وحياة المرسيدس ما تلعبوا اللعبة دي

: معطيات عالمية

الولايات المتحدة الأمريكية وإسرائيل عندهم مشروع الشرق الأوسط الجديد، واللي نشروا خريطته على العالم

المشروع ده بيهدف إلى تقسيم المنطقة تقسيما طائفيا ومذهبيا وعرقيا

قلت لي ليه؟

من باب كلم الـ...الشاطرة، مشيها الشاطرة، تلهيك واللي فيها تجيبه فيك

"انتوا رجالة يعني؟ وعمالين تقولوا احنا رافضين الكيان الصهيوني لأنها دولة عنصرية؟ طيب احنا بقى ح نخلي لكوا المنطقة كلها عنصرية"

طول عمرنا بنقول اسرائيل جسم غريب على المنطقة، بدل ما نشيل الجسم الغريب، نغير طبيعة المنطقة بحيث تتجانس مع الجسم الغريب، هارش؟

لا مش هارش، عشان كيان صهيوني كبير، ودويلات طائفية عرقية عنصرية حواليه، وابقوا ورونا اسرائيل ح تبقى عدو ازاي، هارش؟

يعني بيأيفوا المنطقة على مقاس إسرائيل

: معطيات داخلية مصرية

وضع اقتصادي مهبب بستين نيلة

قانون طوارئ وانا مش ح افسر بقى

نتج عنهما وضع لا انساني ومظالم مهولة تقع على كافة فئات الشعب

واذا الاغنيا مش بيعانوا من سوء احوال المعيشة

فهم بيعانوا من قانون الطوارئ وازمة حرية الرأي

هارش؟

مصر بقالها تلاتين سنة عاملة سلام حكومي مع الكيان الصهيوني وعداء شعبي متزايد ضد هذا الكيان

مصر تتميز بان تكوينها البشري لا يعرف العنصرية

مصر تاريخها بيخليها منتمية لكل حضارات وثقافات المنطقة

مصر كانت نقطة الالتقاء لكل بلاد وشعوب المنطقة

هارش؟

: تحركات غريبة

حركة نوبية بتستعرض المظالم اللي واقعة على النوبيين

أقباط المهجر بيعملوا حاجات معينة كده

اضطهاد الإخوان المسلمين بشكل مريب بيؤدي لتكتيل أتباع الديانة الاسلامية في جهة واحدة واحساسهم بالظلم

شوية ناس مسميين نفسهم المثقفين دلوقت بالذات بيطالبوا بإلغاء المادة التانية من الدستور غير المعمول به أصلا

منع البهائيين من تسجيل ديانتهم في البطاقة عشان هم كمان يتكتلوا في جبهة واحدة بسبب تعرضهم للاضطهاد الحكومي والشعبي

شوية ناس مسميين نفسهم السلفية دخلونا في معركة ما نعرفش عنها حاجة مع الشيعة

: تعقيب

معلش

احنا مش ح نهرج

سوء أحوال المعيشة اللي نوبيين بيقولوا انهم بيعانوا منها، بيعاني منها كل المواطنين في الصعيد، والطبيعي ان فقراء مصر يطالبوا بتحسين أحوالهم المعيشية

مش حاجة غريبة انهم يقولوا النوبيين بيعانوا من سوء أحوال المعيشة، مع إنهم ما يفرقوش حاجة عن أي مواطن في الصعيد؟

ما يعنايه الأقباط هو تماما ما يعانيه المسلمين، وكلهم مواطنين مصريين مضطهدين زي ما البابا شنودة قال، والمفروض إن مطالب الأقباط هي مطالب مواطنية عادية زي مطالب المسلمين بالظبط

مش غريبة إن أقباط المهجر بالذات، دونا عن بقية أقباط البلد يتكتلوا ويطالبوا بمطالب مواطنية بس بوصفهم أقباط مش بوصفهم مصريين؟

تعديل مواد الدستور المفروض لا يتم الا باستفتاء ، وهو ده الطبيعي، مش غريب ان اللي مسميين نفسهم مثقفين وبيدعوا انحيازهم للديمقراطية يوجهوا كلامهم لرئيس الجمهورية بإلغاء المادة التانية، واكرر غير المعمول بها، دون حتى الاشارة لعمل استفتاء عليها؟

وبعدين هو الدستور كله بيطبق؟

اشمعنى المادة التانية؟

واشمعنى بيطالبوا رئيس الجمهورية؟ مش بيطالبوا باستفتاء على المادة التانية؟

واشمعنى دلوقت؟

واشمعنى الحملة دي تتعمل على الإخوان المسلمين اللي الدولة قبل كده بثانية ادتهم فرصة يدخلوا الانتخابات وينجحوا فيها؟

وايه اللي طلع البهائيين دلوقت بالذات؟

ومن امتى بلد الازهر بتتعلم الدين من ناس مش معروف لهم مصدر ؟ من امتى بلد الازهر اللي بتوحد المسلمين وبتأسس لاحترام الاختلاف بين المذاهب والاخذ بها جميعا بتنساق ورا المعارك المذهبية؟ من امتى بلد الوسطية بقت بلد التطرف؟

: استنتاج

الغرض من كل ما يحدث هو تقسيم المصريين إلى طوائف وأعراق ومذاهب

يعني مصر اللي ما تعرفش العنصرية من ايام الفراعنة

مطلوب منها دلوقت انها تتقسم تقسيم عنصري

اضطهاد الاخوان يهدف الى تكتيل المواطنين المسلمين كجبهة واحدة، من خلال شعورهم بالظلم

اقباط المهجر بيسعوا لتكتيل الاقباط لجبهة مقابلة، وربنا يخلي لنا البابا شنودة اللي بيقاوم المخطط ده بكل ما اوتي من قوة وبيتعرض مع ذلك للهجوم من قبل المتعصبين من اتباع الديانتين

وادي النوبيين منهم اللي بيطالب بالاستقلال، ومنهم اللي بيعرض مظالمه بوصفه نوبي مش بوصفه مصري بيتعرض لما يتعرض له كل المصريين من غبن

وايقاع الظلم بالبهائيين برفض الدولة لتسجيل ديانتهم في البطاقة، وعليه فنخلق كتلة تالتة بهائية

مطالبة من يسمون أنفسهم بالمثقفين دلوقت حالا مش قبل كده ولا بعد كده بتعديل المادة الثانية للدستور عشان يقدموا نفسهم بوصفهم علمانيين

الاصرار على خلق الفتنة بين السنة والشيعة عشان حتى لو بقى فيه دويلة اسلامية ضمن الدويلات المطروحة ما يبقاش فيه بينها وبين اي مسلم خارج مصر اتصال غير على اساس مذهبي.

وعليه، وبعد تقسيم المصريين إلى فئات، يبقى من حق كل فئة ان يكون لها دويلة داخل مصر، لان لها بالفعل قاعدة شعبية كبيرة بقى وللا صغيرة مش مهم

سواء الحكومة، أو الاطراف الاخرى ممكن يكونوا مش واعيين قوي للي هم بيعملوه

زي ما محمد هاشم كان بيقول لي: دول اقصى امالهم انهم يركبوا عربية مرسيدس

كان بيرد على تخوفاتي بان امريكا بتخطط لضرب مصر

الكلام ده ما طمنيش، بالعكس ده قلقني اكتر

صحيح كل واحد فيهم أقصى آماله انه يركب عربية مرسيدس ومعتمد على اعتقاد محمد هاشم: لا مصر مش ممكن يحصل فيها كده

ما اعرفش الثقة دي جايبينها منين

على فكرة

العراقيين عمرهم ما كانوا طائفيين ولا مذهبيين، والعائلة الواحدة كان بيبقى فيها مختلف الاديان والمذاهب ومتجوزين من بعض

اما اعتماد البعض على ان الحكومة المصرية حلوة وشاطرة وبتنفذ الاوامر بالمللي

فده برضه اعتماد عبيط

لان الخطة الجديدة بالنسبة للشرق الاوسط الجديد ان يبقى نظام الادارة جديد

يعني امريكا اكتفت من العملاء وخطتها دلوقت انها تدير مصالحها بنفسها في المنطقة

ما حك جلدك مثل ظفرك فتول انت جميع امرك

يعني حتى الحكومة اللطيفة الاميرة دي مالهاش مكان في الشرق الاوسط الجديد

مصر دي....مصر

مالهاش مكان، عايزين يرجعوها زي زماااااااااااااااان لما كانت كلمة مصر تعني المملكة الشمالية

والتانية باين كان اسمها مملكة طيبة

ده غير السواحل

انا مش باحاول اخض حد

ولا كمان باحاول اثبط من عزيمة المعارضين الحقيقيين مش المتأبجين اللي عايزين يعملوا حراك سياسي حقيقي

كل اللي عايزة اقوله

ان اي مطالب سياسية او مواطنية او اقتصادية تتحط تحت اي مسمى غير "مصري" يبقى بتصب في مجرى الشرق الاوسط الجديد

اما بخصوص المطالب الدستورية، فبطلوا تهريج بقى، عشان دي نكتة مش لطيفة خالص وما تضحكش

دستور ايه اللي انت عايزين تعدلوه؟

هو فيه دستور اساسا؟

هو فيه حاجة اسمها تعديلات دستورية من غير استفتاء شعبي على تعديل كل مادة؟

يعني انتوا متخيلين ان تعديل المادة التانية لو اتعمل عليه استفتاء شعبي الناس ح توافق؟ وللا ناويين تفرضوا عليهم التعديل ده؟

يعني البابا شنودة، في حالة الاستفتاء، ح يدي تعليمات ان صوتوا: بلا، فيه ناس ح تسمع الكلام وفيه ناس مش ح تسمع الكلام مش ده المهم

بس ليه كده؟ لعبة الاقباط والمسلمين دي لعبة فيها نار ودم ودمار، ما فيهاش هزار

العربية المرسيدس ح تتحرق لو قامت حرب اهلية، وللا قبل الحرب الاهلية ح تهاجروا وتسيبوانا؟

انا باحب بنت الكلب دي

زي ما هي كده

ويا رب قبل ما تتقسم طائفيا وعرقيا وقبل ما تضربها امريكا اكون مت، مت بكتير قوي وما شوفش اللحظة دي ولا حتى التمهيد بتاعها.

مافيش داعي للمساجلات السياسية والطائفية وكمان العرقية، والنبي حاجة تضحك من امتى عندنا اعراق؟

مافيش داعي للعبة دي، مش هزار، مهما كانت العربية المرسيدس شيك، ومجهزة

مهما زاد الحساب في البنك

اللعبة دي خطر