تحذيرات ومراجعات قبل يوم 30 يونيو

التحذيرات التالية واجبة لكل اللي نازلين سواء مستجد او قديم:

لازم نحط في الاعتبار ان اللي بنواجههم لاول مرة يحسوا انهم بيخلصوا فعلا، وهم مش جيش ولا شرطة، فمواجهاتهم حتختلف عن كونهم جيش او شرطة، الجيش خلاص عرفنا ان مدرعاته مرتبكة، والشرطة بتخزق العينين بالخرطوش

الجماعة وتوابعها مختلفين من حيث التنظيم واسلوب المواجهة وطريقة التفكير، هم تشكيلهم اقرب للمافيا منه لكتلة نظامية زي الجيش او الشرطة

يعني صحيح هم بيجروا بسرعة في المواجهات زي ما شوفنا في الاتحادية واسكندرية والمقطم ورشا عزب... لكن مين قال انهم حيعتمدوا على المواجهة المرة دي.. المرة دي ممكن يلجأوا للمواجهة ويجروا من قدامنا عشان نجري وراهم عشان يخلوا ساحة التظاهر او الاعتصام لمجموعة تانية شغلتها تندس عشان تزرع حاجة، تسمم حاجة... تعمل حاجات كتير انا شخصيا جات في بالي لما قعدت تقمصت شخصيتهم وحاولت افكر بطريقتهم لقيت نفسي طلع في دماغي افكار شريرة كتير، مش لازم اقولها ولا لازم انت لو جه في بالك افكار شر تقولها على النت لان ببساطة ممكن نكون بنديهم افكار.. اه هم بالعبط ده، واظن بعد عشرة سنة رئاسة وست شهور برلمان اتأكدنا انهم بالعبط ده، واوحش انواع الشر الشر الغبي

طيب مبدئيا كده:

الاعاشة:

الاعاشة اكل وشرب لازم تبقى من اماكن معروفة ومراكز معروفة ومعلن عنها في الاعلام، القنوات والصحف يقولوا ان مصادر اعاشة الاعتصام المركز الفلاني، الشخص الفلاني.. والصناديق اللي تيجي يبقى محطوط عليها اسم او لوجو او اي حاجة، والمجموعة اللي بتسلم الاعاشة والمجموعة اللي بتستلم الاعاشة تبقى معروفة ومعلن اساميهم واشكالهم للجميع.. مسئولين الاعاشة في الاعتصام يبقوا معروفين بالاسم والشكل ويعلن عنهم عبر وسائل الاعلام

ممنوع منعا باتا تجيب باكو بسكوت ولا حتى ازازة مية خارج مجال الاعاشة..

ما تشتريش من باعة جائلين..

ما تجيبش من اكشاك حوالين الاعتصام، لو حتجيب لنفسك حاجة وانت جاي تبقى حاجة بعيدة قوي عن الاعتصام، يعني تبقى جاي من الهرم مثلا واعتصامك في الاتحادية تجيب من الهرم

مافيش ست عجوزة تيجي تقول يا حبايبي جايبة لكوا سندوتشات وما تصدق وتقعد تاكل يا طفس زي حواوشي مجلس الوزرا... الست العجوزة اللي جايبة لحبايبها تروح خيمة الاعاشة وتتكلم معاهم وهم يشوفوا حياخدوا منها ولا لا.. ويستحسن ما ياخدوش منها حاجة الا لما تاكل قدامهم من الاكل

لو حتتكسف تقول لست كبيرة كلي من الاكل يبقى ما تاخدش منها حاجة، لو حتتكسف تكسفها وما تاخدش منها، يبقى خده منها وارميه... مافيش اي تهاون في تأمين الاكل والشرب بتاع الناس

اللجان:

كل اعتصام يبقى له مجموعة مسئولة عن اللجان الشعبية لتأمين الاعتصام ده كلنا عارفينه، المرة دي المجموعة دي بقى لازم اسماءها وصورها يتم الاعلان عنها في الصحف والفضائيات عشان يبقوا دول مسئولين الامن في الميدان ويبقى لهم خيمة مكتوب عليها الامن، عشان اللي عايز يتطوع يأمن في اللجان يروح لهم ويسلم بطاقته هناك يصوروها ويبقوا عارفينه، واللي يشوف حاجة غلط في الميدان او مقلقة يروح يبلغ امن الميدان

الحاجة التانية لازم يتم عمل مسح بشكل دوري الصبح وبالليل للاعتصام، ولازم يتم تفتيش الخيم

عشان نبقى واضحين مع بعض، تفتيش الخيم مش عشان مصادرة الحاجات اللي الناس جايبها تحمي بيها نفسها لو الاخوان هجموا.. يعني مش معقولة الاخوان يهجموا زي يوم الاتحادية بالالي والناس ما يبقاش معاها براشوت حتى تدافع بيه عن نفسها

تفتيش الخيم ده المقصود منه ان لو مزروع حاجة مش تمام في المكان ممكن تئذي المعتصمين

ملحوظة هامة: اهلا وسهلا باي مستجدين، بس الاعاشة واللجان ممنوع منعا باتا اي حد من المستجدين يبقى مسئول عنها.. اولا ما عندهمش خبرة، ثانيا احنا عارفين دول مين؟

القدام هم اللي يبقوا مسئولين عن الحاجات دي.

التشكيلات:

في حاجة دي مخصوص للقدامى المحاربين بس

انت لازم تقعد مع نفسك نص ساعة كده، تتخيل نفسك انسان وسخ ومجرم، وخلاص بتتسلم وتفكر لو حصل ده معاك حتعمل ايه؟ فكرت؟ اهي كل الافكار السودا دي حطها احتمال ان الاخوان ممكن يعملوها.. وما تنشرهاش على النت زي ما بنعمل كل مرة، هات مجموعة من صحابك، افصلوا باطريات الموبايلات، وحطوا الاحتمالات دي في ورقة، وحلول الاحتمالات دي، وشكلوا مجموعة للتصدي لهذه الاحتمالات.. لما الناس تعتصم ويبقى في خيمة امن الميدان، تروح انت والمجموعة بتاعتك ويا اما تطرحوا الحلول، يا اما تتطوعوا تأمنوا

----------

تعليمات هامة للمستجدين:

1- تمشي شايل خطين موبايل كل موبايل يبقى مشحون للآخر، ويبقى معاك لكل موبايل بطارية احتياطي مشحونة.. الموبايل الاولاني ده العادي بتاعك اللي كل الناس عارفاه ويبقى في ايدك.. الموبايل التاني يستحسن يكون جديد خالص، لسه شاريه وماحدش يعرفه غير القريبين بس، مامتك.. مراتك.. المحامي بتاعك.. كده المهم ما تديهوش لاكتر من تلاتة اربعة بالكتير قوي

الخط ده، تبقى مخبيه بحيث لو لا قدر الله اتخطفت ماحدش يعرف يوصل له غيرك.. وتبقى محضر فيه رسالة: انا اتخطفت، وتبعتها لاهم شخص ممكن يعرف يتصرف وتبقى محضرها على الارسال

2- ما تمشيش لوحدك مهما حصل.. تمشي في مجموعة، لو مروح يبقى ما تمشيش لوحدك ابدا، حتى لو رايح تركب مواصلة او تاكسي او عربيتك، يبقى معاك اتنين يوصلوك للركوبة ويرجعوا هم 

3- تجنب الشوارع الجانبية على قد ما تقدر

4- ما تركبش تاكسي ولا مواصلة من قدام الاعتصام.. اطلع على الشارع وخد مواصلتك

5- تمشي شايل في جيبك ورقة فيها اسمك وعنوانك واهم تليفون الناس تتصل بيه لو حصل لك حاجة، وفصيلة دمك

6- في حالة الاشتباكات اقف ورا المشتكبين وما تجريش.. ما تجريش ما تخافش.. مش حيحصل لك حاجة، اللي واقفين قدام دول مش كاوركات عشان تخاف يخطوهم ويوصلوا لك، دول وقفوا في وش جيش وشرطة ورانين الاخوان سبعين قفا على سهوة.. بس نفسيتهم بتحبط لما يبصوا وراهم يلاقوا كل اللي نزلوا روحوا.. بلاش ندالة، مش تبقى ما بتتصدرش في الاشتباكات وكمان تروح.. ما تكشفوش ضهر الناس ويموتوا عشان خاطركوا وبعدين ترجعوا تشتموهم وهم ميتين وتقولوا عليهم بلطجية ومنهم لله خربوا البلد... فاكرين؟ حق الله المفروض انتوا اللي تتصدروا في الاشتباكات دي

كمان احتمال تكون الاشتباكات دي بهدف اخلاء الساحة الخلفية لناس يزرعوا اي حاجة خطر.. وهروبكوا بيسهل مهمة المتسلل، لما العدد يبقى كبير صعب حد يتسلل

ملحوظة للمشتبكين:

بص يابني.. حق الله اللي نازلين جديد ورافعين شعار "كفاية عك" على اساس ان احنا بقالنا سنتين ونص بنعك هم اللي يتصدروا في الاشتباكات، مش احنا اللي عكينا وهم اللي نازلين يصلحوا عكنا؟ طب ما يشتبكوا ولا مافيش غيرنا يموت يعني؟ بس بما ان انا وانت وهم عارفين انهم لا حيشتبكوا ولا نيلة، يبقى اقل واجب عليهم انهم ما يجروش ويقفوا في ضهرك.. بصيت وراك لقيتهم روحوا وقف الاشتباك وروّح

روّح

انت تموت عشان ناس بتسيبك ليه؟ هو انت نازل مستفيد حاجة؟ هم نازلين عشان اكل عيشهم، وانت نازل عشان اكل عيشهم لان اكل عيشك انت اتقطع خلاص من زمان.. يبقى يقفوا زي الناس في ضهرك لو مشيوا خد بعضك وارجع............... بجد

المرة دي مش حينفع مية ميتين بني ادم يفضلوا في الاشتباكات والاعتصامات والباقي روّح.. المرة دي لو العدد الكبير روح العدد الصغير اللي بيلزق في كل اعتصام واشتباكات لازم يرجع فعلا.... لازم يرجع فورا ما يفضلش مخلوق.. يا نعيش عيشة فل يا نموت احنا الكل

لان اولا وجودك مالوش لازمة ومش حيحل حاجة مدام العدد قليل ومش حتمشي الاخوان بالعدد القليل

ثانيا حتموت.. وبصراحة، المرة دي بالذات ماحدش لا من النازلين ولا من اللي منزول لهم يستاهل تموت عشانه.. مش كل ما يتزنقوا في دور واحد ميت يجيبوك انت وصحابك.. وياريتهم لما بتموت بيترحموا عليك حتى

وتاني بكرر: عايزين تمشوا الاخوان تفضلوا باعداد كبيرة في الاعتصامات والاشتباكات ليل نهار.. عايزين تتسلوا وتنزلو ياي مزاهرة سو كووووول وبعدين تروحوا اخر النهار عشان تاخدوا الشاور بتاعكوا وتشربوا الاربال تي قدام ام بي سي ماكس.. يبقى قولوا لنا عشان نوفر تعبنا وشقانا ودم اللي نازلين شايلين اكفانهم

الاعتصام بالليل لازم يبقى عدده زي عدده بالنهار.. مش زي اعتصام الاتحادية اللي الصبح مدارس الولاد، والضهر باحضر الغدا، والعصر باودي العيال التمرين، وبعدين تنزلوا انتوا والعيال الاعتصام من المغرب للعشا تاكلو فشار وغزل البنات وتروحوا وتسيبوا الناس.. كده مش حينفع.. كده مش حينفع

وباقول للثوار الكلام ده لو حصل من اول يوم لم خيمتك وامشي يابني.. انت مش كسبان لو الاخوان قعدوا ولا كسبان لو مشيوا.. انت فقري اساسا وعمرك ما كسبت وبس نازل عشان المبدأ والاخلاق والبلد اللي ضاعت والبيوت اللي اتخربت.. لو الناس مش حتدافع عن بيوتها اللي اتخربت وتقعد وترابط انت كده كده بيتك مخروب.. لو مشيوا روّح

شوفوا انا عمالة اكرر في نفس المعنى بعدة صياغات ازاي؟ 

على الله بقى اللي بحذر منه ده يحصل بعد كل اللت والتكرار ده

7- جبهة الدفاع عن متظاهري مصر حتنزل ارقام تليفونات محامين قبل الاعتصام بيوم او يومين تابعها وسجل الارقام دي على التليفونين اللي معاك واكتب اسمك وبيانات في رسالة ومعاها كلمة انا اتخطفت وحطها على الارسال مع رقم التليفون اللي انت حتبعته لاي حد من قرايبك

8- ما تتصحابش على حد من النت.. خصوصا لو انت في الفترة الاخيرة نشط ضد الاخوان وحد باعت لك على الفيك بوص او الطنيطر يقولك ازيك سلامات حاشوفك في المظاهرة.. مش وقت شقط الله يكرمك خالص.. ولا وقته تضرب صحوبية مع ناس ما تعرفهمش.. مهما كان بيشتم في الاخوان، اغلب صحابنا اللي اتخطفوا كانوا متصاحبين على ناس من النت بيشتموا في الاخوان وقبل لما ينزلوا كانوا مدينهم معاد يقابلوهم

9- في ناس بتندس في الاشتباكات شغلتها تجري.. اه.. بتبقى واقفة ورا المشتبكين بس قبل الناس اللي ورا خالص، وفجأة تروح جارية عشان تجرّي الناس... طول ما انت مش شايف قدامك حاجة، لا قنبلة ولا رصاص ولا براشوت قريب منك يبقى ما تجريش.. واقف مع كذا حد رافع ايدك وقول: اثببببتتتتت... اثثثبتتتت... الا اذا سمعت صوت طلق رصاص قريب منك.. يبقى تنتحي جانبا ناحية الرصيف وترجع ورا شوية... مش كتير.. واوحش حاجة الجري.. ممكن تموت تحت رجلين الناس مش من الرصاص

10- احنا نازلين نمشي الاخوان... مش كل واحد ينزل يطالب بجوز خالته رئيسا.. اي حد يرفع صورة لحد، او شعار غير اسقاط النظام يترن علقة ما اكلهاش حرامي في مولد

--------

دي تعليمات حركة تمرد نزلتها برضه اطلع عليها مفيدة للمستجدين

دي اسعافات اولية برضه للمستجدين اللي مش عارفين الاسعافات

أخيرا للمستجدين:

ما تخافش.. دي تعليمات أمان ضروري وفي الاخر ربنا بيسلم، ما احنا قدامك اهو نزلنا ورجعنا زي القرد اغلبنا... يعني فيه ناس استشهدت وناس اتصابت بس اغلبنا رجع سليم.. بعدين اللي اتصاب واستشهد ده كان عشان هو انسان كويس... كويس قوي بطريقة تخليه اصلا ما يخافش من الموت... لكن مدام انت خايف مش حيجرا لك حاجة.. عشان انت كده تبقى مش كويس قوي يعني لدرجة انك تستشهد :)

ما تخافش ربنا مش حيقدر عليك الا المكتوب لك، والله حاولنا نموت اكتر من مرة وفشلنا، العمر ده زي الصاحب اللزج مهما تزق فيه ما يسيبكش

وبعدين انتوا حتبقوا ورا.. يعني ان شاء الله مش حيجرا لك حاجة

ومعاك رجالة ويعرفوا يحموك كويس.. بس ما تكشفش ضهرهم

مرسي في ماتش اعتزاله: زمن اللللللللللل خلاص انتهى

انتوا قافشين قوي في موضوع اننا نمشي الاخوان ده؟ اصل انا راجعت نفسي ولقيت ان ماحدش ممكن يضحكني كده... طب ممكن تمشوهم وتعملوا لهم قناة فضائية مخصوص يطلعوا عليها 24 ساعة؟

استغفر الله العظيم.. ليه يا رب كده العبيط ده؟ احنا كنا عملنا ايه عشان ده كله؟ يا رب ده احنا غلابة يا رب

شوفتوا ال.... هو ده كان ايه؟ مؤتمر ولا احتفال ولا اجتماع ولا ايه؟

هو مما لا شك فيه ماتش اعتزال مرسي بالصالة المغطاة... : الف شكر.. الف شكر.. الف شكر.... الف شكر.. الف شكر

ده بالنوسبة للخطيب... بالنوسبة لك انت يا مرسيخ.. تسعين مليون شكر حصلت في هاذوها الماشت

ماشت الاعتزال ده يليق بمرسي وجماعته

والملحوظ ان حزب النور ما شاركش في حفل التأبين ده وواحد اخوان كتب على التويتر عاتبا على حزب النور: حد يقول لحزب النور ان المؤتمر ده معمول ضد الشيعة

هو الحقيقة المؤتمر مش معمول ضد الشيعة... ولا السنة، هو معمول عشان يخطب ود امريكا عشان ما تتخلاش عنه يوم 30/6 الجاي

اهبل ان اذا كانت امريكا بتمشيه فاحنا اللي بنمشي امريكا واللي يتشدد لامريكا... هو حييجي اغلى من مبارك؟ 

حفل التأبين بدأ براجل لابس خليجي بس بيتكلم مصري وبيقول الحمد لله الذي امد في عمري حتى حكمني رئيس مسلم! 

يا دين النبي وكل المحمدات اللي حكمونا دول طلعوا هندوس؟ على كده مرسي سيخ... محمي

وطبعا قعدوا يشتموا في الشيعة شوية لدرجة حتضايق امريكا نفسها لان ده خطاب كراهية وامريكا عندها ناخبين بيحاسبوها على الكلام ده

لا ومحمد عمارة بيقول نظام سوري فاشي.. على اساس ان النظام المصري بيرأسه فنان تشكيلي، وعاصم عبد الماجد الارهابي بينظر لمصر وبيتكلم عن سيادة الدولة وكدزه.. قال محمد عمارة بيتكلم عن الفاشية وقاعد جنبه عاصم عبماجد... ده ربنا له حاجات يا جدع
وبالمناسبة مرة عاصم عبد الماجد قال على البلاك بلوك ارهابيين... 
ثم ختمت بخطبة محمد حسان
ولي هنا عتب على كل الحضور الكريم... ازاي ماحدش سأله: فين الفلوس اللي لمتها يا شيخ حسان؟
هاه؟ هاه؟ هاه؟ ده انا كنت حانط جوه التلفزيون عشان اسأله
حسان بقى قال ان الجهاد في سوريا واجب شرعي بالمال والسلاح والنفس... طب ما تروح يا حسان، ما معاك الفلوس اللي لمتها ولو اخدت في ايدك الاربعين الف اللي كانوا في الصالة المغطاة ورحتوا سوريا احنا مسامحينك في اللي لميته ولك عندي انشك في لساني ان سألتك فين الفلوس اللي لمتها يا شيخ حسان تاني لو خدت بعضك ورحت جاهدت.

انا عايزة افهم هم كانوا بيعملوا ايه؟ كانوا بيحاولوا يحببوا المصريين في الاخوان عن طريق سوريا ولا بيكرهوا المصريين في سوريا واللي جاب اللي جابها؟
انا اكاد اجزم ان نص الشعب المصري لما سمع الخطاب ده بقى شيعي وبعد ما بقى شيعي ألحد وبعد ما ألحد قعد يدعي على سوريا وهو كاشف راسه.. ده بيقول ادعم سوريا بالمال!
مال ايه يافنجري البق احنا لاقيين ناكل؟ بقى تخلي كيلوا الخيار باربعة جنيه وكيلو العنب بتمانية جنيه وكيلوا البصل بخمسة جنيه وتشفط السولار وتقطع الكهربا وتضيع المية عشان تدفع فلوس لسوريا؟ طب وبالنسبة للشعب المصري الشقيق؟ مالوش حاجة ده؟
انت بتوقع بينا وبين السوريين؟ المصريين كده حيكرهوا السوريين
مش كفاية اللي عملتوه في فلسطين؟ السادات عمل معاهدة سلام مع اسرائيل والمصريين ما نسيوش القضية الفلسطينية، مبارك بذل كل جهده عشان يكره المصريين في الفلسطينيين لمدة تلاتين سنة اكمنه كان حبيب اسرائيل وكنزها الاستراتيجي وفشل فشل ذريع واحد اسباب الثورة عليه موقفه من الفلسطينيين.. المصريين اول ما مشي مبارك راحوا عند سفارة اسرائيل واتشعلقوا وشالوا علم اسرائيل... واول ما مرسي مسك في ظرف سنة واحدة مش لاقية مصري طايق سيرة فلسطين ولا الفلسطينيين... والجديد اني بقيت اقابل فلسطينيين عايشين في مصر بقوا مش طايقين سيرة فلسطين.. كرهت الناس في قضيتها
طب دمرتوا القضية الفلسطينية.. ايه اللي بتعملوه في السوريين ده؟ احنا بينا وبين سوريا تاريخ مشترك.. عايز الجيش المصري يحارب الجيش السوري بعد ما كانوا بيحاربوا مع بعض في 73؟ احنا نحارب السوريين احنا؟ ننشك في معاميعنا لو عملنا كده... لما يبقى في حرب اهلية في مكان والمكان ده غالي زي سوريا ما نروحش نساهم في القتل خصوص ان الناس مش ناقصة كل من هب ودب داخل بلدهم يقتل اي حد يشوفه معدي... وبعدين يقول لا مكان لحزب الله داخل سوريا.. صح.. بعدين يقول احنا مش بنتدخل في الشأن الداخلي، بعدين يقول انه بيعلن الجهاد لنصرة سوريا وعايز يبعت الجيش يحارب في سوريا.. طب انت البعيد مضروب على دماغك من زمان، الاربعين الف معتوه اللي قعدوا يصقفوا على الكلام وعكسه دول كلهم مخبوطين على دماغهم؟ هو شرط للانضمام للجماعة؟
وجيش ايه اللي عايز تبعته سوريا؟ هو احنا حنبعت الجيش سوريا ولا اثيوبيا ولا القدس؟ وهو الجيش ده ساكت كده ليه؟ مالوش قيادات تقول له اقف عند حدك انت كل اسبوع تعلن الحرب على بلد شكل؟ ولا هم اخوان راخرين؟ 
وبعدين هو مش لما راح لروسيا قالهم احنا موقفنا من سوريا زي موقفكوا بالظبط؟
الابعد عارف موقف روسيا ايه؟ بتبعت سلاح لبشار... 
وشفتوا الشيخ عبد المقصود الامنجي اللي اخوه ظابط امن دولة وبيخوض في اعراض الناس على شاشات الفضائيات وطالع يدعي علينا كأننا اسرائيل؟ 
اسرائيل ايه؟ دول ما جابوش سيرة اسرائيل خالص.. وعبمقصود اللي حرق سعرات حرارة في الدعا علينا ده ما جابش سيرة اسرائيل 
لا الفارة طاهرة ولا دعوتها مستجابة يا عبمقصود.. والدعاء اللي دعيته علينا بالافتراء علينا ووصفنا اننا دعاة الكفر مردود عليك بأمر الله وعلى كل من أمن وراك.. ولكم بمثله
وعبمقصود قالك مصر اهلها في رباط الى يوم القيامة ههههههههههههه ناس ما عندهاش اخلاق ولا دين... السلفيين كلهم بيكذبوا الحديث ده، وبيكذبوا كل الاحاديث في فضل مصر... دلوقت بقيت تعتبر بحديث كلكوا بتكذبوه عشان لك مصلحة؟ 
وكله كوم والمطرب الاوبرالي اللي غنى وقال سنرفع السبابة.. ساعتها كل الشعب رفع له الوسطى
بس انا عرفت الناس بتنضم للجماعة ازاي؟ بيبقوا اصلا ناس عندها وهم انها موهوبة في الشعر او الغنا او التمثيل، وطبعا بيفشلوا، لما بيفشلوا بيخشوا الجماعة واخوة الاسلام بقى يستحملوهم... طب واحنا نستحملهم ليه؟ ده حتى عبمقصود قال علينا وهو بيدعي علينا اننا دعاة الكفر والالحاد.. ذنبنا ايه احنا نستحمل الابداع الفني بتاع مطرب السوبرانو الاول مرة ورقصة المغير مرة وشعرم انا مش خروف مرة؟ 
ثم إن مرسي لو ما مشيش عشان هددنا وحرض بالعنف علينا كلنا وقال علينا فلول وهم اساسا اللي قالوا احنا مش حنشارك يوم 25 واللنك اهو لتكونوا نسيتوا ولو مامشيش عشان بيهلوس ولو ما مشيش عشان عامل جيشنا ملطشة وكل شوية يعلن الحرب من دماغه... يبقى يمشي عشان قال: الآنُ بالضمة

ابلغ رد مؤقت عليك يا مرسي الدبانة اللي عفت عليك وعرفتك انت ايه بالظبط

واجمد حتة لما قال: المسلمين والمسيحيين في مصر يدعمون سوريا
هو المؤتمر ده كان فيه مسيحيين؟ ولا اكتفوا بمحمد الصاوي؟

سؤال الحلقة:
ما هي الدولة التي سيعلن عليها مرسي الحرب في الاسبوع القادم؟ ده اذا فضل للاسبوع القادم

حسن مصطفى اخد سنة وانا جاي في بالي اهزأنا

حسن مصطفى للي ما يعرفوش هو اللي طلع صورة خالد سعيد واول من نشر حكايته

وحسن مصطفى عمره ما تخلف عن وقفة ولا فاعلية من قبل الثورة وكان من اللي بيحشدوا للوقفات اللي بالاسود.. فاكرين لما كنا بنقف بالاسود عشان خالد باصين للبحر او النيل ومديين ضهرنا للشارع؟ واحمد موسى بتاع الجمهورية كتب يقول اننا ماسون؟ كان حسن من اللي بيحشدوا وبيدعوا الناس للوقفات دي

وحسن عمره ما اتأخر عن حد، ووقف جنب ناس كتير

وحسن نوارة اسكندرية فعلا

اخد سنة في قضية تحمير خدود وكيل النيابة 

كان اتقبض عليه يوم 27 يناير اللي فات في احداث اسكندرية، ولسبب ما قرروا يتبلوا عليه بانه اهان هيئة قضائية وقالوا انه ضرب وكيل النيابة والطب الشرعي قال ان وكيل النيابة خدوده حمرا! 

الحكم الاول كان سنتين، ولما اتخفف بقى سنة

حسن قضى 5 شهور، كده يبقى فاضل له 4 شهور ويخرج مظلوم من سجن ظالم في قضية ظالمة

وده لان الثورة نجحت الحمد لله، ولان العدل بياخد مجراه زي ما كلنا شايفين

والاخوان بيبرروا الكلام ده باننا احنا اللي حوشناهم يطهروا القضاء، وهم بينسوا ان احقاقا الحق القضاء مالوش دعوة.. النيابة هي اللي بتحول للقضاء قضايا فستك... بادلة فستك.. والنيابة بالذات هي الحاجة الوحيدة اللي تحت ادارتهم وادارة المرشد بالتحديد.. والا ازاي في احداث المقطم احنا نتحول جنايات والمغير وعبد الشاطر هز مطلوقين على البشر؟

الخلاصة... حسن اتحبس

السجن للجدعان، وكلها اربع شهور ويطلع لنا بالسلامة.. بس الظلم مر يا ناس.. الظلم مر قوي

ربنا ما يوري حد.. اقصد ما يوري حد غيرنا، بالنسبة لنا احنا خلاص اتعودنا على موضوع الظلم ده وحبينا الموضوع قوي من اغسطس 84

ليا رجاء:

والنبي.. سايقة عليكو النبي، وموسى نبي عيسى نبي محمد نبي وكل من له نبي يصلي،

والنبي ما تقعدوش تقولوا على حسن "ايقونة الثورة" و"رمز" البتنجان وحبظلم الافشخانات

عشان حيطلع من السجن وبعدها بشهر حتقعدوا تشتموا فيه زي ما عملتوا مع علاء ودومة ومالك وغيرهم وغيرهم.. ما انتوا اصلكوا ناس قليلة اصل... معلش احنا بنتكلم يعني مافيش حاجة ومافيش داعي للزعل يعني الواحد يزعل من الافترا لكن انا باقولكوا الحقيقة

انتوا ناس قليلة اصل

دلوقت عاملين افشخنات عشان حسن مصطفى وبس يطلع من السجن تطلعوا ميتين ابو اللي جاب اللي جابه وتقعدوا تشتموا فيه وتتبلوا عليه ولو طلع في التلفزيون وهو لسه خارج من السجن تقولوا له نشطاء التلفزيون زي ما عملتوا مع كل الناس.. كل الناس، وياريته كلام حقيقي، الا كله افترا وصرم ابوكوا اللي مولع ازاي ده يطلع في التلفزيون وانا ما اطلعش

ايوه ايوه.. المرة دي باهزأ الثوار مش الاخوان ولا الفلول ولا الكنباوية

تصدقوا انا حبس حسن ده اخدته وبلعته من ضمن المصايب اللي بتحط علينا، لكن اول ما شوفتكوا على الفيك بوص والتويتر عاملين المناحة اللي اتعملت على علاء اللي بتشتموه دلوقت، واتعملت على دومة اللي ما بيلحقش يخرج عشان يخش تاني، ومع ذلك في العشر دقايق اللي بيخرج فيهم من السجن بتألفوا عليه قصص وروايات وناس تانية كتير، شوية فاكراهم ومش عايزة اقول اساميهم، وشوية مش فاكراهم بس فاكرة احساسي وانا باقول بيني وبين نفسي: يا واطيين يا قلالات الاصل ياللي الصرم ولع لكوا في ذواتكوا المتضخمة

قعدت ابص على النواح اللي على حسن واقول استنى بس يا حسن لما تطلع وتشوف حيعملوا فيك ايه لو بس فتحت بقك

وعلاء اللي كان افتار لكل البشريات بقى هو السبب في كل حاجة حصلت للبلد.. هو السبب في الموجات الحارة

ودومة ده بيبقى بطل وهو في السجن واول ما يعتب برة السجن تقولوا عليه امنجي 

اسماء محفوظ جدعة وهي بتشم غاز.. وبنت ستين في سبعين لما تبقى حامل ومش قادرة تتحرك وعايزينها تنزل مظاهرة وهي حامل.. لو فيكوا راجل ينزل مراته المظاهرة وهي حامل يبقى يشتم في اسماء محفوظ.. ولا هي لازم تعمل اعلان انها حامل وظروفها صعبة؟ وما عكمتش ولا حاجة، والا لو كانت عكمت ما كانش جوزها اضطر يسافر في عقد عمل عشان يجيب فلوس لابنه ولا بنته اللي جايين

حتى رشا عزب.. رشا عزب ذات نفسها.. تضرب المغير تبقى جدعة، تخش تنام ساعة تبقى ندلة

وانا لما انضرب، كالعادة، ابقى بميت راجل، ولما يعدي عليا اسبوع ما حصليش اي مصيبة ابقى بنت ستين كلب وليه اتحقق معاها وما اتحبستش! حاضر.. حنبقى نوصي على الموضوع ده في جلسة 6 يوليو

هو انتوا متخلين ان المصايب حتبقى كونتينوس؟ 

طب وانتوا مصايبكوا مش كونتينوس ليه؟ 

ده بدون ذكر اسماء ناس قعدت تقول على ناس ما: هو عشان اتصاب في الثورة حتعملوه زعيم؟ مش معنى انه اتصاب انه بيفهم في السياسة وتحطوه في مجلس ولجنة وبلا بلا بلا

ده كان ايام محمد محمود...

وهو احمد حرارة بدون ذكر اسماء.. اقترحنا اسمه في لجنة تتكلم باسم الميدان هو ومالك مصطفى وعلى اللي اتعمل فينا بسبب الصرم والذوات المتضخمة.. بس انا ما بارضاش اقول عشان ما اتعبش نفسيتهم.. وما يحسوش انهم ضحوا باغلى حاجة ممكن يضحي بيها انسان عشان ناس ما تستاهلش.. هو انا قلت؟ انا قلت اه

وارجع واقول يابت معلش.. حوشي لسانك عنهم.. استحمليهم.. ماهم برضه جدعان.. ماهم برضه شافوا كتير.. ماهم برضه اتبهدلوا كتير.. ماهم برضه كل اللي يعرفوهم يا الله يرحمهم يا الله يشفيهم يا الله يفك سجنهم.. ماهم برضه بيسمعوا كلام يسم بدنهم من اهاليهم وجيرانهم وزمايلهم لمجرد انهم ثوار

طب بس كلنا بنسمع كلام زي السم.. نطلعه على بعض ليه؟

انا بس حبيت اقول الكلمتين اللي في قلبي دول عشان اقول لكوا حاجة واحدة:

لايموها بقى.. اوعى تفتكر ان "الثورة بتكسب مؤيدين جدد" والخيالات اللي انت عايش فيها دي.. مافيش مؤيدين جدد.. كل واحد بيركب علينا بيبقى عايز مصلحته.. ومن الاخر احنا مالناش الا بعض، والذوات المتضخمة دي مالهاش اي معنى ولا قيمة خصوصا لما نمارسها على بعض، وكفاية علينا اللي بيتعمل فينا ولسه حيتعمل فينا

ولا انتوا فاكرين البهدلة حتخلص بالخلاص من الاخوان؟ هأ

انسى يا عمرو.. ده قضاء الله وقدره.. فبلاش نعمل في بعض حاجات تشيلنا من بعض عشان في الاخر كل واحد فينا حيتزنق ويحتاج للتاني

وانت النهاردة متضامن مع حسن مصطفى.. بكرة تحتاج حسن زي ناس ياما احتاجوه وما كسفهمش

وعشان بس ما نقعدش نلوم في كل الناس اللي حوالينا، الاخوان اوساخ، والكنابوية اندال، والفلول انجاس.. واحنا مخاليل رسمي وعندنا جنون العظمة وكل واحد شايف نفسه جيفارا وماو تسي تونج وهوشي منه وكيندي ومانديلا مجمعين على بعض.. وكل واحد شايف نفسه هو اللي خرطه الخراط واتمدد مات

ولاننا ماعندناش فرصة نطلع غلبنا لا في اخوان ولا فلول ولا كنابوية فبنطلعه على بعض... شاطرين

انا حاكتب اسماء اللي حاطين صور حسن مصطفى دلوقت واذا ربنا كتب لي عمر حراقبهم عشان ابقى اقفش ابوهم لما يطلع ويقعدوا يشتموا وينظروا عليه

ومش معنى ان واحد اتحبس يبقى فوق البشر، ما كلنا بنتحبس واتحبسنا.. المعنى المقصود ان بلاش قلة اصل... ده اخوك ده.. واكيد له اعذار.. وفي الاخر مالكوش الا بعض.. وفي فرق انك تختلف معاه وانك تجرسه.. وافتكر له ايام حلوة

اكتر من واحد طلع عميل للاخوان وشهد زور على حاجات انا شوفتها ودلوقت بيقرن لهم واتفضح قدام الكل وانا مش باحفل عليه؟ عشان فيه عيش وملح.. وعشان كان حيموت اكتر من مرة.. اه ما عنديش ثقة فيه، بس مش لازم افرش لحمة على السفرة واقعد اكل فيه

بلاش ده كله.. مش حاقول بقى على الثوار اللي نزلوا واتبهدلوا معانا.. حد سمعني باشتم في وائل قنديل على كل دفاعه عن الاخوان؟

عارفين ليه؟ عشان وقف جنبنا في الاضراب عن الطعام بتاع مجلس الشعب وقت ما كل الناس اتخلت عنا.. وانا مش قليلة اصل عشان انسى حاجة زي دي.. مش حاسمع كلامه، ولا اثق فيه تاني.. لكن مش حاشتمه كرامة للي عمله معانا

يبقى احنا اولى ببعض نرحم بعض شوية
نرحم بعض شوووووويييييييييييةةةةةةةةةةةة
فلان انت عارف انه جدع ومش بيتأخر.. جه في يوم اتأخر.. مش لازم تفتري عليه وتطلع ميتين امه انت ما تعرفش ظروفه، بدل ما تجرسه على النت اتصل اسأل عليه واطمن عليه... او ارحمه من لسانك حتى
فلان انت عارف اخلاصه... عمل موقف مش ولابد.. انصحه في المداري.. سمع سمع ما سمعش خلاص ما كفرش يعني.. هو انت منزل؟ ما يمكن انت اللي غلطان.. ويمكن الايام تثبت لك ان الموقف اللي انت قلت عليه وسخ طلع صح.. الله اعلم
وبلاش مسح كل حاجة كده عشان موقف واحد... واحد طول عمره هاري نفسه جه في يوم وخستك.. تبني على الموضوع ده نظريات: وانت شربت شاي بالياسمين.. وانت بعت.. وانت بتحشد الناس وتتخلى عنهم.. واحنا لازم نبتدي نغير دم.. ايه ايه ايه ايه؟ ايه القرف ده؟ لما احنا بنتربص ببعض كده امال العدو له حق بقى يعمل فينا اكتر  من كده

لو سمحتوا.. بلاش افترا وصرم.. واحنا بنغير من بعض على ايه؟ على الاملة؟ الا مافينا حد مسك رئيس مراجيح مولد النبي حتى

انا عمري ما كنت خروف.. ولا ف مرة طلعت صوف

الاخوان نزلوا عصيدة جديدة عشان يرفعوا من روح الاخوان المعدنية.. والشخص اللي سمع العصيدة دي وفضل في الاخوان يستاهل اي حاجة تحصل له بعد كده

العصيدة بعلوان انا اخوان:
أنا إخوان.. أنا عمرى ما كنت خروف.. ولا بمشى ورا الإجرام.. وأنا عمرى ما هشتم حد.. وأنا عمرى ما اكفر حد أنا إخوان.. وكل المسلمين إخوان.. ما دام السنة منهجهم مع القرآن.. وأنا إخوان وكنت الصاوى بالميدان.. وبفلسطين أنا الياسين وأنا الرنتيسى والقسام.. وأنا اللى جاهدت فى الشيشان.. وبالأفغان أنا عزام.. وأنا إخوان رفضت الظلم والطغيان فى عهد فاروق وقبله فؤاد.. وبعده جمال وبعده سادات.. ومات الكل وأنا عايش.. وأنا إخوان أنا إخوان طريقى جهاد وأمنيتى أنا استشهاد.. وأنا إخوان أنا سلفى وأنا صوفى وأنا سياسى وأنا رياضى وأنا فنان.. وأنا بالليل مع الرهبان. وفى الجبهة مع الفرسان.. أنا إخوان وبتحارب من اللى خان وم الإعلام وكان بيقولى يا محظور.. وكان خايف من السلطان وكان قبلى مهوش قادر يقول كلمة.. ودلوقتى يقول خرفان ويرمينى بميت تهمة وميت صفقة

انتهت العصيدة

لا حول ولا قوة الا بالله... 
هي دي عصيدة تأبين الاخوان زي تأبين مدام كوثر كده؟

يا مدام كوثر يا مدام كوثر
انا متعكنن انا متحسر
جاي بعزي بنتك سامية
يا احسن واحدة بتعمل بامية
مين في المكتب مش متأثر
حتى الماج بتاعك اتكسر
يا مدام كوثر يا مدام كوثر

احنا لو ما شيلناهمش عشان كل الفشل اللي هم فيه لازم نشيلهم عشان الشعرم اللي كتبوه

كن مع الثورة

بالنسبة للي عاملين ثوار وبيقولوا مش حننزل مع الفلول:

والله اذا ما كنتوش اخوان خلايا نايمة، وانا اشك في ذلك، فحضراتكوا ناس خونة وانانية... انتوا خايفين الاخوان لو مشيوا ييجي نظام يعمل فيكوا مصيبة

طيب انا اقولكوا... انا ما عنديش اي مشكلة ييجي نظام يشنقني في ميدان عام، بس يأمن منابع النيل، ويرجع سينا، ويأمن قناة السويس
وللاسف السبب في ان مطالبي تدنى كده هم الاخوان اللي انتوا بتدافعوا عن استمرارهم، ولما تقول مش نازل عشان فيه فلول نازلين تبقى بتدافع عن استمرار الاخوان

احنا كان مطلبنا عيش حرية عدالة اجتماعية، بعد سنة ونص من الحكم العسكري بقى مطلبنا: خرج المعتقلين يا مرسي وعيد المحاكمات، بعد سنة من حكم الاخوان بقى مطلبنا: دوروا لنا على مصر ورجعوها تاني.. وقعت منا في البلاعة

انما انتوا ما اتئذيتوش من الاخوان، وغالبا مش حتتئذوا لانكوا غالبا اخوان.... او مش اخوان بس بتحترموهم... ويمكن لو جه نظام تاني نعيد الكرة من جديد والمرة دي امن الدولة والمخابرات عارفة اساميكوا وشوشكوا فانتوا خايفين على نفسكوا، طبعا دي خيالاتكوا المريضة، ان شاء الله مش حيحصل لمصر غير كل خير، انما موقفكوا بيبين وساختكوا.. ومش مهم البلد دي تنقرض باستمرار حكم الاخوان فيها.. صحيح احنا مالنا؟ هي كانت بلدنا؟

انا ما عنديش ادنى ثقة في اللي عامل ثوري وبيقول مش نازل يوم 30/6 ولا حاوقع تمرد عشان في فلول نازلين

وعندي تصور شبه يقيني انهم اخوان، بصرف النظر ان فيه منهم ناس نزلت معانا اشتباكات فعلا، ممكن نازلين يراقبونا، او ده دورهم يندسوا وسطنا زي الواد ده... بس هم اخوان، والا ايه معنى الكدب والتضليل ده؟
هم عارفين كويس قوي ان فكرة تمرد والحركة كلها والتوقيعات اللي عاملها مجموعة من الشباب ثوار عارفينهم بالاسم وبالاشتباكات اللي شاركوا فيها من اول الثورة ومن قبل الثورة كمان، ممكن نستخرج منهم الغاز في حال ما اذا حصلت ازمة من كتر ما شموه، وفي منهم محمود بدر اللي عصر لمون على مرسي، وبقية زملاؤه قاطعوا
وهم عارفين كويس ان الشباب دول هم اللي حددوا معاد 30/6 وانه لاقى قبول عند الناس
وعارفين كويس ان اللي نازل وهو انتخب مرسي اضعاف اللي نازل من اللي انتخبوا شفيق، ولو ان ضميري ما يسمحليش اصف كل من انتخب شفيق بانه فلول
فلول دي يعني من فلول النظام السابق، بمعنى مستفيد بشكل مش شريف من النظام السابق، وكان له يد في استمراره بشكل او بآخر... انما واحدة قاعدة في البيت مع عيالها وبتشتم في اللي خربوا البلد عشان مش عارفة تودي عيالها التمرين دي فلول في ايه؟ دي حمارة بس.. ايه اللي عملها فلول؟
الحاجة التالتة اللي هم عارفينها وبيضللوا الناس فيها ان الاخوان مافيش فيهم فايدة
هم ليه حاطين تنظيم الاخوان الدولي اللي ماسك السلطة في كفة وشوية ناس غير منظمين كان لهم وجهات نظر مبنية على الفرجة على القناة الاولى في كفة تانية وهم عارفين ان ده ظلم بين... الناس دي على الطراش اللي كانت بتقوله طول السنتين ونص مافيش في ايدهم حاجة يعملوها عشان يئذوا بيها حد، ولا يقتلوا حد، ولا يحرضوا على حد
الناس دي اللي كانت بتدافع عن المجلس العسكري من البيت على اكاونت الفيس بوك، مش هي اللي راحت عملت صفقة مع المجلس العسكري عشان تستلم منه السلطة ولا هي اللي خرجته خروج آمن وادته قلادة
الناس دي اللي كانت بتقول منكوا لله خربتوا البلد مش عارفين نروح مارينا، مش هي اللي نزلت ناس بدقون يوم ماسبيرو يمشوا مع الجيش عشان يبينوا ان الموضوع خناقة ما بين مسلمين ومسيحيين، واللي نزل يوم ماسبيرو شاف الناس اللي بدقون اللي كانوا ماشيين مع تشكيلات الجيش، ومش هم اللي قالوا لمحمد حسان يطلع على التلفزيون يكدب ويقول ان المسيحيين بيضربوا الجيش
الناس دي مش هي اللي حرضت علينا واحنا في محمد محمود، واللي اقنع الناس دي ان اللي في محمد محمود بلطجية هم الاخوان نفسهم، ثم الناس دي مش هي اللي جرجرتنا على محمد محمود وخلعت ابتداءً... افتكروا كده اللي اتسبب في احداث محمد محمود كلها كان حازم ابو اسماعيل اللي جرنا وخلع منا.. واللي طلع انه هو وحركته اخوان.. مش اللي قاعدين في البيت يقولوا منكوا لله خربتوا البلد
الناس دي اخرها شوية رغي خايب، وندالتهم في انهم ما نزلوش طول السنتين اللي فاتوا.. والحمد لله.. دول كانوا حينزلوا في اشتباكات دول؟ ده احنا دلوقت بنقنعهم انه لما يحصل اشتباكات ما يروحوش.. بس يقفوا ورا الشباب
واللي عاملين ثوار وبيقولوا مش نازلين مع الفلول بيطرحوا ايه المقابل؟ استمرار حكم الاخوان؟
ده على اساس انهم ثوار؟
الاخوان اللي كانوا سبب مباشر في قتل صحابنا طول فترة الحكم العسكري؟ 
هم الاخوان امتى كانوا ثوار ولا حتى كانوا حلفاء ثورة؟ دول نزلوا عشر ايام بس في الثورة عشان يطلعوا اللي لهم في السجن وشكرا، واتفقوا بعد كده مع المجلس العسكري انه يصفي القوى الثورية في الشارع عشان يخلى لهم الجو في الانتخابات
طب معلش بقى 
العيش والملح والاشتباكات مش اغلى من بلدي
اللي عامل ثوري وبيقول مش نازل عشان الفلول علموا على وش امه.. ده اخوان وش
عشان ده ما بيعملش حاجة غير انه عايز الاخوان يستمروا في الحكم
والاخوان ما ينفعش يستمروا في الحكم عشان مصر تستمر، ما يا تختاروا مصر يا تختاروا الاخوان
والكلام بتاع احنا اصلنا مش جاهزين ببديل للاخوان وحييجوا الفلول.. طب انت جاهز ببديل لمصر لما الاخوان يستمروا؟
واحد سايق اتوبيس ودايس بنزين وحينط بالاتوبيس من على حافة الجبل... اديله فرصة لما نقع من فوق حافة الجبل وبعدين اجيب غيره؟

الاخوان مش نافعين لا باليمين ولا بالشمال ولا من فوق ولا من تحت.. خالص.. ولو كان الاخوان مش نافعين وزي قلّتهم كنا سيبناهم يكملوا المدة وشوفنا غيرهم، انما المصيبة البعدا كل يوم قالبين حتة في البلد خرابة جديدة... افتتاح الخرابات، من اهم انجازات الرئيس مرسي والفنان محمد بديع والمطرب خيرت الشاطر... بيفتتحوا كل يوم خرابة جديدة في مصر، كل ما كان عمران، ولو بقوة الدفع الذاتي، يسعوا وراه لحد ما يخربوه... طب في كل ده كله سيبك من الاكل والغلا والكوى والسولار والبنزين وقطع الكهربا والمية... كل ده نستحمله، ما نستحملوش ليه؟ استحملنا اوسخ منه

ونستحمل الشعور المرير لما احنا يتقبض علينا ونتقدم لمحاكمات وجنايات وكمان يتهم جزء منا بالارهاب، ومن مين.. من عاصم عبد الماجد، في نفس ذات الوقت اللي علاء وجمال مبارك وحسن عبد الرحمن يطلعوا براءة... ويبقى البغل احمد المغير ابو شومة "فنان" وتبقى رشا عزب اللي ما شافتش بيتها الا طشاش من قبل ما تقوم الثورة وهي يا في مظاهرة يا في مشرحة يا في مستشفى يا على المعبر تبقى هي البلطجية اللي عايزة دولة ظلامية! اه وربنا احمد المغير قال على رشا انها عايزة دولة ظلامية، ولما رشا قالت له ما تبص على نفسك وعلى الكلام الخرا اللي بتقوله ريهام السهلي قالت لها من غير الفاظ تخدش الحياء! يعني انت يا ريهام مش مخدوش حياءك تطلعي المغير في التلفزيون على مرأى ومسمع من الاطفال والقصر والمراهقين والعذراوات ومخدوش حياءك من كلمة "خرا" اللي هي اقل توصيف لكل اللي احنا فيه؟ طيب لو كانت قالت كاكا؟ لو كانت قالت براز؟ خلاص.. نبقى نقول براز يا ولاد

احنا نستحمل ده كله، ونستحمل وساخة اكتر من كده، ونستحمل نبقى مأكلوين مذمومين، والجدعان اللي بيتمرمطوا عشان اللي قاعد في البيت يعيش عيشة احسن ما طلبش شكر.. بس بتشتموا ليه؟ ومع ذلك نستحمل.. ونستحمل خوض في الاعراض، وافتراءات، وكوابيس وشوش صحابنا اللي ماتوا.... كل ده نستحمله وماله

نستحمله يا اخوان الشياطين.. ياللي لو قلت عليكوا كفرة الكفرة تزعل.. في ناس كفرة محترمين، اشتمهم ليه؟

لكن نستحمل ازاي ان حدود مصر يتلعب فيها؟ وان سينا تضيع منا؟ وان قناة السويس تخرب؟ والاهم من كل ده نستحمل ازاي النيل يروح؟
ده مرسي كل اما يتكلم اثيوبيا تطلع قرار ناقص تختم بيه: وربنا ما انتوا شايفين بق مية يا مصريين عشان تبقوا تنتخبوا بغل زي ده

ولما نقولهم النيل راح يقولوا لنا ده مبارك الخاين الوحش هو سبب المشكلة، ما احنا مشينا مبارك الخاين الوحش.. هو انتوا اللي يهمكوا تنفوا التهم عن نفسكوا ولا يهمكوا اننا نشرب؟ ما انتوا حتتوكسوا معانا ولا قطر حتبعت لكوا كراتين مية معدنية؟

احنا حاولنا مع الاخوان بكل الوسائل والطرق والكباري.. مافيش فايدة

يعني الاخوان اذا حدث كذب واذا وعد اخلف واذا عاهد غدر واذا خاصم فجر... وبلعناها

اوساخ وما نزلوش في الثورة كلها عن اخرها غير عشر ايام كل هدفهم فيها كان يطلعوا المساجين بتوعهم ويخشوا الانتخابات ومتشكرين على كده... وسكتنا

عملوا الفعل الفاحش مع المجلس العسكري على قارعة الطريق قدامنا كلنا وخونونا وكفرونا وشتمونا واحنا واقفين قصاد المدرعات والرصاص وشتموا صحابنا المتمددين في المشرحة.. وقلنا عند الله

خدوا السلطة بالغش والخداع والوعود الكاذبة.. وقلنا حسبنا الله

حنثوا باليمين اللي اقسموا عليه... وقلنا لا حول ولا قوة الا بالله

لكن كل يوم طالع بمصيبة تضرب الامن القومي في مقتل؟ وانت يا مرسي اول ما مسكت الحكم ما مسكتش ليه ملف اثيوبيا واول حاجة تعملها انك تروح وتحل المشكلة وتطول وتقصر وتعمل كل ما في وسعك عشان تحل المشكلة دي بشكل ناجع ونهائي ليه بدل ما قضيت سنة كاملة تطرقع بالقبقاب عشان تغيظ ضرايرك وده كل هدفك في الحياة؟
طب مش بلاش سؤال ليه ما حاولتش يا مرسي تحل، لانه سؤال متخلف.. طب ليه يا مرسي بتعقد؟ ليه؟
طب اثيوبيا قفشت علينا وحولت مجرى النيل.. ليه يا مرسي تستفز الناس وتذيع على الهوا لقاء يخليها تقول لو ضربتوا سدنا حنضرب لكوا السد العالي، طب ما خدتش بالك، ليه يا مرسي تعمل بعدها مؤتمر تهدد فيها الناس تهديد اهبل تقول بالدم بس اثيوبيا حلوة مافيش كلام وتهديدات كده لا تحارب ولا تخلا من النجاسة وتخلي الناس تعمل اجتماع توافق بيه بالاجماع على اتفاقية عنيتيبي؟ طب ما تسكت يا مرسي.. مش عارف تحل اسكت، بتعقدها ليه؟ اللي حييجي بعدك حيحل العك ده ازاي؟
وبعدين نقولهم ما ينفعش كده ونعترض ينزلوا يضربونا.. نقولهم طب امشوا يقولوا لنا رصاص حي... وانت تقولي نستنى لما نحضر بديل وما ننزلش احسن فيه فلول نازلين
تمرد حركة ثورية اللي اسسها ثوار، واللي دعا ليوم 30/6 هم الثوار... ولو فيه ناس حست بغلطها انها قعدت في البيت سنتين ونص من حقهم ينزلوا ومش من حقك تقصيهم كأنك ملكت الشارع وعامل لي كأن الاخوان هم اللي ثوار
ثم انت اخوان حضرتك
اللي بيقول كده اخوان
لو شفتوه في المعركة تفوا لي عليه

اخيرا:

الكلام اللي كاتبه مالك عدلي ده مهم جدا وحيحط النقط على الحروف بالنسبة ل30/6 يا ريت تقروه وتوزعوه على اوسع نطاق

خاف يا عيد

بصوا والنبي الاهبل ابن الامريكانية وتاجر العملة بيقول ايه؟

يامي يامي يامي يامي... تصدق اتخضيت؟

والنبي من ايام الاتحادية وصوت الرصاص الحي وحشني.. خصوصا انكوا غشم وبتضربوا بعض بيه

والرصاص الحي ده اجمد من رصاص الامن المركزي ولا من رصاص الجيش؟

ويا ترى الرصاص ده حتطلقه من الشاحن، ولا حتشوطه برجلك اللي فيها كرامب

وبيقولك: خلاص تقرر!

احنا ربنا رازجنا بابن امريكانية تاخين ورغاي يا مولانا ربنا ما يوريك

نفسي اعرف "تقرر" دي يعني ايه؟ عملوا اجتماع الافيال هو والمغير وخريت وقرروا ياكلوا كرنب ويبهدلونا معاهم؟

طيب يا ريت تآنسنا يوميها بس واحتياطي كده حنبقى جايبين معانا شواحن عشان لو نسيت شاحنك، ورباط ضاغط عشان رجلك... ولا حضرتك بتشتغل في المظاهرات كتاليست.. يعني مجرد عامل مساعد على التظاهر لكن لا تتظاهر؟

---------

الا بهذه المناسبة السعيدة متقدمة للجنايات ومتهمة باني فاعل رئيسي ضربت 125 واحد وكام ضابط شرطة وحرقت التوحيد والنور ومسجد بلال ومسجد الحمد وعدد اتوبيسيات وسيارات شرطة، وادلة الثبوت اللي النائب الخاص اداني بيها وعلى اساسها حولني جنايات تويتة كاتبة فيها: ولما انتوا غلابة كده امال بترغوا وتهددونا بحرب اهلية ليه!

فاعتبر النائب الخاص ان ده اكبر دليل على اني قتلت كل الشعب

والبغل ده طالع يقول حنستخدم رصاص حي لحسم الامور وماحدش بيسحب رخصه حتى... 

وهو ده تطهير القضاء اللي عايزه الاخوان

كل سنة واحنا طيبين بيك يا سيدنا الحسين

في هاذوها الظرف اللي مزاجي فيه متعكر، مناسبة سعيدة: النهاردة خمسة شعبان، عيد ميلاد سيدنا الحسين

كل سنة وانت طيب يا جدو

:)

أحب الله من أحب حسينا

يالا بالمرة الاخوان والسلفيين يتضايقوا عشان بنجيب سيرة سيدنا الحسين... مش عارفة بيتضايقوا من سيرته كده ليه؟ بس بالعند فيهم المصريين بيحبوا اهل البيت وحيفضلوا يحتفلوا بموالدهم دايما.. واهل البيت حيفضلوا معانا واللي مش بيحبهم هو اللي حيمشي

D:

دليل المتظاهر الجديد

احنا المرة دي نازلين مع مجموعة تعل قوي يا عيال.. 

بصوا.. عشان بس ما تنزلوش مزاجكوا متعكر اكتر ماهو ، هم مش افظع من الاخوان ولا حازمون اللي اتدبسنا في النزول معاهم قبل كده، يعني مثلا دمهم مش تقيل، اقفال شوية بس ممكن لو خدت واديت معاهم في الكلام تجيب نتيجة لانه ما بيسمعش كلام مسئول ولا ماشي ورا حد، هم ميزتهم انهم على باب الله زينا... بس العبط اللي هم فيه محتاج صبر 

مبدئيا الاخ والاخت المتظاهرين الجدد.. حضراتكو يمكن لو كنا قابلناكوا من سنتين ونص كنا عشنا مع بعض  قصة حب جميلة، لكن الحقيقة انتوا لازم تراعوا انكوا نازلين من بيوتكوا لسه فريش، بينما احنا طلع ميتين اللي جابونا على مدى سنتين ونص، ده غير ان حضراتكوا برضه اتفرجتوا كتير على القناة الاولى، وقعدتوا تقولوا علينا بلطجية، وطول السنتين ما سمعناكوش بتشتموا في الاخوان خالص اللي كانوا متحالفين مع المجلس العسكري، كنتوا بتشتموا فينا احنا وتقولوا علينا عملا وجواسيس وفريدم هاوس وماسونية وخربتوا البلد وحرقتوا المجمع العلمي والمسيحيين ضربوا الجيش وبتوع محمد محمود بلطجية وانتوا تغنوا والاخوان يطبلوا لكوا ويروجوا كلامكوا وما كنتوش على خلاف معاهم في حاجة.. لحد ما اختلفتوا على المرشح وده لانكوا مستكبرين ان واحد خارج من السجن يمسك البلد، وبعدين مسكوا الحكم فالبلد كده داخلة في حيط، فحضراتكوا قررتوا تنزلوا كتر خيركوا.. طبعا كل ده في الخلفية فمش حتلاقي نفوسنا صافية من ناحيتكوا يعني عشان نبقى واضحين مع بعض وما تطالبوناش نصفى من ناحيتكوا زي ما نزلنا نحتفل بسقوط شفيق كده وما كناش صافيين للاخوان وقعدنا نشتمهم في وشهم اول ما شوفناهم داخلين محمد محمود.. معلش اتعاملوا معانا على اننا حالات واقبلونا زي ما احنا كده لانكوا محتاجينا.. لكن احنا نصفى؟ صعب، لان انتوا طول ما احوالكوا كانت كويسة ما كنتوش مهتمين ابدا بان في ناس تعبانة في البلد... احنا بقى كانت احوالنا كويسة وكنا تعبانين عشان كان في ناس تعبانة في البلد.. كمان حضراتكوا على نياتكوا وبتتفرجوا على القناة الاولى كتير وما انتوش عارفين مثلا ان الاخوان على اتصال بالمجلس العسكري وامريكا من 2005 على اساس انهم يبقوا بديل مبارك لو الناس رفضت جمال، وان مبارك هو اللي كان سايبهم يتغلغلوا في العشوائيات والقرى والنجوع ويعملوا مليارات من جوه السجن، وان المجلس العسكري كان كل شهر يعمل لنا مدبحة عشان يخلي الجو للاخوان ويستعدوا للانتخابات بينما حضراتكوا كنتوا بتشتمونا، وان وصول الاخوان للحكم وفشلهم ده مصلحة احسن ما كانوا يفضلوا يتسولوا ويقولوا انهم مظلومين، وان الاسلام السياسي ده سؤال اجباري كان ضروري الاجابة عليه عشان نخلص بقى ونخلص الى الابد، لا عبد الناصر ولا السادات ولا مبارك عرفوا يقضوا على الاخوان... بعون الله شوية البلطجية اللي ريحتهم غاز دول هم اللي عرفوا يقضوا عليهم: مش انتوا عندكوا مشروع.. اتفضل وريني نفسك، ورانا نفسه.. ويا ريته ما ورانا.. بس بس.. البس البس بلاش فضايح.... معلش، انتوا ما تعرفوش الحاجات دي، انتوا اللي تعرفوه انكوا عايزين تعيشوا كويس وتاكلوا وتشربوا وتودوا الولاد النادي، ولما كان ده متوفر ايام مبارك كان مش مهم عندكوا ابدا ان فيه ناس بتاكل من الزبالة ولا اطفال نايمة تحت الكوبري ولا ان مبارك عميل اسرائيل، والمجلس العسكري والاخوان حلفاء امريكا.. مش احنا، واحنا لا ماسون ولا امريكان ولا فريدام هاوس، اللي بياخد فلوس من امريكا هم المجلس العسكري والاخوان وكان مبارك.. كل ده ما تفكروش فيه ومش مهم مدام انتوا عايشين مبسوطين

طبعا الاخوان دلوقت مش حيخلوكوا لا انتوا ولا غيركوا تاكلوا ولا تشربوا ولا تعيشوا، فحل من اتنين، يا تهاجروا يا توقعوا تمرد وتنزلوا معانا... واحنا شاكرين قوي انكوا ما هاجرتوش وقررتوا تنزلوا معانا

طيب... طبعا احنا ممتنين ان فيه ناس اخيرا قررت تنزل تسعف البلد معانا.. بس زي ما قلت لكوا، احنا مش احنا اللي كنا من سنتين ونص، من سنتين ونص كنا نازلين عندنا امل وخطط لمصر واقبال على الحياة او الممات مش مهم المهم اننا عندنا امل... دلوقت حضرتك بعد خيبات امل كتير، النفسية مش هي النفسية، بنعمل الواجب اللي علينا، بس ما تنتظروش يعني نبادلكوا الهيبرة وكدزه. بشكل عام احنا في كل الاحوال ميتين.. يعني انا مثلا بشكل  شخصي، واحدة من الناس سواء الاخوان قعدوا حتحبس، او الاخوان مشيوا اللي حييجي ورا الاخوان حيحبسني  اساسي.. ليه؟ لاني ما بسكتش لحد، يعني ماحدش بيشوفني بمصلحة ويسكتني وخلاص، انا بقى والصنف اللي انتمي له في كل الاحوال مش بندور على مكسب، لكن البلد لازم تاكل وتشرب وتفضل هي مصر دي المربع اللي مرسوم على الخريطة بكل حدوده متكاملة ومتماسكة وبيجري في نصها نهر النيل.. ومع استمرار الاخوان في الحكم ده مش حيتحقق، المربع يمكن يتقسم مثمنات ومثلثات ومخمسات، وكلها كام شهر ومافيش نيل، وطبعا مافيش اكل

بس حضراتكوا اذا كنتوا نازلين يبقى تسمعوا الكلام شوية، معلش، اتظاهر منك بيوم يعرف عنك بسنة

يعني:

1- موضوع انكوا تفضلوا تحرجموا على الجيش والشرطة باعتبارهم المخلص اللي حيقف جنبكوا ده تنسوه خالص... الجيش والشرطة مؤسستين تابعتين للدولة، وفي الدول الاستبدادية اللي شبهنا تابعين للحاكم، الجيش يهمه فلوسه وحاجته ومشاريعه ومعونته اللي بتوصل، والشرطة يهمها سلطاتها وتسمع كلام اللي في السلطة عشان يحبها.. وطبعا الاتنين ما يتنوش كلمة لامريكا

امريكا بقى بالجيش بالاخوان بالشرطة بابليس نفسه مالهمش سلطان على شعب قرر ينزل باعداد غفيرة ويصبر

يصبر

يصبر

يصبر

ماشي يا امور انت وهو؟ يعني مافيش حاجة اسمها مش عارفة اودي ولادي التمرين منكو لله خربتو البلد.. ماهي الثورات يعني خراب للبلد، او بالاحرى خراب للنظام اللي حاكم البلد

مافيش حاجة اسمها يالا بقى خلصونا عشان عجلة الانتاج

مافيش حاجة اسمها تلزقوا في ودننا: انتوا عايزين ايه دلوقت؟ انتوا عايزين ايه دلوقت؟ انتوا عايزين ايه دلوقت؟

لو كنا ما مشيناش يوم 11 فبراير وفضلنا بنفس العدد لحد ما نعمل دستور ومجلس رئاسي مدني زي ما كان مكتوب في مطالب الثورة ما كانش كل ده حصل لنا.. بس زن حضراتكوا ووساخة الاخوان اللي نزلوا يقولوا الشعب يريد اخلاء الميدان لدرجة ان تلاتين واحد شالوني هيلا بيلا ورموني برة الميدان.. يالا بقى.. العايط في الفايت نقصان عقل

ملحوظة كمان: لما نزلنا الاتحادية وطبعا الناس اللي حاطين برفان خدوا بعضهم ومشيوا وفضلنا كام واحد بس، ظابط شرطة قال: مشيوا.. شعب خ***ت... بصراحة معاه حق

2- الموضوع مش صعب... المهم نحافظ على الكتلة الحرجة ليل نهار، ونقسم نفسنا نبتشيات زي ايام ال18 يوم، والاخوان مش حيستحملوا 18 يوم.. انا باقولكوا، بس مش حيستحملوا 18 يوم لو العدد في الشوارع كبير ليل نهار وموقفين لهم البلد... لكن احتفالات كاس افريقيا ونروح دي.. يارب انشالله ننزل كل يوم، هم خسرانين ايه؟ الشعب فرحان وبيتفسح

3- في حال ما اذا الناس مشيت وما فضلش الا ال150 200 واحد بتوع كل مرة، واللي تقريبا نصهم مات فحتى ما بقوش مية وخمسين ميتين، الاخوان مش بس حيقعدوا، دول حيتوحشوا وماحدش حيعرف يكلمهم تاني بعد كده.. حشدتوا ضدنا وجمعتوا توقيعات وبرضه ما عرفتوش تمشونا.. وطبعا مش حيقبضوا عليكوا انتوا.. هو انتوا بيجرالكوا حاجة؟ احنا اللي حنتشعلق من رموشنا زي كل مرة، ماهو احنا اصلنا ملطشة، مبارك يضرب، مجلس عسكري يضرب، اخوان يضرب... بس مش مهم احنا نتشعلق من رموشنا لان ده قدرنا حتى لو الاخوان مشيوا، المهم ان حيبقى عصر قمعي الى ابعد الحدود، حتبقى حاجة اوسخ من ايران والسعودية مجمعة، زايد عليهم الجوع والفقر والعطش... ده غير ان الناس حيبقى عندها يأس تاريخي، حتبقى حاسة انها عملت اقصى ما في وسعها وفشلت

والحقيقة انها ما عملتش اقصى ما في وسعها

اذا ما كناش نوقف البلد ونقعد في الشارع بكتلة حرجة لا تقل ان مليون واحد في الشارع ليل نهار يبقى استمارات تمرد دي نبرمها ونحطها فييييييي عينا.. آه، ويبقى نزولنا كرنفال

4- معلش.. لو حصل ضرب ما تمشوش.. مش باقول اتصدروا في الضرب، بس اقفوا في ضهر الشباب ما تمشوش وتسيبوهم بحيث يبقى وراهم ناس... زي ايام محمد محمود كده فاكرينها؟

لا وانتوا حتفتكروها ازاي انتوا نزلتوها؟

طيب ايام محمد محمود كان اللي بيواجه بتاع 300 400 واحد، نصهم مات، ودلوقت نص نصهم مات.. بس الميدان بيتراوح من ما يقرب من مليون لحد اقل وقت كان بيبقى 50 الف.. فاللي بيواجه حاسس ان وراه ناس... واللي بيضرب حاسس ان بيضرب كتله حرجة وان فيه خطورة ما يقدرش يكسح اللي بيواجهوه

اقفوا ورا وما تمشوش

5- كام حاجة كده لازم تعرفوها عشان التغييب بس: 

مش الجيش اللي مشى مبارك ولا الجيش اللي حمى الثورة. الناس فضلت في الشارع بكتلة حرجة وباصرار واستمرار ووقفوا البلد خالص وده اجبر الجيش انه يمشي مبارك والا يبقى بيجازف بان البلد تنهار.. 

ماحدش جاب الاخوان وسلمهم البلد الا المجلس العسكري، والشرطة حتفضل تحمي الرئيس لحد ما احنا في الشارع بكتلتنا نقرر نخليه مش رئيس

الجيش والشرطة والامريكان مش بيحبوا حد ولا بيكرهوه، هم بيحبوا مصلحتهم.. لو حسوا ان الاخوان مش في مصلحتهم حيبيعوهم، ماحدش يقدر يوصل لهم الاحساس ده غير تواجدنا المستمر في الشارع

6- يا ريت ما تقلوش ادبكوا علينا... عشان ما نسيبكوش انتوا والاخوان ونقعد في بيوتنا.. وزي ما تيجي تيجي احنا في كل الاحوال ميتين ميتين.. وانتوا والاخوان مش بتوع مواجهات، بس الداخلية في صف الاخوان، ومع اول فسية.. مش قنبلة، حتجروا

فمعلش احنا عاصرين عليكوا غيط لمون بحاله فما تطلعوش قرفنا وتفضلوا تقولوا لنا جبتوا لنا الاخوان ونجيب الجيش ونفتح السجون والطراش ده

اللي جاب الاخوان هو الجيش اللي انتوا عايزين تجيبوه.. والسجون لو اتفتحت مش حيخشها اللي انتوا مستتقلين دمه بس.. انتوا كمان حتخشوا.. 

ما تقرفوناش كتير.. انتوا محتاجينا في المواجهات.. امال مين اللي حيموت؟ انتوا لا سمح الله؟ اذا كنتوا كرهتوا الثورة عشان مش عارفين تودوا العيال التمرين.. حتموتوا؟

----------

اخيرا:

الزملاء الثوار....... معلش

الصبر..
حنعمل ايه يعني؟ ما هو لو ما عملناش كده الاخوان حيخلوا مافيش مصر اساسا، وبعدين اجيب لكوا شعب منين يعني؟
ماهو ده شعبكوا.. يا بيحب عم الشيخ ولاغي عقله وبيسمع كلامه، يا بيحب المجلس العسكري وفيلم ابناء الصمت... واحنا مش كتير
احنا مش كتير
رمانة ميزان اه... بس عمالين نخس
وعلى فكرة ده الطبيعي في كل المجتمعات، البني ادمين يا اما دوجمة يا اما مصلحة... الناس اللي عايشة عشان تخلي الانسانية اسعد دي بيبقوا النسبة الضئيلة، وبيبقوا عصابيين كمان ومخهم لاسع.. امال يعني حيخش في مدرعة وهو مخه طبيعي؟
واللي احنا بنعمل ده اسعاف لبلد بتحتضر...
الصبر

بالراحة شوية/ الثورة الاسلامية/ الشرطة/ لنكات مهمة

خلاص بقى.. الشنا على الراجل وشردنا له بما فيه الكفاية

قال كلام مالوش لازمة في اجتماع الحوار الوطني، وبعدين غلط غلطة كبيرة قوي قوي قوي قوي لما قبل يبقى وسيط بين الاخوان والفلول

واتهاجم على التصرف ده واتألش عليه بما فيه الكفاية... خلاص

ما تبقوش كده اذا خاصم فجر، ايمن نور ده رشح نفسه قدام مبارك وقت ما كان الترشيح قدام مبارك عملية انتحارية، اللهم الا الحاج الصباح والناس اللي كانت بتترشح وتقول انا حنتخب الرئيس مبارك

واتحبس خمس سنين وهو مريض بلا اي مبرر واتهموه بالتزوير في حاجة كل الاحزاب كانت بتعملها لانها روتين، زي ما بتغمز الساعي بعشرين جنيه عشان يخلص لك ورق في اي مصلحة حكومية، وما حدش يقولي ما خيرت الشاطر ومرسي اتحبسوا، عشان هم مسكوا سلطة، لما يبقى ايمن نور يمسك سلطة ويفشل ويصمم يكمل بغلاسة والناس مش عايزاه ابقوا قطعوه ستين حتة وانا اقف اشفي.. لكن هو مش سلطة، هو حيالله رئيس حزب وسياسي مرموق وغلط وهاجمناه عليها والموضوع خلص، وفي ده كله ما تنسوش برضه انه قدم تضحيات وما اخدش تمنها، لما يبقى ياخد تمن تضحياته سلطة يبقى لكوا حق تشردوه

انا مختلفة معاه في كل حاجة خصوصا في افكاره فيما يخص التعامل مع الاخوان وامريكا، هو متسامح معاهم قوي... عمل مصيبة انه يوفق بين الاخوان والفلول.. بس ربنا مش رايد لهم الستر والحمد لله اتكشفوا

خلاص بقى.. ما تمسكوش في الراجل هبد والرقع.. وهو قال اعتزلت العمل السياسي.. يا ريت كل سياسي يتعرض للهجوم يبقى حسيس كده.. طب ده احنا مبهدلين مرسي والمرشد مش عايز يخليه يعتزل

----------

خلينا في المهم... الحمد لله تمرد قربت على 15 مليون، ولو اني زعلانة انهم اعلنوا قبل ما يكملوها ويروحوا للدستورية.... لان ده حيهيج عليهم الوحوش الكاسرة. شفتوهم ياعيني امبارح في المؤتمر؟ مؤتمر الوحوش الكاسرة الهابلة... وشفتوا الراجل اللي بيغني؟ طب شوفتوا مرسي وهو بيقول: "ولأجل من اجل ذلك ولأجل هذا"... انا عايزة احفظها العبارة دي.. كل ما اجي اقولها اتلخبط وارجع لها تاني.. اصلي كتبتها وراه اول ما قالها 

المهم دلوقت اخر تهديد لهم: 

لو اسقطوا مرسي حنعلن ثورة اسلامية ونطبق الشريعة

سؤال: هي الناس دي مدركة بتقول ايه؟

ده كده كأنهم بيقولوا لنا ان الاسلام والشريعة دي عقوبة وحاجة وحشة نتهدد بيها... طب ولما هي حاجة وحشة انتوا رافعين شعارها ليه؟ ولو هي حاجة حلوة وعشان كده رافعين شعارها.. طب المفروض تطبقوها على اللي بتحبوهم ولا بتكرهوهم؟ انت لو شايف الاسلام والشريعة حاجة كويسة كنت قلت: لو عملتوا ثورة عليا انا حالغي الشريعة الاسلام واحرمكوا منهم... مش العكس

وحاجة كمان.. حازم ابو اسماعيل قال انه حيقتحم مدينة الانتاج الاعلامي ويعلن مرسي رئيسا

D:

بحبهم قوي.. شوفتوا الارهابيين بتوعنا حلوين ازاي؟ في ارهابيين في الدنيا كمالو كده غير عندنا؟

--------------

ظباط الشرطة وقعوا تمرد وكانوا بيهتفوا النهاردة ضد مرسي في جنازة شهيد الشرطة الله يرحمه

متشكرين قوي.. مش عايزين منكوا حاجة غير تبطلوا تضربونا

منين بتوقعوا ضد مرسي ومنين لما بتجيلكوا الاوامر تحموا مقر الارشاد بتنزلوا فينا ضرب كأنكوا اسرائيل واحنا فلسطين؟

حلوا عنا شوية.. لو عايزين تخدمونا فعلا، لا توقعوا تمرد ولا تتظاهروا... بس تاخدوا اجازة يوم 30 يونيو، ولو ما نفعتش الاجازة لما تجيلكوا اوامر تضربونا ما تضربوناش... بطلوا تضربونا بقى.. ولو انت جبان وخايف تكسر الاوامر، يبقى ياريت لما تضرب ما تبقاش تضرب بذمة واخلاص وتفاني كده كأنك بتضرب في جوز امك انا مش فاهمة الغل اللي جواكوا وانتوا بتضربوا ده سره ايه؟... على الاقل لو خلاص مش قادر تكسر الاوامر يبقى اضربنا كده وكده واحنا حنعمل نفسنا موجوعين

ايه اللي مخلي الظباط قالبين على مرسي كده.. اكيد مش عشان احنا صعبانين عليهم 

بس عشان كلام زي ده وارد جدا يكون حقيقة.. بصراحة انا مصدقاه، هو الراجل ده اداؤه سكندلينا شوية، بس بيقول حاجات كتير بتحصل

طيب يعني مدام هم اللي بيسلموكوا ويموتوكوا... بتموتونا احنا ليه؟ احنا مالنا احنا؟ 

----------

ده مقال مهم لعزمي بشارة بيعرف ايه هي الفاشية... وطول ما انت بتقرا تحس انها منطبقة على واحد صاحبي انت ما تعرفوش

ودي تلات مقالات مهمة لخالد الحروب عن ضرورة حل جماعة الاخوان المسلمين الجزء الاول الضرورة الوطنية والجزء التاني الضرورة الاقليمية والجزء التالت الضرورة التنظيمية

--------- 

للمرة المليون ومش حازهق من اني اقولها: احذروا الناس اللي في النص.. احذروا الناس اللي في النص.. احذروا الناس اللي في النص.. دول اخوان والاخوان حيستخدموهم كبوابة طوارئ يعاودوا الدخول منها لما ينطردوا

ارجوكوا... ده كتاب مهم عن طائفة الحشاشين الاسماعيلية مهم قوي تقروه بتاع برنارد لويس وترجمة المرحوم محمد العزب موسى.. لازم تقروه عشان تعرفوا الاخوان بيشتغلوا ازاي.. تقريبا حسن الباندا قرا عن الحشاشين الاسماعيلية وقرر يعمل تنظيمه شبههم

جزء مهم جدا من طائفة الحشاشين: الناس اللي مش منهم بس "محايدين".. دول مش بس بيبقوا اعضاء، دول بيبقوا قيادات مفتاحية... 

خلوا بالكوا من الناس اللي في النص

انا النمساوي ملك الليل

وتقريبا دومة ميمو يااااض

هو انا مش فاهمة القضية بتاعتنا ماشية ازاي؟ ولا فاهمة طبيعة تطورها ونموها... حاسة ان فيه كيماويات في الموضوع

القضية ابتدت بضبط واحضار خمسة واستدعائي انا لسماع شهادتي في قضية المقطم، ولما علاء عبد الفتاح راح يشوف ايه الحكاية ما اتوجهلوش تهمة لا تحريض ولا ضرب ولا حاجة.. سألوه عن علاقته بالاميرة جومانة، واخد اخلاء سبيل

القضية دي غابت وظهرت علينا فجأة في ثوبها الجديد حيث تم احالتنا جميعا الى الجنايات، والتعامل مع دومة المحبوس وحازم عبد العظيم والشاعر وعيد بوصفهم هاربين، والتعامل معايا انا وعلاء بوصفنا حاجة تانية مش عارفين هي ايه، مع ان دومة كان مقبوض عليه يبقى هارب ازاي، والتلاتة التانيين ما راحوش يتحقق معاهم لكنهم ما هربوش هم قعدوا في البيت وقالوا تعالوا خدونا، والشرطة ما حاولتش تروح تاخدهم ومثلا اتشعلقوا على المواسير

طب علاء واخد اخلاء سبيل وانا شاهدة.. ازاي نتحول جنايات؟

قالوا ان تهمتنا جميعا محرضين..

بعدين فجأة، وبدون سابق مقدمات اتضح اننا فاعلين اساسيين مش محرضين

ومحسوبتكوا المتهم التامن في القضية، حيث اني ضربت 125 اخوانجي، وحرقت التوحيد والنور، واتلفت مسجد بلال ومسجد الحمد وعدد من الاتوبيسات وسيارات الشرطة، وضربت ظباط شرطة

واذا كان دي تهم المتهم التامن فلك ان تتخيل المتهم الاول عمل ايه؟ انا مش عارفة بقية الزملا ايه نظامهم، بس عرفت ان حازم عبد العظيم طلع مازنجر زيي كده برضه

الجلسة حتبقى في دورة اول يوليو.. وحنخش المحكمة نقول: انا النمساوي ملك الليييييييل... وانا ميمو ياااااااااض

سؤال بريء: الاخوان مش مكسوفين من نفسهم ولو بينهم وبين نفسهم كده؟ بجد وربنا

ويحضرني هنا مقولة محمد النفس الزكية لعمه جعفر بن الحسن لما طلب منه يدعي ان ربنا يخرجهم من السجن فقال له: يا عم.. إن لنا منزلة في الجنة لا نبلغها الا بمظلمتنا هذه، وإن لجعفر المنصور موقعا في النار لا يبلغه الا بمظلمته لنا هذه.. فإن شئت صبرت وإن شئت دعوت الله.

فعمه قال له: بل نصبر

تام ترارام تام تام

انا قلت استنى شوية وبعدين اكتب بوست عن موضوع الفلول ومشاركتهم في الثورة ال.... هي دي الثورة الكام يا ولاد؟ التالتة دي ولا الرابعة.. كتروا، بقوا عاملين زي عبورات مرسي، الراجل ينجح في الانتخابات يقول ده العبور التاني، يحضر مؤتمر يقول ده العبور التالت، يخش الحمام يقول  ده العبور الرابع

بس احنا نقدر نقول ان دي الثورة التالتة، الاولى على مبارك، والتانية على العسكر، والتالتة على الاخوان

المهم انا كان ليا وجهة نظر في الموضوع ده وقلت اخش اكتبه.. بس ما اقدرش اتعرض لهاذوها الموضوع دون المرور على الخبر ده

ايه ده؟ ايه ده يا ولاد ده؟ ايه الهلاوس دي؟ العيال بتوع الاخوان بيقولوا للقيادات احنا خايفين قالوا لهم ما تخافوش حينزل لنا جند من السما! هو من حيث جند من السما فنحس مرسي اجدع جند من السما ضده.. طب والله العظيم راجل نحس والطبيعة كلها رافضاه، وايام الرسول ايه؟ وصحابة ايه؟ ده على اساس اننا قريش؟ مش باقولكو الناس دي عايشة في مسلسل على هامش السيرة ما خرجتش منه؟

وهم الاخوان بيشبهوا نفسهم بالصحابة؟ هم الصحابة كانوا فشلة وكدابين ومنافقين وحانثين بالعهود ويظهروا غير ما يبطنوا وخونة وخايبين ومش عايزين يعترفوا انهم خايبين؟ هم الصحابة كانوا اندال واوساخ وعملوا صفقة مع ناس بتقتل الابرياء بشكل دوري كل شهر؟ هم الصحابة لما بنت تتعرى قدامهم يقولوا عليها ايه اللي نزلها؟ هم الصحابة لما ناس اتسجنوا عشان بيدافعوا عنهم ينزلوا يتظاهروا ضد الحكم العسكري يطلعوا بيان يقولوا عليهم: جمعة الوقيعة بين الجيش والشعب؟ هم الصحابة بيخوضوا في اعراض الناس بالباطل وبيضربوا الستات؟ هم الصحابة والناس واقفة تموت في محمد محمود يبعتوا يهددوهم بحرب اهلية ويطلع الكبير بتاعهم يقول: اللي خالفوا اوامري وراحوا محمد محمود رجعوا اعتذروا لي وقالوا لي  احنا شوفنا مهازل! مهازل ايه اللي شافوها يا بديع في محمد محمود والناس ما بين قتيل وجريح؟ هم الصحابة لما ناس تنضرب عشان بتدافع عن جزء منهم يقولوا احنا ما نعرفش مين دول؟ هم الصحابة نزلوا شايلين شوم على النسوان اللي كانوا بيتداروا ورا ضهرهم في العباسية؟ هم الصحابة بيخونوا الامانة؟ هم الصحابة بيقعدوا هم في التكييف ويطلعوا ينبروا على الناس عشان عندها تكييفات ويقطعوا عنهم النور؟ هم الصحابة يخونوا البلد ويبعتوا معلومات سرية لمؤسسات اجنبية؟ هم الصحابة لما يتولوا امور الناس بدل ما يشوفوا حيأكلوا الناس ويشربوهم ازاي ويهتموا بالقضايا الملحة يقعدوا يرازوا في معارضينهم كأنهم ضرايرهم وبعدين يقولوا اتفاجئنا بالنيل اصل كنا مشغولين في الثورة؟ مشغولين في الثورة ولا مشغولين تسلطوا المغير يضرب النسوان؟ هي الناس دي مصدقة نفسها وشايفين نفسهم صحابة ودعوة ربانية وملايكة حتنزل لهم؟ يا رب تنزل عليهم زبانية تديهم بالجزم 

ابسط قواعد الامانة اني لما احس اني مش كفء في عمل اتنحى عنه مش اقاوح وارمي فشلي على غيري... يا.. صحابة.. هأ

----

عود لموضوع الفلول

الاضحوكة التانية اني كنت ناوية اقول ان الفلول انواع، وانك لو تقصد الفلول هم بتوع الحزب الوطني والمستفيدين من النظام السابق فدول فلول فعلا ولازم ما نقبلهمش وسطنا.. خصوصا يعني واحد زي ملك الفياجرا اسطورة الترامادول سيد سرنجة.. او عمرو موسى اللي راح قابل خريت الشاطر والشاطر عمل له كمين وفضحه، مع انها فضيحة للشاطر اللي طول النهار يقول على موسى فلول

وكنت حاقول في نوع تاني من البشر ناس عادية بس تخوفت من الثورة الاول، مش مستفيدين من النظام ولا حاجة، واحدة ابوها ظابط جيش متقاعد وميت وبتحب الجيش عشان كده، واحد ما عرفش يروح مارينا لما الثورة قامت، واحد سواق تاكسي حاله وقف بعد الثورة فانتخب شفيق.. وكنت حاقول ما تقولوش عليهم فلول.. بس لقيتهم بيقولوا على نفسهم فلول 

اه وربنا

واحد بيقول الفلول غير مرحب بيهم، فواحدة قالت له: انا فلول ونازلة!

اوختشي.. كلمة فلول دي كلمة وحشة.. الا اذا كنت حضرتك مثلا بنت عمر سليمان، او عضو سابق في الحزب الوطني، او في امانة السياسات، او من نواب القروض، او واحدة حرامية ما، او جوزك ظابط شرطة بيعذب الناس وبيموتهم في الاقسام، او حماكي طنطاوي

اذا كنت من الناس اللي اصلا ما نزلتش في الثورة في الاول وكانت بتقول الكلام الوسخ بتاع منكو لله خربتوا البلد وتشكر في المجلس العسكري، اللي وضح لكل الناس انه هو اللي باع البلد للاخوان وانه مجلس خاين، وانتخبتي شفيق عشان خايفة من الاسلاميين وبعدين قررتي تبقي ايجابية وتحلي الوحلة اللي الناس فيها وتنزلي فده ما يعملش منك فلول.. ده يعمل منك عبيطة بس

وعادي كلنا عبط بشكل او بآخر

هو طبعا الواحد بيصعب عليه نفسه قوي.. مش انا بس.. عدد كبير، يعني واحد صعبان عليه نفسه قوي وعمال يحذر من مشاركة الفلول

وبيقول ان الاعتماد على الفلول زي عصر اللمون، وهو معاه حق فعلا.. طب بس احنا نعمل ايه؟ اولا ما تخليش الاخوان يبتزونا بان الفلول راكبين علينا، لانهم هم نفسهم ركبوا علينا.. والاخواني اللي يقولك نازل معاكوا فلول، قول له: ما انتوا نزلتوا معانا قبل كده.. حنعمل ايه يعني؟ حنطردهم؟

اذا كنت تقصد فلول من اساطين النظام زي سيد سرنجة وموسى وغيرهم، فدول احنا مش ماشيين وراهم، ولا احنا ماشيين ورا جبهة الانقاذ اساسا.. جبهة الانقاذ لما كنا عند الاتحادية خذلتنا وطلبت اقالة قنديل! ودلوقت تو ما عرفت ان الاخوان نظامهم سقط.. واحنا دايما سابقين عليهم، وكون جبهة الانقاذ تبقى ماشية في ديلنا ده مش وحش.. مش احسن ما احنا اللي نمشي في ديلها وهي لامة فلول؟

اذا كنت تقصد اللي كانوا قاعدين في البيت يشتمونا واحنا بندفن صحابنا.. فدول مش فلول، دول مهاطيل، طبعا حاجة تضايق، بس ده مش معناه نشتمهم ولا نطردهم، هم ما عملوش جرايم ولا سرقوا ولا قتلوا عشان نمشيهم، والا كنا مشينا الاخوان من اول يوم 28 يناير.. ده شارع، واحنا مش ملاك الشارع ولا حتى الثورة عشان نمشي ناس ونجيب ناس... احنا حننقي؟ ناس معترضة على حكم ما من حقها تنزل تعبر عن نفسها.. انت حتفتشهم وتقولهم انتوا فلول ولا ثوار؟ ولا حتشمهم لو ريحتهم برفان يبقوا فلول لو ريحتهم غاز يبقوا ثوار.... وطبعا لو ريحتهم حلبة او شرابات يبقوا اخوان مدسوسين

دي حاجة صعب التحكم فيها، وما ينفعش نعمل فيها حاجة

انا متفهمة تخوفات الثوار من اننا نلف في حلقة مفرغة... بس احنا لازم نكمل طريقنا، ومافيش رجوع لورا، والتخوفات بتاعة ان العسكر يرجع تاني مش حتحصل.. والنظام القديم مش حيرجع تاني، خلاص.. المرحلة اللي خلصناها مش حنرجع لها ومش مفروض نتخوف اننا نرجع لها.. المفروض نبص قدامنا ونخلص المرحلة اللي احنا فيها دي لانها خطرة ولازم باسرع وقت تتحل.. احنا موحولين وحلة سودا، والعسكر مش عايز يمسك البلد، لانه مش حيستفيد حاجة ده دماغه حتتوجع وهو كده مبسوط بنفسه وبحاله وبفلوسه وبعيشته مش عايز هو يحكم البلد، ولا امريكا عايزاه يحكم البلد عشان شكلها ما يبقاش وحش قدام الناخبين بتوعها... فده تخوف اظنه مبالغ فيه

موضوع ان لو حصل انتخابات مبكرة شفيق هو اللي حينجح.. ده احتمال، طب بس نعمل ايه يا ولاد طيب؟ حنعمل ايه؟ ماهو مرسي اهو الناس نجحته وعصروا لمون عليه قطع مية وكهربا حرفيا عن البلد.. واحتمال شفيق يا اخي ما ينجحش قول يا رب وربنا يسترها معانا

النقطة التالتة واللي انا متفهماها جدا، ان الثوار صعبان عليهم نفسهم.. يعني هم يتبهدلوا ايام مبارك وايام العسكر وايام الاخوان وكل شوية حد عامل ضهرهم مطية وياخدها على الجاهز؟ ماهو زي ما الاخوان اندال وسابونا ننضرب سنة ونص وهم متحالفين مع العسكري اللي كان بيضربنا مخصوص عشان يستنزفنا ويخلي الساحة للاخوان حسب اتفاقه مع امريكا.. ماهو برضه لما يحصل ضرب الفلول دول حيخلعوا ويسيبونا نشم غاز لوحدنا برضه.. ماهو ده اللي كان بيحصل في الاتحادية.. 

والله انا حاسة بموضوع الصعبانية دي.. انا ساعات نفسي بتصعب عليا قوي، يعني انا واحدة من الناس طلع ميتين امي في الثورة.. طلع ميتين امي.. بكل المقاييس، وما كسبتش اي حاجة غير الشتيمة وقلة الادب من كل الاطراف.. وجات لي مراحل كتير نفسي اتسدت وبقيت اقول انا اشوف اللي ورايا ونفسي بدل المرمطة عشان شوية ناس قلالات اصل الواحد ما بياخدش من وراهم غير البهدلة واخرتها لا حمد ولا شكرانية وكمان شتيمة واتهامات باطلة واللي يقولي انت السبب في كل اللي احنا فيه، واللي يقول لي بقى معاكي فلوس، مع اني ما فلستش وفلوسي قلت الا بعد الثورة، واللي يقولي معاكي فلوس بادعي له من قلبي يبقى معاه قد اللي معايا.. طيب ده انا وانا لا استشهد لي ابن، ولا عيني طارت، ولا ماشية على عكاز، وما قعدتش في السجن الا اسبوعين، ولا اتكهربت في لاظوغلي، اتضربت بس.. لكن الحمد لله ما اتكهربتش.. امال بقى اللي اتحبس بالشهور، واللي اتكهرب، واللي عينه طارته، واللي عينيه اللي اتنين طاروا، واللي مش قادر يمشي، واللي واللي واللي.... دول احساسهم ايه بقى لما بعد البهدلة دي كلها ينزل مظاهرة جنبه سيادة الباشا لابس ومشيك وريحته مهفهفة وبيهتف جنبه؟ وهاذوها الباشا كان بيقول عليه بلطجية من سنة... هي حاجة تحرق الدم... قوي.. خصوصا انه لسه قايم من ضربة ان الاخوان الاندال اللي هو قعد سنة ونص ينضرب ويدفن صحابه من تحت راسهم عشان العسكري يمهد لهم نجاحهم في الانتخابات من غير ما يبقى فيه منافسة هم اللي خدوا الحكم وكمان بيزايدوا عليه بالثورة، لا وايه؟ بيقولوا عليه فلول عشان في ناس فلول نازلين معاه.. حاجة فظيعة.. فظيعة.. فظيعة وانا حاسة باحساسكوا كلكوا والله العظيم.. لما الاخواني يقول لاحمد حرارة يا فلول ولما احمد حرارة يمشي جنب واحد كان بيقول عليه بلطجي في مظاهرة، وحتختم في الاخر يا تنتصر الثورة دي ان شاء الله وبأمر الله تعالى وفجأة حرارة يلاقي اللي كان بيقول عليه بلطجي محمول على الاعناق، او لا قدر الله بعد شر الف بعد الشر ربنا ما يكتبها علينا ابدا ما تنتصرش والاخوان يطلعوا يقولوا انتصرت الثورة على الفلول.. اللي هم احمد حرارة ومالك مصطفى واحمد عبد الفتاح ورضا عبد العزيز وام خالد سعيد وابو جيكا وام كريستي وخطيبة الحسيني ابو ضيف

انهيار يعني

بس مهلا مهلا... (بايخة قوي مهلا مهلا دي.. اخوانجي فشخ) يا شباب انت بتعمل لله ولا بتعمل عشان الناس تشكرك.. الناس ولاد كلب مبدئيا.. دي القاعدة عشان نبقى واضحين مع بعض، وانت صعبان عليك ان الروس تتساوى واحيانا انت اللي بتتشتم والنطع اللي كان قاعد في بيته هو اللي بياخد كل الشكرانية.. بس ده عند الناس لان الناس ظلمة اصلا، الحياة دار ظلم، بس الخير لازم يفضل كده يعافر ويقاوح، يعني حنشوف الظلم ونسكت؟

اولا انت مش لازم تضايق من حاجة.. استمرارك على نهج واحد وتغير الركيبة عليك يقول انك متسق مع نفسك وانك مش بتعمل مواءمات ولا انك ماشي ورا مصلحتك انت ماشي ورا الصح وبس.. انت ضد الظلم وفقط، الظلم ده لما كان مبارك والاخوان لهم مصلحة ركبوا عليك، الظلم ده لما بقى الاخوان والفلول لهم مصلحة ركبوا عليك.. لكن انت ماشي زي القطر على خط واحد مش بتغيره ودي حاجة تخليك تحترم نفسك.. واذا كان الناس ولاد كلب دلوقت، التاريخ بيكتب.. هو حيقع من الضحك، بس حيكتب

واذا كانت الروس اتساوت هنا وساعات روس المصلحجية عليت عليك.. عند ربنا الروس مش متساوية يا زميل.. عند ربنا كل واحد واخد مقامه صح.. 

وانت تزعل على نفسك ليه؟ وتصعب عليك نفسك ليه؟ وانا مش باقولك انت بس كده، انا باقول لنفسي... تزعل ليه؟ ماهو انت لو عايز حاجة كنت اخدتها من الاول.. انت اخترت الطريق الصعب، انت اخترت تعرض حياتك وعينك وامنك للخطر مش عشان اي حاجة غير عشان انت بتحب الحق وبتكره الظلم.. تزعل ليه لما تنور وتزهزه لناس ما تشوفش وشها الا ساعة جمع الغنايم، ما لو عايز الغنايم كنت مديت ايدك اخدت.. وهم بياخدوا الغنايم عشان هم عايزينها.. يبقى ايه اللي يزعلك لما ده اختيارك

واحمد ربنا ان ماحدش بيقولك شكرا هنا

عشان الشكر عند ربنا يبقى مضاعف.. وانت لو بصيت في حياتك كده الناشفة اللي مليانة كوابيس ووشوش صحابك الميتين وكلام الناس الجارح واللوم والتقريع المستمر، حتلاقي  ربنا من عنده بيجبر بخاطرك في حاجات كتير قوي.. من غير ما تتحوج لبني ادم، والموضوع مالوش علاقة بنشطاء مشهورين والله... اي شاب عنده 18 سنة كان بينزل من يوم 25 ولحد يوم 30 وفي عيلته فلول ولا اخوان ولا حتى كنبة بياخد في جنابه كلام ولوم وتقريع، مبدئيا بيتعاملوا معاه على انه رئيس عموم الثورة، ويفضلوا يقولوا له: وانتوا ناويين على ايه؟ وانتوا عايزين ايه؟ وبعدين يفضلوا يشتموه ويلوموه ويحسسوا الواد ابو 18 سنة ده ان هو اللي مسئول عن كل الفياضانات والزلازل اللي حصلت في الكون

وفوق ده كله لو اتسجن ابوه يشتمه وهو في السجن ويقول للمحامي بتاعه: انا ابني قليل الادب وما عرفتش اربي

معلش... معلش والنبي.. والنبي ما تزعل.. وما تنكرش خير ربنا عليك، انا واثقة ان دايما ربنا بيجبر بخاطرك في حاجات بينك وبينه وبيفكرك دايما انه بيحبك وبيقولك ما تزعلش

احنا مالناش دعوة مين بيعمل ايه؟ ولا بيقول ايه؟ ولا بيهبب ايه؟ احنا حنفضل ماشيين على قضبان القطر نعمل الصح وبس

يعني ماهو من اول لحظة واحنا شايفين الاخوان بيركبوا علينا.. كنا نخلي مبارك يعني؟ من اول لحظة واحنا شايفين صفقة العسكري مع الاخوان.. كنا نخلي الحكم العسكري يعني؟ 

طيب انت خايف من ركوب الفلول... نخلي الاخوان يعني؟ حنروح من ربنا فين لو خليناهم؟ والفقرا؟ والضعفا؟ والجعانين؟ والعطشانين؟ والمحبوسين؟ والمصابين؟ والمقتولين؟ نسيب كل دول ونتخلى عنهم عشان خايفين لناس تنزل معانا غير مرغوب فيهم؟ حنروح من ربنا فين؟ حنروح من ربنا فين؟

جانب الضعيف هو دايما الامان

جانب الضعيف هو دايما الصح

------------

سيبنا بقى من موضوع الفلول ده وياريت بقى نفتكر جميعا الناس اللي في النص.. هذه الكائنات الرخوة، اللي عادة بيبقوا اكس اخوان، او تربية اخوان بس مش في الجماعة.. وتلاقيهم ماسكين العصايا من النص وعمالين يقولوا لك: اصل الطرفين بلا بلا بلا

طرفين ايه يا ناقص يا رمة يا عرة البشر انت وهي؟ طرف معاه سلطة وسلاح وامكانات، وطرف اعزل مش معاه الا صوته وتقولي استقطاب والطرفين غلطانين؟ تصدق انك راجل او ست رمة؟ ولا الاسلوب اللزج ده بتاع حبو بعض يا ولاد، وعارفين الكلام الدمث المهذب بلزوجة اللي يخليك عايز تتطرش في وش اللي بيتكلم.. وعامل او عاملة لي فيها عقلانيين.. عقلاني ايه يا روح خالتك في ناس ماتت وناس اتحبست وناس اتصابت وناس الاخوان عذبوهم في الاتحادية منهم شاب فقد قدرته على الزواج بسبب تعذيبهم.. لو ده ضناك ما كنتش قلت الطرفين والاستشيكتاب.. استشيكتاب ايه يا حيلتها.. 

اهو الصنف الوسخ ده بالنسبة لي انجس من مبارك ومن مرسي ومن خريت ومن بدين ومن نتنياهو نفسه

بل انجس من ابليس.. عشان كل من سبق ذكرهم لهم مواقف واضحة ومحددة وباينة

انما الاخوة اللي في النص بتوع حاذنبكوا انتوا الاتنين دول مافيش انجس منهم

والغريب ان معظمهم فعلا يا اكس اخوان يا تربية اخوان يا متعاطف مع الاخوان... فعلا، جماعة الاخوان مركز تفريخ النفاق والمنافقين

اهم الناس اللي في النص دول اخطر من الناس اللي بتنزل بالكلب اللولو في المظاهرة وحاطين نقركوا من نقرهم ومسمينهم فلول وهم مسميين نفسهم كده بعبطهم 

عارفين ليه؟ لان دي الناس اللي عايزة تكسب على طول، دي الناس اللي نطبق عليهم:

"الذين يتربصون بكم، فإن كان لكم فتح من الله قالوا ألم نكن معكم، وإن كان للكافرين نصيب قالوا ألم نستحوذ عليكم ونمنعكم من المؤمنين"

والحقيقة ان الاخوان لعبوا الدور ده في صراع الثوار مع العسكري

ودلوقت في ناس مش اخوان بس بيحترموهم برضه بيلعبوا الدور ده.. حاسبوا منهم

عشان دول ممكن يبقوا الورقة الاخيرة للاخوان لو حسوا انهم لازم يمشوا، ويبقى الناس اللي في النص دي هي البوابة اللي الاخوان حيخشوا منها تاني

-------

اخيرا... بصراحة مصر نكتة.. حتى في مصايبها، تحس انك بعد ما تقرا اي خبر في الجرنال او اي مقال او اي تعليق او تصريح لاي مسئول او شخصية عامة تبقى عايز تقول:

تام ترارارام تام تام