقاتلةاللي فضلت تحلق علي إرتفاع منخفض فوق المتظاهرين في التحرير وقتها ( محلها إيه من الإعراب ) لأننا كلنا وقّعنا الموضوع ده من ذاكرتنا علي إعتبار إن الريس هو اللي أمرها بالتحليق ، طيب عايزين نعرف مين اللي إدي الطيارين الحربيين وقتها الأوامر، و الأهم الأوامر دي كانت ( ليه ) . . ؟ ؟

patata said...

برافو يا نوارة فعلا الناس بتنسى ان الشريف المناضل بيغلط برضة لكن للأسف الشباب اللى وكسونا وقالوا بكل وقاحة انهم فعلا اتدربوا فى الخارج و بياخدوا تمويلات من أمريكا و بيقولوا مفيهاش حاجة وعادى. مش غريب عليهم يشوهوا صورة أى شيخ لمجرد انه شيخ. نفسى اعرف ليه مفيش حد اتجرأ يعااتب البابا شنودة اللى منع الناس علنا من الخروج يوم 25 و اعلن صراحة تأييده للتوريث ولا بنسمعش منة أى عتاب حتى لأقباط المهجر اللى أعلنوا قيام الدولة القبطية وكمان القمص اللى طلع يهدد محافظ اسوان بالقتل. الواحد قرف من اعلام النفاق و النجاسة

المهندس وليد مجاهد said...

تعرفى يااستاذه نوارة ان كل اللى حوالينا دة بيقول ان بلدنا دى متنفعش تتحكم الا بالحديد والنار كل الناس خلاص بقت بتلعب سياسه وابتتكلم سياسه وعرفت حقوقها وعاوزة تاخدها وبقت زى الغابه كل اللى مايتحققلوش مطالبه يطلع يحرق ويولع ويكسر حتى احنا مابنسمعش لرأى الاخر واللى مش بيعجبنا بنشتمه ونقول عليه انه جزمه ورمه ومابدالنا .اللهم لا نسألك رد القضاء ولكن نسألك اللطف فيه.

abumazen said...

صحيح سبع صنايع والبخت ضايع يا نوارة....ناشطة وصحفية ومذيعةو زمبلك وثورية...كل ده كوم وكونك تبقى محامية كوم تانى !!!محامية خايبة قوى يانوارةوالمتهم بتاعك قضيته خسرانة ...الدكتور صفوت داعية اسلامى رائع ولا غبار عليه لكن زعيم سياسى نوووووووووووو....انصحية يا نوارة يخليه فى الدروس والمحاضرات احسن له عشان عملره ما هيبقى عبدالناصر الذى بعث من جديد...السياسة لعبة قذرة عليه ان ينأى بنفسه عنها وهى مش هتخسر كتير

sammar ahmed said...

المشكلة مع د/صفوت حجازي أنه عندما يخطئ فإنه لايسئ لنفسه فقط بل يسئ للدعوة الإسلامية لأنه أحد الدعاة المحسوبين علينا وعلي الإسلام بالإضافة إلي مساهمته في تشويه صورة الثوار وهذه فرصة لن يفوتها الفلول وأعداء الثورة وبالتالي تصريحات حجازي لم تضر أحداً أكثر من الثورة .....عليه أن يعتذر بشكل علني حتي ينفي هذه التهمة عن الثوار وعن ميدان التحرير وحتي لايكون دعاية سئية للإسلام لأنه شهّر بالناس دون دليل

Unknown said...

ناس غامضة وغريبة

hardway said...

نرنر وصفوت أعضاء بارزين في نادي راكبي الأمواج بل أعضاء مؤسيسين لراكبي الأمواج
فلا تتعجبوا ياأهل مصر من أن تدافع راكبة أمواج عن راكب أمواج
لا تتعجبوا

خالد المرسي said...

الأخت الفاضلة نوارة: أنا آسف جدا لو كنتي غضبتي من كلامي لك في التويتر، فأنا لما وجدتك تتكلمين على مزاج السيد الوالد - ابتسامة - مع ما سمعته من الشيخ الذي علق على سبك للسلفيين ظننتك لا تغضبي من سؤالي لك عن كلامه. أرجو ان لا تغضبي وآسف جدا لك

doha shoala said...

عندك حق يا نوارة الشعب دلوقتى مش بيعمل حاجه غير انه بيشتم ف بعضه وكلو بينقد كله وكل واحد فاكر نفسه ملاك!!!! انا ذات نفسى ذهقت
والله زهقت

Anonymous said...

انا مش عارفه انت بتجيبي سيره الناس ليه بس بالاخر بتوصلي لنفس الحقيقه ان الرجل صفوت حجازي رجل مهم و عضيم مقالك طويل و فيه قصه مرتبه لكن هي نفس النتيجه مثل ما سبقت و قلت هو انسان مهم و عضيم عايزين المزيد من امثال

المهندسه ياسمينه said...

الناس دول هيولعو البلد
بقى حد يشتم صفوت حجازى
شيخنا العظيم

Anonymous said...

ربى يجديه على قد ضميره
ويولى علينا من يصلح

noon kiko said...

انا فخوره اوى بيكى وفخوره انى بقرا لحد رائع زيك..سيبك من كل الرغى بتاع الناس..مفيش فايده فيهم وكلامك مش هيغيرهم..معظم النس بقو ماشيين وهما مش فاهمين رايحين على فين

محمد المصرى said...

السلام عليكم.طبعا انا اكتب علشان اعلق عن مقلك عن صفوت حجازى..وعلى فكرة دة اول مرة اكتب تعليق هنا من مدة كبيرة او باختصار من بعد خلع المخلوع ربنا ينتقم منه فى الدنيا والاخرة باذان الله معرفش اذا كنتى فكرة ان انا كتبت تعليقت هنا قبل كده ولو لا ؟المهم للاسف الشديد المشهد الان مؤلم جدا لم يكون كل واحد عايز يظهرنفسه على انه قاضى على راجل يشهد له من اهل الدنياما يكفه ليشفع له عند الله على انه رجل يتقى الله ويخاف الله ولا يريد للنفسه شهرة ولا تلميع اعلامى من احد وانما عرفنه من قبل الثورة من خلال دعوته الى الحق والى الله................واحس من هؤلاء الذين يتكلمون على هذا الرجل كانهم الملائكة وهو الشيطان...........واقول لهم اتقوا الله واتقوا يوما ترجعونا فيه الى الله ثم توفى كل نفس بما كسبت..........على فكرة انا مش مقيم فى مصر ولكنى والله العظيم كنت اتمنى ان اكون مع هولاء الذين ماتوا فى ميدان الشهداء (التحرير).........اتحدوا وانسوا انفسكم من اجل مصر والله العظيم لو كنت املك ان يمنحنى الله الف نفس لكى اموت الف مرة فى حب مصر ومن اجل رافع راية الحق ما ادخرة نفس واحد من اجل الدنيا وشاهواتها......

محمد المصرى said...

السلام عليكم.طبعا انا اكتب علشان اعلق عن مقلك عن صفوت حجازى..وعلى فكرة دة اول مرة اكتب تعليق هنا من مدة كبيرة او باختصار من بعد خلع المخلوع ربنا ينتقم منه فى الدنيا والاخرة باذان الله معرفش اذا كنتى فكرة ان انا كتبت تعليقت هنا قبل كده ولو لا ؟المهم للاسف الشديد المشهد الان مؤلم جدا لم يكون كل واحد عايز يظهرنفسه على انه قاضى على راجل يشهد له من اهل الدنياما يكفه ليشفع له عند الله على انه رجل يتقى الله ويخاف الله ولا يريد للنفسه شهرة ولا تلميع اعلامى من احد وانما عرفنه من قبل الثورة من خلال دعوته الى الحق والى الله................واحس من هؤلاء الذين يتكلمون على هذا الرجل كانهم الملائكة وهو الشيطان...........واقول لهم اتقوا الله واتقوا يوما ترجعونا فيه الى الله ثم توفى كل نفس بما كسبت..........على فكرة انا مش مقيم فى مصر ولكنى والله العظيم كنت اتمنى ان اكون مع هولاء الذين ماتوا فى ميدان الشهداء (التحرير).........اتحدوا وانسوا انفسكم من اجل مصر والله العظيم لو كنت املك ان يمنحنى الله الف نفس لكى اموت الف مرة فى حب مصر ومن اجل رافع راية الحق ما ادخرة نفس واحد من اجل الدنيا وشاهواتها......

محمد المصرى said...

احب اعرفك يا استاذة نوارة ان انا كنت بكتب قبل ذلك باسم ...angel_love40 والان اكتب باسم محمد المصرى او اكس مان...........وعلى فكرة اللى يعرفوا صفوت حجازى خارج مصر يمكن يكونوا اكثر من داخل مصر ..للعلم فقط من خلال اقامة خارج مصر وخارج العالم العربى..على فكرة انا من اشد المعجبين بالسيد الولد الاستاد احمد فواد نجم

youssef_a7med said...

اصبر واللة يا شيخ فانت على الطريق وانظر بقلبك للسماء فواللة ما انت با كرمم من حبيبك سيدنا محمد فقد لقى ما لق وهو محتسب وليصبر معك اهلك فكثير منا يتمنى ان يكون مكانهم فليحتسبوويعينوك واعلم ان كل دقة ونفس لك وليست عليك فهذا هو الجهاد بعينة ولا تلق بالا للماجوريين فى رعاية اللة وحفظة