Friday 28 March 2008

ايه حكاية مشكلة العنوسة دي بقى؟

والله انا مش شايفة اي مشكلة عنوسة في البلد، سيبكوا من نظريتي التآمرية، بس بجد ليه الالحاح في ان عندنا مشكلة عنوسة بينما الحقيقة ان الاحصاءات بتقول ان تسعة مليون غير متزوج وغير متزوجة (عانس يعني) من سن تمنتاشر لخمسة وتلاتين!!!نعم؟ هو اللي ما اتجوزتش وللا ما اتجوزش في سن تمنتاشر وللا عشرين وللا تمانية وعشرين ده يبقى اسمه عانس او عانسة؟
اولا التسعة مليون دول لو كلهم فوق الاربعين ولسة ما اتجوزوش يبقى برضه مافيش مشكلة عنوسة لاننا وفقا للتعداد ستة وسبعين مليون من غير اللي مالهمش شهادات ميلاد واللي ساكنين في مناطق بتوع التعداد يقرفوا يدخلوها طبعا وبلاش نحسب دول في احصائية ما يسمى بالعوانس لان دول مش داخلين في اي احصاءات وعايشين حياتهم هم بلد وبقية البلد بلد تانية. وبيتجوزوا ويخلفوا ويموتوا ولا حتى بيتعمل لهم شهادة وفاة
طيب خلينا في المحسوبين تسعة مليون على ستة وسبعين مليون يعني حداشر وتمانية من عشرة في المية..ده كتير؟ ده كتير في عالم الناس كلها ما بقتش تتجوز اصلا؟ والستات في اليابان بيربوا حيوانات عشان زهقانين من الرجالة؟ والرجالة في الخليج بيتجوزوا اي جنسية تانية غير الخليجية عشان طلباتها مش عارفة كام كيلو دهب؟ حداشر في المية ده كتير؟ هو فيه حد بيتجوز قدنا؟ ده احنا اي حد معدي من البلد ما بيخرجش منها الا وهو سايب عيل
المعروف ان الفقرا قوي والاغنيا قوي بيتجوزوا من غير اي مشاكل
الفقرا قوي: حصيرة واقلب
والاغنيا قوي: عش حياتك كأنك لا تموت ابدا....عش حياتك كأن يوم القيامة لن يأت، عش حياتك كأن مافيش ربنا اصلا
وبيتجوزوا ويصاحبوا من الجنس الاخر ومن نفس الجنس كمان يعني لما يحبوا يجددوا
ده حتى المقريزي قال علينا في خططه: هم منهمكون في الجماع
واحنا من اكتر الدول اللي بتستهلك الفياجرا لحد ما طلع اوشاعة على رجالتنا انهم مضروبين، طبعا ما يعرفش الحقيقة غير المصريين اللي عارفين ان الرجالة المصريين الوحيدين اللي يبقى طبيعي ويصمم ياخد فياجرا عشان عنده طموحات ما اتحققتش لحد النهاردة لاي انسان
يبقى فين المشكلة؟
التسعة مليون دول نصهم ما وصلش لسن الجواز العالمي ويمكن اكتر من نصهم خصوصا ان سن الجواز اتأخر في العالم كله، ثم اننا لحد مطلع القرن اللي فات كان سن الجواز المتعارف عليه اربعتاشر سنة، وخلاص بقى المفاهيم دي اتغيرت في المدن، يمكن لسة في الريف شوية زي ما هي بس والله حتى الريف ابتدى يغير رأيه، واللي عايز يتجوز بيتجوز باي طريقة، ومش صحيح ان البنات طلباتها كتير ولا حاجة، ولا صحيح ان الرجالة مش لاقيين يتجوزوا عشان عواطلية، بيبقى عواطلي ويتجوز واحدة تصرف عليه بمنتهى الروح الرياضية يعني مافيش اي مشاكل
ليه الاصرار على ان مصر فيها مشكلة عنوسة؟ ليه؟
عشان الطبقة المتوسطة قيمها متلخبطة وعاملة زي الهجين اللي نصه حمار ونصه التاني رجل فرخة؟ طب واحنا مالنا الطبقة المتوسطة دي وفقا لتقارير القلل المنتحرة ما تتجاوزش العشرة في المية، ومش مشكلتها العنوسة مشكلتها تلوث القيم والدماغ اللي متركبة شمال وانهم عين في الجنة وعين في النار وح يموتوا يعيشوا عيشة رجال الاعمال وعيني فيه واخي عليه وفي نفس الوقت بيتنططوا على الطبقة الفقيرة بانهم هم المتعلمين اللي عندهم دين واخلاق
وعشان كده انتشرت ما بينهم ظاهرة المزة المؤدبة وعشان كده طلبات رجالة الطبقة دي: رقاصة متدينة
مش رقاصة هي حاجة تانية بس الواحد مش عايز يقبح يوم الجمعة...اجازة
ومشكلة الجواز بالنسبة لهم مش مشكلة مادية ده عرض مش مرض هم عيانين في دماغهم
وهم اصلا مش مهمين اساسا لا ماسكين الاقتصاد زي الاغنيا ولا تعدادهم كبير زي الفقرا يبقى ماسكين ودانا وبيتكلموا ليه لما اكلوها ويشغلونا بمشاكلهم اللي هي مش مشاكل اصلا؟ ما يحلوا عننا

No comments: