والله العظيم كل يوم الجزيرة بتكبر في نظري

بعد النجاح الباهر لضرب خبر سيفون سبورت في اليوم الساقع وضرب خبر الحكم كودجا في العربية اليوم الساقع رجعت تنشر اخبار كاذبة تاني بعد ما قلنا انها تابت وارتجعت

انا بصراحة شفت الخبر ده اتلهيت واتخضيت وركبي خبطت في وداني

قام ربنا يكرمهم الشباب على التويتر قالوا لي ده تأليف وتلحين ووائل خليل جاب لي اللنك ده اجرنها بقى كدبة عالمية (عارفين يعني ايه اجرنها يا فرافير؟ :) مش ح اقول) وكل الناس بتسرح بيها

انا مش سبق وحذرت اليوم الساقع من انها تنقل من النت عمياني بالطريقة دي؟ لازم كل شوية نعمل لهم فضيحة؟ 

وقبل كده دبسوا السي ان ان بذاتها في اخبار سيفون سبورت؟ والعربية طبعا ام الكومبينيشن والبيديهات كلها

كل يوم الجزيرة بتكبر في نظري، ما شاء الله عليهم، لا عمرهم ضربوا خبر، ولا جريوا ورا اخبار منشورة في اي حتة تانية من غير ما يتأكدوا من صحتها من مراسيلنهم ومصادرهم

وعشان كده كايدين العزال مرة يقولوا عليها اسرائيلية ومرة يقولوا عليها شيعية ومرة يقولوا عليها تبع تنظيم القاعدة

وهي مش اكتر من قناة اعلامية اللي فيها بيراعوا ربنا في لقمة عيشهم وبيعملوا شغلهم

ما تنسوش تشردوا لليوم الساقع تاني، على الله يرتجعوا خالص المرة دي

حد ينقل خبر من على مجموعة على الفيس بوك؟ افرض كدبة فبراير؟ افرض واحد بيستظرف دم اهله، طب تليفون صغير للداخلية يسألوا عن صحة الواقعة طاه

الشروق بتتابع التويتر

انا مش عارفة ليه عندي احساس ان التويتر ده مش مكان عام، يعني واخدة راحتي فيه، اللي ممكن اقوله لصاحبي باقوله على التويتر

طلع الشروق بتتابع التويتر

هههههههههه طب اما الم لساني بقى

على الله ياخدو مقتطف من تويتات احمد ناجي عشان يتفضح بدل ما كل اللي يشوفه يقول: مين الطفل البريء ده؟ 

حق عرب لبلال فضل عندي

اولا انا لما كتبت البوست ما كنتش عارفة ان المسلسل بتاع بلال، بعدين حد بعت لي يقول لي: ده مسلسل بتاع صاحبك ...ما اعرفش هل ده نوع من الشماتة وللا ايه
فكتبت في التعليق قلت، الغريب ان بلال هو اللي كاتبه الا اذا كان يقصد حاجة معينة وراها
المهم
بلال كلمني: يعني لما تفتحي مسلسل تلاقي واحد كاتب اقتلوا محمدا يبقى كاتب المسلسل عايز يقتل سيدنا محمد؟
:)
قلت له الجملة صعبة، قال لي البنت شخصية متفرنجة وعايزة تبقى نجمة فيديو كليب والراجل ده نصاب وعايز يضحك عليها بيقول لها انت شكلك مش مصري راحت قالت له متشكرة على المجاملة وده جزء من شخصيتها اللي عايز اوضحه في المسلسل...خليتي واحد يكتب يقول اني باشوه سمعة البنات المصريات وباحابي للسعودية
:))
انا مش عارفة يعني ايه دخل السعودية؟ انا قلت اني مش متابعة المسلسل لان مش معقول حد يتابع حاجة في رمضان، وكل اللي كتبته نص الحوار وبعدين كتبت لا تعليق، وفعلا انا مش عارفة السياق اللي اتقالت فيه الجملة، وبصراحة لما عرفت انه بلال كتبت في تعليق عندي انه اكيد بلال يقصد حاجة من وراها لاني عارفة بلال كويس ومرة زمان كتبت مقال في الجرنال عن بلال وقلت بلال ابو الغلابة اللي مصمم ينكد على الاغنياء بانه يطلع لهم الغلابة دايما في السينما وينططهم على الكنب ويقعدهم على السفرا معاهم
يبقى ايه دخل السعودية دلوقت مع ابو الغلابة؟
لا يا بلبل فشر اللي يقول عليك كده، حقك على راسي، ثم ان ده بلبل يعني، ده اللي يرشه بشبه جملة ارشه بمجموعة مدونات ومقالات يخلوه يلف حوالين نفسه

عدد البديل الممنوع

احنا قلنا امبارح ان مطابع الاهرام رفضت تطبع البديل، حمل هنا عدد البديل الممنوع من عند احمد عبد الفتاح.
امبارح بعد الحريقة قعدت اقرا كتاب اسمه صور من المجتمع الاندلسي، شاحتاه من احمد عاطف مش بتاعي، اللي مألفاه اسمها د.سامية مصطفى مسعد، هو مش كبير قوي فخلصته، والدروس المستفادة ان المجتمع الاندلسي من كتر الرفاهية اللي فيه
اطمنوا، اللي زينا بيفضلوا واللي بيعيشوا مرفهين هم اللي بيخلصوا
هي دي حاجة تطمن وللا تقلق؟

انا باحب جرنال البديل

الكمال لله وحده، وما اعرفش الناس كلها عشمانة بزيادة في البديل، انتوا عارفين ده بقاله قد ايه عشان كل العشم ده يتحط فيه، صحيح العشم على قد المحبة، بس سو فار يعني حتى الان بيتقدم مش بيتأخر، فيه ناس كتير بتهاجمه عشان هم عشمانين في اكتر من كده او اداء احسن من كده بس كل حاجة تتقيم بمحيطها، انهي جرنال اكثر احتراما من البديل؟ شاورولي كده
صحيح ساعات بيعملوا جنرالات كازوزة، بس يعني جنرالات كازوزة احسن ما يبقوا مخبرين زي المخبر اليوم، او انهزاميين او اي حاجة
بصراحة ناس محترمة انا باختلف معاهم كتير وساعات بيضحكوني لما النبرة تعلا بس باحترمهم
وكمان بيعملوا صحافة كويسة

مدون حلو...وجيمي ما راحش في الوبا

المدون ده امريكاني واضح انه من اصول مكسيكية او هندي احمر مخلط ببيض، وواضح انه برضه طالع من طبقة اجتماعية متكحرتة وربنا نفخ في صورته، لما تقروا تدويناته ح تستنتجوا كده برضه، ثم يعني امريكي ابيض سيك ومن طبقة متوسطة ازاي ح يبقى مخه نضيف يعني؟
الواد ده اكيد يعني جدته مغتصبة زي اي ملون مخلط بعرق ابيض، مالكوم اكس بيقول كده
المهم المدون ده عاجبني قوي ولما باقرا له باحس ان الدنيا لسة بخير بس هو مقل قوي عايزة الواد جيمي بما انه في امريكا يقول له كتر شوية من التدوين
اسكتوا اسكتوا اسكتوا مش الحمد لله الواد جيمي ما راحش في الوبا، بصراحة بصراحة انا كنت فاكراه راح في الوبا اصل الواد خلع ولا كلمني وبعدين غطس كده قلت بس الواد راح في الوبا وجاله ازبهلال وصدمة حضارية من اللي بتحصل للي بيروح امريكا ويرجع لاوء لسانه وبيتكلم عن الامريكان اللي زي الفل وان احنا اللي ولاد وسخة
بس الحمد لله حبيبي يا اخويا طلع فقري زي اخته، راح اتصاحب على الهومليس والجرابيع اللي في امريكا كلهم وباعت يقول لي وحشتني عربيات الكشري والفول انا زهقت...ما طلعتش حلوة ولا حاجة يعني، وبيتوعدني توعد شديد اللهجة بانه ناوي يعمل مسح لكل جرابيع امريكا ويضرب معاهم صحوبية

فقري فقري يعني، انشالله دايما يا جيمي ربنا يديمه عليك وعلينا
انا مبسوطة قوي على قد ما كنت زعلانة منه لما كنت فاكراه هنادي وراح في الوبا على قد ما انا مبسوطة انه لسه من قبيل الفقريين دلوقت

مدونة عراقية: جديدة ومثقفة وذكية

انا باتفسح على النت كده لا بيا ولا عليا لقيت مدونة اسمها
shoot the Arab
بصراحة الاسم عجبني موت استخفيت دمه
دخلت لقيت المدونة لسة فاتحة جديد وريحة البوية لسة موجودة
وكاتبه على المدونة كده
Since everyone is shooting at Arabs these days...
maybe I should take a shot too.
هههههههههههههه
قلت ايه المسخرة دي واقرا لكو...الاقي المدونة مستواها الثقافي مرتفع جدا ودمها خفيف زي الشربات وصاحبة المدونة ملاحظاتها ذكية جدا قلت لا ما بدهاش قعدت افلي في المدونة واكتشفت ان صاحبتها عراقية مع انها كاتبة في اللوكيشن الامارات بس انتوا عارفين العراقيين دلوقت اتنطروا على كل العالم بما ان امريكا عايزة العراق شوية كده يعني ودلاديل امريكا فارشين العراق على السفرة وكل واحد عمال ياخد حتة اللي من الكتف واللي من الكوارع واللي من بيت اللوح
المهم بس هي كاتبة بالفصحى لكن عرفت من لهجتها انها عراقية وفرحت قوي، عشان انا باحب العراق، عشان انا كمان متربية فيها
وفرحت بالمدونة وبالمكتوب في المدونة وبصاحبة المدونة
بس والنبي يا صاحبة المدونة كبري الخط شوية عشان المسنين من امثالي يعرفوا يقروا

الله يرحم مجدي مهنا

الله يرحمه ويتقبله ويغفر له ويدخله فسيح جناته

كان راجل محترم

مبروك لعلاء الأسواني

علاء الأسواني فاز بجائزة برونو كرايسكي لحقوق الإنسان عن رواية عمارة يعقوبيان وأنا مبسوطة قوي

هو يستاهلها لأنه الرواية بتتكلم عن - طبعا اهم حاجة في حياتي دلوقت :) - التعذيب في السجون، وعن الانتهاك الجنسي للأطفال وعن الفروق الطبقية القاسية والفقر المهين اللي بيهين صاحبه ويؤدي به اما للفساد او لتدمير نفسه وغيره، وعن انتهاك حقوق المرأة واستغلالها جنسيا. وكلها حاجات حقيقية وموجودة عندنا وهو عرضها من وجهة نظر مصرية ومن غير ما يبص على جوائز عالمية.

مبروك يا دكتور علاء.

الخبر اهو

http://www.almasry-alyoum.com/article.aspx?ArticleID=85742

تعليق بخصوص صحيفة البديل

الحقيقة انا مش باتحيز لاشخاص ولا حتى ابويا انا واحدة قليلة الادب اصلا ولساني طويل، بس بجد جرنال البديل بقى حلو قوي، ودي حاجة كويسة لان ده معناه ان اللي بيشتغلوا فيه بيسمعوا النقد وبيحاولوا يطوروا نفسهم، الجرنال اول ما طلع كنت مسمياه صحيفة البليد: مقبرة الصحافة المصرية، كنت كل ما افتحه احسن ان حد زقني في الستينات وقفل الباب عليا وجري، وتلات اربع الكلام ما كنتش بافهمه، حاجة كده عاملة زي: الماضوية في السديم اللا متناهي مع الحداثة البرجماتية، وكمان التوضيب كان سيريالي وشبه لوحة متاهة الانسان الانوي في عصر الآلة. بس دلوقت اتغير خالص، التوضيب بقى حلو ومريح للعين، والمواضيع والاسلوب والمقالات وكل حاجة فيه تطورت جدا، والموقع الالكتروني كمان بقى حلو قوي، بس اللون المصفر ده مش فاهماله يعني مش اصفر ومش برتقاني، لو يعملوه لبني مثلا يبقى احسن ولو يوسعوا شوية كمان ح يبقى مريح اكتر للعين، بس الحقيقة تاني الجرنال حاجة تانية خالص غير اول ما طلع، قفز قفزة جامدة جدا. انا بانبسط لما احس ان حد بيحب يطور نفسه وعايز يبقى احسن، خصوصا في الصحافة، عشان كده لقيتها تحية واجبة، لاني بصراحة اول ما طلعوا سلختهم وخليت اللي ما يشتري يتفرج عليهم :) بس معلش بقى هو انا كده، ولما بالاقي حاجة حلوة باقول برضه.