Thursday 24 May 2012

SOS الاستغاثة الاخيرة

توضيح:
سبب احتمالية ان شفيق يعيد حاجتين
1- الاقبال ضعيف
2- انه بيدفع فلوس ما بين 400 جنيه الى 1000 جنيه.. ده من كذا مصدر
من مراقبين داخل اللجان، ومعظم اللي صوتوا لشفيق ناس غلابة قوي ومعظمهم بيبصم.. 
3- كان فيه محاولة امبارح لتبديل الصناديق بس الحمد لله انها فشلت
بمعنى ان شفيق مش حينجح الا بالرشوة والتزوير
------------
الساعة واحدة وربع على ما اخلص البوست حتبقى واحدة ونص على ما يتقري وينتشر حتبقى اتنين ونص تلاتة.. يعني ما عندناش وقت كتير بس لازم اخلص ضميري للمرة مليون قدام ربنا
الوضع دلوقت حرج جدا، والبلد في رقبة اتنين بالتحديد: ابو الفتوح وحمدين.
لو اتحالفوا دلوقت حالا بإنهم يشوفوا مين اصواته اكتر ويبقى هو الرئيس واللي بعديه نائب انشالله بنص صلاحيات الرئيس يبقى بيوفروا دم كتييييييييير جدا... كل الدم اللي نزف قبل انتخابات الرئاسة كوم، والدم اللي حيسيل في حال ما اذا شفيق او مرسي نجحوا كوم تاني
وده طبعا لاننا عارفين يعني ايه شفيق يبقى رئيس.. يعني القذافي.. يعني كتاب البلوفر اللبني، يعني اطاطا بتتكلم كل يوم وتقول لنا: سرقة الجزم من قدام الجوامع لسه ما حدش يعرفها، سرقة مستودع الانابيب انا بس اللي اعرفها.. عشان انا فريق جدع.. وانت عارف ان انا فريق جدع
عصام سلطان؟ ده نحمده يا ولا.. نحمده بتاعة البخور
بما انه عسكري + فلول + مجنون + حاسس بالاهانة من كم الجزم والتهزيء اللي اخده وعايز يثبت شخصيته فالمدابح اللي عملها العسكر طول السنة والنص اللي فاتت مش حتيجي حاجة في اللي هو حيعمله فينا.. حيبقى القذافي حرفيا
وبما ان فيه ناس كتير مش حتقبل يحكمها القذافي فالموضوع ممكن يتطور وتبقى حاجة شنيعة جدا
بالنسبة لمرسي فهو الخيار الثاني اللي لحد دلوقت الارجح يطلع الاعادة مع شفيق
وهو حكم آل سعود مترجم ومدبلج باللهجة المصرية.. مش محتاجين يعني نتناقش في اسلوب حكم الاخوان اللي مش حيبقى وراهم غير الختان والمواقع الاباحية ومنع الخمور + ان الاخوان معاهم فلوس بالعبيط وعايزين يكسبوا الناس والبلد عندها ازمة اقتصادية، مصطنعة صحيح بس اهي موجودة، فحيضخوا فلوس كتير لانهم زي مرجان احمد مرجان كده متعودين يشتروا الناس بالفلوس
يعني اربع سنين قمع وفلوس.. وتعالى بقى بص على المصريين النسوان محبوسة في البيت بتلزبن على بعض والرجالة بكرش وبينطوا على السواق الهندي
وده مش كلام عنصري، لانه مش مرتبط بطبيعة شعب، ده مرتبط بطبيعة حكم
حرية + رفاهية = تقدم
قمع + فقر = ثورة
حرية + فقر = فوضى
واوحش حاجة على الاطلاق اللي بتشوه طبيعة الانسان
قمع + رفاهية = جاموسة
هات السويد وخليها في رفاهيتها واعمل لها قوانين قمعية وتعالى بعد سنتين حتلاقي الراجل بينط على السواق الهندي والستات بتشقط ستات تانيين من على النت
هات السعودية واحتفظ برافهيتها واديها حرية وتعالى بعد سنتين حترجع تلاقيهم بيطوروا قنبلة نووية
حتقول لي ايران دولة قمعية وفيها تقدم علمي حاقولك ايران مافيهاش رفاهية، الانسان لازم يشتغل عشان يلاقي ياكل، مش بياخد الاعدادية وياخد عليها اعانة، صحيح مش ضاربهم السلك زينا، بس ماحدش بيلاقي ياكل الا اللي بيشتغل وعندهم مشروعين مهتمين بيهم التعليم والمشروع النووي فزي ما اللي عايز ياكل عيش في مصر بيغني او بيلعب كورة اللي عايز ياكل عيش في ايران لازم يتعلم.. الى جانب انك مش سامع عن ايران غير المشروع النووي اللي هو مشروع دولتهم، لكن ما تعرفش مثلا ان ايران فيها اعلى نسبة ادمان للمخدرات في المنطقة، وماهياش يعني يوم الهنا يوم المنى مبروك علينا كلنا ولا حاجة
الخلاصة... الاخوان ما عندهمش مشروع غير فلوس كتير وقمع كتير وده حيخليك غصب عنك تضرب الفلبينية وتنط على السواق الهندي، لانك مذلول وطافح الكوتة، ومعاك فلوس كتير مش عارف توديها فين، فبتروح تجيب اي حد غلبان تطلع عليه عقدك
مبارك افسد الانسان المصري بما فيه الكفاية.. مبارك خلى الانسان المصري فرجة العالم، وبقت الناس تشاور علينا وتقول الشحاتين اهم.. الواطيين اهم.. الاندال اهم.. الجبنا اهم
وده يفسر سر اقدام الناس على الموت بشكل هيستيري وكلامهم عن الكرامة بشكل هيستيري زي اللي بينفي عن نفسه تهمة الجبن والوطيان والشحاتة.. وزي ليه؟ هي كده فعلا
احنا ما عملناش ثورة وصبحنا الفساد اللي عمله فينا مبارك اتغير.. احنا عملنا ثورة عشان نجيب نظام يصلح الفساد اللي عمله فينا مبارك
واذا كان مبارك خلق من قطاع كبير منا واطيين وشحاتين وجبنا واندال.. فمش ناقص نجيب شفيق يخلق منا معاتيه، ولا مرسي يخلق منا جواميس.. كده بقى اختصر وقول شامبانزي.. حنعيش ليه؟ احنا لحقنا نعالج نفسنا من الامراض اللي جابها لنا مبارك لما حنجيب لنفسنا امراض تانية؟
وطبعا.. بما ان فيه قطاع في مصر حيبقى واعي لده كله فبرضه مش حيسكت لما مرسي يمسك الحكم
ومن ثم حيبقى فيه دم كتير تاني
ودم بقى بما لا يخالف شرع الله.. والدم بتاع شرع الله ده بيبقى بحور والناس بتسكت لبعدين تخش النار
طبعا الثوريين مش حيسمحوا لشفيق او مرسي انهم يخربوا الثورة
الا الثورة على جثتنا
بس لازمتها ايه جثتنا واحنا عندنا الحل
عبد المنعم ابو الفتوح وحمدين صباحي في ايديهم الحل انهم يضموا على بعض دلوقت حالا
بدل ما بتوع الحملتين دايرين على اللي انتخبوا خالد علي يشحتوهم.. 
انا انتخبت خالد علي لاني قرفانة منكوا.. كان مفروض من الاول تعملوا فريق رئاسي وخالد قال ان لو حمدين وابو الفتوح عملوا فريق رئاسي هو حيتنازل
لكن خالد اترشح واحنا انتخبناه لما يأسنا منكوا، وعددنا مش كبير، احنا بالمقاطعين، بتتوع ابو العز الحريري بالبسطويسي مش ممكن نعمل لكم اي حاجة دلوقت.. انتوا اللي في ايديكم الحل بدل ما انتوا نازلين شتيمة في بعض
ما تبقوش زي ما ام كلثوم بتقول: انا وانت ظلمنا الثورة بالغيرة وجبنا للظنون سيرة، وعز عليك تسيب العند وتسامح، وعز عليا أكون البادي واتصالح
وده محمد واكد مستقل ومقاطع الانتخابات وبيراقبها وبيقول ان ابو الفتوح وحمدين عوروا بعض جامد وانفصالهم خلى لحد دلوقت اولا: الاقبال ضعيف جدا، ثانيا: الاعادة لحد دلوقت حتبقى بين مرسي وشفيق
الاستطلاعات بتقول ان ابو الفتوح متقدم على حمدين
واجب ابو الفتوح انه دلوقت حالا يتصل بحمدين صباحي ويتعهد له بانه يدي له صلاحيات نائب نص صلاحيات الرئيس
وواجب على حمدين انه يقبل
مافيش غير كده.. مافيش حل تاني.. ده اللي حيزود الاقبال في الساعات الاخيرة على الانتخابات، وده اللي حينقذ الموقف وينجينا من دم محتوم
احنا مش حنسيب بلدنا تروح للعسكر ولا لنظام فاشيست قمعي يشتري الناس ببطنهم
ومستعدين نموت... ولو ابو الفتوح وحمدين ما ضموش على بعض دم اللي حيموت بعد الانتخابات في ايديهم
وانا احملهم مسئولية كل واحد حيموت بعد الانتخابات.. وباقولكم انا حانزل احاول اموت تاني بما ان الموت مش راضي يستعبرني.. ومش حنسيب بلدنا.. بس انتوا تقدروا توفروا دمنا.. ومافيش غيركم يقدر يعمل ده في البلد كلها دلوقت وفي الساعات المقبلة.. لو انقذتوا البلد حتبقوا ابطال قوميين... ولو استمريتوا على المعاندة والانانية مش حنسامحكم لا واحنا احياء ولا واحنا اموات
ألا هل بلغت؟ اللهم فاشهد

27 comments:

amir matter said...

اقسم بجلال الله هذا ما قلته واقوله دوماً لمن حولي

لا فض فوك يا نواره

mohamedalimam said...

استر يارب

mohamedalimam said...

استر يا رب

memo said...

طب هما لما يتحدوا دلوقتى اوكيه الى لسه منتخبش حمدين حينتخب ابو الفتوح طب الأصوات الى راحت لحمدين حنعمل فيها اييه
ممكن حد يفهمنى لأنى مش فهمه ايه الوضع وايه الى حيحصل لو عملوا كده

memo said...

طب هما لما يتحدوا دلوقتى اوكيه الى لسه منتخبش حمدين حينتخب ابو الفتوح طب الأصوات الى راحت لحمدين حنعمل فيها اييه
ممكن حد يفهمنى لأنى مش فهمه ايه الوضع وايه الى حيحصل لو عملوا كده

احلام مش بعيدة said...

الله ينور بس احلى حاجة المعادلة الحسابية دى جامدة جدا وواقعية اخر حاجة

أبو عفان said...

استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب . استر يارب

thirteenoclock said...

والله مسخرة .. بعد ما وقع الفاس فى الراس .. دلوقتى اقتنعنا بالواقعية السياسية و تفتيت الاصوات .. راحت فين احلامنا و الذى يملثلنى و احلامى و الى حانتخبوا عشان ينجح مش عشان حينجح انتخبوا .. اشربوا بقى .. الكل حيشرب. .. خليتونى اقولها : منكم لله خربتو البلد .. ربنا يستر

thirteenoclock said...

والله مسخرة .. بعد ما وقع الفاس فى الراس .. دلوقتى اقتنعنا بالواقعية السياسية و تفتيت الاصوات .. راحت فين احلامى و الى بيمثلنى و الى حانتخبوا عشان ينجح مش عشان حينجح انتخبوا .. اشربوا بقى .. الكل حيشرب .. خلتونى اقولها : منكم لله خربتوا البلد .. دلوقتى لا عزاء الا "و لا تكرهوا شئ و هو خير لكم". يمكن لو جه واحد محترم كانت بلعتو الدولة العميقة و خاصة ان القوى الثورية بهذا الغباء و عدم التنظيم

MohmdFthy said...

فعلا تهييس
تهييس في الوقت الضايع

Anonymous said...

هههههههههههههههههههههههه ياكذابة ياحيزبونة

Anonymous said...

لو عندك دليل يابنت الجزمة روحي قدمية كذابة وقليلة الادب انتي

haroon said...

كان من الأولي التظاهر والاستموات في الميادين لمجرد اهانة الثورةوقبول ترشح احمد شفيق من اصله واساسه مش دلوقتي لما كل العالم شهدوا انه مفيش تزوير ويبقي اللي هيعترض ويتظاهر ضد النتيجة اللي افرزتها الصناديق بنزاهة بشهادة الجميع يستحمل اللي يجري ليه لانه هيتسحل وبالقانون ...العيب الاكبر علي الاتنين الكبار اللي ضيعوا فرصة تاريخية بالاتحاد فيما بينهم واخدتهم الجلالة والعزة والكبر وقاللك محدش احسن مني وانا وانا وانا ....اتفوووووووووو علي غباء ابو الفتوح واتفووووووووووو علي غباء صباحي ..منهم لله ربنا ينتقم منكم ومن غباءكم

عين فى الجنة said...

اسجل اعجابى بحسن توقعك واسجل استيائى من التحليل والنتائج التى تترتب على المعادلات فهى فعلا تهييس
لكن لو تأملنا عبارة الريس مرسى حنلاقى فيها مزيكة

حسين العسقلاني Hussein alaskalany said...

هيسي براحتك - محدش واخد منها حاجة، وإن شاء الله مرسي رئيس الدولة - وأنت يا نواره أول من يعرف أن الإخوان لا بتاع بطنهم ولا فلوس ولا سعودية من الكلام الكذب اللي كاتباه - فعيب عليك والله...

dahabhospital said...

لا يا نوارة لا والف لا الاخوان احسن الف مرة من شفيق وماتخافيش ماحدش هيعرف يلعب بمصر تاني ابدا .... ومصر عمرها ما هتقبل حكم آل سعود مصر اكبر من كده بكتير قوي وسعي تفكيرك ....اتكلمي بما يرضي ضميرك كمصرية وبس الاخوان ارحم من اي حد دلوقت احنا عايزين ادارة مشتركة لمدة اربع سنين لا كاريزما ولا وجاهة ولا خطب عايز حد يدير البلد

عاشــــــ النقاب ـقــــة"نونو" said...

الله المستعان

جلال كمال الجربانى said...

مهما حصل حلمنا مش لازم يموت
ولازم نفضلن نحلم بتحقيق أهداف الثوره مهما حصل
الثوره حلم ولازم نعيشه صاحيين أو نايمين
لأنه حلم بإن مصر تبقى أفضل

جلال كمال الجربانى said...

مهما حصل حلمنا مش لازم يموت
ولازم نفضلن نحلم بتحقيق أهداف الثوره مهما حصل
الثوره حلم ولازم نعيشه صاحيين أو نايمين
لأنه حلم بإن مصر تبقى أفضل

فافى said...

حساكى اتغيرتى يا نواره وبقيتى اهدى واعقل ولا دى لامبالاه :)
كمان حساكى بقيتى فى علم النفس حاليا
عموما انا بلوم الكل المقاطعين واللى مش مقاطعين وحمدين وابوالفتوح واد الكلب الثوار والفلول وولاد الكلب الاخوان والكل مسئول ومش بستثنى حد
http://wafaa-shalaby.blogspot.com/2012/05/2.html

Anonymous said...

اللهم لا شماته
بس هع هع هع هع

أنا طبعا أسخر من الكل وبضمنهم نفسي لتصديقي أن الحال ممكن أن يتغير

لا فائدة

Anonymous said...

اللهم لا شماته

بس هع هع هع هع

انا طبعا أسخر من الكل وأولهم نفسي لتصديقي أن الحال ممكن أن يتغير ولا حول ولا قوة إلا بالله

لا فائدة

Unknown said...

نوارة الدنيا اشهد انا بمليون راجل و ياليت اللى انت قلتيه كان اتسمع بس زى ما قيل ( اللهم اغوذ بك من جلد الفاجر و عجز التقى ) و المخطط كان واضح من الاخوان و العسكرى ان لا توجد اعادة مع واحد من دول ( ابو الفتوح و حمدين ) و الهدف ان الاثنين يفتتوا بعض و بالتالى يأخذ مكانهم مرسى و شفيق فيه حكمة بعد الحدث و فيه ناس بتشوف قبل الحدث , لكن فيه افظع اللى مش عاوزين يشوفوا الحدث و هو قدام عنيهم

طيوري said...

http://www.youtube.com/watch?v=CPzmzQ9SjxM&sns=fb

شوووفي خارج الموضوع بس مستفزززززززززززززززززززززززززززززززززز

hardway said...

ياناس يانااااااااااااااااااس
سكسكة مهرتلة..ضايعة..أهو شفيق نجح ودخل الاعادة
شوفتي يامهرتلة..ماعندكيش اي تصور او فهم تهبيش تهييس تعبيط ......لا تجدوا نوارة السكاسك الا في الزحمة في الميدان تموت في الحشد والاحتشاد والجري وراء كاميرات التصوير بس برضه ياسكسكة مافيش سويسرا ولا فرنسا زي أسماء محفوظ دي ناس ممنهجة
مش مسكسكة زيك
سلمي علي حمدين بك ودكتور عبد المنعم وثالثهما لا اتذكر اسمه الآن....جاييين دلوقتي بعد سقوطهم عايزين مجلس رئاسة.....لكي الله يامصر..لكي الله يامصر

hardway said...

ياناس يانااااااااااااااااااس
سكسكة مهرتلة..ضايعة..أهو شفيق نجح ودخل الاعادة
شوفتي يامهرتلة..ماعندكيش اي تصور او فهم تهبيش تهييس تعبيط ......لا تجدوا نوارة السكاسك الا في الزحمة في الميدان تموت في الحشد والاحتشاد والجري وراء كاميرات التصوير بس برضه ياسكسكة مافيش سويسرا ولا فرنسا زي أسماء محفوظ دي ناس ممنهجة
مش مسكسكة زيك
سلمي علي حمدين بك ودكتور عبد المنعم وثالثهما لا اتذكر اسمه الآن....جاييين دلوقتي بعد سقوطهم عايزين مجلس رئاسة.....لكي الله يامصر..لكي الله يامصر

Unknown said...

للأسف , الكام شهر اللي بعد الثورة كان لسه مضحوك علي البلد كلها وأولهم النخبة بأسم حماية الثورة وأيد واحدة وكان ناقص نغير القبلة لكوبري القبة !!!
وانتي من الناس دي فهمتيها متأخر لأنك طيبة ومتعرفيش عن الناس دي حاجة ولما شباب صغير حاول يفهمكم ويعرفكم اللي هو شايفه وعايشه يوم 8 ابريل قولتوا عليهم فلول !!!
انا بعلق ساعات علي مدونتك وبقراها من 2009 مثلا وعارف نيتك الصادقة والله بس متغلطيش الغلطة دي وتحاسبي لوحدك ع المشاريب ... انتي كلامك ليه تأثير في ناس كتير بتفهم ...
انا لما بيجيلي كام كومنت علي بوست في صفحة علي قد حالي ولا مدونة مفيش حد بيقراها باحس اني ممكن اعمل حاجة ...
اعتصمي , اضربي عن الطعام , اقفي هزقي في النخبة كل يوم , شغلي الشبشب علي دماغهم ,,,
بس اوعي تبطلي كتابة لأن ده دورك ...
وربنا معاكي ومعانا ...
الثورة مستمرة بجد المرة دي . MK