ندوة التعذيب

صورة الضابط سموءل ابو سحلة من مدونة عرباوي

على هامش مؤتمر القاهرة لمقاومة العولمة والإمبريالية

باين

ومتهيالي فيه الصهيونية كمان

المهم المؤتمر اللي في نقابة الصحفيين ده

تاني يوم كان فيه ندوة عن التعذيب

أدارت اللجنة عايدة سيف الدولة

واتكلم في الندوة دي

منعم أو عبد المنعم محمود

اللي اتكلم عن التعذيب اللي اتعرض له

في يناير 2003 مع مجموعة من زملائه

منعم بيقول إنهم كان متوصي عليهم

:عشان كده

الحمد لله ما اتعذبناش

كان ضرب بس

وقلعونا الجزمة والشراب

ووقفونا على البلاط 14 ساعة

واللي كان بيقع كان بيضرب جامد قوي

وقعدنا 13 يوم مغميين عنينا في زنزانة

عبارة عن دكة اسمنت

جنبها الحمام البلدي

وكانوا كل شوية يخشوا عليا ويضربوني

ومنعم مناخيره اتكسرت وحصل له تهتك في اغشيته

اصل الحمد لله كان متوصي عليه

بعدين الشرقاوي اتكلم

انا شخصيا مش ح اقدر اتكلم خالص في اللي قاله الشرقاوي

لاني باتعب

بس الشرقاوي عرف اسم الظابط اللي عمل فيه كده

:اسمه

سموئل ابو سحلة

يعني

اهو انا دلوقت عرفت هو بيعذب الناس ليه

ما هو انا لو اسمي شخنيفة ام زبعبع اكيد كنت ح اعذب الناس

بعد الشرقاوي

اتكلمت المواطنة حنان

مواطنة عادية غلبانة

صاحب البيت كان عايز يخلي الشقة

ويطلعها هي وولادها وجوزها

البوليس جه وعمل عمايل

برضه مش ح اقدر اقولها كلها

عشان انا باتعب فعلا

بس مثلا ع الماشي كده

نقدر نقول ان الظابط ربط جوزها واخدها هي وبناتها

وقلهم هدومهم جوة

غير بقى الضرب والتعذيب وخلافة

مواطن تاني اسمه محمود

كل حكايته انه كان سايق عربية

معاه مراته وولاده

الظابط قال له رخصك

قال له اتفضل

الظابط قال له انزل

قال له انزل ليه يا باشا لا مش ح انزل

ودي كانت نهاية فرقة عكاشة المسرحية

وبعد شوية تعذيب وضرب وطرد وتقليع

محمود اتعمل له قضية بانجو

ومراته محبوسة في قضية حبوب مخدرة

"برشام " أو "بورشام"

بعدين احمد حسن الطالب في كلية الهندسة

اتكلم وقال انه كان بيحفظ زمايله قرآن

فاتقبض عليه

:وقال

وضربوني وشتموني شتمات وحشة ما اقدرش اقولها

طبعا العيال المدونين

عملوا زي اللمبي وقالوا: ايه الواد ده

ما حصلوش حاجة

وانا مقدرة طبعا لان هم شافوا اهوال

بس احنا وصلنا للدرجة دي

لدرجة ان الاهانة بالسب والقذف والضرب

بقى حاجة عادية؟

وما تستحقش الشكوى؟

لا

احنا مش لازم نقبل اي اهانة

مهما كان سقف الشرطة عالي قوي في الاهانة

او بالاحرى مالهمش سقف اساسا

لكن احنا لنا سقف

مين بقى اتكلم وكان ح يوقع لحم وشنا من العياط؟

ابو عمر المصري

او ما ابتدى قال انه جاي بدون علم الامن

لانه متحدد اقامته في اسكندرية

الراجل ده

يستاهل انه يتحط في ميدان عام

ونقعد نلف حواليه ونتمسح فيه عشان ناخد من بركاته

الحكاية للي ما يعرفهاش

تبدأ بمصر وتنتهي في مصر

اتقبض عليه في الفترة اللي كان كل واحد بيصلي فيها بيخش السجن

اتعذب طبعا وطفش راح البانيا

اشتغل في البانيا في التجارة البوليس الالباني

قبض عليه وعذبه وقال له اشتغل معانا

رفض وطفش على ايطاليا

اتقبض عليه بالغلط واتعذب وبعدين جه مصر

:بيقول ابو حفص

لما جيت مصر شخصية كبيرة قابلتني

وقال لي اشتغل معانا فرفضت

في ساعتها

انا مش ح اقدر اقول مين

(هو اللي بيقول)

:ثم أكمل

فيه بعض الصحف قالت انه وزير الداخلية

بس انا مش ح اقول اسمه بقى

اشترطوا عليه انهم يخرجوه على اساس انه ما يفتحش بقه

ابو عمر بيقول انه كان قدامه اختيارين

يا اما يسكت وخلاص

يا اما يتكلم عشان يحذر بقية الناس اللي هو عرف جوة

انهم هم كمان ح يتعرضوا للخطف

وقرر ابو عمر انه يحذر الناس من الخطف

ويتكلم مع الاعلام

فاتقبض عليه هنا

وعذبوه

المعروف على فكرة انه حاول الانتحار في السجن المصري

بالصلاة ع النبي

واحد بالايمان ده كله ازاي وصل لمرحلة انه يفكر في الانتحار؟

مصر بلد المعجزات

وما زال ابو عمر مصمم يتكلم

ومش ح يسكت

عشان كده امريكا كانت بتطارده في البنانيا وايطاليا ومصر

وكل اللي حصل له ده بأوامر امريكية

منعم كان بيحاول يحكي بحياد على قد ما يقدر

بس كل الالم نط من عنيه

:وهو بيقول

أو ما وصلنا قالوا لنا احنا جوانتانمو مصر وعذبنا اعتى عتاة القاعدة

الشرقاوي كل ما يحكي

غصب عنه الاحاسيس بتستحضر

كأنها لسة بتحصل دلوقت

وبيتضغط على نفسه عشان يفضل مبتسم طول ما بيحكي

وبالعافية عايز يهزر عشان يخفف من وطئة الحكاية

وهو بيحكي وبيحاول يبلع المه كان ح يغمى عليا

ابو عمر المصري لسبب ما ضاربها صارمة

وشه مليان تحدي واستبياع

حنان بتحكي كأنها مكسوفة تتكلم

محمود بعد ما خلص كلامه

:قعد يقول

اعمل ايه طيب

قولوا لي اعمل ايه؟

حد يقول لي اعمل ايه؟

انا اخدت صور بالموبايل بس مش عارفة طبعا انزلها

ح اخلي مالك ينزلها لي

مالك ده بقى معروف ان لما البوليس بيضربه بيرد ويضربهم

لدرجة ان جيمي ضحك وقال له: بيقولوا ان الظباط رافعين عليك قضية

عشان بتعذبهم