هو كل ده بركات السفارة المصري؟

ياااااااا "الدفاع عن كرامة الطائفة السنية" ده الكلام ده بيتقال في لبنان؟ ده كل ده بركات السفارة المصري واحمد ماهر؟ معقولة؟ لالالالالا معقول؟ لالالالالالالالا

لالالالالالالالالالالالالالالالالالالالالالالالالالا

طب ايه؟ طب يطردونا طاه.. بلدهم حتتخرب، احنا نستحمل ومش حتحصل حرب طائفية لان فرق النسبة كبير ولان مافيش امكان فيها تكتلات مسيحية وتكتلات مسلمة، لكن لبنان مافيهاش هزار، دول لسه مموتين بعض عمناول

الله يخرب بيتك يا عوكل.. هي الناس ناقصاك؟ مش كفاية اللي عملته فينا؟ 

طب بقى ماحدش يسمع كلامنا.. ما بترجعوا تعيطوا بقى وتلوموا علينا، سيبونا في حالنا، وكل واحد عقله في راسه يعرف خلاصه

-----

سويسرا بقى بقت نازية على ابوها وبقت تسخر العلم عشان تشتم المسلمين زي ما هتلر كان بيسخر العلم عشان يثبت ان اليهود اغبيا

هي مش سويسرا دي كانت طيبة زمان وبتعمل شوكولا والناس بتحوش فيها فلوسها المسروقة؟

ااااااه

احنا وقعنا

لا وربنا رازيني بشوية بهايم حيدخلوا يسيبوا تعليقات زي وشهم تحسسني ان مصر تحولت لمصحة عقلية وان القيامة لازم تقوم بقى عشان شرار الخلق جم اهم

احنا رايحين باعتين واحد من اللي بيعلقوا عندي في السفارة بتاعتنا يقول للناس في بلدهم حزب اللات والرافضة عباد القبور؟ احنا اتجننا؟ وهم اتجننوا يتأثروا بكلامنا؟ مش لو كنا بننفع كنا نفعنا نفسنا؟ يعني ايه السفارة المصري تعمل لهم فتنة طائفية تقوم تتعمل.. هم هبل ولا ايه؟ حتى اللبنانيين طلعوا مجانين وبيسمعوا كلامنا؟ بيسمعوا كلامنا ليه؟ شكلنا مقنع يعني؟ امال الدنيا كلها عمالة تتفرج علينا وعلى فتنتنا الطائفية ليه؟ 

---------- 

ثم ايه التفاهة اللي هيكل بيقولها دي؟ وماله جاررنا لمناقشة تافهة كده؟ ايه قام عمل له قهوة والظاهر سمه بس لا مش ممكن يكون سمه، لا والتانية الهايفة سكينة السادات تقول يعني ايه السادات يعمل فنجان قهوة بنفسه هو كان خدام عشان يعمل فنجان قهوة؟ 

انا مبسوطة قوي من الهبل ده

لا بصراحة ما بقتش مبسوطة.. الهبل زاد يعني

حنقضي ستميت سنة بقى نتكلم عن فنجان القهوة اللي شربه عبد الناصر ومات واللي عملهوله السادات اللي مات برضه

ده موضوع مهم جدا الحقيقة، باب القلعة متركب بالعدل ولا بالمقلوب؟ ثم هيكل ده مش لاقي حاجة يقولها؟ توه ما افتكر ان عبد الناصر قبل ما يموت شرب فنجان قهوة؟ وما قالش من ساعتها ليه؟ قهوة ايه اللي حنتكلم فيها دلوقت واحنا عندنا فتنة طائفية واكابر الناس عمال تخرف وتقدم في بعض بلاغات للنائب العام ورايحين نعمل فتن للناس والمعارضة بتتخانق تشارك ولا ما تشاركش في الانتخابات واللي مش حيشارك حيبقى اثم واللي حيشارك حيبقى خاين وسويسرا بتقول ان النقاب بيجيب هشاشة عظام وبري بري وسكربوط وتليف في الكبد وبروستاتا وده راح طالع زي الخازوق لوحده يقول لنا فنجان القهوة عشان ندخل في خناقة تاني.. عاشر... سبعمية وخمستاشر

قال قهوة قال.. يا عم روح احكي حواديت قبل النوم بتاعتك دي بعيد عنا احنا كنا ناقصينك؟
----------
لا وشوفوا شوفوا عودة الندل ده كمان
مالك ومال شيكابالا الله يخرب بيتكككككككككككك ما تسيبه يا راجل، مش كفاية العمل اللي معمول لنا ومدفون تحت سور النادي؟ عايز تمشي الحيلة؟