اللي حيعمل مظاهرة قدام السفارة السوري حاطلع ترابنتينه

 تحديث:

انا جالي رد من ناشط في داخل سوريا، وقال لي ان فعلا فيه خطورة عليهم، وان تسليم البيان للسفارة او وقفة السفارة كلها مالهاش لازمة

اولا الوقفة امام السفارة حتتفسر داخل سوريا ان مبارك هو اللي حرك الناس ضد بشار الاسد بسبب الخلاف بينهم على المفاوضات

وتسليم البيان للسفارة السوري حيترمي في الزبالة

لذلك هو قال لي ان افضل وسيلة لمساعدة طل فعلا، ولانقاذ النشطاء السوريين من الاعتقال لانه هو نفسه كان حيروح في ستين داهية في الفترة اللي فاتت بسبب الفضايح اللي احنا عاملينها دي لولا ستر ربنا

الحل الوحيد اننا نوزع البيان على الوكالات كلها، رويترز والفرنسية والبي بي سي والجزيرة والسي ان ان وكل وكالة نشوفها في خلقتنا

حتلاقوا لنك البيان اللي مكتوب عليه وقع لاطلاق سراح طل ملوحي

نقطة اخيرة: فيه فرق ما بين الشخص اللي عايز يساعد بجد وينقذ حد محتاج له

وان الشخص يبقى عايز يسجل موقف وخلاص ومش مهم اثر ده على الاشخاص اللي هو بيدعي انه بيساعدهم

رجاء اللي له اتصال بالوكالات ياخد البيان ويرسله من جانبه وانا كمان حاحاول ارسل البيان من جانبي

وانا مش رايحة الوقفة دي وكل انسان حر في اختياره، بس النصيحة اللي اخلص بيها ضميري امام الله للي يهتم بنصيحتي، الوقفة دي مش حتساعد بل حتضر، الا هل بلغت اللهم فاشهد

الوقفة دي رونج رونج رونج
---------------
ما تطلعوش انيابي وضوافري، اللي عايز يتضامن مع طل ملوحي يعمل مظاهرة عند النقابة، مش قدام السفارة السوري

مش قدام السفارة السوري

تاني؟ تاني الزييطة تاني حيدخلوا وسط الهلولة وينفذوا اجندات؟ لا

كفاية القفوات اللي كلتها في ملف حرية العقيدة...... دلوقت اعد صوابع ايديا، وانا ساكتة، انا ساكتة يا مليجي، مالك ومال ابن بنت بنت بنت بنتي؟ سرقة الجزم من قدام الجوامع لسه ماحدش يعرفها، سرقة مستودع الانابيب انا بس اللي اعرفها، عشان انا ست جدعة، وانت عارف ان انا ست جدعة

طل ملوحي في السجن وناس برة تاكل عيش على قفاها؟ 

اسباب اعتراضي على التظاهر قدام السفارة السوري قلتها لعاطف على التويتر وحاعيد نشرها هنا:

معترضة عشان دي ريحة وحشة


1- كلنا الناس اللي عندها دم زعلت لما حصلت مظاهرات قدام السفارة المصري ايام حرب غزة، مع ان السفارة المصرية جهة اختصاص في القضية دي، بينما السفارة السوري مش جهة اختصاص في قضية طل ملوحي، السفارة هي ممثل لدولة، باختلاف النظام، السفارة العراقي سفارة العراق قبل صدام واثناء صدام وبعد صدام وهكذا
واللي ما نرضاهوش على نفسنا ما نرضاهوش على غيرنا
2- احنا مش بنقدر نتظاهر قدام السفارة الامريكي والسفارة الاسرائيلي، لان الامن بيهددنا انه يفتح علينا الرصاص الحي، واحنا جبنا وبنخاف، مدام جبنا وبنخاف مافيش داعي نعمل رجالة على ابو بلاش
3- المقصود بالحملة نظام الاسد، والمطلوب الافراج عن مدونة سورية، مش المقصود زعزعة سوريا نفسها وهي تحت التهديد دلوقت حالا يا ابو عاطف، ولا مقصود خلق حزازات بين المصريين والسوريين
4- المظاهرة قدام النقابة حتبقى انجح وملفتة اكتر
5- ايه وجهة النظر في التظاهر قدام سفارة سوريا؟ عايزين نقفلها؟ عايزين نضربها؟ معترضين على وجود سوريا في الحياة؟ ايه دخل السفارة السوري؟
زي ما الباسبور المصري والسفارة المصري والعلم المصري مالهمش دعوة بمبارك كمان السفارة السوري مالهاش دعوة بالاسد، موجودة قبل الاسد وبعد الاسد
6- انا شامة ريحة وحشة، وما عنديش استعداد انجر ورا ناس عندها اجندة بدعاوى حق يراد بها باطل، كفاية الب****ص اللي اخدتها في موضوع حرية العقيدة
وبعدين طل ملوحي بقالها سنة.. اشمعنى دلوقت؟
اتضامن مع طل اه، اطعن سوريا لا
---------
ثقافة التضامن مهمة، ومهمة كمان بين الشعوب العربية وبعضها، احنا محتاجين الشعوب العربية تساندنا في قضايانا، وهم محتاجينا نساندهم في قضاياهم، بالذات السوريين عشان ظروفهم اوحش منا ومش بيقدروا يتكلموا قوي زينا، ومع ذلك مش ساكتين، ومافيش حاجة اسمها اللي يعوزه البيت يحرم على الجامع
ده كلام الاندال والواطيين بس
بس كمان مش عايزة ناس تدخل في الظيطة - زي كل مرة - وتنفذ اجندات سياسية
احنا ضد الديكتاتورية، بس مش مع ضرب سوريا مثلا، مش مع خلق حزازات بين سوريا ومصر، مش مع حصار سوريا شعبيا اضافة الى حصارها دوليا
لكن احنا مع الشعب السوري، ونقدر نتضامن من غير ما نؤذيهم، ما يبقاش جبتك يا عبد المعين تعيني لقيتك يا عبد المعين شغال مع مؤسسات اجنبية وعامل عليا فورتينة 
ومش لازم نسكت على اللي بيحصل لهم عشان ما نحسش بالذنب ناحيتهم زي ما عملنا في العراق
ومش لازم نتآمر عليهم زي ما بنتآمر على ايران
ما ينفعش نتضامن بشكل محترم؟