جبت التايهة يا نعيم يا قاسم

الا صحيح، الناس كلها ماسكة في خناق بعض فجأتن وكأنها.. وكأنها.. كحة شيطان.. مشيها كحة

السنة والشيعة اتخانقوا في الكويت عشان عيل اهبل شتم السيدة عائشة

المسلمين والمسيحيين اتخانقوا في مصر عشان راجل اهبل بلغ ان المسلمين خطفوا مراته

المسلمين والمسيحيين اتخانقوا حتى في امريكا عشان معتوه اهبل قال حاحرق القرآن

كل الحاجات دي فجأتن كده وفي نفس التوقيت؟ 

الشيخ نعيم قاسم من حزب الله قايل كلام لوز هنا واخر براجراف بقى جايب التايهة، كل الناس ماسكة في خناق بعض وعملية بيع فلسطين بتتم على قدم وساق وماحدش واخد باله

صحيح.. ما جاتش في بال حد دي يا عيال، اوعى حد يقول نظرية مؤامرة، اذا ما كانوش يتآمروا عشان مشروع حياتهم، وطوق النجاة لشعبية اوباما، وتسليم اخر مفتاح من مفاتيح فلسطين لاسرائيل، وكمان بيخططوا للبنان وسوريا عشان يقفلوها خالص، ونتانياهو قال مانيش قايم قبل ما تشوفوا لي حل في سوريا ولبنان ونخلص ليلتهم بقى خلينا نفضى لايران (سوريا.. ها؟ سوريا اللي فجأة اكتشفتوا ان فيها معتقلات، ما المعتقلات دي من ايام الملك خشبة) ولو تلاحظوا مافيش حس للصهاينة خالص في الليلة دي، الخناقة كلها ما بين المسلمين وبعض، ومابين المسلمين والمسيحيين، الا ما شمينا ريحة يهودي في الموضوع، ايوة باقول يهودي بما ان الخناقات كلها دينية ومذهبية، ده حتى بشوي ما سابش طايفة مسيحية الا ومسح بيها البلاط وما جابش سيرة اليهود خالص، الا الراجل مدام مهبوش كده وبيقول البت ووتر جتة الصايعة بتاعة الشوبان والكاتوليك المشركين الكفار، ده كلامه عن المسلمين الطف كلام يعني، ما فاتش بالمرة على اليهود ليه؟ اشمعنى دول وقعوا من قفته مدام ماشي يهبش يمين وشمال؟ والعوا عمال يتكلم عن سلاح الكنيسة والناس رايحة تقفل كل حاجة عن سلاح المقاومة، ومبارك سايبنا نولع بجاز وسخ، عشان ابنه طبعا، الا احنا مش متعودين ان مبارك بيرفع سماعة التليفون ويقول اسكتوا يا عيال قوم العيال يسكتوا؟ مش هو اللي قفل على موضوع وفاء قسطنطين وقال الموضوع ده ما يتفتحش تاني قام اتقفل؟ اشمعنى المرة دي سايبنا مطرح ما نحط راسنا نحط رجلينا

في كل الهلولة دي حد عارف ايه اللي حصل في المفاوضات؟ 

انا بقى اقول لكوا ايه اللي حصل في المفاوضات، عباس قال مستعد اعترف بيهودية الدولة لو حيعملوا لنا دولة فلسطينية

ونوفوستي بتقول صفقة جمال مبارك تمت خلاص

والواد اوباما حيموت وينجز الليلة دي لانه على حافة الهاوية وهو عايز يترشح تاني

اوعى وشك بقى

خليكوا في ياسر الحبيب ودقن كاميليا، وعلى رأي مبارك، الولعة دي مش عندنا احنا بس، ده في كل العالم، ودايما ابطالها مسلمين، واليهود مختفيين من الصورة، ليه بقى؟ ده حتى اليهود متعودين على الشتيمة وكل الناس طالعين شاتمينهم نازلين شاتمينهم يا قلبي.. اشمعنى المرة دي ماسكين في بعض وناسيينهم؟