Thursday 7 June 2007

محاكمة اسلاك خامس مرة عشان البيه

لا لا لا لا
اللي ما جاش النهاردة محاكمة اسلاك ابيح فاته تلات اربع عمره
شرباااااااات
في البداية استكمال مرافعة الادعاء
ناصر امين كان اترافع المرة اللي فاتت
والنهاردة استكمالا اترافع الاستاذ حمدي
وكانت مرافعة هايلة تناولت القضية من جهة اخرى
ملخصها: بلاش حقوق الانسان
امشي يا حقوق الانسان
وحشة يا حقوق الانسان
بخ بخ
احنا مش ناس مسلمين وموحدين بالله ونعرف ربنا
ينفع كده يعني اللي حصل ده؟
الحقيقة ما ينفعش مرافعة الاستاذ حمدي تتلخص
شوفوها فيديو
ثم
وركز معايا في ثم لو سمحت
ابتدت مرافعة الدفاع ان اسلاك ابيح
الاول الاستاذ انور عبد الله تقريبا ده اسمه مش متأكدة
انا برضه سجلتها كلها
تلات اربعها شتايم
وشتايم طبقية
حاجة كده على مستوى خبير الاصوات وعماد دول
ادب سيس خرسيس
جرابيع فلاحين
اخص اخص
الله وانا ح اتريق ليه
اليكم مقتطف من كلام الاستاذ انور: "خبير الاصوات الكهربائي الحاقد الجاهل الصايع"
فالقاضي قال له مافيش داعي للاهانة
قال له لا هو جاهل وحاقد ولا يحمل شهادات وبالدبلوم وكهربائي
القاضي قال له: انت بتقول عليه صايع
فاتلجلج انور عبد الله
راح جميل سعيد العقر لحقه وقال: لا لا هو قال صانع ما قالش صايع
حد شاف مسرحية الدخول بالملابس الرسمية: انت قولتي بكام
- انا يا فندم قلت بكام؟ انا قلت لمين بس بالودن الشمال تسمعيها بكام وبالودن اليمين تسمعيها لمين
بس جميل سعيد ح يلحق ايه وللا ايه
الراجل بعد شوية قال: خبير الاصوات الاهبل
كويس اني سجلت كل مرافعته
خصوصا صايع اللي هي صانع
- انتي ايه اللي رجعك؟
- الجزمة بتوجعك؟
للاسف البتارية كانت بتفيص والمساحة كانت قربت تخلص على ما الاستاذ جميل سعيد ابتدى يتكلم
اول ما اتكلم قال ان اسلاك ابيح حبيبه وابن حبيبه
اه والله، قال انا باترافع عن هذا الفتى اليافع الجميل اللي هو حبيبي وابوه حبيبي
وقال ان اسلاك عمل اتنين وتمانين قضية مخدرات
وانه متربي مع ولاده
وان والد جميل سعيد واخوه وابنه ظباط بوليس
انعم واكرم
وان عماد الكبير سواق ميكروباص
وان اللي قتل الظابط المتناوي
برضه سواق ميكروباص
وقال ان له عتبى على النيابة
"والعتبى غير العتب لأن العتبى رجاء"
والحقيقة ان الكلام ده مش صحيح
لان الرسول صلى الله عليه وسلم
لما كان بيخاطب رب العزة قال: لك العتبى حتى ترضى
ومش معقول يعني الرسول ح يقول لربنا لك الرجاء مني حتى ترضى
المهم انا حاولت اسجل على قد ما قدرت
من الحاجات اللي للاسف ما سجلتهاش
غير ان اسلاك حبيبه وابن حبيبه
ان الاستاذ جميل بيستند في الدفاع على اقوال عماد
وبيقول ان عماد لما اتسأل: اسلام اللي قلعك البنطلون
قال: لا
قالوا: طيب شفته وهو بيؤمر حد يقلعك البنطلون
قال: لا
واستطرد الاستاذ جميل: طيب يعني معنى الكلام ده
ان اسلام دخل لقاه قالع البنطلون
هو ماله بقى كل واحد حر في نفسه!
وتعقيبا على هتك العرض اكد الاستاذ جميل
ان ما هو في الفيديو مش هتك عرض
لان هتك العرض يستلزم ان الواحد يمد ايده في مكان حساس
او يقلع الضحية
وبما ان اسلام وجد عماد قالع لوحده
وبما ان اسلام استخدم عصايا مش بايده
يبقى مش هتك عرض
خصوصا انه ما دخلش العصايا
وشاور بالنضارة وقال: يعني انا لما اعمل لواحد كده بالعصايا
وما ادخلهاش ده ما يبقاش هتك عرض
ده يبقى تحضير
وعماد بيقول انه حاول يدخلها بس ما دخلهاش
واحنا عندنا في القانون لو الواحد تراجع عن الجريمة
ما يتحاسبش عليها بل يتكافئ على انه ما عملهاش
===
انا ح اسيب التعليقات والاصوات والاشارات للسادة القراء
على رأي مريم قالت لي: ده كان ناقص يقول بيمارس حقه الشرعي
عموما انا سجلت جزء كبير من مرافعة الاستاذ جميل سعيد
شوفوها فيديو
بالذات مشهد العروسة
اه وربنا
جاب عروسة ..عروسة لعبة مش عروسة ح تتجوز يعني
ونيمها على ترابيزة ورفع لها رجليها ووقف القلم جنب راسها وقال: ازاي بقى امين الشرطة
بيصور من عند راسه واللي بان لنا وشه
هههههههههههههه
والنبي الراجل ده شربات
المهم اننا كنا قاعدين عند المنصة
والموكوس مينا
اللي هو مراقب مصري بس هو مش قايل
ده سر بينا احنا السبعة الاف
قاعد بقى سي مينا
يسمع مرافعة جميل سعيد ويكركع من الضحك
لما فضحنا
مين بقى
لقيت لك واد امور كده قاعد في الصف الاولاني
تقريبا كان ح ينط يخنق مينا
بعد ما رفعت الجلسة جاله وقال له ممكن اتعرف عليك
المهم مينا أير كده وقال له ليه خير
غتت عليه يعني
في الاخر عرفنا انه طارق جميل سعيد
وانا خارجة لقيت محامية داخلة بتقول لطارق: انت ايه اللي بيشغلك محامي انت تقعد في بيتكوا
جري وراها واتخانق معاها
وبعدين لما سابها وهو بيتدور قال: يلعن ابوكي مرة بنت احبة
بس برضه ما كانش عندي مساحة اسجل الكلام ده
بس صورته وهو بيشتم صورة يعني مش فيديو
===
ملحوظات: مرافعات الدفاع كلها معتمدة على المفاهيم الطبقية
لدرجة ان جميل سعيد هاجم فترة الستينات
كمان جميل سعيد قال ان عماد ابوه وامه وعمه ومرات عمه تجار مخدرات: ومافيا تجار المخدرات
اتفقت مع مافيا حقوق....حقوق ايه؟ آه حقوق الإنسان
اي والله قال كده
رشا بتقول انه الظاهر ما يعرفش ان الدنيا فيها انسان
المهم مافيا تجار المخدرات اتفقت مع مافيا حقوق الانسان مع مافيا الفضائيات المأجورة
سيئة السمعة زي الجزيرة اللي منهم هويدا طه المحكوم عليها بالسجن لتشويه سمعة مصر
اخص عليكوا
بقى مظبطين مع بعض وسايبني من غير حتى لاب توب ولا كاميرا ديجيتال عدلة
طب شوفوني بحاجة بدل ما انا باصرف ع المدونة من جيبي
واتفضحت على قسط عربيتي ابو 400 جنيه
والحقيقة ان الاستاذ انور والاستاذ جميل وجهوا اهانات كتيرة قوي للاستاذ ناصر امين
وطبعا لكل سواقين الميكروباص على اساس انهم تنظيم
الاستاذ انور قال سواقين الميكروباص بيروعونا في الشوارع
والاستاذ جميل قال اللي قتل المتناوي سواق ميكروباص
الانكت من ده كله
ان في اطار "العتبى" الاستاذ جميل قال للنيابة بتقولوا له اين انت من المتناوي الشهيد؟
طيب مين قال لكوا انه مش شهيد؟
طيب ايه رأيكوا انه كان ح يبقى شهيد وربنا ما قسمش
طيب بكرة ياخد براءة ويموت شهيد واجي لكوا وافكركوا انه بقى شهيد
وربنا وربنا ما باتبلى عليه وشوفوا الفيديو
وكل الشتايم اللي حاز عليها سواقين الميكروباص بصفتهم الاجتماعية كوم
والشتايم اللي حظى بها الحاصلين على الدبلوم: الصيع الجهلة الاغبيا الحاقدين الهبل
كوم تاني
ما كانش ناقص غير يقولوا: ادي اللي اخدناه من مجانية التعليم
ولاد البوابين اتعلموا والروس اتساوت يا حوش
اميجو التركي
==
هوامش: الاستاذ طارق جميل سعيد طلع رافع قضية على صحفي
وقال لمينا انت متحيز ولو كتبت حاجة مش عاجباني ح ارفع عليك قضية
قلت له: ليه انا منحازة لعماد ومتوحدة معاه ونكتب اللي احنا عايزينه
قال لي: لا انت اكتبي...!!!! واذ بي افوجأ ان جميل سعيد بيقول لي اهلا بالمدونة العظيمة
وللا الجميلة حاجة كده مش فاكرة
انا اتلهيت بس في انه عرف اني مدونة مع اني المرة اللي فاتت اتكلمت معاه بصفتي الصحفية
مش التدوينية
وبعدين قال لي: ح تشتميني؟
قلت: انا باقول اللي بيحصل بالظبط
مينا اتسحب من لسانه وقال له: دي بنت احمد فؤاد نجم
الحقيقة انا عادة باتضايق لما حد بيعمل كده بس ما كانش وقته اطبق في زمارة رقبة مينا
فقال لي: باباكي راجل عظيم..وهو بقى مش بيقول لك دون لي شوي شوي؟
هاهاهاها
وبعدين طارق جميل قال لي: طيب لو ما كانش باباكي احمد فؤاد نجم مش كنتي قلتي عليه بيشتم؟
فالصحفي اللي طارق رافع عليه قضية قال له: طيب احمد فؤاد نجم مش بابايا وانا باحبه
طارق بص له بقرف ما اعرفش ليه وقال له: مش باقول لك انت
زي ما يكون بيقول له ايش دخلكوا انتوا يا حثالة!!!!!! قلت له لا ما كنتش قلت عليه كده
كنت قلت راجل بيقول رأيه
وبرضه سألته السؤال اياه: لو اخوك عماد كان ح يبقى شعورك ايه
قال لي: مش ممكن يكون اخويا عشان انا اخويا مش مجرم
وبعدين التعذيب كان زمان اسألي باباكي مش دلوقت
قلت له: يعني دلوقت مافيش تعذيب
قال لي: طيب افرضي اتعذب ماهو مجرم واتهرب من السلطات
قلت له: وافرض مجرم شغلة الظابط انه يعذب المجرمين؟
قال: هي هي هي انا مش ح اعرف اتكلم معاكي....طيب اسألك سؤال تاني افرضي انا ضربت الراجل ده وحد جه قال مش طارق اللي ضربه
دي نوارة مين بقى اللي يثبت
قلت له المضروب
قال لي طيب خلاص
!!!!!!!!!!!!
فين السؤال؟
==
ابو اسلاك طلع يقول انه ح يتصل بالنائب العام لان عماد هدد اسلاك بالقتل
والحقيقة ان عماد ما هددهوش ولا حاجة كل اللي قاله ما معناه انا كان ممكن اقتله
لكن انا لجأت للقانون
----
حاجة اخيرة مينا قال لي ما تقوليهاش
طيب مش عارفة اسكت
عموما انا ح اقولها بس ده بينا
قبل المحاكمة لقيت الاستاذ جورج اسحاق داخل
قلت له اهلا وسهلا
قال لي انا جاي بسرعة وح امشي انا بس جاي اشوف العيال
قلت له عيال ايه حضرتك عايز مين من العيال
قال لي مش النهاردة محاكمة كريم
قلت له كريم؟
قال لي : عبد المنعم
قلت له عبد المنعم؟
قال لي حد من المدونين
اتصلت بعبد المنعم قال لي: حرام عليكي يا نوارة انا واخد براءة
خرج جورج اسحاق واتكلم في التليفون وبعدين دخل قلت له: منعم مافيهوش حاجة
قال لي: خلاص خلاص عرفت
وخرج
خرجت وراه لقيت الشاب اللي كان جاي معاه قلت له: الاستاذ جورج عرف هو كان جاي ليه؟
قال لي: ايوة عرف لما يجي اسأليه
وبعدين لقيت الاستاذ حمدي محامي عماد الكبير بيقول لي: هو جورج اسحاق بيعمل ايه هنا؟
قلت له على اللي حصل
قال لي ده جه وسلم على عماد وقال له احنا جنبك يا عماد وما تخافش
طبعا عماد يا عيني واقف زي الاطرش في الزفة: مين ده
الاستاذ حمدي: ده بتاع حركة كفاية
عماد: كفاية ايه؟
الاستاذ حمدي: بيقولوا لمبارك كفاية حكم كفاية توريث
عماد: آآآآآآآآآآآه كفاية ديمكراطية وكده صح؟
الاستاذ حمدي: ......صح يا عماد........
انا ما قلتش حاجة احسن مينا يتخانق معايا
ده سر بينا احنا الخمستلاف..هه؟
الفيديوهات لسة بتتحمل
لما تخلص ح انزلها ان شاء الله
==
الخلاصة الجلسة اتأجلت ليوم 4/7 لاستكمال مرافعة الدفاع
حضر من المدونين وائل عباس ومينا اللي هو مراقب مصري بدون ذكر اسماء
وراندا زنزانة ورشا وخدامتكوا
ومن الصحفيين كتير وعلى رأسهم وائل عبد الفتاح
بس تشوف اشكالنا
مأجورين مأجورين يعني
حاجة تقطع الشراب
========
يا فضيحتي يا فضيحتي يا فضيحتي
كنت ح انسى اهم مدون حضر النهاردة
الا وهو عمر
اسد
اللي لولا بتارية موبايله العامرة
ما كنتش عرفت اكمل تصوير
بالمناسبة
كل محاكمة اسد يسلفني بتاريته
بعد ما بتاريته تفيص
لا مؤاخذة يا اسد
العتب على الزهايمر

19 comments:

Anonymous said...

تعليقا علي اول البوست كان نفسي اعبر عن نفسي وانتمائي للاتحاد السكندري ولاهل الاسكندرية العظماء لانهم اكتر ناس يقدروا يقولوا كلمة من تلات حروف مع صوت عظيم يخرج من الانف
اما نص البوست فا ممكن اكع كع من الضحك علي فين السؤال ؟
بالظبط زي سعيد صالح في مدرسة المشاغبين
انا احط ايدي ع السؤال اقول الاجابة علي طول
شكل طارق ملهوش في حط الايد عشان كدة فشلنا احنا اننا نفهم السؤال
اقصد حط الايد علي السؤال مش حاجة وحشة
:)

Anonymous said...

يا لاهوي..قلبي كان حاسس ان الجلسة دي نار...عموما...الجلسة دي هتحط القاضي في موقف حرج جدا...ما عدش ينفع يدي حكم مخفف....المحامي ده..المفروض يتقدم للمحكمة بعد القضية دي بتهمة الغباء الأزلي...حاجة صراحة تغم النفس..يعني حتى الكدب مش عارفين يكدبوه...بدل ما يحاولوا يخترقوا عذر عدل عليه الطلا..جاي يشتم الصيع السفلة الي ضميرهم الميت سمحلهم انهم يتعلموا تعليم متوسط...صراحة..المفروض نعمل في الناس البيئة الي مشوهين شكل القاهرة الحضاري..زي الفراخ الي عندها انفولنزا الطيور..ندفنهم صحيين تحت الأرض..اه والله الفراخ بنعمل فيها كده..انا مش ملاحقة اتابع تدويناتك الله اكبر عليكي يا شيخي...كان نفسي اشكرك قوي على البوست القنبلة بتاع المؤتمر..حقيقي مبهر..عموما..الجلسة الثانية انشاء الله ربنا يكرمنا و نتقابل...تحياتي..

Anonymous said...

ana walhee msh 3rfa ad7ak we karkar mal da7k wela 22oool a7a bsooot 3alee !!!! eh el tahreeeg da ??!!!
b2a bdal mad7'lche el 3asaya yb2a msh hatk 3ar !!?? a7a y3nee eeh da!!!
we lama 2alo 3la naser amen mynf3che yb2a mo7amee 3mad 3chan howa eele adam el bla3' , 2mal see gameeel 7'ara da b2a lama 2al we bnfso we saba7 el bga7a da 7abeebe we 2bn 7abebee ..!!!
we kda ya nawara ana 7asa ano bgad 3mleeen ymoto fel adya we 3al fady we de 7aga msh m7ataga y3ne kol el lat wwel 3gn da !!
kwyas atnee mgatch f3lan almradee kam zmanee 23da damee m7arooo2 we msh b3eeed kot msskt fe zomarat 7ad fehom..
we eh s7eee7 se tarak da kman , howa kol wa7ed b2a 7ytntatlo shwaya ..eh 7'ara da..
rbna ystor b2a galst el shr el gay..2ma nachooof b2a a7'rtha eh
we walhe kda shklha 7tb2a zay ma 2ostaz 7'aled 2al ya nawara ..
ufff y3ne bgad.

Anonymous said...

اه صح نسيت حتة حركة النظارة بتاعة سي الاستاذ جميل
فكرتني بفيلم ضد الحكومة لاحمد زكي في لقطة
الحبارة والقلم الحبر
يا خوفي لا ياخد براءة ونتشد كلنا سب وقذف

Anonymous said...

s7eeee7 we y3nee el 2ADEE da eh nzamo ??? eh b2a msh sam3 el far2 been say3 we ay 7aga tanya !!!!!

Anonymous said...

يا نوارة أنا قولتلك اللي فيها عن سي الاستاذ المحامي... أقولك حاجة ما يخلي اسلام يعمل كده مع حد من ولاده و نشوف بقى هيفضل برضه شاب يافع و جميل و لا...... انت فاهماني بقى

Anonymous said...

في وسط كل ده عماد عامل ايه؟ يا تري خايف و لا مطمن ان حقه مش هيروح؟...كفايه بجد اللي حصله ما اظنش انه ناقص تريقه المحامي ابو مخ مركب شمال ده ..

Anonymous said...

howa el mo7amee mo7'o msh mrkab shmal da mo7amee **** :X

Anonymous said...

نوارة بجد مش عارف أضحك على إيه و لا إيه
بس حلوة حتة مافيا حقوق إنسان ماتغرفيش بيبعوا فين و النبي
إن شاء الله أقصى العقوبة لإسلاك

Anonymous said...

هأو هأو هأووووو
ده انا فعلا فاتني تلات اربع عمري يا نوارة
ايه المسخرة دي

وكمان عرفت دلوقتي انك سيد من يكتم السر.. فضيحة يعني.. بس لعلمك الاستاذ جورج ده كهين.. يعني هو عارف مين منعم ومين عبكريم ومين عماد بس هو بيتوهك زيادة في التأمين يعني

شفتي بقى؟ ياما توهنا والله.. أنا شخصيا رحت بناءا على كلامه عند دار القضاء العالي يوم 25 مايو 2005 واتاري ياختشي المظاهرة عند ضريح سعد
عادي يعني

Anonymous said...

بصراحه من كتر تغطيه الجمدة ومطبعتك الدقيقه لموضوع اسلام نبيه
بقيت اكسل انزل اغطى المحاكمه
لمدونتى واكتفى انى التابع مدونتك اخر النهار اعرف اه حصل
تغطيه لموضوع 10 على 10 ممتاز جدا

Anonymous said...

كويس اني ما قريتش التدوينة أصلا إلا بعد ما نشرتي التصحيح وإلا ...

أنا مش عارف إنتوا حاقدين على الفتى اليافع الجميل إسلام نبيه ليه ؟ الراجل ما عملش حاجة , دخل لقى عماد قالع فلوحله بالعصاية يعني , مجرد تحضيرات زي ما قال الأستاذ جميل سعيد لا حصل إيلاج ولا شروع في إيلاج حتى والمشرع في هذه الحالة يكافيء إسلام نبيه لأنه محطش العصاية تماماً زي عروض موبينيل كدة - حسب نص مرافعة الأستاذ حميل سعيد

Anonymous said...

الاستاذ جميل بيستند في الدفاع على اقوال عماد
وبيقول ان عماد لما اتسأل: اسلام اللي قلعك البنطلون
قال: لا
قالوا: طيب شفته وهو بيؤمر حد يقلعك البنطلون
قال: لا
واستطرد الاستاذ جميل: طيب يعني معنى الكلام ده
ان اسلام دخل لقاه قالع البنطلون
هو ماله بقى كل واحد حر في نفسه!
وتعقيبا على هتك العرض اكد الاستاذ جميل
ان ما هو في الفيديو مش هتك عرض
لان هتك العرض يستلزم ان الواحد يمد ايده في مكان حساس
او يقلع الضحية
وبما ان اسلام وجد عماد قالع لوحده
وبما ان اسلام استخدم عصايا مش بايده
يبقى مش هتك عرض
خصوصا انه ما دخلش العصايا
وشاور بالنضارة وقال: يعني انا لما اعمل لواحد كده بالعصايا
وما ادخلهاش ده ما يبقاش هتك عرض
ده يبقى تحضير

لولا انى عارفك كويس وعارف انك بتكتبى الحقيقة كنت قولت انتى بتهرجى

دا منظر كلام يقوله محامى

ال يعنى عماد دخل القسم وقلع نغسه البنطلون غاوى يفضح نفسه يقلع البنطلون لوحدة فى القسم على كده مفروض عماد يتحاكم بتهمة فعل فاضح فى الطريق العام وربنا يخلينا اسلام بيه هوا اللى ستر عماد وادله جوزين اقلام علشان يحترم نفسة وميعملش كده تانى




والله العظيم العالم ديه بتهرج



سؤال اخير انتى ليه بتطلتى تعليقى على الكومنتات اللى بتجيلك
اللى عدا عدا يا كبير

Anonymous said...

انا حسأل سؤال صغير
هوه الاستاذ جميل ساكن فين؟
و الله بسأل بجد
و اللى عارف يقوللى، علشان شكلها كده حتبقى مفاجاة جامدة

:)))

Anonymous said...

ههههههههههههههه

نوارة بجد انتي تحفة

صحيح ماخدوكيش معاهم في المافيا ليه !!!


عماد ده غلبان

ربنا ينصره على من ظلمه

Anonymous said...

هيهيهيهيهيهيهيهيهيهيهيهيهيهيهي

دا ايه الجمال دا .. والنبي بجد دا اللي حصل

ههههههههههههههههههههههههههههه

لا بجد لازم اشوف الفيديوهات بتاعت المرافعه..وبتلومي علي مينا انه كان قاعد يضحك..دي حاجه افيه كدا محصلتش ..ولا مسرحيات عادل امام في عزة ياشيخه

طب والله فكرني بفيلم مش عارفه عادل امام باين وللا احمد ذكي ..بتاع ان القلم مش هايدخل في ازازة الحبر غير بمزاجها !!!!
يعني المحصله النهائيه ..ان ازازة الحبر دي نوعها وحش وسمعتها بطاله..اوعي تشتري منه تاني

اول مرة اشوف دفاع بيعتمد علي الشتايمم الطبقيه والحقد الطبقي ..وان سواقين الميكروباص يع يع اخ اخ ..وخبراء الاصوات جهله وصيع وبدبلوم

يارب يا رب يارب خبير الاصوات الجاهل الصايع الكهربائي ورابطة سواقين الميكروباصات في القاهرة الكبري يروحوا يرفعوا دعوي سب وقذف عشان تكمل ... دا احنا هانضحك ضوحك

تحياتي علي المجهود الرائع يا نوارتي

ومايحرمناش منك

Anonymous said...

زنزانة
فاهمة فاهمة

sokoothansawat

يا شيخة ده انت فاتك نص عمرك

لوبي

والله يا حبيبتي بالنسبة لتساؤلاتك الكونية

مش عارفة ارد

ح اقول لك ايه يابنتي

الله يهده زي ما هد السلم لملم لملم


مريم
غالبا هو شاب يافع وجميل عشان كده
مش الشرطة كانت في خدمة الشعب؟
هي دي خدمة الشعب
بس بما ان الشرطة والشعب في خدمة الوطن

فحد بقى يلايمنا على مؤخرة الوطن عشان نخدمه


اتفضل عندنا

كان نفسي اقول لك مطمن

بس طبعا قلقان ودمه محروق

ربنا يجبر خاطره يا رب

ادعوا له يا جماعة


مصري

صحيح ده انت حضرتك المحاكمة

مش كده؟

مش انت سعادة الضاكتور؟

يابني والنبي ما تزعل مين

بقيت بانسى


نورا يونس

هههههههههههههههههههههههههه

هههههههههههههههههههههه

هههههههههههههههههههههه

يخرب مطانك

انتي....بريه منك


بحبك يا مصر
لا تعالي


الواد محتاج الناس جنبه


مصر هي امي

انا اللي عدا عدا؟

اه ده بمناسبة اني جزء من المافيا وكده

طبعا

جدك كان كائد مافيا؟

تبقى مش من مستواااااااااااااااي


believer

ح اعرف واقول لك

هههههههههههههه


عيلة وعايزة تفهم

انت فين يا بنتي؟

كنت بتمتحني وللا ايه؟


نون

والله يا بنتي انا خايفة المرة الجاية يسألونا بجد

جدك كان كائد تابية

واللي اصله مش تركي ما يدخلش المحكمة

لا

ويتحبس اربعة وعشرين ساعة

Anonymous said...

السلام عليكم
شكرا يانوارة جدا على التغطية الجامدة دى

Anonymous said...

kal3ada meshayelany gamaylek