مسلسل: النسر المصري

بطولة زكي علي أحمد محمد هيثم أحمد هيثم أحمد زكي

انتاج سنة

2085

يتحدث عن مسيرة حياة النسر المصري

صاحب اول طلعة جوية فتحت باب الشعرية

بطل العدالة الاجتماعية والحرية والوحدة العربية

والريادة المصرية

مناقب السيد الرئيس التي سيتحدث عنها الناس

في عام 2085 هي:

- بنى كوبري اكتوبر اللي لولاه كان زمانا مزنوقين في الاشارة

- انطلق في عهده القمر المصري اللي لولاه كانت فاتتنا كل الكليبات

- تصالح مع كل الدول العربية اللي كان اللي قبله متخانق معاهم وشادد شعرهم

وعمل بمبدأ: يا نحلة لا تقرصيني ولا عايز عسل منك مع اضافة بسيطة

بس عايز استثمارات

- بنى المحور

- بنى مسجد النور

- اعطى مجالا واسعا من الحرية وليس ادل على ذلك

من ان الناس تمكنت من ترديد: مش عايزين الشرطة تعذبنا تاني بقى

- حمى مصر من الانزلاق في حروب المنطقة وعمل بمبدأ

من خاف سلم

- بنى محطة مياه في كفر العلو ومش مهم اللي انطردوا

الحي ابقى من الميت

- حول العشوائيات الى مزارات سياحية وبرضه الحي ابقى من الميت

- نشأ جيل من المدونين (قلالات الادب) في عصره

خلي الشعب يعيش

- ازدهار الاقتصاد المصري وان لم يصل الى المستوى القاعدي

اصل القاعدة منملة شوية

التبريرات لكل اخطاء النسر المصري:

- كفاية ان المستثمرين الاجانب جم مصر

هم صحيح اشتروا البلد كلها بس البلد ازدهرت

هو الصحيح الفقر كان مريع بس كل نهضة ولها خسائرها

- ماهو اضطر يسجن الصحفيين وكتر خيره انه سجنهم بس

كان ممكن يعمل فيهم زي اللي قبله

- هو يعني كان ح يعمل ايه ما كان لازم يعدي القوات الامريكية

من قناة السويس عشان يحمي مصر من مصير العراق

وقال يا روح ما بعدك روح

- ماهي الفتنة الطائفية حصلت بسبب الحرية اللي هو اداها للشعب

والشعب المصري مش متعود على الحرية فحصلت الفتنة

- عشان كده كان مضطر يحكم بقانون الطوارئ عشان يمسك البلد مسكة كويسة

- ماهو التعذيب ده هو اللي قضى على الارهاب وللا كان يسيب الارهابيين؟

مصلحة الجماعة فوق مصلحة الافراد

- ماله لما يورث ابنه مش احسن من الناس اللي كانت موجودة اياميها

اهو متربي في بيت سياسي ومستحق لشغل المركز ده وللا عشان ابن رئيس

يتحرم من فرصته

- ايمن نور اللي هو حبسه ده عميل امريكاني وكان بيتكلم مع كوندوليزا

ايوة الحكومة تتكلم مع كوندليزا لكن الشعب لا

- هو موته؟ ما التاني اللي كان عيان طيب ازاي يبقى عيان ويترشح للرئاسة

- طلعت السادات ده كان بلطجي

- كفاية انه هو السبب في تغيير مسار الجماعات الاسلامية ومراجعاتهم

اه بالتعذيب..مش احسن من الارهاب؟

- الالاف اللي كانوا معتقلين دول ارهابيين اصلا ولو سابهم يخرجوا ح يفجروا البلد

كان لازم يعتقلهم وبعدين السجون اللي كانوا قاعدين فيها كانت فيها حمامات افرنجي

نضيفة يعني

- هو معذور العالم كله في الفترة دي كان بيمر بظروف الحرب على الارهاب

وثقافة العولمة وهو كانت الاولوية الاولى عنده انه يحمي مصر من خطر الدمار

والاحتلال والقلاقل

- مش صحيح انه هو السبب في فقر الناس الناس هي اللي ما كانتش عايزة تشتغل

- اه...حادثة القطر والعبارة...طيب ما الكوارث بتحصل في كل زمن

آه طبعا كان فيه فساد بس هو مالوش ذنب فيه ما كل زمن فيه فساد

هو يعني دلوقت اللي مافيش فساد؟

- ايوة مشروع توشكى فشل بس بسبب اللي جم بعديه مش بسببه

- هو ما استندلش مع فلسطين ولبنان هو كان مضطر عشان يحمي مصر

- هو ما باعش البلد...فيها ايه يعني ما محمد علي عمل اعتمادات اجنبية

وامتيازات اجنبية

ده لمصلحة البلد وعشان الاستثمار يزدهر

- والله بقى مش ذنبه ان الاقتصاد ما ازدهرش لحد دلوقت هو ابتدى خطة الاستثمارات

ولوكانت مشيت زي ما هو كان راسم لها كانت مصر بقت زي سويسرا

بس هم اللي جم بعديه بقى

- هو ابتدا خطوة كويسة للقضاء على التعذيب في مصر مش ذنبه انه ما انتهاش

لو كانت مصر مشيت على النظام اللي هو كان راسمه لها كنا بقينا زي

جرين لاند في حقوق الانسان

- هو اعطى للصحافة حرية بس ما كانش يقدر يسيب السايب في السايب

واللي اسمه ابراهيم عيسى ده كان شتام وكان لازم يوقفه عند حده لانه

عمل بلبلة في البلد واتسبب في وقوع البورصة

- هو مشي في خطين متوازيين

خط بناء نظام اقتصادي قوي وخط الحريات ومزيد من الديمقراطية والدستورية

وكان بيتكلم عن العدالة الاجتماعية وعمل تعديلات دستورية

مش ذنبه انه اللي بعديه ما كملوش مشواره

هم اللي جم بعديه السبب في كل اللي احنا فيه مش هو

===

المسلسل سبعة وتسعين حلقة لتغطية مشوار النسر المصري

تأليف: ترزية التاريخ من عينة كتاب ناصر 56 وايام السادات والملك فاروق

اخراج: واحد سوري طبعا

قامت بدور السيدة الاولى حفيدة بنت حفيدة منى زكي

موسيقى: نائل كريم محمد زكريا وائل ياسر عبد الرحمن

المسلسل طبعا اخد الجائزة الاولى في مهرجان التلفزيون في مصر