عن السيسي والفرح الهيستيري والنكد البوز الاخصي

ده انتوا ناس مبالغ فيكوا... هو يا الناس تفرح كاننا حررنا فلسطين يا الناس تزعل كأننا خسرنا كاس الامم الافريقية؟

على فكرة كلنا مش عايزين حكم عسكري... حتى الناس اللي بتقول الجيش والشعب ايد واحدة مش عايزين حكم عسكري.. هم عايزين الجيش يتعامل مع مصر زي ما الظباط المتقاعدين بيتعاملوا مع مجلس ادارة نادي هليوبليس... او مجلس ادارة العمارة: يظبطها، ويوفر الفلوس اللي اتسرقت، ويشد على البواب شوية عشان ابتدا يتمرع، ويصلح الاسانسير، ويبيض مدخل العمارة، ويعمل كشف حساب لصندوق العمارة، والست اللي بتيجي تمسح السلم تخاف منه عشان تمسح كويس بفنيك مش بمية ريحتها وحشة وتكروت... هم ده تخيلهم، بيتعاملوا مع الجيش من واقع النادي والعمارة مش من واقع السياسة، ده بجد، زي ما بيتعاملوا مع الشرطة من واقع انهم بيخشوا مكتب الظابط في المرور يجيب لهم عصير ويخلص لهم تجديد الرخص... دي ناس ما تعرفش حاجة دي... واللي احنا خايفين منه ليحصل هم مش عايزينه يحصل.. هم عايزين يصلحوا الاسانسير ويبيضوا المدخل

بالنسبة للجيش نفسه، ما اظنش ان من مصلحته يمسك الحكم، كلنا خايفين من حكم عسكري، وكلنا مش عايزين السنة والنص اللي قضيناها مع المدرعات المرتبكة تتعاد تاني، وما اظنش الجيش عايزها تتكرر، ولا عايز يتشتم تاني، ولا عايز يتقال له: وميزانيتك.. وفين الفلوس.. ويا بتاع الحلل والمكرونة، وكل المرمطة دي... حد في الدنيا بيعوز يتمرمط؟ الا الاخوان بقى..

اذن.. الناس امبارح نزلت تهيص في الشارع.. وبعض الثوار انهاروا من الرعب والنكد ودي كلها مخاوف مشروعة، الى جانب احساس المرارة اللي هو مشروع برضه بصراحة.. سنة ونص مشارح وصحاب بيموتوا.. والاهم من ده كله الصدمة العصبية، احنا ما كناش معشمين في الاخوان عشان نتصدم في وساختهم، بس بعد 11 فبراير عشمنا كتير في ابناء الصمت وعشان كده كانت صدمة كبيرة لحد دلوقت ماحدش فينا عارف يتجاوزها

بس احنا لازم نتجاوزها عشان المشوار لسه طويل

بقى هالله هالله ع الجد والجد هالله هالله عليه:

بالنسبة للناس اللي فاكرة ان الحكم العسكري ده زي رئاسة ظابط متقاعد لمجلس ادارة العمارة.. لا هو مش كده على فكرة.. لا مصر عمارة، ولا دول ظباط متقاعدين، وحق الله اللي فعلا بيحب القوات المسلحة ودايب في هواها يدعي ربنا ان السيسي بعد ال48 ساعة يتبنى خارطة الطريق اللي طارحاها تمرد ويلتزم بوعوده اللي قالها في البيان وما يقعدش ولا ثانية في حكم البلد.. لو ده حصل السنة ونص الدمار بتوع طنطاوي حيتمسحوا من ذاكرة الشعب المصري... مش حيتمسحوا من ذاكرة صحاب اللي ماتوا.. بس احنا مش مهمين.. طول عمرنا مش مهمين، ومش مهتمين اننا نبقى مهمين، احنا عايزينكوا انتوا تبقوا بخير وتمام.. مسيرنا نموت واحزانا وكوابيسنا تندفن معانا... لكن مافيش داعي تطالبوا بحاجات تخلي الاحزان والكوابيس تصحى من جديد.. والا ويمين الله ننكد عليكوا وعلى البلد كلها.. ارحمونا شوية، شوية انسانية
انتوا بتحبوا المجلس العسكري حبوه... بس هو قال احنا ملتزمين بمطالب الشعب، ومطالب الشعب دولة مدنية لا دينية ولا عسكرية، والراجل كتر خيره قال احنا مش حنبقى طرف في السلطة ولا اللعبة السياسية، ساعدوه بقى انه ينفذ التزامه ده وما تورطوهوش في حاجة هو مش عايزها
والمفروض ان اي جيش في الدنيا مش صايع وبندور له على شغلانة، ده جيش اهم دولة في الشرق الاوسط ومحاطة بمشاكل وشغلته والقسم بتاعه الحفاظ على حدود مصر وقناة السويس.. يبقى ساعدوه يعمل شغلته
تساعدوه ازاي؟
اولا: من هنا لحد لما المهلة بتاعة السيسي تخلص الميادين لازم تتملي
ثانيا: حنشوف خارطة الطريق بتاعة الجيش.. والله لو زي ما احنا كلنا احسنا الظن وتوقعنا وزي ما هو قال، وتبقى خارطة طريق واضحة ومحددة بتواريخ وكل تاريخ متحدد فيه حيتعمل ايه ومافيهاش حكم عسكري، وانما حكم مدني زي ما فيه اقتراح ان رئيس المحكمة الدستورية يبقى رئيس شرفي وتشكيل حكومة مدنية وتشكيل لجنة لكتابة الدستور
ابوس ايديكوا
الدستور اولا
الدستور اولا
الدستور اولا
وبعدين انتخابات في ست شهور
والله لو كده وبتواريخ... يبقى نروح بيوتنا بقى ونجيب ياميش رمضان ونتابع المسلسلات وننبسط ونعيش حياتنا
ما كانش.... يبقى احنا مضطرين، حماية لنا، وحماية للقوات المسلحة نفسها، اننا نفضل في الشارع لحد ما مطالبنا تتحقق من غير خستكة
وجع ساعة ولا كل ساعة... خلينا نخلص بقى
وعايزة اقولكوا حاجة.. اوعوا تفتكروا ان لما كلكوا تروحوا وتسيبوا الشارع قبل ما المطالب كاملة يبقى فيه ضمانة انها تتحقق الشارع حيفضى ولا عجلة الانتاج حتدور ولا اي هلاوس من دي... كانت دارت بعد ما روحتوا وسيبتونا بعد 11 فبراير
في مجموعة كده قلبها محروق ومتنكدة ومش فارق معاها موت ولا سجن.. مش حتهني حد.. ومش حتسمح لحد اننا ينضحك علينا تاني.. ومش حينوبكوا ولا ينوب اي حد غير ان السنة والنص بتوع طنطاوي يتعادوا تاني ومصر مش مستعده لده خصوصا ان فيه ارهابيين متربصين... فلازم كده الامور تتظبط وتتستف بحيث ان حتى الجيش يبقى فاضي يحمي البلد من اي ارهاب خارجي او داخلي.. دي شغلته: الجيش يحمي ولا يحكم، وما اظنش انه عايز يحكم، وما اظنش انه مستفيد حاجة من الحكم، بس لو استموتوا له وقلتوا له حواش شيلني يا حواش يبقى بتدبسوه وتدبسونا وتلبسوا البلد كلها
----
بالنسبة للزملاء الثوار اللي قاطعين ابونيه مع النكد:
ابوس ايديكوا افرحوا شوية.. شوية
افتكروا كده من اول الثورة، الكام لحظة اللي سيبنا فيها نفسنا للفرح هي دي اللحظات اللي كسبناها.. ما احنا كده كده الحياة ناوية تنكد علينا.. يبقى ننكد علينا في لحظات الفرح ليه؟
احنا كسبنا فرحة يوم 11 فبراير بصرف النظر عن اللي حصل بعدها، ماهو اللي بعدها نكد اتنكدناه في وقته، ما كانش في داعي نستبق النكد.. وكسبنا حتى لما فرحنا بسقوط شفيق ورحيل المجلس العسكري.. والنكد اللي بعده اتنكدناه في وقته.. نفرح دلوقت بسقوط الاخوان، ولما الدنيا تجيب لنا النكد لحد عندنا نبقى نتكنده.. احنا ورانا ايه؟ بس ما ينفعش نكد كونتينوس كده
وقال على رأي السيسي: هذا الشعب الذي عانى كثيرا ولم يجد احدا يحنو عليه
اي والله.. والنبي صحيح.. (ملحوظة: الجملة دي مأثرة في كل الشعب من اول الحافي لحد اللي ريحة برفانه جايبة من اول الشارع.. شعب محروم من الحنان هههههههه)
ارحموا نفسكوا وارحموا الناس... الموقف اللي حيتفرض علينا حنواجهه زي ما اتعودنا.. بس على الاقل افرح بانجازك يا اخي.. انت عارف انت عملت ايه؟ انت عملت معجزة حتخلي بتوع العلوم السياسية يحطوا لك نظريات جديدة لوحدك، انت في ظرف سنتين ونص اسقطت حكم بوليسي، ثم حكم عسكري، ثم حكم ديني... دي لو بلاي ستيشن ما كانتش بقت كده
توكل على الله وافرح.. اذا ما كانش عشان انجازك، يبقى عشان مسيرك تتنكد ومن حقك تاخد بريك تفرح شوية، مش ممكن حتفضل سنتين ونص تحس بشكل مستمر بالخذلان والخزي والطعن في الضهر والخيانة والمرارة والظلم... كتير عليك ارحم نفسك.. لازم تحس شوية انك فرحان وانك عملت حاجة.. والله العظيم انت عملت حاجة.. ما تقعدش تنحت في نفسك وفي اعصابك مشوارك لسه طويل
وادي احنا بنعمل اللي علينا وبنحاول نحذر الناس من ان ينضحك عليهم تاني
وادي احنا محددين المرة دي احنا عازين ايه:
حكم مدني، دستور اولا، انتخابات 
عشان ماحدش يقولنا ما انتوا اللي ما كانتش مطالبكوا واضحة احنا فهمنا انكوا عايزين تمشوا مبارك واهم مشوه... مع ان والله العظيم ده مش صحيح، مطالبنا كانت واضحة وكنا معلقينها في الميدان، لكن يالا العايط في الفايت نقصان عقل
وادي احنا اتعلمنا والمفروض ان كل الناس تكون اتعلمت: ما نستعجلش.. ما نعصرش لمون.. نقعد على البساط وناخد سيد الرؤساء
وفي كل الاحوال احنا مكملين ان شاء الله لحد ما تتعدل، والله المطالب اتحققت في 48 ساعة، نروح احنا كمان نشتري ياميش.. ما اتحققتش نقول للناس اقعدوا لحد ما تتحقق، قعدوا اهلا وسهلا، ما قعدوش احنا صيع ما ورناش حاجة
عشان كده كنت باقول ممنوع موت الثوار البتة في المعركة دي مع الاخوان.. ما تصدرش نفسك في مواجهات الاخوان دلوقت عشان توفر نفسك لبعد كده، والله ما احتاجتش يبقى خير، احتاجت اديك موجود.. معركة دلوقت اي حد يسد فيها، معركة ما بعد كده (ويارب ما يبقاش في معارك ولا حاجة خالص) ماحدش يسد فيها غيرك
----------
الاخوان والمتأسلمين:
ابوس ايديكوا امشوا على خير
والله العظيم والله العظيم والله العظيم دي نصيحة خالصة ليكوا ولمصلحتكوا انتوا اكتر من مصلحة اي حد تاني وربنا شاهد على قلبي وعلى نيتي.. انتوا مصريين وانا ما ارضالكوش اي حاجة وحشة من اللي مستنياكوا لو ارتكبتوا حماقات
ارجوكوا حافظوا على تاريخ وتعب وشقا وبنا تمانين سنة
ارجوكوا امشوا.. امشوا.. ما توصلوش الناس انها تمشي تصطادكوا في الشارع
انا من ست شهور قلت في فيديو للاخوان: حرام عليكوا اللي بتعملوه حتيجي لحظة انا نفسي مش حاعرف امشي بحجابي ده.. واللحظة دي بتقرب قوي
حرام عليكوا
حرام عليكوا نفسكوا وتعبكوا ومجهودكوا وفلوسكوا.. خلصوا قبل ما ال48 ساعة تنتهي بكرامتكوا
وما كانش مفروض ابدا تستنوا لما السيسي يعمل كده.. ابدا ابدا.. كل ساعة بتتأخروها مش في مصلحتكوا، كل ساعة بتتأخروها بتخصم منكوا تاريخ وفلوس ودم.. دم
وانتوا لو حتفضلوا تبرقوا للناس وتهددوهم وتقولوا لهم الشهادة والجهاد والكلام ده الناس حتموتكوا.. انا مش عايزة الناس تموتكوا.. بس انتوا كده بتخوفوا الناس، وكام حد من الثوار اللي دخلوا معاكوا في مواجهات بس اللي عارفين انكوا بق وان اخركوا شوية طوب يجريكوا، بقية الناس متأثرين بافلام وحيد حامد ومتخيلين انكوا عتريس وبلوة وسودا وحيخافوا فعلا.. واوحش حاجة تتعامل مع حد خايف.. مافيش اكثر عدوانية ولا عنفا من الخايف
انتوا فاكرين لما الناس حتخاف حتخش في بيوتها؟ يستحيل.. انتوا وصلتوا لهم احساس انكوا حتخشوا عليهم البيوت، واستفزيتوهم، ومليتوهم غل عمرهم ما حسوا بيه ناحية حد، انتوا ازاي تعملوا كده؟ ازاي تعملوا كده مع الناس؟.. الخايف دايما بيبقى متوحش ودموي وعنيف وغير عقلاني في مواجهاته... ما ترجعوش تزعلوا ان الناس بتسحلكوا في الشارع بعد ما تقضوا ليلة كاملة تضربوا عليهم نار من الشباك وتموتوا لهم ولاد البوابين الغلابة.. ما ينفعش كده، حاولوا تصعبوا على الناس شوية.. انتوا مش مدينهم فرصة تصعبوا عليهم ابدا
خلاص الناس مش عايزاكوا، وما جراش حاجة لما تعترفوا انكوا فشلتوا، خلوها فشل في جولة بدل ما تبقى فشل في معركة، خليها انكوا فشلتوا اول مرة عشان مالكوش خبرة بدل ما تبقوا فشلتوا الى الابد عشان غير صالحين للاستخدام الادمي
ما ترجعوا خطوة لورا وتضحوا بالرئاسة عشان تفضلوا فصيل سياسي متواجد في الساحة يصحح ويجود وينافس ويعارض ويحاول الكرة تاني بدل ما تتحولوا لمطاريد الجبل وتنطردوا من جنة المصريين الى غير رجعة
وما تقعدوش تقولوا للناس جبريل وحلمنا بسيدنا النبي والكلام ده.. الكلام ده بيضايق الناس قوي.. المصريين معتزين بدينهم وانتوا بتطعنوهم في اعز حاجة عندهم لما بتقللوا من ايمانهم وتعاملوهم بازدراء كأن ان انتوا مؤمنين وهم لا
امشوا، ووانتوا بتمشوا حاولوا تتصعبنوا شوية، المصريين طيبين والله.. وحتصعبوا عليهم، بس ما تستفزوهمش وتسخنوهم عليكوا
الا هل بلغت.. اللهم فاشهد

كده مش حينفع

كده مش حينفع.. كده مش حينفع.. هو مش احتفال بكاس الامم الافريقية 

فرحانين قوي عشرين مليون نزلوا عشرين مليون نزلوا.. وبعدين؟ عندهم هانج اوفر من ليلة امبارح؟

مش حينفع كده

وانا مش فاهمة تمرد راحت فين؟ المفروض تطلع بيان تقول للناس فيه الخطوة الجاية

الناس لو ما نزلتش النهاردة حتبقى اقل من هوجة، حتبقى احتفال بماتش، وحتبقى مجزرة، وقبل ما الناس تلحق تلم نفسها عشان تنزل تاني حيتعمل حملة اعتقالات

اذا كنا احنا فرحانين بامبارح وقاعدين نستمتع بنشوة العدد... فالاخوان دلوقت مش قاعدين ساكتين

لو تلاحظوا الاخوان مش طالع لهم حس خالص... عارفين ليه؟ عشان كامنين يشوفوا احنا اخرنا ايه وينقضوا علينا في اللحظة المناسبة

امبارح الاخوان قتلوا 12 واحد.. 8 عند المقطم، و4 في المحافظات، وتقريبا العدد زاد عن كده كمان دلوقت

وده ما كانش غير عشان يحفزوا العنف ويرجعوا ينتقموا

كده مش حينفع... كده مش حينفع

احنا بنقرا في سورة عبس؟ امال عمالين نرغي في ايه من امبارح ونقول ما ينفعش حد يروح ولازم تصعيد

ايوه الاخوان اتفاجئوا بعدد الناس اللي نزلت ضدهم

بس هم مش حيقضوها متفاجئين بقى.... هم حيحاولوا ينتقموا.. وبعد اللي شافوه امبارح عداءهم ما بقاش مع المعارضة ولا جبهة الانقاذ ولا الشعوعيين ولا النصارى الصلبيين والماسون والشيعة والشواذ والفلول.. عداءهم بقى مع الشعب.. ده بجد، وعلى فكرة هم مستعدين نفسيا جدا انهم يكرهوا الشعب ويتعاملوا مع مصر على انها القرية الظالم اهلها وهم الثلة المؤمنة واهل الكهف والصحابى وحق علينا القول ولو ربنا ما جابلناش صيحة من عنده يبقى هم يفرقعونا ويجاهدوا مافيش مشكلة.. يعني مش حيقفوا مع نفسهم ويقولوا يعني معقول الشعب كله غلطان واحنا اللي صح؟ ايوه حيقولوا احنا اللي صح ويحطوا القرآن في غير مواضعه ويرجعوا لاستشهادات الجهاديين عشان يبرروا ان المجتمع يستحق النقمة

يعني المرة دي مش محمود بدر وعلاء ودومة ونوارة ومالك وكل الناس اللي انتوا بتسترخموهم وتقولوا عليهم "نوشتاء" وتألسوا عليهم اللي حيتشمطوا وياكلوا كاكا زي كل مرة وخلاص... المرة دي وبعد اللي شافوه امبارح المجتمع كله كافر وعدو الله يعني حتتشمطوا معانا كلكوا يا حلو منك له ومش حيبقى عندكوا فرصة تألسوا علينا واحنا بنتجرجر في المحاكم، لاننا لا احنا ولا انتوا حنبقى عايشين عشان نتجرجر في ايتها حتة.. وعشان تبقى عارف، بعد موضوع العباسية الاهالي في العباسية كانوا متحفزين ضدنا، واحنا بنهرب في العباسية كان الاهالي كل ما يشوفوا حد بدقن يضربوه ويسلموه للجيش، واحد من حازمون قالي: واحنا بنموت عشان الناس دي؟ فقلت له: بس احنا بنموت عشان المبدأ.. فقال لي: لا الناس دي ما تستاهلش

هو صحيح احنا كلنا كتير بنقول عليكوا شعب ما يستاهلش عشان بتعملوا معانا حركات قرعة كتير وساعات كتير بيبقى اللي يوضيكوا زي اللي ينجسكوا.. بس ده كلام من ورا قلبنا.. زي ما الواحد كتير يتغاظ من امه ولا ابوه ولا ابنه ويقول والله ما انا سائل فيه تاني، ويرجع ما يهونش عليه

انما هم دي عندهم عقيدة عندهم مؤمنين بيها انهم الصح والباقي ضالين

فهم مبدئيا كده يعني مش محتاجين مجهود كتير عشان يكرهوا الشعب ويهون عليهم يعملوا فيه اي حاجة.. هم مؤهلين لده اوريدي.. هم الجماعة الربانية اللي جاية تهديكوا.. ما رضيتوش تهتدوا تتقتلوا.. 

طيب هم مش حيقدروا يعملوا حاجة طول ما الاعداد كبيرة في الشارع

انا نفسي افهم الناس روحت ليه؟ تعبت؟ تعبت من اول يوم؟ طب ما كنتوش تنزلوا بقى

ما ينفعش تعور وحش مفترس ولا كلب مسعور وتسيبه.. يا تجهز عليه يا كنت تسيبه في حاله من الاول

اذا كنت حران تعتصم الصبح يبقى ما تروحش الشغل وده اضعف الايمان... خايف تترفد من الشغل، وحران تعتصم الصبح.. يبقى ما كنتش تتشملل وتقول مش عايز الاخوان... كنت تقعد في بيتكوا وتقول الشرعية خط احمر وخلاص... بتتصرف تصرفات مش قدها ليه؟

احنا مش نازلين نهزر احنا... ده دم ناس.. ولو الناس فضلت في بيوتها كتير الدم حيزيد، وحيجيلك القتل دليفري لحد البيت

اسمعوا وعوا...

الميادين لو ما اتملتش في مجزرة حتحصل

ما تشحطوطناش وراكوا وبوري رايح وبوري جاي.. اللي ياخد موقف يتحمله ويبقى قده ويتصرف على مستواه

والله الموفق والمستعان