Wednesday 28 November 2007

بخصوص أنابوليس في حال ما اذا كنا "مثليين"

انا اصل الصهاينة مثلي الاعلى
اه بجد
ناس يحتذى بيهم بجد
ايه بقى؟ بقى موضوع ال
petition
والجوابات والمذكرات وشغل الباز افندي في ابن حميدو ده
زمان من يجي تلات اربع سنين كده كنت بابص له بازدراء
وباقول يعني هو الجواب ده وللا التوقيعات دي هي اللي ح تفرق؟
لحد ما دخلت مرة على موقع التوقيعات ولقيت السادة الصهاينة
واكلين تلات اربع الموقع مع كل تفة يكتبوا بيان ويجمعوا عليه
بالصلاة ع الصلاة اعداد مهولة واقل عدد ستة وعشرين الف وكسور
واحنا يوم ما بنلم ربعميت توقيع بنقول لمينا
ده غير طبعا المتحف المخصوص لجوابات الصهاينة لانجلترا عشان
ياخدوا فلسطين
قلت يبقى اكيد دي حاجة مهمة مدام هم مهتمين بيها
مش هم حكومة الدنيا وعارفين كل الكلام؟
وعرفت بعد كده ان فعلا الحكومات في اوروبا والدول المتغدمة بتهتم
بالتوقيعات دي يعني لما تحب تعمل توقيعات ما تعملهاش للحكومة المصرية مثلا
لان رأيهم في التوقيعات زي رأينا
وادينا عرفنا الباب اللي بندخل له من الحكومات العربية: نفتح الشباك ونرقع
بالصوت زي الولية اللي جوزها بيضربها وبتستنجد بالجيران
والجيران دول طبعا هم اللي بيقروا البيانات وبيشوفوا التوقيعات
يووووووو قالوا لي هدي اعصابك وانت بتتكلمي
حاضر
لا
مش ح اهدي
بقى احنا كل اللي بنعمله ده سواء في الشأن الداخلي وللا الخارجي
عبارة عن تسول
تسول لحقوقنا ومافيش في ايدنا حاجة تانية
يا تنبسط يا اخ والعصايا داخلة لك
يا اما ترقع بالصوت وخلاص يمكن حد معدي يسمع صوتك
ويتطوع ينقذك وللا حتى يكلم الاخ اللي بيحط العصايا
ومافيش فرق كبير بين الشأن الداخلي
- زي التعذيب والعمال والحريات وغيره -
ومابين الشأن اللي بيسموه خارجي زي انا بوليس
لان ببساطة اللي رايح انابوليس يعمل صفقات مع الناس
اللي انت عادة بترقع بالصوت عشان يسمعوك
هو نفس ذات الشخص اللي بيحط لك العصايا
والناس اللي بترقع لهم بالصوت دولم هم نفس ذات الاشخاص
اللي بتقول لهم: الحقوا بينتهكوا حروق اللسان عندنا
الحقوا بيحبسوا الصحفيين والمدونين عندنا
لو سمحتوا بطلوا تدوا للاخ اللي بيحط لنا العصاية المعونة
لانكم بتساعدوه انه يفضل حاطط العصاية اللي بيجيبها
من فلوس المعونة
ولو عايزين تحافظوا على مصالحكوا ممكن نتفاهم من غير عصيان سعادتك
ها؟
مش هو ده اللي بيحصل وللا احنا ح نهجص بقى ونفتح زورنا ونجعر؟
اللي بيحصل في انا بوليس ان الشخص ساب العصايا عندك وانت لسة متعلق
وراح يتفاهم مع الناس دي عشان يعرف يحط العصايا من غير ماحد يقول له
اختشي عيب
وجه علينا الوقت الوسخ اللي نعتذر فيه عن اننا بنتكلم عن فلسطين
بان المسألة مش حكاية فلسطين وبيعها وبس
ولكن دي ح تصب في شأننا الداخلي
ولازم نعتذر الاعتذار ده عشان احنا متعلقين وواخدين العصاية
وعشان زي ما قلت في تعليق ليا عند مدونة مالك
احنا عندنا تلات خيارات اتنين منهم ممكن يحصلوا وواحد ماعندناش الامكانية
اننا نعمله
اللي مش ممكن نعمله اننا نعمل حركة وطنية مستقلة معتمدة على
"القاعدة"
لامؤاخذة الشعبية اللي ح تعمل تغيير داخلي من تربتنا احنا وبدون تدخل
من اي حد
وطبعا ده عند ام لالو في ظل نظام العولمة
الاختيارين التانيين الممكن اننا نعمل زي ما بنعمل دلوقت
وهو اننا نتسول ونرقع بالصوت لحد ما يزهقوا من صويتنا
ويشيلوا العصاية ولو خمس دقايق بس نرتاح
او الاختيار الاخير واللي مش محطوط في اجندتي انا شخصيا
ان اللي بياخد العصاية يعمل بالنصيحة الدنماركية للفتيات اللي بيتعرضوا للاغتصاب
relax and enjoy it
البيان المطلوب التوقيع عليه اهو
عشان حاجات كتير
عشان احفادك ما يتفوش على قبرك
وعشان يمكن الصويت يجيب نتيجة
وعشان تبري ذمتك
والاهم عشان الصهاينة مهتمين قوي بالموضوع ده
يبقى اكيد مهم مش كده؟
----
انا باستغرب قوي من بعض الناس اللي كل ماحد يتكلم
يقولوا: الموضوع ده مطروح عشان يلهينا عن الاهم
انا بوليس: عشان يلهينا
موضوع التعذيب: عشان يلهينا
العمال: عشان يلهينا
طيب يا سيدي قفل على المواضيع دي وبلاش نتلهي
ادينا سيبناها
اتفضل بقى كلمنا عن المهم اللي حضرتك مش عايزنا نتلهي عنه؟
تحبوا اطرح لكوا موضوع مهم من اللي الناس بتحب تلت فيه
وتسيب كل المواضيع السابقة عشان تتكلم فيه؟
المسير قال ابن الزنا لا ينسب ولذلك فلو واحد زنا مع واحدة
وخلف بنت يجوز له انه يتجوزها اللي هي بنته يعني
اييييييييييووووووه
سيبوا بقى بيع فلسطين ومصادرة حقوق اللاجئين
والصفقة اللي ح تتعمل مع الحكومات العربية عشان تحكم عليكوا
القبضة الامنية والدعم اللي امريكا ح تزوده للديكتاتوريات في المنطقة
قصاد الصفقة دي والعصاية اللي كل شوية تطول وتعرض
واتكلموا في الموضوع المهم ده الله يخليكوا
سلامووووووز

No comments: