أنا اللي اعرفه ان كل مواطن محترم بيؤدي شغله كما يجب
واجب علينا احترامه سواق بقى شرطي او زبال
واي بني ادم بيستغل صلاحياته ولا يحترم الاخرين
واجب انه ياخد بالجزمة - بالقانون - لحد ما يحترم نفسيته
ويتظبط
صح؟
ايه بقى حكاية "نحن لا نهدف إلى المساس بهيبة الشرطة" اللي كل الناس
بتقولها دي واشمعنى الشرطة لها هيبة والكناس مالهوش هيبة؟
ومين اللي مفروض يحترم اكتر؟ زبال نضيف بيشيل الزبالة كل يوم
من غير ما يشر على السلم ولا يعبأ الاسانسير بريحة الزبالة
وللا لواء شرطة بيرتشي ويعذب ويستغل سلطاته؟
يعني انا لما ظابط الشرطة في كمين يقول لي رخصك بطلعها مش عشان
انا خايفة منه ولكن عشان انا باحترم شغله وباساعده انه يعمل واجبه
لان ده واجبي كمواطنة وكمان في مصلحتي
لما الاشارة بتبقى حمرا باقف ولما بتبقى خضرا بامشي عشان ده واجبي كمواطنة
وحقي كمان
ولما بتبقى الاشارة حمرا والظابط يقول امشوا بامشي ولما بتبقى خضرا
والظابط يقول اقفوا باقف عشان ده شغله ومن واجبي ان اسمع الكلام لحفظ الامن
صحيح اني من غير ما اشوف مين اللي واقف باعرف رتبة اللي بينظم المرور
يعني: لو الدنيا واقفة خالص ما بتتحركش - خصوصا على الكوبري - باعرف انه ظابط
من اول نقيب فصاعد ولو ما كنتش في الصفوف الامامية عشان اشوف وشه
باعرف اتخيل نظرة السعادة والانتصار لما يوقف العربيات على الكوبري من غير سبب
ويفضل يبص لنا ونظرته كلها شماتة: كلكم واقفين يا كلاب عشان انا اللي موقفكوا
ماحدش فيكوا يقدر يتحرك الا لما انا اقول
وساعات ح الظابط يسرح او يتكلم في الموبايل فالناس تبتدي تدي كلاكسات
يقوم الظابط يفوق مرة واحدة وبعدين يقرر انه ما يمشيش العربيات عشان
"هيبة الشرطة"
ما تسمحش باننا لما نديله كلاكس يمشينا فيستنى خمس دقايق عشر دقايق ربع ساعة
عشان يبقى هو اللي مشانا بمزاجه مش احنا اللي قلنا له يمشينا
ده في حال ما اذا كان ظابط
اذا كان امين شوربة تسمع صوت حك العجل في الاسفلت وصوت العربيات بتخبط في بعض
ليه بقى؟ ح الامين متخيل انه يقدر يفتح اشارتين تلاتة اربعة في وقت واحد
ويشاور لك بايده تعالى ويشاور للقدامك بايده تعالى ويشاور للي على يمينك
تعالى لحد ما يلبس الناس كلها في بعض
وساعات يتردد يبقى مش عارف كده يقرر فيفضل يعمل بايده
اشارة تعالى
قف
سر
قف
سر
قف
ورا بعضه ولما تقول له حضرتك عايز ايه يعني نمشي وللا نقف؟
يبلم ويبص لك بصه كلها حيرة وذهول وساعات مرة واحدة والاشارة واقفة
يروح مطلع الدفتر وينقي له حتة سيات صغيرة كده وياخد نمرتها وهي واقفة
- ايه يا عم في ايه؟
يبص بذهول
- يا عم بتاخد نمرتي ليه
يبص بذهول
- يا عم انا عملت حاجة؟
يبص بذهول
- ينعل ديك امك
ويدوس صاحب السيارة المنكوبة بنزين ويكسر الاشارة وهو بيسب ويلعن
والتاني يتابعه ببصره بنفس نظرة الذهول
لما الدنيا بقى تبقى رايقة وسالكة ده معناه ان اللي واقف في المرور عسكري
لان العسكري هو الوحيد اللي ما عندوش عقد انه يمارس سلطة هابلة
وما يجيش في باله انه لما يوقف حال الناس يبقى هو كده سبع
كمان العسكري عنده بديهية انه ما يقدرش يفتح تلات اشارات في وقت واحد
لانه يتوقع انه في الغالب العربيات ح تخبط في بعض وهو ما عندوش رغبة في ان
العربيات تخبط في بعض
مش شايف ان فيه داعي للموضوع ده
ده غير انه مش بيعرف يقرا ولا يكتب
ولذلك مش معاه دفتر يرازي بيه مخاليق ربنا من غير ايوتها جناية
ده غير انه مبتسم طول الوقت من غير سبب واضح وماعندوش صلاحيات
انه يعمل زي ح الظابط اللي بيدخل ساعات في الاشارات وهو مجنح دراعاته
ونافش صدره ومعرض صوته وبيشاور على بياع مناديل: هات لي الحيوان ده هنا
ماشوفش وشك هنا تاني يابن الوسخة
هيييييييه
بس برضه احنا ليس لدينا اهداف لهدم هيبة الشرطة
هم قايمين بالواجب
No comments:
Post a Comment