بشوي والعوا يتحديان الملل

عثل يا اخواتي عثل

انا خلاص كده مش حاعرف اعيش من غيرهم هم الاتنين، حاعمل ايه دلوقت؟ ده انا باصحى كل يوم ادور على تصريحاتهم، بالذات تصريحات بشوي، جميلة جميلة

اولا العوا قال الكلام اللي قلته لصحفية الشروق ما كانش للنشر ههههههههههههههههههههههههههههههه اما بت غلسة صحيح، الراجل بينم معاها ويتفك معاها بكلمتين تقوم تنشرهم؟ وقال ان الناس فهمته غلط في حوار الجزيرة

هو عموما في حوار الجزيرة فعلا كان مثير لكن ما قالش نصا الكنيسة فيها سلاح، عملها كأنها تساؤل، بس تساؤل منيل طبعا، لكن حطها في شكل تساؤل

فالراجل يعني ما كانش بيتهم الكنيسة بامتلاك سلاح، ده كان بيسأل بيسأل.. هو السؤال حرم؟ ياباي عليكم.. قاعدين على الساقطة واللاقطة كده؟ بس تاني مرة ما تنمش مع حد ما تعرفوش على حد مش موجود، عاجبك كده؟ اهي الصحفية نقلت لهم الكلام وبقت بوليكة، عامل زيي والله، كل ما اتكلم على حد من وراه اتلفت الاقيه واقف ورايا وسمع كل حاجة هههههههههه ربنا بيعاقبني، عشان كده حرمت وبقيت اقول كل حاجة في وش كل الناس

واتضح برضه ان الناس فهمت بشوي غلط

ده حتى بيدافع عن الاسلام في المجمع الكنسي وبيقول لهم ماحدش يغلط في الاسلام والمسلمين، مهما كان دول عشرة عمرنا وابو ولادنا، والصحافة هي المسئولة، هي اللي فهمت غلط، لان الحوار كان هادئ، يبقى ازاي الحوار هادئ وهجوم على الاسلام؟ 

صحيح، الراجل عمر ما الواحد سمع حسه بيزعق ولا حتى بينادي على بتاع القوطة من البلكونة، يبقى ليه تقولوا على الحوار الهادئ اللي صوته واطي انه هجوم يا كفرة يا كفرة

طب ايه؟ اتصالحتوا كده يا شباب؟ ولا حتعملوا حاجة تاني؟

لا حتوحشوني، اوعوا تغيبوا، انا صحيح كنت قلقانة من الفتنة بس بعد شوية ادمنتكوا، مش عارفة مين حيسليني بقى بعد ما تمشوا

ممكن تعملوا تشانل على اليوتيوب وتقولوا فيه الكلام بتاعكوا عشان نتسلى وننبسط؟