صح والله صح.. وغير الازواج كمان لولا الملامة

ميدو جاب لي الخبر ده، وانا شايفة ان عنوان الخبر غلط، مش النساء المصريات الاكثر ضربا لازواجهن

المفروض: المصريون الاكثر استحقاقا للضرب بين الرجال  في العالم

فعلا والله فعلا، اه ستات كتير بيفقدوا اعصابهم وكتر خيرها مش بترميه من الشباك

ورجالة كتير فعلا يستاهلوا الضرب، ازواج وغير ازواج والله في مصر هنا

انا دايما لما اتضايق من حد اقعد اتخيل اني ضربته وللا اتخانقت معاه عشان اهدا، عمري ما تخيلت اني بارمي حد من الشباك او باولع فيه الا اذا كان راجل مصري، عمري ما تخيلتها على ستات مع اني اتخانقت مع ستات كتير في خيالي، بس كل الخناق كان بالكلام واني افهمها غلطها، وعمري ما تخيلتها على رجالة مش مصريين

وكنت فاكرة نفسي فريدة وحيدة، ارتضح ان فيه ناس كتير كده والله، سألت، فيه ناس كتير بتتخيل الانتقام وناس بتنفذه وكلهم بيضربوا الرجالة يا في خيالهم يا في الحقيقة

التقرير بيقول العشوائيات اقل بسبب ان الستات اقل جرأة في العشوائيات انها تقول انها ضربت جوزها

بس كتير قوي في العشوائيات بيضربوا اجوازهم، بيبقى متلقح في البيت، وهي بتشتغل، وياخد فلوسها يشرب بيهم ويضربها، طب تضربه وللا ما تضربوش؟ كتر خيرها انها ما بتقلش عقلها وتقتله عشان ما يتحسبش عليها بني ادم وتتحبس بجريرته

بس جدعان الستات المصريات

keep up

السنة الجاية عايزة النسبة 90 في المية، وبعد كده اقتصروا وربوا ولادكوا، مش تروحي تفهميه انه فرخة بكشك، وان اي ست اجنبية حتشوفه حيغمى عليها

صح حيغمى عليها من ريحة شرابه

بطلوا الدلع اللي بتعملوه في الصبيان ده كله منكوا انتوا كمان وترجعوا تغنوا ظلموه

طلعيه راجل

ويغسل المواعين

ويلم الغسيل

ويتعود يعتمد على نفسه

ولما يغلط يعتذر ويقول انا اسف، ويقول انا اسف قدام الناس

ولما يغلط يواجه اللي غلط في حقهم ما يهربش 

ولما يبقى عامل عملة ما تروحيش تزعقي له وبعد شوية "ما يهونش عليا" وتروحي انت تهزأي نفسك وتصالحيه يقوم يستهتر بيك ولما ما يحترمش امه ما يعرفش يحترم حد في الدنيا بعد كده ولا نفسه حتى

ونزليه الشارع

ويشتري لك حاجات

ومافيش حد حياكله يا امورة بطلي الخضة دي

وماهواش فرخة بكشك ولا حاجة

وما يقعدش على البساط وياخد ست البنات

وفيه زيه كتير على فكرة مافيش حاجة اسمها: هو انت فيه زيك؟ فيه زيه واحسن منه

واي جميلة او خدمة تعمليها معاه ماهياش حق مكتسب ومش واجب عليك

ويتعود يشكر الناس لما حد يعمل معاه دقة جدعنة

وما يتمرعش على الناس اللي بتعامله كويس.. يتأدب معاهم

وما يبقاش شبشب للناس اللي بتديله بالجزمة.. يبقى عنده كرامة

ويحس يحس على دمه

يتعود يبقى حسيس ويحس بغيره وبتعب غيره

ويبقى بني ادم

بني ادم

ربوا عيالكوا يا نسوان بدل ما تيجي نسوان تانية يربوهم وهم شحطة بشنبات

هو مين في الدنيا بتبقى مبسوطة لما بتضرب جوزها؟ 

حاجة تقرف