ايه اللي حصل في العياط؟ بفلوسي يا كلاب

على الله يكون خلص العياط على العياط على رأي علاء سيف
انا ما كنتش عايزة اتكلم والناس منفعلة ومتضايقة
غير بس بقين اتفشيت بيهم عند نورا يونس
وعندي شوية حاجات كده مضايقاني
برضه خاصة بالفلوس اللي بادفعها واللي بتتخصم مني من المنبع
على اساس انها ضرايب
الحقيقة اللي انا شايفاه ان المسألة امنية بحتة
يجي واحد مينا يقول لي لا اصل المسلمين بيكرهوا المسيحيين
اصل المسيحيين محتقنين ضد المسلمين
الكلام ده كله هجص في هجص
لانه ببساطة سطحي
والحكاية مش ببساطة ان مسلمين بيكرهوا مسيحيين او مسيحيين بيستسخفوا مسلمين
دلوقت انا مواطنة
بادفع اربعين في المية من دخلي ضرايب
تلتهم بيروح لوزارة الداخلية
عشان يحموني
عشان اعرف امشي في الشارع
امشي في الشارع ايه؟
دول ناس كانوا قاعدين في بيوتهم
بيصلوا
بلاش بيصلوا
ان شالله حتى بيسكروا وللا عاملين حفلة جنس جماعي
ناس قاعدة في بيتها
واتحرقت عليهم بيوتهم
والناس دي اتنازلت عن المحاضر
لانهم ضغط عليهم
لانهم قهروا
لانهم اتهددوا
لانهم مسيحيين متسامحين وبيديروا خدهم الايسر
طيب انا مش مسيحية
ومش متسامحة
واللي يهوب ناحية خدي ارقع له صداغه الاتنين
وقفاه كمان
وزيي زي اي مواطن بيشتغل وبيشقى وبيتعب
وبيدفع من عرقه وشقاه نص فلوسه للدولة
عشان تخدمه
واحد الخدمات
اني اعرف مين البلطجية اللي هجموا على ناس بيصلوا
زي كهانا اللي هجم على الناس في الحرم الابراهيمي
من حقي كمان انهم يتقدموا للمحاكمة
هم وكل اللي وراهم
واللي حرضهم
واللي اتستر عليهم
واللي اجبر المواطنين المجني عليهم بالتنازل عن البلاغات
المواطنين دول اتنازلوا عن حقوقهم بخطرهم او غصب عنهم؟
دي تفرق كتير
عشان لو غصب عنهم دي تبقى جريمة تانية
واذا كانوا هم مستعدين يطنشوا
انا كمواطنة
مش متسامحة
من حقي اطالب بمعرفة اللي اخلوا بامن بلدي
ومن حقي اعرف كمان مين اللي استغل سلطاته عشان يقهر مواطنين
لاني ممكن في يوم من الايام الاقي نفسي بيتي بيتحرق عليا
وشاب يافع بيجبرني اني اتنازل عن المحضر
ومطالباتي دي كلها بفلوسي
بفلوسي اللي انا مش لاقياها في الشارع
ولا وارثاها عن جدو الباشا
فيه ناس بتشتغل عندي مش بيعملوا شغلهم ليه؟
وامتى بقى ح الاقي البلطجية دول بيتهجموا عليا لاي سبب
زي ما اتهجموا على مواطنين تانيين
اسمحوا لي جميعا
اشير باصبع الاتهام للجميع
الجميع
الجناة
والامن
والمجني عليهم ايضا
اللي اتنازلوا عن حقي انا
اللي انا دافعة فيه فلوس
مش واخداه صدقة من حد
وده مش من حقهم
مش بس كده
عفوا
انا باشير باصبع الاتهام للكنيسة المصرية الموقرة
المعنية بالامر
واللي عندها معلومات
ومش عايزة تثير الموضوع وربما تكون شاركت في الضغط
ولو النفسي
على المجني عليهم عشان يتنازلوا عن حقي القانوني
دي مش غلطة كي بورد
انا كاتبة حقي
ومصممة انه حقي
ومن غير زعل
من اي طرف
اسمحوا لي برضه
ارسل عتابي للبابا شنودة
واسفي الشديد
حين قرأت بيانه للاقباط اللي مفاده
ان اصبروا وربنا موجود
ومين قال ان ربنا مش موجود يا قداسة البابا
بس ربنا قال اذا حكمتم بين الناس ان تحكموا بالعدل
وانت حافظ القرآن اكتر ما انا حافظة الانجيل
وتعرف ان اكيد في الانجيل فيه اية مشابهة
ربنا اذن لنا نتنازل في حقوقنا الشخصية

مش التنازل عن حقوق الاخرين
والتنازل ده اضر بيا انا شخصيا
مين قال لك يا قداسة البابا
اني متنازلة عن حقي كمواطنة في حفظ امن بلدي؟
مين قال لك اني كمواطنة بتدفع ما يقرب من نصف دخلها ضرايب
اسمح بوجود هؤلاء البلطجية احرار في مجتمعي؟
مين قال لك اني كمواطنة ارضى بان يبقى في مجتمعي ناس حاسة بالمرارة
واذا هم اتنازلوا النهاردة
الله اعلم ولادهم بكرة ممكن يعملوا ايه؟
مين قال ان الانسان لما بيقهر مش بيلاقي وسيلة تانية ياخد بيها حقه؟
مين قال ان بكرة مش ح الاقي واحد مسيحي حرق مسجد انتقاما للي حصل
مين قال ان من حق المجني عليه يصعد الامور بالشكل ده بدعوى انه تنازل وتسامح
وربنا موجود
صحيح ربنا موجود
وح يحاسبنا كلنا
الجناة
والمجني عليهم
والساكتين عن الحق
كلنا ح نتحاسب
===
اسخف التعليقات اللي سمعتها: الاسلام بريء مما حدث في العياط
او هو ده الاسلام الارهابي
سواء اللي قالوا كده او كده الاتنين اسخف من بعض
واللي اسخف منهم اللي فرحوا بكلامهم