هو الخليفة المأمون كان شيوعي وللا سعودي وللا امريكاني؟

من يجي خماشر تلاتاشر سنة كده

قابلت واحد اسمه صبري كوشي

كان مفتي ألبانيا

هو الحقيقة كان كبير قوي يعني زمانه مات

خصوصا انه اتعذب كتير من قبل الحكم الشيوعي

حكى لي حكايات سمعتها كتير عن الحكم الشيوعي

في يوغوسلافيا والاتحاد الزفتتي

عاتشي يعني

مش القصة قصة تعذيب

القصة الرغبة العارمة اللي عند البشرية

في انهم لازم يقنعوك غصب عنك

باللي هم مقتنعين بيه

زي الله يرحمه الخليفة المأمون

اللي عجبته فكرة خلق القرآن

وقرر هو والخلفاء من بعده

ان الناس لازم تقتنع بخلق القرآن

واللي ما يقتنعش عذبوه لحد ما يقتنع

الناس تحت الحكم الشوعوعي

واللي منهم صبري كوشي

الله يرحمه عايش بقى وللا ميت

لازم يكفروا بالعافية

الراجل كان بيضحك وهو بيقول لي ان سجانينه اغبيا

:وبيقول

يعني مثلا يمنعوا المياه ويستبدلونها بالخمر

طيب انا مسلم

وفي الاسلام اذا لم يتوفر ماء للشرب

ولا يوجد غير الخمر

يحرم علي الا اشرب الخمر

ذلك حفظا لحياتي

وكانوا بيقولوا له ان الخبز اللي بياكله معجون بدهن الخنزير

يعني سواء هم فعلا عجنوه بدهن الخنزير وللا لا

المهم انهم كانوا بيكدروه

طيب ما برضه لو مافيش غير دهن الخنزير ياكله

واجب عليه ياكله

وفي رمضان كانوا بيدخلوا عليه ويفتحوا بقه بالعافية

ويدلقوا فيه خمرة عشان قال يفطروه

والراجل بعد ما يمشوا كان بيكمل صيام عادي

وبيخبي حتة بصل من الفطار بتاع الصبح

عشان يفطر عليها في المغرب

وكان بيصلي بعنيه لان السجان لو ظبطه بيصلي ح يعذبه

ولان مافيش مياه كان بيتيمم

يعني قضى سنين طويلة وهم فاهمين انهم

مانعينه من الايمان ومن الشعائر

وهو كان الايمان مستقر في قلبه

وادى كل شعائره وبيقول انه مافاتش عليه رمضان واحد

من غير ما يصومه

لان السجان ما يعرفش: رفع عن امتى

السهو والخطأ وما استكرهوا عليه.

وقضى عشرين سنة في السجن بيصلي ويصوم ويؤدي كل الفرائض

ويقينا قبلت

وخرج وهو اكثر ايمانا وبقى مفتي البانيا في ذلك الحين يعني من 13 سنة

والحكايات دي سمعناها كتير

في شهادات المؤمنين اللي كانوا تحت الحكم الشيوعي

على الجانب الاخر بقى

فيه في السعودية

بلد اسمها القسيم

بياخدوا فيها الغياب في الجوامع

واللي يغيب يروح له البيت ويضربوه

واحدة من سكان القسيم بتقول لي

ان عدد كبير جدا بيروح يحضر الصلاة من غير وضوء

بالعند

وفيه منهم مش بيقول صيغة الصلاة وهو بيصلي غصب عنه

وفيه منهم بيتمتم بكلام فيه سخرية

يعني

عندي سؤال

ليه الغباوة دي؟

ايه الهدف منها يعني؟

يعني مافيش قوة في الدنيا تقدر تجبر المؤمن على عدم الايمان

ومافيش قوة في الدنيا تقدر تجبر غير المؤمن على الايمان بالعافية

هم بقى مش عارفين كده؟

مش بس كده

اذا كان هدف الناس اللي بتفرض عقيدتها بالقوة

انها تبسط سيطرتها

فهم لازم يعرفوا ان مع اول فرجة في الشباك

ح يطلع عليهم النمل من كل حتة وياكلهم

زي ما حصل للاتحاد الزفتتي

وما حدش بقى يقول لي امريكا وما عرف ايه

الناس ما صدقت الحكم الشعوعي غار من قفاها

زي ما حي يعملوا فرح لما الحكم السعودي يغور

هي ليه حاجة ملحوظة في الطبيعة البشرية

اننا بنفكر ازاي نئذي اعداءنا اكتر ما بنفكر ازاي نخدم مصالحنا

يعني انا كمواطنة

كفرد

ايه مصلحتي في اني ابقى محاطة بالنصابين؟

ما هو المنافق تعريفه البلدي انه بيني ادم نصاب

والحقيقة ان الحياة بتوفر لنا

او على الاقل بتوفر لي

عدد لا بأس به من النصابين

الماهرين

وربنا خلق العبط اللي زي

عشان النصابين يسترزقوا

وانا بقى اخد ثواب

ان شاء الله اخد ثواب يعني

كل واحد بيتحاسب على قد مخه

طيب اذا ربنا خلق ناس

بالسليقة كده عندهم هواية النصب على المخاليق

ايه بقى مصلحتنا في اننا

نجبر ناس تانية مالهاش مزاج تنصب

على انها تنصب؟

حد جرب قبل كده يتنصب عليه؟

اللي جرب ح يعرف قد ايه الواحد لما بيتنصب عليه

دمه بيتحرق وبيبقى عايز يولع في الكون من كتر الغيظ

طيب يعني الحمد لله

احنا لسة ما بنفطرش الصايمين بالعافية

ولا بناخد الغياب في الجوامع

بس بعد قانون الارهاب

الواحد خايف يبقى زي العراق ايام

الرئيس الشهيد الولي الصالح

صدان

اللي العيال وهم بيذاكروا في البيت

لما يوصلوا لاسمه في الكتاب يقوموا يقفوا ويصقفوا

اه وربنا

الواحدة تبقى قاعدة في بيتها

وفجأة تلاقي ابنها اللي عنده عشر سنين

وقف مرة واحدة قعد يصقف لوحده

طب استفاد ايه بقى؟

يعني لما خلا الناس تعلق صورته بالغصب في البيت

عرف يخليهم يحبوه بالعافية؟

اول ما جات لهم فرصه

ضربوا تمثاله بالجزم

واكيد هو عارف انه كان مكروه

بدليل انه طلب تسليمه للامريكان مش للعراقيين

طيب من اول الخليفة مالمأمون

لا

من اول يزيد اللي اخد بيعته غصبانية واقتدار

لحد الاتحاد الزفتتي وصدان والقسيم

كل دول اغبيا؟

كل دول ما كانوش بيفكروا في مصلحتهم

قد ما بيفكروا ازاي يرازوا الناس ويقرفوهم؟

ومن الاول اللي منعوا البهائيين انهم يعلنوا عن نفسهم

مرورا باللي سجنوا كريم عامر

وانتهاءا بقانون الارهاب

الامريكي من الطراز الاول

كل دول ما عندهمش هدف في الحياة

غير انهم يملوا لنا البلد نصابين

عشان امثالي من البهاليل والمهابيل

يتنصب عليهم لحد ما يجيلهم التهاب رئوي من كتر الريالة اللي نازلة على صدرهم

وفي الاخر برضه ح ينضربوا باوسخ واقدم جزم

وعجبي

: ملحوظة

البشر زي ما بيحبوا يقهروا بعض

ما بيكرهوش حاجة قد ان حد يقهرهم

بدليل ان الاتحاد الزفتت ما يعرفش يرشي الناس بالمستوى المعيشي المرتفع

والتقدم العلمي والحضاري

والخليفة المامون ما يعرفش يرشي الناس بالنهضة العلمية والثقافية

والسعودية مش عارفة ترشي المواطنين بالفلوس الكتير

فما بال اللي مجوعنا ومسففنا التراب