يوميات مواطنة غلبانة كان نفسها تصوت: يا لاااااااااااااهوىىىىى

الصديقة ريهام يسري،

بنت مؤدبة بتشرب اللبن كل يوم الصبح

وبتسمع الكلام

حلوة وبتسمع الكلام

سمعت كلام الحكومة وراحت تشارك في الاستفساء

طبعا هي مؤدبة

بس مش عبيطة

يعني بتسمع الكلام آه

بس تصوت بنعم لا

كان نفسها نفسها نفسها تقول: غير موافق

أمنية حياتها

بعتت لي الميل الآتي

بتشرح ايه اللي حصل من الساعة تمانية الصبع للساعة عشرة الصبح

: إليكم كلامها دون تعديل او تبديل او حذف او زيادة

نواره

بصى انا بدأت اليوم الساعه 7,50 دقيقه،8:00- قسم مصر القديمه

أنا و نرمين زميلتى و صاحبتى فى الشغل· أول ما دخلت لئيت ذى خيمه جواها 4 ناس و ترابيزه وكمبيوتر بس سعادتك بما انهم فى الشارع مكانش فى كبس ( خدمة إرشاد المواطنين)· رحت سألت واحد:"أنا " : من فضلك انا عاوزه استفتى أروح فين؟؟؟"هو": خشى اسألى جوه ؟؟؟"أنا" : أمال انته بتعملوا إيه ؟؟؟؟"هو": إحنا معانا الكشوفات و توزيع اللجان و لسه حنبتدى الساعه 9"أنا": طب قولولى ينفع انتخب وانا معييش بطاقه انتخابية ؟؟؟؟؟قالوا لواحد منهم يرد عليا"هو" وأنتى مالك متحمسه كده ليه ؟؟؟؟؟"أنا" : كده عاوزه ائول رأيى"هو" : لعلمك مش بيفرئوا فلوس"أنا": لأ هم قالولى أنهم بيدوا خمسين جنيه، مش حمشى من غير ما أخدها"هو": لأ فى شقق 70 متر روحي أأفى ورا الناس دى**لقيت توابير ناس كتير أوى لى السلم موقفينهم و مش بيتحركوا بس مش عارفه بيعملوا إيه، قعدت أسأل الناس ، كلهم عساكر مش فاهمين ، دخلت جوه لقيت ست فى مكتب قلت أسألها"أنا": ممكن انتخب بالرقم القومى ؟؟؟؟؟؟"هى" : لأ لازم يكون عندك بطائه انتخابية"أنا": ممكن بالرقم القومى ؟؟؟"هى": انت قدمتى على طلب؟؟"انا" : لأ.... ممكن أئدم ؟؟؟؟"هى": لأ.... كام آخر معاد يناير، كان ممكن تعملى طلب فى الحزب الوطنى"أنا" : ممكن اروح أعمل طلب ؟؟؟"هى" لأ.. النهارده لأطلعنا بره نسأل الراجل الظابط مبصلناس لأنه مشغول عالجهاز بيتفخص حال اللجان الأنتخابيه التانيه، فسألنا الراجل اللى قاعد أدام الناس اللى واقفه عالسلم و كررنا نفس الكلام حكايتى و حكاية نرمين"الراجل" : مبصليش و قال لنرمين " أنتى روحى لأى مدرسة فى المنيل".رحنا لأول مدرسة فى المنيل صنايع ............... مشعارفه إيه اتنين ظباط عاليمين فى حالهم ........... ترابيزه عالشمال عليها كشوفات الأسامى (حوالى 1000 ورقه متقسمين) و راجل لطيف مش فاهم حاجه.سألناه ندخل اللجنه دى... قال لازم تلائى إسمك فى الكشوفات، قولناله ممكن تدور على إسمنا ، قال المشكله إن الورق مش مترتب أبجدى، طيب ندور بالرقم ، قاللى مفيهوش أرقام، قلت له ممكن ادور انا قاللنا اتفضلوا دوروا....مالائيناش حاجةنرمين شافت فى بطاقتها منيل غرب وورق الكشوفات مكتوب عليه منيل غرب، واحج كان وائف قاللنا بهزار ، تستاهلواماهو انتم جايين فى حته غلط، و قاللنا ان منيل غرب دى مدرسه تانيه عالكورنيش و ءاللى انت ساكنه فى شارع إيه؟؟؟ قلتله الروضه قاللى روحى معهد الروضه. وانا خارجه سألت واحد من الظباط اللى عاليمين " ينفع انتخب من غير بطاقة انتخابية ؟؟؟ قاللى دورى على إسمك فى الكشوفات اللى تبع منطقتك حتلائيها.رحنا المدرسة النتانية لقينا ظابط قرفان و ست برضه مش فاهمه حااجه اكتر من الراجل اللى فى المدرسة التانيه، قلنالها نخش فين قالت خشوا هنا عاليمين بس أملوا الورقه دى، البيانات اللى فى الورقه كلها ملهاش دعوه بالبطاقه......... طلع ان لازم تتملى من الكشوفات، بيقى لازم ندور على أسامينا الأول. طلعنا الكشوفات المدهوله لغاية ما لائينا أسم نرمين، و طلعت اللجنه رقم 77- ب‘ لما ملينا الورقه الست الطيبه اللى هناك قلنالها نعمل إيه بالورقه ، قالت اديهالى أنا و روحوا اللجنه المشكله إن لجان المدرسه من 176-183 يعنى مفيش 77 أصلا.الظابط الأمور قاللنا انتم جايين من الحزب قلناله لأ إحنا جايين نصوت، ءام ءاللنا إطلعوا فوء، طلعنا فوق لقينا اتنين عساكر مرصرصين من البرد، و مشربوش بء مايه من الصبح . قلتلهم انتوا مفيش شاى ولا قهوه تشربوها، قالولى ياريت.المهم طلعنا الدور التانى طلع غلط، طلعنا الدور الثالث و دخلت نرمين اللجنه و سابونى اخش معاها، و لحوسوها بالحبر و ماكانش فى ستاره ولا حاجه و ماكانش فى حد بيرائب، و ماقارنوش البطاقة الإنتخابية بالبطاقه الشخصيه، أنا الحئيئه كنت حاسه إنى فى جو أسرى دافىء.وبعد كده الظابط سألته سؤالى الشهير : ينفع أروح انتخب من غير بطاقة انتخابية، قاللى لأ ... إسمك مش حينزل فى الكشوفات أصلا.رحت الشغل وانا أفايا يأمر عيش ، وكلمت غاده غاظتنى ان انا اسمى حيكون موجود، كلمت سايس الجراج يتاعنا يروح المعهد و يفرم الكشوفات تدوير، غاب ساعه و رجع و قاللى إسمك مش موجود و الست اللى هناك فى اللجنه بتقولك" متدوريش على إسمك فى الكشف، تعالى و هاتى معاكى بطاقتك الإنتخابيه و هى تخليكى تصوتى....قلتله خلاص يا حسنين، انا حئعد اصوت هنا فى المكتب

.The End.