Friday 2 March 2007

مطالب أنثوية...إن شالله لجمعية الرفق بالحيوان


احنا عايزين وقفة من اللي هي كده،









بصراحة احنا زهقنا،
















أنا شخصيا زهقت


















امبارح كنت باسمع نجوم إف إم،












بيتناقشوا هل ممكن الراجل يساعد مراته في البيت وللا لا!

















وعمالين يقولوا واجبات الست الطبيخ والكنيس والمسح وتربية العيال،















والراجل عليه يجيب الفلوس،















وبعيدا عن إن الراجل ما بيجيبش فلوس،
















ولا بيجيب حتى جاز،















وبعيدا عن إنه يبقى كتر خيره لو ساب لها فلوسها تصرف بيها على عيالها،















وما برشتش عليها،

















وبعيدا عن إن الشرع أساسا بيقول إن الست مش من واجباتها الأعمال المنزلية،






















وإن الراجل واجب عليه شرعا إنه يجيب للست خادم،














طبعا دي أحلام العصافير،















احنا مش عايزين خادم،
















بس يا ريت ما نتعاملش على إننا خادم،















لا وخادم إيه، هو اللي بيدفع فلوس لمستخدمه،

















بعدين قريت فتوى، إن الراجل لو ما بلغش مراته بإنه مسافر يبقى من حقها تطلق،





















الحقيقة أنا زهقت بقى من اللي عمالين يقولوا لنا الإسلام بيدي حق للست كذا وكذا وبعدين يسبونا نرن





















ولما نتكلم، يقول لك لا ما هو لو جوزك ما اداكيش حقوقك يبقى من حقك تطلقي،




















كحك














معناته إيه الكلام الماصخ اللي ع يجولوه ده





















يعني اللي عندها عيال






















وللا مش عايزة تخرب بيتها



















لأي سبب















تقبل الوضع ومطرح ما تحط راسها تحط رجليها؟



















واللي عاجبه ع الكحل يتكحل واللي مش عاجبه يترحل؟



















وعلى رأي
تمر حنة












تقعد الست تشتغل برة البيت وجوة البيت












وفوق البيعة تدلع فأبو عيلاء:









وانت الكل في الكل يا بو عيلاء









والشورى شورتك والكلمة كلمتك يا بو عيلاء










وتروح للمزين عشان تعجب ابو عيلاء
















اللي واحلها في الشغل وفي البيت وفي العيال
















وفي عينه الزايغة اللي عايزة يندب فيها رصاصة

















واما تسأل شيخ يقول: لا ما هو كده حرام




















انت من حقك تطلقي
















يا سلام؟



















يعني انتوا بتخيرونا ما بين التعذيب والإعدام؟















طيب ما فيش إفراج أبدا؟
















يعني معلش يعني


















العشرة بالمعروف فريضة على الراجل











صح؟


















حسن المعاملة فريضة على الزوج










صح؟















الإنفاق عليها والسعي على راحتها فريضة على الزوج،















متنازلين عنها،















بس هو يحط في عينه حصوة ملح ويعمل السلطة مع اللي واقفة تطبخ له وهي لسة بهدوم الخروج،















وللا حتى يحوش عنها العيال على بال ما تخلص طبيخ السم الهاري اللي هو ح يطفحه،















صح؟



















الصدق فريضة على كل مسلم،
















ناهيك بقى عن الزوج،












وما حدش يقول لي: لا ما الرسول أباح للراجل يكذب على مراته،













أيوة، أباح له يقول لها: إيه القمر ده؟


















ده انت أحلى من مارلين مونرو،













الشوية اللي غبتي فيهم وحشتيني،














تلسع الأكل مثلا، يقول لها: والله وهو محروق طعم أكتر،

















لكن يبقى مع مزة ويقول لها كنت في الشغل؟


















ولا يبقى متجوز من وراها ويقول لها أنا رايح عند صحابي في مأمورية عسكرية كلفتني بيها قناة روتانا سينما!



















وتعيش الولية نايمة على ودانها،














وتعيش التانية تتعامل على إنها عشيقة وهي زوجة،












وفي الآخر لما يعرفوا يمسكوا في شواشي بعض،










واسم الله على مقامه هارون الرشيد، سعيد قوي ان فيه نسوان بتتخانق عليه،
















وهو أساسا العفن اخضر على جتته!















ده حلال ده بقى؟

















يعني فيه حياة بتبنى على كدب؟


















في العراق،
















قبل ما يسمحوا للراجل إنه يتجوز على مراته،


















بيطلبوا منه إنه يجيب وثيقة من الزوجة الأولى إنها موافقة على جواز جوزها أو على إنه يطلقها















وعلى فكرة،













ماكانش عندهم حاجة اسمها طلاق غيابي،

















يعني ما يعقلش ان واحدة تصحى الصبح تلاقي نفسها مطلقة



















أو جوزها متجوز عليها،















أو واحد ينصب على واحدة وتتجوزه تلاقي واحدة جاية بتقول لها اتجوزتي جوزي ليه!


















يعني مافيش داعي للمفاجئات غير السارة دي يا خوانا،

















لا عايزينكوا تصرفوا علينا،













ولا تأكلونا،












ولا حتى تضحكوا في وشنا،
















ولا تبطل تبص على الفضائيات وتستنى لما مراتك تجيب العشا وتقعد جنبك عشان تسم بدنها:
















شايفة النسوان؟

















جتنا نيلة في حظنا الهباب،


















ولا عايزاك قبل ما تتكلم كده تبص على عماصك في المرايا،












وتحمد ربنا إن فيه واحدة رضيت بيك.


















كل اللي عايزينه إننا ما نتفاجئش في حاجات تمس حياتنا بشكل مباشر،





















يعني أم عيلاء من حقها ما تصحاش الصبح تلاقي نفسها مطلقة،


















ولا تصحى الصبح تلاقيك اتجوزت عليها،


















ولا اللي اتجوزتها على مراتك تصحى يوم الصباحية تلاقي ست غريبة جاية بتقول لها أنا مرات جوزك يا عروسة،


















وقياسا على ذلك،















ما تبقاش رايح عند مراتك وتقول أنا رايح عند صبحي،














ويا ريت لما تاخد فلوس مراتك ما تبقاش تصرفها على كلام فارغ وتسيبها جعانة هي والعيال،












ولا تصحى الصبح تلاقيك سافرت إعارة وبتقول لها عايزة تيجي معايا اتفضلي















مش عايزة اقعدي لالي لوحدك في البيت،



















ويا ريت لما تبقى عايز تطلق تبطل نتانة،














وما تقعدش تقرف في أمها واللي جابوها لحد ما تقول لك حقي برقبتي،

















خد فلوس وطلقني،



















ويا ريت السادة الشيوخ اللي عمالين يقولوا:
















لا حرام،














حرام راجل يخدع مراته،














حرام راجل يخفي زواجه،















حرام راجل ياخد فلوس مراته،

















حرام راجل يسم بدن الولية اللي خادماه وخادمة عياله واللي يتشدد له،

















حرام الراجل يعلق الست،
















"ولا تمسكوهن ضرارا لتعتدوا، ومن يفعل ذلك فقد ظلم نفسه"





















حرام الراجل يغدر بالست،













حرام






حرام








حرام،












كسبنا صلاة النبي عليه الصلاة والسلام،

















أحسن مكسب والله، بس إيه يعني؟













إيه؟















ما حرمت عليه عيشته البعيد لا بيخاف من ربنا ولا بيعمل له حساب،
















نعمل إيه يعني احنا دلوقت،


















"من حق الست إنها تطلق"
















طيب اللي بتطلق هي اللي بتخسر
















وهو مش خسران حاجة،











الله جاب،










الله خد،















الله عليه العوض،
















سيدنا عمر عمل حد للخمرة مخصوص لما لقاه بيهدد المجتمع،















أيام الرسول ماكانش فيه حد، كان فيه تعزير،













إذن من حق المشرع، لما يبقى فيه خطر بيهدد المجتمع،


















إنه يعمل له حد،


















استنادا على إن الفعل ده حرام،



















وقياسا على إن النشوز له عقوبة،



















لازم يبقى فيه تعزير للرجالة اللي بتفتري وتعتمد على إن الست مش عايزة تطلق عشان خراب البيوت،
















أو إنها لو اتطلقت ح تسيب له الجمل بما حمل،

















وحكاية الخلع دي نفعت الرجالة قوي،














بدل ما يسافر إعارة، يتجوز واحدة ويقرفها لحد ما تدفع له فلوس ويطلقها،















يعني المجتمع دلوقت عرف نوع من الجواز اسمه:













الجواز التكويني،















اللي الراجل بيكون بيه نفسه،




















طيب بقى فين التعزير،






















احنا من حقنا ان الحكومة تشيل عننا شوية مهمة الطرقعة الواجبة لاستقامة الجواز،
















مافيش واحدة بتعمر غير لما تطرقع لجوزها،

















بس ده على حساب أعصابنا،


















وبما إننا شعب يحمل نفسية المقهور،
















فالراجل مش ح يتعدل إلا لما يعرف إنه لما يعمل "الحرام" اللي الشيوخ الأفاضل




















عمالين يتكلموا عليه في الفضائيات، ح يدفع غرامة أو يتحبس،













يا الدفع يا الحبس،













إنما الشور بتاعة، من حقها تطلق دي،














عقوبة للست وللعيال،

















وهو بقى: اللي راح ونسي محبتنا اللي جاي ح يحل محله محله مححححاااااااااااااله.





















وإليكم بعض الاقتراحات فيما يخص الحدود التعزيرية:






















اللي يتجوز من ورا مراته يتحبس سنة ويدفع عشرة آلاف جنيه،


















اللي يفاجئ مراته بالطلاق دون علمها، يدفع غرامة تلات أضعاف مؤخرها،



















اللي يتجوز ست على خديعة، أيا كانت هذه الخديعة، ويتكشف لها إنه كان بيغشها،





















يتحبس سنة ويدفع عشرة آلاف جنيه غرامة،





















اللي يضرب مراته، ينضرب زي ما ضربها بالظبط، وعلى فكرة دي مش فتوى جديدة،

















الأئمة الأربعة أجمعوا على الفتوى دي، أما ابن حنبل فزاد عليها في إن لو القاضي ما وكلش حد يضربه،













يبقى من حق أبوها وأخوها إنهم يضربوه،

















وإلى جانب بقى إنه يضرب يدفع غرامة عشرة آلاف جنيه،



















اللي يعلق زوجته ويقرفها عشان تبريه أو تدفع له فلوس،





















يتحبس نفس المدة اللي هو علقها فيها بالظبط،















يعني لو علقها شهر يتحبس شهر، لو علقها سنة يتحبس سنة،















ويدفع غرامة تلات أضعاف مؤخرها اللي هو كان عايز يتهرب منه،


















وما يسمحوش له كمان انه يطلقها غير بإذنها تعزيرا له،




















عقوبات نشوز المرأة كلها متصلة بالكرامة عشان الست بتخاف على كرامتها،














لكن الرجالة بيخافوا على فلوسهم، خصوصا عندنا في مصر،

















وبيخافوا من الحبس، خصوصا بعد فيديوهات التعذيب،















لما كل واحد يبقى عارف إنه لما يفتري على مراته ح يدفع فلوس أو يتحبس، أو الاتنين مع بعض،















ح يلم نفسه،













وبكده تضمن الدولة السعادة الأسرية،















وتوفر على الست مجهود الطرقة، والشبشبة، والإرهاب الفكري
















اللي بتضطر الستات تلجأ ليه عشان بيتها ما يتخربش.




















ودي العقوبات اللي خطرت في بالي،





















اللي عندها مشكلة ممكن تقول، ونحدد العقوبات التعزيرية.























هس ولا كلمة،















ما اسمعش حس راجل واحد،

















انتوا ليكوا عين تتكلموا؟



















لا فلوس بتصرفوا،














ولا عيال بتربوا،














ولا حتى بتشيلوا طبقكوا،













أمال عايشين في الدنيا ليه؟


عشان تقرفونا وتنكدوا علينا وتبصبصوا كمان؟

والله لو حكومة قارفاكوا احنا مالناش ذنب ما احنا مقروفين معاكوا،

لو رجالة صح بسكوا على الحكومة، خايفين؟

يبقى اتوكسوا وما تقرفوناش احنا

















مش مكسوفين من نفسكوا.

















مليتوا البلد
.
تحديث:
بالنسبة للأخوة اللي كل ما يصبح على مراته
يرمي عليها يمين طلاق
وبعدين يروح لشيخ يقول له أنا طلقت مراتي اتنين وخمسين مرة
شوف لي حل يا عم الشيخ انا عندي عيال
ملحوظة: دي حادثة حقيقية
ويبدو ان دي عادة مصرية قديمة لان ابن تيمية لما جه مصر ابطل كل انواع الطلاق ما عدا الطلاق السني
وانا باطالب بتتطبيق رأي ابن تيمية عشان الستات ما تبقاش
حياتها متعلقة على لسان راجل سفيه
تاني حاجة ان الاخوة اللي زي أبو اتنين وخمسين مرة
يتحبسوا
يتحبسوا
ولولا الملامة كنت قلت يتقتلوا
يتحبسوا وكل ممتلكاتهم ومالهم يؤول للزوجة اللي رمى عليها يمين من غير مناسبة
حاجة تانية خاصة بآلاف من قضايا النسب اللي قدام المحاكم ومجهولي النسب اللي في الشوارع
لو ثبت النسب بتحليل الحامض النووي يثبت النسب
ولو ثبت الزواج باتنين شهود ذكور او رجل وامرأتان يثبت الزواج
وفي الحالة دي يتم حبس الزوج المنكر للنسب والزواج أيا كانت جنسيته
خمس سنين لانكار النسب وخمس سنين لانكار الزواج مع دفع التعويض اللي تطالب به الزوجة
عشان لما واحد يقول اصل مراتي بتضغط على اعصابي يعرف انه لما يرمي يمين هو ما يقصدهوش ح يتحبس ح يتحبس
يعرف ازاي يبقى راجل ويتحكم في اعصابه ويتحمل مسئولية اليمين اللي ربنا حمله له
ويعرف كل الرجالة سواء مصريين او العرب اللي بيجوا يتجوزوا في الصيف ويمشوا
إن بنات الناس مش لعبة حتى لو كانوا فقرا
وانهم مش ح يخلفوا ويرموا ويفلتوا بعملتهم السودا
توضيح واجب عشان زعل الضارب:


الرجالة اللي ممكن يزعلوا من البوست ده هم اللي بيعملوا الممارسات دي، لكن مش يجي واحد يزعل ويقول لي انا مش باعمل كده، ليه بتقولي علينا اننا كلنا كده؟ أنا ماقلتش ان كل الرجالة كده، عشان الزميل الضارب زعل مني وافتكرني باتهم كل الرجالة، أنا كل اللي باقوله، إن القوانين سايبة الستات تحت رحمة الراجل، يا يطلع متربي وابن اصل، وفي الحالة دي نو بروبلم، يا يطلع ابن ستين في سبعين، وفي الحالة دي مطرح ما تحط راسها تحط رجليها. كمان أظن إن الرجالة اللي بيتقوا ربنا، المفروض إنهم يبقوا داعمين للاقتراحات دي مية في المية وأكتر مني، وزي ما قلت لضارب، أنا لما ابقى كويسة واشوف واحدة وحشة بتتساوى بيا، بل وحظها كمان احسن من حظي ح اتفرس، نفس الحكاية بالنسبة للازواج، لما تبقى زوج طيب وبتراعي ربنا، وتشوف راجل مفتري وعايش احسن منك، ومراته بتعمل له الف حساب من باب "القبيحة ست جيرانها" اكيد ح تتفرس، وتبقى ح تطق، يبقى لازم الراجل المفتري ياخد جزاءه، وما تبقاش الست، أو الطفل، أو أي إنسان تحت رحمة إنسان خالص كده من غير قوانين تحميه. ما ينفعش نسيب الناس لضميرها، والا نلغي كل القوانين بقى، وللا إيه؟

1 comment:

Anonymous said...

أشكرك على هذه المقالة الجميلة وكنت أود من السادة زوار الموقع زيارة موقع أكلاتى www.akalaty.com ويقوموا بإرسات أكلاتهم المميزه على الموقع.وتمتعوا أيضا بقائمة الوصفات الموجوده به