من عند جابر

انا مش فاضية اليومين دولم شوية، بس جابر عمل حاجة حلوة

يا مبارك ما يهزك ريح

الحمد لله اطمنا عليه، بخير وطيب وبصحة، خلاص بقى، يقعد

 يقعد يقعد يقعد، مين جاب سيرة توريث؟ انا اذكر اني في المؤتمر بتاع السنة اللي فاتت لما اتواجهت بجمال قلت نفس الكلام: مبارك يقعد يقعد يقعد

خلاص يا ريس

you made your point

مافيش داعي كل شوية تهددنا بجمال من السنة للسنة، احنا راضيين ومبسوطين، وعلى رأي امي، احنا ح نلاقي فين رئيس نشتمه ويسكت لنا؟

انتوا شفتوا جمال بيزعق للصحفيين ازاي؟ لسة امين السياسات وبيزعق للصحفيين وبيبرق لهم وبيخبط على الترابيزة، وكل ما حد يسأله سؤال، سؤال عادي يعني ما يقصدش منه حاجة، يجز على سنانه ويقول: ما انت لو ركزت شوية في الكلام مش ح تسأل السؤال ده!! الله، ايه يا راجل؟ الجدع بيسأل يعني مافيش حاجة، مالك؟

امال لو بقى رئيس ح يعمل فينا ايه؟

خلقه ضيق شوية هو، مش هادي زي الحاج الكبير

خلاص، خلاص، خلاص، خليك قاعد يا ريس، هو احنا قلنا لك تمشي؟ احنا بنتكلم بس يعني، وانت ما بتزعلش من الكلام، ح تجيب لنا اللي بيزعل من الاسئلة ليه بقى؟ احنا ح نرجع لـ"لن ارحم" وح افرم واعجن واعصر تاني؟

بلاش جمال والنبي، وحياة حبيبك النبي يا شيخ، ما انت كويس اهو الحمد لله ربنا يديك الصحة، انت زعلان عشان بنتكلم يعني؟ ادينا بندردش ورانا ايه ورانا ايه، مانت مش معقول ح تقفلها لنا من كل ناحية، لازم نقول بقين نفك بيهم عن نفسنا، مش كل ما ح نتكلم ح تهددنا بالمحروس، ايه بقى؟

وبعدين اعمل بنصيحة معاوية: يا بني ان الملك عقيم

وما تعملش زي الملك لير لبعدين تتبهدل، انت برضه عشرة عمرنا وما تهونش علينا

خليك بقى، يا نوصلك يا توصلنا... واذا كان ح يبقى جمال، يبقى توصلنا احنا احسن

روح يا شيخ، ربنا يجعل يومي قبل يومك
----
اه، نسيت اقول حاجة:
امبارح وانا نايمة صحيت على صريخي وماما قعدت تقرا لي قرآن وقالت لي النهاردة كنت بتصرخي وانت نايمة امبارح ليه؟
انا كل اللي فاكراه اني كنت باحلم بجمال مبارك واقف بيقول كلمة في المؤتمر
والله، والله العظيم، وبعدها بقى صحيت على صوتي وانا باصرخ

حرام عليك يا ريس... احنا ما عملناش حاجة

والناس مش عايزينكوا تنجحوا ليه يا نظيف؟

بعد ما تقدم التحيات للـ"هيئة البربرامية" و"ناواب" الحزب الوطني واثنى على الانتخابات اللي اتسمت بـ"الحيدة والشفاهية" واستظرف استظراف فوق الطاقة، وحيا المعلم محمد منصور الوزير الشجاع، اللي شرف ونور، وحيا رجال الامن، وحيا القوات المسلحة وحيا القضاء وسمعني الضوء الشارد

قال: احنا عايزينكوا تقفوا ورانا (على اعضاء الحزب يعني عشان عارف اننا احنا مالناش في الكلام ده) عشان فيه ناس مش عايزانا ننجح، المعارضة مش عايزانا ننجح

والمعارضة دي طبعا اللي هي الشعب يعني اللي مش اعضاء للحزب الوطني

ليه؟ ليه يا نظيف مش عايزنكوا تنجحوا؟ متجوزين امنا مثلا؟ ايه اللي بينا وبينكوا عشان مش عايزينكوا تنجحوا؟ 

طيب انا واحدة اهو مش عايزة حاجة غير ان الناس تعيش كويس وتتعامل معاملة ادمية، واعملوا بعد كده اللي انتوا عايزينه

نفسي بلدي تبقى دولة محترمة، زي اي دولة محترمة تانية، ايه الجريمة في كده؟

نفسي يبقى عندنا صناعة وزراعة وكرامة ودور

ابقى فخورة اني باقول اني مصرية، بدل ما اقول: انا مصرية، والله احنا كويسين، بس ربنا يعفي عننا

هو فين النجاح ده؟ انت كل ما تشوف وش امنا تقول لنا بننمو، بننمو، بنشرب اللبن وناكل خضار وننمو

وماسكينا عمالين تقولوا لنا: بتخلفوا بتخلفوا

يعني عشان كده عاملين اوسخ نظام صحي؟ عشان تموتوا الناس؟ عشان كده محمد منصور عمل صفقة جرارات قطارات معيوبة ولما حصلت الحادثة لحق نفسه واستقال بدل ما يتمسك ويتحقق معاه؟ عشان كده حاطين لنا هرمونات في الاكل تجيب عقم وعجز جنسي؟ عايزين تخلصوا مننا؟

اذا كان ده الهدف، اه مش عايزينكوا تنجحوا، ياروح ما بعدك روح، ح ندعي لكوا تنجحوا تموتونا؟ ما تشيلونا من دماغكوا شوية

انت مش ملاحظ انك انت بالذات، دونا عن كل رؤساء الوزراء اللي خلقهم ربنا في مصر، خربتها خراب مالوش اول ولا اخر؟

حسبي الله ونعم الوكيل

بس بس بس بس اتفرجت على الخطاب

اولا اي شاب من الشبان اللي لسة ما دخلوش دنيا انصحهم نصيحة اخت كبيرة انهم ما يتفرجوش على الخطاب ده لو كان في خطتهم الجواز والخلفة، واي شاب اتفرج ربنا يتولاه، معلش، العوض على الله بقى، وكل واحد منه لله، ودي حاجة يابني ما تعيبكش هو كان بايدك بس مافيش داعي بعد ما اتفرجت تحرج نفسك وتحاول تتجوز، عشان كله ح يبقى في وشك وفضيحتك ح تبقى بجلاجل

 ثانيا: ده طلع عوكل فعلا، انا عايزة اعرف مين خريج نحن الامنية اللي شكل له الخطاب، ده تشكيل "الارضي كرويتان تلفو حول نفسها"، ده غير ابدعاته هو بقى: اولتويتوي لكل فؤات مدحودي الدخل، ايه الحلاوة دي؟ ده قطع الشورت في البيسين خالص

ثالثا: ايه كمية الصرف الصحي اللي كبه على دماغنا ده؟ ومشروع الصرف الصحي، والصرف الصحي بقى احسن، وح نروح الريف ونعمل صرف صحي، كانت خطبة طافحة في وشنا وريحتها كيك بصراحة

هو ما اتكلمش غير في نقطتين فقط لا غير: الزيادة السكانية، ومشكلة الصرف الصحي. وهدفه من الخطاب انه يقطع خلف الناس عشان مشكلة الزيادة السكانية تتحل (على فكرة الخطبة دي كانت عملية اخصاء تامة وواقعية وحقيقية زي اللي بيعملوها للخرفان عشان تسمن.. انبسط، ح تتخن وتربرب ويدبحوك على العيد في قطر)، والهدف التاني انه يجيب للناس امساك عشان ما يضطرش يعمل مشاريع صرف صحي كتير

طلبتها ونلتها يا حااااااج

حصل.. حصل يا عوكل حصل، انا مش قلت لكوا ده راجل عقر وكل اللي بيعوزه بيحصل؟

رابعا: بيقول لنا بكل فخر واباء وشانون ان مصر اكبر دولة مستوردة للقمح في العالم

والمفروض ان دي غلطتنا احنا عشان بنخلف وبناكل عيش... اما انتوا شعب رخم صحيح، يعني الراجل عمل اللي عليه وخصاكوا، بطلوا اكل عيش بقى، انتوا مش مفروض عاملين دايت؟

خامسا: حكى حكاية باين قوي انها فشرة، عن واحد غلبان مسكين قال له عايز شقة يا ريس عشان ساكن فوق السطوح وطلع مخلف تسعة وهو ومراته يبقوا حداشر فقال له انت عايز عمارة مش شقة، والمفروض اننا نصدق القصة الفاكسة الخزعبلية المشعوذة المريضة دي، مش عيب في السن ده ويكدب؟ هو فيه حد بيعدي من الشارع اللي جنب الشارع المتقاطع مع الشارع الموازي للشارع اللي هو معدي منه عشان ييجي واحد غلبان يقرب منه في المطار ويطلب شقة كمان وياخد ويدي في الكلام؟ طب نرد على العشوائيات اللي هو بيقولها لنا دي بايه؟ ده كان زمانه بقى مصفى زي ابو العربي الله يرحمه

ويكاد المريب يقول خذوني قال لجمهور الترسو اللي قاعدين يتفرجوا عليه: على فكرة دي قصة حقيقية مش تأليف انا مش ح اقول اسمه ولا بيشتغل ايه

 ههههه يا راجل هو حد سألك على اسمه وبيشتغل ايه؟ احنا ح ندور وراك يعني؟ ما خلاص باين انك واخد دماغهم وبتسرح بيها في اشارة ميدان روكسي والناس صقفت وماحدش احرجك، اسكت بقى بتحرج انت نفسك ليه؟ ده كان ناقص يحط كوباية المية على عينه ويقول: والنيعمة دي على عيني وللا اطفحها وما اوعى اعملها بيبي والعشرة دول والنار دي وللا تحرقني زي السوجارة وحياة ضنايا اللي قاعد وباترجاه من الدنيا وللا يعدم الشعب ان اللي باقولهولكوا ده حوصول

سادسا: ايه كم الظرف الفشيخ ده؟ هو مش كان لطيف زمان؟ وللا ابنه كرف عليه؟ وللا هو بيضحك بس لما ما بيبقاش قاصد؟ هو راح لمونولوجيست الماني يحفظه نكت؟

سابعا: خلاص يعني؟ ما بقاش يكلم حد غير بتوع الحزب الوطني؟ هم دول الشعب بالنوسبة له؟ مخاصم الباقيين ولما بنتصل بيه حاطط الفويس ميل وبيقول لصفوت لما الشعب يتصل على الارضي قول له مسافر؟

ثامنا:  هو اللب بقى رمز الحزب الوطني؟ هالة ابو علم كانت بتقزقز لب في اثناء 

الخطبة ليه؟ اكيد اللب ده له حكمة في الحزب الوطني، هل مثلا وسيلة جيدة ومفيدة للتف على قفا الشعب؟

تاسعا: ايه احساسك وانت رئيسك لطيف وخفيف خفة السنين كده؟ كركركركركر قوي فحت  يعني

حد عنده خطبة مبارك؟

عملتوا ايه يا شباب في معتمر الحزن الوثني؟ انبسطوا؟ اتفرجتوا على ريسنا قال مافيش مجال؟

انا اصلي كنت في الدرس، وكنا بنذاكر، بنذاكر فيلم مولان روج

:)

يا سلاااااام الفيلم ده حلو قوي، ويروق الدماغ، نساني عوكل والحزن الوثني والمعتمر ومن اجلك انت، دي المرة المية وسبعة وخمسين اللي اشوف فيه الفيلم ده واعيط كل مرة، رومانصي رومانصي يعني، قصة غادة وكاميليا بقى واغاني رومانصية سنتمنتالية مهترئة، قضيت يوم كله اهتراء

المهم، كيف كانت كلمة الريس متقال؟ هل كانت على المستوى المأمول والمطلوب من العبثية والتخريف؟ وللا خذلني؟

لو حد عنده لنك انا احب ابلع بفيلم كوميدي بعد اليوم المهترئ اللي كله تنهدات وعياط ده

واهو كله مذاكرة، بيقولوا لنا شوفوا الفيلم الوحش عشان ما تعملوش زيه، وروني خطبة عوكل عشان ما اعملش زيها

وزي ما انا شبعت اهتراء، اكيد انتوا شبعتوا عبث النهاردة، خدوا اهترئوا شوية

عبد المنعم مصمم ياخد حقه على الدولة

زي اي حد بيوصل للسن القانوني في المؤسسة، لازم يتخرج، ويبتدي نوع جديد من المشاكل. ومش محتاجة اقول لكوا المؤسسات بتبقى عاملة ازاي، المشرفين، المديرين، الاخصائيين، الزملاء، كلهم ناس غلابة بتفش غلها في بعض، وكل غلبان بيستقوى على اللي الاغلب منه.

بعد ما عبد المنعم اتخرج من المؤسسة فيه ناس ولاد حلال جابوا له شقة وكشك. الكشك اترخص في حتة يقطنها ناس شكل ذئاب الجبل كده. كل يوم على الله يمسكوه يرنوه علقة، لا بس هو واد جدع، ينضرب وما يقولش آي، ويصلح الكشك ويفتحه تاني

ماحدش يسالني بيكسروا له الكشك ويضربوه ليه؟ واحد راجع بالليل مبرشم، وعبد المنعم واد شكله غلبان ومالوش في حاجة، واللي راجع بالليل مبرشم ده واخد بالجزمة من مخاليق الله كلهم، لقى لقية واد غلبان، ما يفشش فيه غله ليه يعني؟ العيال بتوع المؤسسة يبقى جوة المؤسسة واد ايه، مقطع البطاقة، اول ما يطلع تجيله صدمة حضارية ويبقى مافيش اهبل ولا اغلب منه

المهم يا سيدي لما انت، عبد المنعم عارف ان: "الكانون يا ابلة بيقول اني لمن اتخرج من المؤسسة ليا حق اللي انا اخد شقة من المحافصة" بعد ما اهل الخير قدموا له على طلب شقة، واتطنش، كتبت مقال في الوفد لمحافظ القاهرة، اتصلوا بيا وقالوا لي ابعتي لنا عبد المنعم، فرحت فرحة الاعمى وكتبت احيي محافظ القاهرة، راح هناك، قالوا له انت تبع الجيزة، طلع بطاقة تبع القاهرة، او روح محافظة الجيزة، يبدو ان محافظة الجيزة بيبعتوا لها العيال اللي مش بتسمع الكلام عشان يعذبوهم

قام الواد عمل الاتنين، قدم على بطاقة في القاهرة وراح محافظة الجيزة، وانا كتبت نداء لمحافظ الجيزة

الكلام ده بقاله دلوقت سنتين حضراتكوا، كل اسبوعين عبد المنعم يكلمني: ايون يا ابلة، دوقت انا بقى رحت المحافصة، قالوا لي طب هات لنا وسل نور (عايزين وصل نور من واحد مقدم طلب على شقة، يعني هو لو عنده وصل نور ح يروح لهم ليه، ثم الشقة اللي جابها له اهل الخير في العشوائيات يعني، على قد فلوسهم ماهم اصلا كمان اهل الخير دول ناس مكافحين ماهماش احمد عز) جات عايدة عبد العزيز، الممثلة، قرت المقالين اللي كتبتهم عنه واتصلت بيا: انا عندي مزرعة وممكن ييجي يشتغل حارس وادي له مكان

- يا عبد المنعم

آه... بس انا يا ابلة ليا حق كانوني في شقة المحافصة، انا ايه اللي يخليني اخد حاجة من حد وانا ليا شقة في المحافصة

- طب معلش يا عبد المنعم مؤقتا كده بدل ما كل يوم وشك متخرشم من العيال اللي بيكسروا لك الكشك

طبعا قالت له طريق مصر اسكندرية قام راح اسكندرية ودور عليها هناك ما لقهاش. طريق مصر اسكندرية ايه بس؟ ده واحد عاش لسن عشرين سنة في مؤسسة ما شافش غيرها، يوم ما شاف الشارع كان بيروح يجيب سجاير للمدير من الكشك اللي جنبهم، يفهم ازاي هو فرق طريق مصر اسكندرية من اسكندرية نفسها؟ ثم حارس ايه وهو كل يوم ينضرب من عيال مبرشمة لمجرد ان شكله غلبان ومش عارف يدافع عن نفسه

"لا يا ابلة بس انا زعقت لهم بقى... قلت لهم مش كل يوم الاذية دي"

ده ما يعرفش حاجة ده غير ان له حق قانوني في شقة المحافظة، تصوروا؟ ومتسمك بيه قوي

- الو.. ايوة يا ابلة، انا رحت المحافصة وقالوا لي اليومين دولت مشكلة الدويقة ومش ح يدوك شقق فانا بقى ح اروح محافصة الجيزة، ما انا ليا حق في الجيزة

- الو ايوة يا ابلة، منكن اللي حضرتك تديني كارت برضك يساعدني؟

- الو ايوة يا ابلة، منكن اللي حضرتك بقى تديني المكال اللي فيه حضرتك بتتكلمي عني؟ برضك لمن اروح وادخل بيه

- الو ايوة ايا ابلة، انا لقيت حل.. منكن مثلا اللي انا لمن اروح اعمل مشكلة وازعق بقى واخوفهم

خلاااااااااااااااص يا عبد المنعم، يا عبد المنعم حرام عليك، يابني انا تعبت لك، ايه الاصرار اللي انت فيه ده؟ انت يابني مش عارف تفهم انهم بيمطوحوك، انسى المحافظة يا منعم، انساها

"بس انا ليا حق في شقة المحافصة دي"

عبد المنعم، مش ح يدوهالك، خلاص، دي ناس فاسدة، الشقة حقك ح يدوها لحد من معارفهم، انتهينا يا عبد المنعم مشي حالك، مشي حالك يا عبد المنعم، انا ح اكلم فلانة وفلانة واخليهم يجيبولك مكان في حتة ما تنضربش فيها

"بس ده حقي يا ابلة..طب اقول لك، انا عندي اكتراح كويس، ايه رأيك اطلع مكتب المحافص نفسه واكسر لهم المكتب؟ او ازعق"

ايه عبد المنعم اللي بتقوله ده؟

"ما انا باحاول الاقي حل... انا الظاهر تعبتك"

تعبتني؟ تعبتني في ايه عبد المنعم؟ يابني انا لو تعبانة تعبانة عشانك، انت مش حاسس بتعمل ايه في نفسك؟ يابني دول طلبوا منك وصل نور، هو فيه واحد عايز شقة يطلبوا منه وصل نور؟ انت مش واخد بالك انهم بيشيعوك؟ انا اللي تعبانة؟ وانت مش تعبان؟ ما زهقتش يا عبد المنعم؟

"ازهق من حقي؟"

مافيش فايدة

المبهر في الامر، ان انا اللي باقول له مشي حالك وهو اللي بيقول لي انا ليا حق "كانوني" وعايز اخده "الدولة مفروض اللي هي بتدي ابناء المؤسسات شقق تبعت المحافصة، يعني انا في الكانون كده" ايوة، بيقول الدولة وبيقول ابناء المؤسسات، وفي نفس الوقت بيقول المحافصة وما بيعرفش يقرا ولا يكتب عشان ما علمهوش في المؤسسة كانوا بيخلوه يمسح وينضف

وعلى كل البؤس اللي هو فيه ده جاب منين الاصرار على الحق الكانوني؟ وجاب منين التقديس المبالغ فيه للكانون اللي لازم ياخد مجراه؟ الله اعلم

ح اموت واعرف بجد، ده مش اول ولا اخر ولد من المؤسسة يتصرف بالطريقة الغريبة دي، ده كان ناقص يقول لي دي ضرايب المواطنين ولا يضيع حق وراءه مطالب واحنا لازم نحارب السلبية

ما كانش ناقص غير يقول كده بقى عشان كنت انكش شعري وامشي مجنونة في الشارع

ما بقتش عارفة اضحك وللا اعيط، افرح وللا ازعل، وامبارح مسكت صاحبتي اللي عندها جمعية اعصر فيها: العيال دي جابت الكلام ده منين؟ ده انت لما ابن عمك مات ما بقوش فاهمين يعني ايه ابن عمك

"البقية في حياتك يا ابلة، سمعت اللي حضرتك عندك حالة وفات، مين؟"

قالت لهم: ابن عمي

........ يعني ايه؟

قالت لهم: يعني ابويا له اخ، الاخ ده له ابن، ابنه ده هو اللي مات

اهو اللي مش عارفين يعني ايه ابن عمها دول، ييجوا لشقة المحافصة ويقفشوا فيها بمنطق: حقي بالكانون ويتكلموا كأنهم سليم العوا

لو جبت له قصر، عايز حقه بالكانون

- طب لو الشقة دي مش عاجباك نجيب لك شقة تانية

"بس ليا انا حق تبعت الكانون"

ولسة امبارح عرفت انهم بيتسللوا وينزلوا وسط البلد عشان يقفوا في الوقفات الاحتجاجية وكانوا عايزين يسافروا غزة عشان يحاربوا يناير اللي فات

"مين يا غادة اللي بيعلمهم الكلام ده؟ مين مهيج  الجماهير اللي في المؤسسات؟"

قالت لي: مافيش قاعدة، ممكن وهو قاعد على القهوة سمع كلمة، شاف منظر عيل وحس انه زيه، هم يعني عشان ما اتعلموش يبقوا ما بيفهموش وما بيحسوش؟ اما انت غبية ومتكبرة صحيح

تمام، انا غبية ومتكبرة وجاهلة وفاضية من جوة وضحلة، وعمالة ارغي

وفيه ناس ربنا خالقهم صح من غير رغي، هم ناس كده صح من راسهم لساسهم، من غير ماحد يعلمهم الصح

اللي حاول يعلمهم ما علمهمش غير ازاي يحط البشلة في بقه وما يعورش نفسه، وياريتهم بيعرفوا يستخدموها

اي حد عنده بيت واهل اسمعه يشتكي ح ارميه من الشباك

ايش عرفك انت بالسياسات الجديدة

ومن أقواله رضي الشعب عنه او لم يرض:

إحنا شعب ما بيحبش يتحرك كتير، وهذه هى ثقافتنا، لأننا لا نريد أن نتعلم أو نعمل بعيدا عن أهلنا

خصوصا لما يبقى اهلنا ساكنين في القصر الجمهوري... ح نلاقي فين سكن زي ده؟

السياسات الجديدة

ومن اقواله طيب الله سياساته الجديدة: التوزيع غير العادل للثروة افضل من التوزيع العادل للبؤس

ايش عرفك انت على الشروق

الشروق كتبت عن الحملة

وعلى فكرة لما تكتب في السيرش تلاقي كتير ناس كاتبة، مدونين، واحنا بنشكرهم كلهم طبعا

بوستات كتير قوي عنوانها ايش عرفك انت... تخص جمال يعني، عشان فيه واحدة كاتبة بوست في فورم باين بتقول: ايش عرفك اني حلوة :) مالناش دعوة بيها دي

ياللا انضم بقى للحملة معانا، لسة الف وخمسمية وخمسين بس؟

مش كفاية تشوف مصر من هنا عشان تعرفها

تصميم: محمد عبد العاطي

انضم الى ايش عرفك انت؟

ده طلع ايش عرفنا احنا؟

يا جاهل منها لها له له

ايش عرفكوا بتطور العالم السريع وتفضلوا كده تفكيركوا متوقف عند الستينات؟ الله يرحمه السادات

لا انا ما اتجننتش، ده جزء من اقوال جمال مبارك رضي الله عنه وارضاه

هو طبعا الله يرحم السادات مش جابكوا؟

ايش عرفنا احنا بدور مصر الاقليمي المهم؟ الكلام عن تراجع الدور المصري وقفاها اللي بتاخد عليه بمضرب الدبان ده كلام انشا، مصر مهما كان، ست كبارة، وقد والدتنا، وكل الناس بتحترمها، اذا ما كانش عشان حاجة يبقى عشان سنها ومركزها

موضوع ضرب الحدود واختراق مجالها الجوي ده كلام انشا

موضوع ان السيد الوالد بلسانه قال: اللي بيدخل من حدود باخطر اسرائيل واللي بيخرج باخطر اسرائيل ولو ما اخطرتهم هم شايفين من المونيتور وح ينزلوا لي بنفسهم ده كلام انشا

موضوع اننا ما بقالناش منتج محترم نصدره ونعرف نضغط بيه على اللي بيتعاملوا معانا اذا احتكم الامر ده كلام انشا

موضوع ان دول حوض النيل مدية ودنها لاسرائيل واحنا مش عارفين نفتح بقنا ده كلام انشا

موضوع اننا لما حبينا نرشح واحد لليونسكو رحنا اخدنا الاذن والسماح من الاسرائيل وبرضه ادتنا على قفانا ده كلام انشا

العالم بيتغير

ييجي واحد وللا واحدة اغبيا زيي يسألوا طب ملامح التغيير ده ايه؟

ايش عرفكوا انتوا؟

هو ليه محسسني انه بيتكلم عن حاجة اخترعوها اول امبارح الساعة عشرة الصبح؟ اللي بيقوله ده كان بيتقال في القرن التمنتاشر واثبت فشله ونفس اللي انتجوا الافكار دي عدلوا فيها كتير، ده امريكا وحش الرأسمالية بتأمم اهي وبتعمل تأمين صحي، طب يقرا كتب اتكتبت في العشرينات على الاقل بدل ما هو قاعد في متحف الشمع بيكلمنا عن الفكر الجديد

ده ناقص يكلمنا عن اكتشاف نظرية داروين بوصفها ثورة في العلم ح تغير العالم

قال واحنا اللي كنا بنقول له ايش عرفك بمصر؟ هو ايش عرفه احنا سنة كام اصلا؟ بصوا والنبي بيقول ايه؟

موضحاً أن مصر يجب أن تظل متواجدة على الساحة الدولية بعد أن ولى زمن المقاطعة عندما نختلف مع أحد. وشدد جمال مبارك على أنه يشعر بتفاؤل نسبى من الجهد المبذول خلال السنوات الماضية، وأن محافظات الصعيد بدأت تأخذ حقها فى فرص العمل، سواء من استثمارات الدولة أو القطاع الخاص، موضحاً أن القطاع الصناعى حقق خلال ٤ سنوات ما يفوق المحقق خلال ١٥ سنة.
طب ده عايش فين وسنة كام؟
زمن المقاطعة ولى ازاي اذا كانت امريكا اللي في ايدها تعجن العالم لما فرنسا رفضت الانضمام لها في غزو العراق قاطعت المنتجات الفرنسية، ده كان سنة الفين وتلاتة يعني يا عم الكتكوت ياللي عايش سنة الف وسبعمية واحد وخمسين وبتكلمنا عن التجديد وفاكر نفسك محمد علي باشا الكبير ووصفك محافظ قنا بإنه من ابناء مصر العظام والمخ والاعصاب
بس فيه نايب قال عليه "رائد الاصلاح في الالفية الثالثة" طب حيث كده بقى، وبما اننا يا افندية من بتوع فكر الستينات
فـيصح اننا نبحث عن لقب كويس قوي خالص وارجوكو ما يمكنش ابدا نتكلم بالطريقة البطالة دي مرة تاني عن جنابه، اه يا زلنطحية يا دون، احفظوا مركزكوا، انا بدي اعرف ايه سر الحئد الدفين اللي عامي قلوبكوا عن الحقيقة، صدقوني (بتضخيم الصاد) انتوا اللي بتجنوا على انفسكممممم، لو مافيهاش اساءة ادب يصح اني انتظر منكوا شوية القاب خصوص افندينا


بس الحقيقة، العمدة قال لك: والله انا مش بانافق، اللي شايفة على ارض الواقع فوق الخيال
ليه؟
عشان بقى عندنا صرف صحي
ههههههههه
اي والله قال كده
اهو في الخبر ده
ايه فيلم سلامة في خير ده؟
بس الحقيقة، انا اضايقت (مع تضخيم الضاد قوي زي حسين صدقي) من الطلبات المرفهة اللي مالهاش داعي ابدا، اذا كان العمدة بذات نفسه قال ان اللي شايفه على ارض الواقع يفوق الخيال امال ايه لازمة الكماليات اللي طلبوها دي:
وطالب أحد الحضور بإنشاء مكتب بريد، واقترح عماد عبدالهادى إنشاء مدرسة ثانوية تجارية، وعندما سأله جمال مبارك: هل لها الأولوية؟ قال: «عندنا ٦ آلاف طالب يذهبون لمراكز أخرى.. العيال هيروحوا فين؟!»


واستنكر عبدالمحسن حافظ زيادة فوائد الصندوق الاجتماعى للتنمية، واستنكر سيد الخولى عدم تطهير الترع ونوهت الدكتورة منى الشحات إلى ضرورة حل مشكلة صعوبة إجراءات ساقطى القيد وطالبت بإلغاء التعليم التجارى، وطالب د.بركات بتخفيض أسعار أراضى المدن الجديدة.


ما كانش يصح ابدا انهم يتمادوا في الطلبات السفيهة دي يا منير، ده العز اللي هم عايشين فيه من لحظة ما دخلت مواسير المجاري قريتهم السعيدة ما عمرهمش شافوا زيه ابدا، اييييه، ياما كان في نفسي اعيش حياة الريف، حيث مافيش النفاق والكدب والخداع اللي بيتحكم في ابناء المدنية الحديثة


وفيه سؤال صفيق سألته طالبة مش ولابد عن نيته في الترشح فأجاب بمنتهى اللباقة:
«يبدو كل ما تتأخر الأسئلة ستسخن»
يبدو؟ يبدو كل ما تتأخر الاسئلة؟ سليمان باشا نجيب بيتكلم يا اخواتي

ارجو من جنابكم زيارة المكان ده في اقرب فرصة

(منعا لاني افاجئكم بشيء ما يسركمش اللنك اللي فوق ده الفيس بوك)

ميرسي...
ميرسي...
نهاركم سعيد

ايش عرفك انت، على الفيس بوك

اضغط على الصورة للمشاركة في جروب "ايش عرفك انت" وادخل اسأل

ايش عرفك انت 3

التصميم لمادو

مادو سأل اسئلة

ايش عرفك انت بالناس الفقرا الي مش لاقيين قوت يومهم
ايش عرفك انت بالمرضي الي مش لاقيين تكاليف العالج ولا مكان ادمي يتعالجو فيه
ايش عرفك انت بملايين الشباب الي بتتخرج ومبتلاقيش فرصة عمل ولو في فرصة عمل بيبقو تحت رحمة اصحاب العمل وبيتم استغلالهم
ايش عرفك انت بالطعام الملوث والمحاصيل الزراعية الي بتروي بمياه الصرف
ايش عرفك انت بالمحاصيل المسرطنة
ايش عرفك انت بالموصلات المتهالكة و الزحمة في المترو والاتوبيس
ايش عرفك انت اشارات المرور الي ممكن الناس تقف فيها بالساعات متعطلة مصالحهم
ايش عرفك انت بالشباب الي بترمي نفسها في البحر وبتحاول تهاجر وتهرب من ظروف المعيشة السيئة
ايش عرفك انت بالفساد الي مالي البلد و مصالح الناس الي مش بتمشي غير بالرشاوي
ايش عرفك انت بفساد الجهاز الاداري في الدولة
ايش عرفك انت بالتعذيب واهانة المواطنين في اقسام البوليس وعلي يد رجال الشرطة
ايش عرفك انت طوبير العيش الي ناس بتموت فيها علشان يجيبو كام رغيف
ايش عرفك انت عن مياه الشرب الملوثة بالصرف
ايش عرفك انت الشوراع الي مليانة مطبات ومفيهاش اضاءة ومليناة اكوام زبالة
ايش عرفك انت بمصر ولا ناس مصر
------
Wild Heart


إيش عرفك إنت بإحساس واحد ماشي في الشارع خايف اللي يطلع عليك بمطواة ولا الي يشدك إحم ولا اللي يدوسك بالعربية عشان ماحدش بينفذ القانون ولا تدوس على سلك كهربا عريان ولا ابنك يقع في بلاعة مفتوحة؟
------
الباب لسه مفتوح ومافيش حد ح يسدك... اسأل، ايش عرفه هو؟
-----
الشباب اللي بيستأذنوا ياخدوا بانر وللا اسئلة، اللي ياخد حاجة من المدونة دي ياخدها من غير استئذان، حقوق النشر محفوظة للانسانية

--------

شارك في جروب إيش عرفك انت؟ على الفيس بوك

المصريون يسألون جمال: ايش عرفك انت؟

الحقيقة انا ما توقعتش المشاركات تبقى بالكثافة دي، ياااااه، ده الناس شايلة ومعبية يا جيمي، دول كأنهم ما صدقوا يا قلب امهم، حنفية واتفتحت ما بقتش عارفة اسدهم ازاي

وبقت بقى مش عارفة، اكتب الاسئلة على طول، وللا اقول كل واحد قال ايه؟ انا قلت احط اللنك اللي عليه المشاركات وانتوا تشوفوا

واليكم دون ادنى تدخل مني ولا حتى بتصحيح اخطاء الكي بورد.... مصر تسأل جمال مبارك، ايش عرفك انت:

إيش عرفك بخريج جامعة أو تعليم متوسط مش لاقى شغلانة لا بشهادته و لا من غيرها و معندوش واسطة؟

إيش عرفك بواحد أبوه إترفد من شغله و مابقاش يقدر يصرف عليه و لا على إخواته فإضطر يسيب المدرسة و يدور على رزقه فى الشوارع؟

إيش عرفك بمهندس خبرة خمس سنين لأ و بيشتغل و بشهادته و قطاع خاص و مع ذلك مرتبه ما يجيبلوش شقة لو حوشه كله 15 سنة؟

---

سؤال بسيط لو سمحتي

هو مش جيمي برضة ممته نصها انجليزي و نصها مصري؟

يعني جيمي 75% منه بس مصري

و على حسب معلوماتي ان اللي زيه لا يصلح ان يكون عسكري في الجيش اصلا فكيف يصبح القائد الاعلى للقوات المسلحة و هو 25% منه انجليزي؟

سؤال اصغر

هل جيمي عند بسبور انجليزي؟

----

وانا هاضيف من عندي كمان :

ايش عرفك انت باحساس شاب لسه في العشرينيات وقلبه حزين وعنده احباط ويأس الدنياكله راكبه وتشوفه تديله 100 سنه.

اتقتل طموحه وكل الابواب مقفوله في وشه هو ومفتوحه علي مصراعيها للتافهين والاغبياء والفاشلين

ومطلوب منه يكون انسان كوووووووول وميحقدش علي ولاد الناس الواصلين علي الرغم من تفوقه وكم الشهادات العليا وكورسات اللغه والكمبيوتر اللي واخدها لكن مش عارف يلاقي مكان محترم يقبله للعمل فيه وكل ده لسبب بسيط لأنه معندوش واسطه واسطته دراسته وعمله الجاد ودول موصلهوش لاي حاجه...

-------

ايش عرفك انت بواحدة ست عجوزة ماتت في سريرها وحيدة بتبكي ان ولادها كلهم مش جنبها عشان راحوا الخليج بعد ما ضاقت بيهم الدنيا هنا عشان يعرفوا يستروا نفسهم

ايش عرفك انت باوضة وصالة ساكن فيها 3 اسر بملحقاتهم

ايش عرفك انت بناس ساكنة في عشش كل 10 اسر ليهم حمام واحد مشترك

ايش عرفك انت بواحد ولا واحدة عزيز النفس مش لاقي يأكل عياله ويسترهم وبيستعفف ومش هاين عليه نفسه يشحت

ايش عرفك انت بناس بتموت عشان مش لاقيين تمن الدوا

ايش عرفك انت بينا انت مش مننا على فكرة

---------

إيش عرفك

انت وانت اللي قابض علي نفسنا بعد المتعوس ابو كلت مدلدل اللي مسكك البلد دى ان فيه 10 مليون معاق اللهي اللي فيهم يجي فيك يابعيد انهم مبيشتغلوش ولا ليهم تأمين صحي محترم ولا سكن يلهم ولا جوازة تعفهم ايش عرفك انت وانت عامل فيها فرعون تيت اوى وعامل فاهم البلد جتنا نيله في حظنا بعد ما السادات خمنا وجابك

------

ايش عرفك انت بحالنا وحال عيال وعمال المصانع في بلدنا

ايش عرفك ومين فينا اصلا عاوز يعرفك

من الاخر خليك بعيد لانك متشرفناش رغم اننا نشرفك

---------

ايش عرفك ب 5 ماتوا مخنقوين من السحابه السوداء وناس عندها ربو و ازمات حتى الهواء النضيف مش عارفين يشموه؟

ايه عرفك بواحد عنده الكبد و استسقاء وبيعملوله بزل كل شويه و بيلف على التامين الصحى علشان يلاقى الدواء و لسه بيشتغل لاخر نفس علشان يوفر لولاده لقمه؟

ايه عرفك بمعنى انك تكون مصرى ابن مصرى شريف وتتعامل معمله الكلاب فى القسو ولو حد طلع بسبور امريكانى ؟؟

ينضربله تعظيم

ايه عرفك عن شاب باع الى وراه والى قدامه علشان يركب قارب فى البحر علشان ياكل اكله نضيفه؟

ايه عرفك باكل مسمم بالمجارى و انت بتاكل الاورجنك؟

ايه عرفك بواحده غلبانه بتحط القرش على القرش علشان تجيب خلاط لجهاز بنتها احسن الجوازه حتبوظ؟

انا بصراحه لو انفتحت مش حسكت خلى الى فى القلب فى القلب بقه

------

ايش عرفك انت بواحد ساكن فى عشة

يصحى من نومه ويكون فطاره صخرة تقع عليه تدفنوا تحتهاو مقدرتش تطلعه, عمرك صحيت من النوم؟

ايش عرفك انت باحساس ام مستنية ابنها يرجع من غربته هو وابنه من السعودية و الحوت ياكلهم فى البحرو الحوت ياخد 7 سنين,عمرك حسيت بالظلم ؟

ايش عرفك بام تانية ابنها نازل يعيد عليها ويولع فى قطار. عمرك ركبت قطار؟

-----

ايش عرفك بـ شباب كتير بيدرسوا حاجة مش طايقنها لمجرد ان مكتب التنسيق رماهم فيها ؟؟

ومع ذلك بيذاكر وبينجح بيتخرج

ايش عرفك بطلبة الانتساب المشوخين من الدكاترة وادارة الجامعة اللي عاملاهم سبوبة بصرفوا بيها علي الجامعة وكل شهر زيادة في الرسوم واخرها مفيش حضور علشان انفلونزا الخنازير

ايش عرفك بواحد طالع عينه علشان يحوش 95 جنيه اشتراك نت من الزبالة وفي الاخر السنترال يتعوج ويقوله خطك مش نافع روح غيره

ايش عرفك بأربعة جيران مشتركين مع بعض في وصلة نت علشان الاشتراك عالي

ايش عرفك بموظف شاطر وعنده 24 سنة وشغال 15 ساعة بمرتب 600 جنيه مع العلم بأن صاحب الشركة مليونير

ايش عرفك بالبنات اللي بتبيع نفسها وشغالة جرسونة في كافيه علي البحر علشان الف جنيه مع العلم ان كهم مؤهلات عليا

ايش عرفك ب بنت اتجوزت من واحد خليجي اكبر من ابوها واتطلقت وعي مجبتش 25 سنة

عايزة تاني ولا اكتبهم في بوست عندي ؟؟

--------

أسمحولى ابأه أنانى شويه

أيش عرفك أنت

بخريج هندسه حاسبات وأهله طفحوا الدم فى كورسات علشان ياخد أكبر شهادات تقنيه فى العالم وبيتفرج على أعلان (أشتغل أى حاجه لا القطر يفوتك)

ومطلوب منه 25 الف جنيه علشان يتعين فى الحكومه ؟!!!!!

------

ايش عرفك انت

ايش بلدي بمسامير

وايش فينو بنص جنيه

واللي يايش ياما يشوف

اللهجة معدلة عشان ماننساش الربع الانجليزي

-----

طيب هحاول أشارك معاكم :

أيش عرفك أنت بشاب ترك تعليمه وبيشتغل في شغله مالوش أي دعوة بيها علشان يقدر يعيش في بلد أنت بتطمع تحكمه ؟؟؟

أيش عرفك أنت بنظام الكفيل اللي بيستعبد شباب بلدنا في الخليج وبيذلهم ؟؟؟

أيش عرفك أنت بشباب نفسهم يعيشوا كبشر في بلدهم ؟؟؟

أيش عرفك أنت بشباب كتير أنتحروا علشان شافوا من كرم نظام حكام أبوك كتير ؟؟؟

أيش عرفك أنت بشباب بيسب ويلعن في اليوم اللي أهله خلفوه فيه علشان حاسس أن خير بلده مش لأهلها ؟؟؟

أيش عرفك أنت بشباب ماشيين مع بعض ويوقفهم ظابط معفن بـ 50% ويقول لهم طلعوا بطايقكم ؟؟؟

------

ايش عرفك انت بواحد ولا واحده بيركب له 3 او اربع مواصلات علشان مافيش حاجه اسمها هيئة النقل العام او دور للحكومة فى المواصلات و سايبين عليهم سواقين الميكروباصات البلطجيه و بتوع التكاتك

ايش عرفك انت بعيل فى اعدادى مش بيعرف يقرأ و يكتب لأن تعداد الفصل بتاعه 60 تلميذ و بيروح 3 فترات دراسه تخيل عيال تروح الساعه 7 تخرج على الساعه 10 بيضحكوا على مين

ايش عرفك انت بالستات اللى بيتروح للفرارجيه علشان يشتروا كيلو رؤوس و اجنحة فراخ يعملوا عليهم مرقه ياكلوا بيها

------

ايش عرفك بالغلابة الفقراء اللى بيسترزقوا بالبيع فى المترو وكل شوية الامن يجرى وراهم و يسحبهم علشان يزهقوا و يتحولوا لحرامية؟

ايش عرفك بأم الايتام اللى بتدور تشحت علشان جوزها كان عامل سريح مالوش معاش؟

----------

ايش عرفك بالملايين اللي هجوا بره مصر و كتير منهم مش عايز يرجع تاني

ايش عرفك يعني ايه تكون بتشرف على بناء و تشطيب شقق و انت مرتبك ما يسمحلكش تحلم بأوضة حتى مش بشقة

ايش عرفك لما تكون بتمضي على مستخلصات للمقاولين بملايين و مرتبك 500 جنيه و الرشاوي بتتعرض عليك يومياً و انت تقول لأ رغم انك عارف إنك لو فضلت تحوش مرتبك 50 سنة مش حتعرف تتجوز و لا تجيب حق شقة و لا شبكة و لا مهر و لا فرح

على فكرة أنا فاكر إني كنت قريت في جرنان الدستور من زمان إن جمال و علاء معاهم جوازات سفر بريطانية

لأنهم أخدوا الجنسية البريطانية من مامتهم سوزان اللي أخدتها من أمها الممرضة من مقاطعة ويلز

---------

انتهت المشاركات ولم تنته الاسئلة

المدون اللي عايز ينقل عنده الاسئلة والحملة ياريت

ونحن في انتظار بقية البانرات من مادو ومن جابر، لسة في الفرن

دعوة لاطلاق حملة "ايش عرفك انت" بمناسبة من اجلك انت

احبك انت، يا ابيض انت

وتعتمد حملة ايش عرفك انت على عشرة اسئلة توجه لحياتي انت جمالك انت مبارك انت خاصة بالشعب المصري

1-  ايش عرفك انت اللي بيقبض 300 جنيه في الشهر وعنده عيلين بيعيش ازاي؟ جربت تعيش بتلتميت جنيه في الشهر بطولك؟

2- ايش عرفك انت لما اي حاجة بتبوظ (تلفزيون، تلاجة، عربية، جلدة حنفية، تليفون) في بيت موظف مرتبه الف جنيه بيعمل ايه؟

3- ايش عرفك انت باحساس الناس اللي واقفة في الاشارة لحد ما نبت لها جدور في الارض عشان حضرتك او اي مسئول تاني معدي؟ عمرك استنيت حد؟ 

4- ايش عرفك انت باحساس واحد راكب اسانسير فيه حوالي خمستاشر واحد؟ واحيانا بيبقوا تلاتين؟ عمرك شميت؟

5- ايش عرفك انت شكل سواق الميكروباص، بعد ستاشر ساعة لف في عربية شكمانها منفس وتعامل مع ركاب ياكلوا دماغه عشان خمستاشر قرش وامين شرطة بيطلب منه اتاوة، وهو راجع بالليل البيت بيعمل ايه في مراته؟

6- ايش عرفك انت بقى بمراته بتعمل ايه في عياله عشان تفش غلها؟

7- ايش عرفك انت بيعمل ايه العامل اللي بقاله تلات شهور ما قبضش مليم؟

8- ايش عرفك انت بفلاح صرف اللي وراه واللي قدامه على زراعة القطن عشان يجهز بنته وجيتوا انتوا بمنتهى البساطة عملتوا فيه مغرز وادتوا له تقاوي بايظة: مدودة، طلعت المحصول اصفر، ما طلعتش محصول اصلا؟

9- ايش عرفك انت بواحدة ست جوزها عاطل (مرفود من مصنع مثلا) وهي اللي بتشتغل بتعمل ايه عشان تحوش القسط الاولاني بتاع المدرسة؟

10- ايش عرفك انت بحال المواطن والموظف في المصالح الحكومية: السجل المدني، المرور، الجوازات..إلخ؟ وايش عرفك بالمرتب اللي بيقبضه الموظف وبالرشوة اللي بيدفعها المواطن؟

-------

يا جاااااااااااابرررررررررررررر

اذا عجبتك الفكرة توكل على الله، والاقتراحات مفتوحة للاضافة والتعديل والتطوير

احنا ناس ديمقراطيين يا ولادي

الاسئلة ممكن تزيد وممكن تتعدل

وانني اهيب بالوكالة الحاج حسام الحملاوي للحملات بمد يد المساعدة

من أَجَلَك انت

اصل انا ساعات بتنتابني حالات كده مالهاش تفسير، يعني مثلا جابر كان عايز ينشر بانر تحت عنوان من أجلك انت على اوسع نطاق بحيث ان اللي يعمل سيرش على العنوان ده اول حاجة تطلع له البانر، قمت انا لما شفت البانر اتكسفت انشره، وقبل ما حد يقول كلام قلة ادب واسمع اصوات مش كويسة هنا في المدونة الطاهرة، انا مزاجي متقلب وساعات بعض الحالات العجيبة بتنتابني

بس بعد ما شفت الخبر ده

ثم الخبر ده

عرفت ان الشعار الناس قرته غلط، التشكيل مهم جدا، هم يقصدوا من أجَلك انت، يعني احنا عاملين حملة ح تاخد من اجلك انت ايها المواطن، وعليه، فلا حياء في العلم، البانر ده توصيف علمي دقيق للحملة

وعلى راي الشاعر، اللي هو هو محمد جابر: اللي يتكسف من بنت عمه ما يجبش منها جمال

ويكفي تعرفوا ان اللي بعت لي الخبرين دول وللا عينيك هو مينا زكري، عايز يموتني المسيحي