واجبي القومي يحتم عليا تحذير كل الشيباب

لسه قافلة التليفون مع واحد صاحبي واستأذنته ان احكي الحكاية مدام من غير اسماء وحتى لو قلت اسمه الاولاني ماحدش حيعرفه لانه من وسط تاني غير وسط التدوين، المهم، طبعا انا مسحت بيه البلاط، ثم نصحته، ثم عمل بنصيحتي، ثم جابت نتيجة والحمد لله وربنا ستر

الحكاية وما فيها ان الافندي مصاحب بنت زي الفل، حلو كده؟ راح زيه زي اي شاب مصري طفس الساحل الشمالي مع صحابه ومعاهم فتيات شريفات عفيفات

اولا سافر الساحل من غير ما يقولها عشان عامل عملة

ثانيا واخد بنات

ثالثا وهي الغلطة الاكبر قعدت تتصل بيه طول اليومين والافندي عشان عامل عملة ايه اللي حصل؟ ما بيردش.. الحمار ما بيردش

رابعا بعد ما راحت السكرة وجات الفكرة اكتشف انه عمل عملة سودا انه ما ردش عليها، قام الجبان خايف يتصل بيها لتنفجر في وشه

طيب يا فتح الله ما اتصلتش بيها ليه حتى تنقذ ما يمكن انقاذه؟

قال لي سايبها تهدا

انا مش فاهمة هم كل الرجالة اغبيا كده ليه؟

نداء انساني الى كل اصحاب القلوب الرحيمة: ما تسيبوش الستات تهدا ابدااااااااااااااااااااااااا

اوسخ حاجة ممكن تعملها في حياتك انك تسيبها تهدا

لانها مش بتهدا، كل ساعة بتعدي عليها وانت عامل عملة ومش بتكلمها بتكبر الموضوع وخيالها بيشتغل: واه طبعا، تلاقيه قاعد مبسوط دلوقت مع صحابه، يا سلام؟ للدرجة دي ولا على باله؟ هو ما صدق وللا ايه؟ طبعا تلاقيه مع الاشكال اللي بيلمها من الشوارع

(مش محتاجين نشرح ان اي بنت انت تعرفها حتى لو اختك في الفترة دي هي واحدة من الشارع طبعا)

طب ليه كده الغباوة دي؟ ليه؟

طاب طاب... من غير تقطيم.. وبما اني عارفة ان المرض ده مستشري بين الرجالة المصريين بالتحديد، كام نصيحة كده حطها حلقة في ودنك الله يخليك واسمع كلامي وعلى ضمانتي وشيل لي اني طلعت اسرار العائلة النسوية برة والستات حيشرحوني على اللي حاقوله ده بس برضه انتوا مالكوش اخوات صبيان؟

1- تحت اي ظرف مافيش حاجة اسمها ما تردش عليها، حتى لو عارف انها بتتصل بيك عشان تشتمك

وماله؟ اسمع الصرختين والشتيمتين وانت ساكت، وبعدين قول لها طب ممكن نتقابل عشان نتفاهم؟ وخلاص كده الموضوع خلص انتهينا

التبعات اللي حتحصل لك على اثر الرد على تليفونها وانت عامل عملة اخف بكتيييييييييييييييير من المصايب اللي حتحصل لك لما ما تردش عليها

بجد حتكهرهك بعد شوية.. انا باتكلم بامانة

2- تحت اي ظرف ومهما تكون عملتك سودا، ما تجيش تكحلها تعميها، ما تنيمهاش زعلانة ابدا، مافيش حاجة اسمها سايبها تهدا، ما بتهداااااااااااااااااااااااااااااااش ما بتهداااااااااااااااااااااااااااااااااااااااااااااااااااااااش بتتجنن اكتر ومش بقى كل يوم بيعدي بتتجنن اكتر، ده في الاول كل تلات ساعات، بعدها كل ساعة، بعدها بشوية كل نص ساعة وهكذا دواليب لحد ما تبقى في حالة هيستيريا وخلاص انسى بقى

مافيش جريمة شنعاء نكراء ممكن ترتكب في حق اي واحدة قد الاهمال والتجاهل، شوف، ولا الخيانة حتى، ايوة ايوة، انت خايف ترد او سايبها تهدا، هي ما بتبصلهاش كده، هي شايفاها اهمال وتجاهل وولا على بالك وبتتصرمح مع الاشكال اللي بتعرفها 

وكل ما الوقت بيمر كل ما بتحس انك بتقولها انت صرصارة ولا تسوي... حتئذيك

تعمل ايه؟ الحاجة الوحيدة اللي تخليها تهدا انك في اليوم اللي عملت فيه العملة السودا تفضل تتصل بيها تتصل بيها تتصل بيها وتزن تزن تزن، وكل ما زنيت اكتر كل ما هي كده بتهدا اكتر، ويا سلام بقى لو تبدع، بتاع عشرين ميسد كول على سبعتاشر رسالة (حل الكيس شوية بلاش دناوة) على تسع ميلات، على تتصل بيها من تليفونات ما تعرفهاش، استموات بقى

طبعا في الاخر حترد عليك.. خلاص كده المشكلة اتحلت، مش مهم ردت قالت ايه؟ حتى لو ردت وقالت لك انا مش قلت لك ما تتصلش بيا تاني؟ خلاص مش حينفع الموضوع، انا مش عايزة اشوفك..إلخ إلخ إلخ، مش مهم بتقول ايه؟ المهم انها ردت

حترد عليها الرد المعتاد: طب ممكن اشوفك ونتفاهم؟

وياسلام يا سلام لو في نفس اليوم اللي اتقفشت فيه تروح لها تحت البيت.. خلاص كده وفرت على نفسك كتير

3- مافيش حاجة اسمها: دي غلبانة والقطة تاكل عشاها، او دي عيلة ما تعرفش حاجة، احم... انا مضطرة اقول ان الستات مفطورين على الاذية، مش القاعدة انها ماشية تئذي عمال على بطال، بس لو ضايقتها قوي وحسستها انها صرصارة انت كده بتستحث جين الاذية فيها وبتضطرها تفهمك انها مش صرصارة وان انت اللي صرصار، والله لو عيلة عندها خمستاشر سنة، وتجاهلتها واهملتها حترقد لك وتمشيك بعد كده تكلم نفسك وحتعرف ازاي تئذيك، مافيش موديل للاذية طبعا كل شيخ وله طريقته، بس الحقيقة العلمية ان كل الستات مؤذية قوي لما تحب تئذي

طب ليه الغباوة دي؟ ما تخليك حلو

طب ده انا باشوف رجالة صيع والله العظيم، يبقى لازق البت على قفاها وملبسها السلطانية وهو اللي سايبها كمان وغادر بيها وهي عاملة زي القطة السيامي معاه... ما تسألوهم العيال دي بتعمل ايه؟ عارف بيعمل ايه؟ مش بيهملها حتى وهو بيسيبها مش بيحسسها انها مهملة ولا مش مهمة ولا مش على باله ولا متجاهلها، ويقعد يستموت كده، ومهما تعمل فيه يفضل ساكت، وتقول له انزل دلوقت - وهم سايبين بعض - ينزل، وتتصل تشتمه يقعد يسمع ولو اتصلت خمسين مرة يرد وهي مش بتضيف يعني بتشتم برضه.. خلاص شوية وفعلا حتخلص اللي عندها وتهدا وتبقى ميت فل وسبعتاشر وكده اتقيت شرها بدل ما تحطك في دماغها وفجأة تبقى مش عارف الضربات جاية لك منين، وكله حيبقى من تحت لتحت ومش حتعرف تمسك عليها حاجة وتمشي تكلم نفسك يا ولداه

الا هل بلغت؟ اللهم فاشهد... انا برضه عندي ولايا رجالة وما يهونش عليا

ربنا يستر على البهدلة اللي حاشوفها من البنات على الاسرار اللي طلعتها دي