لقد استندهشت جدا لما فيه بعض الزملاء علقوا بيقولوا لي الحزب الوطني بتاع مصطفى كامل مالوش علاقة بالحزب الوطني بتاع السادات
لأول مرة الساداتيين ممكن ينفعونا في حاجة عشان حيبقوا متابعين لخطابات السادات وعارفين هو قال ايه وهو بيأسس الحزب
السادات لما رجع الاحزاب قال انه بيعيد إحياء الحزب الوطني وفقا للمبادئ اللي اسسه عليها الزعيم مصطفى كامل، بس طبعا السادات لازم يضيف لمسته كالعادة وقال بس احنا حنسميه الحزب الوطني الديمقراطي ايمانا منا بالديمقراطية والمش عارفة ايه، والهجايص بتاعته دي وقعد يرط كتير قوي في خليط الافكار والابتكارات بتاعته، المهم يعني البؤرة الاساسية للكلام انه قال ان ده حزب مصطفى كامل مع لمساته هو واضافاته العبقرية المعتادة يعني
ازاي حد يقول لي مالوش علاقة من قريب او بعيد بحزب مصطفى كامل؟ اذا كان يقصد انه مالوش علاقة على ارض الواقع بحزب مصطفى كامل فده حقيقي، وده كلام ينسحب على حزب الوفد كمان، ومش من دلوقت، من ساعة اعادة الاحزاب تاني، وتأسيس بعض الاحزاب اللي ما كانتش موجودة او استعارة اسماء احزاب وتأييفها من اللي كانت قبل الثورة، لكن الشاهد ان السادات قال ان الحزب الوطني الديمقراطي امتداد لحزب مصطفى كامل ورط كتير قوي في موضوع مصطفى كامل والمفروض ان الساداتيين والناصريين عارفين كده، ورط كتير في ان نقطة الانطلاق: لو لم اكن مصريا لوددت ان اكون مصريا، وقعدوا شوية ماسكين في الجملة دي وبعدين شالوها، الظاهر لما لقوا ان الجملة دي وسعت منهم، بعد شوية بقى الحزب هو السادات والسادات هو الحزب وبعدين مسك صولجان الفرعون وبعدين مبارك بقى والعسل بتاعه
بس حتى مبارك اول ما مسك برضه رجع قال مصطفى كامل.. انتوا ناسيين ليه؟ ده فيه فترة الناس كرهت مصطفى كامل من كتر ما لزقوا فيه الحزب يا قلبي، انا مش باتكلم عن الواقع المعاش، انا باتكلم عن التصريحات اللي اتقالت واللي المفروض انها ملزمة للحزب ودلوقت لحسها وما بقاش يجيب سيرة مصطفى كامل خالص عشان الراجل حيورطهم في حاجات مش حابينها هم، والسادات اكتر من مرة اشار لان مصطفى كامل كان يجوب العالم من اجل قضيته الوطنية في اشارة يعني ان السادات زيه وكان بيجوب العالم اللي هو اسرائيل وامريكا، والناصريين اياميها اتريقوا عليه وقالوا بيجيب سيرة مصطفى كامل ليه دلوقت هو مش السادات كان بتاع كفاح مسلح واغتيالات سياسية وكان ضد الحلول السياسية؟ (اه.. السادات كان كده قبل الثورة والله، كان راديكالي زي ابو مصعب كده ومؤمن ان اللي يتفاوض مع الاحتلال لازم يتم اغتياله وكان ضد حزب الوفد ههههههههههههههههه والنبي الدنيا دي عجيبة) بعدين بقى قال احنا كنا بنكافح عشان نساعد المتفاوض وكان كلام غريب وجديد عليه، وان مصطفى كامل كان بيعمل توعية عالمية مش بيتفاوض، وهلولة كانت، ماهو كل حاجة كان يعملها كان لازم تصاحبها هلولة، طب احنا عايزين نوثق بقى خطب الرئيس السادات وتصريحاته من دار الكتب ومكتبة التلفزيون اذا نفع عشان شكل مبارك نسانا الدنيا واللي فيها، وانا ملاحظة ان فترة السادات هي الاقل توثيقا، ما بين ناس بتكرهه ومش عايزة تسمع همسه، وما بين ناس بتحبه وعايزة تغطي عليه، وماحدش بيهتم يجيب خطبه، ولا تصريحاته، مع ان خطب عبد الناصر كلها موجودة، اشمعنى بقى؟ فترة السادات فترة مهمة جدا، وحاجته موجودة في دار الكتب، اقصد الخطب بتاعته كانت بتتنقل في الصحف كلها - بالشتيمة اللي فيها - بالنص في الصحف التلاتة، غير انها كانت بتتعاد تاني يوم على القناتين وفي كل محطات الاذاعة، يعني الراجل نفسه كان مصمم يسمع كل نملة في جحرها هو كان بيقول ايه؟ طب حرام دي زي وصية الميت، ما نلم للراجل حاجته يا جدعان ده كان رئيس مصر انتوا بتتعاملوا معاه على انه كومبارس صامت ليه؟ الساداتيين مش حيلموا له حاجة عشان حيتكسفوا من الشتايم الكتير اللي في الخطب، بس المفروض حد يلم كل الخطب بحياد وينزلها بالتسلسل الزمني لأن دي فترة مهمة وهو الله يرحمه كان بيتكلم كتير قوي وكتر الكلام خلاه يلزم نفسه بتصريحات معينة، وبعد كده الظاهر كان بينسى ولا ايه فيقول تصريحات تانية عكسها وكان عسل يعني، مش حتزهقوا منه وانتوا بتلموا له، وانا شايفة ان خطبه اهم من خطب عبد الناصر بكتير، لأن عبد الناصر كان بيخصص الخطب للمبادئ والشعارات فمتبقاش عارف اللي بيقوله ده له علاقة بالواقع ولا نخع، عامل زي جداريات الفراعنة كده، عارف ان الكلام بيتسجل ومش عايز يتسجل عليه حاجات تبينه اي كلام، ولو ان له خطبة بيقول فيها انا في ليلة واحدة قبضت على تمنتاشر الف، بس مش عارفة فين الخطبة دي، بس دي غلطة واحدة، لكن السادات كتير كان بينسى ان الكلام بيتسجل وينطلق ويخصص الخطب للخناقات فده يديك فكرة عن اللي كان بيحصل على ارض الواقع، ومن خلال شتيمته لخلق الله كلهم تقدر تعرف الناس كانت بتقول عليه ايه ساعتها
بالنسبة لخطب مبارك فمافيش داعي لتوثيقها... لا بجد، باتكلم جد، مش حتعمل حاجة خالص، كأنك فاتح التلفزيون بعد ما الارسال خلص وبتسمع وشششششششششششش
