أولا ألف مبروك لكل المصريين كسبنا قضية تلبانة
اللي فيها الضابط محمد محمود معوض هووتلاتة امناء
أحمد عبد العظيم وياسر مكاوي وشريف سعد شريف
قتلوا المواطن نصر عبدالله
وسحلوه قدام اهله لحد ما مات
الضابط ده او بالاحرى اللي كان ضابط كان نقيب
اخد هو وامناء الشوربة سجن مش حبس لمدة سبع سنين
مع الشغل والنفاذ وفصل من الوظيفة
ثانيا لسة فيه قتلا كتير عايزين اللي قتلوهم ياخدوا جزاءهم
ثالثا سعادة الوزير طلع بيان بيوصي فيه باحترام كرامة المواطن
لما قلت كده للاستاذ طاهر ابو النصر من مركز هشام مبارك
عشان ابارك له لان هشام مبارك مع المساعدة القانونية مع النديم
هم اللي كانوا ماسكين القضية
لما قلت له ان بيان وزير الداخلية بيوصي باحترام كرامة المواطن
قال لي: ده على اساس ان فيه تلاتة ميتين من التعذيب في الاسبوع ده؟
قلت له طبعا ماهو اكرام الميت دفنه
----
على اي حال البلد دي بلدنا
بتاعتنا احنا بقضائها ومؤسساتها وداخليتها ووزاراتها
احنا اللي بنصرف عليها
احنا اللي بنشتغل ونشقى ونتعب وندفع ضرائب
وبنصرف على الظابط والوزير ورئيس الجمهورية
وبنصرف لهم مرتباتهم من فلوسنا ومن شغلنا
ومؤدبين ومطيعين
ما عندناش دولة وراضيين
ما عندناش خدمات وراضيين
ما عندناش صرف صحي ولا مية وراضيين
ما عندناش اي حاجة يا مدحت
وراضيين
ابسط حاجة اللي بنصرف عليهم ما يضربوناش ولا يشتمونا
خصوصا اننا مش بنسألهم بيودوا فلوسنا فين
No comments:
Post a Comment