احنا حنقضيها حلفانات وخطب كده كتير؟
السيد الرئيس محمد مرسي ما شكرش المحابيس اللي لولاهم ما كانش ابواب السجن اتفحت له ووصل لقصر الرئاسة في خطابه اليوم بجامعة القاهرة
واللي زاد على كده انه قعد يسمع السيد اللواء اللي مش عارفة اسمه وهو بيقول له: قبضنا على 11 الف 555 من مثيري الشغب والهاربين من السجون (ملحوظة.. السيد الرئيس من الهاربين من السجون دول) ومثيري الشغب دول اللي عملوا ثورة
وماحدش يقول لي فيه جنائيين
الجنائي اولا مش مفروض يتحاكم عسكريا
ثانيا مين بقى الجنائيين اللي اتقبض عليهم؟ هو كل ما ظابط يشوف عيل شكله غلط ولا هدومه مبهدلة يقول له تعالى انت بلطجي ويتاخد ينطس خمس سنين ولا عشر سنين ولو طول لسانه ينطس مؤبد عسكري يقولوا عليه بلطجي؟
ويا ترى المواطنين الشرفاء اللي قتلوا محمد محسن، والمواطنين الشرفاء اللي كانوا بيهجموا علينا في عز الثورة وناخدهم نسلمهم للجيش يدخلهم الدبابة ويطلعهم من الناحية التانية، والمواطنين الشرفاء اللي كان الناس بتاخدهم لحد مقر الشرطة العسكرية واول ما يمشوا يشوفوا المجرمين وهم خارجين من الشرطة العسكرية، والمواطنين الشرفاء اللي ضربونا في موقعة الجمل، والمواطنين الشرفاء اللي ضربونا في العباسية مع اننا كنا بننشر اساميهم ومحل اقامتهم وصورهم كل دول مش محبوسين يبقى مين البلطجية المحبوسين معلش يعني؟
ايها السيد الرئيس.. السجين الهارب سابقا
طلع الزمل.. مهما كان دول زمل
احنا مش عايزين منكوا حاجة بعد الحب الجارف اللي فرر الدمعة من عينينا النهاردة في الهايكستب... ونشكركم انكوا راعيتوا مشاعرنا وما بوستوش بعض بوسة حنك في اخر الليلة، واسفين قوي على "العنت" اللي اتسببنا فيه للقوات المسلحة الوطنية
يا ريت بقى مثيري الشغب دول اللي الجيش بنفسه قال ان عددهم 11 الف 555 ومعاهم معتقلي السويس وظباط 8 ابريل وظباط 27 مايو تخرجوهم لنا ومش عايزين من بلدكوا اللي سقيتنا المر حاجة
متشكرين على كده قوي
متشكرين يا ولاد الاصول على البهدلة اللي شوفناها ولولا بهدلتنا ما كنتوش بقيتوا كلكوا في الاملة اللي انتوا فيها
ولولا اننا من مثيري الشغب ما كنتوش قعدتوا قعدتكوا دي مع بعضيكم بكل الحب
احنا عايزين اخواتنا اللي جوه السجن.. حناخدهم ونغور من وشكوا في الصحرا نثير الشغب مع بعض
بكرة الساعة 6 مساء في وقفة عند القصر الجمهوري للافراج عن كافة المحاكمين سياسيا وظباط 8 ابريل وظباط 27 مايو
ملحوظة: محمد وديع حياته مش في مأمن واحنا عايزينه يخرج ويتأمن
بكرة كمان احمد حرارة حيخش لمرسي ويقابله عشان المعتقلين يا ريت لو حد يعرف حد من اهالي المعتقلين يتصل بيهم عشان يخشوا مع احمد
