انا مش ضيفة يا بشوي، ومش حاشتري غير من المسيحيين يا جبهة العملاء

تحديث:
رد سليم العوا، انا لسه باتفرج، لسه في الجزء التاني، بس مهم تشوفوه
الا صحيح ايه موضوع الاستشهاد ده اللي كل شوية بشوي يقولها دي، مافيش حد يحاكمه على الكلام ده؟ او يعالجه؟










لو اي حاجة حصلت لبلدي انا حاقتلكوا كلكوا.. حاقتلكوا كلكوا
------------
واطالب برفع قضية حجر على كل من جبهة معاتيه الازهر والمدعو بشوي اللي كل ما يفتح بقه يطلع هذيان رسمي، وقبل كده كتبت بوست طالب فيه بانكم تخيطوا له بقه، لكن بما انه ماحدش خيط له بقه، يبقى يتحط في مصحة للامراض العقلية، شاتم المسلمين والبروتستانت والكاتوليك وعامل زي اللي قالع عريان وواقف على الناصية يحدف الناس بالطوب

مين دول اللي ضيوف يا كتكوت؟ هو فيه بلد فيها خمسة وسبعية مليون ضيف وتسعة مليون صاحب بيت؟ ثم ايه التقسيمة دي؟ من امتى صاحب البيت والضيف بيتعرف بدينه؟ يعني المسيحي صاحب بيت لما يسلم بقى ضيف على طول توماتيكي توماتيكي؟ طب والمسلم اللي يتنصر؟ بقى صاحب بيت؟ والنبي انت اللي ضيف على دنيا العاقلين، انت مكانك اساسا مش هنا، مكانك هناك، مع عنتر ونابليون ونيرون وانا الاكسسسسسسسسسسس تووووووت، ومتهم البروتسانت بالعمالة، والكاتوليك بالشرك والوثنية، مافيش طبيب امراض نفسية وعصبية يشخص لنا حالته دي؟ انا مش عايزاه خلف لشنودة ده الا اذا كنتوا حتحولوا الكنيسة لمصحة امراض عقلية وساعتها يبقى التعامل معاها مختلف، يعني يتم الكشف على المسيحيين المصريين، واللي سليم عقليا ما يخضعش لتحكم الكنيسة فيه، ونكشف على المسلمين والمجنون اللي فيهم زي جبهة معاتيه الازهر كده يتم ايداعه في الكنيسة ويقعدوا مع بعض هم وبشوي يغنوا: انت يا حضرة نابليون؟ وي ميسيو وانا كمان نابليون انشانتيه

وانا بداية من النهاردة، مش حاشتري خيط في ابرة الا من محل مسيحي، حامشي ادور على المحلات اللي معلقة صلبان او صور العدرا واشتري منهم يا جبهة معاتيه الازهر ياللي بتقولوا لنا قاطعوا المسيحيين

ولو كنا في بلد محترمة، لو كنا في بلد اساسا مش طابونة، كانت الاشكال اللي زي بشوي وجبهة مخاليل الازهر اتقدموا للمحاكمة واخدوا اعدام رميا بالتفافة لحد ما يغرقوا في تفافة الشعب (ده في حال ما اذا ثبت صحة قواهم العقلية، انا باتكلم بجد، فعلا مش سلام في مخهم فيه حاجة، ربنا يعافينا يمكن صرع على الفص اللي تحت شحمة الاذن، بيقولوا النوع ده من الصرع بيتسبب في هلاوس، وهوس ديني) بس احنا نسينا يعني ايه بلد اصلا

فيه حد على التويتر قال لي طب افرضي المسيحيين هم كمان جات لهم اوامر يقاطعوا المسلمين ما يبيعوش لهم

لا، ما تستسلمش، تدخل المحل اللي معلق صور مسيحية وتشتري منه، لو ما رضيش يبيع لك ما تخرجش غير وانت شاري، انشالله تتخانق معاه، انشالله تهدده بانك حتتصل دلوقت حالا بامن الدولة وتبلغ فيه انه بيعمل فتنة طائفية

حتشتري من مسيحي يعني حتشتري من مسيحي، وانا شخصيا مافيش حاجة حاجيبها غير من المسيحيين، اكل شرب دوا هدوم، كله حاشتريه من محلات مسيحية، ومحلات مسيحية معلقة صور مسيحية كمان

مش شوية مجانين مهاويس معاتيه حيجننوا الشعب، ولو الشعب اتجنن يتفلق، انا مش ناوية اضحي بعقلي

لا وكمان مش كفاية الجنان اللي صايبين بيه نفسنا رايحين نطرطش على البشرية بجنانا، تخيل اللبنانيين اللي كان بينهم حرب اهلية بيشتكوا ان السفارة المصري بتعمل لهم فتنة طائفية

لا والله هم ما يقصدوش، هم بيتكلموا بس، وطبعا مدام فتحوا بقهم يبقى اكيد اتكلموا عن عباد الصليب والروافض والمسيحيين اصحاب البلد ودقن كاميليا وعلى رأي واحد على التويتر قال ممكن واحد يخسر صاحبه عشان مزة، لكن نص البلد تخسر النص التاني على واحدة مش مزة اصلا؟

لا وجبهة مخاليل الازهر دي ياما نفخت في النار ما بين السنة والشيعة في العراق

بالصلاة ع النبي.. اتجننا وماشيين نوزع خيراتنا على الناس... بعد ما كنا بنبعت قمح للي حوالينا بقينا بنبعت ذبذبات جنان

نداء بقى الى الاخوة العرب احذرونا.. احنا مش في حالتنا الطبيعية، وبعدين ما تعايروناش، عشان انا شخصيا بازعل، يعني حترمونا؟ راعونا لحد ما ربنا يعفي عنا، ده برضه عيش وملح يعني، استحملونا شوية لحد ما ربنا يقضي امرا كان مفعولا

الموضوع عمال يتطور.. اه والله الجنان بقى خيطير، قفزة كده من الكورة على الدين وباديين بداية مهببة قال في مساعدة النشطاء العرب، انا عارفة اننا حنخرب بيتهم.. انا عارفة والله

يارب من عندك الشفا

انا عمري ما كنت اتخيل اني استهفأ عالم دين ولا رجل دين بالطريقة دي، حد يهزأ نفسه كده؟ وانا سمعت ان د. العوا رد على بشوي، ما شفتش الرد، بس انا شايفة اصلا ان الهلاوس دي ما يتردش عليها غير بقضية حجر عليه وعلى جبهة مهابيش الازعر اللي قاعدين يضفروا شعرهم ويغنوا ويطلعوا بيانات دول