سامعين الأغنية الكئيبة دي؟
أهي دي بقى أنا قلبت الدنيا عليها
مش مشهورة في مصر بس مشهورة في الشام جدا
وبيحبوها قوي زيي
أصل فيه صديق قال لي إنه بطل يدخل المدونة عشان أغنية ليالي الشمال
لأنه رغم حبه ليها إلا إنها بتكئبه وهو مش ناقص حزن زي ما قال لي
طبعا أنا ما هانش عليا زعله
حطيت له الغنوة الكئيبة دي
اللي أخيرا لقيتها
أصل انا بتش كئيبة كئيبة كئيبة
أظن المدونة تتحدث عن نفسها
مش عارفة ايه سر كآبتي
يمكن عشان اتربيت في العراق خمس سنين من سن سنتين ونص لسبع سنين ونص
وشربت من فراتها
فيه حاجة الظاهر في الفرات بتخلي الناس كئيبة ودموعها قريبة قوي
زي ما فيه حاجة في النيل بتخلي الناس تضحك على طول حتى في الهم
بس انا بقى اتربيت على الفرات والنيل وعملوا لي قافلة
يعني لما افرح قوي اعيط ولما ازعل قوي اقول نكت
وكتير جدا باضحك واعيط في نفس الوقت
مش كتير
انا دايما باضحك واعيط في نفس الوقت
ما انا واخدة بقى من النيل للفرات
يعني لو اسرائيل اخدت خبر بيا ح تمثل بجثتي
مش مهم المهم تبقى جثة ما ابقاش عايشة
انا حاطة على جنب الموقع اللي لقيت اغنية مافي حدا
لو عايزين اغاني تانية احطها ع المدونة قولوا
ح اجمع تصويتات وفي الاخر ح احط اللي انا عايزاه
اصل انا ديمقراطشية ديمقراطشية موت
زي الحكومة كده
انت قول اللي في نفسك وانا ح اعمل اللي على كيفي
رحت اقول لماما: يا ماما اخيرا لقيت مافي حدا وحطيتها ع المدونة
قالت لي: عتم وطريق وطير طاير ع الهدا؟
قلت لها : آه حطتها للناس عشان لما يفتحوا المدونة يسمعوها
قالت لي: يا ساتر يا رب
قال الاغنية دي يا ساتر صحيح؟
11 comments:
عزيزتي نوارة .... لا هو بالمجمل بما اني من عشاق فيروز لما لاقيتك حاطة اغنية ليالي الشمال صارت مدونتك مفتوحه دايما انا بالشغل انا بالبيت يعني عشان اسمعها اكتر ... لا شوفي احنا شعب بنحس بالنكبه مع الاغاني مثلا انا بحس بالنكبة مع اغنية هاي الحنطور و اتحنطر , مش بس نكبة و اكتئاب اصلها يا اختي قنبلة الموسم ع راي احد الشباب المحترمين ... ع كلن انا بثق بذوقك بالكتابه بالتالي لن اختلف في ذوقك الموسيقي يا ديمقراطشيه انتي
بالتوفيق ,, مودتي دوما ندى
انتي فين يا شيخة
عموما انا مش باحط غير فيروز
ممكن ابقى احط زياد
بس انا فيروزية نمرة واحد
دي من أحب الأغنيات لقلبي يا نوارة
وانت عارفة .. انا فيروزي حتى الثمالة
ـ انا حطيتها يومين في المدونة .. قبل فترة
ـ شكرا يا صديقتي
انا كمان بثق بذوقك .. يا ديمقراطشية
joe
الحمد لله انك ما انتحرتش والا كنت قتلتك
ههههههههه
ما هو أنا حسبت الحساب ده
شيخة؟؟ اه انتي بتكرهيني و عاوزة تتهمنني اني اخوان و النبي يا سعاده الباشا هي الي بتقول شيخه مش انا ... اصل الايام دي برضك عندنا المشيخة تهمه
احيي فيروزيتك ....
بالتوفيق
أولا الوالده عندها حق .. ثانيا .. بتضحكى و تبكى فى نفس الوقت ؟؟ ممممممممم .. و الله حكاية التبرير بأنها النيل و الفرات دى مش داخله دماغى قوى .. متهيألى كده و الله أعلم أن التفسير العلمى للحاله دى أسمه العته الذهولى .. أو بالعاميه .. الجنان السفرتأى .. و عموما فى أى حاله دمك خفيف ..
و طالما المسأله طالبه فيروز .. سمعينا الجديد بتاعها .. يعنى من أول معرفتى فيك و طالع
انا الاغنيه مش شغاله عدنى عموما بس انا متاكد انها نكديه جدا بكا ان العينه ابتدت بليالى الشتا الطويله عموما انا عندى اغنيه كئيبه فشخ بتاعه شاديه والله يا زمن لو عوزاها جوليلى على الميل بقى يلا شاو.يحيى
يا سلام طب ده كفاياكي فخرا يا بنتي إنك فيروزية هو في أجدع من كده بقول عايزين حد يصمم بانر للفيروزيين اللي زي حالاتنا
و بعدين أنا زعلان إنك سيلتي ليالي الشمال لأني بحبها جدا
عزيزتي جبهة التهييس الشعبية
كلما زرت مدونتك أتذكر
الجبهة الشعبية لتحرير فلسطين
هل أنت ثورية منها؟
هل تنوين خطف الطائرات الأمريكية من أجل تحرير العراق؟
هل أنت ليلى خالد؟
هل تنوين إقامة دولة قومية عربية من النيل للفرات؟
هل تغيرت حدودها ألم تكن من الخليج للمحيط؟
أم أن حدود طموحك من المية للمية ؟
يعني من نهر الأردن للبحر المتوسط
عارفة يا نوارة
الأغنية بقدر ما تثير الحزن ويحاول المرء مغالبة دموعه وهو يسمعها الا أنها أيضا تثير الأمل حين يتذكر الانسان أن بغداد رماها التتار بالدمار وقتلوا من أهلها الألاف وعادت من جديد لتعلن التتار والعلقمي ودمرت في حرب السنوات الثماني ولكن أبناؤها ومهندسيها أعادوا تشييدها في ستة أشهر فقط لا غير، ان من يعرف تاريخ عاصمة الرشيد يعلم يقينا ان ستنهض من تحت الركام يوما ما باذن الله وسيغسل وجهها القمر :)
Post a Comment