Sunday 17 June 2007

انتهينا خلااااااااااااص



حماس عملت دولة في غزة

وسمتها غزستان ما اعرفش ليه

وعباس بينفذ اوامر كوندي واولمرت بالقلم والمسطرة

وخلاص

الدم الي اريق

والنار اللي ولعت ح تاخد مداها وخلاص

واللي جاي اوحش كتير من اللي فات

والدم بين الجار وجاره ما بيتنسيش

وقلة العقل صايبة كل الناس

حتى اللي برة فلسطين نفسهم

ودي حكمة ربنا

ليمحص الله الذين آمنوا

بدل ما كنا قاعدين نقول لو حماس جات لو حماس جات

اهي جات

املنا في فصائل المقاومة التانية

وعلى رأسهم الجهاد الفلسطيني

انهم يعرفوا يعملوا حاجة

هههههههه

احلام العصافير دي

عمرهم ما ح يعرفوا يعملوا حاجة

غير انهم اضعف الايمان

ما يبقوش طرف في النار اللي جاية

تاكل الاخضر واليابس

على الاقل عشان يبروا ذمتهم امام الله

واللي ما يشفش من الغربال يبقى اعمى

بس ان جيتوا للحق

اول مرة اقولها

بس قلتها والله: الحمد لله اننا ما عندناش ديمقراطية

مدام اللي على راسنا وبينا خونة

وما عندهمش مانع يقدموا شرف امهاتهم قربان لامريكا

واللي عليهم الامل واختيار الناس قليلي العقل

ومعدومي الحكمة

وتصرفاتهم كلها ردود افعال

يبقى خلينا زي ما احنا

وحالنا

لو مش احسن يبقى على الاقل مش اوحش

انا مخنوووووووووووووووقة

مافيش فايدة

=====

انا قلقانة كمان عشان النار شكلها جاي علينا

والنبي اللي يبص يشوف النار كأنها ماسكة في خيط

من افغانستان ع العراق

على لبنان بس لبنان عرفت تفلت عشان مخهم انضف من بقية العرب

على فلسطين

خلاص

دي بينا وبينها حيطة

الا ايه حكاية الفصائل الفلسطينية دي
يعني الصهاينة جايين من ثقافات وجنسيات ولغات مختلفة
وعارفين يصطنعوا انهم شعب واحد
وهم مختلفين حتى في اللون
والاكلات
والملابس
والفلسطينيين اللي نفس السحنة
ونفس نبرة الصوت
عاملين نفسهم فصائل؟

ياللا بقى

ربنا ما بيظلمش حد

55 comments:

Anonymous said...

http://ma-3lina.blogspot.com/2007/06/blog-post_17.html

اهداء لحضرتك

نتمنى تفكري معانا

Anonymous said...

الي كلهم
جاتكم القرف بليتو البلد وبليتوا علينا
!!!

Anonymous said...

حسينا الله و نعم الوكيل في العملاء و الخونة

Anonymous said...

كنت نفسي نكمل حوار
انما الظاهر مفيش فايدة يا نوارة
خسارة والله
حتي انت يا نوارة
معلش يا زهر
بكره الامور تتعدل
والناس تفهم
فينك بقه يا بكره
زهقنا انتظار
زهقنا حسبنه
زهقنا تسرع وسربعة
زهقنا وساخة وخيانة
زهقنا اتهمت وديما في القفص بندافع عن نفسنا حتي قدام اللي المفروض يدفعوا عننا

بس برضه ربنا مبينساش حد

الي كل شهداء حماس
الي كل من ضحي ببيته وعياله ومراته وفلوسه
الي المعتقلين في سجون الاحتلال والصهاينة
الي شرفاء فتح ومن يبكون دما منكم
حسبكم انكم قدمتم اعذارا الي الله
وذنبكم انكم جئتم في زمن العفن وأشباه الرجال والموازين المقلوبة
حسبكم الله

Anonymous said...

حماس عملت دولة في غزة


وسمتها غزستان ما اعرفش ليه

هذا فراق بيني وبينك

من أين جئت بهذه المعلومة؟؟؟؟

يأيها الذين آمنوا إذا جائكم فاسقا بنبأ فتبينوا
أن تصيبوا قوما بجهالة فتصبحوا علي ما فعلتم نادمين

يارب يا نوارة تكوني من الذين آمنوا وتتبيني

Anonymous said...

مش عارف الناس زعلانة ليه ؟؟؟
هو إحنا مش كان نفسنا فلسطين ترجع؟
أهو بقى عندنا إتنين فلسطين: فلسطين الشرقية و فلسطين الغربية والله أعلم يمكن لسه يكون فيه تانى؟؟!!
حسبى الله ونعم الوكيل

Anonymous said...

أعتقد يا نوارة أن التدخل الاسرائيلي هو لقطع الطريق على مجيء قوات دولية طبعا
هذا بالإضافة إلى السبب الأساسي وهو أنهم لا يستطيعون التعايش مع طالبان أو محاكم اسلامية على حدودهم

الأمور تعقدت وأصبح هناك أكثر من لاعب في الساعة ، و حركة حماس كانت في منتهى الغباء السياسي فقد قدموا لخصومهم السياسيين أعظم خدمة

شوفي نص الخبر الأصلي في صحيفة الصندي تايمز بيقول ايه

http://www.timesonline.co.uk/tol/news/worl...icle1942918.ece

Anonymous said...

الصارم الحاسم
حاضر فتحت اللنك وباقرا فيه اهو

حائر في دنيا الله

وانا كمان حيرانه والله

علاء

اللهم امين
بس كمان نسيت تدعي على قليل العقل

عدو عاقل خير من صديق جاهل

بحري

ممكن بقى تفوق لنفسك شوية وتبطل تعمل زي الباقيين وتقدم مصلحة مجموعة

تم اضفاء القدسية عليها ما اعرفش منين

على مصلحة المجموع

والحقيقة دي كمان مش مصلحة مجموعة

ده ظن انه مصلحة مجموعة

الحق احق ان يتبع يا استاذ

الخبر بتاع غزستان ده جه على وكالات الانباء

الا اذا اعتبرت ان وكالات الانباء كفرة عشان مش اخوان مسلمين

هو طبعا الاخوان المسلمين على طول معاهم حق

حتى لما مجموعة من المنتسبين لهم تسيح دم الناس وتبقى طرف في حرب اهلية وتحاصر المستشفيات وتقتل الستات والاطفال والرجالة زي الاحتلال وزي عباس ودحلان

الحق مع الاخوان والاخوان مع الحق

اينما نولي طبعا

انت سندك ومعيارك ايه بالظبط

وللا الكيل بمكيالين ده بقى عادة مش عبادة

Anonymous said...

ميتو

ههههههههههههههه

حرام عليك اول مرة اضحك من ساعة المناظر الوسخة اللي شفتها في التلفزيون

حنتكلم

مش كده والنبي

قول للاخوة بقى عشان ما حدش مصدقني

Anonymous said...

آآآآه آآآه والف آآه
يا فلسطين الحبيبه يا اقصى الجريحة العين تدمع والقلب يحزن عليكوا وعلى ما اصابكم
يــاااااااااارب كن معاهم واحقن دمائهم ياااااااارب ولا تشمت بيهم عدو ياااااااااارب آمــــــــــين وانصرهم ياااااارب آمــــــــــين
ياااااارب لقد ضلوا فاهدايهم الى الطريق القويم ياااااارب آمــــــــين
وحسبنا الله ونعم الوكيل

Anonymous said...

إيه الهجص والكذب ده؟؟
وكالات انباء إيه اللي حضرتك بتبعيها؟؟
قبل ما ادخل لفت علي رويترز والجزيرة والعربية والحرة وسوا والقدس برس والBBCوالاسوشيتد برس
والمكتب الاعلامي لكتائب عز الدين القسام واسلام اون لاين والCNN

ولا وكالة او موقع من دول ذاكر الكلام الفارغ بتاعك ده

وعلي فكرة انا مش إخوان وده مش تنصل
بس انا بقه مش إخوان وبلاش اسلوب امن الدولة ده
حتي ديه فيها سربعة وقفز علي الحقائق

ما تحريجيني قدام الناس وتقولي جبتي الكلام ده منين؟؟؟؟؟؟

Anonymous said...

نوارة هانم أميرة المدونات.. انا كنت فاكر العنوان طعادتك عنوان طرقعة و خفة دم.. و حتى قلت ايه الراجل البحري الي دماغه مش صاحية مع البنت النغشة الي مخها صاحي دي. انما شكلك مصدقة ان في حاجة اسمها غزهستان .. من امتى يا نوارة البلوجات بنجري ورا اي خبر منشور في الاعلام؟ يا ست الكل دانتي استاذة في التفحيص و المحيص.. ميصحش و هنية اعلنها من اول يوم صريحة ان مفيش حاجة اسمها دولة في غزة و انهم بس بيطهروا غزة من العملاء و الخونة و الي دنسوا الأرض بجد.. الدواء المر يا نوارتنا و انا قلتهالك قبل كده حماس يا ما صبرت هية و ابطالها و الشعب الفلسطيني الحر على كمية ايذاء و خيانة تهد جبال... و انا نفسي كنت بقول ايه السلبية دي؟!! و أي شريف و دمه حر أكيد كان بيقول كده.. اسمحيلي هنا اقولك ان انتي الي بتكيلي مكيالين.. لأن حماس عمرها ما باعت و لا انبطحت.. و كانوا دايما على عهدنا بيهم قدر الاستطاعة أشراف.. أكيد مش ملايكة لأن مفيش على الأرض ملايكة ليهم أخطأهم و حسابتهم الي يمكن نتفق أو نختلف معاهم.. بس متقوليليش ان واحد هيزنقك في ركن و ينزل فيكي تلطيش يمين و شمال و انتي بتقوليلوا أخويا و حبيبي هات بوسة يا واد.. يديكي مطوة في جنبك و يسلمك لعدوك لقمة سايغة و انتي تقوليلوا وحشتني يا حمادة انت مبتجيش ليه؟ مش تبقى تيجي؟ ده بقة الي بجد اسمه الكيل بمكيالين..

سيف الدين عربي المصري

Anonymous said...

دا حتي وكالة وفا المحسوبة علي التيار الانقلابي مش ذكره ده
ولا حتي وكالة انباء الشرق الاوسط

إيه الثقة ديه كلها؟؟

Anonymous said...

اففففففففففففففففف

ما انتو لو قاعدين مصلوبين قدام الجزيرة زيي كده طول النهار وبتناموا عليها كنتوا سمعتوا الخبر العاجل

اللي نفاه بعد كده اسماعيل هنية اللي هو نفسه خلاص ما بقاش عارف يسيطر على عناصر حماس خالص

وقيادات الكتائب تطلع تصريحات وهو ينفيها كل شوية

وارجع اقول الحمد لله اننا ما عندناش ديمقراطية

ده اولا

ثانية انا ما اتهمتش حد انه اخوان

ده اذا كان الاخوان تهمة اساسا

وفعلا مافيش فايدة

وانا مش عايزة انتخابات حرة ولا ديمقراطية عشان اذا كان دي طريقة تفكير الناس وهم ع البر

لما يبقوا في البحر ح تبقى للركب

Anonymous said...

السيناريو الي جاي معروف و معد مسبقا.. أزمة مفتعلة.. و لم يتركوا لحماس أي خيار الا هذا الخيار... و بعدين ايه الي هيحصل .. تشكيل حكومة من الفتحاوية بس مش أي فتحاوية.. القطط السمينة و الوشوش العكرة الي بتعرف تبوس الصهاينة في بقها.. و حماس تشبع بغزة و اهل غزة يشبعوا بحماس .. جه الوقت الي يعرفوا فيه يربوا أهل غزة على وقفتهم مع حماس و المقاومة و صمودهم..

المساعدات هتنزل زي المطرة على الضفة الغربية و أي مكان في العملاء و الخونة .. و نشف زيت جوع و فقر و في غزة ..

و يورونا هيعملوا ايه بالاسلام هوة الحل و لاد الللللللاخوان المسلمين..
و زمان قالوا الفقر و الجوع يولد الكفر.. و لما أم مهما كان ايمانها بقضيتها تشوف ابنها جعان قدامها بيصرخ من الجوع و بيموت قدام عنيها سهل قوي تكفر بكل قيمة أو مبدأ..

و ادي يا امريكا في فلوس و مساعدات لفتح عباس و دحلان و ابو شباك و خلافه و دربي يا مصر في عناصر كلاب الامن الوقائي و سلحي يا اسرائيل

و زغرطي يالي منتيش غرمانة

حسبنا الله و نعم الوكيل
انتي عندك حق في حاجة واحدة بس هوة انه واضح انه في الأمد القريب مفيش فايدة لأن الحلقة مستحكمة قوي و غلابة قوي رجالة حماس لأنهم محاصرين ما بين عملاء في قلب دارهم و صهاينة محتلين و عالكم بتحكموا أمريكا بجبروتها و حدود ما يعلم بيها الا ربنا و حتى الأمة عشش فيها الجهل و اتخدعت بالميديا و صدقت ان حماس زيها زي فتح سفاحين و طالبي سلطة و لا مال و دي أكبر نكتة للأسف حتى انسانة محترمة و مثقفة زيك يا نوارة مصدقاها و ده بجد الي محزني... يعني اين المفر؟!!!!..
هما من كتر ايمانهم بالله بيقولوا هنفر الى الله و هو نعم المولى و نعم المصير..

هو نعم المولى و نعم النصير

سيف الدين عربي المصري

Anonymous said...

الخبر بتاع غزستان ده جه على وكالات الانباء

الا اذا اعتبرت ان وكالات الانباء كفرة عشان مش اخوان مسلمين

هو مش ده كلامك انتي؟؟؟؟؟

افففففففففففففففف
واخخخخخخخخخخخخخ
كمان

حتي لو بفرض ان ده اتنشر كخبر عاجل في الجزيرة وليس في وكالات الانباء وتم نفيه في الحال

تقومي تجري تكتبي بوست وتسيبي الناس تقرا الخبر المكذوب
منتهي الحرفية والموضوعية صراحة

Anonymous said...

هاهاهاهاهاهاهاهاهاهاه
و الله ضحكتيني يا ست الكل.... بقة هنية مش عارف يسيطر على عناصر حماس؟
و الله العظيم أكبر نكتة سمعتها في حياتي.. و مينفعش تطلع من انسانة مثقفة عارفة يعني ايه حماس
يعني اخوان مسلمين
يعني مدرسة الاخوان المسلمين
مينفعش يا ست الكل..
و الله أي عيل من الاشبال زي مبيسموهم الاخوان المسلمين هيضحك على الكلام بتاعك ده لو سمعو..
ده كان الله يرحموا الشيخ أحمد يس و هو شيخ قعيد صوته يادوب بيطلع ... وكان بيخر ليه أكبر شنب فيهم..

و قبل ماخد فجنابي مرسوم ملكي باني اخوان ... للأسف انا مش اخوان و فعلا هية مش تهمة بس هوة شرف لا أدعيه بس بحبهم زي مبحب كل الشرفة ولاد بلدي و أمتي الطيبين.. و عشان بقرا تاريخ كويس عارف مين الشريف و مين اللئيم..

مين الي بيتاجر بالشعارات و مستني فرصة يبيع فيها وياخد المقابل و مين الي حياتوا عندوا أرخص بكتير قوي من قيمو و مبادئه و ايمانه

Anonymous said...

ده اخر تعليق لي علي الموضوع

بالله عليكي يا نوارة تقري اول وتاني تعليق ليا علي البوست

ابوس ايدك انا مش ناقص وحالتي النفسية زبالة من اللي بيحصل

انا كل اللي طلبته منك فوق ان تتبيني

صعبة ديه؟؟
ربنا يهديكي من قلبي والله ويفتح مخك يارب

Anonymous said...

بالمناسبة هيطلع واحد يقول زي ما قالت الاخت "بلو" قبل كده انهم بيمثلوا بالجثث و بيتصوروا في الحمام و بيدوسوا على صورة عرفات و ابو مازن.. و برغم من ان كل دي تصرفات صبيانية.. و غلط أكيد بس متحكمش على جماعة...
بس ربك و الحق انا لو جه واحد صهيوني و خد بيتي و طردني و ضربني بالجزمة مش بالرصاص و جه جاري المسلم و ساعده و شجعه و اتعاون معاه و كل ماجي احفر حفرة عشان اطلع اقرص الي احتل بيتي في لباليب امه يقوله خلي بالك أو يطوع هوة و يضربني .. و انا بقوله عيب اختشي ميصحش.. و هوة و لا هوة هنا .. شغال فية عجن..

و انا عاقل و راجل كبير.. و فاهم اني لو انا و هوة مسكنا في بعض الصهيوني هيفرح و يزئطط انما تفتكروا هصبر لحد امتى؟ و لما اتمكن من رقبة امه هعمل فيه ايه؟
عايزين الحق دول يستاهلوا الي اكتر من كده.. كل الي باس جزم الصهاينة و لحس تراب رجلهم يستاهل اكتر من كده بكتير قوي..

و الاخت الي المرة الي فاتت قالت يا مجهول أو جاهل و مارست هواية الشتيمة و التجريح الي احنا العرب ابطالها.. و قالتلي الدم الفلسطيني خط أحمر و الأخ و أخوه .. أسف جدا جدا جدا لو أخويا ابن امي و ابويا باع وطنه و دينة و قضيته و عمل الي بيعملوه رجالة ابومازن و دحلان و ابوشباك و الرجوب و امثلهم هدبحوا بنفسي لأن هوة ده اقل ما يستحقه.. و سيدنا محمد عليه أفضل الصلاة و السلام قال لو ان فاطمة بنت محمد سرقت لقطعت يدها تفتكروا كان بيهزر؟..
كان في فيلم مصري كان محمد عبد العزيز بطله و كان خاين من سيناء ابوه اخر الفيلم دب الخنجر في بطنه بنفسه..

لأ يا ست البنات أخويا لا يهجم على مدرسة اسلامية و لا جامعة اسلامية و لا يعزب مقاوم و يسلمه لليصهاينة.. و لا يساعدهم في تفخيخ سيارتي و يدلهم على مكاني..
مه مش يتقتل ده يتحرق حي عشان يكون عبرة لمن لا يعتبر

سيف الاسلام عربي المصري

Anonymous said...

ولو اني عارفة انت مين يا سيف الاسلام المصري العربي

بس لو سمحت

خاف من ربنا قبل ما تكتب الكلام ده

وافتكر الناس البريئة اللي اتقتلت بايد فتح وحماس

والنبي احنا مش ح نقعد نطبل في المطبل

ومش بنشجع فرق كورة وبنحاول نلاقي لهم تبرير عشان متعاطفين مع الفريق ده وللا الفريق ده

ايا كانت الملابسات

انا باسألك سؤال سألتهولك قبل كده\

انت مسلم وللا مش مسلم؟

قتل النساء والاطفال حلال وللا حرام؟

التمثيل بالجثث حلال وللا حرام؟

المشاركة في فتنة بين الناس ولو بالرد حلال وللا حرام؟

تعرف امر الرسول: كن كأحد ابني آدم "لئن بسطت يدك الي لتقتلني ما انا بباسط يدي اليك لاقتلك" وللا لا

ولو كان حد تاني غير حماس - علماني مثلا - وعمل نفس التصرفات دي كان ده ح يبقى رأيك

وللا عشان دي حماس؟

وده برضه نفس السؤال اللي باسأله للناس اللي بتنكر ان حماس اتظلمت وبتتهمها بانها المعتدية

وبيبقوا ناس علمانيين

لو كانت حماس علمانية كان ده ح يبقى نفس موقفكوا

للاسف

للاسف

للاسف

رأيي في المعارضة المصرية بانها غير موضوعية وغير متسقة وغير مبدئية

سواء من اليسار او اليمين

سواء من العلمانيين او الاسلاميين

كل يوم بيتأكد

كان نفسي يطلع رأيي غلط

انا زهقت بقى ونفسي ربنا يرحمني من الدنيا دي

حاسة اني قعدت فيها كتير

Anonymous said...

الطبيعي انك تبقي مخنوقة ومتزاولة وكارهة نفسك
انتي تكرهي جبهة من جبهات المعارضة لما تناقض نفسها مين قال ان العلمانيين يرضوا بحكم اسلامي ويوم ما يوافقوا يبقو بيناقضوا نفسهم ومين اسلامي قال انة حيرضي بحكم مش اسلامي

بصي دم المسلم والانسان عامة حرمة كبيرة جدا
بس الهوان والخيانة اسوا بكتير
سيبيهم يتطهروا وينظموا نفسهم وياخدوا خط
افتكري ثورة في اي حتة في العالم من غير دم
عرب وتغيير يبقي لازم دم
ولو متخيلة ان المظاهرات والتجمعات والمدونات بتغير حاجة يبقي دماغك مش زي ما تخيلت
من غير دم مش حيحصل تغيير وقدرنا اننا وسط دة
لولا خيانة الاردن مكنش مات الزرقاوي ولولا خيانة دولنا مكنش دة يبقي حال الاسلاميين
حتي لو معترضين علي تصرفات شخص ان الخيانة تيجي من بلدة بتؤكد نظرية جهاد الداخل قبل جهاد الخارج
انهي عقل يقول يحاربوا اسرائيل وكل دية خيانة في الداخل
انا متابعتش تطور الاحداث لاني فعلا خلاص مفيش نفس لاي اخبار تاني
وحفضل شهر متبع نظرية الجهل نعمة والجاهل مرتاح يا ريت اقدر اكمل شهر

محدش يقول ان النساء او الاطفال او الشيوخ يموتوا
بس الخاين لازم يموت عشان ميخونش

مين بيحدد الخاين ؟؟؟؟
الاقوي وصاحب السلطة
اللي ملوش قوة يعيش عبد ومنطوي في البلد ويعمل اللي يتقالة انة يعملة
واللي ميقدرش ياخد حقة بايدة ميستاهلوش وميستاهلش انة يقرر قوانين

يا ترضي بحكم مبارك وحكم المالكي وحكم امريكا وحكم اسرائيل وتتعايشي معاة يتغيرية بالقوة وبالدم

ورغم كل دة لسة في امل ولسة في الف طاقة نور ولسة الناس بتحب بعض وبعد الخلاف بييجي التصالح وفي امل في بكرا جاي بالخير وبالتغيير وادينا عايشيين وسعداء بحياتنا وبلمة اهلينا وصحابنا وكفاية اننا عندنا امل عشان نكمل حياتنا
والعرب وفلسطين ومصر عدي عليها ايام اسوا من دية بكتير واسود منها الف مرة والحال اتحسن والايام دول

بعد اذنك راجعي نفسك تاني في مرجعيتك وحددي انتي عايزة شكل البلد عامل ازاي عشان يبقي ليكي خط تمشي علية

M.F.A

Anonymous said...

:)
ماشي يا ستي انتي عارفة انا مين؟
يبقى أنا مش عارف أنا مين..
لأ مش أنا الي انتي عارفه انو انا أصله مش أنا.. و هوة مظلوم و الله..:)
أيوة يا ستي أنا اسلامي الفكر و الهوى و الميزاج و لا أنتمي لأي فصيل بكل أسف.

ده تعريف بسيط و أسف ان كنت لسة مسجلتش في البلوج فخليتيك تظلمي معايا حد..

المهم ردا على سؤالك لأ غلط و ألف غلط اننا نشوه و نمثل بجثة.. و لما ضربتلك مثل كنت أقصد العامة.. صعب جدا انك تسيطر على العامة لما يتمكنوا من واحد هراهم ظلم و مرة تانية التاريخ بيقول كده مثلا الثورة الفرنسية أو الي حصل في الجنود الأمريكان في الصومال و الي بيحصل فيهم في العراق..
و بيني و بينك أهو شغل عامة و غلط و انا لو كنت مكانهم معملش كده..ده أنا!
بس أرجع و أقولك الخاين يستاهل أكتر من كده..

ده جزاء الخاين و العميل دايما و أبدا عند الفلسطينيين او نمور التاميل او بتوع اقليم الباسك.. و دول لا تأخدكم بيهم شفقة و لا رحمة.. دول باعوا الارضو العرض و الدم الفلسطيني الذكي و استحلوه و استباحوه..

انا بقة الي هسألك لو كان كلامي مفيهوش مسحة اسلامية و تعاطف مع التيار الاسلامي و لو كان كله كلام من منطلق قومي و بردوا قلت ان ده جزاء الي يلحس كعب جزمة الصهاينة و يبيع وطنه و شرفه و عرضه و ولاد بلده .. يا ترى كنت هتتحمقي كده؟

يــــــــا ناس يا هو حد يقولي جزاء الخاين و المتعاون مع المحتل ايه.. في أي قانون وضعي حتى؟!!!!
انسي الدين بقه و الاسلام طالما بيزعلك.
أي قانون وضعي..
و مفيش اصلا دولة في فلسطين ناس بتقاوم و هية محاصرة من كل ناحية و يطلعلها خاين خنجر في ضهرها تسيبوا؟
حد دخل الجيش يقول لبنوتتنا الحنينة ايه جزاء الجندي الي يعصى الأوامر في الحرب.. فما بالك بخاين بيتعاون مع العدو ..
ضربتلك مثل طويل عريض ببيتي و اولادي و جاري...
بس انتي حنينة
اه و الله حنينة قوي..
و أقسم بالله يا ست العلمانية انه لو انتي الي في الموقف ده و ولاديك الي الخاين ذلهم الذل ده لتقطعيه بسنانك.. و تكلي لحمه.. و لا بلاش انتي لا تقوليلي لأ و تكبسيني .. أي أم محروقة على ضناها..

الي حماس عملتوا ده تطهير .. زي الكحل لما ينزل على جرح.. و هيطلعلي فلحوص يقولي حماس عايزة السلطة!!! انهي سلطة؟ و تعمل بيها ايه؟ حماس أكبر خسران بالسلطة لو حسبناها بحسابات الدنيا. و حسابتكم.. و اتحدى حضرة الفلحوص انه يذكر اسم واحد بس من حماس ايده اتلطخت في عملية قذرة مع الصهاينة او سرق و مص دم الشعب الفلسطيني..
مع انهم بني أدمين و ممكن يكون فيهم الضعيف .. بس الحمد لله انه محصلش..
و لا واحد في مقابل لستة طويلة عريضة من مقبلي الأيادي و لاحسي كعوب أحذية الصهاينة من الوجوه الفتحاوية اياها..
انا هنا مش بتكلم عن شرفاء فتح و كتائب شهداء الأقصى.. أنا بتكلم عن وجوه كلنا عارفينها..

و بردو مردتيش على أخونا الي سألك لو العكس.. يا ماما العلمانية..
لو كانت حماس هية على السلطة و جت فتح كسبت الانتخبات و حماس عملت الي عملته فتح من اول المسلسل يا ترى كنتي هتقولي ايه؟ و كان هيكون موقفك ايه؟
الصورة واضحة .. حماس كسبانة في انتخبات حرة و بنسبة ساحقة.. و برغم كده بتشكل حكومة وحدة وطنية.. و كلاااااااااااااااااااب دا أقل وصف ممكن يطلق عليهم يتأمرا مع اسرائيل و أمريكا عليهم.. و نرجع نساوي ده بده؟
و الله هوة ده الظلم و اكبر ظلم يا ماما العلمانية..
حماس فضلت تحت نير حكم فتح و تعاونها مع الصهاينة اربعة عقود كاملة 40 سنة و لا عمرنا سمعنا ان حماس رفعت سلاح على فتح...
ايه؟
فجأة كده اتجننوا؟
و جالهم استبحس نفساوي؟
يا شيخة حرام عليكي..
لما تبقي انتي عقلانية و موضوعية ابقي اطلبي من غيرك انه يكون عقلاني و موضوعي.

سيف الاسلام عربي المصري

Anonymous said...

دي طبخة مترتب لها منذ مدة ووضعتها الادارة الامريكية على نار هادئة ونضجت وحان وقت اكلها

للاسف الشديد حماس صدقت لعبة الديمقراطية على الطريقة الامريكية واعتقدت انها ستستطيع خدمة شعبها الذي سأم اللصوص والخونة

ولكن كانت مصيدة لحماس وفخ وقعت فيه وتم استدراجها ليحصل ماحصل بمعاونة الخونة والعملاء بما فيهم الحكومة المصرية التي دربت كوادر من فتح على القتال وادخلت لهم السلاح بفلوس الامارات ومتابعة من امريكا

والآن اصبح لدينا حكومتين
واحدة في الضفة
والاخرى في غزة
واسرائيل قطعت المحروقات عن غزة تمهيدا لقتل ابناءها دفعة واحدة

كلنا مشتركون في هذه الجريمة
كلنا سنتفرج على ذبح الابرياء والعزل وكل ماسنفعله ان نستفغر الله العظيم ونتصعب عليهم ونقلب القناة الفضائية لمتابعة برنامج او اغنية على قناة أخرى


فليسقط الخونة والعملاء

http://afkaar-bella.blogspot.com/2007/06/blog-post_17.html

Anonymous said...

تقرير محايد على موقع الجزيرة يا ريت نقرى و نفكر قبل مانتكلم

http://www.aljazeera.net/NR/exeres/FA83742F-F633-4097-BFA4-94EA4D9761D0.htm

و بالله عليكم ادو الحتتين دول شوية
تركيز

" حماس اليوم ترى أن في مقابلها طرف يريد طردها من الحكومة تمهيداً للتنكيل بها وتمرير برنامج سياسي لا صلة له بالطموحات الفلسطينية، وهي تعلم أنه طرف مؤهل لفعل أي شيء، إذ تتذكر كيف حلق لحى زعمائها وعذبهم على نحو بشع في النصف الثاني من التسعينيات ووضع خيرة رجالها في السجون وأوقف بالقوة مسار المقاومة. "

احيات ابلة ظاظا يا أبلة العلمانية تكتبيلنا بلوجاية في الطئطوقة دي

و تقوليلي ميستهلوش؟ و الله الصبر الي حماس صبرتوا لحد ما يثور البركان ميصبروش لوح
عارفة اللوح؟

و السلام ختام

سيف الدين عربي المصري

Anonymous said...

آه وماله

لا بقى احنا نعلن حرب شاملة

على الشيعة الروافض
والمسيحيين عباد الصليب
والعلمانيين الملاحدة
والمتصوفة الضالين
والقوميين الوثنيين

ده طبعا بعد ما نخلص على الخونة
اللي هم كانوا محاصرين في المستشفيات

حاجة تقرفففففففففففففففففف

Anonymous said...

اسف اللينك مرة تانية
انا مضطر احطو على جزئين في سطرين

http://www.aljazeera.net/NR/exeres/
FA83742F-F633-4097-BFA4-94EA4D9761D0.htm

خدوه
copy
و
past
في ال
url

سيف الدين عربي المصري

Anonymous said...

ياقلبي ياكتاكت ياما انت شايل وساكت
خلص الكلام
:(

Anonymous said...

يا ست الكل لما تلاقي منطقق ضعيف و حجتك ضعيفة بلاش نقول اي كلام
مين جاب سيرة شيعة ولا مسيحيين و لا متصوفة
و ايه السمك لبن تمر هندي ده؟
مين جاب سيرة الناس الطيبين دول؟
و لا هوة اي كلام و فض مجالس؟
و نحبشها في الأخر بحتة
حاجة تقرفففففف

الخاين خاين من غير بقه ملة و لا دين و لا حزب

مش هخلص كل منتناقش في حاجة تروحي ناطة في كلام تاني خالص توهت انا منك خاص مالص يعني

اقولها خونة تقولي شيعة و مسيحين و متصوفة..

يلا ماهو أي كلام في الزيطة
و هيــــــــه هيــــــه
و بما انك فتحتي الكلام عن عيوب المعارضة العربية اسلامية كانت و لا علمانية فاحب أقولك انك بتمثلي أكبر عيب من عيوبها و هو عدم الاعتراف أبدا بالخطأ في التقدير و ضعف الحجة..
لأ هوة دايما احنا على حق و الي مش عجبو يبقى
يبقى برشوفي متمدد و عدو للمريخيين

و ده بردو أي كلام زي الأي كلام الي انتي بتقوليه عشان تشتتي انتباهنا بعيد عن أي منطق

و أدي كمان حاجة تقرف من عندي
لأ لأ لأ لأ لأ
مش هقول حاجة تقرف عشان انا اسلامي و انتي علمانية لازم نختلف زي مختلفنا في حكم الخاين

أنا هقول حاجة تفرس

حاجة تفرسسسسسسسسسس

سيف الدين عربي المصري

Anonymous said...

ههههههههههه

انا علمانية؟

والنبي انت عثل عثل

اقعد مع الاسلاميين يقولوا لي يا علمانية

اقعد مع العلمانيين يقولوا لي يا اسلامية

اقعد مع الليبراليين يقولوا لي يا قومجية

اقعد مع القوميين يقولوا لي يا ليبرالية

اقعد مع الوسخين يقولوا لي يا حنجورية

اقعد مع الحنجوريين يقولوا لي يا وسخة

عشان ما حدش عايز يبص لتياره بنظرة نقدية

عشان كل واحد عامل زي عسكري الامن المركزي

هم اللي قالوا كده واكيد هم بيفهموا

وعشان الناس ما بتفهمش يعني ايه الانسان ما يبقاش مصنف

Anonymous said...

لما الظواهري المصري يحاول انة يحول بلدة لاسلامية انتي معاة ولا ضدة
ولما واحد مصري يختار امريكا تغير بلدة انتي معاة ولا ضدة

مين صاحب البلد ومين تقولي انة من حقة يكسب حرب اهلية لو لا قدر الله حصلت

مينفعش تكوني مع الكل

مينفعش يكون انطباعك وحسن نيتك مع السني والشيعي والرافضي والعلماني واليهودي والمسيحي والملحد واللاديني والتكفيري لانهم متضادين وعمرهم ما حيتقابلوا ممكن يعيشوا في بلد واحدة علي عينا وراسنا لكن بقانون واسلوب حد فيهم

مين قال ان الديمقراطية ان كل واحد فيهم يمشي بقانونة وجيشة واسلوبة

مشكلة مصر ان دستورها وهيئة الدولة انها اسلامية ولكنها تتبع الاسلوب العلماني في الحكم فلا الاسلاميين راضيين ولا العلمانيين مرتاحين


يا تري لو مصر اتبعت الاسلوب العلماني قلبا وقالبا لبناء دولة قوية متطورة حتزعلي لما نفرض الاسلوب دة علي الاسلاميين بالقوة لاسكاتهم واكمال بناء الدولة التي تنتظروها وتتخيلوها وحتخاطري في مقابلها بقتل بعض المتخلفين الناظرين للخلف ولا حيكون رد فعلك انة لا ونقنع المعارضين بالنقاش والمظاهرات

M.F.A

Anonymous said...

ايه ده ايه ده ايه ده؟

ايه ده؟

ايه ده؟

حضرتك ما تسمعش عن حاجة اسمها تعايش

ما تسمعش عن حاجة اسمها مواطنة

ما تسمعش عن حاجة اسمها حقوق انسان

ما تسمعش عن حاجة اسمها حرية العقيدة

ما تسمعش عن حاجة اسمها تغيير سلمي

انا مؤمنة بقى بشوية الحاجات دي اللي اكيد مش عاجباك مدام بتقول لازم دم عشان التغيير

وواضح ان ح يبقى الدم للركب بعد التغيير كمان

يعني ايمن الظواهري دكتور وابن ناس وبيصعب عليا

لكن انا اول واحدة ح يشنقها لو لا قدر الله حكم البلد

عشان انا مش شايفة ان الطرح بتاعه ده طرح صحيح للاسلام
ومش ح ابلع لساني ومش ح اسكت على مفاهيمه الخاطئة ومش ح اتنقب كمان
فحتكون النتيجة اني ح اتقتل
بس حتى وهو بيقتلني ح يفضل صعبان عليا

ثم ايه دخل ايمن الظواهري في حماس

Anonymous said...

آه نسيت اقول لك

لو لا قدر الله قامت الحرب الاهلية المخطط لها في مصر

انا مش ح ابقى مع حد

انا ح اعمل زي ما الرسول امر في ايام الفتنة

ح اكون كأحد ابني آدم

يا اسلامي

Anonymous said...

:)
I Love Debates

Be optimistic..The Worst Is Coming

Anonymous said...

الأخ بحري وسيف الدين
الأخت نوارة
قرأت مداخلاتكم ولاحظت انكم لاتعرفون معنى ما يحدث فعلاً، يمكن أن يكون تشبيه نوارة لموضوع فريقي كرة القدم أقرب لطريقتكم في التفكير مهما حاولت نوارة الابتعاد عنه، فهي علمانية اسلامية قومية شيوعية امنية مهلبية مثلكما
لماذا
اولا حماس اعلنت منذ وصولها للسلطة انها تتبع نهج المقاومة وللعلم لم تطلق على اسرائيل رصاصة طوال حكمها إلا قليلاً التزاما باتفاق القاهرة في مارس قبل الماضي
ثانيا قبيل اتفاق مكة اعلن السيد خالد مشعل الذي تلقى علاجه من الصهيانية الذين حاولوا اغتياله في الأردن أنه يؤمن بأن اسرائيل ستبقى ولمحبى المتابعة مراجعة تصريحه لوكالة رويتر في 21 يناير الماضي
ثالثا: حماس كحركة مسلحة تخوض نضالا من أجل تقرير المصير سيكون مصيرها مثل فتح وغيرها من الحركات التي بدأت بالسلاح وانتهت للتفاوض وهذا ما سيحدث سرا أو علنا لتوفير البنزين والمياه والغذاء لسكان غرة، وطبعا لن تكون المفاوضات مع أبو مازن بل مع باراك واولمرت لضمان الأمن للحدود الجنوبية لاسرائيل
رابعا: بالطبع هناك انقسامات واضحة للعيان لمن يقرأ ويتابع وليس من يصدق أو يتوهم ما يريده، هناك فريق خالد مشعل مع الدكتور محمود الزهار الذي حظي بشهرته الواسعة خلال عمليات الطهارة التي كان يجريهامنذ منتصف الثمانيات وهناك فصيل يتزعمه السيد هنية الذي أصبح بلا حول ولاقوة سوى "الله" فهو غير قادر فعلاً على السيطرة على مايجري حيث يأخذ المسلحون أوامرمهم من الأمير خالد مشعل المقيم في سوريا الداعمة لحزب الله والمدعومة من ايران
كلمة أخيرة حول الديمقراطية طبعا اتمنى ان ارى في بلادنا ديمقراطية ولكن بلا سلاح فلا يعقل ان تقبل بقواعد الديمقراطية وفي يدك بطاقة انتخابية وفي الأخرى بندقية

Anonymous said...

الكلام اللى إتكتب فى التعليقات هنا
جاوبلى على سؤال كان محيرنى،
السؤال هوه إن واضح منذ زمن إن إسرائيل و أمريكا كل همهم إنهم يفرقوا و يزيدوا الهوة اللى بين الفلسطينيين و بعض، و افتكروا من اول لما إخترعواحاجة إسمها رئيس وزراء فلسطينى، علشان يحدوا من سلطات عرفات، لغاية الوقيعة بين حماس و فتح.
اللى كان محيرنى، إزاى إن كل الناس شايفة إن إسرائيل، اللى هوه العدو الأساسي بيوقع بينهم و هما بمنتهى الحماقة وقعوا فى بعض
التعليقات هنا، جاوبتلى على السؤال ده.

صحيح، على رأى نوارة، هوه والله يونس شلبى

Anonymous said...

الغاليه اوى نوارة دائما يا نوارة ما أتفق معكى فى الراى لكن هذة المرة أسمحيلى نختلف
تعليقى على إدراجك هتلاقيه عندى فى المدونة
سلامى دمتى بخير

Anonymous said...

وخلاص يا نواره
عليه العوض

Anonymous said...

اعتبر رئيس الوزراء الاسرائيلي ايهود اولمرت الذي توجه الاثنين 18-6-2007 إلى واشنطن في إطار زيارة لثلاثة ايام الى الولايات المتحدة, ان تشكيل حكومة فلسطينية جديدة معتدلة يمكن ان يتيح العودة الى المفاوضات تمهيدا للتوصل الى اتفاق سلام دائم مع اسرائيل.

ما طبعا دلوقت بعد خرابها وقعادهم على تلها ينفع إسرائيل تتافوض وتفرد شروطها وتدلدل رجليها كمان

Anonymous said...

الي الاخ متابع
مش عارف حضرتك متابع إيه بالظبط؟؟
يمكن حركة المرور!!!وكمان انا كنت مش ناوي اعلق تاني بس الكلام اتوجه لي شخصيا
اولا : التعليقات ديه مرتبطة ارتباط وثيق بالبوست السابق عن نفس الموضوع بعنوان الاشاويس في الحرب الاهلية

ثانيا : كلام حضرتك عبثي فلا يستحق الرد
مشعل اتعالج في اسرائيل وكلام اهبل مش فاضي صراحة ارد عليه

ثالثا : لو اي تيار علماني بيقود مقاومة واتعرض لخيانة قذرة وعمل اللي حماس عملته حكون اول واحد بيأيده

رابعا: حد فيكوا فاكر فيلم القلب الشجاع

اه بتاع ميل جيبسون

طيب حد فاكر مشاعره الشخصية لما وليم والاس بدأ يقتل في الخونة وعملاء الملك؟؟

طيب حد فاكر مشاعره لما راح يقابل ابو مازن اقصد الامير الاسكتلندي وكانت مؤامرة لاعتقاله؟؟

يا اخونا بس علشان انا مش متابع
في حاجة اسمها الخطة الامنية الامريكية
تم عرضها علي مصر واسرائيل والاردن

الكلام ده ممكن ترجعوله في رويترز والبي بي سي عربيا

وحماس رفضت الخطة ديه
تفاصيل الخطة إيه بقه؟؟
ها إيه؟

ويطلب الجدول الزمني من إسرائيل اتخاذ خطوات لتسهيل حركة الأشخاص والبضائع بين قطاع غزة والضفة الغربية المحتلة.

ويدعو الجدول الزمني الأمريكي قوات الأمن التابعة لعباس إلى تشكيل "خلايا تنسيقية مشتركة" مع القوات الإسرائيلية والفلسطينية بحلول الأول من يونيو لتعزيز الأمن على الحدود المصرية.

وبحلول 15 يونيو سينشر عباس قواته على الحدود من معبر حدودي إسرائيلي رئيسي إلى ساحل البحر المتوسط لوقف تهريب الأسلحة وتدمير الأنفاق التي يستخدمها النشطاء، بحسب رويترز.

وبموجب الجدول الزمني الأمريكي سيطور مستشار عباس للأمن القومي محمد دحلان (وهو عدو لدود لحماس) خطة لمنع الهجمات الصاروخية على إسرائيل وبدء عمليات نشر بحلول 21 يونيو

وخدين بالكم من التواريخ؟؟
طب اربطوا التواريخ ديه ببدأ المواجهات الاخيرة

بالنسبة لأسئلة نوارة

قتل الاطفال والنساء والتمثيل بالجثث حرام

بس امتي ده حصل؟؟

اللي حصل ان تم تنفيذ قتل سميح المدهون والمتابعين يعرفون من هو سميح المدهون امام الناس وامام الكاميرات
وده غلط وانا لا اقره

لكن لم يحدث لا قتل للأطفال ولا النساء إطلاقا

تم بعد الاستيلاء علي المقر الرئاسي رفع علم حماس والقاء صور ابو مازن وعرفات في الارض

هذا أيضا تصرف صبياني واهبل ومالوش لازمة وانا ادينه ولا أقره

خالد مشعل نفسه ادانه ووجه رسالة لكتائب القسام بإنزال علم حماس ورفع علم فلسطين

في اليوم التالي اللي هو الجمعة
افرجت حماس عن 9 من قادة الافرع الامنية وتوالت الافراجات بعدها

من الاخر

الموضوع بالنسبة لحماس كان معركة وجود فعلا مش حرب اهلية وكان في تنسيق مع بعض الفصائل بما فيها سرفاء فتح الذين رفضوا الدخول في المعركة ومنهم احمد حلس

اصل الموضوع والقواعد العامة ده شيئ
وبعض الممارسات التي تمت واسترجعت فيها حماس شيئ أخر

لا حماس ولا الاخوان دول ملائكة ولا قدسية لأحد ومنهم ناس ولاد ستين كلب ومنهم افقين ومتاجرين بالدين ومصلحجية
ومنهم ناس فاهمين غلط ومتشددين

منهم اه كلهم لا

Anonymous said...

حقك عليا يا حسنى مبارك يا ريسنا ُيا حامينا‘ أوعوا حد يقولى تانى ديموقراطيه والكلام الفارغ ده‘ومرحبا بتزوير الأنتخاباتوتصوروا أنتم وصلتونى لدرجه انى ممكن والله أقول مرحبا بجمال مبارك؛يالالالالالالالالالالالالالالالاهوى هيا وصلت لدم وزرقاوى وأيمن الظواهرى، واللى مش عاجبنا ندبحه زى الفراخ وأحنا ضميرنا مستريح؟فلتسقط الديمقراطيه والأنتخابات النزيه ليحيا الأستبداد والفساد

Anonymous said...

عودا علي بدأ
الاستاذة نوارة
بداية الاشتباك كانت مناشدتي ان تتريسي قليلا قبل بدأ المأتم
وقلت لكي لعل الايام القادمة نفهم أشياء لم نكن ندركها
وفي قصة سيدنا داود مثل وعبرة

هذا يا سبدتي كلام شرفاء فتح في غزة في المؤتمر الصحفي الذي عقدوه أمس نقلا عن المركز الاعلامي الفلسطيني

دعت عدد من قادة وكوادر حركة "فتح" في قطاع غزة، خلال مؤتمر صحفي عقدوه ليل الأحد (17/6)، إلى تشكيل محكمة ثورية لعضو الحركة النائب محمد دحلان، والذي يشار إليه باعتباره قائد التيار الانقلابي في حركة "فتح".

وطالبت القيادات والكوادر بإجراء "محاكمة ثورية للرموز الذين تسببوا بتدمير حركة فتح في غزة وعلى رأسهم محمد دحلان عضو المجلس التشريعي عن فتح وإيقاع أقصى العقوبات في حقه".

وناشد حسام عدوان، الذي تحدث في مؤتمر صحفي، القيادي البارز في "فتح" وأمين سرها السابق في القطاع أحمد حلس القيام بأخذ زمام المبادرة، وأن يبدأ الإجراءات الفورية لحماية قواعد الحركة والبدء بتشكيل لجان الطوارئ للتعامل مع القضايا والأزمات التي تمر بها فتح.

وحذّر عدوان من خطورة قيام "التيار نفسه" بممارسة الأعمال ذاتها في الضفة الغربية، داعياً حركة "فتح" هناك بإيقافهم وطردهم قبل فوات الأوان، حسب البيان.

وأكد الكوادر في "فتح"، الذين كان من ضمنهم علاء طافش وأبو الوليد الجعبري من قادة "كتائب شهداء الأقصى"، ويوسف عيسي أمين سر "فتح" في المنطقة الوسطى على أن مقاومة الاحتلال هي الثابت الوحيد في حياة الشعب الفلسطيني.


وهذا أيضا كلام ناهض الريس وزير العدل السابق وعضو المجلس الثوري في حركة "فتح
"إن الشعب والتاريخ الفلسطيني مدينان لكتائب القسام، والصنيع الذي أهدته للشعب العربي الفلسطيني، يعد صنيع تاريخي إنقاذي، والسبب أن تركيبة السلطة بلغت في السنوات الأخيرة من الفساد مبلغاً يبعث على اليأس".

وهذا كلام أنور رجا عضو المكتب السياسي ومسئول الإعلام المركزي في الجبهة الشعبية لتحرير فلسطين

أنَّ حركة حماس أنقذت غزة من حرب أهلية وأنها لو لم تقم بخطوة الحسم الميداني في قطاع غزة؛ فإنَّ الأمور في القطاع كانت تسير بشكلٍ متسارعٍ نحو حرب أهلية واسعة النطاق؛ وذلك بالنظر إلى الاستعدادات وعمليات التحشيد والتجييش التي يقوم بها التيار الانقلابي المدعوم صهيونيًّا وأمريكيًّا.

موضحًا أنه على الرغم من المرونة الكبيرة التي أبدتها حركة "حماس" خلال الحوارات التي جرت بينها وبين رئاسة السلطة وحركة فتح على مدار العامين الماضيين في القاهرة ودمشق ومكَّة المكرمة؛ إلاّ أنَّ كل جولة حوار كانت تعقبها عمليات انفلات أمني وفوضى من قبل التيار الانقلابي ودائمًا بوتائر أعلى وأكثر خطورةً، وكانت تلك العمليات تنقل الساحة الفلسطينية في كل مرة إلى مرحلة أكثر تعقيدًا وأشد قسوةً على أبناء شعبنا.

ملحوظة صغيرة جدا
انا مليش اي دعوة بالاخ اللي بيتكلم عن الظواهري والزرقاوي ده

هذا للتوضيح

Anonymous said...

تعايش مواطنة حقوق انسان وكمان حرية العقيدة
طبعا سمعت
انا الحمد لله مسلم وبعرف اقرا فاكيد سمعت عن الحاجات دية

تغيير سلمي دة سمعت عنة وقرات عنة لكن للاسف غير مقتنع بوجودة في الدول العربية
مصيبة لتكوني مقتنعة بوجودة لان دة بيتعارض مع اي ايدلوجية اسلامية او حتي علمانية للحكم في الدول العربية

انا ضربت المثل بامريكا والظواهري لانهم اكتر ما يخشاهم الاسلاميين وغيرهم

انا خايف بوجة نظرك الجميلة المتسامحة دية في وقت حرب تطالبي بحرية التعاون مع العدو وحرمة الدم المسلم حتي لو بيساعد المحتل وبيقتل بني الوطن والدين ومش بعيد تعملي مظاهرة تطالبي بعدم رفع السلاح في وجة المحتل لان منظر الدم مش حلو

اسالي اي عيل صغير لما يكون في سلة تفاح فيها تفاحة بايظة بنعمل فيها اية ؟

مفيش حد بيحب منظر الدم ولا انة يقتل او يتقتل بس في اوقات كتير بيبقي كتب عليكم القتال وهو كرة لكم

M.F.A

Anonymous said...

انا طلعت برة موضوع النقاش الاصلي انا اسف بس نوارة استفزتني شوية في ردودها
عموما انا ضربت مثال بامريكا لانها اكثر ما يخشاة المسلمين وضربت مثال بالظواهري لانة اكثر ما يخشاة غيرهم

مش عارف جبتم منين اني بدافع عن احدهم

عموما نوارة لو دلتي مداخلاتي تبقي مشكوووووورة وعملتي فيا واجب كبير

كمان انا بكتب امضائي تحت فباين انك ملكش دعوة بيا

M.F.A

Anonymous said...

يا اخواننا حماس و للا فتح و للا الجن الأزرق ... لازم تفتحوا عنيكوا و تشوفوا الحقيقة المرة (بضم الميم):
اسرائيل بتحتفل كل سنة بانشاء أقوى دولة في الشرق الاوسط و احنا بنحتفل بذكرى النكبة!
هما بينجزوا و احنا بنقتل نفسنا ...
و الجديد انه بايدينا ...
حماس وصلوا للسلطة بالانتخابات الحرة و اختيار الشعب .... و بعد 18 شهر من الجوع .... نفس الشعب بيضرب نفسه ميت صرمة قديمة على اختياره.
فلسطين و أي دولة تانية موش في فراغ و الدنيا كلها ليها رأي في الاختيارات موش بس الشعب ...
الانعزال و التجويع اللي حتشوفه غزة (و الله بقولها و أنا بأتقطع) بسبب حماس و اللي حيطول كل فرد فيها حيخللي الفلسطينيين يضجوا من حماس و المقاومة.
الدول العربية و الغربية و كل الناس التانية حيحاصروا غزة تماما ....
هل مكتوب على الشعب الفلسطيني يموت من الجوع؟
السياسة ما هياش فتونة و البراجماتية لازمة علشان نوصل للأهداف القريبة و البعيدة ....
موش بطريقة فتح الحرامية ... بس لسة فيه ناس شرفاء زي مصطفى البرغوتي و غيره
اللي حصل رسالة للاخوان في مصر و لكل التيار الاسلامي


و ما تفرقشي سواء سموها غزهستان و للا لأ ..... النتيجة واحدة
حماس وصلت للسلطة و اتحرقت لأنهم أغبياء و شوية ينقسموا على نفسهم و شوية يصعدوا المواجهات و في النهاية كرسي كبير في الكلوب اللي اسمه فلسطين و تعالي يا اسرائيل خلصي على اللي فاضل!!!!

و تحياتي للجميع

محمد الريس

Anonymous said...

الدور الدور الدور الدور موعودة يلي عليكي الدور

Anonymous said...

الاخوة الاعزاء

بصوا تعليق احمد المصري...اهو لخص اللي عايزة اقوله

تحياتي يا استاذ احمد

Anonymous said...

طب أيه رأيكم يا حلويين با بتوع حماس فى البرغوتى ؟هوا كمان عميل؟ أهو من شويه أدان حركه حماس وحركتها الأنقلابيه.ودلوقتى أسرائيل هاتحاصر حماس وتمنع عنها الهواوفى نفس الوقت الأتحاد الأوروبى وأمريكا وحتى أسرائيل هتدعم فتح.وفى الآخربعد تجويع وترويع الفلسطينيين الغلابه هترجع يابو زيد وكأنك لارحت ولا جيت وهترجع ريما لعادتهاالأديمه والصياعه أدب مش هز أكتاف.............................وعلى فكره برضه يا حلويين كل الجرائم والحروب والمذابح اللى بتحصل على مر التاريخ بيكون وراها ناس بتفكر زيكم وليهم نفس منطق أراقه الدماء من أجل تحقيق العدلوسلمولى على السنه والشيعه فى العراقوأحلى سلالالالالالالالالالالالالام للأسلاميين المجاهديين وأهديهم أغنيه ولا زمان ياسلالالالالالالاحى

Anonymous said...

believer

شفت الست شفت الست

وش بيغمز

Anonymous said...

أختي العزيزة نوارة البلوجات.. يا غير مصنفة ;)
يا ست الكل مش عارف و الله ان كانت دي محتاجة شرح لواحدة زيك ماشاء الله متدحرجة و راضعة سياسة..
بس و ماله لما نأكد ع المعلومة:
أنا كمان على كده بردو مش مصنف
عشان بقعد مع الاسلاميين السلفية بيشوفوني مارق و مخالف للاجماع..
و مع الليبراليين بيشوفوني متزمت أو يساري أو ناصري.
و مع الي يساريين و الناصرين بلاقي نفسي زرقاوي من غير عمة..
بس ده كلام سطحي قوي يا ست الكل أنا كنت صريح مع نفسي و صنفت نفسي.. لأنه المسألة مش لوغريتمات. و مع اني لا أنتمي و مرة تانية بكل أسف لكل حركة سياسية معارضة للفساد فعالة في الشارع المصري. الا اني عارف اني اسلامي "و الي هوة عكسه في الفكر مع كامل احترامي العلماني"
و ليه انا اسلامي؟
لأني مؤمن ان الاسلام هو الحل و ان الاسلام منهاج حياة شريعة و دستور و دين و دنيا و سياسة و اقتصاد و رياضة و فن و أخلاق و روحانيات و ماديات منهاج متكامل.. و شايف انه مش بس الخلاص لمصر و لا للعرب انما للبشرية كلها بس أبقى اسلامي ولا لأ؟ ابقى اسلامي.. و لو أنا مكنتش مؤمن بالكلام ده أبقى علماني "و دي مش شتيمة " أنا حر و أنتي حرة..
شوفتي سهلة ازاي؟ اسألي نفسك الكام سؤال دول و قوليلنا اذا سمحتيلي.
تبقي اسلامية و لا علمانية؟
أكيد مسلمة و على عيني و راسي و حسابي و حسابك عند ربنا و يمكن عند ربنا ضفرك برقبتي بس أنا بتكلم حاليا في منهج و دي حاجة و دي حاجة عشان محدش يفهمني غلط.
و جوه الاتجاه الاسلامي فيه تصنيفات و جوه العلمانية في كمان تصنيفات و انا و انتي أحرار بقه نتصنف أو نسيب أمن الدولة يلبسنا تصنيف على مزاجه.
;)
يعني و لا مؤخذة يساري ناصري شيوعي ليبرالي محافظ كل دي تصنيفات تندرج تحت بند علماني.
زي ما اخوانجي أو وسطي و سلفي و وهابي و جهادي و خلافه تصنيفات و درجات متفاوتة للاسلاميين.
أرجو ان المعلومة تكون وصلت يا ست البنات.

و ردا على الخ العزيز الي بيقول ان البراجماتية هي الحل و برغم من انه تكلف عناء شديد في انه يدلل على كلامه ببضاعة غثة و رخيصة قوي و معظمها على أقل تقدير لا يقوم عليه دليل محترم.
بس هقوله اذا كنا انا و انت و اي عربي هيتبع البراجماتية وسيلة يبقى معلش اجري العب مع الأسد أسهلك.. هنخسر هنخسر.
عملها عمنا الكبير عرفات و مشي على خطى أستاذه السادات و أدي حالنا.. تنازلات متتالية و انبطاح و مذلة مفيش بعدها.. لأ فيه.. لسة الي جاي أسود...
و على رأي اللنبي الي يفرط في ساعته يعني يفرط في اي حاجة تانية..
و كلامك أنا أسف جدا ينطوي على جهل شديد جدا بالمنهج الاسلامي الي حماس ماشية عليه و هو المنهج الوسطي الي معروف بيه فصائل الاخوان المسلمين في كل الأقطار و مفيش في المنهج ده براجماتية و لا في باب اسمه الغاية تبرر الوسيلة. ممكن يتفاوضوا مع الصهاينة و يهادنوا و ممكن يقبلوا باتفاقية مجحفة قياسا على ما فعله سيدنا رسول الله صلى الله عليه وسلم مع الكفار و أعداء الاسلام في بداية عهد النبوة لكنهم لا يمكن هيعترفوا أو يقدموا تنازلات هما تتناقض مع الأساس الي بيقوموا عليه كحركة اسلامية مقاومة. و ده الفرق الكبير بين الاسلامي و القومي.. القومي مهما كان عنده مبدأ أسهل بكتير انه يضحي بيه على طريقة راقصة الاستريبتيز كما فعل عرفات من قبل لأن المبايء عنده نسبية و مرحلية و أسهل بكتير قوي انه يتم اغوائه و كلنا عارفين الكحرتة الي اتكحرتها عرفات في اواخر سنواته و جوازه من سكرتيرته الحسناء سها و الملايين و النعيم الي هية فيه في فرنسا. و مش عايزين نظلم الراجل مش لوحده يعني كل أباطرة فتح ساروا على الطريق و علاقاتهم بالصهاينة و الكيان الصهيوني المسمى اسرائيل من النوع الي بنسميه بلغتنا الجميلة خيار استراتيجي.

أما الاسلامي فالمسألة عنده عقيده! و الفرق كبير قوي فان لم يكن شبه مستحيل الا انه في منتهى الصعوبة ان الاسلامي يبيع لأني دي عنده اسمها حرمات.

و التاريخ كمان بيقول كده و حتى القريب منه... فيظل التيار الاسلامي مستمر لا يندثر مثلا كالاخوان المسلمين بينما في نفس الوقت تتلاشى قوى و أفكار أخرى كانت ليها شنة و رنة خلال نفس العقود و ربما حتى بدأت في عقود تالية مثل الناصرية و اليسارية و الشيوعية..

و السلام ختام
أخوكم

سيف الدين عربي المصري

Anonymous said...

رغم اختلافي مع طريقة النقاش التي جرت هنا

لأنها صورة مصغرة مما يجري هناك ( في فلسطين )!!!

من تصنيف لأفكارنا واتهامات بالعمالة متبادلة , مع قليل مع الزيت والوقود , أعتقد أن الأمور هنا كانت ستعالج بعد قليل بالكلاشنيكوف ومدافع الأر بي جى !!!

رغم كل هذا لا أجد في نفسي الجرأة الا على القول بأن الشرعية ستصبح هي المعيار الأخير والأوحد لجدوى تلك الأفعال تاريخياً

بمعنى أنني رغم إختلافي مع بعض ما قامت به حماس من تصعيد للأحداث

وإختلافي كليةً طبعاً على إنقلاب فتح على شرعية حماس والتضييق عليها بالاستعانة بالعدو المشترك لهما

إلا أنني أجد في النهاية أن التاريخ سيقر بشرعية حماس ومشروعية دفاعها عن إدارتها للحكم الذي دعتها اليها ارادة الناخبين

كما أخالفك لعدولك عن فكرة الديمقراطية لمجرد ظهور تطبيق خاطئ لها

وتذكري يا نوارة

أن التطبيق الخاطئ لأي فكرة لا يدين الفكرة نفسها , خاصة لو كانت فكرة قد اتفق الجميع على جدواها

وإلا فلا تنسي أن اوروبا ما كان لها ان تطبق الديمقراطية بعد أن أتت إرادة الناخبين يوماً ما بهتلر !!!

تحياتي لقلمك الحر

Anonymous said...

اه حماستان وفتح لاند بيحاربوا بعض ,,وبقي عندنا دوتين فلسطنتين مش واحده!

تحياي

Anonymous said...

هاهاهاهاها

احسن يا نوارة وقعتى فى ايد اللى مش بيرحموا

ههههههههههههههههههه

و كمان بيقولولك يا علمانية

هههههههههههههههههههههه


يا دين امى على الخرف

و الله يا بنتى انا لو منك ما كنت استحملت كل المناهدة دى

Anonymous said...

الاخت العزيزة نوارة

برضه في ناس دخلت في النص ومتعرفش الموضوع من اوله

برضه في ناس دخلت بينا في مواضيع بعيد تماما عن الموضوع الاصلي

وبرضه في ناس مش عايز اقول بتصدات في الميه العكره

للمرة المليون وبكل ادب وبدون كلاشينكوف ولا يجزنون

فتح تيار وطني وشركاء حماس في المقاومة

هذا التيار الوطني تم اختراقه من الامريكان واليهود عن طريق ناس وسخة جدا انتي عارفاهم كويس وهما لا ينكروا ذلك

هناك حاليا تيار اصلاحي في حركة فتح ولكن للأسف حتي الان هذا التيار تأثيره ضعيف

الحاجة التانية الهامة
بذور الفتنة ترجع منذ فوز حماس بإنتخابات نزيهة ب75% من اصوات الفلسطنين وبداية الحرب علي الشرعية الشعبية

النقطة الثالثة ان المواجهات الاخيرة جاءت كعلاج اخير ودفاع عن وجود وليس كترف واستعراض

النقطة الرابعة : اني اخذت عليكي وعلي بعض المعلقين التسرع والسربعة في اطلاق احكام قبل اتضاح الامور وذكر كلام لم يحدث

النقطة الخامسة : بعض شباب حماس وقع في عدة أخطاء اعترافوا بيها وحاولوا إصلاحها

النقطة الخامسة : لا القضية انتهت ولا احنا خلصنا وفلسطين لا هي حماس ولا فتح

النقطة السادسة : الرئيس المنتخب من الناس هو محمود عباس - رغم كرهي الشديد له _ والقطاع وغزة ملك لكل الفلسطينين

النقطة السابعة : الحكومة المنتخبة من الناس هي حكومة هنية ولا يوجد في القانون ولا الدستور شيئ اسمه حكومة طوارئ وهذا غير شرعي وغير قانوني

النقطة الثامنة : علي كل الاطراف بما في ذلك احنا ان نجبر الكسر الذي حدث ولا نكون كالمرجفون في المدينة ونفكر في حلول عملية

النقطة الاخيرة : لو إني أخطأت في حق أحد أو احتدت علي أحد في أي تعليق لي سابق فأنا أسف جدا وحسبي اني حاولت ان اوضح بعض من جوانب الموضوع

رجاء خاص ليكي يا نوارة
يا ريت تحاولي تشهادي حوار الدكتور سليم العوا أمس مع عمرو أديب في القاهرة اليوم

وأيضا كلام ناهض الريس
وزير العدل الفلسطيني السابق، وعضوالمجلس الثوري في حركة "فتح
بتاريخ 18 / 6/ 2007
إن الإخوة الذين تولوا المعركة في يوم الأربعاء ويوم الخميس الماضيين المجيدين قد وضعوا حدا لمشروع كامل، وأوقفوا السقوط المحتوم لشعب كامل في مستنقع الفساد وحكم المافيات والأيلولة فريسة سهلة ولقمة سائغة للعدو".

وتابع: "على الجميع أن يعلموا خاصة الإخوة الذين كسبوا المعركة، أن إخوتهم الذين لم يقاتلوهم، وإنما تركوا مواقعهم أو سلموها لهم لم يفعلوا ذلك عن جبن، وإنما هم شركاؤهم في الانتصار الذي أحرزه الشعب بأسره، وقد امتنعوا عن القتال، لأنهم لم يقتنعوا لا بسبب قتالهم ولا بقياداتهم، ولكن ميزوا بين ما يستحق القتال وبين ما لا يستحق، وكان ذلك معنى من معاني الإلهام الإلهي ليكون الباطل زهوقا كما في الكتاب العزيز".

Anonymous said...

جيمي هود شمتان فيا

هي بقت كده؟

ماشي

وانا كمان شمتانة في بحري

واظن هو عارف ليه

:)

Anonymous said...

صاحب البوابة

صح

الحوار ده تصغير للحرب الاهلية في فلسطين

عشان كده باقول الحمد لله اننا ما عندناش ديمقراطية

وعشان كده مجهول دخل يقول: حقك عليا يا مبارك