Tuesday 27 March 2007

ومين قال اننا عندنا مشاكل


هذا التقرير وصلني من المهندس محمد ابراهيم
: عبر الميل
بالأرقام .. حصاد حكم مبارك
حصاد حكم الرئيس محمد حسني مبارك
(1981-2005)
إحصائيات من جريدة و مؤسسة الأهرام
الأحوال المالية
ديون : (إجمالي 750 مليار جنيه)الفقر: 39% من الشعب تحت خط الفقر ( أقل من1 دولار في اليوم)نقود مهربة : 300 مليار دولار ( خرجت من البلاد)الجنيه المصري : (الدولار= 85 قرش1981م )( =6 جنيهات 2005 م)
الأحوال الصحيةالسرطان : تضاعف 7 مرات ( أعلى نسبة في العالم).(راجع مبيدات يوسف والي)ذبحة صدرية :20 % من الحالات شباب تحت الأربعين.البلهارسيا : أعلى نسبة في العالم.السكر :‏7‏ ملايين (‏10%‏ تقريبا من الشعب)التهاب كبدي : 20%من الشعب (أعلى نسبة في العالم(فشل كلوي : أعلى نسبة في العالم.شلل الأطفال : موجود في6 دول في العالم فقط منهم ( مصر)الاكتئاب : ‏20‏ مليون مواطن.أمراض نفسية ( أخرى): ‏6‏ ملايين
التدخين : 80% من البالغين مدخنين (غير شيشة البنات)التلوث : أعلى نسبة في العالم ( راجع شارع الجلاء)
الأحوال الإجتماعيةالقضايا : 20 مليون قضية بالمحاكم ( أقدمها من 38 عام حتى الاّن)البطالة : 29% من القادرين على العمل.حوادث الطرق : 6 آلاف قتيل ( ما بالك بالمصابين)الطلاق : 40% من حالات الزواج سنوياً (25% في أول عام)العنوسة : 9 مليون عانس ( 4 مليون فوق 35 عام)الهجرة : راجع هروب الشباب وموتهم على سواحل أوروبا.الأُمية ( الحالية) : 45% من الشعب المصري ( قبل الشهادات المضروبة)الأُمية ( المستقبلية) : 7% من الأطفال لا يدخلون المدارس بسبب الفقر.التعليم : دروس خصوصية ، كتب خارجية ، جامعات خاصة.عمالة الأطفال : راجع الورش ومصانع بير السلم.أطفال الشوارع : راجع الشارع المصري ( الأمم المتحدة : 100 ألف طفل) عشوائيات : 75% من الشعب يسكن العشوائيات ( 35 منطقة بالعاصمة)الفقر : 39% من الشعب تحت خط الفقر( أقل من 6 جنيه يومياً)موظف الحكومة : ( تحت خط الفقر ويؤخذ منه ضرائب) (دولار للفرد يوميا )المخدرات : (ننفق 6 مليار جنيه) (لك أن تصور عدد الشباب المدمن)( رشوة، محسوبية، بلطجة، توريث المهن، عُري، زواج عرفي، قتل الأزواج، امتهان النساء، ألفاظ بذيئة، صحافة جنسية، غش جماعي ، تسول )
الأحوال السياسية( سيطرة وفساد النخبة الحاكمة، مراكز قوى، الإعداد لتوريث الحكم، قمع المعارضة، إعتقالات، تعذيب حتى الموت، انتهاك لحقوق الإنسان، إالغاء دور النقابات والجمعيات الأهلية)
الأزمــات: ( تعليم، إسكان، زواج، عمل، صحة، أخلاق، ضمير، مرور، مواصلات، مياه نظيفة، صرف صحي،البناء على الأرض الزراعية، تصحر، زحام، غلاء )
الأرض الزراعية: ( تم تجريف مليون و200 ألف فدان أرض خضراء من 5000 سنة) من أصل (6 مليون فدان)
------------------------------------------------
انتهى التقرير
وانا بقى عندي الحل بمنتهى السلاسة
وانا كنت ولازلت اظن ان مشاكل مصر
مافيش اسهل ولا ايسر منها
:واليكم الحل اللي تفتقت عنه قريحتي العبقرية- غصب عنكوا عبقرية -


ديون مصر
150
مليار دولار بس

بالمناسبة الدولار بخمسة مش بستة

طيب يعني ابراهيم نفخو (نافع سابقا) عنده تلاتة مليار جنية

وساويرس عنده 10 مليار دولار ( مش ح ناخدهم كلهم تلتهم بس)

اظن ده واجبه قصاد الخمرة اللي بيسقيها للبشرية كلها اللي في مصر.

ولو اخدنا مليار واحد بس من كل رجل اعمال، اللي هم افقر واحد فيهم بيلعب في تلاتة مليار دولار يعني 15 مليار جنيه

ح نسد ديون مصر.
طبعا احنا ح نسد ديون مصر
وهم ح يسبوا ديون مصر
معلش ده واجبهم الوطني

الناس بقى اللي تحت خط الفقر

يعني لو مليار كمان من السادة رجال الاعمال نعمل بيه مشروع ورش ونشغل الناس دي

ومليار كمان نصلح بيه التعليم

ومليار كمان نصلح بيه الصحة

يبقى كده اخدنا من كل رجال الاعمال تلاتة مليار تانيين نصلح بيهم اهم تلات حاجات مسببة لنا المشاكل

الصحة والتعليم والبطالة

ومليار بقى كمان نصلح بيه العشوائيات

ولو الناس لقت شغل ودخل يكفيها وعلاج وتعليم لولادها وسكن انساني، ح تلاقي الاخلاق بقت كويسة والايجابية وكل حاجة ح تبقى ميت فل وسبعتاشر.
وطبعا اطفال الشوارع ح يختفوا
مين ح يرمي عياله وهو عنده فلوس يأكلهم

يبقى كده اربعة مليار جنيه غير اللي اخدناهم عشان نسد ديون مصر

يجي واحد يقول لي (بعد ما يكون اصدر صوت وعمل اشارة وقال كلمة اعتراض من تلات حروف) : يا سلام

ومين اللي ح يديكي ده كله.

اقول له رجال الاعمال،

ح يقول لي لفظ مش كويس وبعدين يقول لي ليه يعني في مقابل ايه؟

اقول له: في مقابل انه يعفى من الضرائب بقية حياته،

والدولة تسكت على سرقاته، وتجارته في السلاح والمخدرات والدعارة ودعارة الاطفال والشواذ وخلافه.

ح يقول لي برضه لفظ مش كويس ابدا، ويعمل برضه اشارة عيب، ويقول لي: دولة ايه يا ام دولة، اذا كانت الدولة نفسها مشاركاه في كل انواع التجارة دي.

ساعتها ح اتلبخ واتلجلج واقول له: على فكرة انت قليل الادب وبتعمل اشارات واصوات مش كويسة وبتقول كلام عيب.

ح يقول لي: ما تغيريش الموضوع.

ح اقول له: لا يا.....(كلمة مش كويسة) مش انا اللي باغير الموضوع انت اللي مش عايز تغير الحكومة اللي انت بتقول عليها مشاركة رجال الاعمال في السرقة وتجارة السلاح والمخدرات والدعارة يا قرني.

مش بااااااارضه؟

39 comments:

Anonymous said...

اولا كويس انك كتبتى عشان كنت قلقان عليكى
ولسه كنت بشوف اتصل بيكى ازاى
ثانيا بقى نخش ف الموضوع يا ابلتى واقولك انه لازم يعمل كل الاصوات اللى ممكن تتعمل و تعمل حركات بكل ايديه مش عارف ازاى بس انتى بتحلمى بمدينة فاضله
او ناس ملايكة وده طبعا مش ف مصر
اللى ف مصر يعرف ان الفلوس بتجيب فلوس مش بتتبرع بفلوس
فى كل الدنيا الناس الاغنيا بتدى ولو من باب حب الشهرة انما ف مصر الاغنيا بيدوروا على السلطة و الواسطة و الفساد عشان يجيبوا فلوس اكتر من الدم الحى بتاع الغلابة
وسلميلى على رجال لامؤاخذه الاعمال

Anonymous said...

المشكله بقي مش في كل دا ... اللي يحرق دمك ان في ناس ماليين الشارع عمالين يهتفو ومعالقين يفط طولها وعرضها تسعين متر نعم للتعديلات الدستوريه _علي رأي عادل امام في فيلم مش فاكرة اسمه بدل ماتعملو يفط ادو القماش للناس اللي مش لاقيه تكسي عيالها_ في الاول بصراحه افتكرتها يافطه واحدة قولت لصاحبتي اللي كانت راكبه معايا التاكسي اكتبي اسم صاحب المحل دا في ورقه عشان مش هنتعامل معاه تاني شويه ولقيت يافطة تانيه قولتلها ودا كمان .. وبعدها بشويه لقيتنا محتاجين كراسه عشان اكتب فيها الناس اللي قررت اني اقاطعهم _طبعا مافتنيش اني اشوف نظرات سائق التاكسي اللي تقريبا وطنيته كانت حرقاه وكان مقرر تقريبا انه يطلع بينا علي امن الدوله عدل _ طب لو فرضنا ان في واحد قرني وعاجبه اللي بيحصل وجاي علي هواه_ودا غالبا بيكون من رجال الاعمال اللي بيكون له مصالح مشتركـــــــــــــــه مع الحكومه_ اللي يغيظك بقي اصحاب المحلات التجاريه البسيطة ومقلة اللب والسوداني والفرن الافرنجي اللي معلقين يفط ..قعدت افكر واقول ناس بسيطه زي دي ازاي يتم السيطرة بالمنظر دا علي عقلها يعني انا بحس اللي بيعمل كدا يا اما عبيط وزي الاطرش في الزفه ومش فاهم اي حاجه في اي حاجه غير مات الملك عاش الملك يا اما حياته بمبي بمبي علي رأي سعاد حسني وغالبا في الحاله دي هايكون مش م البلد دي ...
والله يا جبهة يابنتي حاجه تقرف وتسد النفس وتستاهل ان الواحد يعترض بكل الحركات والالفاظ الممكنه والغير ممكنه

مع تحياتي لحلمك الوردي

Anonymous said...

آآآه

Anonymous said...

يا حاقدة يا مليانه من جواكى حاجات سودة وبنى غامق عيب تقولى كده على الراجل اللى بيحكم بلدكو
احنا عندنا فى عزبة الحاج ابو جمال اللى يخترف كده ويلغوص فى الحلل نحدفه فى الرشاح ولو راجل يستاهل بنخلصه من رجولته عشان ميبقاش عار على عزبة الرجال العزبة اللى بيحكمها ابو جمال
خسئتى يا بنت نجم

Anonymous said...

none
بعد الانتخابات الكثيرة اللى مرت علينا فى السنوات الاخيره دى وخبرتى مع الحزب الحاكم
اكاد اجزم ان اليفط دى وليده بديلين لا ثالث لهما
الاول ان الناس دول مجبورين او مدفوعين اما بالطلب المباشر او بدافع الحاجة لواسطه او محسوبية
و الثانى ان الحزب لاحاكم دائما ما يفاجئنا بهداياه الثمين مثلا 10 جنية او بطانية او خلافه فمش بعيد يعنى يتكفل باليفط و ثمنها بس المحل يحط اسمه عليه
وسلملى على فلوس رجال الاعمال
هى دى اوجه الصرف من رجال الاعمال مش تقولولى يتبرعوا ... قال يتبرعوا قال ...

Anonymous said...

طارق

حد جاب سيرة التبرع؟

انا باقول ناخد

فلوسنا دي وللا مش فلوسنا؟

مش قوتنا وضرايبنا وقطاعنا اللي اتباع لهم برخص التراب ده؟

والحقيقة الحكومة بتاخد منهم فلوس كتير

بس يا ترى بتروح فيييييييييين؟

none

دي ناس غلبانة

وناس كتير من اللي راحوا

واخدوا وجبات زي الست اللي قالت دول ناس طيبة وبيدونا وجبات

معظمهم فاكر انه رايح يقول نعم للرئيس مبارك

فيه واحدة بس مثقفة قوي قالت: انا مع الرئيس في التعادولات



محمد جعفر

سلامتك من الآه

الحاج ابو جمال

صحيح معاك حق

اخلاق القرية اللي علمها لنا الرئيس الراحل انور السادات بتقول ان كل واحد يبص للي اقل منه مش للي اعلى منه

بس بالنسبة للناس اللي في العشوائيات اللي بتبيع اعضاءها عشان تاكل لحد ما فضيوا خالص

مين اقل منهم؟
على فكرة مدونتك تحفة

Anonymous said...

نواره
أولا كويس أنك شغاله بوستات عشان الواحد يطمن عليكي لاني بجد كان عندي احساس أنك حيتقبض عليكي بس الحمد الله
من غير أصوات وحشه أو كلام قبيح ...كلامك جميل و لكنه بالنظر لواقع الحزب الوثني و حكومتنا الرشيده يبدو ضربا من ضروب اليوتوبيا و الخيال...بس علي فكره أنا موافق عليه كلمه كلمه...رشحي نفسك و أنا حنتخبك علي طول حتي لو فيها معتقل بس تعينيني نائب الرئيس
بقولك ايه شفتي المسخره بتاعه الناس اللي شايله يفط نعم لمبارك و نعم للدستور و لا الناس اللي مصورنها في الجرايد و كله كوم و صوره الست اللي مسخسخه علي روحها من الضحك و هي بتصوت كوم تاني...هوا الدستور لذيذ أوي كده يا نواره؟
أنا عاوز بوست منك عن المسخره دي
تحياتي لكي

Anonymous said...

انتي كنتي فيين يابنتي انا قلقت عليكي

للاسف معنديش تعليق على كلامِك انا محبط آخر حاجه

بس انا عندي طلب شخصي ...

عايز اعرف رأيك في الكلِمات دي

Anonymous said...

yslam afkarik :)

w kaman el 7iwar elli fil a7'ir da gameel gidan w fa2r lol

Anonymous said...

اليفط الموجودة فى الشوارع اجباريا على اصحاب المحلات او حتى لو كشك سجاير


وامرهم بها رئاسة كل حى , واليخالف الاومر دى مش هيلاحق من المخلفات ولا هيلاحق من البلدية

Anonymous said...

لا انتى كده بتهرجى ايه اللى انت بتقوليه ده طب خليهم بس يبطلوا سرقة لمدة سنتين والباشا الوريث يرحل لمدة سنتين هوا والحرامية بتوعه صدقينى البلد ديه هتدفع ديونها واكتر شوية

Anonymous said...

بكرا حفله شاكيرا
exclusive
لعملاء موبينيل بابا ساويرس عاملهم المفاجاءه دى بم ان عددهم جاب العشره مليون وقابليم بالشبكه الوسخه بتاعته زى ما كانت واحده صحبتى بتدعى عليه كل يوم لان فوق بيتها شبكه تقويه موبينيل و الموبايل عندها مسقط شابكه ههههههههههههههههههههههه
المهم بقى هم دول الى عاوزاهم يدفعوا فلوس قال ايه نص ثروتهم
والنبى ارحمينى انت كمان يلا ياولاد روحوا الحقوا اشتروا تذاكر ماما شاكيرا بس الى مش من عملاء موبينيل يمسح طيزه فى الحيط شوفتوا بقى بابا ساويرس ممتعكوا ازاى
يحيى

Anonymous said...

امتع تعليق سمعته من الإخوة المغيبين..واحدة بتقول يا سلام لو كل عسكري امن مركزي يفكر شوية قبل ما يهاجم الناس الي بيعارضوا دول وبدل ما يضرب في المتظاهرين يدور ويضرب في الظباط ...مش كان زمان كل مشاكلنا اتحلت؟؟ طبعا البنوته الي قالت كده نفسها الحل يجي بطريقة اللهم اهلك الظالمين بالظالمين...واخرجنا من بين ايديهم سالمين غانمين..منغير تعب ولا بهدلة...نقوم من النوم كدة نلاقي مصر بقت جنة...اللذيذ بقة ان الأمورة دي مش من الجهلة الي صوتوا و هما مش فاهمين حاجة ... لا دي من الناس الي اتصرف علهيم طول حياتهم تعليم وخلافة....لما المتعلمين كدة...مستنيني ايه من الجهلا

Anonymous said...

هو فيه يا شباب

انتوا اتخضيتوا ليه انا رحت الشغل بس

اكتر من حد قال لي قلقنا....

لا الحمد لله انا بخير عمر الشقي بقي

بالنسبة لحفلة شاخيرا فانا شايفة ان ارباحه تروح لصالح عمل خيري برضه

يعني مثلا نعمل حملة تبرعات لصالح محبي الكفيار

ونعمل شنط كفيار ونوزعها على الفقراء والمساكين من سكان جردل ستي والزمالك ومدينة الرحاب اللي واحدة قالت عليها: اللي بناها بن لادن بتاع العراق عشان يستخبها فيها

سكوت ح نصوت

انت سمعتي الولية دي فين؟

Anonymous said...

رغم أنى ماحبيتش قوى أعلق عندك لأن أسلوبك فيه صريخ و انا ماباحبش الدوشه
لكن موضوعك بجد حساس للغايه .. و سبق طرحه و دراسته بشكل علمى فى أكتر من جامعه شاركت منهم فى أكاديمية السادات .. و كلية تجارة طنطا تحديدا عند دراسة مواد أدارة الماليه العامه أو فكرة الحوكمه
مبدئيا الأخ اللى هايعمل الحاجات قليلة الأدب دى من الأول تقوليله احنا مش بنشحت .. احنا بناخد الحق .. و من غير تأميم و لا ادنى شبهة اعتداء على رأسمال الأفراد الوطنيين ..و اما يقولك ازاى بأدبه ؟ ( لو قل أدبه أديله بالجزمه و اندهيلى أكمل عليه )تقوليله نراجع العوائد المتحصله للمستثمر من عمليات الخصخصه .. يعنى .. نقيم رأسمال كل شركه بعد خصخصتها .. يقولك أزاى يعنى .. تقوليله مثلا نراجع حجم رأسمال شركة موبينيل لوحدها بعد ماشتراها ساويرس باتنين مليار جنيه قروض من بنك .. هايوقلك همممممممممم .. و بعدين؟
تقوليله الشركه دلوقتى بتحقق عائد شهرى اتنين مليار فى الشهر .. يعنى على مدار الخمس سنين اللى فاتوا ميه وعشرين مليار جنيه دخلوا جيب ساويرس بعد ماصرف اتنين مليار بس و دى حصته فى رأس المال .. و بما أنه متولى الأداره بالكامل و ناجح و زى الفل .. نديله كمان ربع الأرباح حلال عليه عشان هو فعلا عبقرى أداره .. و يتبقى من الأرباح تسعين مليار جنيه تقريبا .. دول بقى بموجب قوانين حماية الملكيه الفكريه و حقوق التأسيس .. يبقوا ملك المؤسس الأول للشركه .. يعنى الدوله ولا مؤاخذه .. و لو وقفنا قدام أى منصة تحكيم تجارى بموجب اتفاقية الجات .. هانكسب بالثلث .. مش هانعتدى على ملكية ساويرس الخاصه .. و مش هانحرمه من ارباحه بس هانحصل حقنا .. و بالقانون
و طبعا ده ينسحب على حديد عز .. و أسمنت حسن راتب .. و غيره و غيره و غيره
طبعا هاتسألينى يعنى أيه حقوق تأسيس و ملكيه فكريه .. خلينى اضرب لك مثال .. نتخيل أن حضرتك ربنا فتح عليكى و أنتجتى مثلا ماركة ملابس .. نقول جلاليب بلدى .. و سميتى الماركه تهييس مثلا .. جيت أنا اشتريت مصنعك و أصوله المنتجه و قبضتك الفلوس .. بس استخدمت نفس الموديل و الماركه اللى حضرتك بفكرك أسستيهم .. ساعتها هايبقى حقى تماما آخد أرباح على رأس المال اللى دفعته .. و كمان حقى من الأرباح عن الأداره .. لكن الفرق بقى .. لازم يرجع لسيادتك كحق شرعى لأنتاجك الفكرى و تأسيسك لماركة جلاليب تهييس
أحنا مش بنشحت من حد .. و مش بنأمم ولا نصادر ولا ينتجاوز أى قاعده من قواعد حقوق النسناس ( الأنسان سابقا ) أحنا لما بناخد من المستثمرين حقوقنا عن ملكيتنا لفكرة التأسيس و مجهودنا وتضحيتنا فى تأسيس البنيه الأساسيه نبقى بنطبق القانون
و ماتسمحيش لحد يقولك كلمه قبيحه و انتى بتطالبى بحقك ..و طبعا أنتى كمان ماتقبحيش
و دمتم

Anonymous said...

آه .. و على فكره .. اللى أنا باقوله ده بيتعمل فينا فى صناعة الأدويه مثلا .. يعنى كل دواء مصر تنتجه رغم أن تكاليفه المباشره كلها مدفوعه من جيبنا .. ألا أن نسبه من خمسين ألى تمانين فى الميه من أرباح بيع الدواء بتندفع للشركات الأجنبيه اللى اخترعت الدوا أو اسست فكرته .. حسب اتفاقية الجات و حقوق حماية الملكيه الفكريه
مش عاوز افقع مرارتك و اقولك لننا بندفع لأمريكانا بتاعة السندوتشات حقوق ملكيه لأستخدام اسمهم .. و بندفع لشركه تركى و احنا بننتج عربيات دوجان و شاهين .. و غيره و غيره و غيره
يعنى اللى باقول نعمله بيتعمل فينا بالظبط .. يبقى الأفندى قليل الأدب ده تقوليله عامل اسد علينا و فى الحروب نعامه ؟ روح اتوكس يابعيد
ولا اقولك ..بلاش تشتمى عشان عيب .. احنا مؤدبين ..بس مش مغفلين .. و بنطالب بحقوقنا صح .. و تأكدى أن هاييجى يوم يتغير الوضع .. و نطالب بكل ده بالقانون .. و نحصل اللى لينا من عين التخين ..

Anonymous said...

و على فكره من أقدم عقود الملكيه الفكريه اللى بندفع عليها فلوس للشركات بره ماركة جيل بتاعة لامؤاخده الغيارات الرجالى .. كل طقم فيه سبوبه للشركه الفرنساوى صاحبة أسم جيل .. و كابو
وساويرس نفسه بيدفع حقوق ملكيه فكريه على ماركات الخمره الجديده اللى بيعبيها فى مصر .. هنيكان و دينزمور و غيره

Anonymous said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
اظن انت عارفه بضحك على ايه.يحيى

Anonymous said...

وما خفى كان أعظم
التوقيع مواطن من العريش
www.elarish.blogspot

Anonymous said...

يا بنتى إنتى فاكره مصر دى فقيره؟
هما فعلا يبطلوا يسرقوا و البلد دى حتتنغنغ فلوس.
مصر مش أزمتها ازمة فلوس، مصر أزمتها أزمة "إمخاخ"

مصر أزمتها من ساعة ما الناص العباقره بتوعها هجوا من البلد و طفشوا و هما شباب، زى أحمد زويل و مجدى يعقوب ، و كتير غيرهم يمكن منسمعش عنهم حاجه، لكن هما أصلا من الناس اللى بنت إقتصاد امريكا و أوروبا.
(أنا سمعت إن ثلاثه من نواب بيل جيتس فى مايكروسوفت مصريين)

المشكله أن النخبه دى مشيت و سابولنا إحنا بقى الناس الكسر.
علشان كده اصلا تحسى إن الناس اللى بتحكم دى آخرهم ثانويه عامه ، وواخدينها بالعافيه كمان.
و المشكله دى حتحصل فى جيلنا لأن الناس خلاص يا إما طفشوا من البلد، يا غما مستنين الفرصه علشان يطفشوا.

Anonymous said...

الاخت العزيزة نوارة تهييس
انا من ساعة ما دخلت عندك المدونة وانا بنقرا أشياء معبرة جدا وبقالي كام يوم مواظب عليها جدا واجمل ما فيها انها بتعبر عن ناس كتيير جدا وبتحاول تكون محترمة لاني شايف الاخوة مناضلي المدونات عملين صورة ذهنية زي الزفت للمدونين (الشيمة القذرة جدا- سب الدين- الشكل الغريب -الشعر الطويل للولاد - الالفاظ الابحية للبنات )صحيح انك ساعات بتسرحي شوية ولكن سرحانك بيكون مقبول ومعدي ومتماشي مع المزاج الشعبي لينا
بحري من اسكندرية

Anonymous said...

هو يعني كل اللي بتقوليه صح يا نوارة
وانت طبعا عبقرية

بس يا ترى مين بس اللي حيقدر ينفذ الحل ده؟

وعلى فكرة الحلول دي تمشي عند كل الشعوب العربية

بس يا خسارة ما فيش حد قادر ينفذها لسة

يللا لازم احنا العرب نعمل زي ما دايما بنعمل ونستنى تجرية حد تاني لما تنجح وبعدين نقعد نقول مش كنا نفذناها احنا؟؟؟ ونلطم ونصوت

يللا خلي رجال الأعمال تسترزق بقى حرام عليكي انت ليه عينك ضيقة كدة؟

ههههه

Anonymous said...

من راقب حال مصر مات همآ

يا بنتى مافيش حد من رجال الأعمال دول حاسس ان مصر بلده اساسآ

حسبى الله!!

Anonymous said...

إزيك يانوارة
أنا عايز أسأل سؤال محيرنى جدا
هو النظام بيعمل فينا كدة ليييييييية؟
إية كمية الحقد اللى بيكنها هؤلاء الناس ضد هذا الشعب المسكين المسالم!!
إحنا عملنا أية نستاهل علية كل دة؟
صحيح "المخصى هايفضل مخصيي"

Anonymous said...

يا خوانا

مافيش مشكلة في رجال الاعمال

هم صحيح حرامية

وتجار دعارة ومخدرات وسلاح وقرف

بس الدولة الشهادة لله مش بس بتاخد منهم ضرايب

دي كمان مشاركاهم

طيب ايه؟

بعد الدستور الجديد

غيروا "الملكية العامة ملكية الشعب" وعملوها: الملكية العامة ملك للدولة وشخصياتها الاعتبارية

الا مين شخصيتها الاعتباريةدي؟

الاستاذ لامؤاخذة المخصي

صاحبتي معجبة قوي باسمك

وبتقول ان ده حال المصريين

حتى قعدت تغني النشيد الوطني الشهير: قوم يا مخصي مخصي دايما بتناديك

يووووووووووو

الاستاذة اللي معجب بادبي ح يغير رايه فيا

Anonymous said...

ههههههههههههههههه
يا بنتي هسألك سؤال هم عمر الشعب العبيد سأل الفراعنه الملوك الحكام اصاب الارض انتوا بتخدوا ايه؟؟؟ ! يا ستي براحتم اهو بيسرقوا والناس بتهلل؟؟؟! الشب لسه لازم ينضف من نفسه !
تحياتي

Anonymous said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

ممكن أرد بدول

لاء جامد أوى البلوج دة

أحييكى

لاء أحييكى تانى

وعادى بقة
أودى

Anonymous said...

مين ح يرمي عياله وهو عنده فلوس يأكلهم
الجملة دي وجعت قلبي قوي يا بنت عمي
منك لله

Anonymous said...

يا جدعان بغض النظر عن ان حصل تزوير ولا لأه

التعديلات دي مش بطالة فعلا

على الاقل بالنسبة الي

بالنسبة لواحد كافر زيي مش فاهم ايه المشكلة لما الحكومة تبعد الاسلامجية عن اي مواقع سياسية دستوريا

و محدش يقولي قانون لان القانون ده الاسلامجية يقدرو يضربوه بالجزمة لكن الدستور اهه ممكن يصد معاهم شوية و طبعا الكل عارف قوة الاسلامجية في بلد زي مصر عاملة ازاي

و المادة 179 و الحريات
طب انا عايز افهم هل في واحد اوحد وحيد من حركة كفاية تم اصدار امر اعتقال له و هو الان معتقل باحد السجون

يا جدعان الارهاب خطر حقيقي بيهدد مصر بالظبط زي ما بيهدد العراق و اديكو شايفين الحرية عملت في العراق ايه و انا واثق ان الحرية و الديموقراطية دلوقتي في مصر هتحولنا لعراق تاني

و حسني و جمال مش زي صدام

و بصراحة بأى جمال هوا رجل الساعة و انا مش ضدو ابدا

يا جدعان السياسة مفيهاش مبادئ

يللا دماغكو

Anonymous said...

انتي بتقوليلي احاسب على نفسي مع اننا لما اتقابلنا انا و انتي كان سؤالي ليكي ايه فرصة ان واحد مدون يحصلو زي ما حصل لكريم عامر
فاكرة ؟؟

بس عموما انا فعلا مش مهتم يعني , و يعني انا كتاباتي مش في قوة كتابات كريم
و بعدين بصراحة انا اتعودت اكتب و لقيت نفسي في الموضوع ده فمش هينفع ابطله

و شكرا على تعليقاتك مرة تانية ولو اني عارف اني مش هقدر انفذ نصيحتك بخصوص امي

Anonymous said...

الموضوع من أوله يثير الحنق والغيظ...ولا أجد ما أضيفه....لكن...


كومنت خاص الــى Thutmose تحوتمس


إذا أحببت أن تفسد اي موضوع ...أدخل فيه عنصر الدين...وأعزف علي وتر الإسلام والمسيحيه..
وسيتحول الموضوع180 درجه.... ويخرج عن مسارة...
رجاءا أرحموا عقولنا...

للعلم انا مش اخونجى ولا اسير على نهج الاخوان

ولكن ذالك راى اى انسان يحترم الذات الانسانية

انت ذكرت ان التعديلات مش بطالة لرغباتك الخاصة بما انك كافر على حد وصفق لذاتك الانسانية وانه تبعد الاسلاميين عن السياسة ,
وانت ايها الانسان لم تستوعب تصريح شيخ الازهر ان الاقبال على التعديلات الدستوريا مثل واجب الشهادة .
وهذا المشهد اذا لم تستوعبها عقليتك فهو اختلاط مباشر , بحدث التعديلات الدستوريا بالدين ولم اطول فى الشرح ولكن الحكومة التى صنعت التعديل وتحذر بعدم اختلاط الدين بالسياسة لم تتمكن بالعمل به وافردته على نفسها بتصريح شيخ الازهر

للاسف انت ادركت التعديلات من مجرد رغبات لك وايضاً فهمك خاطىء من كل النواحى والابعاد

Anonymous said...

نوارة
ماشى التقرير مليان بلاوى وحاجات زفت كتيييييييييييييييييييير
بس عاوز اقول نقطة شايفها مهمة
لو برده رجال الاعمال اللى انتى قولتى عليهم دفعوا باليمين سيأخذونه بالشمال ده إذا وافقوا أصلا
لكن لو كل واحد فينا وضع خطة لنفسه هذه الخطة مفاداها انى اكون إنسان ناجح وبنجاحى ده سواء فى داخل مصر أو خارجها سيصب لمصلحته الشخصية وبالتالى مصر
بمعنى تانى كلنا ننتقد ونشجب ونستنكر لكن مافيش فعل او حركة
بفضل الله أنا عاشق لتراب هذا الوطن ولى هدف هو ان أجعل غده أفضل إن شاء الله شاركت فى كل فاعليات كفاية من مظاهرات وإعتصامات لكن هذا لم يؤثر على هدفى الاكبر وهو أن أكون إنسان ناجح لكى أستطيع خدمة هذه البلد
وبفضل الله سأعمل كمستشار فى تخصص جديد
فى إحدى الشركات العالمية العاملة بالمنطقة وهذا لن يثنينى عن هدفى وهو أن اكون متفوق لكى اكون من هؤلاء الذين يصنعون القرارات ليس لمصلحتهم الشخصية ولكن لمصلحة بلادهم وشعوبهم
حفظ الله مصر وجعلها دائما حرة ومستقرة

Anonymous said...

ابن ناصر

اه وماله خلي الشعب يعيش

بس الشعب مش عايش



ody

عادي بقى

ايه الضحكة دشي

افهم منها ايه؟

تشرقية دشي وللا حاجة؟



دماغ ماك

طالع نكدي لبنت عمك يا بن عمي


تحتمس وح نتكلم

ما تمسكوش في بعض يا ولاد

ما انت يا تحتمس جاي تعمل شقاوة

اه باقول لك حاسب على نفسك

ما انت شايف

اه ياما اه واه يابا ده عيلة واطية ونصابة



عبقرينو

لا

ما ينفعش بلد ما فيهاش نظام تتقدم

ولو كل فرد عمل المعجزات

ومافيش نظام تخطيطي عام ينظم انتاج الافراد

مافيش حاجة ح تحصل

والناس بتشتغل يا عبقرينو

سيبك من الفاشلين بتوع الطبقة المتوسطة

الغلابة بيشتغلوا زي الحمير

بس شغل مش انتاجي

بيشتغلوا سواقين

لعدة اسباب

انهم ما يعرفوش حرفة

للاسف الحرف في تراجع

ولان السواقة بتكسب اكتر

على الاقل في الخليج

ولاسباب تانية اجتماعية

زي ان السواق

اجتماعيا

بيحترم اكتر من الحرفي للاسف

ودي سمة البلاد المتخلفة

ان المهنة غير الانتاجية تبقى محترمة اكتر من الانتاجية

وحتى لو بقينا كلنا بنشتغل شغل انتاجي

مدام مافيش تخطيط ولا نظام يبقى كأننا بنحفر في بحر

امال هي دولة ليه؟

فيه دولة في الدنيا تبقى عشوائية؟

Anonymous said...

السلام عليكم و رحمه الله و بركاته

إزيك يا طنط نواره

الحل اللي إنت قلتي عليه ده...حل خيالي

و إسمحيلي أقول إنه حل فالصو

لأن مشكله الناس مش في قله الفلوس و الفقر اللي هما عايشين فيه..و إلا فالسؤال هيكون

طيب و هو الفقر ده جه منين أصلاً..!!؟

هتردي و تقولي من حكم مبارك

هقولك يعني مش عيب 80 مليون بني آدم يعلقوا وكستهم علي واحد

النظريه مقلوبه

غياب الدين عن المجتمع حاكم و محكومين هو السبب الرئيسي

و ياريت متعمليش حركات وحشه و لا تتنرفزي خالص عليا

مع إني برده معجب بفكره الحل بتاعك..بس رايي إنه مش هو الحل الجذري

Anonymous said...

انا لسه معجب مش بادبك ولكن بجرأتك المقبولة وبالنسبة للاخ تحتمس بلاش نغير المواضيع ونخش في حاجات اسف يعني هبلة لان اللي بيضهد الاسلاميين النهاردة وانت معجب بيه بكرة ممكن يعمل فيك حاجات قلة ادب ( هو كان عماد الكبير مسئول اخواني ولا حاجة ) بحري من اسكندرية

Anonymous said...

حنتكلم

انت فهمتني غلط انا مش ضد الدين و بأيد الحكومة لان الحكومة كمان ضد الدين اليومين دول

انا مش بأيد الحكومة اساسا حتى و انا بقول جمال كويس لان جمال بالنسبة ل بديل عن مهدي عاكف عشان كده هو كويس بس فقط

الموضوع كلو ان فكرة ابعاد التيارات الاسلامية عن اللعبة السياسية دستوريا ده في حد ذاته فكرة كويسة جدا انا بأيدها سواء جت من حسني او من عفريت ازرق

عشان انا كافر يا سيدي ولو ان حتى المتدينين المفروض يكونو عرفو ان الحكم الديني خراب على اي بلد و العراق مش بعيد

و موقف شيخ الازهر هو دليل على ان الدين لما بيخش في السياسة بيبقى شكلو مش قد كده خالص يعني



و انا مش داخل اتشاقى يا أستاذة جبهة .انا داخل اقدملكو وجهة نظر مختلفة شوية و بقدمهالكو لاني بحترم كلامكو و معجب بيه و متخيل اني بنقطتي بدي بعد ما لطريقة تفكيركو

مع خالص احترامي

Anonymous said...

الاخ الكافر
انا مش عارف هو الاخ عاكف اوحش من جمال في ايه؟؟ في الفساد مثلا..؟ في الوساطة والمحسوبية..؟ في الاكل المسرطن والمياه الفاسدة واصحابه المحتكرين..؟ ولا يمكن احسن منه في المعتقلات والسجون واحترام الراي الاخر ..؟ ولو انت واخد شيخ الازهر مثال للدين ولذلك انت كافر وبتطالب بابعاد الدين فأظن ان بنفس المنطق احنا نلغي الشرطة بعد كده علشان حبيب العادلي واللي بيعمله

Anonymous said...

توضيح بسيط جدا علي التعليق السابق
انا مبكفرش حد ولا حتي بحب اشتم في اي حوار - لكن ممكن اشتم في اوقات تانية - ولكن هو اللي بيقول علي نفسه كده

Anonymous said...

انا مش معاكي اوي في كل افكارك لاني المشكلة مش مشكلة ديون المشكلة مشكلة عقول ناضجة واعية الفلوس اخر حاجة ممكن نفكر فيها انا مختلف معاكي في الراي