امال الخناقة كانت على ايه؟

د. العوا بيقول عندي معلومات ان كاميليا لم تسلم ابدا

والبابا شنودة بيقول كاميليا ما اسملتش

خلاص مصدرين موثوقين بالنسبة للطرفين بيأكدوا ان كاميليا يا عيني عليها لم تسلم

امال الخناقة كانت على ايه؟

الخناقة شخصية، بين العوا والبابا

طب واحنا مالنا؟ خبطوا في بعض هم الاتنين

طب واحنا ذنبنا ايه؟ 

نعزمهم على الغدا ونصلح بينهم

بس انا كاميليا دي صعبانة عليا.. متجوزة راجل واضح انه حاجة صعب خالص، والدليل رد فعله على غيابها، قوم مظاهرات، اللي يجنن بلد مش حيعرف يجنن مراته

راحت يا قلب امها اخدت في وشها وقعدت عند قريبتها

قام قالوا لها انت طفشانك من البيت عمل فتنة طائفية وفيه مظاهرات في الكنيسة

قامت رجعت 

قام قامت مظاهرات تاني لما رجعت

قام قالوا لها رجوعك للبيت عمل فتنة طائفية، طلعي شريط خليهم يسكتوا

قامت يا قلب امها طلعت شريط عشان يسكتوا

قام عملوا مظاهرات تالت

بس كله خير يا كاميليا، كله خير يا حبيبتي، شوفي ربنا عمل كده عشان يرضيك بعيشتك، انت طفشتي من جوزك عشان مجنون، قام ربنا عمل ده كله عشان يثبت لك ان البلد كلها مجنونة.. ما تزعليش بقى، هو ده الصنف المطروح في الاسواق ارضي بقى بنصيبك يا بنتي وربي ابنك,,, حنعمل ايه؟ ادي الله وادي حكمته

يعني جوزها المجنون ده، ما كانش عارف يتصل بقرايبها قبل ما يقدم بلاغ ويقول المسلمين خطفوا مراتي؟ ما كانش عارف حتى يلف عليهم في البيوت بدل ما يعمل مصيبة؟ والبنية يا قلبي اتبهدلت، وناس قعدت تمقق في صورها، وفي وشها وبقت فضيحة بجلاجل

معلش يا بنتي، معلش يا حبيبتي.. نصيبك.. ومش نصيبك لوحدك، ده نصيبنا كلنا

دلوقت الخناقة شخصية ما بين البابا والدكتور العوا

لا البابا عايز يعترف ان مظاهرات الكنيسة غلط بينما متضايق من مظاهرات الجوامع

ولا العوا عايز يعترف انه مالوش حق يقول الكنيسة فيها سلاح

ومتضايقين من بعض، طب احنا مالناش صالح بالخناقة دي

صلوا ع النبي بقى انتوا الاتنين، موسى نبي عيسى نبي محمد نبي، او اتخانقوا، بس احنا مالناش فيه

فين بقى ابو يحيى وابو محمد اللي طلعوا زي الخوازيق دول؟ حد يقبض عليهم ويعلقهم من ودانهم

الغريبة ان د. العوا والبابا شنودة متفقين في الآتي:

حوار الاديان لا يكون في الصحافة، والهدف منه التفاهم لا اشعال الفتن

يجب على الطرفين احترام عقيدة الاخر

والعوا قال باللفظ: لا المسيحي يقول لي انكار الصلب ضد عقيدتي ولا المسلم يفضل يكرر على المسيحي انجيلك محرف انجيلك محرف

كاميليا ما اسلمتش

ما فيش داعي للغط اللي حصل

المسلمين والمسيحيين يجب ان يتعايشوا ومافيش عندهم خيار تاني

العيش واحد حاجة والدين في القلب

طيب متخانقين على ايه؟ لما متفقين في كل النقاط دي؟ متخانقين على ايه؟ 

متخانقييييين على ايييييييييييييييييييييييييييييييييييه؟

واحنا ذنبنا ايه؟